⪡ 1فَبَكَّرَ يَشُوعُ فِي الْغَدِ وَارْتَحَلُوا مِنْ شِطِّيمَ وَأَتَوْا إِلَى الأُرْدُنِّ، هُوَ وَكُلُّ بَنِي إِسْرَائِيلَ، وَبَاتُوا هُنَاكَ قَبْلَ أَنْ عَبَرُوا. عرفنا إن موسى مات في شرق الأردن وسلم القيادة ليشوع في هذا المكان بعد رحلة الأربعين سنة، وكان أول خطوة المفروض يشوع يقوم بيها هي عبور الأردن علشان يدخل الأرض اللى ربنا اديهالهم.
وبعد التمهيد اللى حصل في الإصحاح الأول والتاني تيجي الخطوة الأساسية في كل السفر وهي عبور نهر الأردن، علشان يدخلوا ارض الميعاد.
الإصحاحين الثالث والرابع بيتكلموا عن كل أحداث العبور وكل الملابسات اللى حصلت في الأحداث دي.
الإصحاح الثاني انتهى لما الجاسوسين اللى يشوع أرسلهم رجعوا من عند راحاب وقالوا ليشوع: اطمن لإن ربنا دفع الأرض لينا لإن كل سكان الأرض ذابوا لما سمعوا خبرنا.
يشوع كان عايل الهم ازاى هيدخل اريحا فالجاسوسين دول رجعوا قالوله: ده سكان اريحا دول مرعوبين منك.
هنشوف رد فعل يشوع في الآية الأولى من الإصحاح الثالث
فبكر يشوع يعني قام بسرعة لإنه خلاص حس إن الطريق مفتوح قدامه.
دي علامة النشاط والجدية في اتمام العمل، شطيم دي كانت اخر محطة في الرحلة، وهناك موسى سلم القيادة ليشوع وشطيم دي كانت مكان الخطية ومكان اللعنة، لما بالاق استأجر عليهم بلعام علشان يلعنهم ولكن ربنا حول اللعنة لبركة، ولما فشل بلعام في إنه يلعنهم قال لملك موآب: هات بنات موآب يغرو شباب اسرائيل ولما يقعوا في الخطية ربنا هيتخلى عنهم.
وفعلا جاب بنات موآب وأسقط بني اسرائيل في الخطية وعشان كده ربنا غضب عليهم واهلك ناس كتير في هذه المحطة، فكانوا محتاجين إنهم يسيبوا الأرض دي المليانة بالخطية واللى بتفيض باللعنة والسقوط في الزنا والخطية علشان يدخلوا الأرض الجديدة اللى بتفيض بالقداسة.
في الإصحاح الأول قلنا هينتظروا 3 أيام وبعد كده هيقوموا بعملية العبور طب ليه او اشمعنا؟
الـ 3 أيام دي رمز للقيامة لإن الحدث اللى هيحصل دلوقتي هو ممثل القيامة بتاعة المسيح.
كل أحداث العبور اللى هنتكلم عنها في الإصحاح الثالث وفي الإصحاح الرابع تشير بدقة إلى سر المعمودية، فالـ 3 أيام دول يرمزوا إلى الموت والقيامة مع المسيح.
فالمعمودية هي موت وقيامة، الـ 3 أيام دول يرمزوا إلى الثالوث الآب والابن والروح القدس، فالمعمودية بتكون على اسم الثالوث.
الـ 3 أيام دول بيرمزوا ايضا إلى الـ 3 غطسات اللى ابونا بيغطسهم للطفل وهو بيعمدوا، علشان كده ابونا بيقول اعمدك يا فلان باسم الآب والابن والروح القدس وبيغطسه.
خلينا عارفين دايما إن رقم 3 هو تمجيد للثالوث.
2وَكَانَ بَعْدَ ثَلاَثَةِ أَيَّامٍ أَنَّ الْعُرَفَاءَ جَازُوا فِي وَسَطِ الْمَحَلَّةِ، 3وَأَمَرُوا الشَّعْبَ قَائِلِينَ: «عِنْدَمَا تَرَوْنَ تَابُوتَ عَهْدِ الرَّبِّ إِلهِكُمْ وَالْكَهَنَةَ اللاَّوِيِّينَ حَامِلِينَ إِيَّاهُ، فَارْتَحِلُوا مِنْ أَمَاكِنِكُمْ وَسِيرُوا وَرَاءَهُ. بيقول لهم لما تشوفوا التابوت بيتحرك امشوا وراه، والقيادة هنا مش هتبقى مبنية على يشوع ولكن القيادة مبنية على التابوت اللى هو بيمثل حضور الله، ويمثل ايضا شريعة ربنا لإنه جوه التابوت كان في لوحي الحجر اللى كان عليهم الوصايا العشرة، وده يعلمنا حاجه مهمه وهي إن القائد بتاعنا يبقى ربنا وإننا نحط الكتاب المقدس قدامنا ونمشي وراه.4وَلكِنْ يَكُونُ بَيْنَكُمْ وَبَيْنَهُ مَسَافَةٌ نَحْوُ أَلْفَيْ ذِرَاعٍ بِالْقِيَاسِ. لاَ تَقْرُبُوا مِنْهُ لِكَيْ تَعْرِفُوا الطَّرِيقَ الَّذِي تَسِيرُونَ فِيهِ. لأَنَّكُمْ لَمْ تَعْبُرُوا هذَا الطَّرِيقَ مِنْ قَبْلُ». ولكن يكون بينكم وبينه مسافة نحو 2000 ذراع بالقياس، الفي ذراع والذراع حوالى 50 سم يبقى المسافة هتكون حوالي 1000 متر بينهم وبين التابوت.
رقم 2 في الكتاب المقدس يشير إلى الحب احنا اخدنا رموز كتيرة في الكتاب المقدس قبل كده، ومنها:
- رقم 7 يشير إلى الكمال.
- رقم 8 يشير إلى الحياة الأبدية.
- رقم 6 يشير إلى عدم الكمال.
- رقم 10 يشير إلى الكمال.
- رقم 2 يشير إلى الحب باعتبار إن الحب بيكون متبادل بين اثنين.
- رقم 1000 يشير إلى الحياة السماوية.
وكإنه عاوز يقولهم إن الإنسان اللى هيدخل في سر المعمودية هو الإنسان اللى هيكون ليه امكانيات الحب بطريقة سماوية، ده تأمل رمزي شوية ولكن ممكن نستفيد منه.
قالهم تخلوا في مسافة بينكم وبين التابوت، طب ليه؟
أولا: علشان ميزحموش التابوت لإنهم لو كانوا ماشيين معاه على طول، ممكن يزقوا الكهنة ويزحموهم وهما ماشيين في الطريق.
ثانيا: عايز يقول لهم نقطه مهمة جدا وهي إن في فاصل بينهم وبين ربنا، الفاصل ده اللى كان موجود في العهد القديم محدش كان يقدر يقرب من ربنا، يعني حتى وأنتم ماشيين وراه هتعبروا النهر افتكروا إن في فاصل كبير بينكم، لكن بعد ما المسيح اتجسد في العهد الجديد كلنا نقدر نقرب، لكن في العهد القديم كان في مسافة بين التابوت وبين الشعب
ثالثا: علشان يشعروا برهبة التابوت وميستهونوش بالقدسية بتاعته، ولاحظ إن الصورة دي اختلفت لما المسيح جه ومشي على الأرض وكانت الجموع تزحمه، يبقى الصورة كانت مختلفة خالص في العهد القديم، التابوت كان بينه وبين الشعب مسافة 2000 ذراع يقال إنها تقدر تقريبا بكيلو يعني 1000 متر، لكن في العهد الجديد المسيح مشي في وسط الجموع وكانت الجموع تزاحمه، المسيح قرب لينا في التجسد.
رابعا: فايدة إن التابوت يسبقهم إنهم يعرفوا الطريق اللى ماشيين فيه لإن ده طريق جديد وهم أول مرة يمشوا فيه، ده هما طول عمرهم كانوا في ارض مصر فلما التابوت يكون ماشي قدامهم هيوضحلهم الطريق.
5وَقَالَ يَشُوعُ لِلشَّعْبِ: «تَقَدَّسُوا لأَنَّ الرَّبَّ يَعْمَلُ غَدًا فِي وَسَطِكُمْ عَجَائِبَ». يعني المشهد ده محتاج قداسة شخصية، يعني كل واحد يقدس حياته كويس جدا، طب ليه؟ علشان ربنا بكرة هيعمل عجايب. 6وَقَالَ يَشُوعُ لِلْكَهَنَةِ: «احْمِلُوا تَابُوتَ الْعَهْدِ وَاعْبُرُوا أَمَامَ الشَّعْبِ». فَحَمَلُوا تَابُوتَ الْعَهْدِ وَسَارُوا أَمَامَ الشَّعْبِ. 7فَقَالَ الرَّبُّ لِيَشُوعَ: «الْيَوْمَ أَبْتَدِئُ أُعَظِّمُكَ فِي أَعْيُنِ جَمِيعِ إِسْرَائِيلَ لِكَيْ يَعْلَمُوا أَنِّي كَمَا كُنْتُ مَعَ مُوسَى أَكُونُ مَعَكَ. هنا ربنا بيشجع يشوع مره تانية وبيقوله: بكرة لما تعبر بالشعب نهر الأردن هديلك الهيبة والعظمة بتاعة موسى، فمتخافش.
وكان ربنا بيرفع من معنوياته لإنه كان مقبل على حاجة هو مش عارف هتتحل ازاى، دلوقتي يشوع مش معاه عصاية ومش عارف هيشق المية ازاى زي موسى، لكن يشوع كان عنده الإيمان إنه هيعدي، فربنا بيقوله: متخافش الإيمان بتاعك ده هيعدي الشعب وانا هعظمك في اعين الشعب كمان بحيث إنهم يسمعوا ليك زي ما كانوا بيسمعوا لموسى.
هنا في نبوة عن أمر هيحدث بعد يشوع بمئات السنين وهو إن في المكان اللى بني اسرائيل عبروا منه ودخلوا ارض الميعاد هو المكان اللى يوحنا المعمدان كان بيعمد فيه الناس، والمسيح راحله وقاله: اسمح الآن وعمدني، وكإن ربنا اللى فتح الطريق زمان بتابوت العهد، ربنا يسوع المسيح جه في العهد الجديد يفتح نفس الطريق من نفس المكان.
طب ايه حكاية اعظمك في اعين جميع اسرائيل دي؟
قلنا إن يشوع يرمز إلى يسوع، واحنا بندرس طول السفر خلينا حاطين في دماغنا إن يشوع ده رمز للمسيح يسوع، لما الشعب عبر نهر الأردن تعظم يشوع في أعين الشعب في المكان ده، ولما المسيح جه اعتمد اتفتحت السماء وسمعوا صوت: هذا هو ابني الحبيب الذي به سررت.
يبقى في العهد القديم ربنا عظم يشوع، وفي العهد الجديد قال أكرم الابن بالصوت اللى قال عنه هذا هو ابن الحبيب الذي به سررت، يعني تمجيد يشوع في الحادثة دي كان رمز لتمجيد الرب يسوع وهو في نهر الأردن.
8وَأَمَّا أَنْتَ فَأْمُرِ الْكَهَنَةَ حَامِلِي تَابُوتِ الْعَهْدِ قَائِلاً: عِنْدَمَا تَأْتُونَ إِلَى ضَفَّةِ مِيَاهِ الأُرْدُنِّ تَقِفُونَ فِي الأُرْدُنِّ». 9فَقَالَ يَشُوعُ لِبَنِي إِسْرَائِيلَ: «تَقَدَّمُوا إِلَى هُنَا وَاسْمَعُوا كَلاَمَ الرَّبِّ إِلهِكُمْ». 10ثُمَّ قَالَ يَشُوعُ: «بِهذَا تَعْلَمُونَ أَنَّ اللهَ الْحَيَّ فِي وَسَطِكُمْ، وَطَرْدًا يَطْرُدُ مِنْ أَمَامِكُمُ الْكَنْعَانِيِّينَ وَالْحِثِّيِّينَ وَالْحِوِّيِّينَ وَالْفِرِزِّيِّينَ وَالْجِرْجَاشِيِّينَ وَالأَمُورِيِّينَ وَالْيَبُوسِيِّينَ. ايه الاسماء الصعبة دي؟
دول سبعة شعوب كانت بتستوطن أرض كنعان اللى هي فلسطين، فربنا كان وعدهم وقالهم إنكم لما تيجوا تملكوا الأرض هطرد من أمامكم كل الشعوب الغريبة دي، ربنا قال لبني إسرائيل في سفر التثنية:
"«مَتَى أَتَى بِكَ الرَّبُّ إِلهُكَ إِلَى الأَرْضِ الَّتِي أَنْتَ دَاخِلٌ إِلَيْهَا لِتَمْتَلِكَهَا، وَطَرَدَ شُعُوبًا كَثِيرَةً مِنْ أَمَامِكَ: الْحِثِّيِّينَ وَالْجِرْجَاشِيِّينَ وَالأَمُورِيِّينَ وَالْكَنْعَانِيِّينَ وَالْفِرِزِّيِّينَ وَالْحِوِّيِّينَ وَالْيَبُوسِيِّينَ، سَبْعَ شُعُوبٍ أَكْثَرَ وَأَعْظَمَ مِنْكَ،" (تث 7: 1).
يعني ربنا كان بيقولهم إن الشعوب دي أعظم منك في العدد وفي الإمكانيات وفي ... وفي ....
فهنا يشوع بيأكد على هذا الأمر، وهو إن ربنا هيطرد من أمامكم كل الشعوب اللى استوطنت الأرض دي (ارض كنعان).
11هُوَذَا تَابُوتُ عَهْدِ سَيِّدِ كُلِّ الأَرْضِ عَابِرٌ أَمَامَكُمْ فِي الأُرْدُنِّ. وكإن يشوع بيبث الحماس جوه الشعب ويقولهم: هو أنتم مين يقدر يكلمكم؟ ده سيد كل الأرض ماشي قدامكم.12فَالآنَ انْتَخِبُوا اثْنَيْ عَشَرَ رَجُلاً مِنْ أَسْبَاطِ إِسْرَائِيلَ، رَجُلاً وَاحِدًا مِنْ كُلِّ سِبْطٍ. 13وَيَكُونُ حِينَمَا تَسْتَقِرُّ بُطُونُ أَقْدَامِ الْكَهَنَةِ حَامِلِي تَابُوتِ الرَّبِّ سَيِّدِ الأَرْضِ كُلِّهَا فِي مِيَاهِ الأُرْدُنِّ، أَنَّ مِيَاهَ الأُرْدُنِّ، المِيْاهَ الْمُنْحَدِرَةَ مِنْ فَوْقُ، تَنْفَلِقُ وَتَقِفُ نَدًّا وَاحِدًا». 14وَلَمَّا ارْتَحَلَ الشَّعْبُ مِنْ خِيَامِهِمْ لِكَيْ يَعْبُرُوا الأُرْدُنَّ، وَالْكَهَنَةُ حَامِلُو تَابُوتِ الْعَهْدِ أَمَامَ الشَّعْبِ، 15فَعِنْدَ إِتْيَانِ حَامِلِي التَّابُوتِ إِلَى الأُرْدُنِّ وَانْغِمَاسِ أَرْجُلِ الْكَهَنَةِ حَامِلِي التَّابُوتِ فِي ضَفَّةِ الْمِيَاهِ، وَالأُرْدُنُّ مُمْتَلِئٌ إِلَى جَمِيعِ شُطُوطِهِ كُلَّ أَيَّامِ الْحَصَادِ، 16وَقَفَتِ الْمِيَاهُ الْمُنْحَدِرَةُ مِنْ فَوْقُ، وَقَامَتْ نَدًّا وَاحِدًا بَعِيدًا جِدًّا عَنْ «أَدَامَ» الْمَدِينَةِ الَّتِي إِلَى جَانِبِ صَرْتَانَ، وَالْمُنْحَدِرَةُ إِلَى بَحْرِ الْعَرَبَةِ «بَحْرِ الْمِلْحِ» انْقَطَعَتْ تَمَامًا، وَعَبَرَ الشَّعْبُ مُقَابِلَ أَرِيحَا. هنا بيتكلم عن اللى حصل بالظبط في العبور.
ربنا قال ليشوع: خلي الكهنة يتقدموا واول ما رجليهم تبدأ تلمس المية بتاعة النهر هتلاقي إن المية وقفت لوحدها، ودي يمكن معجزة أكبر من معجزة العصاية بتاعة موسى، هنا بمجرد ما الكهنة اللى شايلين التابوت هيلمسوا برجليهم المية هتقف، وفعلا الكهنة شالوا التابوت ونزلوا وبمجرد ما رجليهم لمست المية في نهر الأردن وقفت الميه بتاعته.
هنا الوحي بيأكد على كذا جزئية في نهر الأردن وبيأكد وبيبين قد ايه المعجزة كانت غريبة!
نهر الأردن ينحدر عن الشمال إلى الجنوب يعني المية كلها بتجري من الشمال للجنوب يعني المية هتكون نازلة بسرعة جدا، لإن المية نازله من على جبل المنبع بتاع نهر الأردن. ونازلة منحدرة بشدة وشدة الإنحدار كبيرة جدا بتاعة الأرض من الشمال إلى الجنوب.
- يبقى في انحدار كبير جدا،
- وفي سرعة في حركة المية،
- ونازله بقوه من فوق لتحت.
الأردن ممتلئ إلى كل شطوطه، طب يعني ايه الكلام ده؟
يعني المية في هذه الأيام كانت فايضة وعاملة فيضان في المناطق اللى حواليها، ربنا علشان يتمجد في المعجزة دي عبر بيهم في وقت فيضان، يعني مش وقت المية دي ناقصة او قليلة.
لما أرجل الكهنة اللى حاملين التابوت لمست المية وانغمست فيها المياه اللى نازلة من فوق وقفت، والمية اللى تحت نزلت لغاية الآخر.
يقول المفسرين كمان إنهم (الشعب يعني) عبروا في أعمق مناطق النهر، يعني في أعمق حتة في مجرى النهر.
ربنا جابهم علشان يعديهم، كان نهر الأردن ده يتميز بحاجة اسمها "مخاوض" طب يعني ايه؟
مخاوض يعني في حتت تلاقي المية منسوبها منخفض وفي شوية حجارة بارزة، فممكن اللى يشمر هدومه يقدر يتنطط على الحجارة ويعدي من شط لشط، هنتكلم عن مخاوض الأردن دي في سفر القضاة.
كان ممكن ربنا يعدي الشعب في الحتة دي، لكن هو عداهم في أعمق حتة في مجرى النهر علشان ربنا يتمجد.
16وَقَفَتِ الْمِيَاهُ الْمُنْحَدِرَةُ مِنْ فَوْقُ، وَقَامَتْ نَدًّا وَاحِدًا بَعِيدًا جِدًّا عَنْ «أَدَامَ» الْمَدِينَةِ الَّتِي إِلَى جَانِبِ صَرْتَانَ، وَالْمُنْحَدِرَةُ إِلَى بَحْرِ الْعَرَبَةِ «بَحْرِ الْمِلْحِ» انْقَطَعَتْ تَمَامًا، وَعَبَرَ الشَّعْبُ مُقَابِلَ اريحا.
يعني المية اللى جاية من بعيد دي خلاص وقفت هناك بعيد. وقفت عند مدينة اسمها أدام، المياه وقفت هناك يعني. والمنحدرة يعني المية اللى فلتت ونزلت موقفتش مشيت للآخر ما حد ما وصلت البحر هناك وانتهت.
عبر الشعب مقابل اريحا يعني قدام منطقة اريحا بالظبط. في آية قالها داود النبي في مزمور 114 عن الحادثة دي
"الْبَحْرُ رَآهُ فَهَرَبَ. الأُرْدُنُّ رَجَعَ إِلَى خَلْفٍ." (مز 114: 3).
يعني لما تابوت ربنا (تابوت العهد) جاء ووقف في وسط المية، الأردن خاف ورجع لورا. المياه اللى ربنا خلقها لم تحتمل إنها تقف قدامه فرجعت للوراء ووسعتله السكة. المزمور ده بيتكلم عن الحادثة دي، وبنقراه من ضمن قرايات عيد الغطاس لإن المسيح عندما جاء ووقف في نهر الأردن المياه برده لم تتحمل إن هي تشوف الخالق بتاعها في هذه الصورة المتواضعة.
هنلاحظ في: 15فَعِنْدَ إِتْيَانِ حَامِلِي التَّابُوتِ إِلَى الأُرْدُنِّ وَانْغِمَاسِ أَرْجُلِ الْكَهَنَةِ حَامِلِي التَّابُوتِ فِي ضَفَّةِ الْمِيَاهِ، وَالأُرْدُنُّ مُمْتَلِئٌ إِلَى جَمِيعِ شُطُوطِهِ كُلَّ أَيَّامِ الْحَصَادِ .. إن في إشارة طقسية حلوة وهي إنغماس أرجل الكهنة حاملي التابوت في ضفة المياه، يعني أول ما رجليهم لمست واتبلت كده في الميه راحت المية وقفت، وبدأت بركة ربنا تحل وتحصل المعجزة، علشان كده أبونا لما يجي يصلي على المية إذا كانت بتاعة المعمودية ولا بتاعة اللقان أول لما يجي يرسم يغمس الصليب في المية وده دليل إن البركة بتحصل بإنغماس الصليب زي ما حصل زمان بإنغماس أرجل الكهنة حاملي تابوت العهد في المياه.
ممكن حد يسأل ويقول طب هو ليه ربنا خلاهم يعبروا مرتين إذا كان عبور البحر الأحمر رمز للمعمودية؟
طب هل في إعادة للمعمودية عشان نعبر تاني نهر الأردن علشان ندخل ارض الميعاد؟
طب ما كان كفاية العبور الأول وخلاص؟
لما نيجي نعمل مقارنة بين عبور البحر الأحمر وبين عبور نهر الأردن هنلاقي إن الاثنين وجهين لعملة واحدة واللى هي المعمودية.
البحر الأحمر مياه مالحة، نهر الأردن مياه عذبة وبيحصل في المعمودية فعلين مرتبطين ببعض وهي خلع الإنسان العتيق ولبس المسيح، فخلع الإنسان العتيق ده تم في عبور البحر الأحمر اللى هي المياه المالحة، ولما نعدي في المياه العذبة أو في المياه الحلوة ده معناه إننا بنلبس الإنسان الجديد اللى هو المسيح، وده كان من خلال عبور الأردن.
يبقى إحنا منقولش إن دول معموديتين وإن في إعادة للمعمودية، لا، الكنيسة تؤمن بإن المعمودية واحدة، طب لما هي معمودية واحدة ليه عبروا مرتين؟
علشان تكمل الصورة بتاعة المعمودية، عبور البحر الأحمر كان خروج من الموت اللى كان موجود في ارض مصر، لكن عبور نهر الأردن كان دخول إلى الحياة الجديدة، فالمعمودية كده برده هي عبارة عن الخروج من الموت اللى كان محكوم بيه على آدم والدخول إلى الحياة الجديدة مع المسيح.
يبقي هنعتبر إن البحر الأحمر هو الموت ونهر الأردن هو القيامة والاتنين بيبقوا في المعمودية، موت وقيامة مع المسيح. المياه المالحة بتاعة البحر الأحمر هي الموت والمياه العذبة بتاعة نهر الأردن هي القيامة لكن المعمودية فيها الاثنين مع بعض يعني المعمودية فيها الموت وفيها القيامة.
17فَوَقَفَ الْكَهَنَةُ حَامِلُو تَابُوتِ عَهْدِ الرَّبِّ عَلَى الْيَابِسَةِ فِي وَسَطِ الأُرْدُنِّ رَاسِخِينَ، وَجَمِيعُ إِسْرَائِيلَ عَابِرُونَ عَلَى الْيَابِسَةِ حَتَّى انْتَهَى جَمِيعُ الشَّعْبِ مِنْ عُبُورِ الأُرْدُنِّ. يعني مش الكهنة عبروا وعدوا الناحية التانية، لا، ده المية وقفت وانفلقت قدامهم فالكهنة فضلوا واقفين في وسط المية لحد ما يعبر كل الشعب، وبعد كده التابوت يعدي آخر واحد بعد ما يطّمن إن كل الشعب عدى. يبقى التابوت مكنش سابق الشعب، لا، ده التابوت والكهنة اللى شايلينه وقفوا في نص المياه لغاية ما كل الشعب عدى وبعد كده راحوا عدوا هما كمان.
ونلاحظ هنا التابوت في البداية كان في المقدمة وده إشارة إلى إن المسيح سابق لأجلنا، فالمسيح أول واحد عدى في طريق الموت وانتصر على الموت وفتح لنا طريق الأقداس زي ما بولس الرسول بيقول، في نص العبور التابوت كان في وسط الشعب يعني كان في ناس عدت وناس لسه جاية من خلف، وده بيمثل المسيح الراعي الصالح اللى ماشي في وسط القطيع، لما الشعب كان عبر التابوت بقا في الآخر خالص وده بيمثل المسيح لما تجسد وصار آخر الكل آخذاً صورة عبد لما انحنى وغسل أرجل تلاميذه، يعني حط نفسه في آخر الصفوف.
يبقى كل مرحلة من مراحل التابوت كانت بتدي صورة عن حياة المسيح.
- المقدمة إنه سابق،
- في الوسط لأنه راعي لشعبه،
- في المؤخرة إنه وضع نفسه في آخر الصفوف وجعل نفسه في آخر كل البشر.
⪢