⪡ 1«فِي ذلِكَ الْيَوْمِ يَكُونُ يَنْبُوعٌ مَفْتُوحًا لِبَيْتِ دَاوُدَ وَلِسُكَّانِ أُورُشَلِيمَ لِلْخَطِيَّةِ وَلِلْنَجَاسَةِ. الاصحاح الـ 13 و 14، بيتكلموا عن الصليب.
"فِي ذلِكَ الْيَوْمِ" ... ده يوم معروف ومحدد. يوم الصليب.
"يَكُونُ يَنْبُوعٌ مَفْتُوحًا" ... الينبوع المفتوح: هو جنب يسوع المسيح له المجد. هو الدم والمية اللي اتفجروا وطلعوا من جنب ربنا يسوع المسيح له المجد.
ينبوع مفتوح: يعني مستمر. مش بيخلص.
ربنا يسوع المسيح له المجد، اتصلب مرة واحدة. لكن الينبوع ده مخلصش. كل يوم علي المذبح، بنأخد من الصليب. كل طفل بيتعمد في جرن المعمودية، بيتطهر في الدم والمية، اللي طالعين من جنب يسوع المسيح له المجد.
عمل الروح القدس في الكنيسة، ده من فعاليات الصليب. الكنيسة هتفضل ترتوي من الينبوع ده، الي المجئ التاني.
"لِبَيْتِ دَاوُدَ وَلِسُكَّانِ أُورُشَلِيمَ" ... بيت داود: داود الملك، هو من النسل الملكي. واحنا أولاد ربنا يسوع المسيح له المجد. أولاد الملك.
- مين اللي استفاد بالينبوع المفتوح بتاع الصليب؟ احنا، أولاد الملك، اللي استفدنا. صحيح ربنا له المجد اتصلب علشان العالم كله. لكن في ناس قبلت، وبقوا أولاد ربنا. وفي ناس رفضت خلاص ربنا ليهم.
"لِلْخَطِيَّةِ وَلِلْنَجَاسَةِ." ... الينبوع: هو الدم، دم يسوع المسيح له المجد، المسفوك علي عود الصليب. دم يسوع له المجد، هو اللي بيطهرنا من خطايانا. بيغسل خطايانا. "وَدَمُ يَسُوعَ الْمَسِيحِ ابْنِهِ يُطَهِّرُنَا مِنْ كُلِّ خَطِيَّةٍ."
- سر الاعتراف: عبارة عن غفران الصليب. هو معمودية متجددة. "اغسلني فأبيض أكثر من الثلج." احنا بنتغسل في دم ربنا يسوع المسيح له المجد.
فالخبر الحلو هنا: أن في العهد الجديد، هيبقي في ينبوع مفتوح. للخطية والنجاسة. بمعني: أي حد مهما كان غِلط، هيجي ينزل وهيطلع واحد جديد. وديه إشارة للمعمودية. وعمل الروح القدس، للغفران من غير حدود. طالما بنقدم توبة بجد من القلب.
فكان لازم تيجي النعمة. وده اللي قاله زكريا النبي في الاصحاح اللي فات. أن في ذلك اليوم: جنب فيض النعمة والتضرعات، والنظر الي الذين طعنوه. ... لأن هيطلع من الطعنة ديه، ينبوع ماء. هو ده ينبوع الغفران.
وزي ما يسوع له المجد، قال للسامرية: اللي يشرب من المية بتاعتي، مش بيعطش أبدا.
2وَيَكُونُ فِي ذلِكَ الْيَوْمِ، يَقُولُ رَبُّ الْجُنُودِ، أَنِّي أَقْطَعُ أَسْمَاءَ الأَصْنَامِ مِنَ الأَرْضِ فَلاَ تُذْكَرُ بَعْدُ، وَأُزِيلُ الأَنْبِيَاءَ أَيْضًا وَالرُّوحَ النَّجِسَ مِنَ الأَرْضِ. "وَيَكُونُ فِي ذلِكَ الْيَوْمِ، يَقُولُ رَبُّ الْجُنُودِ، أَنِّي أَقْطَعُ أَسْمَاءَ الأَصْنَامِ مِنَ الأَرْضِ فَلاَ تُذْكَرُ بَعْدُ،"... علي الصليب، ربنا يسوع المسيح له المجد، هزم الشيطان وكل قوات الظلمة.
"وَأُزِيلُ الأَنْبِيَاءَ أَيْضًا" ... الأنبياء الكذبة. روح الضلال. كل ده تم أزالته بالصليب.
- بالصليب: أخدنا موهبة الروح القدس. روح الإفراز والتمييز. تقدر تمييز التعليم الصحيح من التعليم الغلط والمُعثر المُتعب. الذي لا يوافق تعاليم الكتاب المقدس.
"وَالرُّوحَ النَّجِسَ مِنَ الأَرْضِ." ... احنا أصبحنا هياكل للروح القدس.
بالصليب يتقدس الإنسان. وتتقدس الكنيسة، التي هي جسد المسيح يسوع له المجد. بدمه.
3وَيَكُونُ إِذَا تَنَبَّأَ أَحَدٌ بَعْدُ أَنَّ أَبَاهُ وَأُمَّهُ، وَالِدَيْهِ، يَقُولاَنِ لَهُ: لاَ تَعِيشُ لأَنَّكَ تَكَلَّمْتَ بِالْكَذِبِ بِاسْمِ الرَّبِّ. فَيَطْعَنُهُ أَبُوهُ وَأُمُّهُ، وَالِدَاهُ، عِنْدَمَا يَتَنَبَّأُ. كانت عقوبة الأنبياء الكذبة في العهد القديم هي: الموت.
هنا في الآية: اللي بيموّت الأنبياء الكذبة، أبوه وأمه. ومعناها: أن عند ربنا، مش بنجامل حد. مش هنجامل حد علي حساب ربنا يسوع المسيح له المجد. ولا علي حساب الإيمان والعقيدة.
في العهد الجديد، طبعا مش المقصود: أن حد هيموّت حد. لكن المقصود: إننا بنرفض أي فكر غريب خاطئ، أيا كان مصدره.
إنسان لا يقبل الفكر الغريب. هو إنسان يتقدس، وبيعرف يميز التعاليم الصح من التعاليم الخطأ. وده عن طريق الروح القدس الساكن فينا.
4وَيَكُونُ فِي ذلِكَ الْيَوْمِ أَنَّ الأَنْبِيَاءَ يَخْزَوْنَ كُلُّ وَاحِدٍ مِنْ رُؤْيَاهُ إِذَا تَنَبَّأَ، وَلاَ يَلْبَسُونَ ثَوْبَ شَعْرٍ لأَجْلِ الْغِشِّ. "وَيَكُونُ فِي ذلِكَ الْيَوْمِ أَنَّ الأَنْبِيَاءَ يَخْزَوْنَ كُلُّ وَاحِدٍ مِنْ رُؤْيَاهُ إِذَا تَنَبَّأَ،"... الأنبياء الكذبة، نفسهم هيتكسفوا. لما الناس تقولهم: التعاليم بتاعتكم ديه غلط. واحنا مش قابلينها. الناس مش بتقبل التعاليم الغلط.
"وَلاَ يَلْبَسُونَ ثَوْبَ شَعْرٍ لأَجْلِ الْغِشِّ." ... الأنبياء الحقيقيين، كانوا بيبلسوا لبس من وبر الإبل. زي يوحنا المعمدان.
لكن الأنبياء الكذبة، علشان يقنعوا الناس بيهم. كانوا بيلسبوا نفس لبس الأنبياء الحقيقيين.
لكن في العهد الجديد، وعن طريق الروح القدس اللي جوانا، نقدر نكشف المُخادع.
واحد زي آريوس لبس ثوب الشَعر. لكن اتكشف من تعاليم الخاطئة. وفي غيره كتير.
5بَلْ يَقُولُ: لَسْتُ أَنَا نَبِيًّا. أَنَا إِنْسَانٌ فَالِحُ الأَرْضِ، لأَنَّ إِنْسَانًا اقْتَنَانِي مِنْ صِبَايَ. "بَلْ يَقُولُ: لَسْتُ أَنَا نَبِيًّا. أَنَا إِنْسَانٌ فَالِحُ الأَرْضِ،"... ولما الناس تسألهم، أنتم مين؟
الأنبياء الكذبة دول يردوا: احنا بنزرع الأرض. احنا مش تبع الأنبياء. ملناش دعوة بالتعليم. فيبتدوا يهربوا من ادعائهم أنهم أنبياء ومُعلمين. كل واحد هيقول: أنا مش نبي ولا مُعلم. وده بعد ما الناس اكتشفت زيف تعاليمهم.
"لأَنَّ إِنْسَانًا اقْتَنَانِي مِنْ صِبَايَ." ... هي إشارة لتجسد المسيح فهو ولد من العذراء كصبي صغير فصار ابن إنسان.
6فَيَقُولُ لَهُ: مَا هذِهِ الْجُرُوحُ فِي يَدَيْكَ؟ فَيَقُولُ: هِيَ الَّتِي جُرِحْتُ بِهَا فِي بَيْتِ أَحِبَّائِي. الآية ديه كلها حافظينها.
أنبياء البعل علي جبل الكرمل: لما ايليا النبي جمع أنبياء البعل، علي جبل الكرمل. وقالهم: نادوا بصوت عالي، يمكن إلهكم يسمع. واضح أنه نايم أو في خلوة.
والكتاب المقدس قال: انهم فضلوا طول النهار، يتقطعوا بالسيوف، كانوا بيقطعوا في جسمهم.
"فَيَقُولُ لَهُ: مَا هذِهِ الْجُرُوحُ فِي يَدَيْكَ؟"... الجروح ديه، اللي كان بيعملها، هما أنبياء البعل. الأنبياء الكذبة. كانوا بيجرحوا نفسهم، وده كان جزء من طقس العبادة.
"فَيَقُولُ: هِيَ الَّتِي جُرِحْتُ بِهَا فِي بَيْتِ أَحِبَّائِي." ... ولما يسألوه عن الجروح ديه، اللي كانت جزء من طقس العبادة، يرد ويقول: الجروح ديه حصلت و أنا شغال بأزرع الأرض. وده كان لسان حال الأنبياء الكذبة.
لكن الآيات ديه تحمل نبوة عن يسوع المسيح له المجد. الذي لم يوجد في فمه غش.
الآيات 5 و 6
المسيح قال "أنا إنسان فالح الأرض" ... ربنا خرج ليزرع.
المسيح له المجد، هو الذي جُرح في بيت أحبائه.
اللي باع يسوع المسيح له المجد، صاحبه – تلميذه. وربنا له المجد قاله " لماذا جئت يا صاحب؟ "
واللي أنكره، صاحبه وتلميذه.. واللي صلبوه، واللي قالوا لبيلاطس البنطي : اصلبه اصلبه. هما أهله وناسه. اليهود.
مع أن المسيح يسوع له المجد، هو اللي شفي مرضاهم. وأقام موتاهم. وطهر البُرص منهم.
فلما المسيح يسوع له المجد، مد ايده. سألوه: ما هذه الجروح اللي في ايدك؟ فرد عليهم وقالهم: ديه الجروح اللي اتجرحت بيها في بيت أحبائي.
لو احنا أحباء المسيح يسوع له المجد، ربنا هيجي يقولنا: مش أنت ابني حبيبي؟ طيب ليه جرحتني، بأفكارك - بنظراتك - بالكلام اللي طلع من لسانك - بسلوكك – بعدم غفرانك - بعداوتك للناس...؟
من خلال الجزء ده: التعاليم الغريبة، بتجرح المسيح له المجد. زي الأنبياء الكذبة اللي بيعلموا تعاليم غريبة.
الخطية بتجرح ربنا يسوع المسيح له المجد.
7«اِسْتَيْقِظْ يَا سَيْفُ عَلَى رَاعِيَّ، وَعَلَى رَجُلِ رِفْقَتِي، يَقُولُ رَبُّ الْجُنُودِ. اِضْرِبِ الرَّاعِيَ فَتَتَشَتَّتَ الْغَنَمُ، وَأَرُدُّ يَدِي عَلَى الصِّغَارِ. - هنا زكريا النبي اتنقل علي جزء تاني. علي رسالة تانية. وهي: أن الشيطان بيلعب لعبة خبيثة. اضرب الراعي تتبدد الخراف. فالشيطان عاوز يوقع أولاد ربنا. عاوزهم معاه في الهلاك الأبدي. ربنا يحمينا.
الآية ديه قالها ربنا يسوع المسيح له المجد بنفسه، ليلة آلامه ... " اِضْرِبِ الرَّاعِيَ فَتَتَشَتَّتَ الْغَنَمُ،"
"اِسْتَيْقِظْ يَا سَيْفُ عَلَى رَاعِيَّ،"... السيف ده هو: الصليب.
" رَاعِيَّ،" ... هو المسيح يسوع له المجد. الراعي الصالح.. الراعي الصالح يبذل نفسه عن الخراف.
"وَعَلَى رَجُلِ رِفْقَتِي،" ... رَجُلِ: لأن يسوع المسيح له المجد، ظهر في صورة الجسد. ربنا يسوع أخد صورة جسدنا.
رجل رفقتي: لأن يسوع المسيح له المجد، هو واحد مع الآب في الجوهر.
"يَقُولُ رَبُّ الْجُنُودِ." ... الله الآب بنفسه هو اللي قال كده. فهنا الآب السماوي نفسه، بيتكلم عن ذبيحة الصليب، التي سيقدمها ابنه الوحيد، عن العالم كله.
"اِضْرِبِ الرَّاعِيَ فَتَتَشَتَّتَ الْغَنَمُ،" ... وديه خطة الشيطان. اللي المسيح يسوع بنفسه، كشفها لتلاميذه، في ليلة آلامه.
"وَأَرُدُّ يَدِي عَلَى الصِّغَارِ." ... صغار الغنم: بتبقي سهلة في ايد الشيطان. لأنه يقدر يفترسها بسهولة.
لكن يسوع المسيح له المجد بصليبه، جمع الغنم وهزم الشيطان.
خطة الشيطان باظت بالصليب. والغنم لم تتشتت. وصارت في المرعي الحسن، في الكنيسة.
8وَيَكُونُ فِي كُلِّ الأَرْضِ، يَقُولُ الرَّبُّ، أَنَّ ثُلْثَيْنِ مِنْهَا يُقْطَعَانِ وَيَمُوتَانِ، وَالثُّلْثَ يَبْقَى فِيهَا. بالصليب: في ناس آمنت. وناس رفضت الخلاص والفداء. دول الناس اللي سلموا نفوسهم للشيطان. أدوله فرصة يدمرهم. لكن لو الإنسان مش بيدي للشيطان فرصة، أنه يضيعه. الشيطان ميقدرش يدخل.لأن ملهوش مُطلق الحرية.
"وَالثُّلْثَ يَبْقَى فِيهَا." ... دول الناس اللي قبلوا الصليب. والخلاص والفداء.
الثلث: لأن مفيش حاجة في الكنيسة اسمها يهود وأمم. لكن الكل بقي واحد. كلنا جسد ربنا يسوع المسيح له المجد. فدول ميتقسموش.. لكن اللي بره جسد المسيح له المجد، هما اللي يتقسموا (الثلثين).
يبقي بره الكنيسة ... " يُقْطَعَانِ وَيَمُوتَانِ،". في هلاك أبدي. موت أبدي.. والثلث: ليه الحياة الأبدية.
9وَأُدْخِلُ الثُّلْثَ فِي النَّارِ، وَأَمْحَصُهُمْ كَمَحْصِ الْفِضَّةِ، وَأَمْتَحِنُهُمُ امْتِحَانَ الذَّهَبِ. هُوَ يَدْعُو بِاسْمِي وَأَنَا أُجِيبُهُ. أَقُولُ: هُوَ شَعْبِي، وَهُوَ يَقُولُ: الرَّبُّ إِلهِي». "وَأُدْخِلُ الثُّلْثَ فِي النَّارِ،"... دول أولاد ربنا. اللي جوة الكنيسة. اللي قبلوا الخلاص والفداء. ولأن الكنيسة مش من العالم. فلازم العالم يضطهدهم. وربنا وضح لنا وقالنا: في العالم سيكون لكم ضيق. لكن ثقوا أنا قد غلبت العالم.
الكنيسة تتحط جوة الأتون. بس ربنا يقولنا: أبواب الجحيم لن تقوي عليها. فديه نار العالم. بس ملهاش قوة علي أولاد الله. وكمان النار: ديه عبارة عن: التجارب والضيقات والآلام. ودول هما اللي بينقوا الإنسان.
"وَأَمْحَصُهُمْ كَمَحْصِ الْفِضَّةِ، وَأَمْتَحِنُهُمُ امْتِحَانَ الذَّهَبِ." ... الصايغ: لما ينقي الفضة والذهب، لازم يدخلهم في فرن مخصوص. وساعتها الشوائب تسيح، ويتبقي الفضة والذهب صافيين وفي منتهي النقاء. وبيلمعوا.
أي ضيق بيعدي علينا وعلي الكنيسة، دايما بنطلع منه أفضل من قبل كده. وبنكون أفضل في علاقتنا مع ربنا له المجد.
" الْفِضَّةِ" ... دايما في الكتاب المقدس: ترمز لكلمة ربنا له المجد.
كل ما الضيقات تزيد، كل ما بنمسك في كلمة ربنا ووعوده، أكتر. كل ما بنتكل علي وعود ربنا أكتر.
" الذَّهَبِ." ... إشارة للسماء. كل آلام العالم، بتأهلنا للسماء. لأمجاد الأبدية.
معلمنا بولس الرسول قال: "فَإِنِّي أَحْسِبُ أَنَّ آلاَمَ الزَّمَانِ الْحَاضِرِ لاَ تُقَاسُ بِالْمَجْدِ الْعَتِيدِ أَنْ يُسْتَعْلَنَ فِينَا."
"هُوَ يَدْعُو بِاسْمِي وَأَنَا أُجِيبُهُ." ... كل ده بيخلي كل واحد فينا، ماسك في ربنا أكتر.
"أَقُولُ: هُوَ شَعْبِي،" ... شعبي: وده تأكيد أن الثلث ده، هو اللي جوة الكنيسة.
" أَقُولُ: هُوَ شَعْبِي، وَهُوَ يَقُولُ: الرَّبُّ إِلهِي." ... زي بالظبط ما عروس النشيد قالت: أنا لحبيبي وحبيبي لي.
⪢