⪡ 1وَيْلٌ لِمَدِينَةِ الدِّمَاءِ. كُلُّهَا مَلآنَةٌ كَذِبًا وَخَطْفًا. لاَ يَزُولُ الافْتِرَاسُ. ربنا له المجد يبدأ يحط ملامح مدينة نينوي، اللي بسببها كان يؤدب ويعاقب.
"وَيْلٌ لِمَدِينَةِ الدِّمَاءِ." ... نينوي رمز للمملكة الشر. وملك آشور (نينوي) رمز للشيطان.
لِمَدِينَةِ الدِّمَاءِ: اللي عاوزة تموّت الناس، وتفرح فيهم. سفكت دم كتير جدا من الناس. وهو ده الشيطان اللي كان قتّال (بيحارب) الناس منذ البدء.
المدينة ديه عاوزة تفترس واحد وراء التاني وهكذا. وبلد وراء بلد.
"كُلُّهَا مَلآنَةٌ كَذِبًا وَخَطْفًا. لاَ يَزُولُ الافْتِرَاسُ." ... نينوي بتستخدم الكذب والنفاق والحِيل. وفيها غش في التجارة وسرقة. الخطف: هو سرقة ممتلكات وأشياء من الناس.
" لاَ يَزُولُ الافْتِرَاسُ." ... ماهو الشيطان هو الكداب وأبو الكداب. وبيحاول افتراس الناس، وضياعهم عن طريق الشر.
علشان كده ربنا له المجد بيقول لمملكة آشور: قابلي بقي جيش بابل اللي هأبعته ليكِ.
2صَوْتُ السَّوطِ وَصَوْتُ رَعْشَةِ الْبَكَرِ، وَخَيْلٌ تَخُبُّ وَمَرْكَبَاتٌ تَقْفِزُ، وكأن ناحوم النبي بينقلنا أو بيحطنا وسط المعركة. لنسمع صوت الأسواط التي يحث بها قادة المركبات الحربية الخيول لتسرع، وأصوات بكرات المركبات الفائقة السرعة، ووثبات الخيل، وقفزات المركبات.
"وَخَيْلٌ تَخُبُّ وَمَرْكَبَاتٌ تَقْفِزُ،" ... تَخُبُّ: يعني ثبات الخيل في الحرب.
3وَفُرْسَانٌ تَنْهَضُ، وَلَهِيبُ السَّيْفِ وَبَرِيقُ الرُّمْحِ، وَكَثْرَةُ جَرْحَى، وَوَفْرَةُ قَتْلَى، وَلاَ نِهَايَةَ لِلْجُثَثِ. يَعْثُرُونَ بِجُثَثِهِمْ. وطبعا في الحرب في نيران وسيوف والرمح.
"وَكَثْرَةُ جَرْحَى، وَوَفْرَةُ قَتْلَى، وَلاَ نِهَايَةَ لِلْجُثَثِ. يَعْثُرُونَ بِجُثَثِهِمْ." ... من كتر الجرحي والقتلي والجثث، بيمشوا بيتكعبلوا في الجثث.. وطبعا الكلام علي جيش آشور، واللي ربنا صوره قبل كده بالأسود، اللي حاصروا جيش ربنا.
هو ده الشيطان اللي بيحط في دماغنا أنه مش بيتهزم أبدا. ومحدش يقدر عليه. ويجيب لنا فكرة أو منظر أو عادة الانسان بيحاول يتخلص منها. ويقولنا مش هتقدر تنتصر.
فهنا ربنا له المجد بيطمنا وبيقولنا: متخافوش. أنت تقدر تنتصر. لأن الهنا قدرته لا نهائية.
4مِنْ أَجْلِ زِنَى الزَّانِيَةِ الْحَسَنَةِ الْجَمَالِ صَاحِبَةِ السِّحْرِ الْبَائِعَةِ أُمَمًا بِزِنَاهَا، وَقَبَائِلَ بِسِحْرِهَا. بيكمل كلامه علي مدينة نينوي (آشور):
أنها مدينة زانية. سواء زني روحي، اللي هو عبادة الأوثان. أو زنا جسدي، لأنه كان طقس من طقوس عبادة الأوثان، انهم يزنوا. فعاوزة تضل الأمم بزناها وبطقوسها النجسة.
" صَاحِبَةِ السِّحْرِ الْبَائِعَةِ أُمَمًا بِزِنَاهَا، وَقَبَائِلَ بِسِحْرِهَا. " ... صَاحِبَةِ السِّحْرِ: يعني بتحاول تُظهر قدرات قوية لنفسها. وتحط صور مُخادعة لنفسها، وبيضحكوا علي نفسهم وعلي الناس. زي ما بيعملوا بتوع السِحر.
والناش بتمشي وراها. وراء نينوي (آشور) . ماهو الشيطان دايما في ناس بتمشي وراه، وبتتخدع فيه. وفي ألاعيبه.
5«هأَنَذَا عَلَيْكِ، يَقُولُ رَبُّ الْجُنُودِ، فَأَكْشِفُ أَذْيَالَكِ إِلَى فَوْقِ وَجْهِكِ، وَأُرِي الأُمَمَ عَوْرَتَكِ وَالْمَمَالِكَ خِزْيَكِ. ربنا له المجد بيقول لنينوي:
هأعريكِ.. ربنا شبه مدينة نينوي وكأنها سيدة، أصابتها أعظم إهانة فقد افتضحت وأصبحت عارية في خجل وعار. وها أشور قد افتضح ضعفها وأنها غير قادرة على الدفاع عن نفسها.
"وَأُرِي الأُمَمَ عَوْرَتَكِ" ... يعني المقصود بيها: لما نتكلم عن مدينة وتنكشف عوراتها: يعني كل الثغرات ونقاط ضعف المدينة، هتبان قدام الكل. الكل هيعرف كل حاجة عنها. وتسقط قوتها. واللي حواليها يكتشفوا أنها ضعيفة. وسهل الهجوم عليها.
"وَالْمَمَالِكَ خِزْيَكِ." ... الممالك هيعرفوا إنك ضعيفة. وحتى مش قادرة تدافعي عن نفسك.
6وَأَطْرَحُ عَلَيْكِ أَوْسَاخًا، وَأُهِينُكِ وَأَجْعَلُكِ عِبْرَةً. وده عكس اللي حصل مع ا لابن الضال، لما رجع لأبوه، بأوساخه. بريحة الخنازير. وملخبط خالص. بس هو راجع بالتوبة. فأبوه لبسه نضيف.
فالخطية هي أوساخ. طين. فالإنسان اللي عايش في الطين، ميقدرش يقول ليه يارب ده حالي؟ ليه سايبني كده؟ هو أصلا مختار أنه يعيش في الطين بارادته. فأنت اللي عامل في نفسك أصلا كده.
"وَأُهِينُكِ وَأَجْعَلُكِ عِبْرَةً." ... أية صعبة. لو واحد بيعاند مع ربنا، بالخطية. وربنا عمال يديله فرص كتيرة للتوبة. وفي الأخر مش عاوز يتوب. ربنا يقوله: طيب هأخليك عِبرة للناس اللي بتتمادي في الخطية وفي شرها. ومش عاوزين يتوبوا.
7وَيَكُونُ كُلُّ مَنْ يَرَاكِ يَهْرُبُ مِنْكِ وَيَقُولُ: خَرِبَتْ نِينَوَى، مَنْ يَرْثِي لَهَا؟ مِنْ أَيْنَ أَطْلُبُ لَكِ مُعَزِّينَ؟». كل اللي هيشوفك، هيقول نينوي خِربت. وهيهربوها منِك. لأنها ضايقت ممالك كتير جدا. ونهب بلاد وممالك كتير.
"مِنْ أَيْنَ أَطْلُبُ لَكِ مُعَزِّينَ؟" ... أجيبلِك ناس منين، يعزوكِ؟ من بعد كل الخراب اللي أنتِ فيه ده؟
لأن من ظلمها للشعوب، محدش كان بيحب آشور (نينوي). لأنهم افتروا علي البلاد اللي حواليهم. فمحدش متعاطف معاها.
8هَلْ أَنْتِ أَفْضَلُ مِنْ نُوَ أَمُونَ الْجَالِسَةِ بَيْنَ الأَنْهَارِ، حَوْلَهَا الْمِيَاهُ الَّتِي هِيَ حِصْنُ الْبَحْرِ، وَمِنَ الْبَحْرِ سُورُهَا؟ الكلام لنينوي:
"هَلْ أَنْتِ أَفْضَلُ مِنْ نُوَ أَمُونَ الْجَالِسَةِ بَيْنَ الأَنْهَارِ،"... نُوَ: معناها، نصيب. نُوَ أَمُونَ: يعني نصيب أمون.
في ناس قالت: أنه يقصد بيها مصر كلها. وناس قالوا: أنه يقصد مدينة طيبة بالتحديد. أيا كان ايه المقصود، فهي مدينة في مصر.
هل أنتِ يا نينوي أفضل من مصر أو طيبة، الجالسة بين الأنهار؟ الأنهار: المقصود بيها، نهر النيل وفروعه كلها.
لئلا تظن نينوى أنه يستحيل تحقيق النبوة، فقدم لهم ناحوم النبي، مثلًا لبلدة كانت قوية ومطمئنة وإذ سلكت في الشر، وأصرت على مقاومة الله، حلّ عليها الغضب الإلهي، وهي "نو أمون".
"حَوْلَهَا الْمِيَاهُ الَّتِي هِيَ حِصْنُ الْبَحْرِ، وَمِنَ الْبَحْرِ سُورُهَا؟" ... ده البحر عامل زي الحصن أو سور لمصر أو طيبة. (لأن مصر متحاوطة من الشرق: بالبحر الأحمر. ومن الشمال: بالبحر الأبيض المتوسط)
9كُوشٌ قُوَّتُهَا مَعَ مِصْرَ وَلَيْسَتْ نِهَايَةٌ. فُوطٌ وَلُوبِيمُ كَانُوا مَعُونَتَكِ. كُوشٌ: هي اثيوبيا، في الجنوب. وفي الجنوب (جنوب مصر)، في تحالفات قوية مع اثيوبيا.
كانت كوش تستمد قوتها وثروتها من التجارة والمساعدات الحربية. كانت سندًا لنو أمون.
"فُوطٌ وَلُوبِيمُ كَانُوا مَعُونَتَكِ." ... المقصود بيهم: القيروان وجزء من ليبيا، وليبيا غرب مصر.
المعني: أن مصر محصنة نفسها. وكانت مصر معتمدة عليهم.
فعاوز يقول لنينوي: ان أنت فرحان بنهر دجلة. طيب بص كده للتحصينات اللي كانت حوالين مصر، في الوقت ده.
طيب ايه اللي حصل لمصر؟
10هِيَ أَيْضًا قَدْ مَضَتْ إِلَى الْمَنْفَى بِالسَّبْيِ، وَأَطْفَالُهَا حُطِّمَتْ فِي رَأْسِ جَمِيعِ الأَزِقَّةِ، وَعَلَى أَشْرَافِهَا أَلْقَوْا قُرْعَةً، وَجَمِيعُ عُظَمَائِهَا تَقَيَّدُوا بِالْقُيُودِ. وفعلا مصر سقطت في ايد آشور سنة 666 قبل الميلاد.
فأكيد يا نينوي أنت مش أقوي من البلاد ديه. فمصر راحت في السبي.
"وَأَطْفَالُهَا حُطِّمَتْ فِي رَأْسِ جَمِيعِ الأَزِقَّةِ،" ... غرور مصر وقوتها، خانوها. وأطفالها اتبهدلوا واتدمروا.
"وَعَلَى أَشْرَافِهَا أَلْقَوْا قُرْعَةً، وَجَمِيعُ عُظَمَائِهَا تَقَيَّدُوا بِالْقُيُودِ." ... أشراف: يعني كبار البلد راحوا، في السبي. مسبيين. واتعمل عليهم قُرعة، يأخدوا مين من كبار البلد اللي سبوها، كعبيد.
يعني كانوا بيقسموا كبار البلد، وبيعملوا عليهم قرعة. ويأخدوهم كعبيد.
11أَنْتِ أَيْضًا تَسْكَرِينَ. تَكُونِينَ خَافِيَةً. أَنْتِ أَيْضًا تَطْلُبِينَ حِصْنًا بِسَبَبِ الْعَدُوِّ. الكلام علي نينوي. يعني هتخبطي في الحيطة. أو معناها: إنك هتشربي من كأس غضب الله.
"تَكُونِينَ خَافِيَةً." ... يعني هتستخبي. كأنه بيقول أن مملكة آشور، هتستخبي من الخجل بسبب العار اللي كانت فيه.
"أَنْتِ أَيْضًا تَطْلُبِينَ حِصْنًا بِسَبَبِ الْعَدُوِّ." ... وأنتِ كمان هتدوري ازاي تحصني نفسك قدام العدو، اللي هو جيش بابل.
12جَمِيعُ قِلاَعِكِ أَشْجَارُ تِينٍ بِالْبَوَاكِيرِ، إِذَا انْهَزَّتْ تَسْقُطُ فِي فَمِ الآكِلِ. الْبَوَاكِيرِ: اجود أنواع التين.
"إِذَا انْهَزَّتْ تَسْقُطُ فِي فَمِ الآكِلِ." ... شجرة التين لما يهزوها، ممكن التين كله يقع. والناس تأكل منه.
فبيقولها: هزة من جيش بابل، هتوقعك كلك يا آشور. زي ما التين بيقع.
"فَمِ الآكِلِ." ... المقصود: هو جيش بابل اللي هيهجم علي آشور. هيأكل كل غناها وكل اللي جمعته بالظلم والافتراء، من البلاد اللي حواليها.
13هُوَذَا شَعْبُكِ نِسَاءٌ فِي وَسَطِكِ! تَنْفَتِحُ لأَعْدَائِكِ أَبْوَابُ أَرْضِكِ. تَأْكُلُ النَّارُ مَغَالِيقَكِ. شعبك وجيشك يا آشور، بقي عامل زي النساء. مليانين خوف. ومش قادر حتي يدافع عن نفسه. مش قادر يدافع عن أرضك يا أشور.
"تَنْفَتِحُ لأَعْدَائِكِ أَبْوَابُ أَرْضِكِ. تَأْكُلُ النَّارُ مَغَالِيقَكِ." ... الأبواب انفتحت. نتيجة الفيضان اللي حصل. وسور المدينة تهدم. وجيش بابل قدروا يدخلوا بكل سهولة. ومغاليق الأبواب، النار أكلتها. بسبب دخول جيش بابل لآشور. وابتدوا يحرقوا ويدمروا آشور.
14اِسْتَقِي لِنَفْسِكِ مَاءً لِلْحِصَارِ. أَصْلِحِي قِلاَعَكِ. ادْخُلِي فِي الطِّينِ وَدُوسِي فِي الْمِلاَطِ. أَصْلِحِي الْمِلْبَنَ. وبتهكم أو تريقة ناحوم النبي بيقولهم: ياريت تخزنوا مية، علشان الحصار شكله مطول. وجهزي القِلاع بتاعتك. (حاجة زي النبلة، بس حاجة كبيرة للحرب). أو كمان القلاع: جمع قلعة. علشان تقتدري تحتمي فيها.
فمع كون المدينة مبنية على نهر دجلة والمياه محيطة بها خلال النهر وخنادق المياه، إلا أن جيشها وكل سكانها يعجزون عن أن يخرجوا ليشربوا منها.
"ادْخُلِي فِي الطِّينِ وَدُوسِي فِي الْمِلاَطِ. أَصْلِحِي الْمِلْبَنَ." ... الْمِلاَطِ والْمِلْبَنَ: اللي هما الطين الني. الطين اللِبن علشان تعليّ أسوارك يا آشور (نينوي). جهزي كله، علشان تقدري تحمي نفسك.
15هُنَاكَ تَأْكُلُكِ نَارٌ، يَقْطَعُكِ سَيْفٌ، يَأْكُلُكِ كَالْغَوْغَاءِ، تَكَاثَرِي كَالْغَوْغَاءِ. تَعَاظَمِي كَالْجَرَادِ! الغوغاء: هو الجراد. والجراد لما بيهجم علي الزرع، بيبقي عامل زي الجيش. وجيش بابل فعلا حرق المدينة.
فهو بيشبه جيش بابل، بالجراد.
يدعوها ألا تعتمد على كثرة عدد سكانها ورجال جيشها، فإنهم يصيرون مثل الغوغاء والجراد، الحشرات المتلفة، لا تستطيع أن تصمد أمام النار المشتعلة، ولا تقف أمام السيف.
"تَكَاثَرِي كَالْغَوْغَاءِ. تَعَاظَمِي كَالْجَرَادِ." ... حتي لو زودت يا آشور جيشك، وعددكم كان كتير. برده!"
مفيش أمل، من نجاتك من جيش بابل، اللي عامل زي الجراد.
16أَكْثَرْتِ تُجَّارَكِ أَكْثَرَ مِنْ نُجُومِ السَّمَاءِ. الْغَوْغَاءُ جَنَّحَتْ وَطَارَتْ. نينوي (آشور) كانت من أهم المدن التجارية. و أول ما التُجار لقيوا أن الحصار هيبدأ.
"الْغَوْغَاءُ جَنَّحَتْ وَطَارَتْ." ... كل واحد من التُجار أخد تجارته وهرب. وقت محنتهم صار هؤلاء التجار كالجراد، أخذوا أموالهم وهربوا ولم يبذلوا أي جهد في الدفاع عن المدينة.
17رُؤَسَاؤُكِ كَالْجَرَادِ، وَوُلاَتُكِ كَحَرْجَلَةِ الْجَرَادِ الْحَالَّةِ عَلَى الْجُدْرَانِ فِي يَوْمِ الْبَرْدِ. تُشْرِقُ الشَّمْسُ فَتَطِيرُ وَلاَ يُعْرَفُ مَكَانُهَا أَيْنَ هُوَ. " حَرْجَلَةِ الْجَرَادِ" ... يعني سرب الجراد.
"رُؤَسَاؤُكِ كَالْجَرَادِ، وَوُلاَتُكِ كَحَرْجَلَةِ الْجَرَادِ الْحَالَّةِ عَلَى الْجُدْرَانِ فِي يَوْمِ الْبَرْدِ. تُشْرِقُ الشَّمْسُ فَتَطِيرُ وَلاَ يُعْرَفُ مَكَانُهَا أَيْنَ هُوَ." ... هنا ناحوم النبي بيقول لآشور: جيشك وتجارك والعظماء والولاة بتوعك، كل دول هيبقوا زي الجراد، اللي بيهرب من البرد، لما تطلع الشمس.
هيسيبوك يا آشور فاضي تماما. و هيخربوا آشور تماما.
18نَعِسَتْ رُعَاتُكَ يَا مَلِكَ أَشُّورَ. اضْطَجَعَتْ عُظَمَاؤُكَ. تَشَتَّتَ شَعْبُكَ عَلَى الْجِبَالِ وَلاَ مَنْ يَجْمَعُ. رعاتك ناموا يا نينوي. ملك آشور نايم. مش دريانين بالخراب اللي جاي عليهم.
وكمان معناها: أن ملك آشور فاكر أنه في حماية عظمائه. لكن ناحوم النبي، بيقوله: عظماء البلد ماتوا.
علشان كده ربنا له المجد حذرنا كتير من نوم الغفلة. وقال "اسهروا اذاً، لأنكم لا تعلمون اليوم ولا الساعة."
"تَشَتَّتَ شَعْبُكَ عَلَى الْجِبَالِ وَلاَ مَنْ يَجْمَعُ." ... الملك ضاع. فالشعب كله ضاع واتشتت. وديه زي الآية: اضرب الراعي. تتشتت الخراف.
19لَيْسَ جَبْرٌ لانْكِسَارِكَ. جُرْحُكَ عَدِيمُ الشِّفَاءِ. كُلُّ الَّذِينَ يَسْمَعُونَ خَبَرَكَ يُصَفِّقُونَ بِأَيْدِيهِمْ عَلَيْكَ، لأَنَّهُ عَلَى مَنْ لَمْ يَمُرَّ شَرُّكَ عَلَى الدَّوَامِ؟ "لَيْسَ جَبْرٌ لانْكِسَارِكَ."... لأن ضربة آشور، ما هياش ضربة تأديب. لكن ديه ضربة عدل من ربنا.. لأن ربنا أداهم فرص كتيرة قبل كده. وما استفادوش منها.
"جُرْحُكَ عَدِيمُ الشِّفَاءِ. كُلُّ الَّذِينَ يَسْمَعُونَ خَبَرَكَ يُصَفِّقُونَ بِأَيْدِيهِمْ عَلَيْكَ، لأَنَّهُ عَلَى مَنْ لَمْ يَمُرَّ شَرُّكَ عَلَى الدَّوَامِ؟" ... كله هيشمت فيك يا آشور (نينوي). هيستعجبوا علي قوتك اللي راحت. لآن مفيش حد مضاقش من السم بتاعك. خربت وأذيت ممالك كتير. ضربتك وخرابك يا آشور، ملهاش شفاء.
يختم النبي حديثه مصورًا حال نينوى بأنها كمن انكسر وليس من يجبر هذا الكسر، وجُرح وليس من شفاء للجرح، حيث لا عودة لبناء نينوى، وقيام دولة أشور من جديد. وإذ كانت عنيفة مع كل الأمم التي سقطت تحت يدها، صاروا يسخرون بها، مصفقين بأياديهم، إذ يرون ثمر شرها فيعيّرونها.
ختام السفر:
- نينوي مدينة عجيبة. نشوفها في سفر يونان النبي، كنموذج رائع للتوبة.. وفي سفر ناحوم هنا، نشوفها كنموذج سيء للعِناد قدام وجه ربنا له المجد.
- وده معناه:
الانسان في علاقته بربنا، مينفعش لما يكون ليه مصلحة عند ربنا، يتضع وينسحق ويقدم توبة ويطلب مراحم ربنا.
وبعد ما ربنا يحقق له اللي بيتمناه، يرجع لكل اللي كان فيه من شر وخطية.
نينوي عملت كده مع ربنا. خافت من تحذيرات يونان النبي. وأن بعد 40 يوم تنقلب المدينة. فخافوا وقدموا توبة بجد. حتى الملك لبس مسوح. والحيوانات خلوها تصوم هي كمان. حتى الأطفال الرُضع.
وبعد ما الجيل ده تاب، رجعوا تاني لشرهم. فمدينة نينوي: استحقت الغضب.
أوعي تعامل ربنا له المجد، معاملة مصلحة. صحيح كلنا مُعرضين للسقوط. بس لما نسقط ونقع، بنحاول نقوم بسرعة. ونرجع لحضن ربنا بسرعة. لو وقعنا بلاش، نكمل في الخطية.
- نينوي من كتر التجارة وموقعها الجغرافي وكعاصمة للإمبراطورية الآشورية، أصابها الكبرياء.
والكبرياء: ده أخطر مرض روحي، ممكن يصيب الانسان. والكبرياء مش بيخلي الانسان يقدم توبة. لأن مفيش انسان متكبر، بيقول أنا غلطان.
والتوبة: دايما محتاجة قلب منسحق. ونحذر من الكبرياء ونوم الغفلة. وبلاش تستنفذ مراحم الله. وطول أناته.. ربنا له المجد: بيطيل أناته علينا كتير، علشان نتوب. مش علشان نتمادي في الشر.
نينوي هي نموذج لكل انسان بيستغل طول أناة الله، في التمادي في الشر.
ملك آشور: صورة للشيطان.. احنا أولاد ربنا. مينفعش نكون من مملكة آشور.. لازم نحارب بالأسلحة الروحية، علشان بقوة ربنا، نهزم الشيطان. اللي هو ملك آشور.. ونسير في موكب نُصرة الهنا كل حين.
⪢