⪡ 1قَدِ ارْتَفَعَتِ الْمِقْمَعَةُ عَلَى وَجْهِكِ. احْرُسِ الْحِصْنَ. رَاقِبِ الطَّرِيقَ. شَدِّدِ الْحَقْوَيْنِ. مَكِّنِ الْقُوَّةَ جِدًّا. الْمِقْمَعَةُ: أداة للضرب، لتقمع المنحرف. للتخويف. أداة سحق. وأداة القمع: هي جيش بابل.
معناها: يا نينوي (آشور) جايلك جيش بابل العظيم. اللي هيسحقك يا آشور.
ربنا في الأول استخدم آشور كأداة تأديب لأولاده. لكن آشور اتكبرت جدا، وأذوا جامد أولاد الله. فجه دور آشور أنهم يتعاقبوا علي اللي عملوه في شعب ربنا.
"احْرُسِ الْحِصْنَ." ... علشان كده ناحوم النبي بيقول لنينوي: ورينا شطارتك بقي.
"رَاقِبِ الطَّرِيقَ. شَدِّدِ الْحَقْوَيْنِ. مَكِّنِ الْقُوَّةَ جِدًّا." ... يالا استعد للهجوم. ورينا هتقف قدام جيش بابل ازاي، اللي هي تأديبات ربنا؟
مهما تعمل وتعّلي أسوارك. اعمل اللي تعمله. مش هتقدر تقف قدام ربنا، مهما عملت.
2فَإِنَّ الرَّبَّ يَرُدُّ عَظَمَةَ يَعْقُوبَ كَعَظَمَةِ إِسْرَائِيلَ، لأَنَّ السَّالِبِينَ قَدْ سَلَبُوهُمْ وَأَتْلَفُوا قُضْبَانَ كُرُومِهِمْ. يعني ربنا له المجد، هيرد قيمة أولاده وكرامتهم، اللي أنت حاولت يا آشور تهينها.
لأن كرامة الله في أولاده. ربنا له المجد بيدي الكرامة لأولاده. "أُكرم اللذين يكرمونني." اللي بيحب يكرّم أولاده.
"لأَنَّ السَّالِبِينَ قَدْ سَلَبُوهُمْ وَأَتْلَفُوا قُضْبَانَ كُرُومِهِمْ." ... جيش آشور اللي سلب خيرات مملكة اسرائيل، وسبي أولاد ربنا. وبَعدوهم عن أرضهم. (خلوهم يسيبوا أرضهم، وأخدوهم علي آشور للسبي).
الكروم: دايما تُشير للفرح. فالسبي والاضطهاد اللي عمله آشور في شعب ربنا، ده نزع الفرح عنهم.
الشيطان عاوز يتلف قضبان الكرم. اللي هو احنا. لأن ربنا قال "أنا هو الكرمة. وأنتم الأغصان." فالشيطان عاوز يتلفنا ويفسدنا. والشاطر اللي ميسبش نفسه للشيطان يحقق هدفه. ويبوظه ويبعده عن ربنا.
3تُرْسُ أَبْطَالِهِ مُحَمَّرٌ. رِجَالُ الْجَيْشِ قِرْمِزِيُّونَ. الْمَرْكَبَاتُ بِنَارِ الْفُولاَذِ فِي يَوْمِ إِعْدَادِهِ. وَالسَّرْوُ يَهْتَزُّ. هنا بيوصف شكل جيش بابل اللي جاي علي آشور.
"تُرْسُ أَبْطَالِهِ مُحَمَّرٌ."... يعني من كتر الدم بتاع القتلي من جيش آشور. هيبقي الترس بتاع جنود بابل، لونه أحمر من كتر الدم. متغطي بالدم.
"رِجَالُ الْجَيْشِ قِرْمِزِيُّونَ." ... الملابس القرمزية: هي لبس الملوك، والناس الأغنياء.
فالمعني: أن جيش بابل عنده قدرة وقوة وثراء (غِني)، وأسلحة من كل نوع.
"الْمَرْكَبَاتُ بِنَارِ الْفُولاَذِ فِي يَوْمِ إِعْدَادِهِ." ... لما بيطرقوا علي الحديد، بيبقي في شرار بيطير. فالمركبات في الحرب مع سرعتها، وهي بتتخبط في الصخور اللي في الأرض، بيطير منها الشرار. زي ما الشرار بيطير من الحديد لما بيطرقوا عليه، وهو سخن.
"وَالسَّرْوُ يَهْتَزُّ." ... أشجار السرو العالية اللي ماسكة نفسها. من كتر حركة أقدام جيش بابل، الشجر ده بيتهز.
السرو: هنا هو اشارة للانسان المتكبر.
المعني: أن جيش آشور المتكبر، بيترعش قدام جيش بابل.
4تَهِيجُ الْمَرْكَبَاتُ فِي الأَزِقَّةِ. تَتَرَاكَضُ فِي السَّاحَاتِ. مَنْظَرُهَا كَمَصَابِيحَ. تَجْرِي كَالْبُرُوقِ. مفيش حتة في آشور (نينوي)، جيش بابل مش هيوصلها.
"تَهِيجُ الْمَرْكَبَاتُ فِي الأَزِقَّةِ."... ده حتي هيوصل للأزقة الصغيرة.
"تَتَرَاكَضُ فِي السَّاحَاتِ. مَنْظَرُهَا كَمَصَابِيحَ. تَجْرِي كَالْبُرُوقِ." ... مَنْظَرُهَا كَمَصَابِيحَ: لما الشمس تيجي على المركبات. تٌبرق زي المصابيح.
قدام المنظر المخيف ده بتاع جيش بابل، ملك آشور يحاول يتصرف. ازاي؟
5يَذْكُرُ عُظَمَاءَهُ. يَتَعَثَّرُونَ فِي مَشْيِهِمْ. يُسْرِعُونَ إِلَى سُورِهَا، وَقَدْ أُقِيمَتِ الْمِتْرَسَةُ. "يَذْكُرُ عُظَمَاءَهُ."... يعني يدور علي أقوياء الجيش بتاعه، علشان يصدوا هجوم بابل.
"يَتَعَثَّرُونَ فِي مَشْيِهِمْ. يُسْرِعُونَ إِلَى سُورِهَا، وَقَدْ أُقِيمَتِ الْمِتْرَسَةُ." ... خلاص جيش بابل حاوط آشور. وحاصرها بالمتراس.
6أَبْوَابُ الأَنْهَارِ انْفَتَحَتْ، وَالْقَصْرُ قَدْ ذَابَ. هيشرح بقي أن جيش بابل، دخل لما حصل فيضان في نهر دِجلة (زي ما شوفنا في الاصحاح اللي فات).
"أَبْوَابُ الأَنْهَارِ انْفَتَحَتْ، وَالْقَصْرُ قَدْ ذَابَ" ... المية نتيجة الفيضان: هدت سور مدينة نينوي. فبقي الطريق للقصر، سهل. وبقوا في حالة خوف ورعب.
مدينة نينوي (آشور) علي نهر دِجلة. ملأ أهل نينوى كل الخنادق والمجاري بالمياه لتحوط المدينة من كل جانب، فلا يقدر العدو على العبور إليهم بمركباتهم. ولما حصل فيضان في نهر دِجلة، أسوار نينوي اتهدت)
7وَهُصَّبُ قَدِ انْكَشَفَتْ. أُطْلِعَتْ. وَجَوَارِيهَا تَئِنُّ كَصَوْتِ الْحَمَامِ ضَارِبَاتٍ عَلَى صُدُورِهِنَّ. في واحد من المؤرخين قال: لما حصل هجوم بابل علي آشور، وقصة الفيضان. وبدأ جيش بابل أنه يدخل القصر. أن ملك آشور وكل اللي في القصر حرقوا نفسهم وانتحروا.
" هُصَّبُ" ... ناس قالوا: قد تكون واحدة من ملكات نينوي. أو اسم آلهة مشهورة هناك. لكن علي أية حال هي : اشارة لنينوي.
" أُطْلِعَتْ" ... اللي قالوا أنها الملكة. وأن الملك وكل اللي معاه ماتوا. فالأعداء أخدوا الملكة أسيرة. يعني طلعوها من القصر، وأخدوها أسيرة.
فنينوي انكشفت. سورها وقع. والملك مات.
" وَجَوَارِيهَا تَئِنُّ كَصَوْتِ الْحَمَامِ ضَارِبَاتٍ عَلَى صُدُورِهِنَّ." ... جَوَارِيهَا: الجواري مكانش قدامهم غير الأنين. فالناس بقت تئن كصوت الحمام. لأن صوت الحمام فيه حزن. وكانوا بيضربوا علي صدورهم من الخوف والرعب اللي كانوا فيه.
8وَنِينَوَى كَبِرْكَةِ مَاءٍ مُنْذُ كَانَتْ، وَلكِنَّهُمُ الآنَ هَارِبُونَ. «قِفُوا، قِفُوا!» وَلاَ مُلْتَفِتٌ. الآية ديه ممكن نفهمها بشكلين:
1- "وَنِينَوَى كَبِرْكَةِ مَاءٍ مُنْذُ كَانَتْ،" ... يعني لما حصل الفيضان، المية دخلت فيها. فالكل بيجري في كل الاتجاهات. الكل بيهرب، محدش عاوز يبص وراه. ... "«قِفُوا، قِفُوا!» وَلاَ مُلْتَفِتٌ."
أو :
2- "وَنِينَوَى كَبِرْكَةِ مَاءٍ مُنْذُ كَانَتْ،" ... ممكن تتفهم: بركة المية، اشارة للخير الكتير. فالكل ساب الخير اللي في نينوي، وهرب. لما دخل عليهم جيش بابل. والشعب والجيش بتاع نينوي (آشور)، بينادوا علي بعض: استنوا استنوا. بس الكل خايف وهربان. ... " وَلكِنَّهُمُ الآنَ هَارِبُونَ. «قِفُوا، قِفُوا!» وَلاَ مُلْتَفِتٌ."
9اِنْهَبُوا فِضَّةً. اِنْهَبُوا ذَهَبًا، فَلاَ نِهَايَةَ لِلتُّحَفِ لِلْكَثْرَةِ مِنْ كُلِّ مَتَاعٍ شَهِيّ. علشان كده ناحوم النبي بيوجه رسالته لجيش بابل.
ياجيش بابل لما تدخلوا نينوي، هتلاقوا خير كتير، ملهوش أول من أخر. لأن أشور نهبت كل الممالك المحيطة بيها. علشان كده في ذهب وفضة وتُحف ملهاش عدد. وده لأن اللي بيأدب مملكة آشور (نينوي).
10فَرَاغٌ وَخَلاَءٌ وَخَرَابٌ، وَقَلْبٌ ذَائِبٌ وَارْتِخَاءُ رُكَبٍ وَوَجَعٌ فِي كُلِّ حَقْوٍ. وَأَوْجُهُ جَمِيعِهِمْ تَجْمَعُ حُمْرَةً. قبل كده نينوي كانت من أعظم المدن التجارية في العالم القديم. لكن بعد كده بقت خراب. وفيها خوف. وفيها ارتخاء ركب: مش قادر يقف من كتر الخوف. بيترعش. ركبه بتخبط في بعض.
"وَوَجَعٌ فِي كُلِّ حَقْوٍ." ... مش قادر يفرد طوله.
"وَأَوْجُهُ جَمِيعِهِمْ تَجْمَعُ حُمْرَةً." ... وشه أحمر، من كتر الخوف والرعب والنيران، اللي هيشعلها جيش بابل. جيش الأعداء في نينوي.
وده حال نينوي لأنها اتحدت ربنا. واستمرت في الشر.
11أَيْنَ مَأْوَى الأُسُودِ وَمَرْعَى أَشْبَالِ الأُسُودِ؟ حَيْثُ يَمْشِي الأَسَدُ وَاللَّبُوَةُ وَشِبْلُ الأَسَدِ، وَلَيْسَ مَنْ يُخَوِّفُ. الناس بتسأل: هي فين المملكة القوية، اللي كانت عاملة زي عرين الأسد؟
ده ملكها، كان زي الأسد. ومكانش بيخاف.
12الأَسَدُ الْمُفْتَرِسُ لِحَاجةِ جِرَائِهِ، وَالْخَانِقُ لأَجْلِ لَبُوَاتِهِ حَتَّى مَلأَ مَغَارَاتِهِ فَرَائِسَ وَمَآوِيَهُ مُفْتَرَسَاتٍ. جِرَائِهِ: جمع جرو. يعني الأسود الصغيرة.
"وَالْخَانِقُ لأَجْلِ لَبُوَاتِهِ حَتَّى مَلأَ مَغَارَاتِهِ فَرَائِسَ وَمَآوِيَهُ مُفْتَرَسَاتٍ." ... ملك أشور (نينوي) مكانش عنده غير أنه يملئ المغارة بتاعته بالأسري. وكنوز الناس، من البلاد والممالك اللي كانت حواليه.
راح فين الأسد ده، والأشبال بتوعه؟
في الحضارة الآشورية: كتير كانوا بيستخدموا الأسد في صور المعابد بتاعتهم.. في المعبد كانوا بيحطوا صورة للملك بتاعهم عبارة عن: أسد ليه أجنحة. كانوا بيحطوا وش الملك وجسم أسد مُجنح (ليه أجنحة).
فبيقول فين الأسود ديه؟ ده طلع مجرد صورة علي الحيطة وبس.. فلما ربنا له المجد أدب ... كل أسد دور له علي جُحر يدخل فيه.
الأسود: بتفكرنا بعدو الخير. "يجول كأسد زائر، مُلتمس من يبتلعه." بس بقوة ربنا، أولاد ربنا يقدروا يهزموه.
13«هَا أَنَا عَلَيْكِ، يَقُولُ رَبُّ الْجُنُودِ. فَأُحْرِقُ مَرْكَبَاتِكِ دُخَانًا، وَأَشْبَالُكِ يَأْكُلُهَا السَّيْفُ، وَأَقْطَعُ مِنَ الأَرْضِ فَرَائِسَكِ، وَلاَ يُسْمَعُ أَيْضًا صَوْتُ رُسُلُكِ». علشان كده ربنا له المجد بيقول لمك آشور، اللي عامل نفسه أسد. وهو رمز للشيطان.
"هَا أَنَا عَلَيْكِ، يَقُولُ رَبُّ الْجُنُودِ."... ربنا هيبقي ضده.
"فَأُحْرِقُ مَرْكَبَاتِكِ دُخَانًا، وَأَشْبَالُكِ يَأْكُلُهَا السَّيْفُ،" ... ومركبات جيشك هتبقي شوية رماد. وشبابك والنسل الملكي كله هيتقتل بالسيف.
"وَأَقْطَعُ مِنَ الأَرْضِ فَرَائِسَكِ،" ... مش هيبقي عندك قوة تهجمي بيها علي حد. ومش هتقدري تأخدي فريسة من حد.
"وَلاَ يُسْمَعُ أَيْضًا صَوْتُ رُسُلُكِ." ... زي ربشاقي رسول الملك سنحاريب، اللي كان بيعيُر حزقيا الملك ورجالته: أن ربنا ميقدرش يقف قدام أشور. محدش سمع عنهم بعد كده. ولا هيبقي عندهم رسل، يروحوا يهددوا الشعوب من تاني.
واللي عملته آشور في البلاد المحيطة بيها. هيحصل ليها. عملها يرتد علي رأسها.
⪢