⪡ 1وَيْلٌ لِلْمُفْتَكِرِينَ بِالْبُطْلِ، وَالصَّانِعِينَ الشَّرَّ عَلَى مَضَاجِعِهِمْ! فِي نُورِ الصَّبَاحِ يَفْعَلُونَهُ لأَنَّهُ فِي قُدْرَةِ يَدِهِمْ. واحد قاعد طول الليل بيدبر مؤامرة، أنه يستولي علي حاجة شخص تاني. ويغتصب حقوق الآخرين: حقول - بيوت – ممتلكات - أموال غيره وهكذا. فهو عمال يظلم. وبيخطط طول اليوم للظلم ده.
"فِي نُورِ الصَّبَاحِ يَفْعَلُونَهُ لأَنَّهُ فِي قُدْرَةِ يَدِهِمْ." ... وفي الصبح، بينفذ خططه ومؤامراته.
وده يفكرنا بجمهور الكنهة اللي اجتمعوا علي يسوع المسيح له المجد، طول الليل يُفكرون بالبُطل (بالباطل). ويصنعون الشر. وفي نور الصباح، نفذوه. وراحوا لبيلاطس البنطي، الوالي الروماني. علشان يخلوه ينفذ الحكم بالصلب.
احنا المفروض نقضي اللي في الصلاة والتسبيح.
أحد الآباء قال: الليل مفروز لعمل الصلاة. ... يعني بعد جهاد طول النهار، ولما الواحد يستريح شوية، يقعد مع ربنا بليل. يقعد بكل هدوء ويصلي ويقرأ الكتاب المقدس ويحكي مع ربنا.)
لما الانسان بيتحد مع الله في الصلاة، وينام علي مضجعه، واسم المسيح علي لسانه. يبقي اسم المسيح في ذاكرته. ويكون بدل ... " وَالصَّانِعِينَ الشَّرَّ عَلَى مَضَاجِعِهِمْ!" ... يبقي اسم ربنا له المجد علي لسانه.
فلما يصحي الصبح، يعمل أعمال جيدة. اعمال خير. وينشر الخير حواليه. يساعد الغلابة. ويبقي بيعمل كل حاجة بضمير صالح. وميبقاش عاوز حاجة غير أنه يرضي ربنا.
" لِلْمُفْتَكِرِينَ بِالْبُطْلِ،" ... الْبُطْلِ: يعني أفكار بطالة، غير بناءة. ومعناها: قاعد بيخطط.
"وَالصَّانِعِينَ الشَّرّ" ... يعني: الاتفاق بليل علي المشورات الرديئة.
" يَفْعَلُونَهُ لأَنَّهُ فِي قُدْرَةِ يَدِهِمْ." ... والشيء المؤذي، أنه يكون شخص قادر. ايده طايلة.
احترس واحترز، أن لما يكون في قدرة يدك انك تأخد حقك، متأخدش حقك من حد. ربنا بيقول: "ليا النقمة، أنا أجازي يقول الرب."
أوعي تنتقم لنفسك. وأوعي تظلم حد... قدرة اليد.. ممكن تكون لشخص ليه سلطان، ويقدر يستخدم سلطانه.
وكمان ممكن تكون لشخص معندهوش أي سلطان. زي مثلا شخص بيستخدم لسانه في أذى الناس. لسانه مترين (طويل). فيبقي عنده القدرة أنه يقنع الناس بالشر والأذية.
والنهاردة زي ما بنشوف علي الميديا: أن السلطان مش بس لسان الكلام. لكن كمان لسان الكتابة.
دلوقتي ما أسهل أن أي شخص يكتب أي حاجة علي السوشيال ميديا (وسائل التواصل الاجتماعي). وللأسف بتنتشر بسرعة رهيبة. والناس تقرأها وتصدقها. وهي بتكون شر وكله كذب.
2فَإِنَّهُمْ يَشْتَهُونَ الْحُقُولَ وَيَغْتَصِبُونَهَا، وَالْبُيُوتَ وَيَأْخُذُونَهَا، وَيَظْلِمُونَ الرَّجُلَ وَبَيْتَهُ وَالإِنْسَانَ وَمِيرَاثَهُ. هنا الآية بتشرح لنا ايه هو البُطل اللي فكروا فيه.. ظلم. واحد بيحسد زميله أو قريبه، أن عنده حاجة. فبدل ما يقوله ربنا يباركلك. يبتدي يفكر أنا يأخد الحاجة ديه منه.
وطبعا أشهر قصة في الكتاب المقدس علي الموضوع ده: آخاب الملك ونابوت اليزرعيلي.
وزي ما داود النبي ظلم أوريا الحثي. وقعد يفكر ازاي يقتل أوريا الحثي.
هو ده التفكير بالباطل.
"محبة المال أصل كل الشرور." ... زي آخاب الملك واللي عمله مع نابوت اليزرعيلي. "فَإِنَّهُمْ يَشْتَهُونَ الْحُقُولَ وَيَغْتَصِبُونَهَا،"
"وَالْبُيُوتَ وَيَأْخُذُونَهَا، وَيَظْلِمُونَ الرَّجُلَ وَبَيْتَهُ وَالإِنْسَانَ وَمِيرَاثَهُ." ... طول الليل عمالين يفكروا، ازاي هأزود الأراضي بتاعتي. والبيوت.. فيظلم ويسرق ويقتل. مفيش مشكلة. المهم أنهم يحققوا اللي نفسهم فيه.
الانسان الظالم اللي بيأخد حاجة مش بتاعته. لا هيتمتع بيها علي الأرض وعمره ما هيكسب السماء."الظالمون لا يرثون ملكوت السماوات."
وفي سفر الرؤيا يقول "من يظلم، فليظلم بعد." ... يعني هو حر. خليه يعمل اللي بيعمله. بس النتيجة هتبقي وحشة. طالما مش عاوز يرجع ويتوب.
3لِذلِكَ هكَذَا قَالَ الرَّبُّ: «هأَنَذَا أَفْتَكِرُ عَلَى هذِهِ الْعَشِيرَةِ بِشَرّ لاَ تُزِيلُونَ مِنْهُ أَعْنَاقَكُمْ، وَلاَ تَسْلُكُونَ بِالتَّشَامُخِ لأَنَّهُ زَمَانٌ رَدِيءٌ. أنتم بتفكروا في الأذية؟
ربنا عادل. والعادل دايما مش بيحب الظلم.. والله رحيم. والرحيم برده مش بيحب الظلم.
العدل والرحمة ... ضد الظلم.. والانسان الظالم لا عنده عدل ولا رحمة.
معني الآية: أن الشر ده، إنك هتكون تحت نير. حد هيتسلط عليك. ومش هتعرف تشيل النير ده عن عنقك. هتبقي عبد. بعد ما كنت بتملك الدنيا. وظلمت الناس علشان تأخد حقوقهم. أنا هأفتقدكم بشر.
"وَلاَ تَسْلُكُونَ بِالتَّشَامُخِ لأَنَّهُ زَمَانٌ رَدِيءٌ." ... لا تسلكون بالتشامخ: لأنه لما كان غني، وبيأخد حقوق الناس أو بيشتري أراضيهم بأسعار بخس (رخيصة جدا) أو بالتزوير أو بالظلم. فده كان وقتها مُتشامخ. محدش كان يقدر يكلمه.
وكان المُتشامخ بيشتري كل حاجة بفلوسه. حتى القُضاة كان بيدفع لهم، علشان يكونوا معاه في صفه. يحكموا لصالحه. (شيء مؤلم أن الفساد يوصل للقضاء.)
فربنا بيقولهم: بعد كده مش هتسلكوا بالتشامخ ده. لأن الله هيذلكم، وهيكسر كبريائكم.
" لأَنَّهُ زَمَانٌ رَدِيءٌ." ... آية جميلة، عبارة عن حكمة.
لما حد يجي يقولنا: شوفت اللي بيحصل، ويكون فعلا في ظلم واضح. فالآية تقول " يصمت العاقل في ذلك الزمان. لأنه زمان رديء"
أحسن حاجة الصمت في الوقت ده.. والكتاب المقدس قالنا " مفتدين الوقت لأن الأيام شريرة." ... مفتدين الوقت: يعني مفيش وقت. متضيعش وقتك. افتديه. استغل وقتك في حاجة مفيدة، في البُنيان – العمل الروحي.
الواحد ينشغل في بنيان نفسه وذاته وخدمته وفي مساعدة وبنيان الناس اللي حوالينا.
يصمت العاقل علشان يركز مع نفسه.
4«فِي ذلِكَ الْيَوْمِ يُنْطَقُ عَلَيْكُمْ بِهَجْوٍ وَيُرْثَى بِمَرْثَاةٍ، وَيُقَالُ: خَرِبْنَا خَرَابًا. بَدَلَ نَصِيبِ شَعْبِي. كَيْفَ يَنْزِعُهُ عَنِّي؟ يَقْسِمُ لِلْمُرْتَدِّ حُقُولَنَا». في اللغة العربية، عندنا شِعر رثاء، وشِعر هجو.
الرثاء: يعني في واحد مات، وفي رثاءه بيتقال كلام حلو عليه وفضايله وأنه كان انسان كويس.
الهجو: كان بيتقال من عدو لعدوه. وهو عايش أصلا. فيقوله شِعر يهينه. ويتقال في سلبيات العدو.
فهنا الهجو: معناه الناس اللي عايشين هيتهانوا، بالهجو..والناس اللي ماتوا، هيرثوهم بمرثاة.
"وَيُقَالُ: خَرِبْنَا خَرَابًا." ... وده الكلام اللي هيتقال في الهجو والرثاء. لأن الثروة اللي بيتجي من الشر، ملهاش أي حذور. هتضيع بسرعة.
" وَيُقَالُ: خَرِبْنَا خَرَابًا. بَدَلَ نَصِيبِ شَعْبِي. كَيْفَ يَنْزِعُهُ عَنِّي؟ يَقْسِمُ لِلْمُرْتَدِّ حُقُولَنَا." ... خراب جه علي الناس الأشرار. وبدل ما كان ربنا بيقول دول شعبي ونصيبي، وهأحميهم. ربنا هيتخلي عنهم، وينزع عنهم ميراث ربنا.
" يَقْسِمُ لِلْمُرْتَدِّ حُقُولَنَا." ... المُرتد: يعني واحد بيهجم عليا، وغلبته. فارتد عني. يعني خلاص مبقاش عنده قوة تاني يهاجمني.
ربنا بيقول للمُرتد ده: تعالي وارجع خد الحاجة اللي كانت عاوز تأخدها.. وده لأن ربنا حكم، أن الظالم هيأخد كل اللي اغتصبوه بالظلم والافتراء. يخرب خرابا.
5لِذلِكَ لاَ يَكُونُ لَكَ مَنْ يُلْقِي حَبْلاً فِي نَصِيبٍ بَيْنَ جَمَاعَةِ الرَّبِّ. لما يشوع جه يقسم الأراضي، كان بيقيس الأرض بالحبل. فكان مثلا يقول: فلان أرضه عبارة عن كذا حبل. (زي المازورة عندنا دلوقتي. فلو مثلا الحبل طوله متر ، هيقوله : أرضك مثلا 5 حبل = 5 متر).
فالمعني: لأن كل حاجة بقت دمار. فمفيش حاجة هيقسمها بالحبل. مفيش نصيب. كله بقي خراب.
"فِي نَصِيبٍ بَيْنَ جَمَاعَةِ الرَّبِّ." ... ملكش نصيب في جماعة الرب.
شيء مؤلم أن الانسان يُرفض من جماعة المؤمنين، بسبب أن ربنا غضبان عليهم.
الآية ديه بتتكلم عن السماء: اللي بيظلم وعايش في الخطية، ملهوش نصيب في السماء. ملهوش نصيب بين جماعة الرب.
6يَتَنَبَّأُونَ قَائِلِينَ: «لاَ تَتَنَبَّأُوا». لاَ يَتَنَبَّأُونَ عَنْ هذِهِ الأُمُورِ. لاَ يَزُولُ الْعَارُ. في أنبياء كذبة، وأنبياء حقيقيين.. الأنبياء الكذبة: بيقولوا للحقيقيين : لاَ تَتَنَبَّأُوا. ليه؟ لأنكم بتقولوا كلام بيخوف الناس. متخوفوش الناس. أنتم معقدين الدنيا ليه؟
" لاَ يَتَنَبَّأُونَ عَنْ هذِهِ الأُمُورِ." ... الأنبياء الكذبة، مش بيتنبأوا عن كلام ربنا.
" لاَ يَزُولُ الْعَارُ." ... طول ما الواحد مش بينبه الناس للأخطاء، يبقي العار مش هيزول.
النبي الصادق: هو اللي ميهمهوش رأي الناس. كل اللي يهمه: ربنا بيقول ايه. و بيبقي عاوز يوصل كلمة ربنا للناس.
القديس بولس الرسول قال: "بَلْ كَمَا اسْتُحْسِنَّا مِنَ اللهِ أَنْ نُؤْتَمَنَ عَلَى الإِنْجِيلِ، هكَذَا نَتَكَلَّمُ، لاَ كَأَنَّنَا نُرْضِي النَّاسَ بَلِ اللهَ الَّذِي يَخْتَبِرُ قُلُوبَنَا."
احنا مش جايين علشان نُرضي الناس. احنا بنُرضي ربنا وبس.
7أَيُّهَا الْمُسَمَّى بَيْتَ يَعْقُوبَ، هَلْ قَصُرَتْ رُوحُ الرَّبِّ؟ أَهذِهِ أَفْعَالُهُ؟ «أَلَيْسَتْ أَقْوَالِي صَالِحَةً نَحْوَ مَنْ يَسْلُكُ بِالاسْتِقَامَةِ؟ بيقاوموا كلمة ربنا. مش عاوزين يسمعوا كلام ربنا. الأنبياء الكذبة بيحاربوا أنبياء الله ورسالتهم.
"أَيُّهَا الْمُسَمَّى بَيْتَ يَعْقُوبَ،"... الْمُسَمَّى: يعني ده مجرد اسم بس أنتم شايلينه. لكن حقيقتك أنت مش بيت يعقوب، بقيت غريب. وكأن ربنا بيقولهم: يا خسارة، انكم أولاد يعقوب. أنتم أولاد بالاسم بس.
أيها المُسمي : مسيحي. مسيحي بالاسم. لكن أفعالك مش بتدل علي إنك مسيحي، ولا حتى تصرفاتك وسلوكك.
"هَلْ قَصُرَتْ رُوحُ الرَّبِّ؟" ... هل روح ربنا مش هايطولك؟
بمعني: لو أنت كتمت وسكّت صوت النبي، هل ربنا مش هيعرف يوصلك؟ أنت بتفكر ازاي؟.. يونان النبي لما كتم صوت ربنا وهرب. هل ربنا معرفش يوصله تاني؟ ولا جابه؟
"أَهذِهِ أَفْعَالُهُ؟" ... هل ديه أفعال ربنا؟ هل ربنا بيحب العقاب والخراب؟
أنتم اللي خليتم ربنا يعمل معاكم كده. بسبب شروركم وأفعالكم وخطاياكم.
"أَلَيْسَتْ أَقْوَالِي صَالِحَةً نَحْوَ مَنْ يَسْلُكُ بِالاسْتِقَامَةِ؟" ... مش ربنا اللي أنتم عارفينه دايما أقواله صالحة؟ أقوال ربنا دايما صالحة، نحو من يسلك بالاستقامة.. فالموضوع مختلف مع أولاد ربنا، اللي عارفينه صح، وماشيين في طريقه. وأقوالي صالحة ليهم.. اذاً ربنا مش بيتغير. احنا اللي بنتغير. احنا اللي بنبعد عن ربنا.
8وَلكِنْ بِالأَمْسِ قَامَ شَعْبِي كَعَدُوٍّ. تَنْزِعُونَ الرِّدَاءَ عَنِ الثَّوْبِ مِنَ الْمُجْتَازِينَ بِالطُّمَأْنِينَةِ، وَمِنَ الرَّاجِعِينَ مِنَ الْقِتَالِ. بعد ما كان شعبي، بقي عدو.
"تَنْزِعُونَ الرِّدَاءَ عَنِ الثَّوْبِ مِنَ الْمُجْتَازِينَ بِالطُّمَأْنِينَةِ،" ... واحد معدي، ليه تسرق منه رداءه؟
"وَمِنَ الرَّاجِعِينَ مِنَ الْقِتَالِ." ... الراجع من القتال: ده راجع منتصر. يعني هو بطل. ومع كده أنتم بتظلموه وبتأخده منه ثيابه.
اللي راجع من الحرب، خلاص خلص الحرب اللي كان فيها. وخلص قتال. ودلوقتي هو رجل سلام. وتيجي أنت تقاتله، وهو راجع من القتال؟ وتخاصمه وتأخد توبه؟
" قَامَ شَعْبِي كَعَدُوٍّ." ... في منتهي الظلم. حتى الرداء بيأخدوه من الناس.
9تَطْرُدُونَ نِسَاءَ شَعْبِي مِنْ بَيْتِ تَنَعُّمِهِنَّ. تَأْخُذُونَ عَنْ أَطْفَالِهِنَّ زِينَتِي إِلَى الأَبَدِ. بمعني: واحدة قاعدة في بيتها، وتيجوا أنتم تطردوها، وتطردوا الناس من بيوتها؟
ربنا بيعاتبهم: أنتم بتطردوا النساء من بيوتهم؟ ده قاعدة مُتنعمة في بيتها. وعلي فكرة ممكن يكون بيت التنعم ده، حاجة بسيطة خالص. بس بيتهم وملكهم.
"تَطْرُدُونَ نِسَاءَ شَعْبِي مِنْ بَيْتِ تَنَعُّمِهِنَّ."... بيطردوا الناس من بيوتهم.
"تَأْخُذُونَ عَنْ أَطْفَالِهِنَّ زِينَتِي إِلَى الأَبَدِ." ... زِينَتِي إِلَى الأَبَدِ: زينة ربنا هي: الخلاص – الانتماء لشعب ربنا.
فهما كانوا بيأخدوا الأطفال دول وبيبيعوهم عبيد، للشعوب الوثنية. وطبعا الطفل ده هيبقي وثني زيهم. فزينة ربنا ضاعت. شعب ربنا وأولاده يبقوا بالمنظر ده؟ ويتباعوا عبيد؟
حاجة في منتهي الظلم.
10«قُومُوا وَاذْهَبُوا، لأَنَّهُ لَيْسَتْ هذِهِ هِيَ الرَّاحَةَ. مِنْ أَجْلِ نَجَاسَةٍ تُهْلِكُ وَالْهَلاَكُ شَدِيدٌ. "قُومُوا وَاذْهَبُوا،" ... معناها: بأطردكم من قدام وجهي، لأنكم ظالمين. ربنا بيقولهم ...
"لأَنَّهُ لَيْسَتْ هذِهِ هِيَ الرَّاحَةَ." ... أنتم فاكرين انكم لما تأخدوا حاجة الناس وتظلموهم، هي ديه الراحة بالنسبة لكم.
"مِنْ أَجْلِ نَجَاسَةٍ تُهْلِكُ وَالْهَلاَكُ شَدِيدٌ." ... النجاسة بتاعتكم ديه تُهلك، و الهلاك هيكون شديد.
لما يسلك الانسان باحترام ووقار، ربنا يبارك له في حياته. ويديه خير. والخير ده المفروض يبقي مؤتمن عليه، علشان يسعد اللي حواليه.
والانسان الظالم: اللي عمال يظلم غيره، ويأخد حقوق الناس. ده هيفتقر.
"لأَنَّهُ لَيْسَتْ هذِهِ هِيَ الرَّاحَةَ." ... الراحة الوحيدة: في ربنا يسوع المسيح له المجد. وأن ربنا يستقر في داخلي.
لكن النجاسة والخطية بيسببوا ... الْهَلاَكُ شَدِيدٌ."
11لَوْ كَانَ أَحَدٌ وَهُوَ سَالِكٌ بِالرِّيحِ وَالْكَذِبِ يَكْذِبُ قَائِلاً: أَتَنَبَّأُ لَكَ عَنِ الْخَمْرِ وَالْمُسْكِرِ لَكَانَ هُوَ نَبِيَّ هذَا الشَّعْبِ! الريح يعني الهواء. السالك بالريح: يعني سيرته باطلة. كلامه كلام فارغ، زي الهواء.
"وَالْكَذِبِ يَكْذِبُ قَائِلًا: أَتَنَبَّأُ لَكَ عَنِ الْخَمْرِ وَالْمُسْكِرِ لَكَانَ هُوَ نَبِيَّ هذَا الشَّعْبِ." ... لو قال كده، لكان هو نبي هذا الشعب. يعني كان هيبقي النبي بتاعهم. ويحبوه ويعجبوا بيه. لأنه بيقول كلام علي مزاجهم.
زي مثلا: الكنيسة بتقول الصيام 55 يوم. فيطلع خادم يقول: ليه الصيام ده كله؟ والكنيسة ليه شديدة كده. ديه الناس طفشت منكم.
لكن هو أصلا مش شايف أن الناس موجودة والناس بتحب ربنا وبتصوم عادي.
أو مثلا خادم يأخد فصل مدارس الأحد ويأكلهم ماكدونالدز يوم الجمعة.
وزي دلوقتي: بعض الناس مش بيعجبهم تنبيهات الآباء الكهنة عن: اللبس الغلط – الكلام في الكنيسة غلط. فالناس عاوزة اللي علي مزاجها. حتى لو نهاية الطريق ده وحشة.
فده يبقي النبي بتاعهم يحبوه، لأنهم مبسوطين وعاوزين كده. مش عاوزين الصيام ولا أي حاجة. عاوزين العبادة المظهرية. الشكلية.
" سَالِكٌ بِالرِّيحِ" ... يعني: سالك بالباطل.
" لَكَانَ هُوَ نَبِيَّ هذَا الشَّعْبِ." ... ده يبقي علي مزاجهم ويعجبهم.
معني الآية: أن الناس مش عاوزين اللي يقولهم، أن اللي بيعملوه ده غلط. لكن عاوزين اللي يضحك عليهم، ويقولهم برافو.
الناس ديه مش عاوزين اللي يكلمهم عن الصوم والصلاة والمطانيات والتذلل والحياة الروحية. هما عاوزين اللي يضحك عليهم ويجاريهم. ويقولهم: أنتم كده كويسين خالص.
واللي يضحك علي الناس ويقولهم: أنتم كده كده كويسين، وخلاص أخدتم الخلاص. خلاص السيد المسيح له المجد.
12«إِنِّي أَجْمَعُ جَمِيعَكَ يَا يَعْقُوبُ. أَضُمُّ بَقِيَّةَ إِسْرَائِيلَ. أَضَعُهُمْ مَعًا كَغَنَمِ الْحَظِيرَةِ، كَقَطِيعٍ فِي وَسَطِ مَرْعَاهُ يَضِجُّ مِنَ النَّاسِ. لغاية الآية 11، كان الكلام صعب.. من أول الآية 12: هيبتدي يدي رجاء.
"إِنِّي أَجْمَعُ جَمِيعَكَ يَا يَعْقُوبُ." ... ربنا بيقولهم: أن مش هأسيبكم متشتتين وضايعين. هأجي أجمعكم.
"أَضُمُّ بَقِيَّةَ إِسْرَائِيلَ." ... اللي ضاعوا دول هأجيبهم.
"أَضَعُهُمْ مَعًا كَغَنَمِ الْحَظِيرَةِ، كَقَطِيعٍ فِي وَسَطِ مَرْعَاهُ يَضِجُّ مِنَ النَّاسِ." ... َضِجُّ: يعني ناس كتير أوي.
ربنا هيجمع المُشتتين. ربنا مش ممكن يسيب يعقوب، شعب الله.
أَضَعُهُمْ مَعًا كَغَنَمِ الْحَظِيرَةِ،" ... ديه تفكرنا بربنا يسوع ا لمسيح له المجد، لما قال: "وَلِي خِرَافٌ أُخَرُ لَيْسَتْ مِنْ هذِهِ الْحَظِيرَةِ، يَنْبَغِي أَنْ آتِيَ بِتِلْكَ أَيْضًا فَتَسْمَعُ صَوْتِي، وَتَكُونُ رَعِيَّةٌ وَاحِدَةٌ وَرَاعٍ وَاحِدٌ." ... الخراف الأُخر: هما الأمم. وبكده نبقي شعب واحد مع اليهود اللي آمنوا وهيأمنوا بعد كده. كلنا شعب المسيح له المجد.
" يَضِجُّ مِنَ النَّاسِ." ... هيجوا، لدرجة هيبقي في ضجيج. ناس كتير.
13قَدْ صَعِدَ الْفَاتِكُ أَمَامَهُمْ. يَقْتَحِمُونَ وَيَعْبُرُونَ مِنَ الْبَابِ، وَيَخْرُجُونَ مِنْهُ، وَيَجْتَازُ مَلِكُهُمْ أَمَامَهُمْ، وَالرَّبُّ فِي رَأْسِهِمْ». الْفَاتِكُ: يعني الغالب. المُنتصر. اللي بيفتك بالأعداء.
"يَقْتَحِمُونَ وَيَعْبُرُونَ مِنَ الْبَابِ، وَيَخْرُجُونَ مِنْهُ، وَيَجْتَازُ مَلِكُهُمْ أَمَامَهُمْ، وَالرَّبُّ فِي رَأْسِهِمْ." ... ديه نبوة عن السيد المسيح له المجد. يسوع المسيح له المجد، هو الفاتك. الذي فتك بالشيطان.
" يَقْتَحِمُونَ" ... ربنا يسوع المسيح له المجد، دخل ليقتحم الجحيم. وطلّع المسبيين من جوة. وأخدهم ودخل بيهم الفردوس.
يعبرون من الباب، ويخرجون من الجحيم. ويجتاز الملك أمامهم. والرب الملك في رأسهم، علشان يدخلهم الفردوس.
بعد ما كانت الصورة مُظلمة و ضلمة. ختم الاصحاح بصورة مُضيئة: الفاتك. المسيح يسوع له المجد الجبار. قهر الشيطان علي الصليب. وصعد الفاتك ربنا يسوع المسيح له المجد أمامهم. واحنا وراه الي الأبدية السعيدة.
واقتحم أبواب الجحيم. وخرّج معاه المسبيين الأبرار، اللي كانوا منتظرين علي رجاء، من الجحيم. من السجن.
⪢