⪡ 1قَوْلُ الرَّبِّ الَّذِي صَارَ إِلَى مِيخَا الْمُورَشْتِيِّ فِي أَيَّامِ يُوثَامَ وَآحَازَ وَحَزَقِيَّا مُلُوكِ يَهُوذَا، الَّذِي رَآهُ عَلَى السَّامِرَةِ وَأُورُشَلِيمَ: "قَوْلُ الرَّبِّ" ... ميخا النبي بيأكد أن ده كلام ربنا. مش كلامه هو.
"الَّذِي صَارَ إِلَى مِيخَا الْمُورَشْتِيِّ" ... الْمُورَشْتِيِّ: نسبة للقرية اللي كان منها ميخا النبي.
"فِي أَيَّامِ يُوثَامَ" ... ده ملك. وكان مُلكه لمدة 7 سنين، أثناء ما عُزيا أبوه ما كان لسه عايش. عُزيا الملك عمل غلطة كبيرة، وخلته يُصاب بالبَرص، ويُطرد من المملكة.. أنه دخل الهيكل وقدم بخور. وهو من سبط يهوذا، مش من سبط لاوي. الكهنة منعوه من أنه يعمل كده. لكن هو تجاسر ودخل الهيكل. وفي الوقت اللي كانوا بيمنعوه، وهو لسه مازال واقف قدام المذبح. أُصاب بالبَرص. ولما شاف نفسه كده. طردوه الكهنة بره الهيكل، وهو خرج يجري. وفضل لغاية ما مات وهو أبرص. وعلشان كده لم يُدفن في مقابر الملوك. (اخبار الأيام التاني 26.)
ابن عُزيا، يوثام الملك: أتولي الحكم وعُزيا أبوه كان عايش وقتها. وكانت مدة حُكمه 7 سنين. وبعد موت عُزيا أبوه، أتولي المملكة لمدة 16 سنة. اذاً اجمالي مدة حُكمه 23 سنة.
يوثام الملك: لما شاف أبوه أُصيب نتيجة مخالفته لربنا، عمل المستقيم في عيني الرب. وبالرغم من كده، لكن في غلطتين نُسبوا اليه:
- الغلطة الأولي: مكانش بيروح للهيكل يقدم العبادة. ويشترك في العبادة. (زي لما بيكون ناس: زي الملوك أو القادة أو بعض رجال الأعمال، وكأنهم مش فاضيين لربنا)
- الغلطة التانية: أن الشعب كان عايش في الخطايا وعبادة الأوثان. وهو مش فارق معاه، أن شعبه بعيد عن ربنا.
في أيام يوثام: عَمر وبني حاجات في هيكل ربنا. وبَني حاجة اسمها حصن يهوذا. والحصون ديه كانوا بيبنوها زمان علشان الحروب.
وفي أيامه: ملك راصين وملك السامرة، شنوا حرب علي مملكة يهوذا.
"وَآحَازَ" ... جه بعد يوثام الملك، ابنه أحاز. وكانت مدة حُكمه أو مُلكه 16 سنة. لكن للأسف مشي وراء عبادة الأوثان.
ومن ضمن أخطائه: أنه عبّر ابنه في النار، كنوع من الذبيحة للآوثان.
ولما اتعرض للحرب من راصين والسامرة. اتحالف مع ملك آشور. وده بدل ما يعتمد علي ربنا. بالرغم أن اشعياء النبي قاله متخافش، ربنا مش هيسيبك ومش هيسلمك للأعداء. بس هو مطمنش لكلام اشعياء النبي. وراح اتحالف مع ملك آشور.
وقبل وفاته: قامت حرب جديدة، فراح برده اتحالف مع ملك آشور. لكن للأسف ملك آشور مساعدهوش. لكن ضايقه.
"وَحَزَقِيَّا مُلُوكِ يَهُوذَا،" ... كان ملك كويس. مرة يجي ملك وحش ومرة ملك كويس. كل واحد علي حسب اللي بيتعلمه من اللي قبله. وبيتعلم من أخطاء اللي قبله.
اهتم أنه يرمم الهيكل ويوضبه. ودعي كل الشعب انهم يقدموا عبادة لربنا. وعمل نهضة روحية جميلة في عهده، وحركة توبة.
ولما ملك آشور: اللي كان أبو حزقيا الملك، بيتحالف معاه (مع ملك آشور). جه ملك آشور ده وبعت يهدد حزقيا الملك. فحزقيا الملك لجأ لإشعياء النبي، وقاله صلي. حزقيا الملك أخد الجوابات اللي جات له من الأعداء، جوابات التهديد. ونشرها علي المذبح قدام ربنا في الهيكل. (علي فكرة: من هنا اتعلمنا اننا نحط ورق الطِلبات بتاعتنا علي المذبح) وقال: يارب أنت شايف هو بيقول ايه. ووقتها ربنا أرسل ملاك، وضرب 185000 من جيش الأعداء. اتقتلوا من غير ما حزقيال يدخل في أي حروب.
وحزقيا الملك: مَرض مرض للموت، وجاله اشعياء النبي: وقاله أوصي أهل بيتك علشان أنت هتموت. وفي الأخر حزقيا الملك صلي لربنا، وربنا مد في عمره 15 سنة.
ودول كانوا التلات ملوك اللي كان بيعاصرهم ميخا النبي.
"الَّذِي رَآهُ عَلَى السَّامِرَةِ وَأُورُشَلِيمَ:" ... السامرة: عاصمة المملكة الشمالية.. أورشليم: عاصمة المملكة الجنوبية.
2اِسْمَعُوا أَيُّهَا الشُّعُوبُ جَمِيعُكُمْ. أَصْغِي أَيَّتُهَا الأَرْضُ وَمِلْؤُهَا. وَلْيَكُنِ السَّيِّدُ الرَّبُّ شَاهِدًا عَلَيْكُمُ، السَّيِّدُ مِنْ هَيْكَلِ قُدْسِهِ. مش اليهود بس. لكن الكلام لكل الشعوب.
"أَصْغِي أَيَّتُهَا الأَرْضُ وَمِلْؤُهَا. وَلْيَكُنِ السَّيِّدُ الرَّبُّ شَاهِدًا عَلَيْكُمُ، السَّيِّدُ مِنْ هَيْكَلِ قُدْسِهِ." ... ربنا لما بيقدم لينا تنبيه، بيشهّد علينا كل الشعوب والمخلوقات.
وكمان ربنا بنفسه هو الشاهد. هو اللي شايف كل الخطايا. كاشف كل الأسرار. فاحص القلوب.
أي حد فينا بيعمل خطية في الضلمة. هو ناسي أن ربنا عيناه تخترقان أستار الظلام.
فميخا النبي: بيقول للشعب (المملكتين الشمالية والجنوبية) خدوا بالكم، ربنا شايف كل حاجة بتعملوها.
فياريت منوصلش للمرحلة ديه. أن ربنا يقول للكل: أنا عملت كل ده مع شعبي، لكن شعبي مش ماشي في سكتي.
3فَإِنَّهُ هُوَذَا الرَّبُّ يَخْرُجُ مِنْ مَكَانِهِ وَيَنْزِلُ وَيَمْشِي عَلَى شَوَامِخِ الأَرْضِ، طبعا الله من جهة لاهوته، لا بيدخل ولا بيخرج. لأنه مالئ في كل مكان. مالئ الوجود. ملهوش مكان محدد.
بس التعبير هنا: أن الله هيبتدي يتحرك ضدنا. وهيبقي في كارثة أوعقاب. وطبعا لما المسيح له المجد خرج من مكانه، جاء للتجسد والخلاص. لكن في النبوة ديه: ربنا هيتحرك علشان يعاقب.
وطبعا في المجيء الأول: المسيح يسوع له المجد جه علشان يفدينا ويخلصنا. لكن في المجئ التاني: جاي علشان يدين العالم.
"وَيَنْزِلُ وَيَمْشِي عَلَى شَوَامِخِ الأَرْضِ،" ... الشوامخ: يعني حاجات عالية ومرتفعة.
معناها أن الله أعظم من الكل. فالناس المتكبرة اللي فاكرة نفسها، أن في ايديها هيحكموا علي الناس بالموت. ويقتلوا. الله هيكسر كبريائهم.
الواحد لما يتشطر، بيتشطر علي الضعفاء والغلابة. ويكش قدام الناس العظيمة. لكن ربنا مش كده. بالعكس: مع الضعيف ربنا يترفق. ويطبطب ويعول.. ومع العنيف المتكبر والشديد واللي فاكر نفسه كبير، الله يُخفض كبريائه.
علشان كده أحسن حاجة أن الواحد يقف قدام ربنا بكل تواضع.
4فَتَذُوبُ الْجِبَالُ تَحْتَهُ، وَتَنْشَقُّ الْوِدْيَانُ كَالشَّمْعِ قُدَّامَ النَّارِ. كَالْمَاءِ الْمُنْصَبِّ فِي مُنْحَدَرٍ. ونتيجة أن ربنا هيخرج من مكانه، ويفتقد الأرض، ويجي للناس المتكبرين:
"فَتَذُوبُ الْجِبَالُ تَحْتَهُ،" ... الجبال هتذوب قدام ربنا. ما بالك البشر، هيحصل لهم ايه قدام ربنا؟
علشان كده الواحد ميبقاش جبل قدام ربنا. يعني ميبقاش متكبر قدام ربنا. لكن خليك منخفض، علشان النعمة تملاك. خليك متواضع.
لكن قدام الشيطان خليك جبل. خليك شديد مع الشيطان والشهوات والضعفات والأخطاء. خليك شديد مع كل حاجة غلط.. ونقف قدام ربنا زي العشار. ونقول: اللهم ارحمني أنا الخاطئ.
"وَتَنْشَقُّ الْوِدْيَانُ كَالشَّمْعِ قُدَّامَ النَّارِ." ... الشمع بيسيح ويدوب قدام النار.
يعني ربنا داخل زي النار: الجبال تدوب قدامه. والوديان تنشق.
"كَالْمَاءِ الْمُنْصَبِّ فِي مُنْحَدَرٍ." ... محدش يقدر يقف قدامه. نازل زي الشلال.
يعني: محدش هيقدر يقف قدام غضب ربنا. غضب ربنا علي الأشرار.
احنا أولاد ربنا منخافش من أي حاجة. معانا إله جبار قدير قوي
5كُلُّ هذَا مِنْ أَجْلِ إِثْمِ يَعْقُوبَ، وَمِنْ أَجْلِ خَطِيَّةِ بَيْتِ إِسْرَائِيلَ. مَا هُوَ ذَنْبُ يَعْقُوبَ؟ أَلَيْسَ هُوَ السَّامِرَةَ؟ وَمَا هِيَ مُرْتَفَعَاتُ يَهُوذَا؟ أَلَيْسَتْ هِيَ أُورُشَلِيمَ؟ لو سألنا طيب ليه يارب هتسيب مكانك، وهتسيب رحمتك، وتبدأ تعاقب؟
فربنا يجاوب: من أجل خطاياكم.
فيردوا علي ربنا.. "مَا هُوَ ذَنْبُ يَعْقُوبَ؟ أَلَيْسَ هُوَ السَّامِرَةَ؟ وَمَا هِيَ مُرْتَفَعَاتُ يَهُوذَا؟ أَلَيْسَتْ هِيَ أُورُشَلِيمَ؟" ... (زي اللي يقول وهو غلطان، ده أنا أحسن من غيري بكتير، أخطائي مش حاجة كبيرة زي ناس تانية. احنا عملنا ايه علشان نستحق العقاب ده كله؟)
فربنا يرد عليهم.. أَلَيْسَ هُوَ السَّامِرَةَ؟ ... عاوز تعرف ايه هو الذنب والخطية؟ أتمشي في السامرة، وشوف الأوثان ومعابدهم اللي في كل حتة. والنجاسات اللي مالية الشوارع والمرتفعات والبيوت وكل مكان.
"كُلُّ هذَا مِنْ أَجْلِ إِثْمِ يَعْقُوبَ، وَمِنْ أَجْلِ خَطِيَّةِ بَيْتِ إِسْرَائِيلَ." ... ربنا نازل وهيعاقب، علشان خطية يعقوب واسرائيل. كل ده بسبب الخطية.
يعقوب واسرائيل، عبارة عن كل شخص فينا. ربنا زعلان وبيقول أن في خطية. طيب يارب أعمل ايه؟ ربنا يقولنا : توبوا. توبة من كل قلوبكم. ارجعوا ليا.
ربنا أصلا مش عاوز يعاقب أولاده ويأدبهم. ربنا عاوز الانسان يبقي كويس. ويقدم توبة. ربنا بيرفع غضبه عن الانسان، لما يقدم توبة حقيقية. وده شوفناه في مدينة نينوي. وشوفناه مع اللص اليمين.
وزي ما قال العشار: اللهم ارحمني أنا الخاطئ. "فنزل مُبرراً" الله مش صعب في تعاملاته. أهم حاجة اننا نقدم توبة واعتراف. ونرجع لحضنه من تاني.
القديس يوحنا ذهبي الفم يقول تعبير جميل جدا: هل أخطاءت؟ حسناً. قل له اني أخطأت. ما الصعوبة في هذا.
روح لربنا وقوله: أنا غلطان. مفيهاش صعوبة. وربنا سريع الغفران والعفو بينسي، طالما التوبة من القلب بجد.
ربنا مش قصده يخوفنا. لكن قصده يرجعّنا لحضنه من تاني. عاوزنا نبقي كويسين.
"مَا هُوَ ذَنْبُ يَعْقُوبَ؟ أَلَيْسَ هُوَ السَّامِرَةَ؟ وَمَا هِيَ مُرْتَفَعَاتُ يَهُوذَا؟ أَلَيْسَتْ هِيَ أُورُشَلِيمَ؟" ... معناها: يعني يارب ايه هي غلطة اسرائيل أو يعقوب؟
فيقول: بص علي السامرة وشوف.. " أَلَيْسَ هُوَ السَّامِرَةَ؟" ... كلها علي بعض وحشة.
"وَمَا هِيَ مُرْتَفَعَاتُ يَهُوذَا؟ أ" ... اللي هي أورشليم.
" مُرْتَفَعَاتُ" ... ليها معنايين:
1- لما كانوا بيعبدوا الاوثان. كانوا بيحطوا الأوثان ديه، فوق المرتفعات. فصارت كلمة المرتفعات: كناية عن عبادة الأوثان.
2- والمرتفعات: معناها الشموخ والكبرياء.. وسكان العاصمة، دايما بيفتخروا انهم من العاصمة. ففيها حتة ارتفاع وكبرياء. لأن ميخا النبي كان من القرية.
اذاّ ذنب يعقوب، هو السامرة.
فكأن أورشليم بكبريائهم وانحرافهم لعبادة الأوثان علي المرتفعات، سببوا غضب ربنا عليهم.
6«فَأَجْعَلُ السَّامِرَةَ خَرِبَةً فِي الْبَرِّيَّةِ، مَغَارِسَ لِلْكُرُومِ، وَأُلْقِي حِجَارَتَهَا إِلَى الْوَادِي، وَأَكْشِفُ أُسُسَهَا. السامرة كانت بلد جميلة. وفيها حضارة. لكن هتبقي خربانة، لأن فيها خطية.
"مَغَارِسَ لِلْكُرُومِ، وَأُلْقِي حِجَارَتَهَا إِلَى الْوَادِي، وَأَكْشِفُ أُسُسَهَا." ... الأسس بتاعتها لما تنكشف، يعني في خراب. الأسس يعني: الأساسات، كلها هتتهدم.
"مَغَارِسَ لِلْكُرُومِ،" ... يعني زي واحد جايب ماكينة المحراث، علشان يجهز الأرض بتاعته. بس يفضل رايح جاي علي الأرض، لغاية ما يبوظها.
ربنا طيب جدا مع أولاده. وشديد جدا مع المخالفين. زي ما حصل مع حنانيا وسفيرة.
وزي ما ربنا دخل الهيكل يوم أحد السعف، وكان معه كرباج وطرد الباعة.
والواحد كأب وأم في البيت: الأب لازم يكون ليه هيبة. والأم تحافظ علي هيبة زوجها، علشان الأولاد يتربوا صح.
ولازم الأب يكن عنده هيبة بالإضافة لأبوته. علشان الأولاد ميتكسروش.
الأب لازم يكون شديد وحنين. يبقي عنده حزم. وحنية يعرف يطبطب. لأن لو عنده واحدة بس، ده هيضيع ويكسر الأولاد.
فلازم يوضح لأولاده: أنا بأحبكم وفي نفس الوقت خايف عليكم.
7وَجَمِيعُ تَمَاثِيلِهَا الْمَنْحُوتَةِ تُحَطَّمُ، وَكُلُّ أَعْقَارِهَا تُحْرَقُ بِالنَّارِ، وَجَمِيعُ أَصْنَامِهَا أَجْعَلُهَا خَرَابًا، لأَنَّهَا مِنْ عُقْرِ الزَّانِيَةِ جَمَعَتْهَا وَإِلَى عُقْرِ الزَّانِيَةِ تَعُودُ». "وَجَمِيعُ تَمَاثِيلِهَا الْمَنْحُوتَةِ تُحَطَّمُ،" ... كله هيتحطم وهيتكسّر.
"وَكُلُّ أَعْقَارِهَا تُحْرَقُ بِالنَّارِ،" ... الأعقار: يعني الأجرة.
"وَجَمِيعُ أَصْنَامِهَا أَجْعَلُهَا خَرَابًا، لأَنَّهَا مِنْ عُقْرِ الزَّانِيَةِ جَمَعَتْهَا وَإِلَى عُقْرِ الزَّانِيَةِ تَعُودُ." ... كلمة الزانية: معناها البلد اللي مشيت وراء الأوثان.
لأن المفروض البشرية: هي عروس لله. ولما بتسيب ربنا، وتروح لإله غريب، فده اسمه زنا روحي. فهي جمعت كل التماثيل الوثنية. علشان كده بقت زانية. وجابتها من بلد تانية زانية، اللي هي آشور..
التماثيل المنحوتة اللي بتتحطم، مش بس الأصنام.
كل واحد فينا ممكن يكون عنده تمثال، عامله لنفسه، وبيعبده حد يكون مهتم بـ المال – جمال الجسد - الكرامة - كلمته: كلمتي مينفعش تنزل الأرض - ....... وهكذا.
كل ده بيعطلنا عن التوبة والتناول وعن ربنا. وقتها ربنا بيحطم كل التماثيل اللي في حياتنا واللي بنتكل عليها. لأنه بيضيعنا وبيعطلنا عن ربنا.
8مِنْ أَجْلِ ذلِكَ أَنُوحُ وَأُوَلْوِلُ. أَمْشِي حَافِيًا وَعُرْيَانًا. أَصْنَعُ نَحِيبًا كَبَنَاتِ آوَى، وَنَوْحًا كَرِعَالِ النَّعَامِ. علشان كده ميخا النبي زعلان، من اللي قاله ربنا. لأنه زعلان علي شعبه.
"مِنْ أَجْلِ ذلِكَ أَنُوحُ وَأُوَلْوِلُ." ... ديه المشاعر الجميلة بتاعة رجال الله. ده كمان بيبكي ويولول.
"أَمْشِي حَافِيًا وَعُرْيَانًا." ... كل ده نوع من أنواع الزعل علي شعبه.
"أَصْنَعُ نَحِيبًا كَبَنَاتِ آوَى،" ... بَنَاتِ آوَى: نوع من أنواع حيوانات البرية. زي التعلب. بيعيش في الأماكن الخربانة. وصوته كأن حد بيعيط. نحيب. صوته وحش.
"وَنَوْحًا كَرِعَالِ النَّعَامِ." ... رِعَالِ النَّعَامِ: رعال، يعني قطيع. والنعام وهو بيجري، بيبقي ليهم أصوات زي صوت البكاء.
ميخا النبي: زعلان علشان الشعب ماشي غلط. وربنا عمال ينبههم. وهما مش عاوزين ينتبهوا، ولا يتوبوا.
9لأَنَّ جِرَاحَاتِهَا عَدِيمَةُ الشِّفَاءِ، لأَنَّهَا قَدْ أَتَتْ إِلَى يَهُوذَا، وَصَلَتْ إِلَى بَابِ شَعْبِي إِلَى أُورُشَلِيمَ. طيب زعلان ليه يا ميخا؟
"لأَنَّ جِرَاحَاتِهَا عَدِيمَةُ الشِّفَاءِ،" ... الجرح عديم الشفاء، اللي هو مش بيتعالج. خلاص مفيش أمل من العلاج.
وجايز في بعض الأحيان، يتطلب بتر عضو من الجسم، لأن خلاص ملهوش علاج.
"لأَنَّهَا قَدْ أَتَتْ إِلَى يَهُوذَا، وَصَلَتْ إِلَى بَابِ شَعْبِي إِلَى أُورُشَلِيمَ." ... الجراحات أو الخطية أو الفساد، وصل لشعب الله. فبقت وكأنها عديمة الشفاء.
وديه القصة اللي جت في سفر الملوك التاني 18 : 13 "وَفِي السَّنَةِ الرَّابِعَةَ عَشَرَةَ لِلْمَلِكِ حَزَقِيَّا، صَعِدَ سَنْحَارِيبُ مَلِكُ أَشُّورَ عَلَى جَمِيعِ مُدُنِ يَهُوذَا الْحَصِينَةِ وَأَخَذَهَا."
فبقي الجرح غير قابل للشفاء.
10لاَ تُخْبِرُوا فِي جَتَّ، لاَ تَبْكُوا فِي عَكَّاءَ. تَمَرَّغِي فِي التُّرَابِ فِي بَيْتِ عَفْرَةَ. ويكمل ميخا النبي:
"لاَ تُخْبِرُوا فِي جَتَّ،" ... جَتَّ: بلد بتاعة الفلسطنيين، الأعداء.. يعني: متقولوش عندهم الكلام ده، لأحسن يشتموا فينا.
"لاَ تَبْكُوا فِي عَكَّاءَ." ... عَكَّاءَ: برده بلد من بلاد فلسطين.. مش عاوزين خبر، أن ربنا زعلان مننا، يوصل للأعداء. علشان هيشمتوا فينا برده.
هيبتدي ميخا النبي يذكر بعض المدن. وكل مدينة ليها معني. وأعطي ليها كلمة مناسبة لهذا المعني.
"تَمَرَّغِي فِي التُّرَابِ فِي بَيْتِ عَفْرَةَ." .. عَفْرَةَ: كلمة معناها تراب.. لأن اللغة العبرية قريبة من اللغة العربية. الاتنين من جذر واحد. لأن الاتنين من أصل واحد. هو أبونا ابراهيم، وجه منه اسماعيل واسحق.
فاللغة العبرية قريبة جدا من اللغة العربية، مع تبديل الحروف.
" عَفْرَةَ." ... هي كلمة العُفار. التراب.
" بَيْتِ عَفْرَةَ." ... معناها: مدينة التراب.. فقالها: تمرغي في التراب، يا مدينة التراب.
يارب مش عاوزين نوصل لدرجة أن أعداء الايمان يشمتوا فينا، ويقولوا: فين إلههم. لازم نلحق نفسنا ونقدم توبة، قبل ما نوصل للمراحل ديه.
"تَمَرَّغِي فِي التُّرَابِ فِي بَيْتِ عَفْرَةَ." ... معناها: نقدم توبة.
11اُعْبُرِي يَا سَاكِنَةَ شَافِيرَ عُرْيَانَةً وَخَجِلَةً. السَّاكِنَةُ فِي صَانَانَ لاَ تَخْرُجُ. نَوْحُ بَيْتِ هَأَيْصِلَ يَأْخُذُ عِنْدَكُمْ مَقَامَهُ، شَافِير: معناها جميل. المدينة الجميلة، هتبقي عريانة وخجلة (خجلانة) العُري. معناها: أن وحاشة الانسان بتبان.
"السَّاكِنَةُ فِي صَانَانَ لاَ تَخْرُجُ." ... صَانَانَ: معناها الخروج. يعني: اللي ساكنة في بلد اسمها: الخروج، متخرجش. علشان هتتفضحي.
"نَوْحُ بَيْتِ هَأَيْصِلَ يَأْخُذُ عِنْدَكُمْ مَقَامَهُ،" ... هَأَيْصِلَ: معناها الأصالة والمقام العالي. يابتوع الأصالة، هيبقي في نوح قاعد عندكم.
الخروج عاريين (عريانين) ... علامة الهزيمة. لأن زمان لما كان بيحصل حرب، وبيجي ملك ينتصر. بيأخد جنود الأعداء، ويعيّرهم ويأخدهم عريانين لغاية بلده. علامة أنهم مهزومين. رمز للاهانة.
12لأَنَّ السَّاكِنَةَ فِي مَارُوثَ اغْتَمَّتْ لأَجْلِ خَيْرَاتِهَا، لأَنَّ شَرًّا قَدْ نَزَلَ مِنْ عِنْدِ الرَّبِّ إِلَى بَابِ أُورُشَلِيمَ. مَارُوثَ: معناها بالعربي المُر. البلد اسمها المُر.كان فيها خير، وبقي مُر. فاغتمت.
"لأَنَّ شَرًّا قَدْ نَزَلَ مِنْ عِنْدِ الرَّبِّ إِلَى بَابِ أُورُشَلِيمَ." ... الشر، بسبب خطاياهم.
13شُدِّي الْمَرْكَبَةَ بِالْجَوَادِ يَا سَاكِنَةَ لاَخِيشَ، هِيَ أَوَّلُ خَطِيَّةٍ لابْنَةِ صِهْيَوْنَ، لأَنَّهُ فِيكِ وُجِدَتْ ذُنُوبُ إِسْرَائِيلَ. لاَخِيشَ: معناها سريعة. شدي المركبة يا سريعة. شدي المركبة. معناها حاجة من الاتنين:
- يأما : رايح يحارب. - أو : هربان من وجه العدو.
فمعناها: أن الناس دول انهزموا. شدي المركبة واهربي واخرجي.
"هِيَ أَوَّلُ خَطِيَّةٍ لابْنَةِ صِهْيَوْنَ، لأَنَّهُ فِيكِ وُجِدَتْ ذُنُوبُ إِسْرَائِيلَ." ... يقولوا: أن لاخيش ديه أقرب مدينة لأورشليم. وكان فيها عبادة أوثان. فالناس اتعملوا منها. علشان كده سماها ... "هِيَ أَوَّلُ خَطِيَّةٍ لابْنَةِ صِهْيَوْنَ،"
14لِذلِكَ تُعْطِينَ إِطْلاَقًا لِمُورَشَةِ جَتَّ. تَصِيرُ بُيُوتُ أَكْزِيبَ كَاذِبَةً لِمُلُوكِ إِسْرَائِيلَ. مُورَشَةِ جَتَّ: اسم مدينة. معناها مملكة جت، بتاعة فلسطين.
"تَصِيرُ بُيُوتُ أَكْزِيبَ كَاذِبَةً لِمُلُوكِ إِسْرَائِيلَ." ... أَكْزِيبَ: يعني كذب – خداع.
البلد اللي كان المفروض أنها تبقي أمينة للملك، بقت كاذبة. مش مُخلصة ليه.
لاَخِيشَ .. اتذكرت في سفر الملوك التاني 18: 14. "وَأَرْسَلَ حَزَقِيَّا مَلِكُ يَهُوذَا إِلَى مَلِكِ أَشُّورَ إِلَى لَخِيشَ (الملك كان مُعسكر فيها) يَقُولُ: قَدْ أَخْطَأْتُ. ارْجعْ عَنِّي، (يعني أنا غلطت) وَمَهْمَا جَعَلْتَ عَلَيَّ حَمَلْتُهُ. (يعني قرر عليا غرامة. واللي هتقوله، هأدفعه)
فَوَضَعَ مَلِكُ أَشُّورَ عَلَى حَزَقِيَّا مَلِكِ يَهُوذَا ثَلاَثَ مِئَةِ وَزْنَةٍ مِنَ الْفِضَّةِ وَثَلاَثِينَ وَزْنَةً مِنَ الذَّهَبِ. (طالما هتدفع الغرامة ديه، يبقي خلاص مش هأحاربك).
فَدَفَعَ حَزَقِيَّا جَمِيعَ الْفِضَّةِ الْمَوْجُودَةِ فِي بَيْتِ الرَّبِّ وَفِي خَزَائِنِ بَيْتِ الْمَلِكِ.
فِي ذلِكَ الزَّمَانِ قَشَّرَ حَزَقِيَّا الذَّهَبَ عَنْ أَبْوَابِ هَيْكَلِ الرَّبِّ وَالدَّعَائِمِ الَّتِي كَانَ قَدْ غَشَّاهَا حَزَقِيَّا مَلِكُ يَهُوذَا، وَدَفَعَهُ لِمَلِكِ أَشُّورَ. (وديه كانت علامة الخراب والضياع.)
وَأَرْسَلَ مَلِكُ أَشُّورَ تَرْتَانَ وَرَبْسَارِيسَ وَرَبْشَاقَى مِنْ لَخِيشَ إِلَى الْمَلِكِ حَزَقِيَّا بِجَيْشٍ عَظِيمٍ إِلَى أُورُشَلِيمَ، (بعد ما حزقيا الملك أداله الغرامة، ملك أشور بعت لحزقيا الملك جيش يحاربه. فكان في منتهي الذل. جمّع كل الفضة والذهب اللي في الهيكل وفي بيت الملك حزقيا نفسه. وأداهم لملك آشور. وبعد كل ده، بعت لحزقيا الملك الجيش بتاعه.) "
15آتِي إِلَيْكِ أَيْضًا بِالْوَارِثِ يَا سَاكِنَةَ مَرِيشَةَ. يَأْتِي إِلَى عَدُلاَّمَ مَجْدُ إِسْرَائِيلَ. مَرِيشَةَ: معناها وارثة.. معناها: حد غريب هيجي يورثك.
"يَأْتِي إِلَى عَدُلاَّمَ مَجْدُ إِسْرَائِيلَ." ... عَدُلاَّمَ: معناها ملجأ.
وكانت مشهورة بالكهوف بتاعته. المعني: أعظم ناس في اسرائيل، زي الملوك والرؤوساء والقضاة، هيحاولوا يجروا يستخبوا في الكهوف بتاعة عَدُلاَّمَ.. لأنهم مش قادرين يواجهوا الجيوش ولا الحصار.
16كُونِي قَرْعَاءَ وَجُزِّي مِنْ أَجْلِ بَنِي تَنَعُّمِكِ. وَسِّعِي قَرْعَتَكِ كَالنَّسْرِ، لأَنَّهُمْ قَدِ انْتَفَوْا عَنْكِ. في العهد القديم القرعة، من علامات الحزن.
واحزني علي أولادك وعلي بيتك و أراضيكي وعلي المملكة اللي بتضيع منهم.
"وَسِّعِي قَرْعَتَكِ كَالنَّسْرِ،" ... البني آدم ممكن الصلع يجي في شعر رأسه. لكن النسر لما بيكبر في السن، ريشه كله بيقع.. يعني: هتبقي زي النسر اللي عجّز وفقد كل ريشه ومبقاش قادر يطير. فلما يجي الأعداء يحاصروكي، مش هتعرفي تهربي.
"لأَنَّهُمْ قَدِ انْتَفَوْا عَنْكِ." ... كنتِ زمان نسر، قوية. تقدري تنقضي علي الأعداء، زي اللي بينقض علي الفريسة. وده علشان كان ربنا معاكي. وكنتِ ماشية مع ربنا.
لكن دلوقتي بقيتِ زي النسر اللي فقد ريشه. وهتقعي في الفخ. والأعداء هيهجموا عليكي ويمسكوكِ.
كأنه بيقول لبنت الشعب، اللي عايشة في الخطية، قومي اعملي حداد. وكان من ضمن الحداد: أن الواحد يحلق شعره. ويعيش علي التراب والرماد والمسوح. وكأنه بيقدم توبة لربنا.
ربنا يدينا اننا نقدم توبة حقيقية. وتكون تحذيرات الأنبياء بالنسبة لنا، تساعدنا علي أن قلوبنا تتحرك للتوبة
⪢