⪡ 1رُؤْيَا عُوبَدْيَا: هكَذَا قَالَ السَّيِّدُ الرَّبُّ عَنْ أَدُومَ: سَمِعْنَا خَبَرًا مِنْ قِبَلِ الرَّبِّ وَأُرْسِلَ رَسُولٌ بَيْنَ الأُمَمِ: «قُومُوا، وَلْنَقُمْ عَلَيْهَا لِلْحَرْبِ». "رُؤْيَا عُوبَدْيَا" ... كلمة رؤيا، مش شرط أنه يكون شاف حاجة معينة بعينه. لأن عوبديا النبي هنا مشافش حاجة. لكن ربنا أداله كلام يقوله.
رؤيا: بمعني نبوة.
"هكَذَا قَالَ السَّيِّدُ الرَّبُّ عَنْ أَدُومَ:" ... رسالة وكلام ربنا عن أدوم.
"سَمِعْنَا خَبَرًا مِنْ قِبَلِ الرَّبِّ وَأُرْسِلَ رَسُولٌ بَيْنَ الأُمَمِ:" ... الرسول قال:
"قُومُوا، وَلْنَقُمْ عَلَيْهَا لِلْحَرْبِ." ... عقاب ربنا لأدوم، أنه هيهيج عليهم الأمم.
ان كنت أنا بأضرب وأعاقب وأدب شعبي. وأنت يا أدوم تشمت فيهم، فمش أنا اللي هأضربك. لكن هأهيج علي الشعوب اللي حواليك.
ربنا استخدم الأمم علشان يأدب بيهم شعب أدوم.
" وَأُرْسِلَ رَسُولٌ بَيْنَ الأُمَمِ:" ... وده نبوة عن العهد الجديد. وأن الأمم هيكون ليهم نصيب في علاقتهم مع ربنا.
الأمم: هما كل الشعوب ما عدا اليهود. (في العهد القديم: الشعوب منقسمة لقسمين: اليهود. والأمم، اللي مش بيعرفوا ولا بيأمنوا بربنا)
اليهود كانوا يظنون أن ربنا بتاعهم هما وبس. وهما شعب الله المختار. واليهود كانوا بيقولوا علي الأمم: كلاب. ملهوش قيمة. ولا نصيب مع الله.
ربنا اختار شعب اسرائيل، علشان ربنا يسوع المسيح له المجد منه. ولغاية النهاردة: هما حاسين أنهم أحسن الشعوب.
فهنا: ربنا بيبعت ناس من الأمم المحيطة بأدوم، علشان يجمعوا نفسهم، ويستعدوا للحرب ضد مملكة أدوم. اللي شمتوا في شعب اسرائيل، شعب ربنا. لما بابل هجمت علي اورشليم.
2« إِنِّي قَدْ جَعَلْتُكَ صَغِيرًا بَيْنَ الأُمَمِ. أَنْتَ مُحْتَقَرٌ جِدًّا. "إِنِّي قَدْ جَعَلْتُكَ صَغِيرًا بَيْنَ الأُمَمِ." ... ربنا بيقول لأدوم، هأخليك صغير بين الأمم.
"أَنْتَ مُحْتَقَرٌ جِدًّا." ... كلمة قاسية جدا. لأنه مفتكر نفسه ياما هنا ياما هناك.
شعب أدوم حاليا، ملهوش وجود. مفيش شعب حاليا اسمه أدوم. من أجل كبريائهم، انتهوا.
لما حد يقف قدام ربنا، ويقول لربنا: أنا أقل الناس وأنا ضعيف. ويقف قدام ربنا بكل اتضاع. فربنا يرفعه.
ربنا دايما بيقف ضد المستكبرين. ضد المتكبر. "انزل الأعزاء عن الكراسي. ورفع المتضعين. أشبع الجياع خيرات. وصرف الأغنياء فارغين"
"يقاوم الله المستكبرين." ... الوحيد اللي ربنا يقاومه ويحطمه، هو المتكبر. عمرنا ما سمعنا أن ربنا بيقاوم الخطاة: الزناة والكذابين والقتلة ....، كل دول غلابة، وربنا بيشفق عليهم. وبيقولهم: توبوا.
لأن الكبرياء هو خطية الشيطان. والانسان المتكبر لازم ربنا يذله، علشان يعرف أنه غلطان.
كل ما الانسان يكبر في نظر نفسه، كل ما يصغر في عين ربنا.
أي حد هيفتكر أنه حاجة، وهيشوف نفسه أنه حاجة مهمة ... ربنا هيقوله " أَنْتَ مُحْتَقَرٌ جِدًّا."
لأن احنا أساسا قيمتنا في ربنا. مش من نفسنا. فبلاش نخلي الشيطان يضحك علينا. ويلعب بينا، ونفتكر اننا حاجة. لكن نرد علي الشيطان ونقوله: احنا تراب.
3تَكَبُّرُ قَلْبِكَ قَدْ خَدَعَكَ أَيُّهَا السَّاكِنُ فِي مَحَاجِئِ الصَّخْرِ، رِفْعَةَ مَقْعَدِهِ، الْقَائِلُ فِي قَلْبِهِ: مَنْ يُحْدِرُنِي إِلَى الأَرْضِ؟ "تَكَبُّرُ قَلْبِكَ قَدْ خَدَعَكَ" ... لو أنت متواضع، كنت عرفت مقام نفسك، ومكنتش تقع.
"أَيُّهَا السَّاكِنُ فِي مَحَاجِئِ الصَّخْرِ،" ... مَحَاجِئِ الصَّخْرِ: دارسي الكتاب المقدس بيقولوا: أن المنطقة اللي كانوا ساكنين فيها، كانت جبال عالية جدا، لدرجة أن مكانش حد يقدر يوصلهم. وعندهم: شقوق وكهوف بين الصخور.
والأعداء ميقدروش عليهم. فديه خلتهم يثقوا في أنفسهم بزيادة.
وديه اشارة للأنسان اللي بيحتمي بأشياء، بيظن أنها بتحميه. زي مثلا انسان مسنود علي فلوسه أو وظيفته أو مركزه أو علاقاته الاجتماعية. فهو كده ساكن في محاجئ الصخر. فمثلا اللي متكل علي مركزه، أو علاقاته المهمة، الناس تخاف منه ، لأن ممكن بمكالمة تليفون يعمل اللي هو عاوزه.
فهما فاكرين أنهم متحصنين بمحاجئ الصخر. بس هنشوف بعد كده هيحصل لهم ايه.
"رِفْعَةَ مَقْعَدِهِ،" ... المقعد بتاعه مرفوع فوق. أصله فوق الجبال. لأن بيوتهم كانت علي الجبال فوق. عالية فوق الجبال.
"الْقَائِلُ فِي قَلْبِهِ: مَنْ يُحْدِرُنِي إِلَى الأَرْضِ؟" ... بيقول لنفسه: مين يقدر يجيبني أو يوصل لي؟
كلام أدوم ده يفكرنا ب اشعياء 14: 12 لـ 15: "كَيْفَ سَقَطْتِ مِنَ السَّمَاءِ يَا زُهَرَةُ، بِنْتَ الصُّبْحِ؟ كَيْفَ قُطِعْتَ إِلَى الأَرْضِ يَا قَاهِرَ الأُمَمِ؟
وَأَنْتَ قُلْتَ فِي قَلْبِكَ: أَصْعَدُ إِلَى السَّمَاوَاتِ. أَرْفَعُ كُرْسِيِّي فَوْقَ كَوَاكِبِ اللهِ، وَأَجْلِسُ عَلَى جَبَلِ الاجْتِمَاعِ فِي أَقَاصِي الشَّمَالِ. أَصْعَدُ فَوْقَ مُرْتَفَعَاتِ السَّحَابِ. أَصِيرُ مِثْلَ الْعَلِيِّ. لكِنَّكَ انْحَدَرْتَ إِلَى الْهَاوِيَةِ، إِلَى أَسَافِلِ الْجُبِّ."
الشيطان هو مصدر كل كبرياء ... أضع كرسيّ فوق كراسي العليّ. فكر الكبرياء، ده فكر شيطاني.
نخلي بالنا، لأحسن الشيطان يضحك علينا ويقولنا: ان لينا قيمة. أصلا احنا منساوش حاجة من غير ربنا. ربنا الساكن فينا. قيمتنا واخديناها من ربنا، لأننا أولاده.
فكأن ربنا بيستدعي أدوم، عن طريق عوبديا النبي. وبيقوله: تعالي علشان تتحاكم. فيرد أدوم ويقول: مين يقدر يجيبني ويوصلي ويقبض عليا؟ ده أنا في محاجئ الصخر.
هما فاكرين أنهم محمين في الكهوف والصخور اللي في الجبال. لكن اللي بيحمي بجد، هو الله، صخرة الدهور. ربنا والهنا ومخلصنا يسوع المسيح. اللي بيحمينا هو اسم ربنا له كل المجد. "اسم الرب برج حصين. يركض اليه الصديق ويتمنّع."
4إِنْ كُنْتَ تَرْتَفِعُ كَالنَّسْرِ، وَإِنْ كَانَ عُشُّكَ مَوْضُوعًا بَيْنَ النُّجُومِ، فَمِنْ هُنَاكَ أُحْدِرُكَ، يَقُولُ الرَّبُّ. فيجي الرد عليه: لو أنت مستخبي، حتي لو فين. هأجيبك. خطية الكبرياء بتضايق ربنا أوي. لأنها نفسها خطية الشيطان. وكل اللي بيمشي في خطية الكبرياء، بيبقي شغال مع الشيطان.
"إِنْ كُنْتَ تَرْتَفِعُ كَالنَّسْرِ، وَإِنْ كَانَ عُشُّكَ مَوْضُوعًا بَيْنَ النُّجُومِ،" ... بيرتفع كالنسر. وعشه موجود بين النجوم. فربنا بيقوله:
"فَمِنْ هُنَاكَ أُحْدِرُكَ، يَقُولُ الرَّبُّ." ... سطانائيل كان كده، متكبر. ونزل من السماء. وبقي الشيطان بعد كده.
فربنا بيقوله: هأجيبك. هأجيبك. مهما كنت فين.
5إِنْ أَتَاكَ سَارِقُونَ أَوْ لُصُوصُ لَيْل. كَيْفَ هَلِكْتَ! أَفَلاَ يَسْرِقُونَ حَاجَتَهُمْ؟ إِنْ أَتَاكَ قَاطِفُونَ أَفَلاَ يُبْقُونَ خُصَاصَةً؟ "إِنْ أَتَاكَ سَارِقُونَ أَوْ لُصُوصُ لَيْل. كَيْفَ هَلِكْتَ! أَفَلاَ يَسْرِقُونَ حَاجَتَهُمْ؟" ... يعني السارقون، هيسرقوا وجايز يسيبوا حاجة ميأخدوهاش معاهم، لأنهم بيسرقوا اللي هينفعهم بس. لكن أنا هأجي عندك، مش هأسيب لك أي حاجة. هأضيعك.
لو جم سارقون، وأنت في محاجئ الصخر، هيسرقوا.
"إِنْ أَتَاكَ قَاطِفُونَ أَفَلاَ يُبْقُونَ خُصَاصَةً؟" ... القاطفون: دول الناس اللي بيهجموا علي المزارع. وبينهبوا الزرع.
وخصوصا العنب. دول في الأخر هيسيبولك خُصَاصَةً: يعني بواقي من الزرع.
في وسط الآية قال " كَيْفَ هَلِكْتَ!" ... وكأن ربنا زعلان علي عيسو أوي.
لو جالك لصوص، هيسرقوا حاجتهم، اللي هتنفعهم. لكن أنا هأخليك تهلك. هأضيعك. كل محصولك وكل حاجتك مش هيتبقي منها حاجة خالص.
6كَيْفَ فُتِّشَ عِيسُو وَفُحِصَتْ مَخَابِئُهُ؟ "كَيْفَ فُتِّشَ عِيسُو" ... أنت يا عيسو اتفتشت
"وَفُحِصَتْ مَخَابِئُهُ؟" ... والمخابئ بتاعتك اتفحصت.
بمعني: أنت عامل نفسك مستخبي. لكن هتتفتش. وهتُفحص مخابئك. يا عيسو أنت عامل نفسك أن محدش يقدر يوصلك.
الشيطان هدفه دايما: تدمير كل حاجة غالية عندنا. الشيطان هيفحص كويس أوي حواسنا، هل فيها ثغرات، يقدر يدخل منها؟ ولو لقي ثغرة. هيدخل علطول. وطول ما الواحد سايب للشيطان نفسه، هيدمر الانسان ويضيعه.
7طَرَدَكَ إِلَى التُّخْمِ كُلُّ مُعَاهِدِيكَ. خَدَعَكَ وَغَلَبَ عَلَيْكَ مُسَالِمُوكَ. أَهْلُ خُبْزِكَ وَضَعُوا شَرَكًا تَحْتَكَ. لاَ فَهْمَ فِيهِ. "طَرَدَكَ إِلَى التُّخْمِ كُلُّ مُعَاهِدِيكَ." ... مُعَاهِدِيكَ: الناس اللي عملوا معاك عهد. وقالولك احنا أصحابك. ومش ممكن هنسيبك.
" التُّخْمِ" ... يعني الحدود. حدود مملكتهم.
"خَدَعَكَ وَغَلَبَ عَلَيْكَ مُسَالِمُوكَ." ... كانوا مسالمين معاك. لكن خدعوك وغلبوك.
وده زي الابن الضال، أخد فلوس أبوه. وصرفها علي أصدقاء السوء. ولما حصلت المجاعة، محدش ساعده، لما أحتاج. كلهم سابوه.
وهي ديه صداقات أهل العالم، اللي فيها شر.
عيسو (أدوم) قاعد في مخابئ الصخر. وعامل معاهدات مع الناس. والناس بتسالموه، ومتفقين مع بعض. لكن ساعة الجد: ل المخابئ نفعت. ولا الناس ساعدته.
"أَهْلُ خُبْزِكَ وَضَعُوا شَرَكًا تَحْتَكَ." ... شَرَكًا: الشرك، يعني المصيدة.
اهل خبزك: اللي أكلوا عيش وملح معاك. أهل بيتك، أصدقائك. هما دول اللي حطوا الفخ تحت رجليك. كلهم خانوك.
لازم نفهم أن الدنيا كلها من غير المسيح له المجد، زي قلتها. ملهاش لازمة. لكن لو معايا المسيح له المجد بس، ومعيش أي حاجة تاني. يبقي أنا كده اخدت كل حاجة. وإذا مكناش مصدقين دلوقتي، القيامة هتخلينا نصدق. بس هيكون وقتها، ضاعت مننا فرص كتيرة.
"لاَ فَهْمَ فِيهِ." ... أدوم كانوا مشهورين بالحكمة والحكماء.
- من ضمن أصدقاء أيوب: تيمان. وكان أكثرهم حكمة. وكان من أدوم.
أدوم كانت مشهورة بالحكمة والفهم والذكاء. فربنا بيقولهم: حتي ديه انتُزعت منكم.
الكبرياء ضيع ذكاء وحكمة أدوم. زي الآية "من له يُعطي ويُزاد. ومن ليس له، فالذي عنده. يُؤخذ منه."
"لاَ فَهْمَ فِيهِ." ... حتي الفهم اللي كنتم مشهورين بيه، أتاخد منكم
8أَلاَ أُبِيدُ فِي ذلِكَ الْيَوْمِ، يَقُولُ الرَّبُّ، الْحُكَمَاءَ مِنْ أَدُومَ، وَالْفَهْمَ مِنْ جَبَلِ عِيسُو؟ نتيجة الكبرياء، ربنا هيبيد منهم وينزع منهم ، النعمة اللي كان مديهالهم. ونتيجة كده: تبقي بعد كده كل مشوراتهم فاسدة.9فَيَرْتَاعُ أَبْطَالُكَ يَا تَيْمَانُ، لِكَىْ يَنْقَرِضَ كُلُّ وَاحِدٍ مِنْ جَبَلِ عِيسُو بِالْقَتْلِ. نتيجة أن مفيش حكمة ولا فهم ولا ادارة. والمخابئ بقت مكشوفة.
"فَيَرْتَاعُ أَبْطَالُكَ يَا تَيْمَانُ،" ... يرتاع: يخاف. أبطالك هيخافوا. أمال أطفالك والنساء والشيوخ، هيعملوا ايه؟
(تيمان: اللي كان منها أليفاز التيماني، صاحب أيوب)
محدش هيقدر علي ربنا. ولا يقدر يتحدي ربنا.
"لِكَيْ يَنْقَرِضَ كُلُّ وَاحِدٍ مِنْ جَبَلِ عِيسُو بِالْقَتْلِ." ... وده حصل فعلا. كله انقرض. كانوا لغاية سنة 70 ميلادي. وبعد كده أدوم، ملهاش وجود.
أخر ناس نسمع عنهم، انهم أدوميين. كانوا عيلة هيردوس الملك. هيرودس الأدومي. اللي حكم علي السيد المسيح له المجد.
10« مِنْ أَجْلِ ظُلْمِكَ لأَخِيكَ يَعْقُوبَ، يَغْشَاكَ الْخِزْيُ وَتَنْقَرِضُ إِلَى الأَبَدِ. آية 10 و 11 ... ربنا بيفكر أدوم باللي عمله في أخوه يعقوب (شعب اسرائيل). وقت هجوم مملكة بابل علي مملكة يهوذا)
"مِنْ أَجْلِ ظُلْمِكَ لأَخِيكَ يَعْقُوبَ،" ... طيب ليه هينقرضوا؟ (أية 9) . من أجل ظلمهم ليعقوب. عملك ايه يعقوب، علشان تظلمه؟
الظلم وحش. لما حد يجي في فكره، فكرة الظلم. لازم يراجع نفسه كويس. لأن ربنا مش بيرضي بالظلم.
الظلم: ليه أشكال مختلفة. الظلم – الكلام الباطل علي بعض – الناس اللي بتطلع اشاعات علي غيرها – واللي بيفتري علي غيره - والكلام الغلط اللي مش مظبوط علي حد تاني – والظلم المادي.
كل ده شئ مؤلم جدا.
"يَغْشَاكَ الْخِزْيُ وَتَنْقَرِضُ إِلَى الأَبَدِ." ... هتنتهي تماما.
" وَتَنْقَرِضُ إِلَى الأَبَدِ." ... الآية ديه تتقال لأي انسان متمسك أوي بالأرض. وبيظلم الناس علشان يأخد حقوقهم، سواء: أراضي - فلوس – أو ممتلكات.
والعالم مليان ظلم الانسان لأخيه الانسان.
فالعقاب: أن ربنا هيقرضهم (هينقرضوا) للأبد. مش هيبقي ليهم نسل. حتي أولادك يا أدوم هيتشتتوا.
11يَوْمَ وَقَفْتَ مُقَابِلَهُ يَوْمَ سَبَتِ الأَعَاجِمُ قُدْرَتَهُ، وَدَخَلَتِ الْغُرَبَاءُ أَبْوَابَهُ، وَأَلْقَوْا قُرْعَةً عَلَى أُورُشَلِيمَ، كُنْتَ أَنْتَ أَيْضًا كَوَاحِدٍ مِنْهُمْ. "يَوْمَ وَقَفْتَ مُقَابِلَهُ يَوْمَ سَبَتِ الأَعَاجِمُ قُدْرَتَهُ،" ... الأَعَاجِمُ: يعني الغرباء. المقصود بيهم: البابليين. لما هجموا علي مملكة يهوذا. أورشليم.
" قُدْرَتَهُ،" ... يعني شباب أورشليم. زي مثلا دانيال النبي. والفتية التلاتة وكل الشباب الأقوياء بتوع يهوذا.
" يَوْمَ سَبَتِ" ... سَبَتِ: جاية من السبي. فعل: يسبي. (مش المقصود يوم السبت.).
"وَدَخَلَتِ الْغُرَبَاءُ أَبْوَابَهُ،" ... لما دخل البابليين أرض يهوذا. وأخدوا أواني المذبح من الهيكل.
"وَأَلْقَوْا قُرْعَةً عَلَى أُورُشَلِيمَ،" ... وَأَلْقَوْا قُرْعَةً: يعني قسموا أورشليم. والغنايم مابينهم. أنت عملت ايه؟
"كُنْتَ أَنْتَ أَيْضًا كَوَاحِدٍ مِنْهُمْ." ... أنت عملت ايه؟ ياريتك كنت واقف علي الحياد، تتفرج. لكن الأسوء من كده، إنك اشتركت في كل ده مع البابليين.
"كُنْتَ أَنْتَ أَيْضًا كَوَاحِدٍ مِنْهُمْ." ... وقت ما ألقوا قرعة علي أورشليم، علشان يتقاسموا مع بعض وده بدل ما كنت تشفق علي أخوك يعقوب، وتسنده. أنت وقفت ضده. كأنك عدوه.
12وَيَجِبُ أَنْ لاَ تَنْظُرَ إِلَى يَوْمِ أَخِيكَ يَوْمَ مُصِيبَتِهِ، وَلاَ تَشْمَتَ بِبَنِي يَهُوذَا يَوْمَ هَلاَكِهِمْ، وَلاَ تَفْغَرَ فَمَكَ يَوْمَ الضِّيقِ، "وَيَجِبُ أَنْ لاَ تَنْظُرَ إِلَى يَوْمِ أَخِيكَ يَوْمَ مُصِيبَتِهِ، وَلاَ تَشْمَتَ بِبَنِي يَهُوذَا يَوْمَ هَلاَكِهِمْ،" ... مكانش المفروض تقف تنظر يوم أخوك وتأديبه، بشماتة.
"وَلاَ تَفْغَرَ فَمَكَ يَوْمَ الضِّيقِ،" ... تَفْغَرَ فَمَكَ: يعني تفتح بقك (فمك). معناه: تفتح بقك، وتتكلم براحتك.
أول ما الأعداء انتصروا علي أورشليم، شعب الله. أنت فتحت بقك (فمك)، وقولت: يستاهلوا اللي حصل لهم. كانوا بيشتموا في أورشليم.
كتير بيقع في الخطية ديه. لما حد يسمع أن فلان تعب مثلا. يقولوا: يستاهل. ربنا كبير. أهو ربنا انتقم منه.
بلاش حد يشمت في حد. لأن ده بيُثير غضب ربنا.. لازم يكون قلبنا حنين علي بعض. محدش يشمت في حد. ولا في مصايب حد. لأنها حاجة صعبة جدا. ده كمان في ناس بتدعي علي غيرها. أسلوب صعب جدا. مش أسلوب مسيحي خالص.
13وَلاَ تَدْخُلَ بَابَ شَعْبِي يَوْمَ بَلِيَّتِهِمْ، وَلاَ تَنْظُرَ أَنْتَ أَيْضًا إِلَى مُصِيبَتِهِ يَوْمَ بَلِيَّتِهِ، وَلاَ تَمُدَّ يَدًا إِلَى قُدْرَتِهِ يَوْمَ بَلِيَّتِهِ، "وَلاَ تَدْخُلَ بَابَ شَعْبِي يَوْمَ بَلِيَّتِهِمْ،" ... يدخل الباب: معناها يدخل يرث. يأخد الورث. مصدق أن الدنيا خربت في أورشليم. فدخلوا يلموا الغنايم ويسرقوا وينهبوا.
"وَلاَ تَنْظُرَ أَنْتَ أَيْضًا إِلَى مُصِيبَتِهِ يَوْمَ بَلِيَّتِهِ،" ... يعني أورشليم مبلي (عنده بلية). وأنت يا أدوم بتحطمه بزيادة.
"وَلاَ تَمُدَّ يَدًا إِلَى قُدْرَتِهِ يَوْمَ بَلِيَّتِهِ،" ... تَمُدَّ يَدًا إِلَى قُدْرَتِهِ: معناها أنت بتضعفه.
لكن كان المفروض إنك تسنده. مش تضعفه.
قدرته: كمان معناها الشباب القوي بتوع يهوذا. أدوم كانوا بيأخدوا شباب يهوذا, ويبيعوهم عبيد.
علي المستوي الحياتي مثلا: يجي ابنك من المدرسة. وواخد درجات وحشة. وراجع مخزي وحزين. فتكمل عليه أنت وتضربه وتزعق له.
هي ديه: انك مديت ايدك عليه يوم بليته.
لأنه عارف انه مقصر وغلطان. واتعاقب أنه أخد درجات وحشة. فكده أنت حطمته بزيادة. وكسرت مقاديفه وأحبطته. فكده أنت ضيعته. لأني كمان وصلّت له احساس أنه مش نافع.
لكن لو كان شجعه أنه يذاكر. ويحسن من درجاته الشهر الجاي، كان الموضوع هيبقي مختلف.
14وَلاَ تَقِفَ عَلَى الْمَفْرَقِ لِتَقْطَعَ مُنْفَلِتِيهِ، وَلاَ تُسَلِّمَ بَقَايَاهُ يَوْمَ الضِّيقِ. بمعني الأعداء هجموا علي أورشليم وخربوها. وفي ناس هربت. فلتت.
"وَلاَ تَقِفَ عَلَى الْمَفْرَقِ لِتَقْطَعَ مُنْفَلِتِيهِ،" ... أدوم وقفوا علي المفارق. علشان يقطعوا الطرق علي المنفلتين، يعني الهاربين من أورشليم، وقت هجوم وسبي بابل. الأدوميين، كانوا يمسكوا الهاربين. ويسلموهم للأعداء. وكمان بيبيعوهم عبيد.
"وَلاَ تُسَلِّمَ بَقَايَاهُ يَوْمَ الضِّيق." ... كانوا بيسلموا اليهود الهاربين للأعداء.
فربنا زعلان من أدوم جدا.
15فَإِنَّهُ قَرِيبٌ يَوْمُ الرَّبِّ عَلَى كُلِّ الأُمَمِ. كَمَا فَعَلْتَ يُفْعَلُ بِكَ. عَمَلُكَ يَرْتَدُّ عَلَى رَأْسِكَ. "فَإِنَّهُ قَرِيبٌ يَوْمُ الرَّبِّ عَلَى كُلِّ الأُمَمِ." ... أية مهمة. لازم يبقي في مخنا دايما، أن وقفتنا قدام ربنا قريبة جدا.
أدوم أكيد مكانوش حاطين في حساباتهم الكلام ده. فربنا بيقولهم: قريب يا أدوم هتقفوا قدامي. وقدام ما تقف قدامي، عملك هيرتد عليك.
"كَمَا فَعَلْتَ يُفْعَلُ بِكَ. عَمَلُكَ يَرْتَدُّ عَلَى رَأْسِكَ." ... نحفظ الأية ديه. وزيها بالظبط الآيات ديه: "بالكيل الذي تكيلون بيه، يُكال لكم ويُزاد." و "مايزرعه الانسان، اياه يحصد." و "كل ما تريدون أن يفعل الناس بيكم. افعلوا أنتم أيضا بيهم."
فده قانون إلهي.
فزي ما ربنا له المجد هو حنين ومُحب ورحيم وكثير الغفران. فهو كمان الديان العادل. بيحاكم ويحاسب.
مشكلتنا اننا بننسي: "فَإِنَّهُ قَرِيبٌ يَوْمُ الرَّبِّ". وعلشان كده الكنيسة كل يوم بتفكرنا بكده في صلاة النوم: هوذا انا عتيد أن أقف أمام الديان العادل.
16لأَنَّهُ كَمَا شَرِبْتُمْ عَلَى جَبَلِ قُدْسِي، يَشْرَبُ جَمِيعُ الأُمَمِ دَائِمًا، يَشْرَبُونَ وَيَجْرَعُونَ وَيَكُونُونَ كَأَنَّهُمْ لَمْ يَكُونُوا. "لأَنَّهُ كَمَا شَرِبْتُمْ عَلَى جَبَلِ قُدْسِي،" ... شربتم: هنا معناها، أثناء ما كان شعبي مُهان ومذلول
ومضروب ومهزوم، أنتم شربتم خمر وفرحتم في شعبي. فزي ما أنتم شربتم علي جبل قدسي، اللي هي أورشليم، برده هيتعمل فيكم كده.
فهنا المعني "لأَنَّهُ كَمَا شَرِبْتُمْ عَلَى جَبَلِ قُدْسِي،" ... الكلام هنا علي شعب الله، أورشليم شربت من كأس غضب الله. وحصل السبي البابلي. والسبي ده كان مجرد تأديب لأورشليم. وفترته كانت 70 سنة.
"يَشْرَبُ جَمِيعُ الأُمَمِ دَائِمًا، يَشْرَبُونَ وَيَجْرَعُونَ وَيَكُونُونَ كَأَنَّهُمْ لَمْ يَكُونُوا." ... كله هيضيع. الهلاك. بس الكلام ده للأمم اللي شمتوا في اسرائيل، شعب الله.
فربنا بيأدب أولاده وبعدين يطبطب عليهم. يجرح ويعصب. ويداه تشفيان.
لكن ربنا ميقبلش أن حد يشمت في أولاده.
17« وَأَمَّا جَبَلُ صِهْيَوْنَ فَتَكُونُ عَلَيْهِ نَجَاةٌ، وَيَكُونُ مُقَدَّسًا، وَيَرِثُ بَيْتُ يَعْقُوبَ مَوَارِيثَهُمْ. ربنا هيبتدي يدينا وعد جميل علي شعبه اللي بيتعاقب.
"وَأَمَّا جَبَلُ صِهْيَوْنَ فَتَكُونُ عَلَيْهِ نَجَاةٌ،" ... يا أدوم اللي أنتم شمتتم فيهم دول شعبي. أنا هأنصفهم.
"وَيَكُونُ مُقَدَّسًا،" ... هيبقي مُخصص لله. مقدس: يعني: مخصص أو مُكرس. وهترجع ليه الهيبة والقداسة بتاعة زمان.
"وَيَرِثُ بَيْتُ يَعْقُوبَ مَوَارِيثَهُمْ." ... بعد ما كانوا هيضيعوا. هيرجعوا يرثوا الأرض تاني.
الآية ديه ليها شق تاريخي وشق روحي.
- الشق التاريخي: أن بعد ما انتهت فترة السبي، ال 70 سنة بتاعة سبي بابل. زربابل أخد مجموعة ورجع بيها علي اورشليم، مرة تانية.
ونحميا أخد فوج تاني. وكمان عزرا أخد فوج تالت . فاليهود طلعوا علي أفواج من بابل، علشان يرجعوا لأورشليم تاني. وسكنوا هناك تاني.
- الشق الروحي:
وده الأهم. "وَأَمَّا جَبَلُ صِهْيَوْنَ فَتَكُونُ عَلَيْهِ نَجَاةٌ،" ... هو جبل الجلجثة اللي في اورشليم. هي ديه النجاة الحقيقية. ويكون مُقدس ويرث بيت يعقوب مواريثه.
احنا لولا الصليب، مكناش عرفنا نورث الحياة الأبدية. ملكوت السماوات.
فبيت يعقوب يرث مواريثه، من خلال الصليب.
18وَيَكُونُ بَيْتُ يَعْقُوبَ نَارًا، وَبَيْتُ يُوسُفَ لَهِيبًا، وَبَيْتُ عِيسُو قَشًّا، فَيُشْعِلُونَهُمْ وَيَأْكُلُونَهُمْ وَلاَ يَكُونُ بَاق مِنْ بَيْتِ عِيسُو، لأَنَّ الرَّبَّ تَكَلَّمَ». الآية ديه كمان ليها شقين: تاريخي و روحي:
الشق التاريخي:
المكابيين هما اللي أكلوا الأدوميين (بيت عيسو) ... المكابيين اخضعوا وأجبروا أدوم علي الختان.
" وَبَيْتُ عِيسُو قَشًّا،" ... يعني النار تاكلوهم.
الشق أو المعني الروحي:
"وَيَكُونُ بَيْتُ يَعْقُوبَ نَارًا، وَبَيْتُ يُوسُفَ لَهِيبًا،" ... المقصود بيها: الروح القدس الناري.
" وَبَيْتُ عِيسُو قَشًّا،" ... لأننا من خلال الروح القدس، بنحرق كل الأفكار الشريرة. كل أفكار الشيطان. وكل أعماله.
الخطية متلاقيش مكان جوانا. لأننا مسكن للروح القدس الناري.
فمعني بيت عيسو قش: اللي هو الانسان العتيق اللي مات بالمعمودية.
"وَيَكُونُ بَيْتُ يَعْقُوبَ نَارًا، وَبَيْتُ يُوسُفَ لَهِيبًا، وَبَيْتُ عِيسُو قَشًّا،" ... بمعني: هتتقلب الموازيين. وبيت يعقوب يبقي نار. وبيت يوسف يبقي لهيب. وبيت عيسو (أدوم) قش.
"فَيُشْعِلُونَهُمْ وَيَأْكُلُونَهُمْ و َلاَ يَكُونُ بَاقٍ مِنْ بَيْتِ عِيسُو، لأَنَّ الرَّبَّ تَكَلَّمَ." ... وده واضح، لأن مفيش أصلا حد من بيت عيسو خالص حاليا. محدش متبقي منهم.
19وَيَرِثُ أَهْلُ الْجَنُوبِ جَبَلَ عِيسُو، وَأَهْلُ السَّهْلِ الْفِلِسْطِينِيِّينَ، وَيَرِثُونَ بِلاَدَ أَفْرَايِمَ وَبِلاَدَ السَّامِرَةِ، وَيَرِثُ بِنْيَامِينُ جِلْعَادَ. "وَيَرِثُ أَهْلُ الْجَنُوبِ جَبَلَ عِيسُو،" ... النهاردة المنطقة ديه: في المملكة الأردنية الهاشمية. وهناك كان في جبل سعير وجبل أدوم. محدش منهم ساكن هناك دلوقتي.
اللي ساكنين دلوقتي: العرب. ودول جايين من الجنوب.
"وَأَهْلُ السَّهْلِ الْفِلِسْطِينِيِّينَ، وَيَرِثُونَ بِلاَدَ أَفْرَايِمَ وَبِلاَدَ السَّامِرَةِ، وَيَرِثُ بَنْيَامِينُ جِلْعَادَ." ... ربنا لازم يعدل الموازيين، بعد ما الناس كانت بتفتري.
معني الآية: أن الكنيسة أصبحت من كل الأمم. من كل القبائل. من كل الشعوب. اذا الكلام منطبق علي علي كنيسة العهد الجديد. مش علي رجوع مملكة يهوذا من السبي.
20وَسَبْيُ هذَا الْجَيْشِ مِنْ بَنِي إِسْرَائِيلَ يَرِثُونَ الَّذِينَ هُمْ مِنَ الْكَنْعَانِيِّينَ إِلَى صَرْفَةَ. وَسَبْيُ أُورُشَلِيمَ الَّذِينَ فِي صَفَارِدَ يَرِثُونَ مُدُنَ الْجَنُوبِ. "وَسَبْيُ هذَا الْجَيْشِ مِنْ بَنِي إِسْرَائِيلَ يَرِثُونَ الَّذِينَ هُمْ مِنَ الْكَنْعَانِيِّينَ إِلَى صَرْفَةَ." ... ربنا هيرجعهم وهيرثوا الأرض.
الآيات 19 و 20:
بعد سبي بابل. ولما اليهود رجعوا لأورشليم. كانت أورشليم خربانة تماما. ومهدودة ومحروقة. وابتدوا يصلحوا فيها.
لكن كمان الكلام علي العهد الجديد: كنيسة العهد الجديد. اللي دخلها من كل مكان. من كل الأمم. واحنا كنا أمم، لأننا مش يهود. لكن بقينا ضمن مملكة اسرائيل الجديد. والكلام ده حصل في كنيسة العهد الجديد، عن طريق كرازة كل الرسل لكل الأرض.
21وَيَصْعَدُ مُخَلِّصُونَ عَلَى جَبَلِ صِهْيَوْنَ لِيَدِينُوا جَبَلَ عِيسُو، وَيَكُونُ الْمُلْكُ لِلرَّبِّ. "وَيَصْعَدُ مُخَلِّصُونَ عَلَى جَبَلِ صِهْيَوْنَ لِيَدِينُوا جَبَلَ عِيسُو،"... بتفكرنا بكلام ربنا يسوع المسيح له المجد لتلاميذه "تجلسون علي كراسي، لتدينوا أسباط اسرائيل الاثني عشر." أولاد الله هما اللي هيدينوا العالم.
" جَبَلِ صِهْيَوْنَ" ... هي الكنيسة. النجاة في الكنيسة دايما. في حضن ربنا له المجد.
" جَبَلَ عِيسُو،" ... اتفقنا أن اهل العالم، تبع مملكة الشيطان. وأن اولاد الله هم اللي هيدينوا العالم. هيصيروا دينونة علي كل انسان رفض المسيح والخلاص ورفض الايمان بدم المسيح.
"وَيَكُونُ الْمُلْكُ لِلرَّبِّ." ... أخر 3 كلمات بيختم بيهم السفر. بعد ما كان في ناس بتفتري. يرجع المُلك تاني لربنا.
يعني ملكوت الله، اللي بدأ من كنيسته، هيستمر الي أبد الدهور. الحياة الأبدية.
حاليا في ناس مننا بتتعرض للظلم. وده زي شعب الله، بيتعرض كتير للظلم والاضطهاد. وزي ما كان عيسو كمان بيضايق شعب اسرائيل.
فالمظلوم: لما يسمع الكلام ده، يطمن، أن الظلم ليه نهاية. ولابد أن ربنا هينتقم من الظالم المفتري. الجبار. اللي بيتعب الآخرين.
وطبعا مننا، ظالمين ومفترين. فلازم الظالم يفوق لنفسه بسرعة.
وممكن بطريقة تانية يكون الظلم، أن حد يحكي قدامنا قصة. فنحكم بسرعة علي القصة والأشخاص. فده برده غلط. وظلم. لأن جايز في تفاصيل منعرفهاش. ونكون اتسرعنا في الحكم. وظلمنا الناس.
⪢