⪡ 1لاَ تَفْرَحْ يَا إِسْرَائِيلُ طَرَبًا كَالشُّعُوبِ، لأَنَّكَ قَدْ زَنَيْتَ عَنْ إِلهِكَ. أَحْبَبْتَ الأُجْرَةَ عَلَى جَمِيعِ بَيَادِرِ الْحِنْطَةِ. ربنا هنا بيكشف لهم عن أمر في حياتهم.
"لاَ تَفْرَحْ يَا إِسْرَائِيلُ طَرَبًا كَالشُّعُوبِ،" ... المقصود هنا: الشعوب الوثنية.
يعني: متقلدش الشعوب الأخري من جهة الأفراح بتاعتهم. لأن ربنا كان راسم لهم طريقة الاحتفالات المقدسة.
متفرحش يا اسرائيل الفرح الوقتي المزيف. الفرح بالأمور الزمنية.
ربنا بيقول لكل واحد فينا: منشابهش ولا نقلد أهل العالم في طريقة أفراحهم.
"لأَنَّكَ قَدْ زَنَيْتَ عَنْ إِلهِكَ." ... الفرح ده نابع من خطية. نابع من بُعد عن ربنا. زنيت عن إلهك: يعني عبد آلهة وثنية.
"أَحْبَبْتَ الأُجْرَةَ " ... المقصود هنا: أجرة الزنا.
"عَلَى جَمِيعِ بَيَادِرِ الْحِنْطَةِ." ... بيادر: جمع بيدر. والبيدر: هو الجُرن أو المكان اللي بتُدرس فيه الحبوب.
" الْحِنْطَةِ." ... هي أنواع الحبوب عامة. وخاصة تُطلق علي القمح.
المقصود: انهم نسبوا الخيرات اللي عندهم للأصنام. واعتبروا أن بيادر الحنطة أو الأجران المملوءة بالحبوب، هي من بركة عبادتهم لهذة الأصنام. وأن ديه أجرة عبادتهم الأصنام. وللأسف لم يُدركوا أن كل ديه عطايا من ربنا ليهم.
2لاَ يُطْعِمُهُمُ الْبَيْدَرُ وَالْمِعْصَرَةُ، وَيَكْذِبُ عَلَيْهِمِ الْمِسْطَارُ. علشان كده يقول: أن ربنا هينزع منهم هذة الخيرات الزمنية، علشان يعرفوا أن كل ده كان مصدره هو ربنا. وليس الاله بعل.
"لاَ يُطْعِمُهُمُ الْبَيْدَرُ" ... يعني: الحقل لا يُعطي ثماره، اللي كانوا بيستخدموها في الطعام.
"وَالْمِعْصَرَةُ،" ... ده كان حوض حجري. مخصوص لعصر العنب.
"وَيَكْذِبُ عَلَيْهِمِ الْمِسْطَارُ." ... المسطار: هو الخمر الجديد. بمعني: انهم مش هينالوا أي نتاج للكروم بتاعتهم.
البيدر: اشارة للشِبع. والمسطار: اشارة للفرح.
ولأنهم لجاؤا للعبادات الوثنية، فيعوزهم: الشبع والفرح، لأنهم بعدوا عن ربنا. فهنا ربنا بيوبخهم: علي انهم بينسبوا عطايا ربنا للالهة الوثنية. وربنا بينذرهم أنه هيحرمهم من كل العطايا ديه.
أوعي تنسب أي عطية الهية لذاتك. أو لأي انسان. لكن دايما ننسب المجد والعطايا لربنا. لئلا ينزعها مننا. فتشعر بفقرك الحقيقي.
3لاَ يَسْكُنُونَ فِي أَرْضِ الرَّبِّ، بَلْ يَرْجِعُ أَفْرَايِمُ إِلَى مِصْرَ، وَيَأْكُلُونَ النَّجِسَ فِي أَشُّورَ. ربنا بيكمل انذاره ليهم.
"لاَ يَسْكُنُونَ" ... اشارة أن ربنا هينفيهم من أرضهم. هيروحوا السبي ويعيشوا في أرض غير أرضهم.
"فِي أَرْضِ الرَّبِّ،" .... اشارة لأرض كنعان. الأرض التي أعطاها ربنا ميراث لابراهيم واسحق ويعقوب.
هما سكنوا في أرض ربنا، بس معاشوش (لم يعيشوا) بناموس ربنا. علشان كده مش هيسكنوا في أرض ربنا. أرض كنعان.
"بَلْ يَرْجِعُ أَفْرَايِمُ إِلَى مِصْرَ،" ... هنا اشارة الي انهم لجأوا لمصر، من أجل المعنونة. واشارة للعبودية. لكن العبودية هتكون في آشور، مش في مصر.
مصر دايما بتُستخدم: يا أما لجأوا لمصر للحماية. أو هيعودوا للعبودية، زي ما حصل لهم في مصر من عبودية.
"وَيَأْكُلُونَ النَّجِسَ فِي أَشُّورَ." ... آشور اللي جاية لتأديب المملكة الشمالية. يأكلون النجس: المقصود بيه طعام الأمم النجس، المرفوض من ربنا. لأن ربنا كان ناهيهم عن أطعمة معينة، بحسب شرائع الناموس.
فلما يروحوا وسط الشعوب الوثنية، و في أرض وثنية. هيأكلوا طعام الوثنيين. وده يبين انهم انفصلوا عن ربنا. وارتبطوا بالشعوب التانية.
4لاَ يَسْكُبُونَ لِلرَّبِّ خَمْرًا وَلاَ تَسُرُّهُ ذَبَائِحُهُمْ. إِنَّهَا لَهُمْ كَخُبْزِ الْحُزْنِ. كُلُّ مَنْ أَكَلَهُ يَتَنَجَّسُ. إِنَّ خُبْزَهُمْ لِنَفْسِهِمْ. لاَ يَدْخُلُ بَيْتَ الرَّبِّ. السكيب: ده الخمر اللي كان بيُسكب علي الذبائح. يعني خلاص ذبائحهم هتتوقف. لأنهم هيبعدوا عن أرض ربنا، اللي كانت بتحتوي علي الأكل ومذبح ربنا.
"وَلاَ تَسُرُّهُ ذَبَائِحُهُمْ." ... لأن تقدماتهم كانت برياء وعدم توبة. فربنا مش بيقبلها و لا يُسربيها.
لكن ربنا يُسر بالقلب المنسحق.
"إِنَّهَا لَهُمْ كَخُبْزِ الْحُزْنِ. كُلُّ مَنْ أَكَلَهُ يَتَنَجَّسُ." ... ده الخبز اللي كانوا بيأكلوه في وقت الجنازات ووقت الحزن علي الميت. فكانوا بيُقيموا في بيت المتوفي. وبيأكلوا من الخبز ده. وبيت الميت كان بيتنجس ، بوجود المتوفي فيه. وكل من يتلامس مع هذا الميت، يتنجس أيضا.
فهنا المقصود: من انهم ياكلوا خبز الحزن في بيت المتوفي: أن كل من يأكل أو يلمس شئ يتنجس. لأن النجاسة أصلا دخلت حياتهم.
"إِنَّ خُبْزَهُمْ لِنَفْسِهِمْ." ... لمجرد استبقاء حياتهم، علشان يعيشوا. لكن مفيش حياة مع ربنا.
"لاَ يَدْخُلُ بَيْتَ الرَّبِّ." ... لأنه خبز نجس.
فهنا بيربط ما بين خبز الحزن، و ما بين حياتهم في السبي. لأن حياتهم في السبي هتكون منفصلة تماما عن ربنا. وهيكونوا في حالة نجاسة، لاختلاطهم بالنفوس الميتة. اللي هما نفوس الوثنيين، الأمم.
لأن الانسان البعيد عن ربنا، بيكون في حُكم الميت.
والانسان المسيحي اللي بيُعاشرالأموات، يعني البعيدين عن ربنا. برده هيتنجس من العِشرة ديه.
5مَاذَا تَصْنَعُونَ فِي يَوْمِ الْمَوْسِمِ، وَفِي يَوْمِ عِيدِ الرَّبِّ؟ هنا ربنا بيتَسائل: هتعملوا ايه في أيام الأعياد؟
الأعياد هتتحول لحزن.
"وَفِي يَوْمِ عِيدِ الرَّبِّ؟" ... اللي هي الأعياد الكبري لليهود.
وهنا اشارة الي انهم احتفلوا بأعيادهم، بطريقة عالمية. وبالتالي سيفقدهم الله هذة الأعياد.
هنا دعوة بالفرح الروحي بربنا. وليس الأفراح العالمية. وده تأكيد علي الآية رقم 1.
في درس مهم نطلع منه من الآية 1 و 5 .. إيه هي صورة احتفالاتنا؟ اذا كانت أعياد ربنا. أو مناسبات خاصة بينا؟
فربنا بيسأل "مَاذَا تَصْنَعُونَ فِي يَوْمِ الْمَوْسِمِ،" ... في يوم العيد بتاعي أنت بتحتفل ازاي؟ وبتعمل ايه؟
هل بتفرح " طَرَبًا كَالشُّعُوبِ،" ... أية 1، يعني بطريقة عالمية، مجرد الاحتفال بالأكل والشرب والخروج واللبس والفُسح؟ ولا بتفرح بطريقة روحية؟
6إِنَّهُمْ قَدْ ذَهَبُوا مِنَ الْخَرَابِ. تَجْمَعُهُمْ مِصْرُ. تَدْفِنُهُمْ مُوفُ. يَرِثُ الْقَرِيصُ نَفَائِسَ فِضَّتِهِمْ. يَكُونُ الْعَوْسَجُ فِي مَنَازِلِهِمْ. ربنا بيكمل ويقولهم: خلاص أرضهم صارت خراب. واضطروا يمشوا من الخراب ده، واتسبوا لآشور.
"تَجْمَعُهُمْ مِصْرُ." ... في البعض منهم حاول يهرب لمصر، وخصوصا فيما بعد، في وقت نبوخذنصًر.
"تَدْفِنُهُمْ مُوفُ." ... موف: سام مدينة منف. عاصمة مصر القديمة.
وده اللي حصل فعلا: أن بعد ما نبوخذنصًر دمر المملكة الجنوبية. بعضهم هرب لمصر. وأخدوا معاهم بالعافية، ارميا النبي. ووُجدت قبورهم في مصر.
فالمعني: الناس اللي هربت من أرض كنعان، من الحياة مع ربنا.
" تَجْمَعُهُمْ مِصْرُ. تَدْفِنُهُمْ مُوفُ." ... بمعني: وُجدت قبورهم هناك. بمعني انهم ماتوا، لأنهم بعدوا عن ربنا.
"يَرِثُ الْقَرِيصُ نَفَائِسَ فِضَّتِهِمْ." ... القريص: نوع من الأشجار الشوكية. يعني بدل ما الفضة كانت تُوضع في أماكن فخمة وخزائن، " يَرِثُ الْقَرِيصُ" ... يعني: تبقي بين الشوك مطروحة.
" نَفَائِسَ" ... يعني: أغلي ممتلكتهم وكنوزهم.
"يَكُونُ الْعَوْسَجُ فِي مَنَازِلِهِمْ." ... العوسج: عبارة عن شجر قصير، كله شوك. وبينمو في المناطق الحارة. لا يُقدم ثمر ولا ظِل. بينفع بس في الايقاد، بيولعوا بيه النار.
القريص والعوسج: كانوا بيُستخدموا كصورة من صور الخراب. لأنهم مش بيطلعوا غير في الأماكن الخربة.
مكان خزائنهم وسكنهم، هيتحول لخراب. ومكان غير مسكون. مهجور.
7جَاءَتْ أَيَّامُ الْعِقَابِ. جَاءَتْ أَيَّامُ الْجَزَاءِ. سَيَعْرِفُ إِسْرَائِيلُ. اَلنَّبِيُّ أَحْمَقُ. إِنْسَانُ الرُّوحِ مَجْنُونٌ مِنْ كَثْرَةِ إِثْمِكَ وَكَثْرَةِ الْحِقْدِ. في أيام للعقاب والجزاء.
لازم نحط قدام عنينا، لأن في ناس مش حاطة قدام عنيها: موضوع العقاب. وأنه هيتعاقب عن أفعاله اللي متابش عنها.
سفر الجامعة قال "سيُحضر الله كل عمل الي الدينونة."
في يوم العقاب: هيكتشفوا الحقيقة. حقيقة الأنبياء الكذبة اللي كانوا في وسطهم.
"سَيَعْرِفُ إِسْرَائِيلُ. اَلنَّبِيُّ أَحْمَقُ. إِنْسَانُ الرُّوحِ مَجْنُونٌ" ... قالوا كده علي أنبياء ربنا. وخاصة هوشع النبي اللي كان مُعاصر ليهم. قالوا عليه أنه أحمق، وغير مُدرك لحقيقة الأمر. اتهمون أنه مش فاهم. وأنه جاهل.
لأن الزمن اللي كان بينذرهم فيه هوشع النبي، كان بيتميز اللازدهار السياسي والمادي والاقتصادي. فبالتالي مش هيصدقوا كلامه عن الخراب اللي جاي عليهم والهلاك والسبي. هما كانوا مصدقين الواقع اللي عايشينه وبس.
" إِنْسَانُ الرُّوحِ مَجْنُونٌ " ... انسان الروح: بتتقال كناية عن النبي. الانسان الذي يعمل بروح الله. واتهموه أنه مجنون.
فبدل ما كانوا يخضعوا للأنبياء، اتهموهم انهم حمقي ومجانين.
اذاً في يوم العقاب والجزاء، هيعرف اسرائيل حقيقة أنبياء الله. وحقيقة أنبيائهم الكذبة. ومين اللي كان صح، هيعرفوا كل ده في يوم الدينونة.
وطبعا المعرفة ديه جت متأخرة. لأن هتفيد بايه المعرفة المتأخرة؟ وخلاص باب التوبة هيكون أُغلق. وهتكون خلاص جت ساعة التأديب.
"مِنْ كَثْرَةِ إِثْمِكَ وَكَثْرَةِ الْحِقْدِ." ... بسبب خطاياهم، شتموا أولاد ربنا. من كثرة الحقد وعدم المحبة، لا حبوا ربنا ولا الأنبياء اللي بعتهم ربنا ليهم.
8أَفْرَايِمُ مُنْتَظَرٌ عِنْدَ إِلهِي. اَلنَّبِيُّ فَخُّ صَيَّادٍ عَلَى جَمِيعِ طُرُقِهِ. حَِقْدٌ فِي بَيْتِ إِلهِهِ. منتظر، هنا بمعني: رقيب. النبي هوشع هو رقيب افرايم عند ربنا. والمفروض افرايم يكون منتظر رد ربنا.
"اَلنَّبِيُّ فَخُّ صَيَّادٍ عَلَى جَمِيعِ طُرُقِهِ. حِقْدٌ فِي بَيْتِ إِلهِهِ." ... بيقول: انهم كانوا بيعملوا مؤامرات علشان يتخلصلوا من هوشع النبي، والأنبياء كلهم. فكانوا بيحطوا فخاخ ومؤامرات في طرق الأنبياء.
ويسكتّوا أصواتهم. لأنهم كانوا بيأنبوهم علي خطاياهم وشرورهم.
" حِقْدٌ فِي بَيْتِ إِلهِهِ." ... طغي وسيطر الحقد علي بيت ربنا. حقدوا علي بيت ربنا وأنبيائه. وده يوضح أد ايه: انهم رفضوا أصوات الأنبياء.
9قَدْ تَوَغَّلُوا، فَسَدُوا كَأَيَّامِ جِبْعَةَ. سَيَذْكُرُ إِثْمَهُمْ. سَيُعَاقِبُ خَطَايَاهُمْ. يعني ازدادوا واتعمقوا في عمل الشر. بلغت بيهم الشرور لأقصي درجة.
"فَسَدُوا كَأَيَّامِ جِبْعَةَ." ... أيام جبعة: فيها اشارة لقصة حصلت في عصر القضاة ... رجال جبعة أخطأوا، رجال جبعة كانوا ضمن سبط بنيامين، اخطأوا مع سُرية اللاوي. أخطأوا معاها طول الليل، لغاية ما ماتت. وللأسف يجي سبط بنيامين يدافع عن أهل جبعة. ولم يُسلموهم للتأديب.
وده يوضح كتر الشر والخطية. يجي رجال السبط يدافعوا عن هؤلاء الرجال، ويتستروا عن الفضيحة. وبسبب كده قامت حرب أهلية ضخمة في إسرائيل مات فيها عدد ضخم من رجال سبط بنيامين. ومتبقاش منهم الا 600 رجل فقط.
وسفر القضاة حكي القصة ديه، علشان يقول مدي الانحراف الأخلاقي اللي وصلوا ليه.
فهنا ربنا بيقول: انهم رجعوا تاني للزمن بتاع الخطية. بيغلطوا و بيدافعوا عن الغلط. وبيتستروا علي الخطاة.
" فَسَدُوا كَأَيَّامِ جِبْعَةَ." ... يعني رجعوا للأيام القديمة بتاعة فسادهم وشرهم.
"سَيَذْكُرُ إِثْمَهُمْ. سَيُعَاقِبُ خَطَايَاهُمْ." ... يعني ربنا هيعاقبهم علي كل اللي عملوه. ويأدبهم .
10«وَجَدْتُ إِسْرَائِيلَ كَعِنَبٍ فِي الْبَرِّيَّةِ. رَأَيْتُ آبَاءَكُمْ كَبَاكُورَةٍ عَلَى تِينَةٍ فِي أَوَّلِهَا. أَمَّا هُمْ فَجَاءُوا إِلَى بَعْلِ فَغُورَ، وَنَذَرُوا أَنْفُسَهُمْ لِلْخِزْيِ، وَصَارُوا رِجْسًا كَمَا أَحَبُّوا. ربنا بيذكر ليهم علاقته القديمة معاهم. لعلهم يستفيقوا (يفوقوا) من انغماسهم في الخطية.
"وَجَدْتُ إِسْرَائِيلَ كَعِنَبٍ فِي الْبَرِّيَّةِ." ... يعني اللي ماشي في الصحراء، بيتمني أي حاجة تبل ريقه.
البرية هنا: اشارة لبرية سيناء. وقت بداية تعارفهم علي ربنا. ودخلوا في عهد مع ربنا بالناموس.
وديه نظرة ربنا لكل واحد فينا. ربنا يجد أولاده كعنب في برية العالم المُحيط. بينا. ربنا بيبص لكل واحد فينا أنه كرمة. بيفرح بيها في وسط هذا العالم المٌقفر.
" رَأَيْتُ آبَاءَكُمْ كَبَاكُورَةٍ عَلَى تِينَةٍ فِي أَوَّلِهَا." ... معناها: تقدمة مقدسة.
الآباء: اللي ربنا دخل معاهم في عهد أيام موسي النبي.
الباكورة: هي أول ثمار المحصول. ورمز لبداية الحياة مع ربنا.
في أولها: يعني في أول الموسم. وازاي الانسان بيبقي مستني البشاير ديه. الثمار اللي طالعة جديد. الواحد بيفرح بظهور أول الثمار.
ساعات لما الواحد بيبعد شوية، وتبدأ حياته تفتر (فتور روحي) . ربنا يفكره ببداية عشرته معاه. وربنا يقوله: فاكر لما كنت باكورة؟ لما كنت عنب في برية. ولما بدأت الحياة معايا؟
علشان ربنا يرجع له مشاعره وعلاقاته الأولي مع ربنا مرة تانية.
"أَمَّا هُمْ فَجَاءُوا إِلَى بَعْلِ فَغُورَ،" ... أَمَّا هُمْ: طيب ايه رد فعلهم علي مشاعر ربنا الجميلة ديه؟
البعل: هو لقب عام لمعظم آلهة الشعوب. ومعني كلمة بعل: سيد أو رب. ونُسب البعل لمدن كثيرة. وهنا اتنسب لبيت فغور. بعل فغور. وده كان اله موآب، وكان ليه اسم تاني: كموش.
فربنا دخل معاهم في عهد. وشافهم كباكورة. لكن هما لجأوا لبعل فغور.
"وَنَذَرُوا أَنْفُسَهُمْ لِلْخِزْيِ،" ... يعني قدموا عبادتهم لعار الخطية.
"وَصَارُوا رِجْسًا كَمَا أَحَبُّوا." ... صاروا نجسين. لأنهم لجأوا لعبادة الأوثان.
11أَفْرَايِمُ تَطِيرُ كَرَامَتُهُمْ كَطَائِرٍ مِنَ الْوِلاَدَةِ وَمِنَ الْبَطْنِ وَمِنَ الْحَبَلِ. " أَفْرَايِم" ... طبعا اشارة للمملكة الشمالية.
" ُتَطِيرُ" ... اشارة لفقدانهم لكل خيراتهم.
"كَرَامَتُهُمْ" ... اشارة للبنين. لأنهم افتخروا بالبنين كعزوة وكرامة.
"مِنَ الْوِلاَدَةِ " ... أثناء الولادة هيموت البنين.
"ومِنَ الْبَطْنِ" ... هيحصل سقوط للجنين.
"وَمِنَ الْحَبَلِ." ... يعني مش هيُحبل بيهم أصلا.
"أَفْرَايِم ُتَطِيرُكَرَامَتُهُمْ كَطَائِرٍ" ... المعني: أن بسرعة كبيرة هيتخلصوا من هذة الكرامة والافتخار والعز.
* فاذا كانوا افتخروا بالبنين، وعلي الرغم أن البنون ميراث من الرب. لكن هما افتخروا افتخار باطل بالبنين.
فربنا قالهم " مِنَ الْوِلاَدَةِ وَمِنَ الْبَطْنِ وَمِنَ الْحَبَلِ" ... ستُفقد هذة الثروة.
12وَإِنْ رَبَّوْا أَوْلاَدَهُمْ أُثْكِلُهُمْ إِيَّاهُمْ حَتَّى لاَ يَكُونَ إِنْسَانٌ. وَيْلٌ لَهُمْ أَيْضًا مَتَى انْصَرَفْتُ عَنْهُمْ! يعني حتي لو الأولاد اتولدوا.
"أُثْكِلُهُمْ إِيَّاهُمْ حَتَّى لاَ يَكُونَ إِنْسَانٌ." ... الثكل: هو فقد الأبناء. يعني: ربنا هيهلك ليهم أولادهم.
"حَتَّى لاَ يَكُونَ إِنْسَانٌ." ... بمعني: انهم هينقرضوا من الأرض.
"وَيْلٌ لَهُمْ أَيْضًا مَتَى انْصَرَفْتُ عَنْهُمْ." ... بمجرد أحول نظري عنهم.
"وَيْلٌ لَهُمْ" ... يعني التأديب والشر هيجي عليهم.
فهنا ربنا بيقول: الأولاد دول ... في ناس تقول طيب ايه ذنب الاولاد دول؟
طبعا الأولاد دول ناشئين في مجتمع فاسد. وآبائهم منحرفين. فأكيد هيكونوا أكثر انحراف من آبائهم.
علشان كده ربنا بيمنع انتشار الخطية، عن طريق التأديب ده.
13أَفْرَايِمُ كَمَا أَرَى كَصُورٍ مَغْرُوسٍ فِي مَرْعًى، وَلكِنَّ أَفْرَايِمَ سَيُخْرِجُ بَنِيهِ إِلَى الْقَاتِلِ». صور: مدينة مشهورة. كانت موجودة في العهد القديم. وكانت تقع علي ساحل لبنان، وتحيط بيها المراعي من كل جانب.
"أَفْرَايِمُ كَمَا أَرَى كَصُورٍ مَغْرُوسٍ فِي مَرْعًى،" ... افرايم زي مدينة صور، مُحاطة بالمراعي.
" مَغْرُوسٍ فِي مَرْعًى،" ... يعني: ربنا أداهم خير.
فربنا بيقول لافرايم: أنا قعدتك في جنة، خير كتير.
" وَلكِنَّ أَفْرَايِمَ سَيُخْرِجُ بَنِيهِ إِلَى الْقَاتِلِ." ... اذا كنت أنا عيشتهم في الخير، وهما مأدركوش الخير ده. فالأنبياء اللي افرايم اعتز وافتخر بيهم، ومش فاهمين أن الخير ده كله من ايد ربنا. ربنا هيوديهم للسبي، للعقاب والتأديب.
" سَيُخْرِجُ بَنِيهِ إِلَى الْقَاتِلِ." ... ربنا هيوديهم للسبي، وهيخرجهم للسبي والقتلة. اللي هما جيش آشور.
14أَعْطِهِمْ يَا رَبُّ. مَاذَا تُعْطِي؟ أَعْطِهِمْ رَحِمًا مُسْقِطًا وَثَدْيَيْنِ يَبِسَيْنِ. سؤال من النبي هوشع لربنا.
"أَعْطِهِمْ رَحِمًا مُسْقِطًا وَثَدْيَيْنِ يَبِسَيْنِ." ... يعني يُسقط الرحم جنينه، قبل اكتمال نموه. وميبقاش في لبن الأم اللي بيحتاجه الطفل المولود للتغذية.
فده برده نوع من التأديب.
15«كُلُّ شَرِّهِمْ فِي الْجِلْجَالِ. إِنِّي هُنَاكَ أَبْغَضْتُهُمْ. مِنْ أَجْلِ سُوءِ أَفْعَالِهِمْ أَطْرُدُهُمْ مِنْ بَيْتِي. لاَ أَعُودُ أُحِبُّهُمْ. جَمِيعُ رُؤَسَائِهِمْ مُتَمَرِّدُونَ. الجلجال: كان مكان مقدس. وكان لعبادة ربنا في البداية، بعد عبورهم نهر الاردن علي ايد يشوع. في زمن يشوع. فيما بعد تحول هذا المكان للعبادة الوثنية، أيام الملوك بعد يربعام عندما انقسمت المملكة ودخلت العبادة الوثنية.
"إِنِّي هُنَاكَ أَبْغَضْتُهُمْ." ... ربنا رفضهم.
"مِنْ أَجْلِ سُوءِ أَفْعَالِهِمْ أَطْرُدُهُمْ مِنْ بَيْتِي." ... بيتي هنا: اشارة لأرض كنعان. ربنا هيطردهم من البيت اللي ربنا جهزه ليهم، علشان يسكنوا فيه
"لاَ أَعُودُ أُحِبُّهُمْ. جَمِيعُ رُؤَسَائِهِمْ مُتَمَرِّدُونَ." ... كلام صعب ربنا بيقوله عليهم، بسبب عدم توبتهم.
16أَفْرَايِمُ مَضْرُوبٌ. أَصْلُهُمْ قَدْ جَفَّ. لاَ يَصْنَعُونَ ثَمَرًا. وَإِنْ وَلَدُوا أُمِيتُ مُشْتَهَيَاتِ بُطُونِهِمْ». مضروب: زي شجرة ملفوحة ومُصابة. مصابة بآفة الزرع.
"أَصْلُهُمْ قَدْ جَفَّ." ... زي الشجرة لما أصلها بيجف. فنتوقع ايه من أغصان وثمار الشجرة ديه؟
"لاَ يَصْنَعُونَ ثَمَرًا. وَإِنْ وَلَدُوا أُمِيتُ مُشْتَهَيَاتِ بُطُونِهِمْ." ... حتي لو انجبوا أو أثمروا، ربنا هيُميت مشتهيات بطونهم. اللي هما أولادهم.
17يَرْفُضُهُمْ إِلهِي لأَنَّهُمْ لَمْ يَسْمَعُوا لَهُ، فَيَكُونُونَ تَائِهِينَ بَيْنَ الأُمَمِ. ربنا بيرفضهم علشان مش عاوزين يسمعوا ليه.
"فَيَكُونُونَ تَائِهِينَ بَيْنَ الأُمَمِ" ... ويكونوا تايهين بين الأمم. عن طريق السبي الآشوري.
فهيتشتتوا ويتوهوا بين الأمم. ويفقدوا كيانهم واستقلالهم السياسي. ويفقدوا وجودهم في أرض وبيت ربنا، اللي هي أرض كنعان. فهنا ربنا مازال يُنذر ويأدب.
التوبة مهمة جدا. وهي اللي بتخلي ربنا يتراجع عن غضبه. من أجل توبة أهل نينوي، ربنا رجع عن غضبه وتأديبه ليهم.
اذاً الانذارات ديه لكل واحد فينا. مش بس لشعب اسرائيل وبس. من أجل أن الانسان يعيش حياة التوبة. ويعيش مع ربنا.
⪢