⪡ 1هَلُمَّ نَرْجعُ إِلَى الرَّبِّ لأَنَّهُ هُوَ افْتَرَسَ فَيَشْفِينَا، ضَرَبَ فَيَجْبِرُنَا. هلُمَّ: يعني هيا بنا. أو تعالوا. تعالوا نسيب طريق الأوثان والخطية، ونرجع لربنا.
"لأَنَّهُ هُوَ افْتَرَسَ" ... يعني: ربنا هو اللي قام بالتأديب.
والآية ديه تحقيق للآية 14 في الاصحاح 5 "فَإِنِّي أَنَا أَفْتَرِسُ وَأَمْضِي وَآخُذُ وَلاَ مُنْقِذٌ." .. الافتراس: معناه التأديب الالهي. مش معناه الإهلاك.
"فَيَشْفِينَا، ضَرَبَ فَيَجْبِرُنَا." ... ضرب: معناها قام بالتأديب. افترس وضرب، جايين بنفس المعني.
" فَيَجْبِرُنَا." ... جاية من: يشفي أو يُضمد الجراح.
فالمعني: أن ربنا بيسمح بالتأديب لأولاده. ليس من أجل التدمير، لكن من أجل الشفاء من الخطية. اذاً هدف ربنا أنه يشفينا. لأن الخطية مرض، بيصيب كل واحد فينا.
فربنا بيقود الانسان بالتأديب الالهي. حتي لو نظر الانسان ليها انها نوع من الافتراس أو الضرب. لكن في أساسها هي من أجل شفاءنا.
2يُحْيِينَا بَعْدَ يَوْمَيْنِ. فِي الْيَوْمِ الثَّالِثِ يُقِيمُنَا فَنَحْيَا أَمَامَهُ. بعد يومين: اشارة لسرعة الشفاء. يعني بمجرد ما الانسان يرجع لربنا بالتوبة، عمل النعمة هيبدأ يشتغل فيه وهيبتدي يشعر الشفاء.
"فِي الْيَوْمِ الثَّالِثِ يُقِيمُنَا فَنَحْيَا أَمَامَهُ." ... في اليوم التالت: ديه نبوة واضحة عن قيامة ربنا يسوع المسيح له المجد من الموت. لكن قيامته هي سر قيامتنا وحياتنا. فاحنا قُمنا معه.
زي ما القديس بولس الرسول قال "وأقامنا معه. وأجلسنا معه في السماويات." من خلال الطبيعة البشرية اللي ربنا يسوع له المجد اتحد بيها. أصبحنا موجودين فيه.
"يُحْيِينَا بَعْدَ يَوْمَيْنِ." ... جمعة الصلب وسبت النور. في اليوم التالت يُقيمنا.
اليوم التالت: دايما يرمز لقيامة ربنا يسوع المسيح له المجد.
فهنا في الآية: بيوضح أن التأديب هدفه، قيادة للتوبة. هدفه حياة.
3لِنَعْرِفْ فَلْنَتَتَبَّعْ لِنَعْرِفَ الرَّبَّ. خُرُوجُهُ يَقِينٌ كَالْفَجْرِ. يَأْتِي إِلَيْنَا كَالْمَطَرِ. كَمَطَرٍ مُتَأَخِّرٍ يَسْقِي الأَرْضَ. "لِنَعْرِفْ" ... يعني المفروض نبحث عن ربنا. والمقصود بيها: مش المعرفة السطحية أوالنظرية ، بقدر ما تكون معرفة اختبارية. اختبار الحياة والعيشة مع ربنا. وفي الاصحاحات اللي فاتت، ربنا قال "هلك شعبي من عدم المعرفة."
"فَلْنَتَتَبَّعْ لِنَعْرِفَ الرَّبَّ." ... وده الاختبار اللي اختبرته الكنيسة في تجسد وقيامة ربنا يسوع المسيح له المجد.
في قيامة ربنا: استُعلن أنه ابن الله بقوة.
" فَلْنَتَتَبَّعْ" ... يعني: نتبع طريق ربنا. نسير وراه. طالما شوفنا فيه هذا الخلاص.
"خُرُوجُهُ يَقِينٌ كَالْفَجْرِ." ... يقين: يعني أكيد. الفجر: يعني اشراق نور الفجر كل يوم. طالما هنتبع طريق ربنا، فلابد أن يُشرق في حياتنا كالفجر.
"يَأْتِي إِلَيْنَا كَالْمَطَرِ." ... المطر يرمز لمراحم واحسانات ربنا لينا. وكمان هنا اشارة للتجسد. وأن الأرض زي طبيعتنا البشرية، كانت جافة. وكانت تحتاج لمطر نعمة ربنا. اللي لاقيناه في التجسد.
المطر بينزل من السماء. وبيروي الأرض. المطر بيُعطي حياة.
كل ده ربط ما بين المسيح وما بين المطر. المسيح هنا --- في تجسده.
"كَمَطَرٍ مُتَأَخِّرٍ يَسْقِي الأَرْضَ." ... المطر المتأخر والمطر المبكر. تعبيرات بيستخدمها الكتاب المقدس.
المطر المُبكر: بيجي في أوان الخريف. شهور اكتوبر ونوفمبر. وبيساعد علي انبات البذور اللي بتُوضع في الوقت ده.
المطر المتأخر: ده بيجي في أوان الربيع. في أواخر شهر مارس وأوائل أبريل. وبيكون قبل الحصاد مباشرة. وبيساعد علي نُضج المحصول.
وربنا أعطي بركة في العهد القديم: أن الانسان اللي هيعيش معاه، ربنا هيبعت له المطر المبكر والمتأخر.
- هنا المطر المتأخر: بيُشير لحلول الروح القدس علي الكنيسة. وفي الكتاب المقدس: أشار للروح القدس أنه كمياه، في أكثر من مكان.
- والمطر المبكر: اشارة لتجسد السيد المسيح له المجد.
اذاً المطر المبكر هو التجسد، في بداية القصة. والمطر المتأخر هو حلول الروح القدس، في نهاية القصة.
الآيات من 1 لـ 3: بيحملوا دعوة للتوبة. وفي نفس الوقت، بيحملوا في طياتهم نبوات عن قيامة ربنا يسوع المسيح له المجد في اليوم التالت. وكمان نبوة عن تجسد ربنا يسوع المسيح له المجد. ونبوة عن حلول الروح القدس.
وده نوع من التلطيف في وسط جو التأديب والانذار الشديد اللهجة، اللي بيوجه هوشع النبي لشعبه.
4«مَاذَا أَصْنَعُ بِكَ يَا أَفْرَايِمُ؟ مَاذَا أَصْنَعُ بِكَ يَا يَهُوذَا؟ فَإِنَّ إِحْسَانَكُمْ كَسَحَابِ الصُّبْحِ، وَكَالنَّدَى الْمَاضِي بَاكِرًا. 4 مَاذَا أَصْنَعُ بِكَ يَا أَفْرَايِمُ؟ مَاذَا أَصْنَعُ بِكَ يَا يَهُوذَا؟ فَإِنَّ إِحْسَانَكُمْ كَسَحَابِ الصُّبْحِ، وَكَالنَّدَى الْمَاضِي بَاكِرًا.
بترجع نغمة الانذار، علشان ربنا يقودهم للتوبة.
سؤال غرضه العتاب. الاستعجاب من موقفهم. أن علي الرغم من خطاياهم وشرورهم، والانذارات ديه كلها، لكن مش عاوزين يتوبوا.
"مَاذَا أَصْنَعُ بِكَ يَا أَفْرَايِمُ؟ مَاذَا أَصْنَعُ بِكَ يَا يَهُوذَا؟" ... افرايم: رمز للمملكة الشمالية. مملكة اسرائيل.
يهوذا: مملكة يهوذا، المملكة الجنوبية.
"فَإِنَّ إِحْسَانَكُمْ" ... يعني أعمالك الصالحة. أو أعمال عبادتكم.
"كَسَحَابِ الصُّبْحِ،" ... يتميز بأنه سريع الزوال. بمجرد ظهور الشمس يتبدد هذا السحاب. فكانت أعمال عباداتهم، أعمال شكلية وسريعا ما تزول. يعني حاجة وقتيه. وغير دايمة.
"وَكَالنَّدَى الْمَاضِي بَاكِرًا." ... الندي: بمجرد شروق الشمس، يتبدد الندي الموجود علي الأسطح. فربنا بيقولهم: أعمالكم وعبادتكم وقتيه.
وبيرمز هنا للبر الذاتي. البر الذاتي بتاعنا: حاجة زي سحاب الصبح. بمجرد ما تُشرق علينا نعمة ربنا، الواحد يكتشف أنه بره ملهوش أي قيمة، قدام بر المسيح يسوع له المجد.
5لِذلِكَ أَقْرِضُهُمْ بِالأَنْبِيَاءِ. أَقْتُلُهُمْ بِأَقْوَالِ فَمِي. وَالْقَضَاءُ عَلَيْكَ كَنُورٍ قَدْ خَرَجَ. أقْرِضُهُمْ: يعني أهلكهم.
لأن الأنبياء كانوا بيتنبأوا عليهم بالهلاك والانقراض. وده مش معناها أن الأنبياء هما اللي هيهلكوهم أو يقتلوهم. لكن بيصدروا عليهم حُكم الهلاك. طبعا عن طريق انهم بيوصلوا رسالة ربنا ليهم.
"أَقْتُلُهُمْ بِأَقْوَالِ فَمِي." ... أحكام ربنا اللي هينطق بيها الأنبياء.
"وَالْقَضَاءُ عَلَيْكَ كَنُورٍ قَدْ خَرَجَ." ... نور: لأن أحكان ربنا هي نور في وسط ظلمة هذا العالم. وسط ظُلمة حياتهم وسلوكياتهم الشريرة.
أحكام الله عادلة وحق. ظاهرة كالنور.
6«إِنِّي أُرِيدُ رَحْمَةً لاَ ذَبِيحَةً، وَمَعْرِفَةَ اللهِ أَكْثَرَ مِنْ مُحْرَقَاتٍ. آية مشهورة وعارفينها. واقتباسها ربنا يسوع المسيح له المجد مرتين. (متي 9: 13. ومتي 12: 7).
" إِنِّي أُرِيدُ رَحْمَةً لاَ ذَبِيحَةً،" ... رَحْمَةً: هنا معناها محبة لربنا وللآخرين.
" لاَ ذَبِيحَةً،" ... طبعا مش معناها أن ربنا بيرفض تقديم الذبائح. لكن ربنا بيرفض العبادة الشكلية التي بلا قلب ولا عمق. ربنا بيرفض العبادة السطحية المظهرية. ربنا عاوز عمق في الحب.
"وَمَعْرِفَةَ اللهِ أَكْثَرَ مِنْ مُحْرَقَاتٍ." ... اني أعرف ربنا واختبره. واختبر العِشرة معاه. أكتر من محرقات شكلية. ما أكثر المحرقات اللي قدموها بني اسرائيل وكانت شكلية. فهي محرقات مرفوضة، ربنا رافضها.
اذاً الأولوية للحب. ومعرفة ربنا. الأولوية أن العلاقة تكون مع ربنا علي مستوي القلب. العبادة تكون من القلب بمحبة. مش مجرد كلام طالع من الشفاه.
وربنا قال "هذا الشعب يُكرمني بشفتاه. أما قلبه فمبتعد عني بعيداً."
" إِنِّي أُرِيدُ رَحْمَةً لاَ ذَبِيحَةً،" ... هنا علي مستوي علاقتنا بربنا، أن يكون الحب اللي يربطنا بربنا، مش مجرد علاقة شكلية. وعلي مستوي الآخرين: يكون في رحمة في التعامل.
كل ما الانسان يرحم الآخرين، يصير مقبول من ربنا.
7وَلكِنَّهُمْ كَآدَمَ تَعَدَّوْا الْعَهْدَ. هُنَاكَ غَدَرُوا بِي. ربنا بيربط بينهم وبين أدم، المخلوق الأول. وازاي أدم كسر وصية ربنا واتعدي علي العهد. لأن الوصية: هي العهد. هي الميثاق بين ربنا والانسان.
"وَلكِنَّهُمْ كَآدَمَ تَعَدَّوْا الْعَهْدَ." ... يعني: كسروا الوصية.
"هُنَاكَ غَدَرُوا بِي." ... يعني : نقضوا هذا العهد.
8جَلْعَادُ قَرْيَةُ فَاعِلِي الإِثْمِ مَدُوسَةٌ بِالدَّمِ. "جَلْعَادُ" ... كانت إحدى مدن الملجأ في شرق الأردن.. مدن الملجأ: كان يلجأ ليها القاتل بدون عَمد، علشان يختبئ فيها من وليً الدم. يعني اللي بيطالب بدم المقتول. فكانت مدن الملجأ، ملجأ ومصدر خلاص.
" جَلْعَادُ قَرْيَةُ فَاعِلِي الإِثْمِ مَدُوسَةٌ بِالدَّمِ." ... لكن هنا: يعني اللي ساكنها الخُطاة.
" مَدُوسَةٌ بِالدَّمِ." ... فبدل ما كانت مَهرب للملتجئيين للحماية من الموت، أصبحت مسرح للجرائم والقتل. وامتلئت بالدم البرئ.
وبدل ما كانت ملجأ للانقاذ. أصبحت ملجأ للخطاة.
9وَكَمَا يَكْمُنُ لُصُوصٌ لإِنْسَانٍ، كَذلِكَ زُمْرَةُ الْكَهَنَةِ فِي الطَّرِيقِ يَقْتُلُونَ نَحْوَ شَكِيمَ. إِنَّهُمْ قَدْ صَنَعُوا فَاحِشَةً. هنا بيوضح انحراف الكهنة. اللي هما قادة الشعب. القادة الدينيين في زمن هوشع النبي.
" زُمْرَةُ" ---- يعني: جماعة.
"كَذلِكَ زُمْرَةُ الْكَهَنَةِ فِي الطَّرِيقِ يَقْتُلُونَ نَحْوَ شَكِيمَ." ... لأنهم أصبحوا ماكرين ومخادعيين. وكان هدفهم الكسب المادي.
فالكهنة عاوزين يسرقوا و يقتلوا. وسابوا الهدف الروحي بتاعهم.
وهنا يبين: لما الخادم يبعد عن الأهداف الروحية للخدمة ويبدا يركز في مكسبه المادي ، وشهرته هو شخصيا. في شهرته وذاته.
" يَقْتُلُونَ نَحْوَ شَكِيمَ." ... لأنهم كانوا بيسلطوا ناس علي الصاعدين لأورشليم. اللي كانوا رايحين يصلوا ويعبدوا ربنا. كان الكهنة بيسلطلوا ناس علشان يقتلوا اللي رايحين يعبدوا ربنا. علشان يمنعوهم من الوصول للهيكل، هيكل ربنا.
شكيم: كمان كانت احن مدن الملجأ في غرب الأردن. وكانوا بيكمنوا في المدينة ديه، لأنها قريبة من أورشليم.
" إِنَّهُمْ قَدْ صَنَعُوا فَاحِشَةً." ... فاحشة: يعني رذيلة أو خطية.
10في بَيْتِ إِسْرَائِيلَ رَأَيْتُ أَمْرًا فَظِيعًا. هُنَاكَ زَنَى أَفْرَايِمُ. تَنَجَّسَ إِسْرَائِيلُ. أَمْرًا فَظِيعًا: يعني أمر صعب. مرفوض من ربنا.
"هُنَاكَ زَنَى أَفْرَايِمُ." ... اشارة للزني الجسدي. لأن الزني الجسدي كان طقس من طقوس العبادة الوثنية. وديه نقط حطها الشيطان في العبادات ديه، علشن يحبب الناس فيها.
يعني ازاي أصلا تختلط النجاسة بعبادة أي إله؟ " رَأَيْتُ أَمْرًا فَظِيعًا." ... فكأن ربنا بيقولهم: ازاي بتعتبروا أن ديه عبادة مقبولة؟ أن أن ده أصلا إله حقيقي؟
"تَنَجَّسَ إِسْرَائِيلُ." ... اتنجسوا بعبادتهم للأوثان.
11وَأَنْتَ أَيْضًا يَا يَهُوذَا قَدْ أُعِدَّ لَكَ حَصَادٌ، عِنْدَمَا أَرُدُّ سَبْيَ شَعْبِي. ربنا بيوجه رسالة سريعة لمملكة يهوذا. المملكة الجنوبية.
"قَدْ أُعِدَّ لَكَ حَصَادٌ،" ... يعني يوم حساب وعقاب.
وكان اشارة لسبي بابل ليهم. فزي ما كان في حساب وتأديب ينتظر ممكلة اسرائيل، المملكة الشمالية، عن طريق السبي الآشوري. فكمان كان في تأديب لمملكة يهوذا، المملكة الجنوبية.
حصاد: البعض بيقول:
- قد تعني يوم الحساب والعقاب.
- والبعض الآخر قال: أنها تعني نوال بركات. لأن في الحصاد بيبقي في بركة دايما.
"عِنْدَمَا أَرُدُّ سَبْيَ شَعْبِي." ... لعله هنا بيذكر أن سبي يهوذا هو اللي هيرجع لأورشليم من تاني. لكن سبي المملكة الشمالية مش هيرجع. وده اللي حصل فعلا. لأن المملكة الشمالية اتشتتت، ولم يعودوا مرة أخري.
لكن المملكة الجنوبية، رجعت من السبي البابلي علي يد زربابل، في أيام دولة فارس أو مملكة فارس.
فالمعني: لما يرجعوا من السبي، سينالون بركات الهية.
الاصحاح هنا:
بيبدأ بنبوات عن الخلاص المٌقدم في المسيح يسوع له المجد، بالتجسد والقيامة وحلول الروح القدس.
وكمان في توبيخات جائت لإسرائيل. تأكيد علي أهمية: الرحمة ومعرفة ربنا.
وبعدين بيختم الاصحاح: بوعد عودة لمملكة يهوذا من السبي.
⪢