⪡ 1«قُولُوا لإِخْوَتِكُمْ «عَمِّي» وَلأَخَوَاتِكُمْ «رُحَامَةَ». بنكمل مشهد أسرة هوشع النبي. وهنا بيتكلم عن اسرائيل الزوجة الخائنة.. بيتكلم عن نموذج الزوجة التي تركت زوجها، وأصبحت تحت التأديبات الالهية. وأن ازاي ربنا بيدعوها للتوبة. علشان ترجع لحياتها مرة تانية معاه.
"قُولُوا لإِخْوَتِكُمْ عَمِّي" ... عَمِّي: كلمة عبرية. تعني: شعب.. والابن التالت لهوشع لُو عَمِّي، ومعناها: لستم شعبي.
"وَلأَخَوَاتِكُمْ رُحَامَة." ... رُحَامَة: كلمة عبرية. تعني: رُحمت.. والابنة لُو رُحَامَة، تعني: غير مرحومة. بلا رحمة.
فكأن ربنا بيقول: أنا أطلقت أسماء علي أولاد هوشع النبي، علشان تحمل معني التأديب اللي جاي علي شعب اسرائيل.
وهنا ربنا بيقولهم: نفسي تبقوا شعبي " عَمِّي". وتكونوا مرحومين " رُحَامَة".
فالأسماء هنا عكس الأسماء بتاعة أولاد هوشع النبي.
2حَاكِمُوا أُمَّكُمْ حَاكِمُوا، لأَنَّهَا لَيْسَتِ امْرَأَتِي وَأَنَا لَسْتُ رَجُلَهَا، لِكَيْ تَعْزِلَ زِنَاهَا عَنْ وَجْهِهَا وَفِسْقَهَا مِنْ بَيْنِ ثَدْيَيْهَا، هنا ربنا بيتخيل معاهم، انهم قاعدين في قاعة محكمة. وربنا هو القاضي. حاكموا أمكم: يعني دِينوا الخطية. اعترفوا أد ايه أنتم بُعاد عني.
" أُمَّكُمْ" ... كناية عن جومر. التي تُشير لأمة اسرائيل.
" لأَنَّهَا لَيْسَتِ امْرَأَتِي وَأَنَا لَسْتُ رَجُلَهَا،" ... ربنا بيوضح هنا: أنه كزوج رافض زوجته الخائنة. كناية عن رفض ربنا للشعب.
ربنا بيقدم الدينونة في صورة زوج غاضب علي زوجته الخائنة.
"لِكَيْ تَعْزِلَ زِنَاهَا عَنْ وَجْهِهَا" ... زنا جومر: هو الزنا الجسدي، لكن زنا اسرائيل كان زنا روحي.
زي ماهي تركت هوشع النبي وارتبطت بآخر، فهنا رمز لزنا اسرائيل الروحي. وابتعدهم عن ربنا وعبادتهم للأوثان. وأن ازاي ظهرت ثمار الخطية في حياتهم. فالزنا هنا: المقصود بيه الزنا الروحي وكمان الزنا الجسدي.
"لِكَيْ تَعْزِلَ زِنَاهَا عَنْ وَجْهِهَا" ... يعني: تبعد خطاياها عنها. وتعترف بيها.
لأن الزانية كانت بتغطي وجهها. وربنا عاوز أن الانسان يكشف خطاياها قدام ربنا.
"وَفِسْقَهَا مِنْ بَيْنِ ثَدْيَيْهَا،" ... فسقها: يعني خيانتها الزوجية.
موضع القلب مابين الثديين. يعني مش المهم انها تبطل من الظاهر فقط. لكن الأهم: أن القلب من جوة يكون نقي.
التوبة تبدأ من القلب. وبعدين يجي الامتناع الخارجي. فالواحد لازم يبعد عن الخطية من قلبه.
3لِئَلاَّ أُجَرِّدَهَا عُرْيَانَةً وَأَوْقِفَهَا كَيَوْمِ وِلاَدَتِهَا، وَأَجْعَلَهَا كَقَفْرٍ، وَأُصَيِّرَهَا كَأَرْضٍ يَابِسَةٍ، وَأُمِيتَهَا بِالْعَطَشِ. ربنا بيبدأ يدخل في مجموعة من الانذارات شديدة اللهجة، علشان يخوفهم. ويقودهم للتوبة.
"لِئَلاَّ أُجَرِّدَهَا عُرْيَانَةً" ... لأن الخطية بتعري الانسان. زي ما حصل مع أدم وحواء، وشعروا بالعُري بتاعهم. والطبيعي أن الرجل يُستر زوجته ويغطيها.
لكن هنا مش المقصود أن ربنا يفضحهم، لكن ربنا يكشف لهم عن أخطائهم. علشان يتوبوا.
" لِئَلاَّ أُجَرِّدَهَا عُرْيَانَةً وَأَوْقِفَهَا كَيَوْمِ وِلاَدَتِهَا،" ... بمعني: أن ربنا بيحاول معانا، وبيكشف لنا عن الأخطاء في حياتنا. علشان ده يقودنا للتوبة.
"وَأَجْعَلَهَا كَقَفْرٍ،" ... القفر: يعني الصحراء. وده اشارة لثمار الخطية. تبدأ تحول الانسان لبرية.
"وَأُصَيِّرَهَا كَأَرْضٍ يَابِسَةٍ، وَأُمِيتَهَا بِالْعَطَشِ." ... بُعدهم عن ربنا، ينبوع الماء الحي الحقيقي. فهنا اشارة لتأثير الخطية علي النفس. وإنها بتصيب الانسان بالجفاف الروحي. بسبب بعده عن ربنا.
4وَلاَ أَرْحَمُ أَوْلاَدَهَا لأَنَّهُمْ أَوْلاَدُ زِنًى. بمعني انهم أولاد من علاقة غير شرعية. اشارة لثمار الخطية المرفوضة. المشكلة مش في جومر بس، لكن كمان في أولادها. لأنهم ثمار الخطية.
فالإنسان محتاج للتوبة. أنه يتوب ويمتنع عن الخطية وثمارها. ويصنع ثمار تليق بالتوبة.
5«لأَنَّ أُمَّهُمْ قَدْ زَنَتِ. الَّتِي حَبِلَتْ بِهِمْ صَنَعَتْ خِزْيًا. لأَنَّهَا قَالَتْ: أَذْهَبُ وَرَاءَ مُحِبِّيَّ الَّذِينَ يُعْطُونَ خُبْزِي وَمَائِي، صُوفِي وَكَتَّانِي، زَيْتِي وَأَشْرِبَتِي. بيوضح ان الأساس في الأم التي زنت وأثمرت بهذة الثمار.
"الَّتِي حَبِلَتْ بِهِمْ صَنَعَتْ خِزْيًا." ... خزي يعني: عار.
"لأَنَّهَا قَالَتْ: أَذْهَبُ وَرَاءَ مُحِبِّيَّ الَّذِينَ يُعْطُونَ خُبْزِي وَمَائِي، صُوفِي وَكَتَّانِي، زَيْتِي وَأَشْرِبَتِي." ... بيوضح ازاي أن جومر سابت جوزها. وقالت: انها هتروح وراء الالهة الأخري. والأخرين كمحبيين ليها. وده اللي بيعمله معانا الشيطان، أنه بيحلي الخطية في عنيننا.
" أَذْهَبُ وَرَاءَ مُحِبِّيَّ" ... اشارة لذهاب شعب بني اسرائيل وراء الشعوب الوثنية المحيطة بيهم. وعبدوا الهة الشعوب الوثنية.
" الَّذِينَ يُعْطُونَ خُبْزِي وَمَائِي، صُوفِي وَكَتَّانِي، زَيْتِي وَأَشْرِبَتِي." ... كناية عن اجرة الخطية. هي فاكرة أنها بتستفيد.
زي لما حد بيعمل خطية، فاكر أنه بيستمتع ومبسوط.
" خُبْزِي وَمَائِي" ... لإعاشة الجسد. علشان الجسد يعيش.
" صُوفِي وَكَتَّانِي،" ... كسوة الجسد. اللبس.
"زَيْتِي وَأَشْرِبَتِي." ... لإنعاش الجسد.
كل العطايا ديه هي عطايا جسدية، وبالتالي فهي أجرة زائلة.
المعني أن الانسان اللي بيركز علي الخطية، هو انسان تركيزه كله جسدي. وثماره أرضية.
6لِذلِكَ هأَنَذَا أُسَيِّجُ طَرِيقَكِ بِالشَّوْكِ، وَأَبْنِي حَائِطَهَا حَتَّى لاَ تَجِدَ مَسَالِكَهَا. ربنا يبدأ يضيًق علي النفس الخاطئة، علشان يقودها للتوبة.
"لِذلِكَ هأَنَذَا أُسَيِّجُ طَرِيقَكِ بِالشَّوْكِ،" ... السياج هو السور. يعني ربنا يعزلها. يحاصرها. والشوك هو ثمرة الخطية.
ربنا بيعزل الانسان الخاطي مع نفسه. علشان يقعد مع نفسه ويفكر شوية ويتوب.
"وَأَبْنِي حَائِطَهَا حَتَّى لاَ تَجِدَ مَسَالِكَهَا." ... بمعني أن ميبقاش ليها مكان للهرب. لأن الانسان الخاطي بيرفض مواجهة ربنا. ومواجهة حقيقة ذاته.
لكن ممكن ربنا يحطه في حوت. زي ما حصل مع يونان النبي. علشان يبدأ يفكر مع نفسه، ويراجع نفسه.
7فَتَتْبَعُ مُحِبِّيهَا وَلاَ تُدْرِكُهُمْ، وَتُفَتِّشُ عَلَيْهِمْ وَلاَ تَجِدُهُمْ. فَتَقُولُ: أَذْهَبُ وَأَرْجعُ إِلَى رَجُلِي الأَوَّلِ، لأَنَّهُ حِينَئِذٍ كَانَ خَيْرٌ لِي مِنَ الآنَ. "فَتَتْبَعُ مُحِبِّيهَا" ... هما أوثانها وشهواتها وخطاياها.
وهنا اشارة لإصرار الانسان علي خطيته.
"وَلاَ تُدْرِكُهُمْ،" ... مش علي اللحاق بيهم. وكأن ربنا بيحاول يمنعها عن الخطية بكل الطرق.
"وَتُفَتِّشُ عَلَيْهِمْ وَلاَ تَجِدُهُمْ." ... ربنا بيحاول يبعد الشرور عننا، لكن احنا اللي بنجري وراء الخطية دايما. زي ما بنقول في قطع الغروب: لكل إثم بحرص ونشاط فعلتُ، ولكل خطيةٍ بشوق واجتهاد ارتكبتُ،
"فَتَقُولُ: أَذْهَبُ وَأَرْجعُ إِلَى رَجُلِي الأَوَّلِ، لأَنَّهُ حِينَئِذٍ كَانَ خَيْرٌ لِي مِنَ الآنَ." ... تبدأ تفوق لنفسها، وتحس أنها تركت زوجها الحقيقي. رجلي الأول: الكلام عن هوشع النبي. وكمان كناية عن ربنا له المجد بالنسبة لشعبه اسرائيل. وكمان زي الابن الضال لما رجع لأبوه
وابتديت تقارن حالتها حاليا بحالها الأولاني. وده اللي بيقود الانسان للتوبة. أن الواحد يقارن نفسه وهو في الخطية، مع حاله قبل الخطية والشر. لما كانت حياته مع ربنا.
هنلاقي اننا في الخطية متمررين ومتبهدلين وتعبانين. فالواحد يتوب ويرجع لربنا، لأبوه.
8«وَهِيَ لَمْ تَعْرِفْ أَنِّي أَنَا أَعْطَيْتُهَا الْقَمْحَ وَالْمِسْطَارَ وَالزَّيْتَ، وَكَثَّرْتُ لَهَا فِضَّةً وَذَهَبًا جَعَلُوهُ لِبَعْل. القمح والمسطار والزيت، تلات حاجات كانت مهم لحياتهم.
القمح: علشان الخبز.
المسطار: هو الخمر. علشان المشروب اليومي بتاعهم.
الزيت: كان بيستخدم في الطعام والتداوي كعلاج... فربنا بيقول أديتها خيرات زمنية.
"وَكَثَّرْتُ لَهَا فِضَّةً وَذَهَبًا" ... أعطيتهم المال.
"جَعَلُوهُ لِبَعْل." ... البعل: هو الاله الوثني اللي كانوا بيعبدوه في الوقت ده.
فهنا نسبوا العطايا الالهية بتاعة ربنا، للإله بعل. وقالوا: أنه هو اللي أدانا كل الحاجات ديه. وكمان قدموا له تقدمات منها.
وده اشارة للإنسان اللي بيفتكر العطايا اللي عنده من خبرته وشغله وشطارته وعِلمه. وناسي أن ربنا هو اللي أداله كل هذة العطايا.
والأخطر أنه يأخد العطايا ديه ويبددها علي شهواته. بيأخد مواهبه ووزناته وطاقاته، ويقدمها للخطية.
9لِذلِكَ أَرْجعُ وَآخُذُ قَمْحِي فِي حِينِهِ، وَمِسْطَارِي فِي وَقْتِهِ، وَأَنْزِعُ صُوفِي وَكَتَّانِي اللَّذَيْنِ لِسَتْرِ عَوْرَتِهَا. اشارة أن ربنا هيحرم الانسان من العطايا ديه.
وده علشان الانسان يعرف أن ربنا هو صاحب العطايا ديه كلها. لأن كتير الواحد بينسي أن ربنا هو مانح العطايا لينا.
"قَمْحِي فِي حِينِهِ، وَمِسْطَارِي فِي وَقْتِهِ،" ... أن ربنا هو مصدر البركات الزمنية. وده نوع من التضييق علي الانسان، أن ربنا ينزع منه العطايا والمواهب والطاقات اللي استخدمها في الشر.
وده علشان الانسان يحس باحتياجه لربنا. فيرجع لحضن ربنا ويتوب. وده مش تحطيم للإنسان، لكن تضييق عليه علشان يتوب. علشان خلاص نفسه.
"وَأَنْزِعُ صُوفِي وَكَتَّانِي اللَّذَيْنِ لِسَتْرِ عَوْرَتِهَا." ... العورة: ما يخفيه الانسان من جسده. فبعد ما كان الانسان بيخبي أخطائه ويتجمل. فربنا يقوله: لأ. أنا هأكشف حقيقة نفسك علشان تتوب.
الآية ديه كناية عن رفع البركة من حياتهم. علشان ربنا يقودهم للتوبة. في ناس تقول مش حاسين بالبركة في حياتهم. المفروض يراجعوا نفسهم، لأحسن تكون خطية ضعيت البركة من حياتك.
وربنا عمل معاك كده علشان تقدم توبة وترجع لربنا.
10وَالآنَ أَكْشِفُ عَوْرَتَهَا أَمَامَ عُيُونِ مُحِبِّيهَا وَلاَ يُنْقِذُهَا أَحَدٌ مِنْ يَدِي. محبيها: من أخطأت معهم. اكشف: الكشف هنا معناه أن ربنا يقودهم للتوبة.
وَلاَ يُنْقِذُهَا أَحَدٌ مِنْ يَدِي." ... يعني مش هتقدر تهرب من التأديب الالهي الذي ينتظرها.
11وَأُبَطِّلُ كُلَّ أَفْرَاحِهَا: أَعْيَادَهَا وَرُؤُوسَ شُهُورِهَا وَسُبُوتَهَا وَجَمِيعَ مَوَاسِمِهَا. يعني أوقف كل أفراحها وأعياد الخطية.. ناس عايشة في ملذات وأفراح زائلة.
"أَعْيَادَهَا وَرُؤُوسَ شُهُورِهَا وَسُبُوتَهَا وَجَمِيعَ مَوَاسِمِهَا." ... أعيادها، اشارة للأعياد اليهودية الكبري، اللي كانوا بيروحوا فيها لأورشليم. للاحتفال.
رأس الشهر: هو احتفال ظهور الهلال. اعلان بداية شهر جديد. وده كان موسم ديني شهري، لاجتماع العائلة.
" وَسُبُوتَهَا" ... السبت هو العيد الأسبوعي.
"وَجَمِيعَ مَوَاسِمِهَا." ... باقي الأوقات اللي حددها ربنا للأعياد.
فربنا هينزع منهم أفراح الخطية. لأن الواحد بيتلذذ ويفرح بحاجات بعيدة عن ربنا.
12وَأُخَرِّبُ كَرْمَهَا وَتِينَهَا اللَّذَيْنِ قَالَتْ: هُمَا أُجْرَتِي الَّتِي أَعْطَانِيهَا مُحِبِّيَّ، وَأَجْعَلُهُمَا وَعْرًا فَيَأْكُلُهُمَا حَيَوَانُ الْبَرِّيَّةِ. الكرم هو: حقول العنب. والمقصود أن ربنا يضيًق علي طاقتها البشرية، نتيجة عدم التوبة. وطبعا مش المقصود أن ربنا هو اللي هيخرًب بطريقة مباشرة، كلن الخطية هي اللي تُخرًب الانسان، وبتدمره وبتخرب كرمه.
"وَتِينَهَا اللَّذَيْنِ قَالَتْ: هُمَا أُجْرَتِي الَّتِي أَعْطَانِيهَا مُحِبِّيَّ،" ... هذة المرأة الخاطئة، تعتقد أن الكرم والتين هما أجرتها. لكن في الحقيقة هي بتخرًب نفسها.
"وَأَجْعَلُهُمَا وَعْرًا فَيَأْكُلُهُمَا حَيَوَانُ الْبَرِّيَّةِ." ... الوعر هو : الغابة المُوحشة.
13وَأُعَاقِبُهَا عَلَى أَيَّامِ بَعْلِيمَ الَّتِي فِيهَا كَانَتْ تُبَخِّرُ لَهُمْ وَتَتَزَيَّنُ بِخَزَائِمِهَا وَحُلِيهَا وَتَذْهَبُ وَرَاءَ مُحِبِّيهَا وَتَنْسَانِي أَنَا، يَقُولُ الرَّبُّ. "وَأُعَاقِبُهَا" ... ربنا هيعاقبها لو هي ظلت علي اصرارها علي فعل الخطية.
"عَلَى أَيَّامِ بَعْلِيمَ" ... بعليم: كلمة جمع. مفردها: بعل. الاله بعل: ده الاله اللي أدخلته ايزابل الشريرة زوجة آخاب الملك، للعبادة. وفضل موجود لسنوات كتير في حياة اسرائيل الدينيية.
"الَّتِي فِيهَا كَانَتْ تُبَخِّرُ لَهُمْ" ... البخور هو رمز لرفع الصلوات. كانوا بيقدموا البخور للأوثان. بدل ما كانوا يقدموه لربنا.
"وَتَتَزَيَّنُ بِخَزَائِمِهَا" ... خزائم مفردها: خُزامة. وده حلق للأنف. كانوا بيتحلوا بالحُلي وهما رايحين يقدموا عبادات الوثنية.
فبدل ما كانوا يرفعوا الصلوات لربنا، ويتزينوا بزينة روحية لربنا. كانوا بيبخروا للأوثان ويتزينوا للبعل.
"وَحُلِيهَا وَتَذْهَبُ وَرَاءَ مُحِبِّيهَا وَتَنْسَانِي أَنَا، يَقُولُ الرَّبُّ." ... الحُلي: هو الجواهر.
الآيات من 1 لـ 13: ربنا بيدي انذارات بالتأديبات الالهية. وانذار شديد اللهجة علشان يقودهم للتوبة.
لكن اتعودنا من هوشع النبي أنه: يغير نغمة الحديث. فربنا هيغير طريقة كلامه مع شعبه.
فهنلاقي من الايات 14 لـ 23: يتسم بالوعود الالهية، بالخيرات والقبول.
14«لكِنْ هأَنَذَا أَتَمَلَّقُهَا وَأَذْهَبُ بِهَا إِلَى الْبَرِّيَّةِ وَأُلاَطِفُهَا، "لكِنْ" ... يعني بيفصل ما بين الجو النفسي السابق اللي فيه انذار وتأديب، علشان يدي جو نفسي جديد، يتسم بالبركة والتشجيع ووعودة العودة.
" لكِنْ هأَنَذَا أَتَمَلَّقُهَا وَأَذْهَبُ بِهَا إِلَى الْبَرِّيَّةِ وَأُلاَطِفُهَا،" ... أتملقها: يعني أتودد اليها، بقصد جذبها.
ربنا بيقدم نفسه كزوج، علي الرغم من خيانتها ليه. لكن بيحاول يجذبها ويقربها ليه.
في الآية 13: هي مشغولة بآخر.
لكن هنا: ربنا بيقول هأفضل أحبها.
" وَأَذْهَبُ بِهَا إِلَى الْبَرِّيَّةِ" ... البرية: هنا بمعني خروج جديد. زي ما أخد الشعب أيام موسي النبي، وخرج بيه للبرية.
فربنا بيقول: هأبدأ عهد وبداية جديدة.
"وَأُلاَطِفُهَا،" ... في الأصل العبري: اتكلم معاها بحنان. أو أتكلم الي قلبها.
15وَأُعْطِيهَا كُرُومَهَا مِنْ هُنَاكَ، وَوَادِي عَخُورَ بَابًا لِلرَّجَاءِ. وَهِيَ تُغَنِّي هُنَاكَ كَأَيَّامِ صِبَاهَا، وَكَيَوْمِ صُعُودِهَا مِنْ أَرْضِ مِصْرَ. يعني: تسترد الكروم الخربة اللي جت في أية 12. الكرم والخمر
اللي خارج منه، اشارة للفرح. فهنا تسترد الفرح. فرح التوبة. مش فرح الخطية الوقتي.
"وَوَادِي عَخُورَ بَابًا لِلرَّجَاءِ." ... وادي عخور: مذكور في سفر يشوع. ومعناها: وادي التكدير. وده يقع بين نهرالأردن شرقا، والمنطقة الجبلية في وسط أرض كنعان غرباً. واتسمي بكده: لأن في الوادي ده، اترجم عخان بن كرمي، اللي كدر شعب اسرائيل بسبب سرقته للغنائم في حربهم أمام أريحا.
وبسبب عخان بن كرمي، اتهزم الشعب أمام عاي. في الجولة التانية في الحرب.
فبعد ما كان وادي عخور مكان للتكدير، بسبب الخطية. هنا التوبة ونزع الحرام. لأن وقت عخان بن كرمي، ربنا قالهم "في وسطك حرام يا اسرائيل."
فهنا يتحول مكان التكدير الي مكان للرجاء. ويبقي مصدر طمأنينة وتشجيع للشعب.
"وَهِيَ تُغَنِّي هُنَاكَ كَأَيَّامِ صِبَاهَا، وَكَيَوْمِ صُعُودِهَا مِنْ أَرْضِ مِصْرَ." ... ترجع لشبابها الروحي مرة أخري.
" كَأَيَّامِ صِبَاهَا،" ... أيام ما اتعرفت علي ربنا. بداية الحياة مع ربنا.
ويوم صعودها من أرض مصر، اشارة الي تسبحة الخلاص اللي موجودة في خروج 15.
16وَيَكُونُ فِي ذلِكَ الْيَوْمِ، يَقُولُ الرَّبُّ، أَنَّكِ تَدْعِينَنِي: رَجُلِي، وَلاَ تَدْعِينَنِي بَعْدُ بَعْلِي. يوم تجديد العهد مع ربنا. وحياة التوبة هي: تجديد العهد مع ربنا. بأعمل عهد جديد مع ربنا.
"يَقُولُ الرَّبُّ، أَنَّكِ تَدْعِينَنِي: رَجُلِي،" ... رَجُلِي: بتعبر هنا عن علاقة الحب.
"وَلاَ تَدْعِينَنِي بَعْدُ بَعْلِي." ... بَعْلِي: تُعبر عن علاقة السيطرة.
فهنا في علاقة حب جديدة هتنشأ بين الشعب وربنا.
17وَأَنْزِعُ أَسْمَاءَ الْبَعْلِيمِ مِنْ فَمِهَا، فَلاَ تُذْكَرُ أَيْضًا بِأَسْمَائِهَا. ربنا هينزع منها كل محبة الخطية. حتي لو كانت مجرد ذِكر الأسماء.
أسماء البعليم، لأن كل مدينة كان ليها اسم بعل مخصوص بيها.
"فَلاَ تُذْكَرُ أَيْضًا بِأَسْمَائِهَا." ... فحتي مجرد ذِكر أسمائهم، مش هيحصل تاني.
18وَأَقْطَعُ لَهُمْ عَهْدًا فِي ذلِكَ الْيَوْمِ مَعَ حَيَوَانِ الْبَرِّيَّةِ وَطُيُورِ السَّمَاءِ وَدَبَّابَاتِ الأَرْضِ، وَأَكْسِرُ الْقَوْسَ وَالسَّيْفَ وَالْحَرْبَ مِنَ الأَرْضِ، وَأَجْعَلُهُمْ يَضْطَجِعُونَ آمِنِينَ. ربنا بيقولهم هتدخلوا في عهد.
"مَعَ حَيَوَانِ الْبَرِّيَّةِ" ... اشارة للحيوانات المفترسة. وكأن ربنا لما بيدخل في عهد معاهم، بيقولهم: أن الطبع الوحشي اللي فيكم، هأغيره.
"وَطُيُورِ السَّمَاءِ" ... اشارة للأفكار المرتفعة والكبرياء.
"وَدَبَّابَاتِ الأَرْضِ،" ... ما يدب علي الأرض، زي الزواحف والحشرات. وكأن هنا بيحصل تصالح ما بين الانسان وطاقاته ومواهبه.
"وَأَكْسِرُ الْقَوْسَ وَالسَّيْفَ وَالْحَرْبَ مِنَ الأَرْضِ، وَأَجْعَلُهُمْ يَضْطَجِعُونَ آمِنِينَ." ... يَضْطَجِعُونَ آمِنِينَ.يعني : يناموا في أمان.
هنا اشارة للسلام الداخلي الذي يسود النفس، وده بيحصل عن طريق التوبة. لأن طول ما الانسان عايش في الخطية، بيبقي مضطرب وقلقان وفاقد سلامه. علشان كده ربنا قال "لا سلام. قال ربي للأشرار." فالتوبة بتُدخِل سلام للنفس. ضمير الانسان بيبقي مرتاح، وبيتخلص من اللي بيزعجه.
19وَأَخْطُبُكِ لِنَفْسِي إِلَى الأَبَدِ. وَأَخْطُبُكِ لِنَفْسِي بِالْعَدْلِ وَالْحَقِّ وَالإِحْسَانِ وَالْمَرَاحِمِ. الآيات 19 و 20، بيتكلم بعبارات جميل. كأن ربنا بيقولها: خلينا نبدأ علاقة جديدة مع بعض.
"وَأَخْطُبُكِ "... ربنا ذكرها في الأيتين دول 3 مرات. لأن علاقة المخطوبين ما أجملها. مشاعر حب فياضة.
"وَأَخْطُبُكِ لِنَفْسِي إِلَى الأَبَدِ." ... ديه علاقة أبدية.
"وَأَخْطُبُكِ لِنَفْسِي بِالْعَدْلِ وَالْحَقِّ وَالإِحْسَانِ وَالْمَرَاحِمِ." ... تبتدي تختبري الصفات ديه فيا. وتشوفي أد ايه أنا عادل معاكي. وبأحسن عليكِ. أد ايه بتدوقي المراحم بتاعتي.
20أَخْطُبُكِ لِنَفْسِي بِالأَمَانَةِ فَتَعْرِفِينَ الرَّبَّ. هأكون أمين معاكِ، من جهة تحقيق كل وعودي معاكِ. وبالرغم اننا مش أمناء مع ربنا، لكنه بيظل أمين دايما معانا.21وَيَكُونُ فِي ذلِكَ الْيَوْمِ أَنِّي أَسْتَجِيبُ، يَقُولُ الرَّبُّ، أَسْتَجِيبُ السَّمَاوَاتِ وَهِيَ تَسْتَجِيبُ الأَرْضَ، الآيات 21 و22: خلاص في استجابة.
بعد ما كانت الأرض مُقفرة. بقي في بركات زمنية. ورجوع البركات الزمنية، اشارة للبركات الروحية القادمة عليها نتيجة التوبة. ودفء العلاقات بينها وبين ربنا.
22وَالأَرْضُ تَسْتَجِيبُ الْقَمْحَ وَالْمِسْطَارَ وَالزَّيْتَ، وَهِيَ تَسْتَجِيبُ يَزْرَعِيلَ. " الْقَمْحَ" ... اشارة للشِبع.
"وَالْمِسْطَارَ" ... الخمر. اشارة للفرح.
"وَالزَّيْتَ،" ... اشارة للمواهب. وعمل الروح القدس للنفس. النفس تبدأ تزدهر بالتوبة. وتظهر ثمار التوبة في حياة الانسان.
" وَهِيَ تَسْتَجِيبُ يَزْرَعِيلَ." ... يعني: يصير المكان بركة. لأن ده بقي زرع ربنا. بعد ما كان يزرعيل في الاصحاح الأول: علامة التشتيت والتأديب.
23وَأَزْرَعُهَا لِنَفْسِي فِي الأَرْضِ، وَأَرْحَمُ لُورُحَامَةَ، وَأَقُولُ لِلُوعَمِّي: أَنْتَ شَعْبِي، وَهُوَ يَقُولُ: أَنْتَ إِلهِي». هنا العلاقة هتتغير.
"وَأَزْرَعُهَا لِنَفْسِي فِي الأَرْضِ،" ... يعني يزرع ربنا شعبه. ويبدأ يبارك شعبه.
"وَأَرْحَمُ لُورُحَامَةَ،" ... اللي كانت غير مرحومة، أعود فارحمها.
"وَأَقُولُ لِلُوعَمِّي: أَنْتَ شَعْبِي، وَهُوَ يَقُولُ: أَنْتَ إِلهِي." ... اللي كان معناه لست شعبي. ربنا يقوله: أنت شعبي.
يعود ربنا، ويقبل شعبه المرفوض. شعبه اللي تاب.
الاصحاح التاني أطول اصحاح في السفر، عبارة عن 23 آية. لكنه مقسوم لجزئين:
1) آيات 1 لــ 13: انذار ربنا بتأديبات الهية. هدفها: أن يقود الانسان الي التوبة.
2) آيات 14 لــ 23: بركات ووعود الهية للنفس التائبة.
ربنا يظل يُلاطف الانسان، النفس البشرية. علي الرغم من خيانتها. الا أنه يظل يقودها لحياة التوبة.
⪢