⪡ 1فِي السَّنَةِ الأُولَى لِدَارِيُوسَ بْنِ أَحْشَوِيرُوشَ مِنْ نَسْلِ الْمَادِيِّينَ الَّذِي مُلِّكَ عَلَى مَمْلَكَةِ الْكَلْدَانِيِّينَ، الاصحاح التاسع.. متميز لأن في صلاة جميلة اوي صلاها دانيال النبي وشبه المزمور 50 صلاة للتوبة والانسحاق والتضرع الي الله.
الكنيسة بتُذكر دانيال النبي في قسمة الصوم الكبير وتقول: الصوم والصلاة هما اللذان خلصا دانيال من جب الاسود... صلاة عميقة بتكشف لينا جوانب كتير من شخصية دانيال النبي.
وكمان في الرؤيا اللي شافها دانيال النبي واسمها: رؤيا السبعين اسبوع.
بعد سقوط مملكة بابل جت مملكة مادي وفارس وكان داريوس هو الملك الأول فيها. ويقال ان كورش الملك هو كان الملك الاساسي وولي داريوس الملك. وكان في صلة قرابة بينهم ويقال ان كورش احتمال يكون جوز بنت داريوس وفي نفس الوقت ابن اخته. بس عامة مع الوقت مملكة الماديين ابتدت تقل تقل وبقت مملكة فارس فقط. علشان كده يقول " الذي ملك علي مملكة الكلدانيين" اللي كانت مقرها في بابل يعني هو اللي اخد مملكة بابل بعد سقوطها.
2فِي السَّنَةِ الأُولَى مِنْ مُلْكِهِ، أَنَا دَانِيآلَ فَهِمْتُ مِنَ الْكُتُبِ عَدَدَ السِّنِينَ الَّتِي كَانَتْ عَنْهَا كَلِمَةُ الرَّبِّ إِلَى إِرْمِيَا النَّبِيِّ، لِكَمَالَةِ سَبْعِينَ سَنَةً عَلَى خَرَابِ أُورُشَلِيمَ. "في السنة الاولي من ملكه" ... بكده يبقي انتهينا من الاسر البابلي اللي قعد 70 سنة.
وكانت في نقطة جميلة في دانيال ان بالرغم من كل المراكز الكبيرة اللي وصلها في المملكة سواء في بابل او مادي وفارس لكنه كان ملازم لكلمة الله. بالرغم انه كان بعيد عن اورشليم والهيكل.
ارميا النبي كان في نفس وقت دانيال النبي ومع كده دانيال كان بيقول عليه ارميا النبي ومكانش بيشعر باي غيرة منه. كل واحد كان ليه موهبته. وكان دانيال النبي بيقرا اللي كتبه ارميا النبي. (ارميا 29: 10)
«لأَنَّهُ هكَذَا قَالَ الرَّبُّ: إِنِّي عِنْدَ تَمَامِ سَبْعِينَ سَنَةً لِبَابِلَ، أَتَعَهَّدُكُمْ وَأُقِيمُ لَكُمْ كَلاَمِي الصَّالِحَ، بِرَدِّكُمْ إِلَى هذَا الْمَوْضِعِ 10 لأَنِّي عَرَفْتُ الأَفْكَارَ الَّتِي أَنَا مُفْتَكِرٌ بِهَا عَنْكُمْ، يَقُولُ الرَّبُّ، أَفْكَارَ سَلاَمٍ لاَ شَرّ، لأُعْطِيَكُمْ آخِرَةً وَرَجَاءً 11 فَتَدْعُونَنِي وَتَذْهَبُونَ وَتُصَلُّونَ إِلَيَّ فَأَسْمَعُ لَكُمْ 12 وَتَطْلُبُونَنِي فَتَجِدُونَنِي إِذْ تَطْلُبُونَنِي بِكُلِّ قَلْبِكُمْ 13
14فَأُوجَدُ لَكُمْ، يَقُولُ الرَّبُّ، وَأَرُدُّ سَبْيَكُمْ وَأَجْمَعُكُمْ مِنْ كُلِّ الأُمَمِ وَمِنْ كُلِّ الْمَوَاضِعِ الَّتِي طَرَدْتُكُمْ إِلَيْهَا، يَقُولُ الرَّبُّ، وَأَرُدُّكُمْ إِلَى الْمَوْضِعِ الَّذِي سَبَيْتُكُمْ مِنْهُ.
ربنا سمح لبابل تسبيهم. يعني ده بسماح منه. واخدوا عقوبتهم والتأديب وده علشان يرجعوا عن طريقهم وديه الآية اللي كان بيقراها دانيال النبي عن السبعين سنة.)
دانيال النبي يدينا مثال لواحد ملتصق بكلمة الله وده اول درس نتعلمه من دانيال النبي. وياريت كلنا نلتصق بكلمة ربنا. ميفوتش علينا يوم من غير قراية الكتاب المقدس مع دراسته لان الكتاب المقدس منهج الحياة الابدية. لكن لو حد بيقعد كام يوم مش بيفتح الكتاب المقدس ده مش هيفهم اي حاجة. لان كلمة الله تعطي استنارة وعمق وفهم. فدانيال النبي كان دارس كويس لكلمة الله.
دانيال عرف خلاص ان زمان الافتقاد جه ولازم المسبين يرجعوا.
3فَوَجَّهْتُ وَجْهِي إِلَى اللهِ السَّيِّدِ طَالِبًا بِالصَّلاَةِ وَالتَّضَرُّعَاتِ، بِالصَّوْمِ وَالْمَسْحِ وَالرَّمَادِ. نحط الآية ديه مع الآية 20: علشان نشوف دانيال عمل ايه. دلوقتي دانيال هيصلي بس مش صلاة عادية لكن ده مع تضرعات وصوم والمسوح والرماد. بالرغم من مركزه في المملكة لكنه رجل صلاة وصوم لابس المسح (لبس خشن وناشف زي الخيش) وكان بيحط رماد. وده لأنه هيقدم توبة.
من اروع صلوات التوبة اللي ممكن نقراها في الكتاب المقدس وتنفع لما الواحد يكون رايح يعترف او عامل خطية وحاسس انه وحش اووي فيصلي صلاة دانيال مع المزمور الخمسين. فلازم نتعلم من دانيال النبي اننا نتضع وننسكب قدام ربنا له المجد في صلواتنا.
4وَصَلَّيْتُ إِلَى الرَّبِّ إِلهِي وَاعْتَرَفْتُ وَقُلْتُ: «أَيُّهَا الرَّبُّ الإِلهُ الْعَظِيمُ الْمَهُوبُ، حَافِظَ الْعَهْدِ وَالرَّحْمَةِ لِمُحِبِّيهِ وَحَافِظِي وَصَايَاهُ. دانيال النبي صلي لربنا له المجد..."واعترفت" ... زي ما قال في الآية 20 "اعترف بخطيتي وخطية شعبي.". الصلاة كانت فيها اعتراف وتوبة. بالرغم ان دانيال من الشخصيات القليلة في الكتاب المقدس اللي متذكرش لهم خطية. دانيال النبي في صلاته ديه يدينا مثال عن الوحدانية اللي المفروض تبقي بين اولاد ربنا في الكنيسة. وبالرغم اننا مسمعناش اي خطية عن دانيال لكن قال بما ان الشعب يخطئ فانا كمان من ضمنهم. وده اللي بيعمله معانا أبونا في سر التوبة والاعتراف. بعد ما بنتعرف ابونا بيصلي لينا التحليل. وهو بيصلي يقول: ان كنا اخطائنا اليك. مع إني انا اللي اخطيت واعترفت وباقدم توبة. بس برده انا ابن ابونا. فابونا بيقدم توبة مع اولاده كمان. احنا الاتنين بنقدم توبة.
"الرب إلهي" ... دايما دانيال يقول إلهي. زي ما قال للملك وهو في جب الأسود "عش ايها الملك الي الابد. إلهي أرسل ملاكه." إلهي انا. علاقة شخصية اوي مع ربنا له المجد. إلهي حبيبي ابويا.
صلاة دانيال النبي: وكمان واحنا بنقرا الصلاة ديه نفتكر القداس (ايها الرب الاله العظيم الابدي)
أول مانبتدي نتكلم مع ربنا له المجد لازم نقر ونعترف اننا تراب ورماد وان ربنا هو الاله العظيم الابدي المهوب.
"حافظ العهد والرحمة لمحبيه وحافظي وصاياه.".. نتعلم ازاي نصلي. اول ما نقف قدام ربنا نعطيه المجد. يارب انت الاله. ممجد عظيم ونمدح في صفات ربنا له المجد. وهنشوف صلاة دانيال هنا: هيقول يارب انت مستحق وعادل واحنا خطاة وحالتنا بؤس ونقر بخطايانا. وعارفين إنك حافظ العهد والرحمة للي بيحبوك يارب وحافظي وصاياك. واديتنا الوصية ديه وقولتنا لو مشيتوا معايا هاكون معاكم ولو سيبتوني انتم اللي هتتعبوا. فاحنا يارب غلطانين.
5أَخْطَأْنَا وَأَثِمْنَا وَعَمِلْنَا الشَّرَّ، وَتَمَرَّدْنَا وَحِدْنَا عَنْ وَصَايَاكَ وَعَنْ أَحْكَامِكَ. "اخطائنا واثمنا" ... وده يوضحلنا ان في درجات في الخطية. الإثم: يعني التمرد والعصيان.
احنا شعب متمرد يارب ودانيال كالعادة بيتكلم كواحد منهم وانه خاطئ.
التمرد اتذكر في الكتاب المقدس وكأنه درجة من عبادة الاوثان. والزنا. معلمنا بولس الرسول يقول "متجنبون عن حياة الله" ... واحد مش عاوز ربنا. خليك بعيد عننا يارب وانا في حالي. نوعيات من اللي بيرفضوا ربنا له المجد.
"وحدنا (يحيد) عن وصاياك واحكامك" ... احنا اللي غلطانين يارب. دانيال بيستعطف قلب ربنا. لأن السبي قرب على الانتهاء والشعب هيرجع فعاوز يقول: يارب اسرع وتمم خلاصك. كفاية كده.
6وَمَا سَمِعْنَا مِنْ عَبِيدِكَ الأَنْبِيَاءِ الَّذِينَ بِاسْمِكَ كَلَّمُوا مُلُوكَنَا وَرُؤَسَاءَنَا وَآبَاءَنَا وَكُلَّ شَعْبِ الأَرْضِ. كلنا يارب من الكبير للصغير خطاة. واتمردنا عليك يارب. ومسمعناش كلام عبيدك اللي بعتهم لينا يارب. ياما ربنا له المجد بيبعت لنا دروس واحنا مش بنسمع. يارب كلمتنا بطرق كتير لكن ودانا مش بتسمع.
قالها اشعياء النبي اشعياء 1 :4و6 "ويل للامة الخاطئة. الشعب الثقيل الإثم. نسل فاعلي الشر. اولاد مفسدين. تركوا الرب. استهانوا بقدوس اسرائيل. ارتدوا الي الوراء... كل الرأس مريض وكل القلب سقيم من اسفل القدم الي الرأس. ليس فيه صح." كلنا يارب من كبيرنا لصغيرنا اخطائنا."
7لَكَ يَا سَيِّدُ الْبِرُّ، أَمَّا لَنَا فَخِزْيُ الْوُجُوهِ، كَمَا هُوَ الْيَوْمَ لِرِجَالِ يَهُوذَا وَلِسُكَّانِ أُورُشَلِيمَ، وَلِكُلِّ إِسْرَائِيلَ الْقَرِيبِينَ وَالْبَعِيدِينَ فِي كُلِّ الأَرَاضِي الَّتِي طَرَدْتَهُمْ إِلَيْهَا، مِنْ أَجْلِ خِيَانَتِهِمِ الَّتِي خَانُوكَ إِيَّاهَا. "لك يا سيد البر" ... وكأنه بيقول مستحق وعادل. منقدرش نفتح بقنا ابدا في اللي حصل لينا احنا نستاهل يارب لأنك حذرتنا يارب.
"اما لنا فخزي الوجوه" ... نستاهل يارب كل اللي احنا فيه. السبي والبهدلة ديه. دانيال مش بس بيتكلم عن مملكة يهوذا لكن عن مملكة اسرائيل كمان. (اللي هي اتسبت زمان في السبي الاشوري.). جايز لو حد تاني غير دانيال النبي وقف يصلي كان عاتب ربنا له المجد :ليه يارب تتخلي عن اولادك. انت فين يارب؟ كتير بنقف نتكلم مع ربنا بالشكل ده: سايبنا ليه؟ هو احنا مش اولادك وخلقتنا؟ ناس كتير بتعمل كده. ودول في السبي 70 سنة ودانيال النبي موجهش لربنا له المجد اي لوم. لازم نتعلم نقول لربنا له المجد "لك ياسيد البر اما لنا فخزي الوجوه." ساعات الواحد في الامه وتعبه يوجه اللوم لربنا له المجد وكأنه مش موجود. ساعات ناس الشيطان يلعب بيها ويوصلوا للإلحاد ويقولوا: هو ربنا بيتفرج علينا؟ هو سايبنا ليه؟ وخصوصا لو حطينا قدامنا الاصحاح اللي فات لما كان بيتكلم عن مادي وفارس واليونانين (اصحاح 8: 4" لم يقف حيوان قدامه ولا منقذ من يديه وفعل كمرضاته وعظم (الشر عمال يتعظم) وكمان عدد 12 الكلام على اليونانيين "وجعل جند علي المحرقة الدائمة بالمعصية فطرح الحق علي الارض وفعل ونجح." الشر عمال يزيد وينجح. في ناس بتلوم ربنا في الوقت ده ويقولوله. سايب الدنيا ليه كده يارب. مش انت ضابط الكل؟
8يَا سَيِّدُ، لَنَا خِزْيُ الْوُجُوهِ، لِمُلُوكِنَا، لِرُؤَسَائِنَا وَلآبَائِنَا لأَنَّنَا أَخْطَأْنَا إِلَيْكَ. "ياسيد" ... تأدب مع ربنا له المجد في الصلاة... في الوقت ده السحرة واللي شغالين في البلاط الملكي: بيكيدوا ليه مكايد. ودانيال مش في باله. لكن مشغول بتوبة شعبه وتوبته هو ورجعوهم من السبي.9لِلرَّبِّ إِلهِنَا الْمَرَاحِمُ وَالْمَغْفِرَةُ، لأَنَّنَا تَمَرَّدْنَا عَلَيْهِ. بيستعطف قلب ربنا له المجد. يارب الرحمة ديه من عندك وبس. احنا اتمردنا عليك. فانت اللي ترحمنا يارب وتغفر لينا. بعد الخطية اللي عملناها نقف قدام ربنا له المجد ونقوله "ارحمنا يارب ارحمنا فاننا كثيرين ما امتلائنا هوانا." 10وَمَا سَمِعْنَا صَوْتَ الرَّبِّ إِلهِنَا لِنَسْلُكَ فِي شَرَائِعِهِ الَّتِي جَعَلَهَا أَمَامَنَا عَنْ يَدِ عَبِيدِهِ الأَنْبِيَاءِ. ربنا كلمنا كتير عن طريق الأنبياء واحنا مكناش بنسمع. مع ان دانيال من الأنبياء لكن برده حاطط نفسه مع الشعب. الناس الخاطية. ده دانيال اللي طلع من اورشليم وكان فتي صغير وكان متدين. وفي منتهي القداسة ومرضيش يتنجس باطياب الملك. وال 70 سنة مغيريوش في قداسة دانيال بالعكس ازداد في القداسة والاستنارة والبر. وبالرغم من كل الحاجات الحلوة اللي فيه بس قال: انا واحد من الوحشين ومسمعناش للأنبياء. انسان في منتهي التواضع. ومن هنا نفهم ليه ربنا له المجد استأمنه على الأسرار ديه كلها.11وَكُلُّ إِسْرَائِيلَ قَدْ تَعَدَّى عَلَى شَرِيعَتِكَ، وَحَادُوا لِئَلاَّ يَسْمَعُوا صَوْتَكَ، فَسَكَبْتَ عَلَيْنَا اللَّعْنَةَ وَالْحَلْفَ الْمَكْتُوبَ فِي شَرِيعَةِ مُوسَى عَبْدِ اللهِ، لأَنَّنَا أَخْطَأْنَا إِلَيْهِ. ربنا كان قال لموسى في الشريعة: لو شعبك عمل كذا هتبقي العقوبة كذا. ربنا مخباش عليهم حاجة وقالهم كل حاجة بس هما اغاظوا ربنا له المجد بعندهم وكانوا فرحانين بإغاظة ربنا له المجد... فشربوا بقي اخدوا جزائهم "فسكبت علينا اللعنة." بتفكرنا بمراثي ارميا في الجمعة العظيمة.12وَقَدْ أَقَامَ كَلِمَاتِهِ الَّتِي تَكَلَّمَ بِهَا عَلَيْنَا وَعَلَى قُضَاتِنَا الَّذِينَ قَضَوْا لَنَا، لِيَجْلِبَ عَلَيْنَا شَرًّا عَظِيمًا، مَا لَمْ يُجْرَ تَحْتَ السَّمَاوَاتِ كُلِّهَا كَمَا أُجْرِيَ عَلَى أُورُشَلِيمَ. "ما لم يجر" ... ما لم يحدث. اللي حصل في اورشليم ربنا له المجد سمح بيه وسلمهم للتأديب علشان يتوبوا. وكتير ربنا بيسلم أولاده للتأديب علشان يتوبوا "تأديبا ادبني الرب والي الموت لم يسلمني." ربنا بينقينا ويطهرنا. وعلشان نقف قدامه بلا لوم في القداسة... للأسف متعظوش من مملكة إسرائيل اللي اتسبت (راحت للسبي) قبلهم ب حوالي 200 سنة.13كَمَا كُتِبَ فِي شَرِيعَةِ مُوسَى، قَدْ جَاءَ عَلَيْنَا كُلُّ هذَا الشَّرِّ، وَلَمْ نَتَضَرَّعْ إِلَى وَجْهِ الرَّبِّ إِلهِنَا لِنَرْجعَ مِنْ آثَامِنَا وَنَفْطِنَ بِحَقِّكَ. كل اللي حصل ده "ولم نتضرع الي وجه الرب الهنا." ... ربنا مستنينا نتضرع اليه ونقدم توبة.. كلمة تضرع بنقولها كتير في القداس.. الشعب الغليظ الرقبة موقفش قدام ربنا ولا قدم توبة. مفهمش حق ربنا.
"لنرجع من اثامنا ونفطن بحقك" ... كام واحد فينا يعرف حق ربنا له المجد؟ حق ربنا نعرفه من الكتاب المقدس. لو دارسين كويس الكتاب المقدس هنعرف حقوق ربنا علينا كويس اوووي.
14فَسَهِرَ الرَّبُّ عَلَى الشَّرِّ وَجَلَبَهُ عَلَيْنَا، لأَنَّ الرَّبَّ إِلهَنَا بَارٌّ فِي كُلِّ أَعْمَالِهِ الَّتِي عَمِلَهَا إِذْ لَمْ نَسْمَعْ صَوْتَهُ. آية تخوف. " الشر" – يعني للتاديب والعقوبة. * نتخيل بدل ماربنا له المجد يسهر عليك لرعايتك وحمايتك وحفظك. يسهر عليك لتاديبك وعقوبتك. وده لازم يخلي الواحد يفوق لنفسنا. لما ربنا يسهر علي شعبه لله للعقوبة والتأديب. يبقي الشعب ده جاب اخره مع ربنا له المجد ويوضح انه فعلا كان شعب صعب. الله بطبعه طويل الأناة. كثير الرحمة. الجزيل التحنن ... فنطلب من ربنا انه يسهر علينا بالرعاية، والحكمة والحماية والحفظ. فياريت منوصلش مع ربنا لمرحلة انه يسهر علينا لعقابنا وتاديبنا. منستحملش يارب.
"لأن الرب الهنا بار" ... الهنا قدوس مش بيطيق الخطية. صحيح بيحب الخطاة لكن الخطية لا. فلما نغيظ ربنا بخطايانا وآثامنا ... نعرف ان لو مقدمناش توبة هتيجي علينا العقوبة. لازم نحسب طول اناة ربنا: خلاص لينا. ولو الانسان مش هيتوب ربنا هيسلمه للتأديب. لان الهنا بار. مستحق وعادل.
15وَالآنَ أَيُّهَا السَّيِّدُ إِلهُنَا، الَّذِي أَخْرَجْتَ شَعْبَكَ مِنْ أَرْضِ مِصْرَ بِيَدٍ قَوِيَّةٍ، وَجَعَلْتَ لِنَفْسِكَ اسْمًا كَمَا هُوَ هذَا الْيَوْمَ، قَدْ أَخْطَأْنَا، عَمِلْنَا شَرًّا. خروج شعب الله من ارض مصر كان من 1000 سنة قبل دانيال النبي. وديه دايما كان بيذكروها قدام ربنا له المجد ويقولوله: يارب بذراع رفيعة اخرجت شعبك من ارض مصر. وصنعت عجائب مع فرعون مصر ومع المصريين وشقيت ا لبحر. فهنا دانيال بيفكر ربنا له المجد.
"وجعلت لنفسك اسما" ... لأن لما الأعجوبة ديه اتعرفت في البلاد: وقع خوف اله اسرائيل علي كل الشعوب. وقالوا: إلههم عداهم في البحر الاحمر.
فدانيال بيقول: ماتعملها تاني يارب وتكرر العجايب "بيد قوية" والناس تعرف انك الهنا.
نيافة الانبا كيرلس قال: ربنا بيسمع وبيشوف وبيكتب عنده في سفر تذكرة.
"كما هو هذا اليوم." ... اعمل بقي يارب معانا احنا كمان. يارب أسفين احنا غلطانين.
(محدش يلومنا في القداس لما نقول: يارب ارحم كتير. بس المهم تبقي من القلب بجد. ولو قعدنا نقول يارب ارحم على كل خطية القداس كله هيبقي عبارة عن يارب ارحم وبس لان خطايانا كتيرة اوووي.) دانيال كل شوية يقول يارب أخطأنا واثمنا. عملنا الشر؟
16يَا سَيِّدُ، حَسَبَ كُلِّ رَحْمَتِكَ اصْرِفْ سَخَطَكَ وَغَضَبَكَ عَنْ مَدِينَتِكَ أُورُشَلِيمَ جَبَلِ قُدْسِكَ، إِذْ لِخَطَايَانَا وَلآثَامِ آبَائِنَا صَارَتْ أُورُشَلِيمُ وَشَعْبُكَ عَارًا عِنْدَ جَمِيعِ الَّذِينَ حَوْلَنَا. "حسب كل رحمتك" ... بتفكرنا بمعلمنا بوس الرسول "حسب غني نعمته." ده احنا بنطلب من الهنا الغني جدا. لما نطلب نطلب حسب غناه في المجد. او نطلب بحسب عمل شدة قوته.
علشان كده دانيال لما طلب من ربنا طلب حسب رحمته.
"اصرف سخطك" ... يقف ابونا ويقول: افنوتي ناي نان. ويقوله ارفع غضبك عنا.
"عن مدينتك" ... ديه مدينتك يارب وشعبك ودول أولادك يارب. تفكرنا بموسى النبي "ان لم تغفر لهم فامحو اسمي من كتابك." دول اولادك وشعبك. الناس هتقول علينا ايه؟ طلعتهم من مصر علشان تبيدهم في البرية؟ وممكن تكون صلاة دانيال ديه وهو عامل مطانية ووشه للأرض: يارب اصرف سخطك وغضبك عن مدينتك اورشليم جبل قدسك. جبلك المقدس يارب.
"اذ لخطايانا ولآثام ابائنا" ... السبي حصل من 70 سنة وكان بسبب ابائهم. بس برده حاطط نفسه معاهم انا واحد من الشعب ده... دانيال مثال واضح جدا للإنسان المحب بإخلاص لبلده وكنيسته.
70 سنة في السبي وكان طالع شاب صغير حوالي 15 او 16 سنة ومش قادر ينسي اورشليم. وشبابيك العلية اللي في بيته مفتوحة ناحية اورشليم والهيكل ولما يتكلم يقول عنها: فخر الاراضي ( في الاصحاح اللي فات.)ويقول لربنا له المجد ديه جبل قدسك.
يارب كل اللي بيشوف اورشليم دلوقتي بيستهزوا بينا. ويقولوا ادي إلههم اللي سابهم. وفين إلههم؟ ومدينتهم خربت والأسوار اتهدمت وهيكل العبادة اتدمر تماما ... "وشعبك عارا عند جميع الذين حولنا."
وأكيد دانيال كان بيتكلم ويصلي كده وهو بيبكي قدام ربنا له المجد لأنه بيحب اورشليم والهيكل بجد. علشان كده لما جاله رئيس الملايكة غبريال (جبرائيل) قاله: أول ما ابتديت تصلي ربنا استجاب. وهنشوفها كمان شوية... (وكمان تفكرنا في القداس لما ابونا يقول: من اجل خطاياي خاصة وجهالات شعبك. "لان من فم الكاهن تطلب الشريعة" ... يارب انا عارف خطاياي وتقصيراتي. لكن شعبك مش عارف بيعملوا الخطايا عن جهل. وابونا يقف قدام ربنا في اخر القداس ويقدم توبة عنه وعن الشعب كله: من اجل خطاياي خاصة وجهالات شعبك لا تمنع نعمة روحك القدوس)
17فَاسْمَعِ الآنَ يَا إِلهَنَا صَلاَةَ عَبْدِكَ وَتَضَرُّعَاتِهِ، وَأَضِئْ بِوَجْهِكَ عَلَى مَقْدِسِكَ الْخَرِبِ مِنْ أَجْلِ السَّيِّدِ. مقالش لربنا له المجد انه يبني اورشليم والهيكل. لكن يارب لما تنير بوجهك على مقدسك اورشليم وقتها هتبقي فخر الأراضي بجد. وبيتك يارب منارة العالم كله. لأنه بيعكس نورك لأنك اضائت بوجهك يارب عليه. نصلي لربنا ونقوله: اضاء بوجهك علينا. انر عقولنا هي ديه الاستنارة. في قسمة القيامة ابونا يصلي ويقول: انر علينا بنور معرفتك الحقيقية لنضئ بشكلك المحيي. (يعني علشان نبقي شبهك يارب).
"واضئ بوجهك على مقدسك الخرب من اجل السيد" ... وكان دانيال النبي واقف قدام الله الاب ويقوله: بالمسيح يسوع. بس مكانتش واضحة قدامه (زي ماهي واضحة قدامنا دلوقتي) ومش عارف يجيبها.
"من اجل السيد" ... يعني في العهد بنقولها: بالمسيح يسوع.
18أَمِلْ أُذُنَكَ يَا إِلهِي وَاسْمَعْ. اِفْتَحْ عَيْنَيْكَ وَانْظُرْ خِرَبَنَا وَالْمَدِينَةَ الَّتِي دُعِيَ اسْمُكَ عَلَيْهَا، لأَنَّهُ لاَ لأَجْلِ بِرِّنَا نَطْرَحُ تَضَرُّعَاتِنَا أَمَامَ وَجْهِكَ، بَلْ لأَجْلِ مَرَاحِمِكَ الْعَظِيمَةِ. وكان دانيال النبي بيقولنا علشان ربنا له المجد زعل من الشعب ده: ربنا غمض عينيه عن اورشليم ومبقاش يسمع أصواتهم. لان اصواتك بقت مكره ليا وذبائحكم مبقتش أحبها.
فدانيال بيقول لربنا: لا يارب اسمع وافتح عينيك من تاني على المدينة التي دعي اسمك عليها... وديه بناخدها في القداس ونقول: من اجل اسمك (أصل مفيناش حاجة عدلة يارب. فمش علشانا احنا يارب لكن من اجل اسمك.)
فمرة يقول لربنا: من اجل اسمك. ومرة من اجل مراحمك يارب. ومرة المغفرة من عندك يارب. يارب اسمع وانظر. بنقولها في القداس كتير وكمان في اول مزمور صلاة النوم " من الاعماق صرخت اليك يارب. يارب استمع صوتي." ولازم نكون واثقين اننا لما بنصلي ونقول كده: ان ربنا هيستجيب وينظر الينا وهيسمعنا. ونقول يارب خلي فينا حاجة عدلة وحلوة تشوفها فينا يارب. ونقول كلام كويس علشان تقدر تسمعه يارب. وطبعا منكونش بنلخبط في حياتنا علشان لما ربنا ينظر لينا ميلقيناش ملخبطين... دانيال بيقول لربنا له المجد : يارب احنا عشمانين في مراحمك.
19يَا سَيِّدُ اسْمَعْ. يَا سَيِّدُ اغْفِرْ. يَا سَيِّدُ أَصْغِ وَاصْنَعْ. لاَ تُؤَخِّرْ مِنْ أَجْلِ نَفْسِكَ يَا إِلهِي، لأَنَّ اسْمَكَ دُعِيَ عَلَى مَدِينَتِكَ وَعَلَى شَعْبِكَ». "يا سيد اسمع. يا سيد اغفر. يا سيد اصغ." ... بنقولها في ختام التسبحة: يا الله انظر الينا. يا الله التفت الينا. يا الله تراءف علينا. وممكن تكون متاخدة من صلاة دانيال. من هنا.
وبيفكر ربنا له المجد تاني: متتاخرش يارب تاني. ال70 سنة علي وشك الانتهاء. تعالي يارب كفاية. فديه صلاة جميلة: نصليها ونتامل فيها.
(في صلاة دانيال شوفنا تعريف الخطية: هي عار – خراب – خزي – تمرد. ودانيال النبي كان بيعترف بخطيته وخطية شعبه. وكمان في آية 4: لما دانيال قال "ايها الرب الاله العظيم المهوب. حافظ العهد والرحمة لمحبيه وحافظي وصاياه." قال المحبة قبل حفظ الوصية لان لما الواحد يحب ربنا هيحفظ ويسمع وصاياه وكلامه تلقائي. وديه بنلاحظها لما مخدوم يكون بيحب الخادم بتاعه بيسمع كلامه علطول. غير لما يكون حد مفيش في قلبه حب يبقي متضايق. كل ماتقوله حاجة ميبقاش مبسوط انه بيعملها)
20وَبَيْنَمَا أَنَا أَتَكَلَّمُ وَأُصَلِّي وَأَعْتَرِفُ بِخَطِيَّتِي وَخَطِيَّةِ شَعْبِي إِسْرَائِيلَ، وَأَطْرَحُ تَضَرُّعِي أَمَامَ الرَّبِّ إِلهِي عَنْ جَبَلِ قُدْسِ إِلهِي، كأب وأم نتعلم من أيوب انه قدم ذبائح عن اولاده لئلا يكونوا عملوا حاجة ومقدموش عنها ذبائح... فاحنا نقدم توبة عن اولادنا بمعني: الواحد يقف قدام ربنا له المجد ويستعطف قلب ربنا على اولاده. ونقول: معلش يارب أنت طويل الروح وكثير الرحمة وأولادك يارب لسه مش عارفين: افتقدهم يارب وعلمهم. انا اللي مقصر معاهم . فلازم قدام ربنا له المجد نقدم توبة عن نفسنا وبيوتنا واولادنا. وكمان الخادم عن مخدومه والكاهن عن شعبه والكاهن بيقدم توبه مع الشخص اللي بيعترف عنده.
"انا اتكلم" ... دانيال عمال يتكلم مع ربنا له المجد. بيصلي.
احيانا الواحد واقف يصلي ويقول انا مش فاكر قولت المزمور ده ولا لا. فيعيد المزمور تاني . لكن دانيال حاسس انه واقف يتكلم مع حد قدامه. حاسس ان ربنا قدامه وبيكلمه.
"واطرح تضرعي" ... شوفنا صلاة دانيال كانت مليانة بالتضرعات.
" عن جبل قدس إلهي" ... عن اورشليم المدينة المحبوبة.
21وَأَنَا مُتَكَلِّمٌ بَعْدُ بِالصَّلاَةِ، إِذَا بِالرَّجُلِ جِبْرَائِيلَ الَّذِي رَأَيْتُهُ فِي الرُّؤْيَا فِي الابْتِدَاءِ مُطَارًا وَاغِفًا لَمَسَنِي عِنْدَ وَقْتِ تَقْدِمَةِ الْمَسَاءِ. "مطارا" ... يعني جاي طاير.
"واغفا" ... يعني بسرعة.
وانا لسه بأصلي وباتكلم مع ربنا. قبل كده لما دانيال شاف المسيح قال "شبه انسان" لكن هنا لما شاف رئيس الملايكة غبريال قال انه شكله شكل راجل ... وديه من المرات القليلة في الكتاب المقدس اللي نشوف فيها ملاك جاي بسرعة وطاير.
"لمسني عند وقت تقدمة المساء" ... دانيال النبي بقاله حوالي 70 سنة في السبي بعيد عن اورشليم وتقريبا كان الهيكل اتدمر خالص ومبقاش في تقدمات ذبائح في الهيكل. بس هو عارف ان في تقدمة الصباح والمساء. علشان كده حدد وقت الملاك انه وقت تقدمة المساء. فكل ده جواه ... وده المفروض يحصل معانا ان الكنيسة تكون جوانا.
22وَفَهَّمَنِي وَتَكَلَّمَ مَعِي وَقَالَ: «يَا دَانِيآلُ، إِنِّي خَرَجْتُ الآنَ لأُعَلِّمَكَ الْفَهْمَ. "فهمني" ... كلمة فهمني والفهم بتكرر كتير في سفر دانيال.
"وتكلم معي " ... رئيس الملايكة غبريال (جبرائيل) ودانيال النبي بيتكلموا مع بعض.
"خرجت الان" ... خرجت في الماضي (كفعل في الماضي). الآن يعني دلوقتي. فربط الاتنين ببعض لان غالبا كانت سرعة رئيس الملايكة سريعة جدا. فانا جاي اشرح لك يا دانيال. وزي ما اتفقنا ان دانيال النبي صديق الملايكة... رئيس الملايكة غبريال بنفسه بيفهم دانيال. دانيال ده مش اي حد.
سفر حزقيال 14: لما حزقيال حب يقول للشعب عن أفضل الانبياء
حزقيال14 : 12 و13 : معناها ربنا بيقول اذا الناس ديه غلطت وانا اديتهم عقوبة.
وآية 14: الآية ديه بتتكرر في الاصحاح ده. ربنا بيقوله: شوف لو الشعب ده اخطا (لأن الاصحاح ده بيتكلم ان كل واحد يتحمل نتيجة خطيته.) وانا عاقبتهم وحتى لو عندهم نوح ودانيال وأيوب برده مش هارفع عنهم العقوبة. طيب واشمعنا التلاتة دول؟ لأنهم أنبياء محصلوش والتلاتة دول ليهم مكانة كبيرة عند ربنا له المجد. وبالرغم من المكانة ديه فربنا بيقول لحزقيال: ان الشعب يتحمل نتيجة خطيته.
23فِي ابْتِدَاءِ تَضَرُّعَاتِكَ خَرَجَ الأَمْرُ، وَأَنَا جِئْتُ لأُخْبِرَكَ لأَنَّكَ أَنْتَ مَحْبُوبٌ. فَتَأَمَّلِ الْكَلاَمَ وَافْهَمِ الرُّؤْيَا. أول ما ابتدى دانيال يصلي ربنا له المجد قال: انا سمعت واستجبت... بتفكرنا بالآية اللي قالها اشعياء النبي (اشعياء 65: 24 "ويكون إني قبلما يدعون. انا اجيب (يعني قبل ما يصلوا انا استجيب) وفيما هم بتكلمون بعد انا اسمع"... مين فينا تنطبق عليه الآية ديه: اول ما يفتح فمه قدام ربنا بالصلاة ربنا له المجد يشتم رائحة بخور ويقول خلاص استجبت... اصل ربنا له المجد عارف نقاوة وقداسة وفكر واشتياقات دانيال واي انسان قلبه جميل ربنا عارفه. دانيال لسه في بداية تضرعاته وصلاته ورئيس الملايكة غبريال يقوله "في ابتداء تضرعاتك خرج الامر. وانا جئت لأخبرك." ... وكان ربنا قال لرئيس الملايكة مرة تاني: روح فهمه.
"لأنك انت محبوب" ... وديه صفة دانيال. الرجل المحبوب: يعني الذي يسر بيه الله. وهتكرر تاني " يا دانيال ايه الرجل المحبوب" واللقب ده ماخدهوش حد غير يوحنا الحبيب في العهد الجديد... دانيال النبي كان موضوع مسرة الرب. ربنا كان فرحان بيه اووي من اول السفر لغاية دلوقتي متذكرش لا غلطة ولا خطية ليه. وكمان رجل صلاة. والاصحاح اللي جاي بيقول " في تلك الايام انا دانيال. كنت نائحا 3 اسابيع ... ولم ادهن حتى تمت 3 اسابيع ايام." ... قعد 3 اسابيع يصلي صلاة في منتهي العمق. كان رجل الصوم والايمان. ورجل المبادئ ومتخلاش عن مبادئه ابدا. ولما كان طفل كان متربي كويس جدا وفضل على تربيته لغاية لما انتهت حياته. مرديش ياكل ويشرب من اطياب الملك. وكان رجل وطني غيور علي بلده وشعبه والهيكل... فرئيس الملايكة هيشرح له الرؤية.
24سَبْعُونَ أُسْبُوعًا قُضِيَتْ عَلَى شَعْبِكَ وَعَلَى مَدِينَتِكَ الْمُقَدَّسَةِ لِتَكْمِيلِ الْمَعْصِيَةِ وَتَتْمِيمِ الْخَطَايَا، وَلِكَفَّارَةِ الإِثْمِ، وَلِيُؤْتَى بِالْبِرِّ الأَبَدِيِّ، وَلِخَتْمِ الرُّؤْيَا وَالنُّبُوَّةِ، وَلِمَسْحِ قُدُّوسِ الْقُدُّوسِينَ. الرؤيا ديه بتشرح امتي هيجي المسيح وامتي هيصلب.
"سبعون اسبوعا" ... 70 اسبوع سنين. يعني الاسبوع = (يساوي) 7 سنين. واصل الترجمة 70 وحدة زمنية.
مالهم ال 70 اسبوع دول يارب؟ دانيال كان عارفهم من ارميا النبي (اصحاح 29 من سفر ارميا)
3 حاجات سلبية و 3 حاجات ايجابية:
* "لتكميل المعصية" ... لغاية ما اخر حاجة في شرهم تكون خلصت.
* "لتتميم الخطايا" ... يعني هيجي حد يرفع الخطية خالص. وده مجئ السيد المسيح.
* "ولكفارة الاثم" ... يعني في ذبيحة هتتقدم كفارة عن الخطية. يعني ربنا يخلصنا من العقوبة بتاعتنا ومن الخطية ومن الذنب اللي واخدينه.
* "وليؤتي بالبر الابدي" ... ده مفيش غير عن طريق المسيح.
* " ولختم الرؤيا" ... يعني الذي تتحقق بمجيئه النبوات والرؤى. لأن بمجئ السيد المسيح تمت كل النبوات والرؤى... في اللحن بنقول: اليوم قد كملت النبوات.
* "ولمسح قدوس القدوسين" ... يفكرنا بالآية اللي قالها ربنا يسوع المسيح " ولأجلهم اقدس انا ذاتي" يعني المسيح خصص ذاته بالتجسد من اجل خلاصنا.
اذا دول 6 حاجات يكملوا بمجئ المسيح :
1) تكميل المعصية ... يعني خلاص العقوبة خلصت. لما المسيح يرفعها عننا.
2) تتميم الخطية ... يغفر لينا خطايانا.
3) كفارة الاثم ... يقدم لينا ذاته ذبيحة.
4) ليؤتي بالبر الابدي ... بموت ربنا له المجد وقيامته: اخدنا البركة اللي مكناش نحلم بيها.
البر الابدي. بقينا ابرار.
5) لختم الرؤيا والنبوة ... تمت في المسيح كل النبوات.
6) ومسح قدوس القدوسين.
25فَاعْلَمْ وَافْهَمْ أَنَّهُ مِنْ خُرُوجِ الأَمْرِ لِتَجْدِيدِ أُورُشَلِيمَ وَبِنَائِهَا إِلَى الْمَسِيحِ الرَّئِيسِ سَبْعَةُ أَسَابِيعَ وَاثْنَانِ وَسِتُّونَ أُسْبُوعًا، يَعُودُ وَيُبْنَى سُوقٌ وَخَلِيجٌ فِي ضِيقِ الأَزْمِنَةِ. "فاعمل وافهم" ... اتقالت كتير كلمات: الفهم وافهم.
المعني او التفسير: تقريبا كل مفسرين الوقت المعاصر: واخدين من كتاب (رؤي الآباء والأنبياء لأبونا عبد المسيح ثاوفيلوس النخيلي. وكان تقديم ومراجعة قداسة البابا شنودة التالت في السبعينات)
ان السبعين أسبوع متقسمين لتلات مراحل:
* أول وتاني مرحلة في التفسير مفيهومش مشاكل.
* المرحلة التالتة او الأسبوع المتبقي الاخير: ده اللي اختلف فيه المفسرين كتير
المرحلة الاولي: السبع اسابيع الاولي. والاسبوع 7 سنين = (بيساوي) 49 سنة وتقريبا من سنة 458 لسنة 409 قبل الميلاد. وديه المرحلة اللي تمت فيها بناء اورشليم والاسوار والهيكل مرة تانية وقت عزرا ونحميا وبعد الرجوع من السبي.
ولما كورش الملك امر بعودة اليهود من السبي لأورشليم ... كان سنة 538 قبل الميلاد.
بس الكتاب المقدس هنا واضح "خروج الأمر لتجديد اورشليم وبنائها." ... يعني كورش اصدر امر تاني مش بس بالرجوع من السبي لكن بالبناء. وده كان سنة 458 قبل الميلاد.
اذا من سنة 458 نشيل منها (نطرح) حوالي 49 سنة يبقي كده وصلنا لسنة 409 قبل الميلاد. وديه بكده ال 7 اسابيع الاولي. المرحلة الاولي.
المرحلة التانية: بعد السبع أسابيع الاولي. 62 اسبوع... 62 اسبوع مضروب في 7 = 434 سنة تقريبا.
من سنة 408 قبل الميلاد نطرح منها 434 ... يطلعوا سنة 26 بعد الميلاد. (اذا كنا وصلنا لسنة 409 قبل الميلاد وبعد ما يخلصوا نبتدي نحسب أسبوع سنين يعني 62 مضروب في 7 سنين = 434 ونطرح منها 408 سنة نوصل لسنة 26 بعد الميلاد.) وبكده نكون وصلنا للسنة بالظبط اللي بدا فيها السيد المسيح خدمته.
دايما التقويم الميلادي ناقص 4 سنين. التقويم الميلادي – (ناقص) 4 سنين = السنة اللي اتولد فيها المسيح وهتكون سنة 4 قبل الميلاد. يعني مش سنة واحد ميلادي. (وده نتيجة حسابات كتير). اذا سنة 26 ميلاديا هي سنة بداية خدمة المسيح.
معني كده ان اليهود كانوا عارفين من نبوة دانيال النبي امتي يأتي المسيح بالتقريب. وعلشان كده لما هيرودس الملك راحوا ليه المجوس وقالوله: اننا شوفنا نجم ملك اليهود وانه اتولد. راح هيرودس جمع كل الكتبة والفريسيين ورؤساء الكهنة علشان يقولوله المسيح يتولد امتي. لأنهم كانوا عارفين الميعاد. دانيال النبي محددها بالظبط. وكمان هيتولد في بيت لحم.
المهم ان سنة 26 ميلاديا ده بدء خدمة المسيح علنا. ووقتها كان سن يسوع المسيح 30 سنة ... ولغاية هنا مفيش اي مشكلة.
المرحلة التالتة: الأسبوع الأخير.
كتر التفسير فيه. ومش هنقدر نجزم بالظبط بحاجة واضحة ونقول ان هي ديه الصح. هيفضل الموضوع مفتوح. لكن أسهل حاجة اتقالت عن الأسبوع الأخير... الاسبوع الاخير يعني 7 سنين.
هناخد 3 سنين ونص من بدء خدمة يسوع المسيح لغاية صلب المسيح تقريبا. ودول اول النص الاول من الاسبوع (الـ 7 سنين.) يعني من سنة 26 ميلادي او اوائل سنة 27 ميلادي لغاية سنة تقريبا 30 ميلاديا. يعني كان سنة المسيح 33 سنة وشوية.
وفي النص بالظبط من الأسبوع الأخير (الـ 7 سنين) بالظبط ... ده كان صلب يسوع المسيح.
اما ال 3 سنين ونص التانيين من الأسبوع الأخير (وده بكده النص التاني منه) ... دول بقي من بعد صعود السيد المسيح لغاية استشهاد استفانوس وكانت حوالي سنة 33 او 34 ميلاديا.
وبعض الآراء تقول النص التاني من الأسبوع الأخير نخليه مفتوح. مش هنقفله او نحدده على استشهاد استفانوس وبداية الاضطهاد وانتشار المسيحية. لان 3 ونص عدد غير كامل. فده اشارة الي البقية الباقية من الزمن حتي مجئ المسيح. وأيا كان التفسير. المهم عرفنا مجئ يسوع المسيح بالظبط.
"المسيح الرئيس" ... ده لقب المسيح. ومعلمنا بولس الرسول قال "رئيس الايمان ومكمله"
"الرئيس" ... باليوناني يعني العظيم.
"سبعة اسابيع" ... وديه المرحلة الاولي حوالي 50 سنة.
"و62 أسبوع"... في الفترة ديه اللي سماها "ضيق الازمنة." علشان كانت انقطعت الرؤي ومكانش فيه تعزيات وقتها وكانت كلمة الرب عزيزة.
"يعود ويبني سوق وخليج" ... بعض الآراء تقول: اشارة الي مجيء يوحنا المعمدان اللي يهيئ الطريق.
"سوق" ... يعني الجميع جايين للتوبة.
"خيلج" ... يعني مية. فكان بيعمد الناس بيدعوهم للتوبة. كتجهيز لطريق المسيح.
26وَبَعْدَ اثْنَيْنِ وَسِتِّينَ أُسْبُوعًا يُقْطَعُ الْمَسِيحُ وَلَيْسَ لَهُ، وَشَعْبُ رَئِيسٍ آتٍ يُخْرِبُ الْمَدِينَةَ وَالْقُدْسَ، وَانْتِهَاؤُهُ بِغَمَارَةٍ، وَإِلَى النِّهَايَةِ حَرْبٌ وَخِرَبٌ قُضِيَ بِهَا. "وبعد 62 اسبوع يقطع المسيح وليس له." ... يعني في الاسبوع الاخير اللي فاضل
"يقطع المسيح" – اشارة للصلب.
"وليس له" ... باليوناني معناها من غير حكم. وفعلا ده اللي حصل ان المسيح اتصلب من غير اي ذنب. القدوس البار. والمحكمة اللي عملوها كانت فاشلة وفاسدة. فهنا الكلام عن الاسبوع الاخير.
"وشعب رئيس" ... شعب قائد.
"آت" ... بيتكلم عن خراب اورشليم بعد الاسبوع الاخير او في النص التاني من الأسبوع الأخير. والكلام هنا عن خراب اورشليم الاخير اللي كان سنة 70 ميلادي علي يد القائد الروماني تيطس.
بيقول ان الهيكل هيتدمر تماما. وهيبقي حرب. وفعلا كله اتخرب وكان مقضي بيه يعني بسماح من ربنا له المجد.
27وَيُثَبِّتُ عَهْدًا مَعَ كَثِيرِينَ فِي أُسْبُوعٍ وَاحِدٍ، وَفِي وَسَطِ الأُسْبُوعِ يُبَطِّلُ الذَّبِيحَةَ وَالتَّقْدِمَةَ، وَعَلَى جَنَاحِ الأَرْجَاسِ مُخَرَّبٌ حَتَّى يَتِمَّ وَيُصَبَّ الْمَقْضِيُّ عَلَى الْمُخَرِّبِ». "ويثبت عهدا مع كثيرين في اسبوع واحد" ... بيتكلم عن الأسبوع الأخير. معناها: اننا نقدر ناخدها علي بداية إيمان الشعوب بربنا يسوع المسيح. لان لما جه المسيح كتير من اليهود امنوا بيه. وكتير من اهل السامرة كمان. وحتى بعد صعوده وكرازة التلاميذ. ابتدا يثبت عهد مع كثيرين في اسبوع واحد. ولغاية دلوقتي في ناس بتؤمن بربنا يسوع المسيح.
"في وسط الاسبوع يبطل الذبيحة والتقدمة"... بيقول ان في وسط الاسبوع ده كان صلي يسوع المسيح. وبالصلب انشق حجاب الهيكل وخلاص بطلت التقدمات... ربنا مش هيقبل منهم تقدمات تاني. قطعت التقدمات روحيا.
وان كان اليهود ممكن كانوا بيقدموا تقدمات لغاية تدمير الهيكل نهائي في عهد القائد الروماني تيطس. لكن روحيا مكانتش بتتقبل منهم تقدمات قدام ربنا. لان التقدمة الحقيقية: هو ربنا يسوع له المجد علي الصليب.
"وعلى جناح الارجاس مخرب" ... في الترجمة اليوناني والقبطي " وعلي الهيكل رجسة خراب." وشوفناها في (انجيل متي اصحاح 24 : 15 و16 "فمتي نظرتم رجسة الخرار اللي قال عنها دانيال قائمة في المكان المقدس ... والذي علي السطح فلا ينزل ليأخذ من بيته شئ") ويقال ان المسيحيين كانوا عارفين: ان اورشليم واليهكل هيتخربوا وهيتدمروا تماما. ولما شافوا القائد الروماني تيطس وابتدت الجيوش تحاصر اورشليم. المسيحيين عرفوا وافتكروا كلام ربنا يسوع المسيح وهربوا. لكن بقية اليهود اللي مآمنوش بيسوع المسيح مكانوش مصدقين. وفضلوا في اورشليم وكانت مذبحة وقتها. ويقال ان في وقت الحصار ده: كان اليهود بيموتوا أولادهم ويأكلوهم لانهم مش لاقيين اكل. فده اللي قاله دانيال "وعلى الهيكل رجسة الخراب"
"حتى يتم ويصب المقضي علي المخرب." ... لغاية ما كل الكلام اللي اتقال. وربنا كان قد قضي بيه لازم يتم حرفيا.
اذا الخلاصة
الـ 70 اسبوع متقسمين لثلاث مراحل:
1) 50 سنة لغاية بناء اورشليم والهيكل والاسوار من جديد.
2) 62 اسبوع سنين ... 62 مضروب في 7 = 434 سنة قطعت فيهم التعزيات عن الشعب. علشان كده قال "في ضيق ". لغاية بداية خدمة المسيح.
3) الاسبوع الاخير. هو ده اللي فيه اقاويل او كذا رأي:
* الفترة الأولي مفيهاش اي مشكلة في التفسير وكانت فترة لغاية صلب المسيح.
* والفترة التانية او النص التاني: قالوا نخليه مفتوح لغاية المجيء التاني. او جايز يكون ليه تفسير تاني. بس جايز نفهمه في السماء بعد كده. لانه مختوم ومش مشروح.
⪢