⪡ 1فِي السَّنَةِ الأُولَى لِبَيْلْشَاصَّرَ مَلِكِ بَابِلَ، رَأَى دَانِيآلُ حُلْمًا وَرُؤَى رَأْسِهِ عَلَى فِرَاشِهِ. حِينَئِذٍ كَتَبَ الْحُلْمَ وَأَخْبَرَ بِرَأْسِ الْكَلاَمِ. هنبتدي الإصحاحات النبوية... الجزء ده رؤي دانيال النبي. والإصحاحات ديه مش مترتبة ترتيب زمني.
مثلا هنا آية 1: بيتكلم عن بيلشاصر. وشوفنا سقوطه في الإصحاح الخامس وسقوط مملكته...إذا زمنيا كترتيب المفروض الاصحاح السابع يجي قبل الاصحاح الخامس. يبقى هنا مش ترتيب زمني.
في تلات البصخة في الساعة التاسعة تقريبا بتتقري نبوة من سفر دانيال من الإصحاح السابع.
"رؤي راسه علي فراشه" ... غالبا كان التعبير اللي بيستخدم للأحلام رؤي راسه. بالرغم انه كان حلم او رؤيا واحدة. لكن غالبا علشان فيها كذا مقطع فاتقسمت رؤي.
شوفنا قبل كده دانيال مفسر الاحلام. دلوقتي هنشوف دانيال الرائي اللي بيشوف رؤي. ربنا استأمن دانيال على رؤي مش تخص مستقبل الكنيسة بس لكن ده مستقبل العالم كله. ويقال إن سفر دانيال ماشي بالتوازي مع سفر الرؤيا في العهد الجديد. والاتنين أسفار نبوية عهد قديم وجديد. وفي تشابهات كتيرة بينهم.
ودانيال كتب الحلم اللي شافه.
"وأخبر برأس الكلام" ... في الترجمة معناها: كتب لنا محتوى الرؤيا.
2أَجَابَ دَانِيآلُ وَقَالَ: «كُنْتُ أَرَى فِي رُؤْيَايَ لَيْلاً وَإِذَا بِأَرْبَعِ رِيَاحِ السَّمَاءِ هَجَمَتْ عَلَى الْبَحْرِ الْكَبِيرِ. الرؤيا ديه شافها دانيال النبي بليل... وفي فرق بين رؤيا اللي الشخص بيشوفها وهو منتبه مش بيكون نايم. والحلم: الواحد بيشوفه وهو نايم تماما.
حلم دانيال ده نقدر نحطه جنب حلم نبوخذنصر اللي في الاصحاح التانى بتاع التمثال (المقصود بيه الممالك الاربعة.) وان نبوخذنصر شاف الحلم في شكل تمثال. هنا دانيال شاف نفس الرؤيا بس في شكل 4 حيوانات.
"البحر الكبير" ...غالبا المقصود بيه البحر الأبيض المتوسط لأنه كان في وسط آسيا وأفريقيا وأوروبا. او بمعني اصح كان في دايرة الممالك اللي هتقوم ديه.
"وإذ بأربع رياح السماء هجمت" ... قيام وسقوط ممالك ده كان بسماح إلهي من السماء. مفيش حاجة مشيت بطريقة عشوائية. الله هو ضابط الكل.
3وَصَعِدَ مِنَ الْبَحْرِ أَرْبَعَةُ حَيَوَانَاتٍ عَظِيمَةٍ، هذَا مُخَالِفٌ ذَاكَ. 4 حيوانات ... رموز لـ 4 ممالك.
طيب ليه ربنا له المجد ادي الحلم ده لنبوخذنصر في شكل تمثال ولدانيال النبي في شكل 4 حيوانات؟ ده علشان يوضحلنا اختلاف الرؤيا ما بين نظرة ربنا للشيء ونظرة الإنسان لنفس الشيء.
نبوخذنصر شافه كإنسان. وان اللي بيحصل ده عادي. وكل الشر اللي في الممالك ده عادي. ساعات كتيرة بتكون نظرة الإنسان للشيء حاجة عادية. لكن نفس الشيء في نظر الله خطية عظيمة.
علشان كده دانيال شاف الحلم انها حيوانات شرسة ومفترسة. فربنا له المجد مش شايف أنها حاجة عادية... الناس بره مصر بيقولوا إيه المشكلة في العلاقات قبل الزواج لكن ربنا له المجد بيشوف العلاقات ديه أنها خطية. واللي يقول إيه المشكلة في الشذوذ لكن ربنا بيقول أنها خطية. فالناس شايفة إن الغلط ده حاجة عادية. فلازم يكون لينا نظرتنا اللي تمشي مع نظرة الله للأمور. العالم ميضحكش علينا حتى لو عايشين في الغربة. المهم ميبقاش لينا نفس نظرة أهل العالم للأمور. لازم نمشي حسب كلام الكتاب المقدس. وده اللي شوفناه مع دانيال والفتية الثلاثة مع عدد سنين السبي الطويلة وكان برده ناجح جدا في حياته العملية.
4الأَوَّلُ كَالأَسَدِ وَلَهُ جَنَاحَا نَسْرٍ. وَكُنْتُ أَنْظُرُ حَتَّى انْتَتَفَ جَنَاحَاهُ وَانْتَصَبَ عَنِ الأَرْضِ، وَأُوقِفَ عَلَى رِجْلَيْنِ كَإِنْسَانٍ، وَأُعْطِيَ قَلْبَ إِنْسَانٍ. لما يجي يقول اسم الحيوان هيقول: كالـ... واسم الحيوان بعدها. مثل النمر او الدب. لكن إيه هو الحيوان بالظبط دانيال مش عارف.
زي القديس يوحنا الحبيب لما اتكلم عن الأربع كائنات غير المتجسدة كان بيقول: شبه كذا. لكن إيه هو بالظبط هو مش عارف. مش عارف يحدد هو شبه إيه بالظبط.
الأول كالأسد: بالمقارنة مع رؤيا نبوخذنصر: الحيوان الأول يشير لمملكة بابل... علي فكرة في نبوة إشعياء النبي وحزقيال النبي و إرميا النبي: كتير شبهوا نبوخذنصر ومملكة بابل مرة بالأسد ومرة بالنسر... الأسد ملك الحيوانات والنسر ملك الطيور.
فعاوز يقول ان المملكة ديه كانت قوية جدا في الاول.
"له جناحا نسر" ... قوة شديدة جدا. بس " انتتف جناحاه" ... بعد ماكنا شايفين نبوخذنصر والمملكة البابلية عمالة تكبر اوي وبتضم كل البلاد تقريبا ابتدت في الآخر متكبرش تاني. وزي ما شوفنا بيلشاصر اخر ملك في بابل والرعب اللي حصله ورجليه خبطت في بعض لما شاف الأيد بتكتب على الحيطة. فبعد ما كان أسد هيبقي كأنه إنسان. بعد كل عظمة بابل ديه كل ده هينتهي. وديه كانت المملكة الأولي: مملكة بابل.
5وَإِذَا بِحَيَوَانٍ آخَرَ ثَانٍ شَبِيهٍ بِالدُّبِّ، فَارْتَفَعَ عَلَى جَنْبٍ وَاحِدٍ وَفِي فَمِهِ ثَلاَثُ أَضْلُعٍ بَيْنَ أَسْنَانِهِ، فَقَالُوا لَهُ هكَذَا: قُمْ كُلْ لَحْمًا كَثِيرًا. حيوان تاني: شبيه بالدب. مفيش مملكة استمرت للأبد. تقوم مملكة وترتفع اووي وبعدين تنتهي. لكل بداية نهاية. ولكل ظلم انقضاء ولكل فساد محكمة الهية تحكم عليه. مفيش حاجة بتدوم للأبد. وعلشان كده لازم نحسب حساب النهاية. لازم نفكر صح لان لينا نهاية في الحياة هنا.
يقال ان مملكة مادي وفارس اشتهرت بالدببة الضخمة.
"فارتفع على جنب واحد" ... عاوز يقول احتمال ان ده معناه: المملكة في الأول مملكة مادي وفارس وجه داريوس المادي. وبعده جه كورش الملك الفارسي. وبقت اسمها المملكة الفارسية.
بعض الآباء فسروها ان المملكة ديه كانت بتعامل كل الامم بطريقة وعاملوا اليهود بطريقة مختلفة. وهما اللي سمحوا لليهود يرجعوا تاني لأورشليم.
"وفي فمه تلاتة أضلع بين أسنانه" ... يقال ان دول 3 ممالك او مدن شهيرة جدا في بابل وأسقطتهم مملكة مادي وفارس وقامت المملكة الجديدة ديه.
"فقالوا له هكذا: قم كل لحما كثيرا" ... كانوا بيقولوا ان بتوع مادي وفارس لما يدخلوا بلد كانوا بيدخلوا بأعداد مهولة علشان ينقضوا على الموارد بتاعة البلد ويدمروها تمام و تبقي في مجاعة في البلد ديه اللي احتلوها.
6وَبَعْدَ هذَا كُنْتُ أَرَى وَإِذَا بِآخَرَ مِثْلِ النَّمِرِ وَلَهُ عَلَى ظَهْرِهِ أَرْبَعَةُ أَجْنِحَةِ طَائِرٍ. وَكَانَ لِلْحَيَوَانِ أَرْبَعَةُ رُؤُوسٍ، وَأُعْطِيَ سُلْطَانًا. الحيوان التالت: مثل النمر وعلي ضهره 4 اجنحة.
مملكة بابل في انتشارها كان عندها جناحين (آية 4). هنا على ظهره 4 اجنحة ومعناها أن انتشاره كان أسرع بكتير من مملكة بابل.
"4 رؤوس" ... معناه فكر عميق جدا. لان الرأس بتشير للفكر. إذا المملكة انتشرت بسرعة جدا. وصاحبة تفكير. الكلام عن مملكة اليونان. ويقال ان الإسكندر الأكبر قدر يفتح العالم كله في 10 سنين. ومات عنده 34 سنة. وكان بيحب يفتح البلاد وينشر الفكر اليوناني والفلسفة.
اليونانيين كانوا فاكرين نفسهم اصحاب الفكر والسادة في العالم. واي ناس مش يونانيين بيسموهم برابرة. يعني غرباء. اسم القديسة بربارة: يعني غريبة.
كان الإسكندر الأكبر بيعتمد على ذكائه في الفتوحات... علشان كده الدولة 4 أجنحة ... لأنه انتشر بسرعة جدا.
و 4 رؤوس ... يعني فكر وفلسفة عميقة.
"وأعطي سلطانا" ... يعني اوعي تفتكر يا اسكندر ن ده بقوتك وذكائك وحكمتك. لكن ربنا هو اللي اداك سلطانا.
المسيح له المجد قال لبيلاطس البنطي المحاكمة: أنت متقدرش تعمل اي حاجة الا إذا كنت اعطيت سلطانا من فوق. إذا محدش يقدر يعمل اي حاجة الا إذا ربنا له المجد هو اللي اداله السلطان ده. فالإسكندر اخذ فرصته. ويقال ان الاربعة دول رمز للملوك الاربعة اللي جم بعد الاسكندر الاكبر. لأن من بعده المملكة بتاعته اتقسمت إلى 4.
يبقى لما نلاقي حد ظالم اوي ونعاتب ربنا له المجد: ليه كده يارب؟ لازم نفتكر وقتها "اعطي سلطانا" ونحط جنبها (آية 12 "ولكن أعطوا طول حياة إلى زمان ووقت.") والوقت ده هينتهي. علشان لما الحياة تنتهي والشخص ده بعيد عن ربنا له المجد ربنا هيقوله: اديتك فرصة وأنت مستفدتش من الفرصة ديه.
7بَعْدَ هذَا كُنْتُ أَرَى فِي رُؤَى اللَّيْلِ وَإِذَا بِحَيَوَانٍ رَابعٍ هَائِل وَقَوِيٍّ وَشَدِيدٍ جِدًّا، وَلَهُ أَسْنَانٌ مِنْ حَدِيدٍ كَبِيرَةٌ. أَكَلَ وَسَحَقَ وَدَاسَ الْبَاقِيَ بِرِجْلَيْهِ. وَكَانَ مُخَالِفًا لِكُلِّ الْحَيَوَانَاتِ الَّذِينَ قَبْلَهُ، وَلَهُ عَشَرَةُ قُرُونٍ. ده الحيوان الرابع: ودانيال مقدرش يديله اسم وله صفات كتيرة وغريبة. ومعرفش يوصف الحيوان ده.
"هائل" ... فى الترجمة يعني مرعب ...."قوي" ... في الترجمة معناه مفزع.
وشديد اوي وليه أسنان من حديد كبيرة. وده يفكرنا بالحديد اللي كان في التمثال اللي حلم بيه نبوخذنصر. فديه مملكة قوية جدا زي الحديد وشكله مختلف. المملكة الرومانية كانت مختلفة. هنحط معاها الآية 23: أن مملكة الرومان كانت متميزة.
منقدرش نحصر كلمة الله وخاصة لما يكون ليها بعد نبوي في شخص معين وزمن معين. ممكن الكلام ينطبق علي اكتر من شخص واكتر من مملكة واكتر من زمن. كلمة الله واسعة جدا محدش يقدر يحدها. علشان كده يقال ان المملكة الرومانية مازالت مستمرة لأنها اتقسمت بعد كده لدول أوروبا الكثيرة وبعدها عرفنا امريكا.
"عشرة قرون" ... رمز للكترة. ليها ملوك كتير.
"أكل وسحق وداس الباقي برجليه" ... إشارة للمملكة الرومانية اللي غطت علي كل اللي قبليها.
8كُنْتُ مُتَأَمِّلاً بِالْقُرُونِ، وَإِذَا بِقَرْنٍ آخَرَ صَغِيرٍ طَلَعَ بَيْنَهَا، وَقُلِعَتْ ثَلاَثَةٌ مِنَ الْقُرُونِ الأُولَى مِنْ قُدَّامِهِ، وَإِذَا بِعُيُونٍ كَعُيُونِ الإِنْسَانِ فِي هذَا الْقَرْنِ، وَفَمٍ مُتَكَلِّمٍ بِعَظَائِمَ. الحيوان الرابع لفت انتباه دانيال النبي اوي علشان كده يقول "كنت متأملا بالقرون." وكمان هتكلم عن قرن صغير طلع ما بين القرون ديه.
هنشوف في الإصحاح ده شوية تداخلات: يتكلم على حاجة ويطلع منها يتكلم عن حاجة تانية ويرجع تاني للموضوع الاولاني. وده يفكرنا بـ متي 24: لما ربنا له المجد اتكلم عن خراب أورشليم ونهاية العالم والاحداث كانت متداخلة في بعض. هنا برده نفس القصة: التداخل.
فبيقول بقي ليه عيون كعيون انسان وبقي ليه فم يتكلم بعظائم.
القديس يوحنا ذهبي الفم يقول: أن القرن ده إشارة لضد المسيح. 2 تسالونيكي 2: "ويستعلن إنسان الخطية ابن الهلاك.... مظهرا نفسه انه إله." وهنا كان القديس بولس الرسول بيتكلم عن ضد المسيح. 2تسالونيكي 2: 8 "سيستعلن الأثيم الذي الرب يبيده بنفخة فمه. ويبطله بظهور مجيئه (نهاية ضد المسيح بمجيء المسيح الثاني) ... وبكل خديعة الإثم في الهالكين (لأنه هيضيع ناس كتير.) " ... علشان كده هنا قال انه " متكلم بعظائم.".
وكمان هنا آية 20 "وهذا القرن له عيون وفم متكلم بعظائم ومنظره أشد من رفقائه". وآية 21 وآية 25
"يتكلم بكلام ضد العلي..... والسنة (القانون) "
يعني القرن ده هو إشارة لضد المسيح... ومعلمنا بولس الرسول يقول "إنسان الخطية." وهيتكلم بكلام تجديف ضد ربنا له المجد وهيجلس في هيكل الله كإله. ويحارب قديسي العلي اللي هما المؤمنين. في الأول هيغلبهم.
9كُنْتُ أَرَى أَنَّهُ وُضِعَتْ عُرُوشٌ، وَجَلَسَ الْقَدِيمُ الأَيَّامِ. لِبَاسُهُ أَبْيَضُ كَالثَّلْجِ، وَشَعْرُ رَأْسِهِ كَالصُّوفِ النَّقِيِّ، وَعَرْشُهُ لَهِيبُ نَارٍ، وَبَكَرَاتُهُ نَارٌ مُتَّقِدَةٌ. الجزء بتاع البصخة: تلات البصخة: "القديم الأيام" ... في ثيؤطوكية الجمعة: اتقالت عن ربنا له المجد الكائن قبل الدهور أتى وتجسد منك (من العذراء ام النور) عتيق الايام خرج من بطنك.
الآباء قالولنا إن قديم الأيام ... هو الله الآب. وفي التسبحة اخذنا نفس التعبير "القديم الأيام" واستخدمناه عن ربنا يسوع المسيح. وكان الكنيسة بتقولنا مفيش فارق زمني بين الأب والابن... لم توجد لحظة كان الاب كائنا بدون ابنه. الأب أزلي عتيق الايام والابن أزلي عتيق الايام.
هيقولنا بعض صفات الله الآب. والله الآب لم يره أحد قط. (لكن كل ده للتقريب)
"وجلس القديم الأيام" ... الجلوس اشارة الى القوة والسيادة. يعني في كل اللخبطة اللي هنشوفها في نهاية الأيام: لكن الله يجلس على عرشه وهو ضابط الكل. محدش يقلق ولا يخاف.
"لباسه ابيض كالثلج وشعر رأسه كالصوف النقي" ... إشارة للوقار. ودايما لما بنتكلم عن السماء نلاقي ان بيغلب عليها اللون الأبيض: إشارة للنقاوة والطهارة. فكل واحد مننا يراجع حساباته. حياتنا شكلها ايه؟ هل عايشين في طهارة ونقاوة ولا فيها بقع خطية؟ عندنا لغاية دلوقتي فرصة اننا نغسل ثيابنا في دم يسوع المسيح عن طريق التوبة والاعتراف والتناول. وأبونا لما بيناولنا بيقول: دم ربنا يسوع المسيح يطهر من كل خطية. لان السماء مفيهاش حاجة دنسة ولا نجسة.
"وعرشه لهيب نار وبكراته نار متقدة" ... حاجة تخوف. مهما كان الظلم بيكبر شوية شوية لكن مين يقدر يقف قدام ربنا له المجد؟ "إلهنا نار متقدة."... مفيش اي ظالم في الدنيا يقدر يقف قدام هذا العرش الملتهب بالنار.
10نَهْرُ نَارٍ جَرَى وَخَرَجَ مِنْ قُدَّامِهِ. أُلُوفُ أُلُوفٍ تَخْدِمُهُ، وَرَبَوَاتُ رَبَوَاتٍ وُقُوفٌ قُدَّامَهُ. فَجَلَسَ الدِّينُ، وَفُتِحَتِ الأَسْفَارُ. "نهر نار جرى وخرج من قدامه" ... تفكرنا بالروح القدس الذي ينبثق من الاب ويعمل في الكنيسة.
واتفقنا ان الكنيسة اللي فيها روح ربنا له المجد شغال ديه كنيسة متقدة بنار الخدمة. حاجة تفرح: فيها اجتماعات وصلوات وخدمات. وياريت نصلي لكنايسنا في كل مكان انها تبقي كده. علشان متبقاش كنايس خاملة ومفيهاش روح الله. أولادها يضيعوا. احنا عاوزين كنايسنا وبيوتنا يجري فيها روح الله. الروح القدس. نار يعمل فيها. ويشبعنا ويفرحنا ويعزينا.
"الوف الوف وربوات ربوات وقوف قدامه" ... بنسمعها في القداس.
"فجلس الدين وفتحت الأسفار" ... الدين.. اتكررت 3 مرات في الإصحاح هنا. (في آية 10 و22 و26)
ومعناها المحكمة. إشارة لأن هناك محكمة إلهية تقضي. ربنا له المجد مش سايب الدنيا كده. وتكرار الكلمة ديه علشان يقولنا: ان الله يجازي كل واحد بالعدل. محكمة العدل الإلهية والكل هيقف قدامها.
لما تعقد المحكمة الإلهية هتفتح الأسفار وكل واحد فينا هيقف قدام ربنا له المجد وقدام العالم كله. واللي مكانش معروف عننا هيتعرف قدام الكل (حاجة ترعب وتخوف.)
مثلا واحد يفكر أو يعمل حاجة غلط ويقول: لو ابويا او امي عرفوا او شافوا اللي باعمله ده. فالواحد ساعات بيتكسف من مجرد فكرة ان حد عرف عني كده. ما بالك بقي قدام ربنا له المجد المحكمة الالهية وتتفتح الأسفار (الكتاب اللي بيتكتب فيه كل اعمالنا وده هيتفتح قدام الله والعالم كله.) فلازم نعمل حساب اليوم ده ونقول يارب استر علينا.
علشان كده في القداس نقول: يارب اغسلنا. يارب طهرنا. يارب نقينا. يارب ارحمنا. وياريت نطلب الطلبة ديه من قلبنا بجد علشان ننال المكافأة السماوية.
11كُنْتُ أَنْظُرُ حِينَئِذٍ مِنْ أَجْلِ صَوْتِ الْكَلِمَاتِ الْعَظِيمَةِ الَّتِي تَكَلَّمَ بِهَا الْقَرْنُ. كُنْتُ أَرَى إِلَى أَنْ قُتِلَ الْحَيَوَانُ وَهَلَكَ جِسْمُهُ وَدُفِعَ لِوَقِيدِ النَّارِ. إذا كنت شايف ظلم بأي شكل من الاشكال وبتقول لربنا له المجد ايه اللي بيحصل ده يارب؟ فلازم تبقى متأكد ان في محكمة إلهية وأن في عدل إلهي. امتي؟ مش موضوعنا. بس الاكيد ان في عدل إلهي.
"القرن" ... ضد المسيح. فهنا هو شايف المحكمة الإلهية منعقدة والقديم الايام. ولقي القرن اللي هو ضد المسيح عمال يتكلم بكلمات عظيمة "كنت أرى. إلى أن قتل الحيوان وهلك جسمه ودفع لوقيد النار" ... انتهي تماما.
12أَمَّا بَاقِي الْحَيَوَانَاتِ فَنُزِعَ عَنْهُمْ سُلْطَانُهُمْ، وَلكِنْ أُعْطُوا طُولَ حَيَاةٍ إِلَى زَمَانٍ وَوَقْتٍ. معناها: هياخذوا وقتهم يمكن يتوبوا. ولو متابوش هما أحرار. نحفظ الآية ديه " أعطوا طول حياة إلى زمان ووقت."... مملكة بابل اخدت وقتها وكمان مملكة فارس ومادي أخذوا وقتهم وكمان اليونانيين.
والجزء ده فيه تداخل زي ما قولنا. زي ما كان المسيح يتكلم عن خراب أورشليم ونهاية العالم...كل واحد وتصرفاته قدام المحكمة الالهية المنعقدة وكل واحد مسئول عن تصرفاته وهيتحكم عليه. لكن لو قدم توبة واعتراف المحكمة هتبقي في صفه.
13«كُنْتُ أَرَى فِي رُؤَى اللَّيْلِ وَإِذَا مَعَ سُحُبِ السَّمَاءِ مِثْلُ ابْنِ إِنْسَانٍ أَتَى وَجَاءَ إِلَى الْقَدِيمِ الأَيَّامِ، فَقَرَّبُوهُ قُدَّامَهُ. يرجع تاني للرؤيا: بما أن الكنيسة قريت علينا الجزء ده في اسبوع الالام. فغالبا ده مقصود بيه الفداء والصليب.
"فقربوه قدامه" ... لما قرب الابن الوحيد. الذي أصعد ذاته ذبيحة مقبولة على الصليب عن خلاص جنسنا بإرادته. فده إشارة للصليب. والمسيح هو الذبيحة التي قدمت أمام الله الآب. علشان كده يقول: "وإذا مع سحب السماء" ... يعني في مجد. والمسيح قال عن الصليب: انه مجد.
14فَأُعْطِيَ سُلْطَانًا وَمَجْدًا وَمَلَكُوتًا لِتَتَعَبَّدَ لَهُ كُلُّ الشُّعُوبِ وَالأُمَمِ وَالأَلْسِنَةِ. سُلْطَانُهُ سُلْطَانٌ أَبَدِيٌّ مَا لَنْ يَزُولَ، وَمَلَكُوتُهُ مَا لاَ يَنْقَرِضُ. "فاعطي سلطانا ومجدا وملكوتا" ... هناخدها عن المسيح في حالة الإخلاء. يعني التجسد. واحنا بنقول إن المسيح ملك علي خشبة... في تسبحة أسبوع الآلام: لك القوة والمجد والبركة عمانوئيل الهنا وملكنا.
"ولا ينقرض" ... مملكة المسيح لا تنقرض. علشان كده يقول سلطانه أبدى. لان مفيش انسان سلطانة أبدى. ولا يزول. إذا هنا بنتكلم عن الله الظاهر في الجسد.
15«أَمَّا أَنَا دَانِيآلَ فَحَزِنَتْ رُوحِي فِي وَسَطِ جِسْمِي وَأَفْزَعَتْنِي رُؤَى رَأْسِي. هنشوف أثر الرؤيا ديه علي دانيال النبي: دانيال حزن لما شاف الرؤيا ديه. "رؤي" ... لأنه شاف القديم الأيام وابن الإنسان وشاف الحيوان والقرن. وحزن لأن الرؤيا غريبة واكيد فيها مناظر صعبة ومخيفة. وكمان هو مش فاهم معناها.16فَاقْتَرَبْتُ إِلَى وَاحِدٍ مِنَ الْوُقُوفِ وَطَلَبْتُ مِنْهُ الْحَقِيقَةَ فِي كُلِّ هذَا. فَأَخْبَرَنِي وَعَرَّفَنِي تَفْسِيرَ الأُمُورِ: "واحد من الوقوف" ... يعني اقترب الي ملاك.
دانيال النبي في التقليد الكنسي بنقول عليه: صديق الملايكة. حتى دعي من قبل الملاك: يا دانيال أيها الرجل المحبوب. وكمان الملاك جاله في الجب " الله أرسل ملاكه." فطلب من أحد الملايكة أنه يفهم. فالملاك شرح له التفسير. اللي احنا شرحناه فوق.
17هؤُلاَءِ الْحَيَوَانَاتُ الْعَظِيمَةُ الَّتِي هِيَ أَرْبَعَةٌ هِيَ أَرْبَعَةُ مُلُوكٍ يَقُومُونَ عَلَى الأَرْضِ. الملاك هيشرح لدانيال المعني... "الحيوانات العظيمة " ... هما الـ 4 ملوك.
ليه مقالش مملكة وقال ملك؟ لان كل مملكة كان ليها ملك متميز اووي.
مملكة بابل ... نبوخذنصر. / مملكة مادي وفارس... كورش الملك. / مملكة اليونان ... الاسكندر الاكبر.
لكن لما نيجي عند المملكة الرابعة: يقول ديه مملكة وعشر قرون وملوك كتير وهيطلع قرن اللي هو ضد المسيح. وهنشوفه هيطلع منين في الاخر.
18أَمَّا قِدِّيسُو الْعَلِيِّ فَيَأْخُذُونَ الْمَمْلَكَةَ وَيَمْتَلِكُونَ الْمَمْلَكَةَ إِلَى الأَبَدِ وَإِلَى أَبَدِ الآبِدِينَ. الآية ديه هتتكرر كتير. نفهم من الآية ديه. ان بالرغم من كل الضيق واللي هنشوفه في الآخر واللي هتشوفه الكنيسة لكن أولاد الله سيملكون مع المسيح. علشان نبقى فاهمين صح: احنا مش مستنين ملك الفي ويجي المسيح يملك ألف سنة على الأرض. معندناش المفهوم ده. المسيح قال "مملكتي ليست من هذا العالم.
والآية ديه تدينا فكرة انا المملكة ديه مش علي الارض. لان مفيش مملكة على الأرض "الي الأبد والى أبد الابدين."
نحط الآية 27 مع الآية ديه علشان نفهم ان الملكوت في السماء مش علي الارض.
19حِينَئِذٍ رُمْتُ الْحَقِيقَةَ مِنْ جِهَةِ الْحَيَوَانِ الرَّابعِ الَّذِي كَانَ مُخَالِفًا لِكُلِّهَا، وَهَائِلاً جِدًّا وَأَسْنَانُهُ مِنْ حَدِيدٍ وَأَظْفَارُهُ مِنْ نُحَاسٍ، وَقَدْ أَكَلَ وَسَحَقَ وَدَاسَ الْبَاقِيَ بِرِجْلَيْهِ، كل ده ودانيال النبي دماغه مع الحيوان الرابع اللي كان شكله غريب اوي بالنسبة له.
"رمت الحقيقة" ... يعني عاوز افهم إيه ده بالظبط.
بيشرح الحيوان الرابع... الحديد والنحاس من أقوى وأصلب المعادن. معادن قوية جدا. يعني الحيوان ده شرس. وغالبا ديه مملكة هتنتشر في الدنيا كلها
20وَعَنِ الْقُرُونِ الْعَشَرَةِ الَّتِي بِرَأْسِهِ، وَعَنِ الآخَرِ الَّذِي طَلَعَ فَسَقَطَتْ قُدَّامَهُ ثَلاَثَةٌ. وَهذَا الْقَرْنُ لَهُ عُيُونٌ وَفَمٌ مُتَكَلِّمٌ بِعَظَائِمَ وَمَنْظَرُهُ أَشَدُّ مِنْ رُفَقَائِهِ. 21وَكُنْتُ أَنْظُرُ وَإِذَا هذَا الْقَرْنُ يُحَارِبُ الْقِدِّيسِينَ فَغَلَبَهُمْ، ورجع تاني يتكلم عن القرون: هنشوف الحتة ديه: هل ضد المسيح هيقوم بعد ما يسقط 3 ملوك؟ زي ما اتفقنا احنا لا ندعي معرفة كل حاجة وكلمة الله واسعة جدا. (علشان كده اللي فوق معرفتنا نقول عليه: ننتظر ونري. وهل احنا هنشوف الكلام ده ولا الاجيال اللي بعدنا؟ لكن تبقى الحياة مع الله بالإيمان وليس بالعيان.)
"فسقطت قدامه تلاتة" ...الله اعلم لسه هيحصل ولا حصل واحنا ماخدناش بالنا؟ محدش عارف.
ورجع تاني يتكلم عن القرن. دانيال متأثر جدا بالحيوان الرابع.
في رؤيا 13 وتسالونيكي 2: نفس التعبيرات ديه قالها القديس يوحنا الحبيب في (سفر الرؤيا 13: "واعطي فما يتكلم بعظائم و تجاديف. واعطي ان يصنع حربا مع القديسين .... 42 شهرا... يحارب القديسين فغلبهم."
بس لازم نحط في بالنا طول ما القرن ده بيعمل كده: أن المحكمة الإلهية منعقدة. وربنا مش سايب أولاده ولا كنيسته ولا سايب الظلم. وكان ربنا مش واخد باله. حتى لو ظهر في الأول أنه غلب القديسين (آية 21).
22حَتَّى جَاءَ الْقَدِيمُ الأَيَّامِ، وَأُعْطِيَ الدِّينُ لِقِدِّيسِيِ الْعَلِيِّ، وَبَلَغَ الْوَقْتُ، فَامْتَلَكَ الْقِدِّيسُونَ الْمَمْلَكَةَ. "الذين" ... بتتكرر مرة تاني. ومعناها في الترجمة: القضاء. وفي بعض الترجمات العربي " وأنصف قديسي العلي.".
لما جه قديم الأيام: رجع حق أولاده أصل حق أولاد ربنا مش بيضيع.
في الختم الخامس في سفر الرؤيا: "لما فتح الختم الخامس رأيت نفوس الذين تحت المذبح: إلى متى ايها القدوس والحق لا تنتقم لدمائنا من الساكنين على الارض." ... هما مش عاوزين انتقام بمعنى انتقام لكن عاوزين الحق والعدل. وطبعا فى الأخر الحق هو اللي هينتصر وأولاد الله هما اللي هيملكوا مع الله في السماء."
"وبلغ الوقت" ... طيب امتي يارب الوقت ده؟ الوقت ده بتاع ربنا. "ليس لكم ان تعرفوا الازمنة والاوقات التي وضعها الآب في سلطانه " احنا نعرف على اد معرفتنا لكن "لا نرتقي فوق ما ينبغي ان نرتقي اليه."
23«فَقَالَ هكَذَا: أَمَّا الْحَيَوَانُ الْرَّابعُ فَتَكُونُ مَمْلَكَةٌ رَابِعَةٌ عَلَى الأَرْضِ مُخَالِفَةٌ لِسَائِرِ الْمَمَالِكِ، فَتَأْكُلُ الأَرْضَ كُلَّهَا وَتَدُوسُهَا وَتَسْحَقُهَا. مملكة الرومان واللي بعدها مختلفة عن باقي الممالك.24وَالْقُرُونُ الْعَشَرَةُ مِنْ هذِهِ الْمَمْلَكَةِ هِيَ عَشَرَةُ مُلُوكٍ يَقُومُونَ، وَيَقُومُ بَعْدَهُمْ آخَرُ، وَهُوَ مُخَالِفٌ الأَوَّلِينَ، وَيُذِلُّ ثَلاَثَةَ مُلُوكٍ. رقم (10) بيدل على الكثرة. مش بالضرورة لازم يكون عشرة فعليا. "وهو مخالف الأولين" ... اللي هو القرن ده. و هيذل 3 ملوك. كررها دانيال النبي قبل كده. 25وَيَتَكَلَّمُ بِكَلاَمٍ ضِدَّ الْعَلِيِّ وَيُبْلِي قِدِّيسِي الْعَلِيِّ، وَيَظُنُّ أَنَّهُ يُغَيِّرُ الأَوْقَاتَ وَالسُّنَّةَ، وَيُسَلَّمُونَ لِيَدِهِ إِلَى زَمَانٍ وَأَزْمِنَةٍ وَنِصْفِ زَمَانٍ. وده اللي شفناه فى سفر الرؤيا. "السنة" ... عاوز يغير القوانين.
"زمان وازمنة (زمانين) ونصف زمان" ... بالظبط اتكررت فى سفر الرؤيا. طيب اشمعنا تلاتة ونص؟ لأنها نص السبعة. ورقم 7 رقم الكمال. فيهاخد وقته. بس حاجة ناقصة. يعني ربنا مش هيسيبه. وربنا له المجد قال "أن لم تقصر تلك الأيام لا يخلص أحد.". منقلقش. ربنا مش هيسيبه.
26فَيَجْلِسُ الدِّينُ وَيَنْزِعُونَ عَنْهُ سُلْطَانَهُ لِيَفْنَوْا وَيَبِيدُوا إِلَى الْمُنْتَهَى. المحكمة هتعقد تاني. "سيبيده الرب بنفخة فمه." ... لما يجي المسيح فى المجيء الثاني هيباد ضد المسيح تماما.27وَالْمَمْلَكَةُ وَالسُّلْطَانُ وَعَظَمَةُ الْمَمْلَكَةِ تَحْتَ كُلِّ السَّمَاءِ تُعْطَى لِشَعْبِ قِدِّيسِي الْعَلِيِّ. مَلَكُوتُهُ مَلَكُوتٌ أَبَدِيٌّ، وَجَمِيعُ السَّلاَطِينِ إِيَّاهُ يَعْبُدُونَ وَيُطِيعُونَ. سنملك مع المسيح إلى ابد الابد. وده اللي احنا مستنينه. وممكن نتعب شوية على الأرض من اضطهاد أو جوع أو عري. بأي شكل من أشكال الاضطهاد "ولكن من سيفصلنا عن محبة المسيح" ولا اي حاجة. احنا مستنين المسيح لأنه حياتنا ورجائنا وفرحنا كلنا. وهنكون معاه فى السماء فى الأخر.28إِلَى هُنَا نِهَايَةُ الأَمْرِ. أَمَّا أَنَا دَانِيآلَ، فَأَفْكَارِي أَفْزَعَتْنِي كَثِيرًا، وَتَغَيَّرَتْ عَلَيَّ هَيْئَتِي، وَحَفِظْتُ الأَمْرَ فِي قَلْبِي». يا دانيال ديه اخر الرؤيا اللي شوفتها. ودانيال اتفزع من الرؤيا. وحصل له تغيير (مش عارف ايه اللي حصله بالظبط)
"وحفظت الأمر في قلبي" ... طيب هل مقولتش لينا كل حاجة يا دانيال؟ مش عارفين. لكن اللي كتبهولنا يكفي لتعزيتنا وفرحنا.
مفيش ظلم ولا فساد بيستمروا للأبد. اه الظلم والفساد بينتشروا بس المهم أن المحكمة الإلهية هتنقعد ويتحكم على المظلومين والفاسدين. لكن الله في طول أناته يعطي " لطول حياة ووقت وزمان." يديله فرصة. زي ما فرعون مصر أخد فرص كتير جدا ولما غلظ قلبه هلك فى البحر الأحمر. المحكمة حكمت عليه لأن ذهنه قد أظلم.
في الأحد الرابع من الخماسين: ربنا هيقول "انا هو نور العالم. من يتبعني لا يسلك فى الظلام." ... اللي ماشيين فى الظلام دول اللي غموا أو قفلوا عيونهم عن رؤية النور.
نيافة الأنبا غريغوريوس يقول: أن القانون الطبيعي بيقول اللي يغمض عينه عن رؤية النور يعيش في ظلام... فاللي يغمض عينه عن رؤية الله ومعاملات ربنا له المجد معاه هو اللي بيحي فى الظلام من فساده وظلمته. هو اللي حكم على نفسه.
لكن الله فى طول أناته ... وديه اللي احنا بنستغربها: سايبه ليه يارب لغاية دلوقتي؟ وليه سايب الوضع كده لغاية دلوقتي يارب؟ لكن طول اناة ربنا على الظالمين هو ده سبب برده اننا عايشين لغاية دلوقتي لأننا برده خطاة.
ربنا بيطول أناته علينا كلنا. علشان كده منستعجلش ربنا لما نشوف ظلم. ونقوله يا رب افعل ما يحسن فى عينيك. وبما أنك طويل الاناة فده مديني رجاء يارب إنك مطول أناتك عليا وإلا هنكون قد فنينا.
لازم نحسب طول اناة ربنا له المجد هو ... خلاص.
ونقدم توبة في كل وقت في حياتنا عشان العمر مش مضمون
⪢