⏭ 1وَفِي السَّنَةِ الثَّانِيَةِ مِنْ مُلْكِ نَبُوخَذْنَصَّرَ، حَلَمَ نَبُوخَذْنَصَّرُ أَحْلاَمًا، فَانْزَعَجَتْ رُوحُهُ وَطَارَ عَنْهُ نَوْمُهُ. في السنة التانية: وبالرغم انهم خلصوا انترفيو السنة التالتة في الاصحاح الأول بس بعض المفسرين قالوا أسباب كتير بس يمكن السبب اكتر منطقية هو إن بنوخذنصر ربنا سمح له انه يحلم بالحلم ده لمدة سنة وكلم مرة بعد الحلم يصحي ناسي اصلا الحلم ومش قادر يفتكره. والحلم غريب ومش فاهم منه اي حاجة ولا فاكره أصلا. وخلال السنة ديه ابتدي يضطرب ومع كده في نهاية السنة التالتة عمل لهم الانترفيو وامتحنهم بنفسه. وجه في الاخر مش قادر يستحمل." احلاما" : وفضل يحلم نفس الحلم قعد يتكرر كتير معاه لمده سنة . والواحد فينا لما يحلم نفس الحلم كذا مرة نقول خير هو هيحصل حاجة ولا ايه؟ فما بالك الملك نفس الحلم خلال سنة كاملة. واضطرب ومكانش عارف ينام.2فَأَمَرَ الْمَلِكُ بِأَنْ يُسْتَدْعَى الْمَجُوسُ وَالسَّحَرَةُ وَالْعَرَّافُونَ وَالْكَلْدَانِيُّونَ لِيُخْبِرُوا الْمَلِكَ بِأَحْلاَمِهِ. فَأَتَوْا وَوَقَفُوا أَمَامَ الْمَلِكِ. وطلب الملك من كل السحرة والمجوس اللي هما علماء الفلك والعرافون. والكلدانين : وغالبا دول فئة من فئات الكهنة اللي بتخدم الاله بعل بتاعهم. وطلب كل الحكماء بس المرة ديه مستدعاش دانيال واصحابه: جايز يكون بحكم انهم عبرانيين ولسه مش مستأمنهم. او هل المجوس والحكماء الموجودين استصغروا دانيال واصحابه وفي نفس الوقت قالوا برده انهم اجانب فخليهم هما واحنا هنروح ناخد المكافآت بتاعة الملك . (ولو كانوا عملوا كده فده تحذير لاي حد انه يبقي خبيث لأنها جت فوق دماغهم بعد كده.) او هل دانيال واصحابه لقوا الموضوع فيه هدايا وإكرام وهما مش عاوزين الحاجات ديه فمراحوش؟
المهم ان الامر كان مخفي بس وارد التلات احتمالات دول.
3فَقَالَ لَهُمُ الْمَلِكُ: «قَدْ حَلَمْتُ حُلْمًا وَانْزَعَجَتْ رُوحِي لِمَعْرِفَةِ الْحُلْمِ». هنا الملك بيتكلم عن حلم واحد مع إن الآية الأولي قالت أحلاما. بس غالبا علشان كان الحلم اتكرر كتير علشان كده قال أحلاما. وقال انا مضطرب جدا وعاوز اعرف الحلم ايه هو بالظبط.4فَكَلَّمَ الْكَلْدَانِيُّونَ الْمَلِكَ بِالأَرَامِيَّةِ: «عِشْ أَيُّهَا الْمَلِكُ إِلَى الأَبَدِ. أَخْبِرْ عَبِيدَكَ بِالْحُلْمِ فَنُبَيِّنَ تَعْبِيرَهُ». عش ايها الملك: ديه تحية بيحيوها للملك. واتكررت في سفر دانيال وقبل كده في الكتاب المقدس. ومعناها: سلام لك ايها الملك. قولنا الحلم واحنا نفسرهولك.5فَأَجَابَ الْمَلِكُ وَقَالَ لِلْكَلْدَانِيِّينَ: «قَدْ خَرَجَ مِنِّي الْقَوْلُ: إِنْ لَمْ تُنْبِئُونِي بِالْحُلْمِ وَبِتَعْبِيرِهِ، تُصَيَّرُونَ إِرْبًا إِرْبًا وَتُجْعَلُ بُيُوتُكُمْ مَزْبَلَةً. وكانت اجابة الملك صادمة ليهم: قولولي الحلم اللي حلمته وكمان تفسيره. علي فكرة فرعون مصر قال ليوسف الصديق الحلم علشان يفسرهوله. بس هنا احتمال وارد انه مش فاكر اصلا الحلم. بس غالبا علي حسب ما هو واضح من كلامه انه غالبا مش واثق فيهم 100% واللي بياكد كده انه لما بيسبي سبايا من بلاد تانية بيعلمهم وبيجيب أحسن ناس علشان بعد كده يساعدوه.
واخد القرار لو مقولتوش الحلم وتفسيره: تصيرون اربا اربا وتجعل بيوتكم مزبلة" وبعد ما كانوا انهم هياخدوا هدايا بقوا في ورطة كبيرة
6وَإِنْ بَيَّنْتُمُ الْحُلْمَ وَتَعْبِيرَهُ، تَنَالُونَ مِنْ قِبَلِي هَدَايَا وَحَلاَوِينَ وَإِكْرَامًا عَظِيمًا. فَبَيِّنُوا لِي الْحُلْمَ وَتَعْبِيرَهُ». 7فَأَجَابُوا ثَانِيَةً وَقَالُوا: «لِيُخْبِرِ الْمَلِكُ عَبِيدَهُ بِالْحُلْمِ فَنُبَيِّنَ تَعْبِيرَهُ». هما مش مستوعبين او مش فاهمين طلب الملك. فقالوله تاني قولنا الحلم واحنا هنفسره.8أَجَابَ الْمَلِكُ وَقَالَ: «إِنِّي أَعْلَمُ يَقِينًا أَنَّكُمْ تَكْتَسِبُونَ وَقْتًا، إِذْ رَأَيْتُمْ أَنَّ الْقَوْلَ قَدْ خَرَجَ مِنِّي قلب عليهم مرة واحدة وقالهم أنا عارف إنكم بتضيعوا وقت. انا قولت قراري ومش هارجع فيه تاني. (على فكرة مع دانيال هيديله وقت لما يطلب وده بسبب نعمة دانيال.)
هنا نخلي بالنا لأحسن ناخد قرار في وقت فرح او لحظة غضب او حزن او اكتئاب لانها في الغالب قرارات كلها غلط.
في وقت السعادة: شوفناها مع هيرودس الملك لما عمل حفلة واخد قرار كان كارثة وانتهي بقطع راس يوحنا المعمدان.
في وقت الاكتئاب: زي الملك هنا في حالة اضطراب ومش عارف ينام وقالهم لو مقولتوش هاقطعكم حتت.
9بِأَنَّهُ إِنْ لَمْ تُنْبِئُونِي بِالْحُلْمِ فَقَضَاؤُكُمْ وَاحِدٌ. لأَنَّكُمْ قَدِ اتَّفَقْتُمْ عَلَى كَلاَمٍ كَذِبٍ وَفَاسِدٍ لِتَتَكَلَّمُوا بِهِ قُدَّامِي إِلَى أَنْ يَتَحَوَّلَ الْوَقْتُ. فَأَخْبِرُونِي بِالْحُلْمِ، فَأَعْلَمَ أَنَّكُمْ تُبَيِّنُونَ لِي تَعْبِيرَهُ». نبوخدنصر معندهوش ثقة خالص في الحكماء بتوعه وكرر لهم نفس الكلام. احكولي الحلم والتفسير بتاعه.10أَجَابَ الْكَلْدَانِيُّونَ قُدَّامَ الْمَلِكِ وَقَالُوا: «لَيْسَ عَلَى الأَرْضِ إِنْسَانٌ يَسْتَطِيعُ أَنْ يُبَيِّنَ أَمْرَ الْمَلِكِ. لِذلِكَ لَيْسَ مَلِكٌ عَظِيمٌ ذُو سُلْطَانٍ سَأَلَ أَمْرًا مِثْلَ هذَا مِنْ مَجُوسِيٍّ أَوْ سَاحِرٍ أَوْ كَلْدَانِيٍّ. وهنا جاوبوه إجابة صح اوووي يا جلالة الملك محدش يقدر يجاوبك خالص. ازاي حد يقدر يعرف حلمك ايه هو؟ ومفيش ملك سال السؤال ده قبل كده.11وَالأَمْرُ الَّذِي يَطْلُبُهُ الْمَلِكُ عَسِرٌ، وَلَيْسَ آخَرُ يُبَيِّنُهُ قُدَّامَ الْمَلِكِ غَيْرَ الآلِهَةِ الَّذِينَ لَيْسَتْ سُكْنَاهُمْ مَعَ الْبَشَرِ». اللي يعرف الحلم ده: هما الالهة. والالهة ديه مش ساكنة وسط البشر دول ساكنين فوق. لكن احنا بشر منعرفش نقول للملك اللي هو عاوزه.
وطبعا ده كان ترتيب ربنا له المجد واكيد كانت إجابة صح بتاعتهم:
بحلم فرعون مصر .... ربنا له المجد اظهر يوسف الصديق. وبحلم نبوخدنصر .... ربنا له المجد اظهر دانيال.
وكان الامر ممكن يعدي بسهولة لكن ربنا له المجد سمح ان الموضوع يضيق وكان الملك بعد كده هيأمر بمذبحة وكل ده لكي ما يظهر دانيال النبي والفتية التلاتة. وكل ده من عظمة ربنا له المجد. ربنا جميل اوووي.
12لأَجْلِ ذلِكَ غَضِبَ الْمَلِكُ وَاغْتَاظَ جِدًّا وَأَمَرَ بِإِبَادَةِ كُلِّ حُكَمَاءِ بَابِلَ. اتغاظ الملك منهم جدا وهو اصلا كان علي اخره وامر بقتلهم كلهم لانهم كدابين.
وده درس نتعلمه ونطلع بيه : لما نكون بنتناقش مع حد ونلاقي ان اللي قدامنا خلاص مبقاش متحمل حاجة تانية منزودش عليه في الكلام والنقاش لان النتيجة بعد كده هتبقي سلبية .
13فَخَرَجَ الأَمْرُ، وَكَانَ الْحُكَمَاءُ يُقْتَلُونَ. فَطَلَبُوا دَانِيآلَ وَأَصْحَابَهُ لِيَقْتُلُوهُمْ. فاصدر قراره خلاص فطلبوا دانيال والفتية التلاتة كمان علشان يخلص علي الكل.
في الحلوة لما كانوا فاكرين ان في هدايا راحوا لوحدهم. لكن وقت القتل طلبوا دانيال واصحابه علشان يقتلوا الكل.
14حِينَئِذٍ أَجَابَ دَانِيآلُ بِحِكْمَةٍ وَعَقْل لأَرْيُوخَ رَئِيسِ شُرَطِ الْمَلِكِ الَّذِي خَرَجَ لِيَقْتُلَ حُكَمَاءَ بَابِلَ، أَجَابَ وَقَالَ لأَرْيُوخَ قَائِدِ الْمَلِكِ: 15«لِمَاذَا اشْتَدَّ الأَمْرُ مِنْ قِبَلِ الْمَلِكِ؟» حِينَئِذٍ أَخْبَرَ أَرْيُوخُ دَانِيآلَ بِالأَمْرِ. دانيال كان كلامه حكيم جدا وموزون وعنده حكمة بالرغم من صغر سنه. وده كان واضح في الاصحاح الاول اية 17 واية 20.
رئيس الشرط ده غالبا زي وزير الداخلية. وكان اخد الامر من الملك انه هيقتل الكل وهينفذه فعلا. وهنا سال دانيال بكل هدوء: هو ايه اللي حصل؟ مع ان كان في امر انه هيتقتل بس كان بيتكلم بكل هدوء وحكمة.
*دانيال في حاجة جميلة اوووي مع انه كان في ارض السبي لكن منسيش اله إسرائيل ويعقوب. وكان دانيال في طاعة كاملة لكلمة الله ومتنجسوش بنجاسات بابل.
واريوخ حكي له علي القصة كلها.
16فَدَخَلَ دَانِيآلُ وَطَلَبَ مِنَ الْمَلِكِ أَنْ يُعْطِيَهُ وَقْتًا فَيُبَيِّنُ لِلْمَلِكِ التَّعْبِيرَ. الملك كان قال للمجوس أنتم بتكسبوا وقت لما طلبوا منه وقت يفكروا. لكن هنا دانيال طلب من الملك انه ياخد وقت.
في الغالب مش دانيال هو اللي دخل بنفسه للملك. لان هنشوف بعد كده في ايه 25 : ملا دانيال راح للملك. الملك قاله هو أنت اللي هتقولي التفسير؟ فواضح انه كان اول مرة يشوفه. المهم ان حد من رجالة الملك وصلوله ان في حد طلب وقت علشان يقول الحلم وتفسيره. وكل ده نتيجة نعمة دانيال.
17حِينَئِذٍ مَضَى دَانِيآلُ إِلَى بَيْتِهِ، وَأَعْلَمَ حَنَنْيَا وَمِيشَائِيلَ وَعَزَرْيَا أَصْحَابَهُ بِالأَمْرِ، القديس بولس الرسول في رسالته للعبرانين يحط دانيال من ضمن ابطال الايمان: الَّذِينَ بِالإِيمَانِ: قَهَرُوا مَمَالِكَ، صَنَعُوا بِرًّا، نَالُوا مَوَاعِيدَ، سَدُّوا أَفْوَاهَ أُسُودٍ، أَطْفَأُوا قُوَّةَ النَّارِ، نَجَوْا مِنْ حَدِّ السَّيْفِ، تَقَوَّوْا مِنْ ضُعْفٍ، صَارُوا أَشِدَّاءَ فِي الْحَرْبِ، هَزَمُوا جُيُوشَ غُرَبَاءَ، (عبرانيين 11: 33-34 )
طيب يا دانيال انت متأكد لما تروح تطلب وقت ان ربنا هيعلن لك عن الحلم وتفسيره؟ اه متأكد وواثق علشان هو ده الايمان. ودانيال راح بيته وحكي القصة لأصحابه التلاتة.
وده مثال حلو للأصدقاء نحكيه لأولادنا إن الاربع اصحاب دول كانوا دايما مع بعض وبيصلوا مع بعض
18لِيَطْلُبُوا الْمَرَاحِمَ مِنْ قِبَلِ إِلهِ السَّمَاوَاتِ مِنْ جِهَةِ هذَا السِّرِّ، لِكَيْ لاَ يَهْلِكَ دَانِيآلُ وَأَصْحَابُهُ مَعَ سَائِرِ حُكَمَاءِ بَابِلَ. دانيال مش لوحده لان اتنين خيرا من واحد. *وفي تاريخ الكنيسة شوفنا القصص ديه كتير: ان هيموتوا المسيحين لو منقلوش الجبل ... فكله صوم وصلاة والجبل يتنقل.
ودانيال قال لأصحابه انهم يصلوا بحرارة وكده كده هما صايمين بالبقول والمية ... "ليطلبوا المراحم من قبل إله السماوات".
طيب ليه مقالش إله إسرائيل؟ غالبا لان دانيال عارف هو واصحابه ان ربنا له المجد زعلان من اسرائيل شعبه في الوقت ده. فقال يارب انت إله الكون كله.
" مع سائر حكماء بابل" ... وهنشوف بعد كده ان دانيال طلب من الملك انه ميهلكش حكماء بابل. لان قلبه علي باقي الحكماء. ولو حاولنا نتخيل صلاة دانيال واصحابه لان الموضوع دلوقتي حياة او موت. بس طبعا صلاتهم كانت دايما بحرارة. احنا اوقات صلواتنا بتبقي فاترة وباردة وضعيفة لان مفيش ضيقة تجارب والدنيا ماشية. لكن لو ربنا له المجد سمح بضيقة او تجربة بنصلي وقتها بحرارة ودموع.
19حِينَئِذٍ لِدَانِيآلَ كُشِفَ السِّرُّ فِي رُؤْيَا اللَّيْلِ. فَبَارَكَ دَانِيآلُ إِلهَ السَّمَاوَاتِ. لو اتكلمنا علي صفات دانيال هنلاقي منها الإيمان. هو متأكد إن ربنا له المجد مش ممكن يتخلي عنهم ومش هيسبهم في الضيقة ديه. وفعلا ربنا له المجد كشف السر في رؤيا لدانيال.
علي فكرة في فرق بين رؤيا وحلم: الحلم ممكن الواحد يشوفه وهو نايم . اما الرؤيا ممكن الواحد يشوفها وهو صاحي مثلا ممكن في صلاة. وغالبا دانيال كان بيصلي طول الليل فربنا له المجد اظهر له السر في رؤيا الليل.
وبارك دانيال ربنا له المجد: يعني يارب ليك كل البركة واحنا منستاهلش كل المجد للي بتديهولنا ده يارب.
20أَجَابَ دَانِيآلُ وَقَالَ: «لِيَكُنِ اسْمُ اللهِ مُبَارَكًا مِنَ الأَزَلِ وَإِلَى الأَبَدِ، لأَنَّ لَهُ الْحِكْمَةَ وَالْجَبَرُوتَ. دانيال أول ماعرف الحلم وتفسيره مجريش علي الملك علشان يقوله لكن اول حاجة عملها جري علي ربنا له المجد. وهنا ده اسمه تسبيح مش صلاة.
الصلاة: كتير نقف قدام ربنا له المجد ونفضل نطلب طلبات كتيرة. لكن
التسبيح والتمجيد: نقف قدام ربنا له المجد ونقوله أنت حلو يارب ونتأمل في جمال وحلاوة ربنا – في حكمته – جبروته – اعماله العظيمة معانا. يارب أنت إله مبارك وتستحق كل مجد وكرامة وبركة وهو ده اللي عمله دانيال النبي. وان الحكمة والجبروت دول بتوع ربنا له المجد.
21وَهُوَ يُغَيِّرُ الأَوْقَاتَ وَالأَزْمِنَةَ. يَعْزِلُ مُلُوكًا وَيُنَصِّبُ مُلُوكًا. يُعْطِي الْحُكَمَاءَ حِكْمَةً، وَيُعَلِّمُ الْعَارِفِينَ فَهْمًا. الملك يتحط أو يتشال الموضوع ده اختصاص وشغل ربنا. مش شغل بشر خالص.
" يعطي الحكماء حكمة" ... في حكمة ربنا له المجد مديهالنا بالطبيعة. بس في حكمة زيادة شوية: زي اللي اخدها دانيال النبي. اي حكمة او فهم عندنا ديه حاجة احنا ملناش دخل فيها ديه بتاعة ربنا. ومينفعش حد يفتخر بذكائه ولا حتي يحتقر حد اقل منه في الذكاء. ده ممكن ربنا ياخد منه ذكائه طالما مش بيدي تمجيد لربنا له المجد. فلما حد يكون عنده موهبة زيادة لازم يدي تمجيد لربنا له المجد وكمان يشكره علي المواهب ديه .
22هُوَ يَكْشِفُ الْعَمَائِقَ وَالأَسْرَارَ. يَعْلَمُ مَا هُوَ فِي الظُّلْمَةِ، وَعِنْدَهُ يَسْكُنُ النُّورُ. صلاة دانيال جميلة اوي
"هو يكشف العمائق والاسرار" ... يعني اللي احنا فيه ده يارب انت اللي عملته من غيرك يارب مكنتش هاعرف لا حلم الملك ولا التفسير وده لان ربنا هو اللي بيكشف الأسرار.
"يعلم ماهو في الظلمة" ... عارف الحاجة المخفية تماما عن البشر علشان احنا أفكارنا مكشوفة قدام ربنا له المجد. فممكن الواحد يخفي افكاره عن الناس لكن مش علي ربنا له المجد.
"وعنده يسكن النور" ... الآية ديه جميلة اللي عاوز استنارة يطلب من ربنا له المجد. نطلب من ربنا: ينور عنينا علشان نشوفك يارب.
نطلب من ربنا: ينور افكارنا. علشان نفكر فيك يارب. نطلب من ربنا ينور قلوبنا ومشاعرنا علشان نحس بحبه.
23إِيَّاكَ يَا إِلهَ آبَائِي أَحْمَدُ، وَأُسَبِّحُ الَّذِي أَعْطَانِي الْحِكْمَةَ وَالْقُوَّةَ وَأَعْلَمَنِي الآنَ مَا طَلَبْنَاهُ مِنْكَ، لأَنَّكَ أَعْلَمْتَنَا أَمْرَ الْمَلِكِ». ديه تسبحة دانيال: يارب أنا باشكرك اووي . أنا مين يارب عشان تديني كل ده. وتعمل كل الخير ده مع عبدك. يارب أنت اللي ادتني الحكمة والقوة.
وقال "ما طلبناه منك" متكلمش عن نفسه بس لا. لان هما الأربعة كانوا بيصلوا. فدانيال شخص جميل اووي لان الموضوع يخصهم هما الاربعة.
احنا يارب طلبنا وأنت استجبت لينا. ده مش علشان حكمة وفهم فيا ولا اي حاجة زيادة لكن ديه نعمتك يارب.
24فَمِنْ أَجْلِ ذلِكَ دَخَلَ دَانِيآلُ إِلَى أَرْيُوخَ الَّذِي عَيَّنَهُ الْمَلِكُ لإِبَادَةِ حُكَمَاءِ بَابِلَ، مَضَى وَقَالَ لَهُ هكَذَا: «لاَ تُبِدْ حُكَمَاءَ بَابِلَ. أَدْخِلْنِي إِلَى قُدَّامِ الْمَلِكِ فَأُبَيِّنَ لِلْمَلِكِ التَّعْبِيرَ». دانيال في الاول راح لربنا له المجد وقدم تسبحة وشكر وحمد. وبعد كده راح لاريوخ وقاله: متكملش الإبادة ديه وقول للملك ان طلبه معانا. دخلني للملك وهابين له تفسير الحلم.
*نتعلم من الحتة ديه: ان لما ربنا له المجد يعمل معانا خير ندخل اوضتنا ونركع ونسبح ونشكر اله ابائنا. ونبارك الهنا اللي ادانا النعمة والخير والبركة ديه. الواحد ميفتخرش لكن اللي يفتخر يفتخر بالرب. ونقول: بافتخر بيك يارب إنك عملت معايا كل ده. انا ولا حاجة يارب لكن أنا أداة في أيدك وأنت يارب استخدمتني في حاجة كويسة . أشكرك يارب.
ولو الواحد نسب الحاجة ديه لنفسه نعمة ربنا هتسيبه وهيبتدي يلخبط في حياته. فلازم يفوق ويرجع لنفسه علطول ويعرف انه "مش بالقوة ولا بالقدرة بل بروحي قال رب الجنود".
25حِينَئِذٍ دَخَلَ أَرْيُوخُ بِدَانِيآلَ إِلَى قُدَّامِ الْمَلِكِ مُسْرِعًا وَقَالَ لَهُ هكَذَا: «قَدْ وَجَدْتُ رَجُلاً مِنْ بَنِي سَبْيِ يَهُوذَا الَّذِي يُعَرِّفُ الْمَلِكَ بِالتَّعْبِيرِ». ودخل اريوخ للملك مع دانيال. واريوخ عامل زي اللي بيصطاد في المية العكرة : لأنه قال انه هو وجد دانيال وده بدل ما يقول: يا جلالة الملك طلبك موجود وفي واحد قال انه هيقول الحلم وتفسير هو انه من سبي يهوذا.
وهو ده الفرق بين اولاد ربنا واهل العالم: اولاد ربنا ينسبوا الحكمة والقدرة والفهم لله. لكن اهل العالم يقولوا: انا لقيت طلبك يا جلالة الملك. عاوز الاكرامية بقي.
زي قصة قالها المتنيح البابا شنودة التالت: لما يكون في راهب في الدير مكلف بعمل. يعمل العمل تقريبا كله ويكون فاضل حاجة بسيطة خالص ويخلي واحد تاني يشترك معاه في الجزء اللي فاضل ولما العمل يخلص. الراهب الاولاني يقول ان الراهب فلان هو اللي عمل كل حاجة. انا معملتش حاجة بالرغم ان الاولاني تقريبا مخلص حوالي 99% من الشغل. بعكس اريوخ اللي قال للملك انه لقي الشخص ده.
26أَجَابَ الْمَلِكُ وَقَالَ لِدَانِيآلَ، الَّذِي اسْمُهُ بَلْطَشَاصَّرُ: «هَلْ تَسْتَطِيعُ أَنْتَ عَلَى أَنْ تُعَرِّفَنِي بِالْحُلْمِ الَّذِي رَأَيْتُ، وَبِتَعْبِيرِهِ؟» الملك كلم دانيال بطريقة فيها شك انه هيقدر يقوله علي الحلم وتفسيره كمان.27أَجَابَ دَانِيآلُ قُدَّامَ الْمَلِكِ وَقَالَ: «السِّرُّ الَّذِي طَلَبَهُ الْمَلِكُ لاَ تَقْدِرُ الْحُكَمَاءُ وَلاَ السَّحَرَةُ وَلاَ الْمَجُوسُ وَلاَ الْمُنَجِّمُونَ عَلَى أَنْ يُبَيِّنُوهُ لِلْمَلِكِ. دانيال ده جميل اوووي لأنه هنا كان بيدافع عن باقي الحكماء. بالرغم ان مش كلهم حلوين ولا حتي اخدوا دانيال معاهم لما وقفوا قدام الملك. لكن لان قرار الملك فيه ظلم ودانيال النبي مش بيقبل بالظلم.
يا جلالة الملك طلبك ده مفيش حد منهم يقدر يقوله. مفيش بشر يقدر يقولك علي الطلب ده. والآباء المفسرين قالوا تأملات في الجزء ده: إن دانيال بيدافع عنهم لان القرار ظالم.
أو لان المجوس نفسهم مكانوش عارفين اله إسرائيل ومكانوش يعرفوا إن السحر والعرافة والحاجات ديه كانت غلط. بس عامة دانيال قدملنا نموذج حلو في : الدفاع عن الحق والإنسان اللي مش بيقبل بالظلم. وكل ده بطريقة لطيفة ومهذبة.
28لكِنْ يُوجَدُ إِلهٌ فِي السَّمَاوَاتِ كَاشِفُ الأَسْرَارِ، وَقَدْ عَرَّفَ الْمَلِكَ نَبُوخَذْنَصَّرَ مَا يَكُونُ فِي الأَيَّامِ الأَخِيرَةِ. حُلْمُكَ وَرُؤْيَا رَأْسِكَ عَلَى فِرَاشِكَ هُوَ هذَا: طلبك ده عند إله السماوات "كاشف الأسرار" دانيال النبي شهد لربنا له المجد قدام الملك. أوقات كتير بتيجي فرص قدامنا بس مش بنشهد لربنا له المجد أو علي الأقل بنطنش.
هو ده الاله الحقيقي يا جلالة الملك. وياريت نطلب من ربنا يدينا اننا نشهد له في كل مواقف حياتنا ومنهربش. نشهد لربنا له المجد بحكمة زي حكمة دانيال.
وبكل ثقة هيبتدي يحكي الرؤيا وتفسيرها اللي هتكون في الأيام الأخيرة للملك وكانه نبوة .
الكنيسة اخدت حلم نبوخذنصر ده في ثيؤطوكية يوم التلات: وهي بتتكلم عن تجسد ربنا له المجد لان هذا هو الحجر الذي راه دانيال قد قطع من جبل (هو الحلم اللي شافه كان نبوخذنصر لكن الكنيسة بتقولنا ان نبوخذنصر ما كان إلا وسيلة لكن دانيال هو اللي شاف الحلم وقال تفسيره. لكن ربنا دخل نبوخذنصر في القصة علشان الموضوع ياخد شكل عظيم.)
29أَنْتَ يَا أَيُّهَا الْمَلِكُ أَفْكَارُكَ عَلَى فِرَاشِكَ صَعِدَتْ إِلَى مَا يَكُونُ مِنْ بَعْدِ هذَا، وَكَاشِفُ الأَسْرَارِ يُعَرِّفُكَ بِمَا يَكُونُ. دانيال بيقوله كنت بتفكر يا جلالة الملك ايه اللي هيحصل في المستقبل؟ وانا ملك عظيم ومملكتي عظيمة جدا. وبعدي المملكة ديه هتروح فين وهيحصلها ايه؟30أَمَّا أَنَا فَلَمْ يُكْشَفْ لِي هذَا السِّرُّ لِحِكْمَةٍ فِيَّ أَكْثَرَ مِنْ كُلِّ الأَحْيَاءِ، وَلكِنْ لِكَيْ يُعَرَّفَ الْمَلِكُ بِالتَّعْبِيرِ، وَلِكَيْ تَعْلَمَ أَفْكَارَ قَلْبِكَ. دانيال عمال ينكر ذاته. بيهرب من الكرامة. وهنشوف في أخر الاصحاح إن نبوخذنصر هيسجد لدانيال. فدانيال عمال يقوله انا ولا حاجة. علشان ميفتكروهوش انه إله بعد ما يفسر الحلم وبعدين يعبدوه.
"بالتعبير" يعني بالتفسير
31«أَنْتَ أَيُّهَا الْمَلِكُ كُنْتَ تَنْظُرُ وَإِذَا بِتِمْثَال عَظِيمٍ. هذَا التِّمْثَالُ الْعَظِيمُ الْبَهِيُّ جِدًّا وَقَفَ قُبَالَتَكَ، وَمَنْظَرُهُ هَائِلٌ. هيقول الحلم: إن الملك شاف تمثال عظيم والتمثال ده وقف قدام الملك ومنظره هايل جدا. 32رَأْسُ هذَا التِّمْثَالِ مِنْ ذَهَبٍ جَيِّدٍ. صَدْرُهُ وَذِرَاعَاهُ مِنْ فِضَّةٍ. بَطْنُهُ وَفَخْذَاهُ مِنْ نُحَاسٍ. 33سَاقَاهُ مِنْ حَدِيدٍ. قَدَمَاهُ بَعْضُهُمَا مِنْ حَدِيدٍ وَالْبَعْضُ مِنْ خَزَفٍ. التمثال ده متقسم لأربع أجزاء: الراس ذهب... صدره وذراعاه من فضة... بطنه وفخذاه من نحاس... ساقاه من حديد... وقداماه بعضهم من حديد والبعض من خزف. حديد مخلوط بخزف.34كُنْتَ تَنْظُرُ إِلَى أَنْ قُطِعَ حَجَرٌ بِغَيْرِ يَدَيْنِ، فَضَرَبَ التِّمْثَالَ عَلَى قَدَمَيْهِ اللَّتَيْنِ مِنْ حَدِيدٍ وَخَزَفٍ فَسَحَقَهُمَا. وانت شوفت حجر اتقطع من غير ايدين. الحجر ده طلع مرة واحدة وراح ضارب التمثال في رجليه اللي من حديد وخزف وسحقهم.35فَانْسَحَقَ حِينَئِذٍ الْحَدِيدُ وَالْخَزَفُ وَالنُّحَاسُ وَالْفِضَّةُ وَالذَّهَبُ مَعًا، وَصَارَتْ كَعُصَافَةِ الْبَيْدَرِ فِي الصَّيْفِ، فَحَمَلَتْهَا الرِّيحُ فَلَمْ يُوجَدْ لَهَا مَكَانٌ. أَمَّا الْحَجَرُ الَّذِي ضَرَبَ التِّمْثَالَ فَصَارَ جَبَلاً كَبِيرًا وَمَلأَ الأَرْضَ كُلَّهَا. وابتدي التمثال ينهارو كل المعادن ديه بقت عاملة زي التراب وجت ريح شالتهم ومبقاش ليها مكان/ وجود. والحجر نفسه اللي ضرب التمثال ابتدي يكبر وبقي جبل كبير وملا الارض كلها "36هذَا هُوَ الْحُلْمُ. فَنُخْبِرُ بِتَعْبِيرِهِ قُدَّامَ الْمَلِكِ. دانيال متأكد من الحلم ده وهيبتدي يشرح له المعني . هيفسرهوله.37«أَنْتَ أَيُّهَا الْمَلِكُ مَلِكُ مُلُوكٍ، لأَنَّ إِلهَ السَّمَاوَاتِ أَعْطَاكَ مَمْلَكَةً وَاقْتِدَارًا وَسُلْطَانًا وَفَخْرًا. نبوخذنصر كان في الوقت ده أعظم الملوك " ملك الملوك". "لان إله السماوات اعطاك" يعني ده مش بقدرتك يا جلالة الملك. وياريت الناس تفهم كده ان كل السلطان والقدرة والمملكة والفخر ده مش من عندهم كل ده بتاع ربنا هو اللي مدهولهم.38وَحَيْثُمَا يَسْكُنُ بَنُو الْبَشَرِ وَوُحُوشُ الْبَرِّ وَطُيُورُ السَّمَاءِ دَفَعَهَا لِيَدِكَ وَسَلَّطَكَ عَلَيْهَا جَمِيعِهَا. فَأَنْتَ هذَا الرَّأْسُ مِنْ ذَهَبٍ. دانيال ده جميل عاوز يقوله لازم تفهم حجمك ومقدارك وان في إله عظيم في السماوات هو اللي اداك كل ده "فانت هذا الراس من ذهب" ... يعني ديه مملكتك ومملكة بابل. مملكة بابل مدتها كانت 70 سنة وبيقولوا كانت مشهورة اوووي بالذهب39وَبَعْدَكَ تَقُومُ مَمْلَكَةٌ أُخْرَى أَصْغَرُ مِنْكَ وَمَمْلَكَةٌ ثَالِثَةٌ أُخْرَى مِنْ نُحَاسٍ فَتَتَسَلَّطُ عَلَى كُلِّ الأَرْضِ. وبعديك هتيجي مملكة أصغر منك. اللي هي مملكة مادي وفارس وديه اللي هي الصدر والدراعين. والمملكة ديه قعدة مدة حوالي 200 سنة.
نلاحظ ان المعدن كل شوية بيقل في القيمة: الذهب والفضة والنحاس. وده لان الفساد والشر كل شوية بيكتر أو لان السلطان المطلق للإمبراطور كل شوية بيقل .
المملكة التالتة من النحاس ... اللي هي مملكة اليونان بتاعة الإسكندر الأكبر.
وبيقولوا قعدت المملكة 130 سنة وهتتسلط علي الأرض كلها.
40وَتَكُونُ مَمْلَكَةٌ رَابِعَةٌ صَلْبَةٌ كَالْحَدِيدِ، لأَنَّ الْحَدِيدَ يَدُقُّ وَيَسْحَقُ كُلَّ شَيْءٍ. وَكَالْحَدِيدِ الَّذِي يُكَسِّرُ تَسْحَقُ وَتُكَسِّرُ كُلَّ هؤُلاَءِ. المملكة الرابعة وهي مملكة الرومان. وبيقولوا إن الرومان فعلا كانوا زي الحديد. وده أقوى المعادن. وكانت قوية جدا وسيطرت علي العالم واستمرت حوالي 500 سنة.41وَبِمَا رَأَيْتَ الْقَدَمَيْنِ وَالأَصَابِعَ بَعْضُهَا مِنْ خَزَفٍ وَالْبَعْضُ مِنْ حَدِيدٍ، فَالْمَمْلَكَةُ تَكُونُ مُنْقَسِمَةً، وَيَكُونُ فِيهَا قُوَّةُ الْحَدِيدِ مِنْ حَيْثُ إِنَّكَ رَأَيْتَ الْحَدِيدَ مُخْتَلِطًا بِخَزَفِ الطِّينِ. 42وَأَصَابِعُ الْقَدَمَيْنِ بَعْضُهَا مِنْ حَدِيدٍ وَالْبَعْضُ مِنْ خَزَفٍ، فَبَعْضُ الْمَمْلَكَةِ يَكُونُ قَوِيًّا وَالْبَعْضُ قَصِمًا. "قمصا": يعني سهل الكسر. عاوز يقول ان مملكة الرومان هيبقي فيها انقسامات بين الناس وبعضها (الحديد والخزف). وده كان بيميز الرومان. بيقولوا: إن الرومان
لما كانوا بيدخلوا اي بلد مكانوش بياخدوا ناس سبايا من البلاد ديه زي ماكانوا بيعملوا بابل لكن كانوا بيحطوا جالية ليهم في بلد والجالية ديه مش بتتخلط بباقي الناس. علشان كده قال حديد وخزف.
وفي اجزاء من المملكة الرومانية قوية اوي زي الحديد والبعض سهل الكسر.
43وَبِمَا رَأَيْتَ الْحَدِيدَ مُخْتَلِطًا بِخَزَفِ الطِّينِ، فَإِنَّهُمْ يَخْتَلِطُونَ بِنَسْلِ النَّاسِ، وَلكِنْ لاَ يَتَلاَصَقُ هذَا بِذَاكَ، كَمَا أَنَّ الْحَدِيدَ لاَ يَخْتَلِطُ بِالْخَزَفِ. وديه حاجات حصلت عند الرومان. مثلا بنت الامبراطور او الملك تعجب بواحد من قواد الجيش أو الجنود وتتجوزه زي ما حصل مع دقلديانيوس.
علي فكرة بسبب الرؤيا ديه وباقي الرؤي في سفر دانيال هاجموا السفر وقالوا إن أزاي قبله ب 600 سنة ويقول ترتيب الممالك بالدقة والترتيب ده. ده أكيد مفبركينها. لكن ميعرفوش ان حتي من قبل دانيال النبي كان في نبوات كتير عن مجئ السيد المسيح.
44وَفِي أَيَّامِ هؤُلاَءِ الْمُلُوكِ، يُقِيمُ إِلهُ السَّمَاوَاتِ مَمْلَكَةً لَنْ تَنْقَرِضَ أَبَدًا، وَمَلِكُهَا لاَ يُتْرَكُ لِشَعْبٍ آخَرَ، وَتَسْحَقُ وَتُفْنِي كُلَّ هذِهِ الْمَمَالِكِ، وَهِيَ تَثْبُتُ إِلَى الأَبَدِ. 45لأَنَّكَ رَأَيْتَ أَنَّهُ قَدْ قُطِعَ حَجَرٌ مِنْ جَبَل لاَ بِيَدَيْنِ، فَسَحَقَ الْحَدِيدَ وَالنُّحَاسَ وَالْخَزَفَ وَالْفِضَّةَ وَالذَّهَبَ. اَللهُ الْعَظِيمُ قَدْ عَرَّفَ الْمَلِكَ مَا سَيَأْتِي بَعْدَ هذَا. اَلْحُلْمُ حَقٌّ وَتَعْبِيرُهُ يَقِينٌ». هنا الكلام عن الحجر اللي شافه نبوخذنصر.
الكنيسة في ثيؤطوكية التلات: وهي بتتكلم عن تجسد السيد المسيح له المجد بتقول: غير المنظور. غير المحدود. ولدته مريم وهي عذراء. لان هذا هو الحجر الذي راه دانيال قد قطع من جبل. ولم تلمسه يد انسان البتة. هو الكلمة الذي من الاب. اتي وتجسد من العذراء بغير زرع بشر حتي خلصنا.
دانيال عاوز يقوله: ان الحجر اللي طلع وقطع الجبل من غير ايدين – ده اشارة الي كلمة الله الذي تجسد بدون زرع بشر .
النبوات: من جبل ... كأنه جاي من البشر من مملكة يهوذا. وطلع من غير ايدين ... من غير زرع بشر.
وكسر الممالك ديه كلها وكبر جدا. وعمل مملكة ... اللي هو الجبل وملأ الارض كلها. اشارة للكنيسة. مملكة المسيح. اللي ملأت الارض كلها. "وملكها لايترك لشعب اخر" آية 44 وديه حتة مهمة. إن مش هتيجي اي مملكة تانية بعد الكنيسة.
آية 45 "الله العظيم قد عرف الملك ما سيأتي بعد هذا. الحلم حق وتعبيره يقين" يعني الحلم صح 100% وتفسيره صح اوووي.
46حِينَئِذٍ خَرَّ نَبُوخَذْنَصَّرُ عَلَى وَجْهِهِ وَسَجَدَ لِدَانِيآلَ، وَأَمَرَ بِأَنْ يُقَدِّمُوا لَهُ تَقْدِمَةً وَرَوَائِحَ سُرُورٍ. ورد فعل الملك لما سمع الحلم وتفسيره ان بالرغم من كل سلطانه وجبروته لكن سجد لدانيال وتقريبا كان سن دانيال وقتها حوالي 21 سنة .
الآباء قالوا هو كان بيسجد لإله دانيال النبي وامر بهدايا لدانيال.
47فَأَجَابَ الْمَلِكُ دَانِيآلَ وَقَالَ: «حَقًّا إِنَّ إِلهَكُمْ إِلهُ الآلِهَةِ وَرَبُّ الْمُلُوكِ وَكَاشِفُ الأَسْرَارِ، إِذِ اسْتَطَعْتَ عَلَى كَشْفِ هذَا السِّرِّ». هنا نبوخذنصر اعترف باله دانيال وان محدش عرف يكشف السر ده غير إلهك يا دانيال.
"إلهكم" الملك قال لدانيال إلهكم. في اللحظة ديه مكانش لسه وصل ان ربنا له المجد الهه هو كمان لأنه مقالش الهنا.
48حِينَئِذٍ عَظَّمَ الْمَلِكُ دَانِيآلَ وَأَعْطَاهُ عَطَايَا كَثِيرَةً، وَسَلَّطَهُ عَلَى كُلِّ وِلاَيَةِ بَابِلَ وَجَعَلَهُ رَئِيسَ الشِّحَنِ عَلَى جَمِيعِ حُكَمَاءِ بَابِلَ. دانيال بقي زي رئيس وزراء يعني بقي في مركز كبير ومهم اوووي في بابل.
"رئيس الشحن" في بعض الترجمات رئيس اعلي. ودانيال بقي أكبر حكماء بابل. لانه هو اللي أنقذهم من القتل.
49فَطَلَبَ دَانِيآلُ مِنَ الْمَلِكِ، فَوَلَّى شَدْرَخَ وَمِيشَخَ وَعَبْدَنَغُوَ عَلَى أَعْمَالِ وِلاَيَةِ بَابِلَ. أَمَّا دَانِيآلُ فَكَانَ فِي بَابِ الْمَلِكِ. وفي وسط كل ده نلاقي تاني جمال دانيال النبي انه منسيش أصحابه ... ساعات الواحد لما يوصل لمركز عالي ينسي الناس وممكن ينسي اهله واصحابه. لكن دانيال اتكلم عن أصحابه التلاتة. لان بصلواتهم هما الاربعة ربنا له المجد كشف لهم الحلم وتفسيره. والملك عينهم في مناصب كبيرة علي اعمال ولاية بابل وغالبا دانيال هو اللي كان مسئول قضاء.
+++++++++++++
مقارنة صغيرة بين دانيال النبي ويوسف الصديق
الاتنين كانوا في ارض غريبة.
يوسف اشتغل في قصر فوطيفار ... ودانيال النبي كان في قصر الملك وقت الدراسة والتأهيل لمدة 3 سنين.
فرعون حلم بحلم ويوسف فسرله الحلم ... ونبوخذنصر هو كمان حلم وطلب الحل والتفسير.
يوسف انقذ مصر والبلاد اللي حواليهم من المجاعة ... ودانيال انقذ باقي حكماء بابل من الموت والهلاك.
⏮