⪡ 1«وَفِي ذلِكَ الْوَقْتِ يَقُومُ مِيخَائِيلُ الرَّئِيسُ الْعَظِيمُ الْقَائِمُ لِبَنِي شَعْبِكَ، وَيَكُونُ زَمَانُ ضِيق لَمْ يَكُنْ مُنْذُ كَانَتْ أُمَّةٌ إِلَى ذلِكَ الْوَقْتِ. وَفِي ذلِكَ الْوَقْتِ يُنَجَّى شَعْبُكَ، كُلُّ مَنْ يُوجَدُ مَكْتُوبًا فِي السِّفْرِ. سفر دانيال سفر جميل وممتع وفيه دروس جميلة، وشوفنا شخصية دانيال الجميلة وانه الرجل المحبوب وصفاته الجميلة.
والتلات فتية القديسين، واد ايه كانوا شباب حلوين متمسكين بايمانهم.
شوفنا مجموعة من الرؤي اللي تخص الفترة قبل ميلاد السيد المسيح وكمان بعض الرؤي تخص نهاية الايام.
الاصحاح الاخير: سهل وصغير وده ختام الرؤيا الاخيرة، وفي الاصحاح الـ 11 شوفنا الرؤيا نفسها وقد ايه مليانة بتفاصيل التفاصيل.
ختام سفر دانيال: اتفقنا ان بعض الرؤي ليها بعد زمني قريب وكمان ليها بعد زمني بعيد.
زي ماشوفنا البعد الزمني القريب: لما اتكلم عن انطيوخس ابيفانيوس وتدنيس الهيكل وكانت فترة صعبة جدا قبل الميلاد وعن الفترة اللي قبل ميلاد ربنا يسوع له المجد.
والبعد الزمني البعيد: ينقلنا لنهاية الزمان ونهاية العالم وقرب مجيء المسيح التاني.
ونفس الموضوع هنلاقي هنا برده الحتة ديه موجودة في الاصحاح ده.
بيكمل الرؤيا، واول كام عدد نقدر نضمهم للرؤيا نفسها.
رئيس الملايكة ميخائيل كام مخصص لرعاية شعب الله...وده يدينا فكرة عن عمل الملايكة: ارواح مرسلة للخدمة لاجل العتيدين ان يرثوا الخلاص. الملايكة كلها بتبقي فرحانة لما ربنا له المجد يرسلها في خدمة بني البشر. واحنا بالنسبة لنا رئيس الملايكة ميخائيل ليه مكانة كبيرة في كنيستنا، بنبي كنايس ومذابح علي اسمه وليه ايقونات كتيرة وكمان بنقراه في السنكسار.
"في ذلك الوقت" ... الوقت الصعب ده قبل ميلاد المسيح، فترة انطيوخس، ان ربنا هيرسل تعزية ومعونة لشعبه . ربنا مش هيسيب شعبه.
واذا اخدناها علي نهاية الزمان: هنلاقي في سفر الرؤيا اصحاح 12: 7" وحدثت حرب في السماء ميخائيل وملائكته حاربوا التنين ... فلم يوجد مكانهم بعد ذلك في السماء."
الملائكة ارواح مرسلة لخدمتنا وديه حاجة احنا منستهلهاش.
"ويكون زمان ضيق لم يكن منذ كانت امة الي ذلك الوقت" ... اللي يقرأ الاية ديه لاول مرة، يفتكر الاية اللي قالها المسيح عن نهاية العالم وان الوقت ده هيبقي ضيق شديد لمن يكن مثله منذ الابتداء.
اذا نقدر ناخد الاية ديه عن فترة قبل تجسد وميلاد المسيح وكانت فترة صعبة جدا وان انطيوخس دنس الهيكل وقتل اليهود وعمل مذابح (مذبحة للشعب اليهودي) بشعة. وديه كانت صورة مصغرة للي هيحصل في نهاية العالم من ضد المسيح.
"وفي ذلك اليوم ينجي شعبك، كل من يوجد مكتوبا في السفر" ... نشكر ربنا انه لم يترك شعبه في الاوقات ديه، بالعكس بيرسل تعزية ومعونة باشكال كتيرة بالرغم ان المسيح قال " لو لم تقصر تلك الايام، لم يخلص جسد."
احنا اسمائنا كتبت في سفر الحياة وبكل جهادنا علي الارض بنحاول بحافظ علي اسمائنا مكتوبة وانها متتمسحش.
2وَكَثِيرُونَ مِنَ الرَّاقِدِينَ فِي تُرَابِ الأَرْضِ يَسْتَيْقِظُونَ، هؤُلاَءِ إِلَى الْحَيَاةِ الأَبَدِيَّةِ، وَهؤُلاَءِ إِلَى الْعَارِ لِلازْدِرَاءِ الأَبَدِيِّ. الآية ديه من اروع ايات العهد القديم اللي بتتكلم عن القيامة بكل وضوح. وبتستخدم كتير في انتقال الأشخاص، والاباء بيقولوها من اجل التعزية.
في صلاة دانيال " اما لنا يارب خزي الوجوه" غالبا كلمة "خزي" ... هي نفس جملة "للازدراء الابدي" والآية ديه بتوضح بكل صراحة: ان معندناش غير قيامة واحدة عند مجئ المسيح التاني.
وطبعا القيامة ديه الدينونة، الاشرار يذهبون " الي العار للازدراء الابدي"
والابرار "الي الحياة الابدية."
وده غير طبعا الملك الالفي: اللي بيقولوا عليها ان في قيامة اولي وقيامة تانية . فالآية ديه واضحة وصريحة ان مفيش غير قيامة واحدة فقط.
3وَالْفَاهِمُونَ يَضِيئُونَ كَضِيَاءِ الْجَلَدِ، وَالَّذِينَ رَدُّوا كَثِيرِينَ إِلَى الْبِرِّ كَالْكَوَاكِبِ إِلَى أَبَدِ الدُّهُورِ. آية جميلة جدا للخدام وللناس اللي حابة تدرس وتفهم كلمة ربنا. لان القراءة فقط مش كفاية، لازم الدارسة علشان نفهم، لان كلمة الله هي كلمة الحياة. وكل مانقرأ كل مانفهم كل مانستنير.
"الفاهمون" ... يعني المستنيرون، الاستنارة متجيش غير من كلمة ربنا، فنلاقي الأفكار بقت نورانية. المشاعر بقت مشاعر مقدسة. الحواس كمان تقدست.
مثلا واحد زي البابا اثناسيوس الرسولي والقديس غريغوريوس الناطق بالالهيات من ضمن الفاهمون.
ربنا هيسالنا ذاكرنا المقرر ولا لأ بتاع الحياة الابدية؟ ربنا هيقولنا: اديتكم عدد السنين اللي عيشتوها، عملتم فيها ايه؟
وعلي فكرة سفر دانيال من الاسفار اللي بتهتم جدا بالفهم، زي اصحاح 8 و 9 كلمة الفهم اتذكرت كتير جدا. ودانيال من الشخصيات الجميلة في الفهم، بالرغم انه كذا مرة قال " وكنت ولا فاهم".
في قسمة الرسل في القداس: لما الروح القدس حل علي الاباء الرسل ملئ التلاميذ من كل معرفة وفهم (فهم يعني عقل، علشان كده ساعات الفاهمون تترجم: العقلاء، الناس العاقلة.) وديه عكس الجهلاء. "انظروا كيف تسيرون بالتدقيق لا كجهلاء، بل كحكماء، مفتقدين الوقت لان الايام شريرة." ... ربنا حابب يملانا من المعرفة والفهم، بس المهم مين اللي حابب يتملي ومين اللي بيخصص وقت من اجل الفهم. وعلي فكرة الوقت ده هو اللي هيبقي لينا في الحياة الابدية، وقت دارسة الكتاب المقدس قاعدين فيه مع ربنا وكلمة ربنا، ووقت الصلاة. لأننا بناخد استنارة، الواحد بقي شخص مختلف وموزون، وافكاره عليها القيمة، افكاره حكيمة. فلازم نخصص وقت يوميا للدراسة.
"ضياء الجلد" ... يعني ضياء السماء.
ربنا له المجد مش هينسي ابدا للناس اللي خدمت وردت كثيرين الي البر... والناس ديه "كالكواكب الي ابد الدهور" ... لأنه اقام ميت من الاموات.
علشان كده حلو اننا نخدم بكل قلوبنا ويكون في عقلنا اننا نوصل الناس للمسيح والعكس: اننا نوصل المسيح للناس، يعني وصلناهم للحياة.
زي اللي يقول لابونا انا سمعت عظمة غيرت فيا كتير، كلمة في النص ممكن تغيرحياة انسان وان ربنا استخدم الكلمة ديه في ان الانسان ده يتغير.
4« أَمَّا أَنْتَ يَا دَانِيآلُ فَأَخْفِ الْكَلاَمَ وَاخْتِمِ السِّفْرَ إِلَى وَقْتِ النِّهَايَةِ. كَثِيرُونَ يَتَصَفَّحُونَهُ وَالْمَعْرِفَةُ تَزْدَادُ». في اصحاح 8: 26 " اما انت فاكتم الرؤيا لأنها الي ايام كثيرة." دانيال كان كاتب عن اللي هيحصل في شعبه، شعب الله. الكلام ده كان مكتوب لأحفاد الناس اللي كانت عايشة وقتها ولكل الاجيال اللي بعدهم. مكتوب عن اللي هيحصلهم علي ايد انطيوخس ابيفانيوس، فطبعا كان هيبقي وضع ووقت صعب جدا علشان كده ربنا قال لدانيال: اختم علي السفر دلوقتي، اخفي السفر دلوقتي.
ومع كده لما جه الوقت الصعب ده بتاع تحقيق النبوة اللي هو وقت المكابيين قبل تجسد المسيح، الكتاب المقدس يقول "كثيرون يتصفحونه والمعرفة تزداد."... لان الناس عاوزة تعرف نهاية اللي هما فيه. نهاية عصر انطيوخس ونهاية وقت تدنيس الهيكل وابطال المحرقة الدائمة.
لو مكانش في تعزية ومعرفة للناس وامتي هيخلص الوقت ده ... هنشوف دلوقتي ان ناس كتير هتقول واحنا مالنا ومال الغلب ده، احنا نعبد الاله الحقيقي وفي الاخر نتبهدل البهدلة ديه؟
وده زي اللي هيحصل في نهاية الأيام، لما يجي ضد المسيح والناس تتأكد انه هو: الناس هتمسك اكتر في سفر الرؤيا وهيدرسوه طول الوقت علشان يعوفوا الدنيا ماشية ازاي. وسفر الرؤيا هينطبق عليه "كثيرون يتصفحونه والمعرفة تزداد."
5فَنَظَرْتُ أَنَا دَانِيآلَ وَإِذَا بِاثْنَيْنِ آخَرَيْنِ قَدْ وَقَفَا وَاحِدٌ مِنْ هُنَا عَلَى شَاطِئِ النَّهْرِ، وَآخَرُ مِنْ هُنَاكَ عَلَى شَاطِئِ النَّهْرِ. "اتنين آخرين" ... 2 ملايكة.
"شاطئ النهر" ... غالبا نهر دجلة.
6وَقَالَ لِلرَّجُلِ اللاَّبِسِ الْكَتَّانِ الَّذِي مِنْ فَوْقِ مِيَاهِ النَّهْرِ: «إِلَى مَتَى انْتِهَاءُ الْعَجَائِبِ؟» الراجل اللابس الكتان شوفناه في اصحاح 10 ... وكتير قالوا انه كان ظهور من ظهورات للسيد المسيح في العهد القديم، لكن كان في راي تاني: انه ملاك. ملاك مهيب.
المهم ان واحد من الملاكين اللي ظهروا لدانيال هنا قال للراجل اللي لابس الكتان: " الي متي انتهاء العجائب؟" ... لغاية امتي؟
وده نفس السؤال اللي اتسال قبل كده في دانيال 8 :13 "الي متي الرؤية من جهة المحرقة الدائمة ومعصية الخراب؟ فقال لي الي 2300 صباح ومساء، فيتبرا القدس"
7فَسَمِعْتُ الرَّجُلَ اللاَّبِسَ الْكَتَّانِ الَّذِي مِنْ فَوْقِ مِيَاهِ النَّهْرِ، إِذْ رَفَعَ يُمْنَاهُ وَيُسْرَاهُ نَحْوَ السَّمَاوَاتِ وَحَلَفَ بِالْحَيِّ إِلَى الأَبَدِ: « إِنَّهُ إِلَى زَمَانٍ وَزَمَانَيْنِ وَنِصْفٍ. فَإِذَا تَمَّ تَفْرِيقُ أَيْدِي الشَّعْبِ الْمُقَدَّسِ تَتِمُّ كُلُّ هذِهِ». هيرفع ايده الشمال واليمين زي الصليب.
"وحلف: بالحي الي الابد." ... والآية ديه خلت البعض يقولوا: انه مينفعش يكون المسيح.
وقاله " الي زمان وزمانين ونصف" ... نفس التعبير ده بالظبط اتكرر في سفر الرؤيا، وديه فترة ضد المسيح. يعني 3 ونص، نص العدد 7 يعني فترة غير كاملة وربنا مش هيسمح انها تبقي فترة طويلة اووي. (مع انها كانت فعليا تلات سنين ونص وقت انطيوخس ابيفانيوس.)
"فاذا تم تفريق ايدي الشعب المقدس، تتم كل هذه" ... فعلا في الفترة اللي قبل تجسد المسيح: انطيوخس شتت اليهود خالص، واستخبوا في المغاير وشقوق الارض وكانت فترة صعبة اوووي.
والناس وقتها لما تقرا الحكاية ديه وتشوف اللي كان بيحصل وقتها، وقت انطيوخس، يفهموا ان الكلام اللي قال عليه دانيال ... كان بينطبق علي الفترة بتاعة زمن انطيوخس ابيفانيوس، وكانوا عاوزين يعرفوا لغاية امتي؟ ويعني ايه زمان وزمانين ونصف زمان؟ وغالبا الاجابة مكانتش مشبعة وقتها لدانيال، يعني مش فاهم اوي والناس مش فاهمين.
8وَأَنَا سَمِعْتُ وَمَا فَهِمْتُ. فَقُلْتُ: «يَا سَيِّدِي، مَا هِيَ آخِرُ هذِهِ؟» حتي دانيال نفسه قال انه مش فاهم.... فاذا دانيال نفسه مكانش فاهم، فمحدش فينا يزعل انه مش فاهم. ودانيال نفسه سال: امتي النهاية ولغاية امتي؟ لأنه مكانش فاهم.9فَقَالَ: «اذْهَبْ يَا دَانِيآلُ لأَنَّ الْكَلِمَاتِ مَخْفِيَّةٌ وَمَخْتُومَةٌ إِلَى وَقْتِ النِّهَايَةِ. الراجل اللي لابس الكتان الابيض يقول "اذهب يا دانيال."
طبعا الشعب في وقت دانيال او بعده ب 50 او 60 سنة، محدش فيهم كان بيفهم حاجة، لان دانيال كان بيتكلم عن تفاصيل عصر البطالمة والدولة السلوقية والحروب اللي كانت بينهم. (كان وقتها الحاجات ديه لسه محصلتش) علشان كده اتقال : "لان الكلمات مخفية ومختومة لي وقت النهاية."
وده نفس اللي بيحصل معانا واحنا بنقرا سفر الرؤيا، ان في حاجات مش فاهمينها لاننا لسه مشوفنهاش. لكن لما تتشاف هنقول: هو ده فعلا اللي اتقال في الكتاب المقدس واحنا مكناش فاهمينه.
10كَثِيرُونَ يَتَطَهَّرُونَ وَيُبَيَّضُونَ وَيُمَحَّصُونَ، أَمَّا الأَشْرَارُ فَيَفْعَلُونَ شَرًّا. وَلاَ يَفْهَمُ أَحَدُ الأَشْرَارِ، لكِنِ الْفَاهِمُونَ يَفْهَمُونَ. التجارب بتعمل كل ده: بتطهر ولما بتطهر بتخلي الواحد كانه لابس ثياب بيضاء، ويبقي الواحد بلا لوم قدام ربنا له المجد.
الكنيسة الوحيدة في سفر الرؤيا اللي المسيح موجهش ليهم لوم: كنيسة سيمرنا، يعني الالم. الكنيسة ديه كانت متالمة ومضطهدة. كان كفاية عليهم الالم بتاعهم ، فمكانش متوجه ليهم لوم.
القديس يوحنا الذهبي الفم قال: ان بالالام اللي ربنا بيسمح بيها لينا، كأن ربنا مديون لنا... وعلشان كده ربنا بيسمح لينا بالآلام، كل هم ربنا اننا نتطهر ونبيض ونتمحص ... وكان معدن بيدخل في النار ويتنقي من الشوائب، بالظبط زي الذهب والفضة.
يمكن وقت التجربة بيبقي صعب والتجربة صعبة والناس مش مستحملة، بس في الاخر ربنا له المجد يقول " يتطهرون ويبيضون ويمحصون."
مرة زمان كان في راجل مملوء بالتجارب، ربنا سمح له بتجارب وراء بعض وابونا سمع احدي الراهبات التقيات، وهي تعرف الراجل ده، فقالت لأبونا: ان ربنا ليه طرقه في التطهير... فربنا يفضل يطهر الانسان لغاية ما يقف قدام ربنا، وربنا يقوله: "هوذا كلك جميلة يا حبيبيتي" مفيش فيكي ولا عيب واحد بس.
فاحنا نقول لربنا صحيح احنا مش فاهمين لكن ارجوك ادينا احتمال اننا نستحمل.
" اما الاشرار فيفعلون شرا" ... الذهب لما يدخل النار عياره يزيد، لأنه اتنقي من الشوائب. لكن بعض انواع المعادن التانية لما بتدخل النار الحارقة بتبوظ.
والتجارب ديه هي اللي هتفصل بين الابرار والفاهمون ... وهيقولوا لربنا جايز مش فاهمين، لكن مسلمين لك امورنا. ولتكن مشيئتك.
والاشرار يجدفون ويهينوا اسم الله، وفي ناس بتوصل للإلحاد. ويقولوا هو فين ربنا مع كل اللي بيحصل ده؟وربنا سايب ليه كل اللي بيتعمل فينا ده؟
"ولا يفهم احد الاشرار" ... الفهم ده شاغل دانيال اوي. لكن الاشرار دول في جهالة (جهل)
" لكن الفاهمون يفهمون" ... اولاد ربنا كل ما يسمح لهم بحاجة، يقربوا من ربنا اكتر ويستخبوا فيه، فيلاقوا حضن ربنا مفتوح ليه وحاضنهم وبيطبطب عليهم.
"اسم الرب برج حصين. يرقض ايه الصديق ويتمنع."
وربنا لما بيسمح بحاجة صغيرة للاشرار: بيبعدوا عن ربنا ... " متجنبون عن حياة الله." ... مش عاوزينك لأنك بتسمح لينا بالحاجات ديه.
زي الآية اللي قالها السيد المسيح "الذي عنده يعطي ويزاد، والذي ليس عنده فالذي عنده يؤخذ منه.
"... لأنه غير امين علي الحبة الصغيرين دول. وواحد تاني لما بيقبل من ايد ربنا اي حاجة، يديله اكتر واكتر.
هنختم بقي: علشان غالبا تحنن ربنا وانه ميسبش الناس مش عارفة لغاية امتي، ويمكن علشان اصرار دانيال انه بيقول لربنا انا مش فاهم يارب .
11وَمِنْ وَقْتِ إِزَالَةِ الْمُحْرَقَةِ الدَّائِمَةِ وَإِقَامَةِ رِجْسِ الْمُخَرَّبِ أَلْفٌ وَمِئَتَانِ وَتِسْعُونَ يَوْمًا. من بعد خراب اورشليم: 1290 يوم ... دول 3 سنين ونص.
في اصحاح 8 : 14 اتقالت 2300 صباح ومساء، يعني من اول حكم انطيوخس ابيفانيوس لغاية الاخر: 2300 يوم.
لكن من بداية تخريبه للهيكل وللقدس ... كان 1335 يوم، يعني حوالي 3 سنين ونص. ودول ينتهوا بموت انطيوخس.
وتطهير المكابيين للهيكل وطردهم لجنود انطيوخس.
وفي بعض الناس بتاخدها علي نهاية العالم ووقت ضد المسيح: زمان وزمانين ونص = التلات سنين ونص.
12طُوبَى لِمَنْ يَنْتَظِرُ وَيَبْلُغُ إِلَى الأَلْفِ وَالثَّلاَثِ مِئَةٍ وَالْخَمْسَةِ وَالثَّلاَثِينَ يَوْمًا. 1335 يوم ... ديه زيادة 45 يوم عن الفترة اللي هي 1290 يوم، وغالبا ال 45 يوم الفرق دول ما بين : ما طهروا الهيكل ونضفوه وطردوا انطيوخس وجنوده، ومابين انهم رجعوا النظام تاني.13أَمَّا أَنْتَ فَاذْهَبْ إِلَى النِّهَايَةِ فتَسْتَرِيحَ، وتَقُومَ لِقُرعَتِكَ فِي نِهَايَةِ الأَيَّامِ». بيقول لدانيال: اذهب الي النهاية فتستريح. " نهاية امر خير من بدايته."
"وتقوم لقرعتك في نهاية الايام" ... يعني ديه نياحة دانيال النبي. كفاية عليك كده يا دانيال، كفاية الرؤي والاحلام والحاجات اللي شوفتها. استريح بقي انت تعبت.
"قرعتك" ... في بعض الترجمات اليوناني: مش بس نصيبك، لكن مترجمة "تقوم لمجدك في نهاية الايام" ... لان اولاد الله في القيامة العامة سيتمجدون.
"لأننا سنراه كما هو." ... وهنكون زي ربنا في المجد في الحياة الابدية.
يالا اتنيح بسلام. وانتظر قيامة الاموات، ووقتها هتقوم الي المجد الي الابد في نهاية الايام.
⪢