⪡ 1فِي السَّنَةِ الثَّالِثَةِ لِكُورَشَ مَلِكِ فَارِسَ كُشِفَ أَمْرٌ لِدَانِيآلَ الَّذِي سُمِّيَ بِاسْمِ بَلْطَشَاصَّرَ. وَالأَمْرُ حَقٌّ وَالْجِهَادُ عَظِيمٌ، وَفَهِمَ الأَمْرَ وَلَهُ مَعْرِفَةُ الرُّؤْيَا. الجزء الأخير من سفر دانيال النبي: اصحاحات 10 و11 و12 وده جزء علي بعضه.
اصحاح 10 ... يعتبر المقدمة.
اصحاح 11... صلب الرؤية.
اصحاح 12 ... الخاتمة ونهاية السفر.
الاصحاح 10 ... يمكن علشان دانيال كان في حالة رعدة ورعب شديد فهنلاقي في شوية تداخلات. في تلميحات وإشارات واضحة لربنا يسوع المسيح في الاصحاح ده. ويمكن لو ماخدناش بالنا نلاقي الامور متداخلة... وهنشوف في الاصحاح ده أمور مكانتش في بالنا وان في أمور كتير بتحصل في العالم الآخر. هنشوف ازاي.
هنا قال اسمه المحبوب ليه اللي اخده في وطنه بالميلاد لما اتولد "دانيال" قبل ما يتغير اسمه في ارض السبي في بابا ويسموه باسم الآلهة الوثنية "بلطشاصر". واسم دانيال محبوب ليه لان فيه اسم يهوه ومعناه الله يدين. وهنا دانيال قال الاسمين للتأكيد. ولأن الرؤية هيقراها شعبه: اليهود اللي عارفينه باسم دانيال وهيقراها الاخرون اللي عارفينه باسم بلطشاصر. ولزيادة التأكيد علشان محدش يشك ...
"الأمر حق والجهاد عظيم وفهم الأمر وله معرفة الرؤيا." يعني الأمر ده حقيقي. احنا مش بنهزر. واللي هيحصل في الأخر وهنشوفه ده جهاد عظيم. ودانيال فهم الأمر وعرف الرؤيا.
2فِي تِلْكَ الأَيَّامِ أَنَا دَانِيآلَ كُنْتُ نَائِحًا ثَلاَثَةَ أَسَابِيعِ أَيَّامٍ طيب ايه اللي في الرؤيا؟ "تلاتة أسابيع أيام" ... دانيال وضح هنا ان 3 اسابيع أيام. لأن الاصحاح اللي فات كان الاسابيع يعني اسابيع سنين. فهنا الكلام ان المدة 21 يوم. كان "نائحا" لمدة 3 اسابيع يعني 21 يوم.3لَمْ آكُلْ طَعَامًا شَهِيًّا وَلَمْ يَدْخُلْ فِي فَمِي لَحْمٌ وَلاَ خَمْرٌ، وَلَمْ أَدَّهِنْ حَتَّى تَمَّتْ ثَلاَثَةُ أَسَابِيعِ أَيَّامٍ. كان في طقس صوم وصلاة عالي جدا. وكان مع نوح ومفيش اكل شهي لا لحم ولا خمر. وطبعا ده مش معناه ان دانيال كان بيشرب خمر لكن معناها: انه بيتذلل قدام ربنا له المجد. وده غالبا لأن الأمر خرج او صدر برجوع اليهود من بابل لأورشليم. البعض رجع والبعض مرجعش ... 70 سنة قاعدين في بابل واستقروا في حياتهم وبقي عندهم عائلات وممتلكات. مرضيوش يرجعوا ويبتدوا كله تاني من جديد.
علشان كده البعض فضل انه يكمل في بابل. وحتى اللي رجعوا: جت اخبار بتقول ان المدينة واسوارها مهدمة وكل واحد اهتم يبني بيته. فربنا له المجد عاتبهم: أنتم بتبنوا بيوتكم وسايبين بيتي خراب؟
فدانيال النبي لقي الوضع ميفرحش علشان كده كان نائح وماكلش لحم ولا اكل شهي... ده يدينا فكرة عن الصوم واننا لما مش بناكل لحمة ان ديه مش حاجة جديدة. مش بدعة. ديه كانت طبيعة صوم دانيال النبي قبل المسيح بحوالي 600 سنة. كان طعامه نباتي فالأكل النباتي موجود في الكتاب المقدس.
4وَفِي الْيَوْمِ الرَّابعِ وَالْعِشْرِينَ مِنَ الشَّهْرِ الأَوَّلِ، إِذْ كُنْتُ عَلَى جَانِبِ النَّهْرِ الْعَظِيمِ هُوَ دِجْلَةُ، لو اخدنا بالنا ان عيد الفصح بيجي في اليوم ال 14 من الشهر الاول. معني كده ان دانيال جه عليه عيد الفصح وده من أكبر الاعياد اليهودية. وهو صايم نائح ولم يأكل اكل شهي. وجه عليه العيد وهو بالتذلل ده قدام ربنا. فده يوضح ان الموضوع خطير.
"اذ كنت على جانب النهر العظيم هو دجلة." ... المفسرين قالوا هل هو فعلا كان على جانب النهر ولا كان في الرؤيا وفي الرؤيا كأنه بقي علي جانب النهر؟ مش عارفين وعامة مش هتفرق ... لكن أحد الآباء أتأمل تأمل جميل: يقول ان دانيال شاف لينا الرؤيا ديه علي جانب النهر. وكمان حزقيال النبي في اصحاحه الاول شاف لنا رؤيا علي جانب النهر وكان النهر ده إشارة للروح القدس. كل ما نقرب لروح الله: كل ما نتملي معرفة وفهم. الي يقرب من ربنا "تجري من بطنه انهار مياه حية." ... يعرف اكتر ويفرح اكتر ويتعزي ويثبت في ربنا له المجد اكتر.
5رَفَعْتُ وَنَظَرْتُ فَإِذَا بِرَجُل لاَبِسٍ كَتَّانًا، وَحَقْوَاهُ مُتَنَطِّقَانِ بِذَهَبِ أُوفَازَ، "رفعت" ... رفع عينيه... "ونظرت" ... اتفقنا ان الرؤي تحتاج ان الانسان يبقي قلبه وعينه وفكره مرفوعين للسماء. اللي متعلق بالأرض مش بيشوف حاجة.
علشان كده في بداية القداس من اهم الحاجات اللي ابونا ينبهها لينا ويقولنا: ارفعوا قلوبكم. وديه الترجمة الاصح. مش اين هي قلوبكم؟ فأبونا عاوز يقولنا ارفعوا قلوبكم علشان تنظروا ما تشتهي الملائكة ان تنظر اليه.
فدانيال لما رفع عينه ونظر: هنا شاف رجل. والرجل ده صفاته متقاربة مع الصفات اللي شافها القديس يوحنا الحبيب في رؤياه في الاصحاح الاول وكان شايف فيها المسيح.
بس الحقيقة ان الإحتمال الاكبر مش هنقدر نعتبر هذا الرجل هو ظهور للمسيح. المسيح موجود في الرؤيا ديه وهنشوفه.
لكن الراجل اللي لابس كتان لو بصينا في الاصحاح 12 آية 7 : وهي ختام الرؤيا "فسمعت الرجل اللابس الكتان الذي من فوق مياه النهر .... وحلف بالحي الي أبد الآبدين... فمش هينفع نعتبره المسيح "وحلف بالحي الي ابد الابدين." ... مع ان كتير من التفسيرات اعتبروه ان ده ظهور المسيح في الرؤيا.
"لابس كتانا" ... اللي اعتبروه انه المسيح قالوا اشارة الي كهنوته.
"ذهب أوفاز" ... يعني ذهب نقي. ساعات أوفاز تترجم ان معناها نقي جدا. وساعات تترجم ان أوفاز ديه مدينة مشهورة بالذهب النقي جدا. وساعات تترجم "ذهب أوفير". فعاوز يقول دهب نقي جدا عند "حقواه"
6وَجِسْمُهُ كَالزَّبَرْجَدِ، وَوَجْهُهُ كَمَنْظَرِ الْبَرْقِ، وَعَيْنَاهُ كَمِصْبَاحَيْ نَارٍ، وَذِرَاعَاهُ وَرِجْلاَهُ كَعَيْنِ النُّحَاسِ الْمَصْقُولِ، وَصَوْتُ كَلاَمِهِ كَصَوْتِ جُمْهُورٍ. "زبرجد" ... حجر من الاحجار الكريمة... بيتكلم عن كائن سماوي مثير للدهشة وفي منتهي القوة والاحترام والوقار.
"وصوت كلامه كصوت جمهور" ... نتخيل واحد بيسمع حد بيتكلم ويحس ان جمهور بيتكلم. ومع باقي المنظر اللي شافه دانيال اترعب.
"ذراعاه ورجلاه كعين النحاس المصقول" ... النحاس من اكتر المعادن صلابة ومش بيسيح بسهولة ابدا.
7فَرَأَيْتُ أَنَا دَانِيآلُ الرُّؤْيَا وَحْدِي، وَالرِّجَالُ الَّذِينَ كَانُوا مَعِي لَمْ يَرَوْا الرُّؤْيَا، لكِنْ وَقَعَ عَلَيْهِمِ ارْتِعَادٌ عَظِيمٌ، فَهَرَبُوا لِيَخْتَبِئُوا. 8فَبَقِيتُ أَنَا وَحْدِي، وَرَأَيْتُ هذِهِ الرُّؤْيَا الْعَظِيمَةَ. وَلَمْ تَبْقَ فِيَّ قُوَّةٌ، وَنَضَارَتِي تَحَوَّلَتْ فِيَّ إِلَى فَسَادٍ، وَلَمْ أَضْبِطْ قُوَّةً. دانيال كان معاه مجموعة من الناس بس مشافوش التفاصيل ديه اللي شافها دانيال... زي شاول (معلمنا بولس الرسول) وهو في طريقه لدمشق. اتذكرت الرؤيا ديه مرتين في اعمال الرسل 9 و21. واتقال عن الرجال اللي كانوا معاه مرة قال: انهم كانوا سامعين الصوت ومش شايفين حاجة. ومرة تانية قال: كانوا شايفين نور ومكانوش عارفين يميزوا الصوت. هما سمعوا اصوات وشافوا نور لكن مش عارفين يميزوا التفاصيل. فاترعبوا. بالظبط غالبا القصة كانت كده هنا مع دانيال النبي: ان الناس اللي كانوا مع دانيال شافوا امر يرعب وجريوا استخبوا. لكن مشافوش التفاصيل اللي شافها دانيال. علشان كده الرجالة دول وقع عليهم ارتعاد لأنهم شافوا حاجة غريبة بتحصل. يمكن شافوا نور او سمعوا صوت.
اعصابه سابت. وشه اصفر جدا. مش قادر يتمالك نفسه ومش قادر يقف وهنلاقيه بعدين انه وقع.
9وَسَمِعْتُ صَوْتَ كَلاَمِهِ. وَلَمَّا سَمِعْتُ صَوْتَ كَلاَمِهِ كُنْتُ مُسَبَّخًا عَلَى وَجْهِي، وَوَجْهِي إِلَى الأَرْضِ. "مسبخا علي وجهي" ... زي مغمي عليه. يعني واحد واقع علي الارض ونايم علي وشه.10وَإِذَا بِيَدٍ لَمَسَتْنِي وَأَقَامَتْنِي مُرْتَجِفًا عَلَى رُكْبَتَيَّ وَعَلَى كَفَّيْ يَدَيَّ. هنا هيبتدي اشارة واضحة لربنا يسوع المسيح ... "وإذا بيد لمستني" في بعض التفاسير بتقول: لو كانت ديه ايد الشخص المتكلم كان قال: اذ يده. زي ماقال وسمعت صوته. لكن قال هنا "وإذا بيد لمستني" وابتدي يقوم حبة حبة. وكف ايديه الاتنين وركبتيه علي الارض وهو كان بيترعش.
وده يمكن يفسرلنا ليه التداخل اللي في الرؤيا ده. أصل دانيال معذور لما يشوف منظر بالشكل ده ويغمي عليه بالشكل ده وعمال يترعش. فكتر خيره.
11وَقَالَ لِي: «يَا دَانِيآلُ، أَيُّهَا الرَّجُلُ الْمَحْبُوبُ افْهَمِ الْكَلاَمَ الَّذِي أُكَلِّمُكَ بِهِ، وَقُمْ عَلَى مَقَامِكَ لأَنِّي الآنَ أُرْسِلْتُ إِلَيْكَ». وَلَمَّا تَكَلَّمَ مَعِي بِهذَا الْكَلاَمِ قُمْتُ مُرْتَعِدًا. هنا هيبتدي الكلام. وغالبا ان ده كائن من الكائنات السماوية. غالبا ملاك.
"الرجل المحبوب" ... اللقب الجميل لدانيال.
"افهم الكلام" ... يفكرنا برئيس الملايكة غبريال (جبرائيل) اللي فهمه الكلام في الرؤيا اللي فاتت.
وابتدي دانيال يقف وهو مرعوب.
12فَقَالَ لِي: «لاَ تَخَفْ يَا دَانِيآلُ، لأَنَّهُ مِنَ الْيَوْمِ الأَوَّلِ الَّذِي فِيهِ جَعَلْتَ قَلْبَكَ لِلْفَهْمِ وَلإِذْلاَلِ نَفْسِكَ قُدَّامَ إِلهِكَ، سُمِعَ كَلاَمُكَ، وَأَنَا أَتَيْتُ لأَجْلِ كَلاَمِكَ. من اول يوم يا دانيال انت طلبت أنك تفهم ايه اللي بيحصل. وليه شعبك بيعمل كده؟ وايه اللي هيصحل يارب؟ وابتديت تذلل قدام ربنا. ربنا استجاب. بس في حاجة عطلت الدنيا من اول ما ابتديت تصلي وكلامك اتسمع. وصلاتك استجابت وربنا بعتني ليك علشان افهمك.13وَرَئِيسُ مَمْلَكَةِ فَارِسَ وَقَفَ مُقَابِلِي وَاحِدًا وَعِشْرِينَ يَوْمًا، وَهُوَذَا مِيخَائِيلُ وَاحِدٌ مِنَ الرُّؤَسَاءِ الأَوَّلِينَ جَاءَ لإِعَانَتِي، وَأَنَا أُبْقِيتُ هُنَاكَ عِنْدَ مُلُوكِ فَارِسَ. 14وَجِئْتُ لأُفْهِمَكَ مَا يُصِيبُ شَعْبَكَ فِي الأَيَّامِ الأَخِيرَةِ، لأَنَّ الرُّؤْيَا إِلَى أَيَّامٍ بَعْدُ». من اول ما ابتدي دانيال يصلي. الاستجابة خرجت من عند الله. وخرج هذا الملاك ليخبر دانيال بالاستجابة لكن "رئيس مملكة فارس وقف مقابلي (قدامي) 21 يوم ... وديه كانت فترة الصلاة والنوح اللي قضاها دانيال النبي. ونستشف من الكلام ده: ان الشيطان مقسم الشغل بتاعه. لكل مكان مندوب يرعاه رعاية ابليسية. علشان يهتم بهلاك الناس الموجودين في المكان ده. فغالبا الشيطان اللي في مملكة فارس وكان مكلف وكان مكلف بتعطيل رجوع اليهود من السبي: عطل هذا الملاك. وده يدينا فكرة عن اللي بيحصل في العالم الاخر... بس طبعا منفهمش من كده ان ربنا له المجد سايب الشيطان يعمل اللي هو عاوزه. لكن كله بسماح من الله. الله ضابط الكل.
فالملاك بيقوله: ان ميخائيل جاء لإعانتي. علشان يعين الملاك. وده يوضح ان الكلام ده مش علي ربنا له المجد لكن عن ملاك. وجه رئيس الملايكة ميخائيل علشان يساعد الملاك ده.
طبعا احنا مش بندعي معرفة كل حاجة. ولكم من الكلام ده. معناه ... ان هناك شغل من عدو الخير كبير اووي لتعطيل عمل الله. والله اداله السماح والفرصة الي حين. لوقت معين... حتي في اخر الزمان لما يفك الشيطان من اسره في الفترة الاخيرة بتاعته ممكن يضل ولو امكن المختارين. وده كلام الكتاب المقدس.
فلازم نصحي لحياتنا ونعرف ان في فخاخ شيطانية منصوبة بشدة. وان وظيفة الشيطان يعطل خلاص الناس الابدي. فلازم نعمل زي دانيال النبي وننسكب قدام الله بدموع ونوح وصوم. علشان ربنا له المجد يتحنن علينا.
جايز يكون الله تحنن وأرسل رئيس الملايكة ميخائيل علشان يعين ويساعد هذا الملاك بسبب صلاة وصوم دانيال النبي. هو طبعا المواقيت والازمنة بتاعة ربنا له المجد هو اللي بيحددها. ولو ربنا عاوز ان الملاك يروح في نفس الوقت لدانيال كان اكيد راح علطول.
بس برده لازم نحط في دماغنا ان في مقاومة من ابليس. " وابليس يجول كاسد زائر يلتمس من يبتلعه."
15فَلَمَّا تَكَلَّمَ مَعِي بِمِثْلِ هذَا الْكَلاَمِ جَعَلْتُ وَجْهِي إِلَى الأَرْضِ وَصَمَتُّ. حتي الملايكة عندها اتضاع. الملاك مش عارف. فقاله: انا معرفتش لغاية ماجه الملاك ميخائيل يساعدني.
ساعات احنا كبشر نستصعب نعمل كده. هو انا هاقول مش عارف؟ لا طبعا. لازم ابقي عارف كل حاجة وحتى لو معرفش هاقول اي حاجة وخلاص... ودانيال لما سمع كده بص في الارض. دانيال سكت لأنه مش عارف يقول حاجة.
16وَهُوَذَا كَشِبْهِ بَنِي آدَمَ لَمَسَ شَفَتَيَّ، فَفَتَحْتُ فَمِي وَتَكَلَّمْتُ وَقُلْتُ لِلْوَاقِفِ أَمَامِي: «يَا سَيِّدِي، بِالرُّؤْيَا انْقَلَبَتْ عَلَيَّ أَوْجَاعِي فَمَا ضَبَطْتُ قُوَّةً. ديه حتة تانية فيها اشارة واضحة للمسيح. دانيال النبي لما اتكلم عن المسيح قبل كده قال "شبه انسان." وهنا بيقول شبه بني ادم."
ولما اتكلم عن رئيس الملايكة جبرائيل في الاصحاح اللي فات قال "واذ بالرجل جبرائيل." فميش مانع ابدا ان اللابس كتان في اول الاصحاح ده قال "راجل لابس كتان" انه يبقي كائن سماوي من الرتب العالية جدا من الملايكة.
مناظر الملايكة مش مناظر سهلة ان الواحد يشوفها ويستحمل. ده يوحنا الحبيب ودانيال النبي لما شافوا الملايكة مستحملوش. امال احنا لما هنروح السماء هنعمل ايه؟ ده احنا هنشوف الله وجها لوجه. طيب حالتنا هتبقي شكلها ايه؟
فبيقول ان الرؤيا ديه هيجت عليها الاوجاع. جايز علشان دانيال شاف ان في مقاومة وتعطيل من عدو الخير لرجوع الشعب... بيقولوا: لما جه ابن كورش الملك. وكان وقتها كورش انشغل في حروب وابن كورش عطل رجوع الشعب. وغالبا ده بسبب رئيس مملكة فارس. بسبب الشيطان. زي ما اتقال في الرؤيا دلوقتي. فعدو الخير بيحب يعطل. واحنا لو ماخدناش بالنا منه بنقع في الفخ ده. عدو الخير بيعطل: صلواتنا واصوامنا ومحبتنا لبعض وخلاص نفسنا وابديتنا وجهادنا.
17فَكَيْفَ يَسْتَطِيعُ عَبْدُ سَيِّدِي هذَا أَنْ يَتَكَلَّمَ مَعَ سَيِّدِي هذَا وَأَنَا فَحَالاً، لَمْ تَثْبُتْ فِيَّ قُوَّةٌ وَلَمْ تَبْقَ فِيَّ نَسَمَةٌ؟». الاسماء هنا متداخلة في بعض. لكن دانيال غالبا بيتكلم مع المسيح وبيقوله. انا عبدك انت. مقالش انا عبد الاتنين. فبيقوله "كيف يستطيع عبد سيدي هذا" ... بيتكلم عن نفسه انه عبد ربنا له المجد... مبقاش فيا اي قوة. 18فَعَادَ وَلَمَسَنِي كَمَنْظَرِ إِنْسَانٍ وَقَوَّانِي، ربنا له المجد ده حنين اوي. مجرد لمسة منه تقوي. تخلي الواحد قوي.19وَقَالَ: «لاَ تَخَفْ أَيُّهَا الرَّجُلُ الْمَحْبُوبُ. سَلاَمٌ لَكَ. تَشَدَّدْ. تَقَوَّ». وَلَمَّا كَلَّمَنِي تَقَوَّيْتُ وَقُلْتُ: «لِيَتَكَلَّمْ سَيِّدِي لأَنَّكَ قَوَّيْتَنِي». لو اللي بيكلم دانيال النبي هو المسيح. فيبقي مش الملايكة بس بتقوله الرجل المحبوب لكن كمان ربنا له المجد نفسه بيقوله الرجل المحبوب.
ملحوظة قالها نيافة الانبا رافائيل: الناس في بعض الكنايس ان من علامات حضور الروح القدس عندهم: انهم يقعوا. فساعات ياخدوا الجزء ده ويقولوا: شوفتوا اهو دانيال وقع. فنقولهم: لا. مش كده. لكن دانيال لما وقع ربنا قومه مش ربنا وقعه. ولما وقع من الخضة والخوف وكل اللي بيحصل ربنا له المجد لمسه وقاله قوم. فاحنا معندناش فكرة ان الواحد يكون واقف طبيعي وبعدين يقع اشارة يعني ان الروح القدس حل عليه. معندناش الحتة ديه. بالعكس الروح القدس يعطي قوة. والله يعطي قوه ويخلينا نقدر نكمل.
لما ربنا كلمه. اتقوي ووقف علي رجله.
"ليتكلم سيدي لانك قويتني" ... وهنا هيبتدي يتداخل علي الشخص الاولاني. هنا بيقول للتاني: فليتكلم سيدي. لأنك انت قويتني. (ساعات تترجم كده. لان ربنا قواه. فقال للكائن الاولاني انه يتكلم. انا كده ممكن اسمعك وتفهمني بما إنك مكلف من الله انك تفهمني. وزي ماشوفنا في الرؤيا اللي فاتت ربنا له المجد قال لجبرائيل رئيس الملايكة: فهم الرجل.) ... فممكن هنا بإشارة من الله ان الكائن التاني يفهم دانيال. ودانيال قاله ليتكلم سيدي.
20فَقَالَ: «هَلْ عَرَفْتَ لِمَاذَا جِئْتُ إِلَيْكَ؟ فَالآنَ أَرْجعُ وَأُحَارِبُ رَئِيسَ فَارِسَ. فَإِذَا خَرَجْتُ هُوَذَا رَئِيسُ الْيُونَانِ يَأْتِي. الكائن الاول بيقول ان لسه ليه حرب مع رئيس فارس. والكتاب المقدس بيقول: لسه ليا حرب مع عماليق من دور الي دور. ورئيس مملكة فارس هيخلص لما يجي اليونانيين. فانا لسه مكلف اني ادافع عنكم ضد رئيس فارس. ولما تخلص الحكاية ديه: هيجي رئيس اليونان ونبقي خلصنا من مملكة فارس.21وَلكِنِّي أُخْبِرُكَ بِالْمَرْسُومِ فِي كِتَابِ الْحَقِّ. وَلاَ أَحَدٌ يَتَمَسَّكُ مَعِي عَلَى هؤُلاَءِ إِلاَّ مِيخَائِيلُ رَئِيسُكُمْ. وكان خطة حياتنا ربنا له المجد سماها "كتاب الحق." ومفيش حد هيحارب معايا ضد هولاء الشياطين وجنوده بتوع فارس ... "ولا أحد يتمسك معي علي هؤلاء."
"الا ميخائيل رئيسكم" ... وغالينا ميخائيل هو كان المكلف بحماية ورعاية شعب الله. علشان كده الملاك بيقوله: مفيش حد هيبقي معايا ضد الشياطين دول الا ميخائيل رئيسكم.
وديه كانت المقدمة بتاعة الرؤيا الاخيرة.
⪢