صورة توضيحية: رقم 2.. شكل بوابة الهيكل الجديد، البوابة الشرقية.
"ثُمَّ ذَهَبَ بِي إِلَى الْبَابِ، الْبَابِ الْمُتَّجِهِ نَحْوَ الشَّرْقِ." ... اذاً ربنا أخد حزقيال النبي للباب الشرقي.2 وَإِذَا بِمَجْدِ إِلهِ إِسْرَائِيلَ جَاءَ مِنْ طَرِيقِ الشَّرْقِ وَصَوْتُهُ كَصَوْتِ مِيَاهٍ كَثِيرَةٍ، وَالأَرْضُ أَضَاءَتْ مِنْ مَجْدِهِ. الشرق، ده نفس المكان اللي ربنا ساب منه الهيكل، هيكل سُليمان ومشي. وكأن ربنا بيُعلن من جديد عودته لبيته. لأن ربنا هو اللي أسس الكنيسة. وحاضر في وسطها. قائم في هيكلها بجسده ودمه.
طيب ليه ربنا جاي بمجده من جهة أو من طريق الشرق؟ لأن ربنا هو النور، شمس البر. " هو الذي يشرق بنوره علي الجالسين في الظلمة وظلال الموت." والكنيسة بتعملنا إننا نصلي اتجاه الشرق. واحنا بننتظر مجيء ربنا يسوع المسيح له المجد، بمجده مرة أخري من ناحية الشرق. وربنا يسوع له المجد جه علي الأرض من ناحية الشرق. والنجم ظهر من الشرق.
والشماس بيقول: والي الشرق انظروا. (خلي عينك علي ربنا. شمس البر. خليك مستعد لمجيئه من المشارق.)
"وَصَوْتُهُ كَصَوْتِ مِيَاهٍ كَثِيرَةٍ،" ... نفس كلام القديس يوحنا الحبيب في سفر الرؤيا.
وحزقيال النبي في الرؤيا الأولي بتاعته، قال نفس الكلام. معناه: صوت فيه رهبة (زي صوت المية المندفعة من الشلالات)
" وَالأَرْضُ أَضَاءَتْ مِنْ مَجْدِهِ." ... بمجيء المسيح يسوع له المجد وتجسده، الأرض كلها استنارت، وأُزيلت اللعنة التي كانت في الأرض بسبب خطية أدم وحواء.
3 وَالْمَنْظَرُ كَالْمَنْظَرِ الَّذِي رَأَيْتُهُ لَمَّا جِئْتُ لأُخْرِبَ الْمَدِينَةَ، وَالْمَنَاظِرُ كَالْمَنْظَرِ الَّذِي رَأَيْتُ عِنْدَ نَهْرِ خَابُورَ، فَخَرَرْتُ عَلَى وَجْهِي. يعني لما أتنبأت علي خراب المدينة، لأن قاله "تنبأ يا ابن أدم." فبيقول: نفس المنظر ده، اللي شوفته قبل كده.
"وَالْمَنَاظِرُ كَالْمَنْظَرِ الَّذِي رَأَيْتُ عِنْدَ نَهْرِ خَابُورَ،" ... حزقيال النبي شاف عند نهر خابور: مركبة الكاروبيم.
"فَخَرَرْتُ عَلَى وَجْهِي." ... حزقيال النبي كل ما يشوف المنظر ده يقع ، يخر علي وجهه. مع أنه منظر مش جديد عليه.
طبعا الإنسان كل مرة، يكون فيها في حضرة ربنا، لازم يشعر بالرهبة وكأنها أول مرة.
مشكلتنا كلنا تقريبا: إننا جوة الكنيسة الرهبة بتروح مننا.
صورة توضيحية: رقم 3..
ده المنظر اللي شافه حزقيال النبي عند نهر خابور. الأربع كائنات الغير متجسدين، الكاروبيم: كل واحد ليها 4 أوجهه و4 أجنحة. وفوق رأسها مُقبب، عليه العرش اللي حزقيال النبي شاف ربنا جالس عليه، وكأنه نحاس ونار. إشارة للناسوت واللاهوت. وشاف مع الكاروبيم، الأربع بكرات وكانت بكرة جوة بكرة. وكانت إشارة للعهد القديم والعهد الجديد. وكانت البكرات مليانة عيون. نفس المنظر هو هو، بيتكرر تاني هنا.
والبكرات مليانة عيون.
4 فَجَاءَ مَجْدُ الرَّبِّ إِلَى الْبَيْتِ مِنْ طَرِيقِ الْبَابِ الْمُتَّجِهِ نَحْوَ الشَّرْقِ. صورة توضيحية: رقم 4.. شكل البوابة الشرقية، اللي هو واقف عندها. وفي البكرات، بكرة جوة بكرة. وشكل الكاروبيم. فبدأ حزقيال النبي يشوف نفس المنظر تاني.
5 فَحَمَلَنِي رُوحٌ وَأَتَى بِي إِلَى الدَّارِ الدَّاخِلِيَّةِ، وَإِذَا بِمَجْدِ الرَّبِّ قَدْ مَلأَ الْبَيْتَ، كانوا واقفين عند البوابة بره، عند السور.
"فَحَمَلَنِي رُوحٌ وَأَتَى بِي إِلَى الدَّارِ الدَّاخِلِيَّةِ،" ... لكن الروح القدس أخده للدار الداخلية.
صورة توضيحية: رقم 5.. في الصورة: البكرات والمجد والبهاء والنور، كله دخل في الدار الداخلية.
طيب ليه يا رب دخلّت حزقيال جوة؟ يا رب ما أنت واقف معاه بره؟ ربنا بيحب يأخد أولاده للعمق. ربنا يسوع المسيح له المجد قال لبطرس الرسول "ادخل الي العمق."
وقفتنا علي باب الكنيسة متتفقش مع ربنا. ربنا بيحب أن الإنسان يدخل في علاقة معاه. علاقة خاصة، مش علاقة سطحية.
6 وَسَمِعْتُهُ يُكَلِّمُنِي مِنَ الْبَيْتِ، وَكَانَ رَجُلٌ وَاقِفًا عِنْدِي. صوت ربنا جاي من جوة البيت. من داخل القدس وقدس الأقداس.
"وَكَانَ رَجُلٌ وَاقِفًا عِنْدِي." ... ديه فكرة التجسد. أن ربنا يسوع المسيح له المجد يظهر في صورة إنسان. "الذي سمعناه. الذي رأيناه."
" وَإِذَا بِمَجْدِ الرَّبِّ قَدْ مَلأَ الْبَيْتَ." ... آية 5 ، "وَكَانَ رَجُلٌ وَاقِفًا عِنْدِي.". الآيتين دول يفكرونا بكلام معملنا بولس الرسول عن شخص المسيح يسوع له المجد "بهاء مجده."
7 وَقَالَ لِي: «يَا ابْنَ آدَمَ، هذَا مَكَانُ كُرْسِيِّي وَمَكَانُ بَاطِنِ قَدَمَيَّ حَيْثُ أَسْكُنُ فِي وَسْطِ بَنِي إِسْرَائِيلَ إِلَى الأَبَدِ، وَلاَ يُنَجِّسُ بَعْدُ بَيْتُ إِسْرَائِيلَ اسْمِي الْقُدُّوسَ، لاَ هُمْ وَلاَ مُلُوكُهُمْ، لاَ بِزِنَاهُمْ وَلاَ بِجُثَثِ مُلُوكِهِمْ فِي مُرْتَفَعَاتِهِمْ. الأرض كلها يارب موطئ قدميك، لا تسعك يارب. السموات كرسيً الله.
لكن هنا: ربنا بيشاور علي البيت ويقول: " هذَا مَكَانُ كُرْسِيِّي وَمَكَانُ بَاطِنِ قَدَمَيَّ حَيْثُ أَسْكُنُ فِي وَسْطِ بَنِي إِسْرَائِيلَ إِلَى الأَبَدِ،"... لأن الكنيسة هي عبارة عن جسد السيد المسيح له المجد.
" حَيْثُ أَسْكُنُ فِي وَسْطِ بَنِي إِسْرَائِيلَ" ... تدينا انطباع عن التجسد. لأن ربنا يسوع له المجد، جه واتجسد وسكن في وسط البشر.
" وَلاَ يُنَجِّسُ بَعْدُ بَيْتُ إِسْرَائِيلَ اسْمِي الْقُدُّوسَ، لاَ هُمْ وَلاَ مُلُوكُهُمْ، لاَ بِزِنَاهُمْ وَلاَ بِجُثَثِ مُلُوكِهِمْ فِي مُرْتَفَعَاتِهِمْ." ... ومحدش هينجس اسمي القدوس تاني بعد كده.
8 بِجَعْلِهِمْ عَتَبَتَهُمْ لَدَى عَتَبَتِي، وَقَوَائِمَهُمْ لَدَى قَوَائِمِي، وَبَيْنِي وَبَيْنَهُمْ حَائِطٌ، فَنَجَّسُوا اسْمِي الْقُدُّوسَ بِرَجَاسَاتِهِمِ الَّتِي فَعَلُوهَا، فَأَفْنَيْتُهُمْ بِغَضَبِي. بيوت الشعب كانت قريبة من بيت ربنا. وبيني وبينهم حائط: يعني كانوا جيراني.
"فَنَجَّسُوا اسْمِي الْقُدُّوسَ بِرَجَاسَاتِهِمِ الَّتِي فَعَلُوهَا، فَأَفْنَيْتُهُمْ بِغَضَبِي." ... بس جيراني دول، اللي بيوتهم جنب بيتي، دنسوا بيتي.
9 فَلْيُبْعِدُوا عَنِّي الآنَ زِنَاهُمْ وَجُثَثَ مُلُوكِهِمْ فَأَسْكُنَ فِي وَسْطِهِمْ إِلَى الأَبَدِ. "وَجُثَثَ مُلُوكِهِمْ"... الجثث في العهد القديم كانت نجاسة. فشكلهم بدأوا يهملوا في الأمور ديه. من ناحية التطهير.
"فَلْيُبْعِدُوا عَنِّي الآنَ زِنَاهُمْ" ... خطية عبادة الأوثان والشهوات والنجاسات.
"فَأَسْكُنَ فِي وَسْطِهِمْ إِلَى الأَبَدِ." ... ربنا عاوز يقول: علشان أرجع أبقي وسطيهم، أهم حاجة الإنسان ينضف نفسه.
لو الواحد عاوز ربنا يسكن فيه، وقلبه يبقي مسكن لله .. ربنا يقوله: نضف قلبك وحواسك علشان أعرف أسكن فيك، جواك.
10 «وَأَنْتَ يَا ابْنَ آدَمَ، فَأَخْبِرْ بَيْتَ إِسْرَائِيلَ عَنِ الْبَيْتِ لِيَخْزَوْا مِنْ آثَامِهِمْ، وَلْيَقِيسُوا الرَّسْمَ. 11 فَإِنْ خَزُوا مِنْ كُلِّ مَا فَعَلُوهُ، فَعَرِّفْهُمْ صُورَةَ الْبَيْتِ وَرَسْمَهُ وَمَخَارِجَهُ وَمَدَاخِلَهُ وَكُلَّ أَشْكَالِهِ وَكُلَّ فَرَائِضِهِ وَكُلَّ شَرَائِعِهِ، وَاكْتُبْ ذلِكَ قُدَّامَ أَعْيُنِهِمْ لِيَحْفَظُوا كُلَّ رُسُومِهِ وَكُلَّ فَرَائِضِهِ وَيَعْمَلُوا بِهَا. آية 10 و11 ... ربنا بيقول لحزقيال النبي: قبل ما تعرفهم علي كل المقاسات (اللي شوفناها قبل كده) ومواصفات بيتي. لازم يقدموا توبة الأول.
المقاسات والتفاصيل ديه كلها، ديه أمور رمزية. فربنا بيقولي: عاوز أسكن معاك. بس أهم حاجة نضف جواك. توب.
12 هذِهِ سُنَّةُ الْبَيْتِ: عَلَى رَأْسِ الْجَبَلِ كُلُّ تُخْمِهِ حَوَالَيْهِ قُدْسُ أَقْدَاسٍ. هذِهِ هِيَ سُنَّةُ الْبَيْتِ. المدينة أو المبني اللي شافه حزقيال النبي، كان علي جبل عالي. لكن هنا ربنا بيقول: الجبل كله قدس أقداس، طالما مكان حل فيه الله. فيبقي كله مقدس.
علشان كده الكنيسة: وأن كان الهيكل ليه قُدسيته، لكن كمان باقية الكنيسة مقدسة. الجبل كله قدس أقداس.
فمش معني أن الهيكل قدس أقداسنا، يبقي نقعد نتكلم ونحكي في الكنيسة. أو نتصرف تصرفات متناسبش الكنيسة، بيت الله. وكمان لو قولنا أن القلب هو بيت ربنا، يبقي لازم الجسد كله يبقي مقدس، يبقي قدس أقداس.
"هذِهِ هِيَ سُنَّةُ الْبَيْتِ."... نرجع لآية 9: " فَلْيُبْعِدُوا عَنِّي الآنَ زِنَاهُمْ وَجُثَثَ مُلُوكِهِمْ " ... الجثث أو الميت في العهد القديم، نجاسة.
لكن كمان ممكن نأخد الموضوع بمعني روحي..
في العهد الجديد، الكتاب المقدس قالنا: "وجعلنا لله أبيه ملوكا وكهنة" (ملوك وكهنة بالمعني العام، مش المقصود بيه الكهنوت، كأب كاهن) ... طيب احنا ملوك، أولاد ربنا ملك الملوك.
فايه معني ابعد عني جثث ملوكهم؟ يعني ربنا مش عاوز في الكنيسة ناس ميتة. "لك اسم إنك حي، وأنت ميت." ربنا مش عاوز جثث. لكن عاوز قلب نابض. مشاعر. احنا أحياناً بنتعامل مع ربنا من غير مشاعر.
هنبدأ دلوقتي في جزء بيشرح المذبح:
13 «وَهذِهِ أَقْيِسَةُ الْمَذْبَحِ بِالأَذْرُعِ، وَالذِّرَاعُ هِيَ ذِرَاعٌ وَفِتْرٌ: الْحِضْنُ ذِرَاعٌ، وَالْعَرْضُ ذِرَاعٌ، وَحَاشِيَتُهُ إِلَى شَفَتِهِ حَوَالَيْهِ شِبْرٌ وَاحِدٌ. هذَا ظَهْرُ الْمَذْبَحِ. صورة توضيحية للمذبح: رقم 6.. المذبح عليه دايرة حمراء.
المذبح في خيمة الاجتماع أو هيكل سُليمان، كان عبارة عن صندوق من الخشب متغطي بالنحاس. وتتحط عليه شبكة، وتتقدم عليه المحرقات. وسموه: المذبح النُحاسي. أو مذبح المُحرقة ... وكان يحمل إشارة للصليب، علشان كده كان بيُصنع من الخشب. اللي هيتصلب عليه السيد المسيح له المجد، اللي رجله كأنهما نحاس مُحميتان في أتون. فهو خشب مطلي بالنحاس.
هنشوف مواصفات المذبح في هيكل حزقيال، وهي مختلفة تماما عن مقاييس المذبح في الخيمة.
صورة توضيحية للمذبح في الهيكل الجديد: 7.. عامل زي الهرم المُدرج. مُكون من 4 درجات:
- الدرجة الأولي: وفيها لونين. لون فاتح، ولون بني غامق. اللون البني الغامق، عبارة عن زي سور صغير حواليه.
- الدرجة التانية والتالتة والرابعة.
وأكبر درجة هي اللي تحت خالص.. اذاً المذبح الجديد: عبارة عن مذبح يشبه الهرم المُدرج. ومكون من 4 درجات.
صورة توضيحية: رقم 8.
الدرجة الأولي بيسموها: الحِضن. لأنها من تحت خالص، وكأنها محتضنة المذبح كله.
الدرجة التانية : الخُصم الأسفل. معني كلمة "الخُصم" ... حاجة زي المصطبة. يقفوا عليها أو يقعدوا عليها.
الدرجة التالتة: الخًصم الأكبر.
الدرجة الرابعة والأخيرة: أخر درجة من فوق، اللي هيبقي عليها المذبح. اسمها: الموقد، التي هتُوقد عليها النار بتاعة الذبيحة. وفوق الموقد موجود، أربع قرون. زي ما كان في المذبح النحاس.
" ذِرَاعٌ وَفِتْرٌ" ... الفِتر هو من رأس السبابة لرأس الإبهام.
وهي نفس الفكرة لما كنا بنتكلم عن الشبر. وقولنا أن الشبر بيُشير لجهادنا في طريق ربنا. وهنا نفس الموضوع. والفِتر أصغر من الشبر.
لأن في وجود الصليب، عمل النعمة واضح. لأن المذبح عبارة عن الصليب.
" الْحِضْنُ ذِرَاعٌ،" ... اللي هو ارتفاعه. ارتفاعه ذراع.
صورة توضيحية: رقم 9.. ارتفاع الحِضن ذراع، اللي باللون البرتقالي.
صورة توضيحية: رقم 10.. ذراع.
صورة توضيحية: رقم 11.. اللي قولنا لونها بني غامق، (في الصورة 2 )
"حَاشِيَتُهُ" ... زي سور صغير، ارتفاعه شبر تقريبا = 20 سم.
14 وَمِنَ الْحِضْنِ عِنْدَ الأَرْضِ إِلَى الْخُصْمِ الأَسْفَلِ ذِرَاعَانِ، وَالْعَرْضُ ذِرَاعٌ. وَمِنَ الْخُصْمِ الأَصْغَرِ إِلَى الْخُصْمِ الأَكْبَرِ أَرْبَعُ أَذْرُعٍ، وَالْعَرْضُ ذِرَاعٌ. صورة توضيحية: رقم 12.. الخُصم الأسفل: لونه برتقالي في الصورة. ارتفاعه ذراعين، وعرضه ذراع.
اذاً المصطبة اللي بيقفوا عليها في كل الدرجات ... عرضها ذراع واحد.
صورة توضيحية: رقم 13.. الخُصم الأكبر: ارتفاعه 4 ذراع. متعلم عليه بالسهم الأسود.
صورة توضيحية: رقم 14.. الخُصم الأكبر: العرض ذراع. متعلم عليه بالسهم الأسود.
15 وَالْمَوْقِدُ أَرْبَعُ أَذْرُعٍ. وَمِنَ الْمَوْقِدِ إِلَى فَوْقُ أَرْبَعَةُ قُرُونٍ. صورة توضيحية: رقم 15.. الموقد متعلم عليه بالسهم الأسود. ولونه برتقالي. ارتفاعه 4 أذرع، وفوقه الأربع قرون.
نحسب الأطوال:
ارتفاع الحِضن ... ذراع. الخُصم الأسفل، اللي فوق الحِضن ... ذراعان. الخُصم الأكبر اللي فوقه ... 4 أذرع.
بكده يكون المجموع = 7 أذرع.
اذاً يبقي علشان أوصل للمكان اللي هتتحط عليه الذبيحة، لازم أرتفع 7 أذرع. لأن ذبيحة الصليب، هي ذبيحة كاملة.
"وَالْمَوْقِدُ أَرْبَعُ أَذْرُعٍ. وَمِنَ الْمَوْقِدِ إِلَى فَوْقُ أَرْبَعَةُ قُرُونٍ" ... الموقد نفسه عبارة عن 4 أذرع، وفوقه 4 قرون.. وده لأن الذبيحة للعالم كله، 4 جهات الأرض.
وال 4 قرون بتفكرنا بخشبة الصليب، لأنها 4 أطراف.
16 وَالْمَوْقِدُ اثْنَتَا عَشَرَةَ طُولاً، بِاثْنَتَيْ عَشَرَةَ عَرْضًا، مُرَبَّعًا عَلَى جَوَانِبِهِ الأَرْبَعَةِ. صورة توضيحية: رقم 16.. الموقد نفسه: عبارة عن 12 ذراع في 12 ذراع.
ورقم 12: هو رقم شعب الله.
3 في 4 ... المؤمنين بالثالوث في كل الاتجاهات الأربعة من الأرض. (شمال – جنوب – شرق – غرب.)
وأسباط العهد القديم ... 12 سبط. والكنيسة أتأسست في العهد الجديد ... علي الـ 12 تلميذ.
وكل اللي استفاد من ذبيحة الصليب هما أولاد الله. رقم 12.
علشان كده معلمنا يوحنا الرائي اللي شافهم في سفر الرؤيا: المختونين من كل سبط، وكان عددهم 144000 مختوم. يعني من كل سبط من الـ12 سبط، كان 12000 مختوم.
فأبعاد الموقد: الذي يُمثل الصليب، 12 في 12.
17 وَالْخُصْمُ أَرْبَعَ عَشَرَةَ طُولاً بِأَرْبَعَ عَشَْرَةَ عَرْضًا عَلَى جَوَانِبِهِ الأَرْبَعَةِ. وَالْحَاشِيَةُ حَوَالَيْهِ نِصْفُ ذِرَاعٍ، وَحِضْنُهُ ذِرَاعٌ حَوَالَيْهِ، وَدَرَجَاتُهُ تُجَاهَ الْمَشْرِقِ». "وَالْخُصْمُ"... اللي تحت الموقد.
لما يكون الموقد 12 ذراع طول و12 ذراع عرض، وفيه ذراع من هنا وذراع من هنا. فلازم تكون الدَرج اللي تحتها 14 ذراع x 14 ذراع. وده علشان تفضل مسافة الذراع، التي تُمثل ايد ربنا المفتوحة لينا من الناحيتين علي عود الصليب.
صورة توضيحية: رقم 17.. الخُصم الأكبر... طوله 14 ذراع في عرض 14 ذراع.
والحاشية أو السور ... ارتفاعه نص ذراع. لونها برتقالي، والحتة ديه هي اللي الكهنة بيتحركوا فيها، علشان يقدموا الذبيحة.
طبعا المقاييس ديه يصعُب تنفيذها عمليا، لأن صعب الكهنة يقفوا في حتة عرضها ذراع، ما يُعادل اقل من نص متر.
والسور اللي يحميهم، ارتفاعه نص ذراع، يعني حاجة وعشرين سم. فأكيد هيقعوا . وكأن الله بيعلن بتأكيد أن ديه أمور رمزية.
وفكرة أن السور ارتفاعه نص ذراع، يعني ... مهما كانت الحماية حوالينا، فاحنا لا نستطيع أن نُدرك عمل الله الفعلي. حماية ربنا أكبر بكتير مما نتخيل. قوة الصليب أكبر بكتير مما نعتقد. مش قادرين نوصل للبُعد الحقيقي. ولا قادرين نتخيل الوضع.
" وَدَرَجَاتُهُ تُجَاهَ الْمَشْرِقِ." ... دايما الصعود للمذبح من جهة الشرق.
القرون اللي فوق المذبح، رمز للقوة. قوة الصليب. "لأن كلمة الصليب عند الهالكين جهالة. أما عندنا نحن المُخلصين فهي قوة الله."
18 وَقَالَ لِي: «يَا ابْنَ آدَمَ، هكَذَا قَالَ السَّيِّدُ الرَّبُّ: هذِهِ فَرَائِضُ الْمَذْبَحِ يَوْمَ صُنْعِهِ لإِصْعَادِ الْمُحْرَقَةِ عَلَيْهِ وَلِرَشِّ الدَّمِ عَلَيْهِ: ربنا هيبدأ يقول لحزقيال النبي علي طقس تكريس المذبح.
"هذِهِ فَرَائِضُ الْمَذْبَحِ يَوْمَ صُنْعِهِ لإِصْعَادِ الْمُحْرَقَةِ عَلَيْهِ" ... طبعا المذبح ده جديد، ومواصفاته مختلفة، فليه طقس في التكريس.
" وَلِرَشِّ الدَّمِ عَلَيْهِ." ... لأن أساس المذبح بتاعنا، هو دم يسوع المسيح له المجد. وأن دم يسوع المسيح ابنه يطهرنا من كل خطية.
19 فَتُعْطِي الْكَهَنَةَ اللاَّوِيِّينَ الَّذِينَ مِنْ نَسْلِ صَادُوقَ الْمُقْتَرِبِينَ إِلَيَّ لِيَخْدِمُونِي، يَقُولُ السَّيِّدُ الرَّبُّ، ثَوْرًا مِنَ الْبَقَرِ لِذَبِيحَةِ خَطِيَّةٍ. هنا ربنا حدد مين اللي هيخدم علي المذبح ده، هما الكهنة واللاويين. (سبط لاوي في العهد القديم: هو سبط الكهنوت)
لكن هنا ربنا حدد أكتر،
"فَتُعْطِي الْكَهَنَةَ اللاَّوِيِّينَ الَّذِينَ مِنْ نَسْلِ صَادُوقَ الْمُقْتَرِبِينَ إِلَيَّ لِيَخْدِمُونِي،" ... كلمة صادوق: معناها البر. يعني ربنا بيقول: اللي يقرب علي مذبحي، مش مجرد أي واحد من سبط لاوي يكون كاهن. لكن اللي يقف علي مذبحي، لازم يكون من نسل صادوق. يعني عنده سلوك يُشير للمسيح القدوس له المجد. يقدر يقف قدام القدوس الذي بلا خطية.
فلازم اللي يقرب للمذبح يكون من نسل صادوق.. وديه فكرة الكهنوت في العهد الجديد، اللي قال عنها معلمنا بولس الرسول في رسالة العبرانيين "لا يأخذ أحد هذه الوظيفة من نفسه، الا المدعو من الله." ... نسل صادوق.
وهنشوف أن طقس تكريس المذبح، هيستمر لمدة 7 أيام. يعني اللي هنقوله، هيتكرر 7 أيام.
"يَقُولُ السَّيِّدُ الرَّبُّ، ثَوْرًا مِنَ الْبَقَرِ لِذَبِيحَةِ خَطِيَّةٍ." ... هيجيب ثور تقدمة، ذبيحة خطية.
20 وَتَأْخُذُ مِنْ دَمِهِ وَتَضَعُهُ عَلَى قُرُونِهِ الأَرْبَعَةِ، وَعَلَى أَرْبَعِ زَوَايَا الْخُصْمِ وَعَلَى الْحَاشِيَةِ حَوَالَيْهَا، فَتُطَهِّرُهُ وَتُكَفِّرُ عَنْهُ. القرون الأربعة تُمثل ... الصليب. دم المسيح يسوع له المجد سال علي خشبة الصليب.
ربنا بيقول لحزقيال النبي: طهر يا حزقيال الأربع زوايا. لأن دم المسيح له المجد اللي سال علي خشبة الصليب، طهر العالم كله.
صورة توضيحية: رقم 18.. رشم الدم علي الـ 4 قرون المذبح. وعلي الخُصم من الأربع جهات.
أصلا المذبح ده لسه مشتغلش، لسه في مرحلة التكريس، تكريس المذبح. طيب فين المكان اللي هيتدبح فيه ثور الخطية؟ 21 وَتَأْخُذُ ثَوْرَ الْخَطِيَّةِ فَيُحْرَقُ فِي الْمَوْضِعِ الْمُعَيَّنِ مِنَ الْبَيْتِ خَارِجَ الْمَقْدِسِ. " خَارِجَ الْمَقْدِسِ." ... المكان هيبقي بره المقدس خالص. هناك هيتقدم الثور ده، وهيتدبح .. لأن المسيح يسوع له المجد، قبل ما دمه يوصلنا، هو ذُبح خارج المحلة. خارج أورشليم. ودمه اللي خارج أورشليم، هو اللي طهر العالم كله.
ده كان أول يوم
22 وَفِي الْيَوْمِ الثَّانِي تُقَرِّبُ تَيْسًا مِنَ الْمَعْزِ صَحِيحًا ذَبِيحَةَ خَطِيَّةٍ، فَيُطَهِّرُونَ الْمَذْبَحَ كَمَا طَهَّرُوهُ بِالثَّوْرِ. "وَفِي الْيَوْمِ الثَّانِي"... نفس القصة هتتكرر تاني. بس بدل الثور، دلوقتي تيس من الماعز، ذبيحة الخطية.
وقولنا أن كل ذبائح العهد القديم، ماهي إلا رمز فقط لذبيحة العهد الجديد.
23 وَإِذَا أَكْمَلْتَ التَّطْهِيرَ، تُقَرِّبُ ثَوْرًا مِنَ الْبَقَرِ صَحِيحًا، وَكَبْشًا مِنَ الضَّأْنِ صَحِيحًا. " صَحِيحًا،" ... كل التقدمات والذبائح لازم تكون بلا عيب.
لأن الذبيحة إشارة للمسيح يسوع له المجد الذي بلا عيب. وكمان لأنها مقدمة الي الله، صاحب الكون، خالص الكل. طيب ازاي يبقي هو اللي خالق، وأديله حاجة وحشة؟
علشان كده ذبيحة الصلاة، لازم تكون بلا عيب.. ذبيحة الصوم، بلا عيب.. ذبيحة التسبيح، بلا عيب.
هيبقي في ذبيحة خطية، وذبيحة إثم. ... (في سفر اللاويين، موجود الفرق بين الذبيحتين. باختصار: نوع منهم يُمثل: معاملات الله والإنسان. يعني بأغلط في كسر وصية مباشرة. والنوع التاني: هو معاملات الأنسان مع الإنسان. سرقة – قتل – شهادة زور ...)
والمسيح يسوع ربنا له المجد، لما اتصلب : كان عن كل الخطايا، مش خطايا معينة. علشان كده يُقدم علي المذبح، ذبيحة الخطية وذبيحة الإثم.
24 وَتُقَرِّبُهُمَا قُدَّامَ الرَّبِّ، وَيُلْقِي عَلَيْهِمَا الْكَهَنَةُ مِلْحًا وَيُصْعِدُونَهُمَا مُحْرَقَةً لِلرَّبِّ. الملح: لازم يتحط ملح علي الذبيحة.
أولا: في العهد القديم، الملح كان وسيلة لعدم الفساد. والمسيح جسده لايري فسادا.
ثانيا: الملح بيفكرنا لما ربنا يسوع المسيح قال لأولاده "أنتم ملح الأرض" ... يعني من غيرنا العالم ملهوش طعم. احنا أولاد ربنا، اللي الناس تشوف فينا الريحة الحلوة والطعم الحلو والكلام الحلو.
معملنا بولس الرسول في رسالة كولوسي يقول: "لِيَكُنْ كَلاَمُكُمْ كُلَّ حِينٍ بِنِعْمَةٍ، مُصْلَحًا بِمِلْحٍ، لِتَعْلَمُوا كَيْفَ يَجِبُ أَنْ تُجَاوِبُوا كُلَّ وَاحِدٍ."
اذاً الذبيحة لازم يكون عليها ملح.
"وَيُصْعِدُونَهُمَا مُحْرَقَةً لِلرَّبِّ." ... وتقدموا الذبائح مُحرقة لربنا.
25 سَبْعَةَ أَيَّامٍ تَعْمَلُ فِي كُلِّ يَوْمٍ تَيْسَ الْخَطِيَّةِ. وَيَعْمَلُونَ ثَوْرًا مِنَ الْبَقَرِ وَكَبْشًا مِنَ الضَّأْنِ صَحِيحَيْنِ. زي ما اتفقنا التكريس بيستمر 7 أيام.26 سَبْعَةَ أَيَّامٍ يُكَفِّرُونَ عَنِ الْمَذْبَحِ وَيُطَهِّرُونَهُ وَيَمْلأُونَ يَدَهُ. "وَيَمْلأُونَ يَدَهُ." ... في ذبيحة في العهد القديم، كان اسمها ذبيحة الملء. وكلمة ملئ: يعني تكريس.
يعني بعد ما يتم الطقس ده لمده 7 أيام .. أصبح هذا المذبح مُكرس لخدمة ربنا فقط.
الطقس ده يستمر 7 أيام. ورقم 7 ... هو رقم الكمال. لأن ذبيحة الصليب هي الذبيحة الكاملة.
27 فَإِذَا تَمَّتْ هذِهِ الأَيَّامُ يَكُونُ فِي الْيَوْمِ الثَّامِنِ فَصَاعِدًا أَنَّ الْكَهَنَةَ يَعْمَلُونَ عَلَى الْمَذْبَحِ مُحْرَقَاتِكُمْ وَذَبَائِحَكُمْ السَّلاَمِيَّةَ، فَأَرْضَى عَنْكُمْ، يَقُولُ السَّيِّدُ الرَّبُّ». من اليوم التامن، تقدر تقدم الذبايح براحتك علي المذبح.
"فَأَرْضَى عَنْكُمْ،" ... اللي عايش 7 أيام، اللي هو زمان غربتنا علي الأرض، مُلتصق بربنا وبالذبيحة.
في اليوم التامن ... اللي هو يُشير للأبدية " فَأَرْضَى عَنْكُمْ، يَقُولُ السَّيِّدُ الرَّبُّ"
خليك مع ذبيحة الصليب... هي اللي هتودينا لليوم التامن.
"من لا يأكل جسدي ويشرب دمي. ليست له حياة أبدية."
اليوم التامن : هو إشارة للحياة الأبدية.
اذاً شوفنا في الاصحاح ده حاجتين:
- عودة مجد الله من باب المشرق. مُجدداً للهيكل.
- وشوفنا مواصفات المذبح الجديد.
والمذبح الجديد ده، ملهوش علاقة بمواصفات مذبح خيمة الاجتماع أو هيكل سُليمان خالص.
والمذبح الجديد ده، يصعُب تنفيذه كمقاييس عمليا. لكن كلها أمور روحية.
⪢