⪡ 1وَكَانَ إِلَيَّ كَلاَمُ الرَّبِّ قَائِلاً: في الاصحاح 37، اتكلم عن يوم القيامة. وازاي الأجساد اللي بقت عظام يابسة هتقوم بقوة إلهية. والبشر هيشوفوا مجد الله. وهيتعرفوا علي ربنا يسوع المسيح إلهنا الحقيقي. وهيبقي في الفرح الأبدي. والهلاك الأبدي للأشرار.
واتكلم عن تجميع الكنيسة كرعية واحدة لراعي واحد.
الاصحاحين 38و 39، بيتكلموا عن جوج وماجوج. وديه مذكورة كمان في سفر الرؤيا 20، واجتهد الآباء والمفسرين عبر التاريخ علشان يعرفوا ايه جوج وماجوج.
فالرأي المعتدل اننا منأخدش البلاد ديه كأنها بلاد حقيقية بأسمائها الحقيقية. لكن أخدوها بشكل روحي: أن ده الشيطان بكل جيوشه وعاوز يوقع مملكة ربنا يسوع المسيح له المجد، الكلام عن الحرب والاضطهاد ضد أولاد الله، ضد أورشليم الجديدة. لكن الطبيعي أن ربنا هو اللي هينتصر.
1 وَكَانَ إِلَيَّ كَلاَمُ الرَّبِّ قَائِلًا
ربنا كلم حزقيال النبي وقاله:
2«يَا ابْنَ آدَمَ، اجْعَلْ وَجْهَكَ عَلَى جُوجٍ، أَرْضِ مَاجُوجَ رَئِيسِ رُوشٍ مَاشِكَ وَتُوبَالَ، وَتَنَبَّأْ عَلَيْهِ اتذكر في سفر التكوين اصحاح 10: 1 -3. الأسماء ديه من أولاد يافث. واللي اتضاف هو اسم الشخص نفسه جوج.
والمنطقة اللي سكنها نسل يافث، منطقة ماجوج. كانت غالبا بين بحز قزوين والبحر الأسود. المنطقة ما بين البحرين، أُطلق عليها قديما: أرض ماجوج.
لكن مش شرط زي ما اتفقنا نكون بنتكلم عن المناطق ديه، لو أخدنا الموضوع من ناحية حرفية، هتكون أرض جوج وماجوج وماشك وتوبال، قد تكون المنطقة ديه حسب الخريطة. وفيها جزء من أسيا الصغري اللي هي تركيا حاليا.
3وَقُلْ: هكَذَا قَالَ السَّيِّدُ الرَّبُّ: هأَنَذَا عَلَيْكَ يَا جُوجُ رَئِيسُ رُوشٍ مَاشِكَ وَتُوبَالَ. الشخص ده الآراء كتير حواليه، واختلفت عليه:
1) الرأي الأول: شخصية حقيقية، بس مش لازم يكون ده الاسم الحقيقي. والشخصية ديه بترمز لأحد الملوك الدمويين. اللي هاجموا شعب ربنا بعد السبي. (لأن في الاصحاح ده حاليا الشعب مع حزقيال في السبي، وهيرجعوا لأورشليم بعد فترة انتهاء السبي اللي هما ال 70 سنة. وعندنا في الكتاب المقدس جزء بيتكلم عن الناحية التاريخية لشعب ربنا بعد السبي، وهو سفر المكابيين. فيه هنلاقي فعلا ملك دموي ويعتبر أعنف ملك تَعب اليهود قديما. واسمه: انطيوخوس (أو انطيوخس) أبيفانيوس. وده كان ملك يوناني. ودانيال النبي اتكلم عنه بوضوح. والملك ده بهدل اليهود ودنس الهيكل. وأسرة المكابيين بقيادة يهوذا المكابي حاربوا انطيوخوس الملك. وكانت نهاية الملك اليوناني ديه نهاية سيئة جدا. فقد يكون المقصود بالاسم ده هو الملك اليوناني انطيوخوس، اللي تعب شعب ربنا.
طيب ليه " أَرْضِ مَاجُوجَ رَئِيسِ رُوشٍ مَاشِكَ وَتُوبَالَ، وَتَنَبَّأْ عَلَيْهِ." ... ده لأنه كان جاي لهم من الاتجاه ده. ومقر كرسيه غالبا كان في انطاكية.
وده كان رأي، أن الموضوع خاص بالعهد القديم لشخصية دموية.
2) الرأي التاني: يقول أن النبوة ديه مش بتتكلم عن أي أحداث في العهد ا لقديم. لكن بما أننا بنتكلم عن أورشليم الجديدة. فالنبوة عن اضطهادات جاية علي الكنيسة في أخر الأيام. وقالوا أن الجزء ده اتكلم عنه سفر الرؤيا، واتذكرت الأسماء ديه. (وهنشوف سفر الرؤيا قال ايه بالظبط عن الموضوع ده.)
وبما أن روسيا في الموضوع، " جُوجُ رَئِيسُ رُوشٍ" ... بيقولوا أن روش هي روسيا.
" مَاشِكَ وَتُوبَالَ." ... دول مدن هناك. وقالوا أن ماشك بالتحديد هي موسكو.
" وَبَيْتَ تُوجَرْمَةَ" ... في اية 6، هي ألمانيا.
فبدوأ يأخدوا الأسماء ديه ويقولوا ديه حرب هتيجي من اتجاه روسيا في أخر الأيام. والحرب ديه هتكون واحدة من الآلامات اللي هتتعرض ليها الكنيسة في أخر الزمان، في فترة الحرب الصعبة الأخيرة.
3) الرأي التالت: هو الشكل العام، وبيقول أن الشخصية ديه بترمز لمملكة الشر عموما. الشيطان وأعوانه. لكل انسان هيمد ايده علي الكنيسة وشعب ربنا.
طيب ليه ذكر أسماء البلاد ديه؟ لأن ماشك وتوبال والمناطق ديه، مناطق وثنية في وقت كتابة النبوة. فاحنا بنتكلم عن ممالك الشر.. وهو ده المعني الأشمل: هو كل مملكة عدو الخير، اللي بتعمل ضد الكنيسة.
أيا كان الكلام علي مين، هنلاقي الآية " هأَنَذَا عَلَيْكَ يَا جُوجُ" ... ربنا هو اللي هيحارب، مش احنا خالص. يعني في الأخر "الحرب للرب" "ان كان الرب معنا، فمن علينا."
فلو الكلام علي انطيوخوس ابيفانيوس، هنلاقي في نبوة دانيال، اتقال عنه "وبلا يد ينكسر" ... لما يجي يموت، هيموت بكل جبروته ده. هيموت موتة شنيعة. بعيد عن الحرب أو أن حد يأذيه. ربنا هو اللي اتصرف معاه.
ولو الكلام عن الحرب ضد الكنيسة في أخر الأيام: ففي سفر الرؤيا هنلاقي أن المرأة التي تُمثل الكنيسة، يُقال عنها: أُعطيت جناحي النسر العظيم." وبعد كده راحت للبرية وربنا عالها هناك وسندها في البرية.
4وَأُرْجِعُكَ، وَأَضَعُ شَكَائِمَ فِي فَكَّيْكَ، وَأُخْرِجُكَ أَنْتَ وَكُلَّ جَيْشِكَ خَيْلاً وَفُرْسَانًا كُلَّهُمْ لاَبِسِينَ أَفْخَرَ لِبَاسٍ، جَمَاعَةً عَظِيمَةً مَعَ أَتْرَاسٍ وَمَجَانَّ، كُلَّهُمْ مُمْسِكِينَ السُّيُوفَ. " وَأُرْجِعُكَ،" ... ربنا بيقوله وأُرْجِعُكَ ... يعني ربنا هو اللي بيحدد له المسار اللي يمشي فيه، هو مش بيتحرك من نفسه.
"وَأَضَعُ شَكَائِمَ فِي فَكَّيْكَ،" ... زي ما بيربطوا الحيوان من فكه. وبيبقي ليه حدود يتحرك فيها، لأنه مربوط فمش هيقدر يعض حد أو يأذي حد الا اللي يدخله في حدوده.
وهو ده حال الشيطان النهاردة، مُقيد، ملهوش سلطان علينا. بس المشكلة اللي بتحصل لما احنا اللي بنروح له. فأكيد بيأذينا.
"وَأُخْرِجُكَ أَنْتَ وَكُلَّ جَيْشِكَ خَيْلًا وَفُرْسَانًا كُلَّهُمْ لاَبِسِينَ أَفْخَرَ لِبَاسٍ، جَمَاعَةً عَظِيمَةً مَعَ أَتْرَاسٍ وَمَجَانَّ، كُلَّهُمْ مُمْسِكِينَ السُّيُوفَ." ... شئ غريب أن الجيش اللي جاي يحارب. لابس أفخم ما عنده.
دايما كل ممالك الشر، بتحاول تظهر في أبهي وأحسن صورها. بتحاول يبقي منظرها الخارجي جميل، لكن شايلين في ايدهم أدوات الموت. كل شر وخطية كده، حلوة وبتلمع ومغرية. لكن عاقبتها الموت. لدغتها مُميتة. قاتلة.
5فَارِسَ وَكُوشَ وَفُوطَ مَعَهُمْ، كُلَّهُمْ بِمِجَنٍّ وَخُوذَةٍ، ربنا هنا بيتكلم عن الممالك ديه اللي هتتحد مع الشخص ده. وهيكونوا في حربهم ضد أولاد الله.
" فَارِسَ" ... هي إيران.
"كُوشَ" ... اثيوبيا.
" وَفُوطَ" ... ليبيا.
" كُلَّهُمْ بِمِجَنٍّ وَخُوذَةٍ،" ... ديه أدوات الحرب اللي كانوا بيستخدموها.
6وَجُومَرَ وَكُلَّ جُيُوشِهِ، وَبَيْتَ تُوجَرْمَةَ مِنْ أَقَاصِي الشِّمَالِ مَعَ كُلِّ جَيْشِهِ، شُعُوبًا كَثِيرِينَ مَعَكَ. " وَجُومَرَ" ... موجودة في تركيا، في الشرق.
" تُوجَرْمَةَ" ... في ارمنيا. (لكن الناس اللي بتقول أن روش هي روسيا، قالوا أن توجرمة هي ألمانيا.).
" مَعَ كُلِّ جَيْشِهِ، شُعُوبًا كَثِيرِينَ مَعَكَ." ... مش غريبة أن العالم كله يقف ضد أولاد الله. ولا حتي جديدة علينا لأن "العالم كله قد وُضع في الشرير."
وطبعا لو أخدناها أن الأمر رمزي مش فعلي: فهو يرمز لاتحاد كل قوي الشر. تحالف الشيطان ضدنا وضد الكنيسة. شوية بالاضطهادات وشوية بالهرطقات (انحرافات عقائدية) وهكذا.
7اِسْتَعِدَّ وَهَيِّئْ لِنَفْسِكَ أَنْتَ وَكُلُّ جَمَاعَاتِكَ الْمُجْتَمِعَةِ إِلَيْكَ، فَصِرْتَ لَهُمْ مُوَقَّرًا. ربنا بيقول للملك ده "اسْتَعِدَّ وَهَيِّئْ لِنَفْسِكَ أَنْتَ وَكُلُّ جَمَاعَاتِكَ الْمُجْتَمِعَةِ إِلَيْكَ، فَصِرْتَ لَهُمْ مُوَقَّرًا." ... كل العالم أعطي الوقار للملك ده. سواء كان انطيوخس (وفعلا الناس كانت بتدخل معاه في تحالفات). أو لو الكلام علي الشيطان فبيحصل برده. أو لو عن ضد المسيح في أخر الأيام، وده نقرأ عنه في سفر الرؤيا: أنه يجلس في هيكل الله. ومعلمنا بولس الرسول قال عنه "يجلس في هيكل الله. مُظهرا نفسه كا إله."
" فَصِرْتَ لَهُمْ مُوَقَّرًا." ... دايما الشيطان بيزين أولاده بالقوة والسلطة العالمية. علشان يقدر ينشر أفكاره.
8بَعْدَ أَيَّامٍ كَثِيرَةٍ تُفْتَقَدُ. فِي السِّنِينَ الأَخِيرَةِ تَأْتِي إِلَى الأَرْضِ الْمُسْتَرَدَّةِ مِنَ السَّيْفِ الْمَجْمُوعَةِ مِنْ شُعُوبٍ كَثِيرَةٍ عَلَى جِبَالِ إِسْرَائِيلَ الَّتِي كَانَتْ دَائِمَةً خَرِبَةً، لِلَّذِينَ أُخْرِجُوا مِنَ الشُّعُوبِ وَسَكَنُوا آمِنِينَ كُلُّهُمْ. ربنا بيقوله الوقار اللي هما أدهولك، ده وقار مؤقت.
" بَعْدَ أَيَّامٍ كَثِيرَةٍ تُفْتَقَدُ." ... ربنا بيقوله: أنا بقي اللي هأفتقدك. بس هيفتقده بالهلاك والعقاب. (لكن احنا ربنا افتقدنا بالخلاص. وبنصلي ونقول: افتقدنا بخلاصك.).
"فِي السِّنِينَ الأَخِيرَةِ تَأْتِي إِلَى الأَرْضِ الْمُسْتَرَدَّةِ مِنَ السَّيْفِ" ... الأرض المستردة من السيف، هي أرض أورشليم. اللي ربنا استردها من سيف نبوخذنصر. ورجع شعبه تاني لأورشليم.
وتُشير للكنيسة اللي ربنا استردها من سيف الشيطان، واقتناها بدمه بالصليب.
" الأَرْضِ الْمُسْتَرَدَّةِ" ... تمشي علي الكنيسة وعلي أورشليم.
" فِي السِّنِينَ الأَخِيرَةِ تَأْتِي إِلَى الأَرْضِ الْمُسْتَرَدَّةِ مِنَ السَّيْفِ الْمَجْمُوعَةِ مِنْ شُعُوبٍ كَثِيرَةٍ عَلَى جِبَالِ إِسْرَائِيلَ الَّتِي كَانَتْ دَائِمَةً خَرِبَةً، لِلَّذِينَ أُخْرِجُوا مِنَ الشُّعُوبِ وَسَكَنُوا آمِنِينَ كُلُّهُمْ." ... برده تمشي علي الكنيسة وعلي أورشليم.
- لأن اليهود كانوا اتفرقوا بين الشعوب. واتجمعوا تاني من السبي ورجعوا لأورشليم.
- وتنفع للكنيسة، اللي هي تجمع كل الشعوب والقبائل والأمم، من كل الألسنة.
9وَتَصْعَدُ وَتَأْتِي كَزَوْبَعَةٍ، وَتَكُونُ كَسَحَابَةٍ تُغَشِّي الأَرْضَ أَنْتَ وَكُلُّ جُيُوشِكَ وَشُعُوبٌ كَثِيرُونَ مَعَكَ. ربنا بيقول علي شكل الهجوم اللي هيعمله الملك ده وجيوشه.
" وَتَصْعَدُ وَتَأْتِي كَزَوْبَعَةٍ، وَتَكُونُ كَسَحَابَةٍ تُغَشِّي الأَرْضَ أَنْتَ وَكُلُّ جُيُوشِكَ وَشُعُوبٌ كَثِيرُونَ مَعَكَ." ... وكأنها سحابة مالية الأرض من التراب الله هتعمله الخيول والجيوش. وده كناية عن الأعداد الرهيبة اللي جاية تحارب.
10هكَذَا قَالَ السَّيِّدُ الرَّبُّ: وَيَكُونُ فِي ذلِكَ الْيَوْمِ أَنَّ أُمُورًا تَخْطُرُ بِبَالِكَ فَتُفَكِّرُ فِكْرًا رَدِيئًا، "أَنَّ أُمُورًا تَخْطُرُ بِبَالِكَ فَتُفَكِّرُ فِكْرًا رَدِيئًا،" ... يعني الكلام اللي هأقولهولك ده، أنت بتفكر فيه. لكن هو مش حقيقي. أنت بتحلم أصلا. ربنا بيقوله: أنا عارف أنت بتفكر في ايه. أنت بتقول أن الناس اللي هناك، سواء الكلام عن أورشليم أو الكنيسة. أن دول ناس عاملين زي " أَرْضٍ أَعْرَاءٍ." اية 11، يعني زي ناس ساكنين في الصحراء من غير سور. ولو أي حد هجم عليهم، ملهومش حماية.11وَتَقُولُ: إِنِّي أَصْعَدُ عَلَى أَرْضٍ أَعْرَاءٍ. آتِي الْهَادِئِينَ السَّاكِنِينَ فِي أَمْنٍ، كُلُّهُمْ سَاكِنُونَ بِغَيْرِ سُورٍ وَلَيْسَ لَهُمْ عَارِضَةٌ وَلاَ مَصَارِيعُ، " وَتَقُولُ: إِنِّي أَصْعَدُ عَلَى أَرْضٍ أَعْرَاءٍ." ... أرض ملهاش أي أسوار أو حماية.
" آتِي الْهَادِئِينَ السَّاكِنِينَ فِي أَمْنٍ، كُلُّهُمْ سَاكِنُونَ بِغَيْرِ سُورٍ وَلَيْسَ لَهُمْ عَارِضَةٌ وَلاَ مَصَارِيعُ،" ... ياجوج انت هتقول: دول ناس ضعيفة. ملهومش ضهر ولا حماية. وديه فرصة.
" عَارِضَةٌ " ... قطع خشبية هي القائمة العليا للباب، أو إحدى قائمتى الباب الجانبيتين، والمقصود أنه لا توجد أبواب للمدن.
" مَصَارِيعُ،" ... يعني الأبواب.
فربنا يقوله: أنت فاهم غلط، مين قالك انهم من غير أسوار، وملهومش حماية؟ ده أنا نفسي أكون ليهم سور وحماية.
زي في قصة أليشع النبي وتلميذه، والجيش اللي أحاط بالمدينة. أليشع كان لوحده ومعاه تلميذه، والتلميذ صرخ وقاله: احنا ضيعنا خلاص، ديه البلد كلها متحاوطة بجيش آرام، جيش الأعداء. فأليشع النبي صلي لربنا وقاله "افتح عيني الغلام. فيري أن اللذين معنا أكثر من اللذين علينا." وتلميذ أليشع شاف أن المدينة كلها متحاوطة بخيرل من نار ومركبات نارية. (2مل6).
كل واحد عاوز يمد ايده علي شعب وكنيسة ربنا، وفاكرأن الموضوع سهل. نقوله أنت فاهم غلط. احنا معانا وعد "ان أبواب الجحيم لنا تقوي عليها."
علشان كده ربنا قاله، ده في خيالك أنت بس. مش ديه الحقيقة. (اية 10).
كمان في أخر الأيام الحرب هتكون شديدة، ويعتقدون أنهم هيقدروا ، لكن في سفر الرؤيا هنلاقي ربنا جاهز. وربنا هيعرف يدبر المَخرج لأولاده. زي ما قال للملاك: حط سمة (علامة) علي جباه أولادي، واللي عليه السمة ديه، الضربة متجيش عليه.
حتي في أيام انطيوخس ابيفانيوس، المكاابييين واليهود اللي طالعين من مشاكل كتير، ومعندهوش أي امكانيات. لكن قدروا يقفوا قدام جيش انطيوخس الملك الدموي.
12لِسَلْبِ السَّلْبِ وَلِغُنْمِ الْغَنِيمَةِ، لِرَدِّ يَدِكَ عَلَى خِرَبٍ مَعْمُورَةٍ وَعَلَى شَعْبٍ مَجْمُوعٍ مِنَ الأُمَمِ، الْمُقْتَنِي مَاشِيَةً وَقُنْيَةً، السَّاكِنُ فِي أَعَالِي الأَرْضِ. الملك جوج جاي وشايف أن أولاد ربنا هيبقوا غنيمة في ايده. بس هو ميعرفش أن الهنا راعي صالح. وأولاده غنم مرعاه. مش غنيمة أبدا. ولو ضاع منهم خروف واحد بس، مش بيسيبه غير لما يرجعه لحضنه.
"السَّاكِنُ فِي أَعَالِي الأَرْضِ." ... الكلام ده علي أولاد ربنا. لأننا المفروض صحيح عايشين في الأرض، لكن مش ملتصقين بتراب الأرض وشهواتها.
أولاد الله الحقيقين عايشين في العالم، لكن العالم مش عايش فيهم. مرفوعين عن الأرض. عنينا مش علي الأرض خالص. عنينا دايما علي السما، علي ملكنا والهنا ربنا يسوع المسيح له المجد.
13شَبَا وَدَدَانُ وَتُجَّارُ تَرْشِيشَ وَكُلُّ أَشْبَالِهَا يَقُولُونَ لَكَ: هَلْ لِسَلْبِ سَلْبٍ أَنْتَ جَاءٍ؟ هَلْ لِغُنْمِ غَنِيمَةٍ جَمَعْتَ جَمَاعَتَكَ، لِحَمْلِ الْفِضَّةِ وَالذَّهَبِ، لأَخْذِ الْمَاشِيَةِ وَالْقُنْيَةِ، لِنَهْبِ نَهْبٍ عَظِيمٍ؟ " شَبَا وَدَدَانُ" ... دول قبائل عربية.
"وَتُجَّارُ تَرْشِيشَ" ... التُجار اللي كانوا بيتاجروا مع أسبانيا.
"وَكُلُّ أَشْبَالِهَا يَقُولُونَ لَكَ: هَلْ لِسَلْبِ سَلْبٍ أَنْتَ جَاءٍ؟ هَلْ لِغُنْمِ غَنِيمَةٍ جَمَعْتَ جَمَاعَتَكَ، لِحَمْلِ الْفِضَّةِ وَالذَّهَبِ، لأَخْذِ الْمَاشِيَةِ وَالْقُنْيَةِ، لِنَهْبِ نَهْبٍ عَظِيمٍ؟" ... كل الناس يطمعوا معاه. أصلها بالنسبة لهم فرصة. الكل مستني الغنيمة.
14«لِذلِكَ تَنَبَّأْ يَا ابْنَ آدَمَ، وَقُلْ لِجُوجٍ: هكَذَا قَالَ السَّيِّدُ الرَّبُّ: فِي ذلِكَ الْيَوْمِ عِنْدَ سُكْنَى شَعْبِي إِسْرَائِيلَ آمِنِينَ، أَفَلاَ تَعْلَمُ؟ قاله: واضح إنك متعرفش مني اللي بيدافع عن الناس ديه.
زمان قبل الصليب كان ممكن تقول عن البشرية، انها زي الخرابة. وكان الشيطان رايح جاي فيها. وكان بينهش في الناس. لكن دلوقتي الأمر اختلف بعد الصليب. دلوقتي ملكش سلطان خالص علي أولادي. أولادي جوة الحظيرة بتاعتي "ولا يستطيع أحد أن يخطفها مني."
" أَفَلاَ تَعْلَمُ؟" ... أنت متعرفش أنت عاوز تقف قدام مين. تقف في وش مين. أنت مسكين.
15وَتَأْتِي مِنْ مَوْضِعِكَ مِنْ أَقَاصِي الشِّمَالِ أَنْتَ وَشُعُوبٌ كَثِيرُونَ مَعَكَ، كُلُّهُمْ رَاكِبُونَ خَيْلاً، جَمَاعَةٌ عَظِيمَةٌ وَجَيْشٌ كَثِيرٌ. واضح ان الهجوم علي أرض اسرائيل. علي أرض ربنا.
والمفسرين اللي شايفين أن الكلام مرتبط بأخر الأيام، بيقولوا: اننا نقدر نفهم من العهد الجديد ومن سفر الرؤيا، أن مركز الحرب وقتها هتكون أورشليم، أرض إسرائيل. والكتاب المقدس قال: أن الوحش هيجلس "في هيكل الله مُظهرا نفسه كا إاله."
16وَتَصْعَدُ عَلَى شَعْبِي إِسْرَائِيلَ كَسَحَابَةٍ تُغَشِّي الأَرْضَ. فِي الأَيَّامِ الأَخِيرَةِ يَكُونُ. وَآتِي بِكَ عَلَى أَرْضِي لِكَيْْ تَعْرِفَنِي الأُمَمُ، حِينَ أَتَقَدَّسُ فِيكَ أَمَامَ أَعْيُنِهِمْ يَا جُوجُ. "حِينَ أَتَقَدَّسُ فِيكَ أَمَامَ أَعْيُنِهِمْ يَا جُوجُ." ... ربنا قاله كده.
فزي ما ربنا أهلك فرعون وجيوشه ومركباته في البحر الأحمر، طلع موسي النبي وشعبه بيسبحوا ربنا "من مثلك يارب معتزا في القداسة. يمينك يارب تمجدت بالقوة. يدك اليمني يا الهي أهلكت كل أعدائها."
وفرعون كان رمز للشيطان والشر. بعصاية موسي، بالصليب، يهلك فرعون.
"حِينَ أَتَقَدَّسُ فِيكَ أَمَامَ أَعْيُنِهِمْ يَا جُوجُ." ... يعني ايه ربنا يتقدس؟ يعني : ربنا يعلن غضبه علي الشر والخطية. الشر ضد القداسة. فبسبب الشر والخطية، أُعلن غضبي. فالأمم تعرف اني بأرفض الشر.
في سفر الرؤيا اصحاح 20:
آية 7 "الألف سنة" ... الحكم الألفي اللي بدأ من ساعة الصليب.
آية 8-9 ... "وأحاطوا بمعسكر القديسين وبالمدينة المحبوبة" ... أحاطوا بالمدينة المحبوبة، مدينة الملك العظيم.
آية 10 ... ابليس والوحش والنبي الكذاب، هيتطرحوا في بحيرة النار والكبريت. عذاب أبدي.
وفي سفر الرؤيا هنا اتذكر اسم جوج وأرضه ماجوج، مرة تانية. في الكتاب المقدس.
17« هكَذَا قَالَ السَّيِّدُ الرَّبُّ: هَلْ أَنْتَ هُوَ الَّذِي تَكَلَّمْتُ عَنْهُ فِي الأَيَّامِ الْقَدِيمَةِ عَنْ يَدِ عَبِيدِي أَنْبِيَاءِ إِسْرَائِيلَ، الَّذِينَ تَنَبَّأُوا فِي تِلْكَ الأَيَّامِ سِنِينًا أَنْ آتِيَ بِكَ عَلَيْهِمْ؟ ربنا بيقول لجوج: خد بالك كل خطوة أنت بتعملها، أنا خليت عبيدي الأنبياء يعرفوها. ويقولوها للناس.
من زمان من قبل ما أنت تيجي وتتولد ومن تحارب أصلا أولادي، أنا شايفك وكاشف خطتك.
علي فكرة كمان ربنا يسوع المسيح له المجد، قال لتلاميذه: أنا قولت لكم علي الأحداث اللي هتحصل، علشان لما تحصل تبقوا عارفيناها. وكمان قالهم: لما تشوفوا رِجسة الخراب التي تحدث عنها دانيال النبي (لأن دانيال النبي هو اللي اتكلم عن الأحداث ديه.) قائمة في الموضع المقدس "ليفهم القارئ." يعني أول ما الحداث ديه تحصل، افتكر أن النبوات قالت الكلام ده.
18وَيَكُونُ فِي ذلِكَ الْيَوْمِ، يَوْمَ مَجِيءِ جُوجٍ عَلَى أَرْضِ إِسْرَائِيلَ، يَقُولُ السَّيِّدُ الرَّبُّ، أَنَّ غَضَبِي يَصْعَدُ فِي أَنْفِي. "أَنَّ غَضَبِي يَصْعَدُ فِي أَنْفِي." ... يعبر الله عن شدة غضبه على جوج، الذي يهاجم أولاده، بأن غضب الله يصعد إلى أنفه، أي أن غضبه سيكون شديدًا وانتقامًا قويًا؛ لأن جوج تجاسر واعتمد على قوته؛ متغافلًا قوة الله، بل متحديًا له. 19وَفِي غَيْرَتِي، فِي نَارِ سَخَطِي تَكَلَّمْتُ، أَنَّهُ فِي ذلِكَ الْيَوْمِ يَكُونُ رَعْشٌ عَظِيمٌ فِي أَرْضِ إِسْرَائِيلَ. " رَعْشٌ" ... في نبوة العظام اليابسة قولنا: أن العظام حصل فيها رعشة. والرعشة وقتها كانت سبب أن العظام ديه اتجمعت مع بعض وقامت.
"أَنَّهُ فِي ذلِكَ الْيَوْمِ يَكُونُ رَعْشٌ عَظِيمٌ فِي أَرْضِ إِسْرَائِيلَ." ... فالأحداث الأخيرة تعمل رعشة في اسرائيل. بمعني أن النفوس اللي ماتت بالخطية، لما الأحداث ديه تحصل، والضيقات الأخيرة هتيجي: فالنفوس ديه تصحي وتفوق وتقدم توبة لربنا. يحصل رعش في اسرائيل. لأن عاية ربنا من الضيقات ديه: التوبة وخلاص أولاده.
وممكن تتفهم " يَكُونُ رَعْشٌ عَظِيمٌ فِي أَرْضِ إِسْرَائِيلَ." ... أن كل اللي هيحيطوا بالمدينة المحبوبة، لما يشوفوا غضب ربنا هيترعشوا من الخوف، ركبهم هتخبط في بعض ... "وَفِي غَيْرَتِي، فِي نَارِ سَخَطِي تَكَلَّمْتُ،".
وفي مفسرين قالوا قصة تالتة خالص، أن الرعش العظيم في اسرائيل: هي الزلزلة اللي اتحدث عنها سفر الرؤيا. اللي هيحصل في أخر الأيام.
20فَتَرْعَشُ أَمَامِي سَمَكُ الْبَحْرِ وَطُيُورُ السَّمَاءِ وَوُحُوشُ الْحَقْلِ وَالدَّابَّاتُ الَّتِي تَدُبُّ عَلَى الأَرْضِ، وَكُلُّ النَّاسِ الَّذِينَ عَلَى وَجْهِ الأَرْضِ، وَتَنْدَكُّ الْجِبَالُ وَتَسْقُطُ الْمَعَاقِلُ وَتَسْقُطُ كُلُّ الأَسْوَارِ إِلَى الأَرْضِ. الرعب والرعشة هتوصل لباقي المخلوقات والكائنات.
"وَكُلُّ النَّاسِ الَّذِينَ عَلَى وَجْهِ الأَرْضِ، وَتَنْدَكُّ الْجِبَالُ وَتَسْقُطُ الْمَعَاقِلُ وَتَسْقُطُ كُلُّ الأَسْوَارِ إِلَى الأَرْضِ." ...غضب ربنا هيكون عظيم في الأيام ديه.
" وَتَسْقُطُ الْمَعَاقِلُ وَتَسْقُطُ كُلُّ الأَسْوَارِ إِلَى الأَرْضِ." ... وده اللي خلي بعض المفسرين يقولوا أن الزلزلة ديه هتحصل، لدرجة أن الأسوار سقطت.
" وَتَسْقُطُ كُلُّ الأَسْوَارِ إِلَى الأَرْضِ." ... عاوزين كل أسوار أورشليم تسقط.
الزلزلة اتذكرت كمان في سفر الرؤيا 16: 18."فَحَدَثَتْ أَصْوَاتٌ وَرُعُودٌ وَبُرُوقٌ. وَحَدَثَتْ زَلْزَلَةٌ عَظِيمَةٌ، لَمْ يَحْدُثْ مِثْلُهَا مُنْذُ صَارَ النَّاسُ عَلَى الأَرْضِ، زَلْزَلَةٌ بِمِقْدَارِهَا عَظِيمَةٌ هكَذَا." ... وديه الرعش العظيم في اسرائيل. وهتحصل في اخر الأيام.
آية 19: "وصَارَتِ الْمَدِينَةُ الْعَظِيمَةُ ثَلاَثَةَ أَقْسَامٍ، وَمُدُنُ الأُمَمِ سَقَطَتْ، وَبَابِلُ الْعَظِيمَةُ ذُكِرَتْ أَمَامَ اللهِ لِيُعْطِيَهَا كَأْسَ خَمْرِ سَخَطِ غَضَبِهِ." ...المدينة العظيمة: اللي هي أورشليم.
وبابل العظيمة: رمز دايما للشر. علشان كده دايما بنتكلم عن مملكة الشر.عن عمل الشيطان وأعوانه.
إذا في ناس هتأخد الرعشة اللي في اسرائيل بمعني حرفي، أن ديه زلزلة فعلا.
واحنا هنأخدنا بمعني روحي: أن البني أدم يبدأ يترعش ويفوق ويقدم توبة. ويخاف من غضب ربنا. الروح القدس اللي جواه تهزه.
21وَأَسْتَدْعِي السَّيْفَ عَلَيْهِ فِي كُلِّ جِبَالِي، يَقُولُ السَّيِّدُ الرَّبُّ، فَيَكُونُ سَيْفُ كُلِّ وَاحِدٍ عَلَى أَخِيهِ. "فَيَكُونُ سَيْفُ كُلِّ وَاحِدٍ عَلَى أَخِيهِ." ... يعني هما اللي هيموتوا بعض. ويبقي شعب ربنا واقف يتفرج عليهم. "الرب يدافع عنكم وأنتم تصموتون."
وشوفنا ده كتير: شوفنا عمل ربنا مع شعبه وأولاده. مثلا مملكة أشور ضايقت شعب ربنا، جت بعدها مملكة بابل خلصت علي أشور. ومملكة فارس ومادي خلصوا علي بابل. وهكذا.
22وَأُعَاقِبُهُ بِالْوَبَإِ وَبِالدَّمِ، وَأُمْطِرُ عَلَيْهِ وَعَلَى جَيْشِهِ وَعَلَى الشُّعُوبِ الْكَثِيرَةِ الَّذِينَ مَعَهُ مَطَرًا جَارِفًا وَحِجَارَةَ بَرَدٍ عَظِيمَةً وَنَارًا وَكِبْرِيتًا. الضربات ديه مكتوبة ف سفر الرؤيا. معظم الضربات ديه في سفر الرؤيا.
وده اللي بيخلي بعض المفسرين يميلوا الي أحداث نهاية الأيام. وكمان الضربات ديه حصلت للمصريين في زمن موسي النبي، ضربات المصريين.
" وَحِجَارَةَ بَرَدٍ عَظِيمَةً" ... عبارة عن كورات من التلج، زي الحجارة. وبتقتل أي حد تقع عليه
23فَأَتَعَظَّمُ وَأَتَقَدَّسُ وَأُعْرَفُ فِي عُيُونِ أُمَمٍ كَثِيرَةٍ، فَيَعْلَمُونَ أَنِّي أَنَا الرَّبُّ. في النهاية، هما جيوش كتير وعندهم أسلحة. بس الغلبة في النهاية لربنا له المجد.
من خلال كل هذه الضربات تعرف الأمم قوة الله التي تفوق كل الآلهة الوثنية، فيروا عظمة الله لعلهم بهذا ينجذبون إلى الإيمان به، ويتركون عبادة الأوثان، أو كل أفكارهم الشريرة.
⪢