⪡ 1كَانَتْ عَلَيَّ يَدُ الرَّبِّ، فَأَخْرَجَني بِرُوحِ الرَّبِّ وَأَنْزَلَنِي فِي وَسْطِ الْبُقْعَةِ وَهِيَ مَلآنَةٌ عِظَامًا، تقريبا أشهر اصحاحات سفر حزقيال. وبيتكلم عن رؤيا كبيرة من الرؤي الي رأها حزقيال النبي، وهي رؤيا العظام اليابسة. ويعتبر تقريبا أشهر اصحاح في العهد القديم كله.
سفر حزقيال فيه 4 رؤي كبيرة: الرؤيتين الأولين للدينونة. والرؤيتين التانيين للشفاء والبركة والتعزية.
* الرؤيا الأولي: شِبه مجد الرب. اصحاح 1 و 2. وشوية من اصحاح 10.
* الرؤيا التانية: لما ربنا أخد حزقيال علشان يوريه النجاسات والرجاسات في الهيكل وفي أورشليم. من اصحاح 8 لـ 11.
ودول كانوا الرؤيتين الكبار للدينونة.
* الرؤيا التالتة: كانت للشفاء. رؤيا العظام اليابسة.
* الرؤيا الرابعة: رؤيا الهيكل الجديد. وده أخر 9 اصحاحات في حزقيال.
رؤيا العظام اليابسة: رؤيا مشهورة جدا في كنيستنا القبطية الأرثوذكسية. وكمان في الكنائس الأخرى وعند اليهود كمان. (في الكنيسة الكاثوليكية: بيصلوها في المعمودية في فترة الصوم. بيقروا الرؤيا ديه، رؤية العظام اليابسة.
عند اليهود: في أسبوع اسمه أسبوع البصخة، بيحتفلوا فيه بالبصخة وعبورهم البحر الأحمر وخروجهم من مصر. فبيقروا في يوم السبت اللي في أسبوع البصخة، من الجزء النبوي اللي بيتقري من أسفار الأنبياء، الاصحاح بتاع العظام اليابسة. إذا اليهود بيقروه يوم السبت الواقع في أسبوع البصخة، علشان يقولوا: اننا فرحانين بالخلاص. وأن في حياة جديدة.
في كنيستنا الأرثوذكسية: بنقراه في النبوة الموجودة في الجناز العام، بعد قداس أحد الشعانين. وده ليه مخزي كبير عندنا: اننا بنؤمن بقيامة الأموات وحياة الدهر الآتي.
وعلي فكرة كتير جدا من آباء الكنيسة، خدوا الرؤيا ديه علي أنها بتوضح جدا قيامة الأموات. يعني اللي عاوز يشوف قيامة الأموات هتم ازاي، يقرأ حزقيال 37.
وكمان ربطوا بينها وبين قيامة ربنا يسوع المسيح له المجد في متي 27، هنلاقي أن في قيامة المسيح حصل زلزلة. والقبور تفتحت، وقام كثير من الراقدين، ودخلوا المدينة.
لأن في حزقيال 37، برده حصل زلزلة. وربنا قالهم "هأنذا أفتح قبوركم" يعني القبور تنفتح. وربنا قالهم "أصعدكم من قبوركم يا شعبي. وأدخلكم الي أرضكم)
الرؤيا ديه جميلة وحلوة أوي ومليانة (دسمة). فبقت مجال لتأملات كتيرة من الآباء. مثلا تُشير:
- لعودة اسرائيل من السبي.
- لقيامة الأموات.
- قيامة كنيسة العهد الجديد من كل الأمم والقبائل.
- قيامة الخاطئ. لأن الخاطئ ده ميت. وقد يكون وصل لدرجة من الفساد والنتانة في الموت والخطية. فاللي ليه نصيب في التوبة، مش هيموت الموت التاني. اللي هو الهلاك الأبدي.
- أن في أوقات اليأس والشدة والضيق والحزن. لما الدنيا تقفل خالص. واليأس هيضيعك. اقرأ اصحاح 37، أن بعد ما العظام كانت يابسة خالص. صارت جيش عظيم جدا. يعني في أمل ورجاء.
- لعودة اسرائيل في نهاية الدهور.
يعني الرؤيا ديه مجال لتأملات كتيرة. لكن هنا هنركز علي اتنين منهم، عودة اسرائيل من السبي. وتاني حاجة قيامة الأموات.
الرؤيا نفسها تنقسم لقسمين:
1) من آيات 1 لـ 10. ديه الرؤيا نفسها.
2) من آيات 11 لـ 14. ده تفسير وشرح الرؤيا.
هنلاقي كتير في الرؤيا موجود: الريح – الروح – العظام - تنبأ - يُحيي.
1 كَانَتْ عَلَيَّ يَدُ الرَّبِّ، فَأَخْرَجَني بِرُوحِ الرَّبِّ وَأَنْزَلَنِي فِي وَسْطِ الْبُقْعَةِ وَهِيَ مَلآنَةٌ عِظَامًا،
" كَانَتْ عَلَيَّ يَدُ الرَّبِّ،" ... يد الرب: تعبير اشتهر بيه سفر حزقيال. معناه: في قوة شديدة هيأخدها حزقيال النبي دلوقتي. لأنه هيشوف رؤيا عظيمة. لان حزقيال مينفعش يشوفها كده، لازم قوة تخليه يتحمل ما سيراه.
اتذكر في سفر حزقيال 4 مرات. وخارج سفر حزقيال 3 مرات.
في سفر حزقيال: - في رؤيا شِبه مجد الرب - رؤيا لما ربنا أخده الهيكل، اصحاح 8 – وهنا في رؤيا العظام اليابسة، اصحاح 37 هنا. – وهتتذكر في رؤيا الهيكل في اصحاح 40.
وبره سفر حزقيال 3 مرات: مرة في سفر اشعياء. – ومرة في سفر ارميا. – ومرة مع اليشع النبي في ملوك التاني اصحاح 3.
"الْبُقْعَةِ" ... هنا جت مُعرفة، لأنها اتذكرت قبل كده في اصحاح 3.
البقعة: كانت حتة منخفضة كبيرة أوي مُحاطة بالجبال حواليها. وكانت مليانة عظام.
" فَأَخْرَجَني بِرُوحِ الرَّبِّ وَأَنْزَلَنِي فِي وَسْطِ الْبُقْعَةِ وَهِيَ مَلآنَةٌ عِظَامًا." ... قوة ربنا خرجت حزقيال النبي وأخدته أو نزلته للبقعة ديه، وكان المكان ديه مليان عظام.
2وَأَمَرَّنِي عَلَيْهَا مِنْ حَوْلِهَا وَإِذَا هِيَ كَثِيرَةٌ جِدًّا عَلَى وَجْهِ الْبُقْعَةِ، وَإِذَا هِيَ يَابِسَةٌ جِدًّا. ربنا قاله تعالي هأعملك جولة في البقعة ديه، وخلاني أمر حواليها. وده لأن ربنا عاوز حزقيال يشوف ايه اللي موجود هناك.
"وَإِذَا هِيَ كَثِيرَةٌ جِدًّا عَلَى وَجْهِ الْبُقْعَةِ، وَإِذَا هِيَ يَابِسَةٌ جِدًّا." ... حزقيال راح للبقعة، وشاف عظام كتير ملهاش عدد. والعضم ده ليه صفتين:
1) عضم كتير جدا ... " وَإِذَا هِيَ كَثِيرَةٌ جِدًّا".
2) عضم ناشف جدا، يعني مش حاجة لسه فريش دلوقتي. لكن ده ميت من زمان، فبقي يابس جدا ... " وَإِذَا هِيَ يَابِسَةٌ جِدًّا.".
القديس امبروسيوس يقول: اشمعنا حزقيال شاف الرؤيا ديه؟ ما كان ممكن ربنا يقّوم العظام ديه من غير ما حزقيال يشوفها.
لكن القديس يقول: أن حزقيال أصبح شاهد عيان. ومحدش يقدر ينكر بعد كده قيامة الأموات. حزقيال شاف الرؤيا ديه قبل السيد المسيح له المجد ب 600 سنة.
معلومة: أن الناس لما تموت، بيجمعوا العضم ده كل فترة ويحطوه في حتة اسمها معضمة. وكل العضم بيتلخبط مع بعض. عضم كل الناس متلخبط. فعاوز يقول أن مفيش أمل.
3فَقَالَ لِي: «يَا ابْنَ آدَمَ، أَتَحْيَا هذِهِ الْعِظَامُ؟» فَقُلْتُ: «يَا سَيِّدُ الرَّبُّ أَنْتَ تَعْلَمُ». السؤال المشهور: ربنا بيسأل حزقيال، أن العضم ده كتير أوي، هل ممكن تحيا العظام ديه من تاني؟
" يَا ابْنَ آدَمَ،" ... وطبعا ده التعبير المشهور لسفر حزقيال، لئلا يرتفع من فرط الإعلانات اللي بيشوفها. فربنا دايما بيفكره انه لسه انسان. لسه في الجسد.
"فَقُلْتُ: يَا سَيِّدُ الرَّبُّ أَنْتَ تَعْلَمُ." ... يعني أنت الخالق يارب. وجبلت الأنسان من العدم. فأنت يارب اللي تستطيع أن تُحيي هذه العظام مرة تانية. لكن من جهة البشر ده غير مستطاع.
وكأن سؤال ربنا " أَتَحْيَا هذِهِ الْعِظَامُ؟" ... معناه أن في باب أمل.
4فَقَالَ لِي: «تَنَبَّأْ عَلَى هذِهِ الْعِظَامِ وَقُلْ لَهَا: أَيَّتُهَا الْعِظَامُ الْيَابِسَةُ، اسْمَعِي كَلِمَةَ الرَّبِّ: طيب يارب ده عضم. يارب هو حزقيال هيتكلم مع العضم؟ ثم ده يارب عضم يابس، مفيش منه رجاء.
"وَقُلْ لَهَا: أَيَّتُهَا الْعِظَامُ الْيَابِسَةُ، اسْمَعِي كَلِمَةَ الرَّبِّ." ... كأن ربنا بيقول لحزقيال، قول الكلام ده ورايا. زي مثلا لما بيحصل في المعمودية. أبونا يقول صلاة جحد الشيطان، جملة جملة. والأم تعيد وتقول وراء أبونا.
فحزقيال مثال للخادم المُطيع جدا.
5هكذَا قَالَ السَّيِّدُ الرَّبُّ لِهذِهِ الْعِظَامِ: هأَنَذَا أُدْخِلُ فِيكُمْ رُوحًا فَتَحْيَوْنَ. ديه الخلاصة. وبعدين هيقولنا التفاصيل في الآية اللي بعدها.
" هأَنَذَا أُدْخِلُ فِيكُمْ رُوحًا فَتَحْيَوْن." ... وديه هي الخلاصة.
6وَأَضَعُ عَلَيْكُمْ عَصَبًا وأَكْسِيكُمْ لَحْمًا وَأَبْسُطُ عَلَيْكُمْ جِلْدًا وَأَجْعَلُ فِيكُمْ رُوحًا، فَتَحْيَوْنَ وَتَعْلَمُونَ أَنِّي أَنَا الرَّبُّ». "رُوحًا" ... كلمة روح في الاصحاح ده: الروح في العبري ليها أكتر من ترجمة. ممكن تترجم بمعني: الريح – أو روح الانسان – ولما تُنسب لي الله، فهي روح الله.
فحزقيال في الاصحاح ده استخدمها علي ال 3 معاني دول. نوّع في الاستخدام بكل الطرق.
"وَأَضَعُ عَلَيْكُمْ عَصَبًا وأَكْسِيكُمْ لَحْمًا وَأَبْسُطُ عَلَيْكُمْ جِلْدًا وَأَجْعَلُ فِيكُمْ رُوحًا،" ... الحتة ديه بتفكرنا لما قال السيد المسيح له المجد في يوحنا 5 : "تأتي ساعة فيها يسمع... في القبور صوته (وده يوضح أن العضم طلع بيسمع، لأنه صوت ابن الله.) ... قيامة الدينونة.".
فده نفس فكرة العضم هنا في سفر حزقيال في رؤيته، أن العضم سمع. فديه فكرة عن اللي هيحصل في أخر الدهور، في القيامة من الأموات.
فكرة القيامة هتم ازاي؟ هو كان عضم. العضم هيبتدي يتجمع. كل عضم إنسان هيتجمع مع بعض. فرجع هيكل عظمي تاني. طيب وبعد كده؟
"وَأَضَعُ عَلَيْكُمْ عَصَبًا" ... الترجمة بالعربي مكتوبة، عصب. لكن بالإنجليزي مترجمة: الوتر. وفي العبري: الكلمة ديه تحمل معني، الوتر أو العصب أو الوريد.
بس هي تمشي أكتر الوتر. لأن اللي هيتجمع هنا هو الترتيب عكس ما الانسان اتحلل. (الإنسان بيتحلل: الأول بيتحط في التراب، فأول حاجة بتتحلل هي الجلد. وبعدين العضلات. وبعدين الأوتار، أوتار العضلات. ومعروف أن الأوتار هي أخر حاجة بتتحلل قبل العضم. وكمان الشعر والضوافر. دول برده أخر حاجة بتتحلل قبل العضم.). فلما يرجعوا، يرجعوا بعكس الترتيب. العضم يتجمع الأول وبعدين الأوتار، وبعدين العضلات وفي الأخر الجلد.
والأوتار: هي اللي بتمسك العضلات في العضم. وبكده يكون الجهاز العضلي اتكون.
"وأَكْسِيكُمْ لَحْمًا وَأَبْسُطُ عَلَيْكُمْ جِلْدًا" ... وفوق الجهاز العضلي، ربنا يكسي اللحم وعليه الجلد. وبكده يكون انسان نايم. بس لسه مفيهوش روح.
" وَأَجْعَلُ فِيكُمْ رُوحًا،" ... فربنا في الأخر يحط فيهم روح.
الرؤيا ديه بتقولنا أن المستحيل ممكن يحصل. أصل قيامة الأموات حاجة مستحيلة بالنسبة للبشر. "لكن الغير مستطاع عند الله."
في القيامة: هنقوم بجسد مُمجد. الجسد هيتحد بالروح اللي فارقته، ويقوم مرة تاني بجسد نوراني مُمجد. يعني مليان مجد.
7فَتَنَبَّأْتُ كمَا أُمِرتُ. وَبَيْنَمَا أَنَا أَتنَبَّأُ كَانَ صَوْتٌ، وَإِذَا رَعْشٌ، فَتَقَارَبَتِ الْعِظَامُ كُلُّ عَظْمٍ إِلَى عَظْمِهِ. "فَتَنَبَّأْتُ كمَا أُمِرتُ." ... حزقيال عمل بالظبط اللي قالهوله ربنا.
"وَبَيْنَمَا أَنَا أَتنَبَّأُ كَانَ صَوْتٌ،" ... وهو عمال يتنبأ علي العظام، ويقولهم: اسمعوا كلمة ربنا (اية 4).
"وَإِذَا رَعْشٌ،" ... رعش: يعني رعد – اهتزاز - ارتجاف. في نفس الوقت اللي كان بيتنبأ فيه علي العظام، وبيقولهم اسمعوا كلمة ربنا. حصل رعد. ونفس الرعد حصل برده في حزقيال 3: 13.
"فَتَقَارَبَتِ الْعِظَامُ كُلُّ عَظْمٍ إِلَى عَظْمِه." ... فشاف حزقيال أن العضم بيقرب من بعضه. عضم كل شخص بيتجمع مع بعضه. ومحدش يشيل هم أن ازاي عضم كل شخص هيتعرف علي بعضه. ديه مش مشكلتنا. مشكلتنا الوحيدة اننا نتوب ونبقي مستعدين.
8ونَظَرْتُ وَإِذَا بِالْعَصَبِ وَاللَّحْمِ كَسَاهَا، وبُسِطَ الْجِلْدُ علَيْهَا مِنْ فَوْقُ، وَلَيْسَ فِيهَا رُوحٌ. رجع تاني كأنه لسه انسان ميت. كله متكون مع بعض. فاضل بس الروح. يعني بقي جسد من غير روح.
نأخد بالنا أن القيامة ديه حصلت علي مرحلتين. وكمان فتح القبور اللي لسه هنشوفها في أخر الجزء ده، حصل برده علي مرتين.
وكأن حزقيال بيرجعنا لي خلقة أدم. ربنا جلب أدم، وبعدين نفخ فيه نسمة الحياة. ** وهو ده نفسه اللي حصل هنا. وكأن حزقيال بيقولنا أن اللي خلق في الأول لا يعثر عليه أن يخلق في الأخر.
9فَقَالَ لِي: «تَنَبَّأْ لِلرُّوحِ، تَنَبَّأْ يَاابْنَ آدَمَ، وَقُلْ لِلرُّوحِ: هكذَا قَالَ السَّيِّدُ الرَّبُّ: هَلُمَّ يَا رُوحُ مِنَ الرِّيَاحِ الأَرْبَعِ وَهُبَّ عَلَى هؤُلاَءِ الْقَتْلَى لِيَحْيَوْا». " فَقَالَ لِي: تَنَبَّأْ لِلرُّوحِ، تَنَبَّأْ يَا ابْنَ آدَمَ،" ... ربنا قاله تنبأ مرتين، علشان حزقيال يركز مع ربنا.
"وَقُلْ لِلرُّوحِ: هكذَا قَالَ السَّيِّدُ الرَّبُّ: هَلُمَّ يَا رُوحُ مِنَ الرِّيَاحِ الأَرْبَعِ" ... من الرياح الأربعة: اشمعنا من الرياح الأربعة؟ لأنه جيش من العضم. يعني روح الانسان اللي فارقت جسده، ستحضر مرة تانية بقوة روح الله.
"وَهُبَّ عَلَى هؤُلاَءِ الْقَتْلَى لِيَحْيَوْا." ... هؤلاء القتلي: ممكن نأخدها قتلي، لأنهم وقعوا تحت دينونة الله. وبقوا في حُكم القتلي في المحكمة الإلهية.
وساعات بتتأخد الحتة ديه بجانب روحي، وأنه تم علي مرحلتين: في الأول أخدنا سر المعمودية. وبعدين نأخد الروح القدس في الميرون.
"وَهُبَّ" ... ديه نفسها موجودة في سفر التكويين2 : 7 "ونفخ الرب الاله في أدم.".
10فَتَنَبَّأْتُ كَمَا أَمَرَني، فَدَخَلَ فِيهِمِ الرُّوحُ، فَحَيُوا وَقَامُوا عَلَى أَقدَامِهِمْ جَيْشٌ عَظيمٌ جِدًّا جِدًّا. نتخيل منظر عجيب: بحر من العضم – وبعدين في زلزلة ورعش أو رعد. والعضم كله عمال يتحرك. حتي بيقولوا مش عارفين الصوت العظيم اللي جاي، ده جاي من صوت الزلزلة ولا من صوت العضم اللي بيتحرك. وبعدين جائت الروح من الرياح الأربع. وكل روح دخلت في جسدها، بقوة روح الله اللي عمل كل ده.
"وَقَامُوا عَلَى أَقدَامِهِمْ جَيْشٌ عَظيمٌ جِدًّا جِدّا." ... ليه جدا، اتقالت مرتين؟ أصل اتقال في الأول أن العضم ده يابس جدا. وبعدين قال كتير جدا. فأصبح العضم اليابس جدا وكتير جدا ... اترد عليه ب " جَيْشٌ عَظيمٌ جِدًّا جِدّا.".
11ثُمَّ قَالَ لِي: «يَا ابْنَ آدَمَ، هذِهِ العِظَامُ هِيَ كُلُّ بَيتِ إِسْرَائِيلَ. هَا هُمْ يَقُولُونَ: يَبِسَتْ عِظَامُنَا وَهَلَكَ رَجَاؤُنَا. قَدِ انْقَطَعْنَا. هنا شرح الرؤيا: " ثُمَّ قَالَ لِي: يَا ابْنَ آدَمَ، هذِهِ العِظَامُ هِيَ كُلُّ بَيتِ إِسْرَائِيلَ." ... يعني اللي كانوا في السبي، ولا اللي اتبهدلوا و اتشتتوا في الأمم، ولا إيه بالظبط؟ ... اللي هتوضح الحتة ديه، لما في الأخر هيقول: اتحاد المملكتين. فعاوز يقول أن بيت اسرائيل هي المملكتين الشمالية والجنوبية. كل الشعب مع بعض.
"هَا هُمْ يَقُولُونَ: يَبِسَتْ عِظَامُنَا" ... كل بيت إسرائيل بيقولوا: يَبِسَتْ عِظَامُنَا يعني مبقاش فيه أي أمل. انقطع الأمل. مبقاش فينا قوة ولا حيوية ولا رجاء خالص.
"وَهَلَكَ رَجَاؤُنَا." يَبِسَتْ عِظَامُنَا مبقاش في أي رجاء انهم يرجعوا من الشتات اللي كانوا فيه. لأنهم كانوا متشتتين في كل حتة. لكن طبعا ربنا عنده امكانية حدوث ما لم يخطر علي بال انسان.
"قَدِ انْقَطَعْنَا " ... معناها: يعني خلاص هَلكنا. مبقناش موجودين في أرض الحياة. مبقاش فينا أي أمل أو رجاء.
12لِذلِكَ تَنَبَّأْ وَقُلْ لَهُمْ: هكذَا قَالَ السَّيِّدُ الرَّبُّ: هأَنَذَا أَفتَحُ قُبُورَكُمْ وأُصْعِدُكُمْ مِنْ قُبُورِكُمْ يَا شَعْبِي، وَآتِي بِكُمْ إِلَى أَرْضِ إِسْرَائِيلَ. نفس الرؤيا بس بطريقة تانية: ... يا شعبي: خلاص بقينا شعب ربنا.
"وَآتِي بِكُمْ إِلَى أَرْضِ إِسْرَائِيلَ." ... لأن المعني الحرفي: أن المسبيين اللي ملهومش أمل في الرجوع، هيرجعوا تاني لأرض إسرائيل.
لكن جمال وعظمة وقوة وعمق الرؤيا، متتأخدش علي المعني الحرفي. لكن ليها أفاق أعمق بكتير.
" وأُصْعِدُكُمْ مِنْ قُبُورِكُمْ" ... تفكرنا بالخروج من أرض مصر. أرض العبودية، ويعدوا البحر الأحمر، وبعدين خرجوا من مصر. واللي مكانش في أمل اننا نقوم من الأموات، هتُفتح القبور. وكل الراقدين علي رجاء القيامة هيقوموا. حينما يتكلم الله.
" وَآتِي بِكُمْ إِلَى أَرْضِ إِسْرَائِيلَ." ... احنا طبعا مش متسنيين اننا نروح أرض إسرائيل، لكن مستنيين أورشليم السمائية. الحياة الأبدية. مسكن الله مع الناس. ساعدنا يارب نكون مستعدين من دلوقتي.
13فَتَعْلَمُونَ أَنِّي أَنَا الرَّبُّ عِنْدَ فَتْحِي قُبُورَكُمْ وَإِصْعَادِي إِيَّاكُمْ مِنْ قُبُورِكُمْ يَا شَعْبِي. " يَا شَعْبِي." ... اتقالت هنا مرة تاني.
لما ربنا يفتح لنا القبور، هيقولنا "تعالوا اليا يا مباركي أبي، رثوا المُلك المُعد لكم منذ تأسيس العالم." وهي ديه الحياة الأبدية. وفي الأبدية هنقعد نعرف ربنا أكتر وأكتر، وهنعرفه للأبد. "هذه هي الحياة الأبدية، أن يعرفوك أنت الاله الحقيقي وحدك. ...."
علشان كده ربنا بيقول "فتَعْلَمُونَ" ... لما أفتح قبورك وأصعدكم، وتجولي السماء. وقتها هتعرفوا اني انا ربنا.
14وأَجْعَلُ رُوحِي فِيكُمْ فتَحْيَوْنَ، وَأَجْعَلُكُمْ فِي أَرْضِكُمْ، فَتَعْلَمُونَ أَنِّي أنَا الرَّبُّ تَكَلَّمْتُ وَأَفْعَلُ، يَقُولُ الرَّبُّ». هندخل السماء ونبقي أحياء، بروح الله للأبد. وتبقي السماء بتاعتنا. وده من جمال ربنا معانا.
"فَتَعْلَمُونَ أَنِّي أنَا الرَّبُّ تَكَلَّمْتُ وَأَفْعَلُ، يَقُولُ الرَّبّ." ... أوعي يكون عندك شك في قيامة الأموات، أو أن الله ستفتح القبور.
إذا كنت واثق في كلام ربنا ده، ينطبق عليك "أما الصّديق فواثق عند موته." هيقول لربنا واثق في كل كلامك يارب. وواثق إنك تُحيي العظام اليابسة. وإنك تفتح القبور. وإنك تُصعدنا معك للسماء.
15وَكَانَ إِلَيَّ كَلاَمُ الرَّبِّ قَائِلاً: هنا هيبتدي الجزء التاني.... ربنا كلم حزقيال وقاله:16«وَأَنْتَ يَا ابْنَ آدَمَ، خُذْ لِنَفْسِكَ عَصًا وَاحِدَةً وَاكْتُبْ عَلَيْهَا: لِيَهُوذَا وَلِبَنِي إِسْرَائِيلَ رُفَقَائِهِ. وَخُذْ عَصًا أُخْرَى وَاكْتُبْ عَلَيْهَا: لِيُوسُفَ، عَصَا أَفْرَايِمَ وَكُلِّ بَيْتِ إِسْرَائِيلَ رُفَقَائِهِ. في بداية سفر حزقيال، ربنا خلاه يعمل أن يمثل حاجات كتيرة. مرة يحلق شعره. ومرة ينام علي جنبه اليمني وشوية علي جنبه الشمال.
هنا برده ربنا طلب منه يعمل حاجة علشان عاوز ربنا يوصل معلومة للناس ديه.
"وَأَنْتَ يَا ابْنَ آدَمَ، خُذْ لِنَفْسِكَ عَصًا وَاحِدَةً وَاكْتُبْ عَلَيْهَا: لِيَهُوذَا وَلِبَنِي إِسْرَائِيلَ رُفَقَائِهِ." ... يعني كأنه هيجيب عصايتين. ربنا هيخلي حزقيال يمسك العصايتين، وكأنها عصاية واحدة. وهيوري للناس أن العصايتين بقوا عصاية واحدة. والناس فهمت أن ربنا عاوز يقول حاجة. وهيروحوا لحزقيال يقولوله: فيه ايه؟ عاوز تقولنا وتوصل لنا ايه؟
"وَخُذْ عَصًا أُخْرَى وَاكْتُبْ عَلَيْهَا: لِيُوسُفَ، عَصَا أَفْرَايِمَ وَكُلِّ بَيْتِ إِسْرَائِيلَ رُفَقَائِهِ." ... هيكتب علي عصاية منهم، عصاية لمملكة الجنوب: وهي عبارة عن سبطين، سبط يهوذا وهو السبط الكبير. ومعاه شوية تاني من سبط تاني.
وعصاية لمملكة الشمال: عبارة عن سبط افرايم، وهو السبط الكبير فيهم. ومعاه بقية الأسباط العشرة.
فهيكتب علي عصاية منهم، عصا يهوذا. وعلي التانية عصا يوسف. (عصا يوسف: لان يوسف كان عنده ابنين، منسي وهوالكبير. وافرايم. لكن لما يعقوب بارك، بارك افرايم وأداله البكورية. ومنسي الكبير مأخدهاش.).
17وَاقْرِنْهُمَا الْوَاحِدَةَ بِالأُخْرَى كَعَصًا وَاحِدَةٍ، فَتَصِيرَا وَاحِدَةً فِي يَدِكَ. ربنا قال لحزقيال: امسكهم من النص، وخليهم كأنهم عصاية واحدة.18فَإِذَا كَلَّمَكَ أَبْنَاءُ شَعْبِكَ قَائِلِينَ: أَمَا تُخْبِرُنَا مَا لَكَ وَهذَا؟ الناس هتشوف حزقيال أنه ابتدي يرجع لطريقته التمثيلية والتصويرية، فهيسألوه.: عاوز تقولنا ايه يا حزقيال؟ إيه الرسالة اللي ربنا عاوز يوصلهالنا؟19فَقُلْ لَهُمْ: هكَذَا قَالَ السَّيِّدُ الرَّبُّ: هأَنَذَا آخُذُ عَصَا يُوسُفَ الَّتِي فِي يَدِ أَفْرَايِمَ وَأَسْبَاطَ إِسْرَائِيلَ رُفَقَاءَهُ، وَأَضُمُّ إِلَيْهَا عَصَا يَهُوذَا، وَأَجْعَلُهُمْ عَصًا وَاحِدَةً فَيَصِيرُونَ وَاحِدَةً فِي يَدِي. ابتدي هنا بالمملكة الشمالية، بعصا افرايم. وقال هيضم ليها مملكة يهوذا اللي هي المملكة الجنوبية.
"وَأَضُمُّ إِلَيْهَا عَصَا يَهُوذَا، وَأَجْعَلُهُمْ عَصًا وَاحِدَةً فَيَصِيرُونَ وَاحِدَةً فِي يَدِي." ... الاتنين هيبقوا عصاية واحدة.
من زمان المملكة الجنوبية عنده حلم، انها والمملكة الشمالية يرجعوا مع بعض من تاني.
20وَتَكُونُ الْعَصَوَانِ اللَّتَانِ كَتَبْتَ عَلَيْهِمَا فِي يَدِكَ أَمَامَ أَعْيُنِهِمْ. تمسك يا حزقيال العصايتين من النص. علشان الشعب يشوفها.21وَقُلْ لَهُمْ: هكَذَا قَالَ السَّيِّدُ الرَّبُّ: هأَنَذَا آخُذُ بَنِي إِسْرَائِيلَ مِنْ بَيْنِ الأُمَمِ الَّتِي ذَهَبُوا إِلَيْهَا، وَأَجْمَعُهُمْ مِنْ كُلِّ نَاحِيَةٍ، وَآتِي بِهِمْ إِلَى أَرْضِهِمْ، ربنا بيقوله في آية 21 و22 : هأخلي المملكتين اسرائيل ويهوذا، يبقوا مملكة واحدة. مفيش انقسام تاني. وهيبقي ليهم ملك واحد. زي أيام داود. لأن في وقت داود كانت مملكة واحدة. (المملكة الشمالية: بعد ما أتاخدت للسبي الآشوري، مبقاش ليها وجود تاني. حتي الشُراح اليهود بيقولوا: احنا مش لاقيين أي أثر يقول أن المملكة الشمالية ممكن ترجع وتتجمع. بيقولوا: أن المملكة الجنوبية ممكن ترجع. فهما نفسهم مش فاهمين ازاي تقدر المملكة الشمالية ترجع. مش فاهمين الحتة ديه. لأنهم طبعا مستنين تفسير حرفي.)
لكن احنا فاهمين: لأن ربنا يسوع المسيح له المجد، صنع الوحدة ما بين السمائيين والأرضيين. وكمان ما بين كل الأمم.
حزقيال النبي بيقول: أن مفيش انقسام تاني بين المملكتين، وهيبقوا مملكة واحدة. وهيبقي عليها ملك واحد هو داود (آية 24) وداود يعني : محبوب. والمسيح له المجد هو الابن المحبوب. "هذا هو ابني الحبيب، الذي به سُررت."
اذا المسيح يسوع له المجد اللي جاي، هو ابن داود. أصل وذرية داود.
22وَأُصَيِّرُهُمْ أُمَّةً وَاحِدَةً فِي الأَرْضِ عَلَى جِبَالِ إِسْرَائِيلَ، وَمَلِكٌ وَاحِدٌ يَكُونُ مَلِكًا عَلَيْهِمْ كُلِّهِمْ، وَلاَ يَكُونُونَ بَعْدُ أُمَّتَيْنِ، وَلاَ يَنْقَسِمُونَ بَعْدُ إِلَى مَمْلَكَتَيْنِ. الكلام علي العهد الجديد. لأن الكلام ده منطبقش علي اليهود، حتي بعد ما رجعوا من السبي البابلي. لأننا مش عارفين فين المملكة الشمالية. حتي مملكة يهوذا لما رجعوا، مكانش ليهم ملك. أخر ملك كان عليهم هو صدقيا الملك رقم 20. وبعدين كانوا مستعبدين من أُمة لأُمة.23وَلاَ يَتَنَجَّسُونَ بَعْدُ بِأَصْنَامِهِمْ وَلاَ بِرَجَاسَاتِهِمْ وَلاَ بِشَيْءٍ مِنْ مَعَاصِيهِمْ، بَلْ أُخَلِّصُهُمْ مِنْ كُلِّ مَسَاكِنِهِمِ الَّتِي فِيهَا أَخْطَأُوا، وَأُطَهِّرُهُمْ فَيَكُونُونَ لِي شَعْبًا وَأَنَا أَكُونُ لَهُمْ إِلهًا. احنا شوفنا في العهد الجديد أن دم يسوع المسيح له المجد يُطهر من كل خطية. ربنا بيطهرنا وينقينا. وأدانا جسده ودمه علي المذبح علشان غفران الخطايا. "وحياة أبدية لمن يتناول منه."
"بَلْ أُخَلِّصُهُمْ مِنْ كُلِّ مَسَاكِنِهِمِ الَّتِي فِيهَا أَخْطَأُوا،" ... الحتة ديه كان في صعوبة في تفسيرها. لكن في بعض الترجمات معناها: أخلصهم من خطاياهم. فهنا مش المعني أن ربنا هيخلصهم من المساكن اللي أخطأوا فيها، لكن المقصود: ربنا هيخلصهم من الخطايا اللي صنعوها في الأماكن اللي هما فيها.
وفي بعض الترجمات التانية " أخلصهم من جميع ضلالتهم." نفس المعني، يعني: خطاياهم.
"وَأُطَهِّرُهُمْ فَيَكُونُونَ لِي شَعْبًا وَأَنَا أَكُونُ لَهُمْ إِلهًا." ... نشكرك يارب لأننا بقينا أولادك. بقينا شعبك.
وبنصلي ونقول: شعبك وكنيستك يطلبون اليك.
24وَدَاوُدُ عَبْدِي يَكُونُ مَلِكًا عَلَيْهِمْ، وَيَكُونُ لِجَمِيعِهِمْ رَاعٍ وَاحِدٌ، فَيَسْلُكُونَ فِي أَحْكَامِي وَيَحْفَظُونَ فَرَائِضِي وَيَعْمَلُونَ بِهَا. بعد ما شوفنا الرعاة الأشرار الكاذبين ضيعوا الرعية. جه ربنا بيقول: هيبقي في راعي واحد صالح. "أنا هو الراعي الصالح."
ونتيجة أن بقي في راعي صالح، بقي كل الشعب يخضع ويسمع ليه. ويسلك في مشيئة ربنا ... " فَيَسْلُكُونَ فِي أَحْكَامِي وَيَحْفَظُونَ فَرَائِضِي وَيَعْمَلُونَ بِهَا." ... علشان احنا بنحب ربنا، بنسلك في أحكامه ونحفظ وصاياه ونعمل بيها. وكل ده بنعمله بمحبة. علشان كده بنقول لربنا "ماذا نرد للرب من أجل كل احساناته."
25وَيَسْكُنُونَ فِي الأَرْضِ الَّتِي أَعْطَيْتُ عَبْدِي يَعْقُوبَ إِيَّاهَا، الَّتِي سَكَنَهَا آبَاؤُكُمْ، وَيَسْكُنُونَ فِيهَا هُمْ وَبَنُوهُمْ وَبَنُو بَنِيهِمْ إِلَى الأَبَدِ، وَعَبْدِي دَاوُدُ رَئِيسٌ عَلَيْهِمْ إِلَى الأَبَدِ. اشمعنا عبدي يعقوب؟ لأن يعقوب هو اكتر من الآباء التلاتة، ابراهيم واسحق ويعقوب، اتغرب واتبهدل بعيد. فكان مناسب ليه أن ربنا يقول: أعطيكم الأرض التي وعدت بيها لعبدي يعقوب. لأن يعقوب كان نفسه يستريح شوية.
فكان مناسب ليهم أنه يقول "" وَيَسْكُنُونَ فِي الأَرْضِ الَّتِي أَعْطَيْتُ عَبْدِي يَعْقُوبَ إِيَّاهَا،".
من أول الآية 25، هنلاقي "الي الأبد" بتتكرر كتير. علشان كده مش هنقدر نأخد الوعد ده، أنه انطبق علي رجوع مملكة يهوذا من السبي. لكن الموضوع أعلي وأعمق من كده بكتير.
"وَعَبْدِي دَاوُدُ رَئِيسٌ عَلَيْهِمْ إِلَى الأَبَدِ." ... وكمان اتذكرت في حزقيال من أول اصحاح 41 لـ 48، عن الهيكل الجديد.
وكأن بنهاية اصحاح 37، ربنا بيمهد لباقي الاصحاحات اللي جاية.
هيتذكر الرئيس والمهام بتاعته. لأن عبدي داود: هو رمز لربنا يسوع المسيح له المجد القادم. الذي صنع الفداء، علشان يخلص البشرية كلها.
26وَأَقْطَعُ مَعَهُمْ عَهْدَ سَلاَمٍ، فَيَكُونُ مَعَهُمْ عَهْدًا مُؤَبَّدًا، وَأُقِرُّهُمْ وَأُكَثِّرُهُمْ وَأَجْعَلُ مَقْدِسِي فِي وَسْطِهِمْ إِلَى الأَبَدِ. يعني عهد الي الأبد. عهد السلام الي الأبد.
" وَأُقِرُّهُمْ" ... يعني أثبتهم، وأخلي ليهم اسم وبهاء ومجد.
" وَأُكَثِّرُهُمْ" ... يعني شعب ربنا في العهد الجديد، يكون بالبركة ألوف ألوف. وربوات ربوات، يصنعون مشيئة ربنا. واحنا بنقول كده في صلواتنا.
"وَأَجْعَلُ مَقْدِسِي فِي وَسْطِهِمْ إِلَى الأَبَدِ." ... مقدسي: ديه نفس الكلمة التي استخدمت عن الخيمة (خيمة الاجتماع) في العهد القديم. وسر الخيمة ديه: أن مجد الرب يحل فيها. (لأن خيمة الاجتماع كان فيها القدس وقدس الأقداس وتابوت العهد كان أعظم حاجة في قدس الأقداس. وتابوت العهد عليه غطاء من ذهب، واتنين كاروبيم مظللين. ومجد الرب كان بيحل علي الغطاء.)
كلمة " مَقْدِسِي" ... بتُشير للحلول أو السَكن. فهي مسكن الله مع الناس.
اذا خيمة الاجتماع في العهد القديم، هي رمز للتجسد. تجسد ربنا يسوع المسيح له المجد في العهد الجديد.
27وَيَكُونُ مَسْكَنِي فَوْقَهُمْ، وَأَكُونُ لَهُمْ إِلهًا وَيَكُونُونَ لِي شَعْبًا. " وَيَكُونُ مَسْكَنِي فَوْقَهُمْ،" ... يعني مش في وسطينا ومعانا بس، لكن كمان " فَوْقَهُمْ،". وديه بتفكرنا بالملاك اللي جه لأمنا العذراء " الروح القدس يحل عليكِ، وقوة العلي تُظللك." وديه نفس المعني "ويكون مسكني فوقهم.". يعني الأول ابتدي بأمنا العذراء وبعدين الباب اتفتح للبشرية. علشان نلاقي مسكن ومكان لينا في ربنا.
وإذا كان ربنا أخد جسدنا مولودا، فده علشان يدينا جسده القائم من بين الأموات. ونبقي مغروسين فيه.
" وَيَكُونُ مَسْكَنِي فَوْقَهُمْ،" ... مسكني، ديه الخيمة. طيب ايه اللي دخل الخيمة أنها تبقي فوقهم؟
طبعا ديه مكانوش بيفهموها زمان. لكن احنا نفهمها في العهد الجديد، "قوة العلي تُظللك"
وزي ما قال القديس كيرلس الكبير: المسيح يسكن فينا بالروح القدس، فنصير مسكن للمسيح بالروح القدس.
وده بناخده في الميرون، لما أبونا بيرشمنا بزيت الميرون. بنصير مسكن للمسيح بالروح القدس.
"وَأَكُونُ لَهُمْ إِلهًا وَيَكُونُونَ لِي شَعْبًا." ... فنكون شعب ربنا. وربنا الهنا كلنا.
28فَتَعْلَمُ الأُمَمُ أَنِّي أَنَا الرَّبُّ مُقَدِّسُ إِسْرَائِيلَ، إِذْ يَكُونُ مَقْدِسِي فِي وَسْطِهِمْ إِلَى الأَبَدِ». من أسماء يهوه في العهد القديم: يهوه مُقدسنا.
" أَنَا الرَّبُّ مُقَدِّسُ إِسْرَائِيلَ،" ... يعني ربنا يُقدس شعبه.
الجزء اللي قريناه: يتفهم في ضوء العهد الجديد. وبيسموها قطعة مسيانية. بتورينا التجسد والفداء وعمل ربنا يسوع المسيح له المجد.
"إِذْ يَكُونُ مَقْدِسِي فِي وَسْطِهِمْ إِلَى الأَبَد." ... يعني مجدي وحضرتي (حضوري) في وسطهم الي الابد. والكلام ده طبعا متحققش إلا في ربنا يسوع المسيح له المجد لما جه واتجسد. لما جه وسطنا، صار بينا وسكن فينا بالروح القدس الي الأبد.
⪢