⪡ 1وَكَانَ فِي السَّنَةِ الثَّانِيَةِ عَشَرَةَ، فِي الشَّهْرِ الثَّانِي عَشَرَ، فِي أَوَّلِ الشَّهْرِ، أَنَّ كَلاَمَ الرَّبِّ صَارَ إِلَيَّ قَائِلاً: الأربع اصحاحات الخاصة بمصر، ودول حوالي 100 آية. وديه مش حاجة تخوف، أو أن ربنا ضدنا. لكن معناها: أن ربنا مهتم بشعب مصر. وقال في اشعياء "مبارك شعبي مصر."
وشوفنا في التلات اصحاحات اللي فاتت: كان في باب مفتوح للتوبة لشعب مصر. علشان يتوبوا.
النبوات الخاصة ببلدنا مصر، في المركز التاني بعد أورشليم. لأن في نبوات اتوجهت ضد الشعوب المجاورة لشعب اسرائيل:
. ضد بني عمون ... 7 آيات في سفر حزقيال.
. ضد موآب ... 4 آيات في سفر حزقيال.
. ضد آدوم ... شوية موجودين في اصحاح 25، واصحاح 35 كله، ومجموع الآيات 18 آية.
. ضد فلسطين ... 3 آيات في سفر حزقيال.
. ضد صُور ... أخدت نصيب كبير كانوا 3 اصحاحات. ومجموع آياتهم 83 آية (اصحاحات 26 و27 و 28).
. ضد صيدا ... 7 آيات.
. نبوات خاصة بمصر ... 4 اصحاحات. ومجموع آياتهم 97 آية، تقريبا 100 آية في سفر حزقيال خاصين بمصر.
+ كترتيب: النبوات الخاصة بأورشليم كانت في الأول، في معظم السفر. وبعد كده في الترتيب: النبوات الخاصة بمصر، وكانت 4 اصحاحات، تقريبا 100 آية.
1 وَكَانَ فِي السَّنَةِ الثَّانِيَةِ عَشَرَةَ، فِي الشَّهْرِ الثَّانِي عَشَرَ، فِي أَوَّلِ الشَّهْرِ، أَنَّ كَلاَمَ الرَّبِّ صَارَ إِلَيَّ قَائِلًا:
بيقولوا التاريخ ده بيوافق شهر فبراير أو مارس. وبيقولوا كمان أن ده بعد شهرين من وصول الأخبار لحزقيال بسقوط أورشليم في يد نبوخذنصر، بعد الحصار الشديد اللي عمله علي أورشليم.. والتاريخ هنا بعد سنة ونص من تاريخ الاصحاح اللي فات.
2«يَا ابْنَ آدَمَ، ارْفَعْ مَرْثَاةً عَلَى فِرْعَوْنَ مَلِكِ مِصْرَ وَقُلْ لَهُ: أَشْبَهْتَ شِبْلَ الأُمَمِ وَأَنْتَ نَظِيرُ تِمْسَاحٍ فِي الْبِحَارِ. انْدَفَقْتَ بِأَنْهَارِكَ، وَكَدَّرْتَ الْمَاءَ بِرِجْلَيْكَ، وَعَكَّرْتَ أَنْهَارَهُمْ. " يَا ابْنَ آدَمَ،" ... العبارة المميزة لسفر حزقيال، وبيقولوا الجملة ديه ربنا بيقولها كتير لحزقيال: علشان من كتر الاعلانات اللي أخدها، لا يرتفع قلبه. فربنا دايما بيفكره: انت يا حزقيال انسان. لسه في الجسد.
"ارْفَعْ مَرْثَاةً عَلَى فِرْعَوْنَ مَلِكِ مِصْرَ وَقُلْ لَهُ:" ... ربنا بينبه حزقيال وبيقوله: اعمل مرثاة. اندب فرعون ملك مصر. وكل اللي بيسلك سلوك فرعون ملك مصر، يستحق الرثاء. لان كانت مشكلته هو وملك صُور، الكبرياء. قلبهم تكبّر من كتر المجد والعظمة اللي ربنا سمح لهم بيها.
"أَشْبَهْتَ شِبْلَ الأُمَمِ وَأَنْتَ نَظِيرُ تِمْسَاحٍ فِي الْبِحَارِ." ... في اصحاح 29، ربنا قال لفرعون "هأنذا عليك يا فرعون ملك مصر، التمساح الكبير." والتمساح الكبير ده صورة مفهومة عند المصريين زي ما وضحنا قبل كده. والتمساح مكانه النهر. المية. لكن فرعون أراد أن يصير أعظم من التمساح. كان عاوز يبقي أسد. وأسد يعني ملك الحيوانات.، يعني يجول ويبقي براحته في كل مكان، ويتصرف كملك. لأن الأسد ملك الغابة. فكان عاوز يفرض سيطرته علي كل الأمم اللي حواليه، ويبقي " شِبْلَ".
فربنا بيقوله: ده مش هيحصل. مش هتبقي " شِبْلَ الأُمَمِ" ... يعني مش هتملك علي الممالك اللي حواليك. وده كان الانطباع اللي بيديه فرعون الأمم اللي حواليه. وعلشان كده كانوا بيحبوا يحتموا فيه من ملك بابل.
ربنا قاله: ده أنت مش هتقدر تحمي نفسك، ازاي هتحمي اللي حواليك؟ ده كلهم هيشوفوا سقوطك.
"انْدَفَقْتَ بِأَنْهَارِكَ،" ... يعني كأنه اقتحم المية اقتحام. النهر بتاعه، مملكته. أنت ملك في مملكتك. وملك كبير. انهارك: المقصود بيها هنا هو نهر النيل وكل فروعه. وزمان كان ممكن يقولوا عليها بِحار.
"وَكَدَّرْتَ الْمَاءَ بِرِجْلَيْكَ، وَعَكَّرْتَ أَنْهَارَهُمْ." ... ده أنت عكرت الفروع التانية بتاعة نهر النيل.
عاوز يقول: أنت يا فرعون لما اندفقت في أنهارك ونزلت في المية بتاعتك، طلّعت كل الوحل والطين. والمية بقت مش نضيفة. وعكرت كل فروع النهر... فبقت المية عكرة وغير صالحة للشرب.
فكأن ربنا بيقوله: ياريتك كنت سيبت الأمم اللي حواليك في حالهم. رايح تقولهم أنا هأحميكم وهأصد هجمات ملك بابل ضدكم. أديك عكرت المية والأنهار برجليك. يعني الناس ديه لو مكانتش عصت علي ملك بابل، مكانتش اتبهدلت البهدلة ديه.
لكن هما سمعوا كلامك وعاوزين يدخلوا تحت حمايتك. وأنت لا هتعرف تحمي نفسك ولا تحميهم.
ساعات الواحد كده بيفتكر نفسه أنه حاجة، ياما هنا ياما هناك. وأنه يقدر يعمل أشياء عظيمة جدا. وينسي قيمته الحقيقية وحجمه. فربنا يقوله كده مش هينفع، لازم تعرف حجمك وحقيقتك.
3هكَذَا قَالَ السَّيِّدُ الرَّبُّ: إِنِّي أَبْسُطُ عَلَيْكَ شَبَكَتِي مَعَ جَمَاعَةِ شُعُوبٍ كَثِيرَةٍ، وَهُمْ يُصْعِدُونَكَ فِي مِجْزَفَتِي. "مِجْزَفَتِي." ... يعني الشبكة بتاعتي أو صنارتي.
هنا حزقيال بيستخدم اللغة اللي فرعون وأهل مصر عارفينها. لأنهم كانوا بيصطادوا بالطريقة ديه، سواء التماسيح أو النمور والفهود. كانوا بيعملوا ليهم حفرة علشان يقعوا فيها، ويقفلوا عليهم.
فربنا بيقوله: وأنت قلبك مرتفع أوي كده، وناسي إنك انسان. وإنك مش إله أصلا. هأوقعك في الشبكة اللي هي: اني هأسمح للبابليين تحت قيادة نبوخذنصر، انهم يجوا يأخدوك في الشبكة ديه.
" شَبَكَتِي . مِجْزَفَتِي." ... شبكة ربنا اللي هيديها في يد نبوخذنصر والبابليين علشان يستخدموها. وكأن تأديب فرعون ده من قِبل ربنا، عن طريق نبوخذنصر.
ساعات مش بنبقي فاهمين ليه ربنا بيسمح بحاجات زي كده. فساعات ده بيبقي عصا تأديب في ايد ربنا.
4وَأَتْرُكُكَ عَلَى الأَرْضِ، وَأَطْرَحُكَ عَلَى وَجْهِ الْحَقْلِ، وَأُقِرُّ عَلَيْكَ كُلَّ طُيُورِ السَّمَاءِ، وَأُشْبعُ مِنْكَ وُحُوشَ الأَرْضِ كُلَّهَا. " وَأَتْرُكُكَ عَلَى الأَرْضِ،" ... أصلك يا فرعون لما تطلع من أنهارك اللي هو نهر النيل، هتُطرح علي الأرض.
نفس التعبيرات ديه اتقالت في اصحاح 29.
بس هنا في كلمتين "كُلّ" و " كُلَّهَا" ... يعني ربنا بيأكد اللي قاله مرتين. يعني كلامي هيحصل هيحصل.
ولو كان فرعون قدم توبة، كان ممكن العقوبة ديه متقعش عليه. لأن أكيد اللي كتبه حزقيال هنا وصل لفرعون مصر، ووصل قبل ما يحصل بكتير.
"وَأَطْرَحُكَ عَلَى وَجْهِ الْحَقْلِ، وَأُقِرُّ عَلَيْكَ كُلَّ طُيُورِ السَّمَاءِ، وَأُشْبعُ مِنْكَ وُحُوشَ الأَرْضِ كُلَّهَا." ... وهتبقي أنت يا فرعون أكلة محترمة لكل طيور السماء، ولوحوش الأرض. مش أنت كنت عاوز تساعد الناس؟ شوف بقي مين هيساعدك أنت؟ دول حتي هيبعدوا عنك يقرفوا منك علشان هتبقي ريحتك نتنة. هتبقي عبارة عن جثة متعفنة لطيور السماء ووحوش البرية.
" وَأُقِرُّ عَلَيْكَ" ... يعني هأخلي كل طيور السماء تستقر عليك.
5وَأُلْقِي لَحْمَكَ عَلَى الْجِبَالِ، وَأَمْلأُ الأَوْدِيَةَ مِنْ جِيَفِكَ. " جِيَفِك." ... هتبقي جثته نتنت ومليانة دود. جثة متعفنة. وهتأكلها طيور السماء.6وَأُسْقِي أَرْضَ فَيَضَانِكَ مِنْ دَمِكَ إِلَى الْجِبَالِ، وَتَمْتَلِئُ مِنْكَ الآفَاقُ. فرعون قال "نهري لي. وأنا عملته لنفسي.".
نهر النيل اللي بيفيض (فيضان نهر النيل)، وبيروي الأرض. وبيشرّب الناس والبهائم. هنا حزقيال مستمر في الصورة البلاغية بتاعته.
"مِنْ دَمِكَ إِلَى الْجِبَالِ،" ... حتي الأماكن اللي بين الجبال، هتتملي كلها من دمك. وبدل ما يبقي أرض فيضان. النيل هيبقي دم، لا يصلح للشرب.
وكأن ربنا بيقول: الحاجة اللي بتفتخر بيها يا فرعون، هأخدها منك. "من يفتخر، فليفتخر بالرب."
"وَتَمْتَلِئُ مِنْكَ الآفَاقُ" ... يعني العقاب هيبقي شديد علي فرعون وكل متكبر.
7وَعِنْدَ إِطْفَائِي إِيَّاكَ أَحْجُبُ السَّمَاوَاتِ، وَأُظْلِمُ نُجُومَهَا، وَأُغْشِي الشَّمْسَ بِسَحَابٍ، وَالْقَمَرُ لاَ يُضِيءُ ضَوْءَهُ. الحتة ديه خلت بعض المفسرين يقولوا إن اصحاح 32 ده، مش مجرد بي نبوات لفترة زمنية قريبة. لكنها تصلُح الي نهاية الأيام، وقبل مجيء ربنا يسوع المسيح له المجد في فترة ضد المسيح.
لأنه بيقول: أن الشمس تظلم والقمر لا يُعطي ضوئه. فهي أية بتدينا فكرة عن اليوم الأخير.
فالبعض أخدها من المنظور ده، انها انتهاء مملكة ضد المسيح، وانتهاء الظلم قبل مجئ ربنا يسوع المسيح له المجد. الذي سيُبيد ضد المسيح بنفخة فمه.
" وَعِنْدَ إِطْفَائِي إِيَّاكَ" ... بيشرحوها: وكأنه شمعة كبيرة جدا مثلا، أو حاجة كبيرة أوي منورة. ولما بتطفي بتطلع دخان. وعلشان ديه حاجة كبيرة أوي. فالدخان ده ممكن يعمي العين.
فلما ربنا يقضي علي فرعون، كل الملوك والرؤساء والسلاطين اللي مناصبهم متعلقة بفرعون، هيسقطوا برده.
"أَحْجُبُ السَّمَاوَاتِ،" ... السماء نفسها تضلم.
"وَأُظْلِمُ نُجُومَهَا، وَأُغْشِي الشَّمْسَ بِسَحَابٍ، وَالْقَمَرُ لاَ يُضِيءُ ضَوْءَهُ." ... وكأن حزقيال بيفكر فرعون الحالي لما يقرأ الكلام ده، يقوله ارجع بذاكرتك واقرأ التاريخ. لأن فرعون اللي قبلك لما اتكبر ووقف قدام يهوه، اله اسرائيل. اتضرب بالضربات العشرة. والضربة التاسعة قبل الأخيرة، في سفر خروج 10، كانت ضربة الظلام في كل أرض مصر.
8وَأُظْلِمُ فَوْقَكَ كُلَّ أَنْوَارِ السَّمَاءِ الْمُنِيرَةِ، وَأَجْعَلُ الظُّلْمَةَ عَلَى أَرْضِكَ، يَقُولُ السَّيِّدُ الرَّبُّ. وكمان اتقال في اصحاح 30 : 8، "ويُظلم النهار في تنحفيس ..... عند كسري أنيار مصر هناك."
فهيكون يوم سقوط فرعون ده، يوم ظلام في مصر. يوم ظلام وكأن محدش عارف يعمل حاجة من كتر الضلمة.. والكل هيهرب لحياته. واللي مش هيلحق يهرب هيموت.
"يَقُولُ السَّيِّدُ الرَّبّ." ... خلاص الأمر صدر من ربنا. ولو متوبتش يا فرعون هيحصل كل ده.
9وَأَغُمُّ قُلُوبَ شُعُوبٍ كَثِيرِينَ عِنْدَ إِتْيَانِي بِكَسْرِكَ بَيْنَ الأُمَمِ فِي أَرَاضٍ لَمْ تَعْرِفْهَا. ربنا بيقوله: لما تتكسر يا فرعون، كل الشعوب التانية اللي حاطة الأمل عليك. وكأنه ضمنيا بيقول شعب بني إسرائيل كمان، لأنهم كانوا متكلين علي مصر. فلما يلاقوا فرعون سقط. هيحصل رعب وخوف في بقية الشعوب. لأنه كان في نظرهم الأمل الوحيد اللي كانوا متعلقين بيه، راح الامل ده منهم.
. المتوكل علي حد غير ربنا، كأنه متوكل علي الهواء.
. و يُقال أن فرعون راح علشان يحمي حد في القيروان في ليبيا. وانهزم فرعون، وجيشه اتشتت. وهو اتبهدل.
10وَأُحَيِّرُ مِنْكَ شُعُوبًا كَثِيرِينَ، مُلُوكُهُمْ يَقْشَعِرُّونَ عَلَيْكَ اقْشِعْرَارًا عِنْدَمَا أَخْطِرُ بِسَيْفِي قُدَّامَ وُجُوهِهِمْ، فَيَرْجِفُونَ كُلَّ لَحْظَةٍ، كُلُّ وَاحِدٍ عَلَى نَفْسِهِ فِي يَوْمِ سُقُوطِكَ. البعض بيقول: كأن سيف ربنا طاير قدام عنيهم، ويُعاقب. والبعض قال: كأن السيف مسلول ويبرق (بيلمع). وفي اللغة البلاغية: أن السيف يبرق يعني علشان اللي ميخفش يخاف، ويأخد باله.
فربنا بيقول لما أعمل كده بسيفي، ونبوخذنصر ده أداه تأديب في ايد ربنا،
"فَيَرْجِفُونَ" ... هيبقوا في حالة رعب وخوف. فلما ربنا هيحرك سيفه، هيحصل حالة رعب وخوف وفزع.
. ولما سقط ملك صُور: الشعوب التانية استغربت سقوطه. وضربت كف علي كف.أن ازاي يحصل لها كده، وديه أصلا مدينة حصينة.
فبرده لما فرعون يسقط، الناس هتتحير ... "وَأُحَيِّرُ مِنْكَ شُعُوبًا كَثِيرِينَ، مُلُوكُهُمْ يَقْشَعِرُّونَ عَلَيْكَ اقْشِعْرَارًا". هيبقي في قشعريرة وخوف ورعب.
"كُلَّ لَحْظَةٍ، كُلُّ وَاحِدٍ عَلَى نَفْسِهِ فِي يَوْمِ سُقُوطِكَ." ... محدش هينفع حد خالص.
وديه تدينا فكرة عن وقوفنا قدام ربنا في اليوم الأخير، كل واحد يُعطي جوابا عن نفسه. محدش هيقول لربنا أنا تبع فلان. ربنا هييقولنا "أعطني حساب وكالتك.
فلازم كل واحد فينا من دلوقتي يستعد، علشان لما يقف قدام ربنا: سيُعطي حساب وكالته عن نفسه
11« لأَنَّهُ هكَذَا قَالَ السَّيِّدُ الرَّبُّ: سَيْفُ مَلِكِ بَابِلَ يَأْتِي عَلَيْكَ. ربنا هنا بيوضح أن ده سيف بابل. سيفي اللي حاطه في ايد ملك بابل، اللي هو نبوخذنصر.
فهنا ربنا بيوضح أن هلاك المصريين وفرعون هيكون عن طريق سيف ربنا، اللي هو سيف نبوخذنصر وجيشه.
12بِسُيُوفِ الْجَبَابِرَةِ أُسْقِطُ جُمْهُورَكَ. كُلُّهُمْ عُتَاةُ الأُمَمِ، فَيَسْلُبُونَ كِبْرِيَاءَ مِصْرَ، وَيَهْلِكُ كُلُّ جُمْهُورِهَا. الجبابرة وعتاة الأمم: ديه تعبيرات استخدمها حزقيال للتعبير عن ملك بابل والبابليين.
"عُتَاةُ" ... يعني أقوياء جدا.
" فَيَسْلُبُونَ كِبْرِيَاءَ مِصْرَ،" ... علشان فرعون وقساوة قلبه، فالعقوبة جت علي الكل.
"وَيَهْلِكُ كُلُّ جُمْهُورِهَا." ... خلاص مفيش كبرياء مصر وفرعونها تاني. يعني مصر هتتذل وهتفقد كبريائها. جايز ترجع وتوب وتتضع. وده يخليها تأمن بربنا.
13وَأُبِيدُ جَمِيعَ بَهَائِمِهَا عَنِ الْمِيَاهِ الْكَثِيرَةِ، فَلاَ تُكَدِّرُهَا مِنْ بَعْدُ رِجْلُ إِنْسَانٍ، وَلاَ تُعَكِّرُهَا أَظْلاَفُ بَهِيمَةٍ. يعني البهائم المرتوية من المياه الكثيرة. البهائم ديه كانت مصدر رزق للمصريين. وكانوا بيعيشوا عليها كرزق. كل ده هيتباد نتيجة كبريائهم.
"فَلاَ تُكَدِّرُهَا مِنْ بَعْدُ رِجْلُ إِنْسَانٍ، وَلاَ تُعَكِّرُهَا أَظْلاَفُ بَهِيمَةٍ." ... خلاص لأن ربنا قد قطع عن مصر الانسان والحيوانات. فبالتالي مفيش حد هيكدرأو يعكر المية. " أَظْلاَفُ" ... يعني حوافر أو أقدام الحيوانات.
ومحدش هيقول للشعوب ديه تعالوا احتموا فيا تاني. لأن حزقيال قال قبل كده "ستصير مملكة حقيرة، ولن تعود لمجدها."
ومن أيام حزقيال، النبوة بتاعته متحققة. وان كان البعض بيقول في أخر الأيام مع التوبة المفروض أن الوضع يتغير ويتحسن.
14حِينَئِذٍ أُنْضِبُ مِيَاهَهُمْ وَأُجْرِي أَنْهَارَهُمْ كَالزَّيْتِ، يَقُولُ السَّيِّدُ الرَّبُّ. النهر وفروعه يا فرعون اللي أنت فخور ومتكبر بسببه، هيجف. هينشف.
" أُنْضِبُ" ... أنشف أو أجفف.
"وَأُجْرِي أَنْهَارَهُمْ كَالزَّيْتِ، يَقُولُ السَّيِّدُ الرَّبُّ." ... ربنا قال أن مفيش إنسان أو بهيمة هيعكروا المية. فالمية هتبقي صافية. بالإضافة وكأنها زيت، يعني: بقت مية راكدة جدا، مفيهاش حركة. مفيهاش حياة.
. وان كان البعض بيأخدها: ان الزيت رمز للبركة. ويكون وهو في عز العقوبة وبيتكلم عن العقوبة، بيدينا أمل في الشفاء بعد كده.
" مِيَاهَهُمْ" ... ربنا بيشوف الإنسان قلبه بيرتفع ويتكبر بايه، فيأخده منه، علشان يتضع.
15حِينَ أَجْعَلُ أَرْضَ مِصْرَ خَرَابًا، وَتَخْلُو الأَرْضُ مِنْ مِلْئِهَا. عِنْدَ ضَرْبِي جَمِيعَ سُكَّانِهَا يَعْلَمُونَ أَنِّي أَنَا الرَّبُّ. بعد ما كانت مليانة من البشر والحيوانات والخير، هتبقي خراب.
"عِنْدَ ضَرْبِي جَمِيعَ سُكَّانِهَا يَعْلَمُونَ أَنِّي أَنَا الرَّبُّ." ... التأديب ده كله، كان هدفه انهم يتوبوا.
وهدف تأديبنا اننا نقدم توبة. ونرفع قلوبنا لربنا. ونقول: أخطائنا يارب الي السموات وقدامك
16هذِهِ مَرْثَاةٌ يَرْثُونَ بِهَا. بَنَاتُ الأُمَمِ تَرْثُو بِهَا. عَلَى مِصْرَ وَعَلَى كُلِّ جُمْهُورِهَا تَرْثُو بِهَا، يَقُولُ السَّيِّدُ الرَّبُّ». بنات الأمم: يعني الشعوب اللي كانت عاوزة فرعون يحميها، المعتمدة علي مصر. وبيقولوا الرثاء والندب هو من وظيفة السيدات. علشان كده يقول بنات الامم.
"عَلَى مِصْرَ وَعَلَى كُلِّ جُمْهُورِهَا تَرْثُو بِهَا، يَقُولُ السَّيِّدُ الرَّبُّ." ... من حنية ربنا علي البشر وعلي اولاده، كان ينظر بحزن علي هلاك مصر وشعبها.
17وَكَانَ فِي السَّنَةِ الثَّانِيَةِ عَشَرَةَ، فِي الْخَامِسِ عَشَرَ مِنَ الشَّهْرِ، أَنَّ كَلاَمَ الرَّبِّ كَانَ إِلَيَّ قَائِلاً: من أول الآية ديه برده الكلام موجه لفرعون مصر. بس ربنا بيذكر كمان بعض الشعوب التانية. وكأن ربنا بيقول لفرعون: اتعلم الدرس من الشعوب التانية ديه.
الانسان الحكيم الذكي، يتعلم من أخطاء وسقطات وضعفات الآخرين.
فربنا حط قدام فرعون مجموعة من الشعوب كانت عظيمة جدا. علشان يتعلم. ربنا حط له : آشور- عيلام – ماشك و توبال – آدوم – أمراء الشمال – والصيديون. وكل ده علشان يتعلم، وبرده متعلمش.
" مِنَ الشَّهْرِ،" ... هنا مش مذكور أنهي شهر، فالاتفاق أتعمل علي أنه في نفس الشهر اللي موجود في أول الاصحاح هنا. يعني في "الخامس عشر من الشهر" يعني أسبوعين تقريبا من بعد اللي قاله في بداية الاصحاح.
18«يَا ابْنَ آدَمَ، وَلْوِلْ عَلَى جُمْهُورِ مِصْرَ، وَأَحْدِرْهُ هُوَ وَبَنَاتِ الأُمَمِ الْعَظِيمَةِ إِلَى الأَرْضِ السُّفْلَى مَعَ الْهَابِطِينَ فِي الْجُبِّ. ولول وأصرخ وأعمل مرثاة مش بس علي فرعون، لكن علي كل جمهور مصر. وكل فِرق جيوش مصر.
"وَأَحْدِرْهُ هُوَ وَبَنَاتِ الأُمَمِ الْعَظِيمَةِ" ... يعني كل الأمم اللي كانت عاوزة يبقي ليها علاقة بمصر. أَحْدِرْهُ: يعني أنزله الي أسفل.
" وَبَنَاتِ الأُمَمِ" ... هنا هي الشعوب العظيمة اللي كان ليها عظمة زي مصر. وبالنسبة لبنات الأمم، هنا هنشوف دلوقتي صورة للجحيم وكمان فيها بنات الأمم العظيمة: آشور ، عيلام ، ماشك ، توبال ، آدوم. ودول هيبقوا مثال لفرعون.
"إِلَى الأَرْضِ السُّفْلَى" ... الهاوية. مكان انتظار الأشرار
"مَعَ الْهَابِطِينَ فِي الْجُبِّ." ... مع كل الناس الاشرار الهابطين للهاوية. الجب: يعني حفرة عميقة، وترمز الي الجحيم.
فهنا ربنا بيطلب من حزقيال أن يبكى ويصرخ في حزن على هلاك المصريين وشعوب العالم المختلفة التي ستهلك بيد بابل. وعندما يموتون ينزلون إلى الأرض السفلى والجب، أي الجحيم مكان انتظار الأشرار.
19مِمَّنْ نَعِمْتَ أَكْثَرَ؟ انْزِلْ وَاضْطَجعْ مَعَ الْغُلْفِ. " مِمَّنْ نَعِمْتَ أَكْثَرَ؟" ... يعني هو أنت كنت أحسن من مين يعني؟ أنت فاكر نفسك أحسن من مين.
ياريت الانسان يتعلم الدرس. لأن لو كان فرعون ده فكر أن آشور بجلالة قدرها وقعت، وقبليهم عيلام وكان مملكة كبيرة، هنشوفها دلوقتي، وديه برده وقعت. هما وغيرهم.
"انْزِلْ وَاضْطَجعْ مَعَ الْغُلْفِ." ... في الجزء اللي جاي هنلاقي الغُلف بتتكرر كتير، حوالي 10 مرات. والغُلف هما غير المختونين.
عند اليهود في الختان، وديه شريعة مقدسة. وكانوا بيعتبروا نفسهم أفضل من الأمم، وده لأنهم مختونين. وباقي الأمم معندهوش موضوع الختان ده.
المصريين وفئة الملوك والفراعنة والكهنة، كانوا يمارسوا ويقدسوا موضوع الختان برده. وعندنا في مصر لغاية دلوقتي هي عادة متوارثة. وجاية من الفراعنة.
في مصر كان اللي بيموت مع الغُلف الغير مختونين، ديه كانت بالنسبة لهم نجاسة وعار.
ففرعون اللي كان بيقدس الختان هو والملوك والكهنة، يتقاله انزل واضجع مع الغُلف.
وكان في بعض المعتقدات: يقولوا أن الهاوية نفسها مُدرجة علي حسب مختونين أو غير مختونين. وأخر حتة في الهاوية للي مش مختونين.
فكأن ربنا بيقوله: هأنزلك يا فرعون الي الهاوية في أوحش حتة. هتموت في منتهي الهوان.
20يَسْقُطُونَ فِي وَسْطِ الْقَتْلَى بِالسَّيْفِ. قَدْ أُسْلِمَ السَّيْفُ. اُمْسُكُوُهَا مَعَ كُلِّ جُمْهُورِهَا. زمان برده لما كانوا يهزموا الأعداء، ويجوا يدفنوهم، يكشفوهم أو يعروهم (تعرية) علشان يشوفوا هل في حد مهم بينهم ولا لأ. ويأخدوهم مجموعة، ويدفنوهم مرة واحدة. مش واحد واحد باحترام ومهابة. (والكلام ده موجود في صموئيل الأول 31 : 8-9 لما اتهزم شاول الملك.).
يسقطون بالسيف: ديه معناها انهم اتهزموا واتعروا أو اتكشفوا كمان.
"قَدْ أُسْلِمَ السَّيْفُ. اُمْسُكُوُهَا مَعَ كُلِّ جُمْهُورِهَا." ... يعني الهلاك علي كل مصر بكل فئات الشعب وكل الأعمار. الهلاك شامل لكل المصريين. وفي ترجمة أسهل: قد عُينت مصر للسيف. يعني: السيف جاي علي فرعون وكل مصر. الكل بعد اللي اتقتل وحياته اتدمرت، العدو سبي الباقي اللي فاضل من المصريين. نبوخذنصر وجيشه هيمسكوا المصريين وهياخدوهم للسبي في بابل.
في الجزء الباقي من الاصحاح في حاجتين:
- قبور علي وجه الأرض.
- والنزول الي الهاوية.
هنركز عليهم في باقي الاصحاح.
21يُكَلِّمُهُ أَقْوِيَاءُ الْجَبَابِرَةِ مِنْ وَسْطِ الْهَاوِيَةِ مَعَ أَعْوَانِهِ. قَدْ نَزَلُوا، اضْطَجَعُوا غُلْفًا قَتْلَى بِالسَّيْفِ. يعني: كأن حزقيال بيدينا صورة تخيُلية: عن فرعون وهو نازل للهاوية وبيستقبلوه. بيعملوله حفلة استقبال. بس حفلة مليانة عار.
"قَدْ نَزَلُوا، اضْطَجَعُوا غُلْفًا قَتْلَى بِالسَّيْف." ... وفرعون نازل في الهاوية، وهما عمالين يستقبلوه، مش بيستقبلوه بالترحيب، لكن بيستقبلوه بالعار. يعني بيستهزوا بيه. لأنه رغم كبريائه قد سقط بينهم، وإن كان قد احتقر الغلف، فقد صار محتقرًا مثلهم، وسقط بينهم، هو وأعوانه من الأمم.
وكأن اللي في الهاوية شمتانين في فرعون وهو نازل للهاوية.
الأشرار حاجة صعبة أوي، صحيح هما في الهاوية مع بعض. لكن بيفرحوا في بعض وديه طبيعة الأشرار، انهم بيفرحوا في مصايب بعض.
22هُنَاكَ أَشُّورُ وَكُلُّ جَمَاعَتِهَا. قُبُورُهُ مِنْ حَوْلِهِ. كُلُّهُمْ قَتْلَى سَاقِطُونَ بِالسَّيْفِ. حزقيال النبي هيقولنا مين اللي في الهاوية اللي هيشوفوا فرعون وهو نازل للهاوية. هنشوف 6 شعوب موجودين في الهاوية، فرحانين وهما شايفين فرعون نازل للهاوية.
" هُنَاكَ أَشُّورُ وَكُلُّ جَمَاعَتِهَا. قُبُورُهُ مِنْ حَوْلِهِ." ... يعني: قبور كل جماعات آشور من حول قبر الملك. هنا بيقول لو بصيتوا من فوق علي آشور، هتلاقوا قبور آشور. قبور الملك وكل أعوانه. ولو بصيتوا في الهاوية، هتلاقوا آشور مشرف في الهاوية هو كمان.
"كُلُّهُمْ قَتْلَى سَاقِطُونَ بِالسَّيْفِ." ... من فوق آشور، شايفين قبور الآشوريين.
معني كده يافرعون، أن ملك آشور مات وكل جماعته. بس ياريت تتعلم الدرس. بس للأسف مش عاوز يتعلم.
23اَلَّذِينَ جُعِلَتْ قُبُورُهُمْ فِي أَسَافِلِ الْجُبِّ، وَجَمَاعَتُهَا حَوْلَ قَبْرِهَا، كُلُّهُمْ قَتْلَى سَاقِطُونَ بِالسَّيْفِ، الَّذِينَ جَعَلُوا رُعْبًا فِي أَرْضِ الأَحْيَاءِ. قبورهم: يعني مثواهم الأخير. في أسافل الجب يعني في نهاية الهاوية.
"وَجَمَاعَتُهَا حَوْلَ قَبْرِهَا،" ... يعني حوله قبور حلفائه.
"كُلُّهُمْ قَتْلَى سَاقِطُونَ بِالسَّيْفِ،" ... كلهم ماتوا في الأخر واتهزموا. آشور كانت عظيمة جدا. جت بابل في الأخر خصلت عليها. وبابل كانت عظيمة جدا، بس جت بعدها مملكة مادي وفارس وبرده خلصوا علي بابل. وبابل بقت قتلي بالسيف.
قتلي بالسيف والقبور، ده من فوق الأرض. المنظر من فوق الأرض اللي واضح. لكن كمان في العالم الغير منظور في الهاوية، نزلوا الي أسافل الجب.
"الَّذِينَ جَعَلُوا رُعْبًا فِي أَرْضِ الأَحْيَاءِ." ... آشورعملوا رعب في الأرض، لأنها كانت مملكة عظيمة جدا. وأي شعب كان بيترعب منهم لما كانوا يعرفوا أن آشور جاية تهجم عليهم.
فهنا بيقول: هيلتقى فرعون عند سقوطه إلى الجحيم بالجبابرة من الأشوريين الذين سيطروا على العالم بعد مصر، وها هم الآن يقتلون بيد بابل، وينزلون بسبب شرورهم إلى الجحيم، هناك تكون قبورهم، أي مستقرهم، فيعذبون إلى الأبد.
24هُنَاكَ عِيلاَمُ وَكُلُّ جُمْهُورِهَا حَوْلَ قَبْرِهَا، كُلُّهُمْ قَتْلَى سَاقِطُونَ بِالسَّيْفِ، الَّذِينَ هَبَطُوا غُلْفًا إِلَى الأَرْضِ السُّفْلَى، الَّذِينَ جَعَلُوا رُعْبَهُمْ فِي أَرْضِ الأَحْيَاءِ. فَحَمَلُوا خِزْيَهُمْ مَعَ الْهَابِطِينَ فِي الْجُبِّ. الكلام هنا علي عيلام. ونفس الفكرة هتتكرر تاني، من صفات حزقيال النبي أنه بيكرر. وده للتأكيد. فهنلاقي تكرار كتير في الجزء الاخير ده من الاصحاح.
" عِيلاَمُ" ... عيلام ده ابن سام، موجود في تكوين 10، وكانت مملكته كبيرة برده. ودول كانوا قبل آشور. وآشور موجودة في تكوين 14.
بعد ما ضعفت عيلام، آشور استولت علي عيلام. كانت عاصمة عيلام: مكان اسمه شوشن. وبعد آشور وبابل، أخدوها مادي وفارس. وخلوها العاصمة بتاعتهم. وشوشن القصر مذكور في قصة استير.
برده الكلام علي الأرض مش من الهاوية. فديه قبور عيلام. يعني كلهم ماتوا. بالرغم انهم نشروا رعبهم في أرض الأحياء.
زمان الممالك كانت بتقوم علي أشلاء المملكة اللي قبلها. بابل تقوم علي أشلاء آشور. ومادي وفارس تقوم علي أشلاء بابل . وهكذا.
"كُلُّهُمْ قَتْلَى سَاقِطُونَ بِالسَّيْفِ، الَّذِينَ هَبَطُوا غُلْفًا إِلَى الأَرْضِ السُّفْلَى،" ... كله سقط بالسيف. مقتولين. وكلمة غُلف: هتتكرر حوالي 10 مرات. اشارة الي العار والهوان.
"الَّذِينَ جَعَلُوا رُعْبَهُمْ فِي أَرْضِ الأَحْيَاءِ." ... برده الناس كلها كانوا بيخافوا من عيلام.
"فَحَمَلُوا خِزْيَهُمْ مَعَ الْهَابِطِينَ فِي الْجُبِّ." ... نزلوا بخزيهم وعارهم الي الهاوية.
محدش يفتكر أن في مملكة تظل للأبد. وكل اللي كانوا بيرعبوا باقي الشعوب، راحوا للهاوية.
25قَدْ جَعَلُوا لَهَا مَضْجَعًا بَيْنَ الْقَتْلَى، مَعَ كُلِّ جُمْهُورِهَا. حَوْلَهُ قُبُورُهُمْ كُلُّهُمْ غُلْفٌ قَتْلَى بِالسَّيْفِ، مَعَ أَنَّهُ قَدْ جُعِلَ رُعْبُهُمْ فِي أَرْضِ الأَحْيَاءِ. قَدْ حَمَلُوا خِزْيَهُمْ مَعَ الْهَابِطِينَ فِي الْجُبِّ. قَدْ جُعِلَ فِي وَسْطِ الْقَتْلَى. " قَدْ جَعَلُوا لَهَا مَضْجَعًا بَيْنَ الْقَتْلَى،" ... لها: المقصود بيها: عيلام. لعيلام.
"مَعَ كُلِّ جُمْهُورِهَا." ... مع كل الشعوب المرتبطة بعيلام، ومتحالفة معاها.
"حَوْلَهُ قُبُورُهُمْ كُلُّهُمْ غُلْفٌ قَتْلَى بِالسَّيْفِ،" ... يعني قبر ملك عيلام وكل جمهوره، وكلهم اتقتلوا بالسيف واتعروا زي ما وضحنا قبل كده. وصاروا في خزي.
"مَعَ أَنَّهُ قَدْ جُعِلَ رُعْبُهُمْ فِي أَرْضِ الأَحْيَاءِ" ... ومع أن رعبهم وقع علي كل الأرض، بس برده جالهم وقت وانتهوا. وبقوا ساكنين في المقابر، أموات. ومن تحت الأرض في الهاوية. كلهم هابطين الخزي الي الهاوية.
26هُنَاكَ مَاشِكُ وَتُوبَالُ وَكُلُّ جُمْهُورِهَا، حَوْلَهُ قُبُورُهَا. كُلُّهُمْ غُلْفٌ قَتْلَى بِالسَّيْفِ، مَعَ أَنَّهُمْ جَعَلُوا رُعْبَهُمْ فِي أَرْضِ الأَحْيَاءِ. الشعب التالت: ماشك وتوبال. قد تكون في تركيا. وده يمكن الرأي الأصح. (وقد تكون ماشك اللي هي موسكو حاليا. توبال في سيبريا).
"حَوْلَهُ قُبُورُهَا." ... برده دول بقوا في القبور. وكل جمهورها: معناه كل اللي كانوا متحالفين معاهم.
"كُلُّهُمْ غُلْفٌ قَتْلَى بِالسَّيْفِ،" ... وبرده كلهم غُلف.
"مَعَ أَنَّهُمْ جَعَلُوا رُعْبَهُمْ فِي أَرْضِ الأَحْيَاءِ." ... وكان برده رعبهم علي الأرض.
27وَلاَ يَضْطَجِعُونَ مَعَ الْجَبَابِرَةِ السَّاقِطِينَ مِنَ الْغُلْفِ النَّازِلِينَ إِلَى الْهَاوِيَةِ بِأَدَوَاتِ حَرْبِهِمْ، وَقَدْ وُضِعَتْ سُيُوفُهُمْ تَحْتَ رُؤُوسِهِمْ، فَتَكُونُ آثَامُهُمْ عَلَى عِظَامِهِمْ مَعَ أَنَّهُمْ رُعْبُ الْجَبَابِرَةِ فِي أَرْضِ الأَحْيَاءِ. يعني من الساقطين في غُلف، دول مش هيضجعوا او يكونوا في نفس المكان مع الجبابرة.
نرجع لآية 21: يعني وهما نازلين للهاوية، في طبقة او درجة في الهاوية خاصة بالجبابرة.
فحزقيال عاوز يقول: أنك يا فرعون مش هتكون مع الجبابرة دول في الهاوية. هيكون ليك مكان أقل منهم. وكل ديه صور بلاغية بيرسمها لنا حزقيال، علشان فرعون يفهم. بس مش عاوز يفهم.
"النَّازِلِينَ إِلَى الْهَاوِيَةِ بِأَدَوَاتِ حَرْبِهِمْ، وَقَدْ وُضِعَتْ سُيُوفُهُمْ تَحْتَ رُؤُوسِهِمْ،" ... مثال للتوضيح مع الفارق: لما أب كاهن يتنيح أو أب أسقف أو أب بطرك، بيحطوا معاه صليبه وانجيله. لأن هذا الأب عاش طول حياته بالصليب والانجيل. ده كان سلاحه في حياته وكان قوته.
زمان برده كانوا بيعملوا حاجة زي كده، جبابرة الحرب كانوا بيدفنوهم بأدوات حربهم. لقيوا بعض الناس مدفونين بسيوفهم اللي كانوا بيحاربوا بيها. علشان يقولوا أن الشخص ده كان جبار في الحروب، وأهو سيفه معاه في قبره. وكانوا بيحطوا سيفه تحت رأسه، علشان ده كان جباربأس. عاش ومات بطل.
طبعا في الهاوية مش هينزلوا بأدوات الحرب ولا حاجة، لكن ده تشبيه. كناية. صورة بلاغية.
"فَتَكُونُ آثَامُهُمْ عَلَى عِظَامِهِمْ مَعَ أَنَّهُمْ رُعْبُ الْجَبَابِرَةِ فِي أَرْضِ الأَحْيَاءِ." ... آثَامُهُمْ عَلَى عِظَامِهِمْ: مش المقصود آثامهم هنا، لكن تميل الترجمة بتاعة آثامهم: الي الدروع. دروع الحرب.
يعني ميت بالسيف تحت رأسه. وملبسينه درع الحرب.
وبالرغم أن كان ليهم رعب علي الأرض، الا انهم ماتوا برده في الأخر.
28أَمَّا أَنْتَ فَفِي وَسْطِ الْغُلْفِ تَنْكَسِرُ وَتَضْطَجعُ مَعَ الْقَتْلَى بِالسَّيْفِ. "أَمَّا أَنْتَ" ... أنت: المقصود بيه فرعون.
" أَمَّا أَنْتَ فَفِي وَسْطِ الْغُلْفِ تَنْكَسِرُ" ... بعد ماربنا أداله 3 أمثلة للجبابرة، يا فرعون أنت بقي مش هتبقي مع الجبابرة، جبابرة الحرب.
"وَتَضْطَجعُ مَعَ الْقَتْلَى بِالسَّيْف." ... للتسهيل هنقول: اما أنت يا فرعون فهتتكسر في الحرب بالسيف. وأنت في الحرب هتتكسر بالسيف. وتُهزم، وهتبقي مع القتلي الساقطين بالسيف. وهتتعري. يعني هينطبق عليك كل كلام العار ده. (الجزء ده شرحناه قبل كده.). وكمان هتضطجع بين غير المختونين في الهاوية.
29هُنَاكَ أَدُومُ وَمُلُوكُهَا وَكُلُّ رُؤَسَائِهَا الَّذِينَ مَعَ جَبَرُوتِهِمْ قَدْ أُلْقُوا مَعَ الْقَتْلَى بِالسَّيْفِ، فَيَضْطَجِعُونَ مَعَ الْغُلْفِ وَمَعَ الْهَابِطِينَ فِي الْجُبِّ. المثال الرابع هو أدوم. أدوم شوفناها في حزقيال 25و 26. نفس الفكرة بنفس التكرار. مصيرهم زي مصير عيلام وآشور وماشك وتوبال.
كلهم علي الأرض يُقتلون بالسيف، ويُحسبوا مع الساقطين بالسيف. ويُعروا ويُدفنوا دفن عار. وبعدين يهبطوا للهاوية بخزي وعار مع غير المختونين. في طبقات الهاوية السفلي.
30هُنَاكَ أُمَرَاءُ الشِّمَالِ كُلُّهُمْ وَجَمِيعُ الصَّيْدُونِيِّينَ الْهَابِطِينَ مَعَ الْقَتْلَى بِرُعْبِهِمْ، خَزُوا مِنْ جَبَرُوتِهِمْ وَاضْطَجَعُوا غُلْفًا مَعَ قَتْلَى السَّيْفِ، وَحَمَلُوا خِزْيَهُمْ مَعَ الْهَابِطِينَ إِلَى الْجُبِّ. المجموعة أو المثال الأخير: أمراء الشمال، كل أمراء شمال فلسطين ومنهم بتوع صيدا وصُور.
برده كانوا عاملين رعب وفي الأخر اتقتلوا وماتوا.
"خَزُوا مِنْ جَبَرُوتِهِمْ" ... بالرغم من كل جبروتهم، لكن في الأخر أخدوا الخزي.
ياريت الناس في كل مكان وزمان يفهموا: أنه مش بالقوة ولا بالقدرة. مش بالثروة المادية بتاعتك ولا بنفوذك وسلطانك. في الأخر هتموت يا مسكين. وبعد ما كنت عامل رعب للناس حواليك، يبقي مصيرك زي مصير آشور وغيره. وهتنزل للجحيم بالخزي. فالأحسن الواحد يقدم توبة من دلوقتي.
"وَاضْطَجَعُوا غُلْفًا مَعَ قَتْلَى السَّيْفِ،" ... اتقالت قبل كده، انهم مصيرهم القتل، وهيبقي مع الغُلف اللي مش مختونين.
"وَحَمَلُوا خِزْيَهُمْ مَعَ الْهَابِطِينَ إِلَى الْجُبِّ." ... برده نزلوا بالخزي للهاوية. كل اللي فضلوا ماشين في عِندهم وجبروتهم ومقدموش توبة، هيكون مصيرهم الهاوية.
31يَرَاهُمْ فِرْعَوْنُ وَيَتَعَزَّى عَنْ كُلِّ جُمْهُورِهِ. قَتْلَى بِالسَّيْفِ فِرْعَوْنُ وَكُلُّ جُمْهُورِهِ، يَقُولُ السَّيِّدُ الرَّبُّ. حتة غريبة: علشان نشوف الأشرار حتي وهما في الهاوية، بيفرحوا ويتعزوا بمصايب غيرهم.
حزقيال النبي يقولنا ايه اللي بيعزي الأشرار. من اصحاح 31: 16 لما فرعون سقط، نقدر نعرف ايه اللي عزي باقي الأمم "من صوت سقوطه ..... كل شاربة ماء." يعني لما فرعون يسقط، الباقيين يتعزوا.
وفرعون نازل في الهاوية وبيتفرج، أدي آشور- عيلام – توبال وماشك – أدوم – صُور – صيدا. يقول الكتاب المقدس "يراهم فرعون ويتعزي ...." وديه تعزية مؤذية. فرعون فرحان أن معاه في الهاوية أشرار تاني غيره. و تعزية الأشرار التانين بوجود فرعون معاهم في الهاوية.
"الفرحان ببلية، لا يتبرأ."
معرفوش غير الشر علي الأرض. فالحاجة الوحيدة اللي تعزيهم في الهاوية، هي الشر برده. ميقدروش يعيشوا في قداسة أو بر أو طهارة. لأنهم مجربوش ولا عرفوا الطهارة ولا النقاوة علي الأرض.
فرحتهم أن كلهم هالكين.
32لأَنِّي جَعَلْتُ رُعْبَهُ فِي أَرْضِ الأَحْيَاءِ، فَيُضْجَعُ بَيْنَ الْغُلْفِ مَعَ قَتْلَى السَّيْفِ، فِرْعَوْنُ وَكُلُّ جُمْهُورِهِ، يَقُولُ السَّيِّدُ الرَّبُّ». " لأَنِّي جَعَلْتُ رُعْبَهُ فِي أَرْضِ الأَحْيَاءِ،" ... الكلام علي فرعون، لما كان عايش.
"فَيُضْجَعُ بَيْنَ الْغُلْفِ مَعَ قَتْلَى السَّيْفِ، فِرْعَوْنُ وَكُلُّ جُمْهُورِهِ، يَقُولُ السَّيِّدُ الرَّبُّ." ... خلاص الأمر خرج من قِبل الرب. فرعون وكل جنوده هينزلوا بخزي وعار شديد الي الهاوية. وبكده هيعيش في هلاك أبدي لأنه متابش.
⪢