⪡ 1وَكَانَ إِلَيَّ كَلاَمُ الرَّبِّ قَائِلاً: نقاد الكتاب المقدس او القارئين السطحيين لكلمة الله، بيسموا الاصحاحات الخاصة بمدينة صُور (26-27-28) الاصحاحات المملة.
لكن في المقابل الدارسين بعمق لكلمة الله، يقولوا ما جاء في سفر حزقيال في التلات اصحاحات دول، لم يأتي في مكان آخر في كلمة الله. وكمان عرفنا منه حاجات مكانش ممكن نعرفها غير لما ذكرها حزقيال في الاصحاحات ديه.
اصحاح 28 الجزء الاول منه: نبوة ضد ملك صُور. وملك صُور في النبوة هنا، وكمان في نبوة ضد ملك بابل في اشعياء 14، الاتنين رمز للشيطان.
في آية 2 في الاصحاح هنا: " مِنْ أَجْلِ أَنَّهُ قَدِ ارْتَفَعَ قَلْبُكَ وَقُلْتَ: أَنَا إِلهٌ. فِي مَجْلِسِ الآلِهَةِ أَجْلِسُ فِي قَلْبِ الْبِحَارِ." ... ده صورة مصغرة للشيطان.
وفي اشعياء 14: وديه الاحداث اللي عرفنا بيها ازاي الشيطان سقط. آيات من 12 ل 15: " َكيْفَ سَقَطْتِ مِنَ السَّمَاءِ يَا زُهَرَةُ، بِنْتَ الصُّبْحِ؟ كَيْفَ قُطِعْتَ إِلَى الأَرْضِ يَا قَاهِرَ الأُمَمِ؟ وَأَنْتَ قُلْتَ فِي قَلْبِكَ: أَصْعَدُ إِلَى السَّمَاوَاتِ. أَرْفَعُ كُرْسِيِّي فَوْقَ كَوَاكِبِ اللهِ، وَأَجْلِسُ عَلَى جَبَلِ الاجْتِمَاعِ فِي أَقَاصِي الشَّمَالِ. لكِنَّكَ انْحَدَرْتَ إِلَى الْهَاوِيَةِ، إِلَى أَسَافِلِ الْجُبِّ.". أَصْعَدُ فَوْقَ مُرْتَفَعَاتِ السَّحَابِ. أَصِيرُ مِثْلَ الْعَلِيِّ
فديه كانت النتيجة ان الشيطان انحدر للهاوية. فالملكين دول رمز للشيطان.
وكمان كان في حتة شبهها عن فرعون مصر في حزقيال 29 : 9.
كانت خطية ملك صُور الذات والكبرياء.
ربنا كلم حزقيال وبيقوله:
2«يَا ابْنَ آدَمَ، قُلْ لِرَئِيسِ صُورَ: هكَذَا قَالَ السَّيِّدُ الرَّبُّ: مِنْ أَجْلِ أَنَّهُ قَدِ ارْتَفَعَ قَلْبُكَ وَقُلْتَ: أَنَا إِلهٌ. فِي مَجْلِسِ الآلِهَةِ أَجْلِسُ فِي قَلْبِ الْبِحَارِ. وَأَنْتَ إِنْسَانٌ لاَ إِلهٌ، وَإِنْ جَعَلْتَ قَلْبَكَ كَقَلْبِ الآلِهَةِ! ربنا بيكلم حزقيال، وهنا بيقول رئيس صُور، وفي آية 12 بيقول ملك صُور. والاتنين مترادفين: الرئيس والملك. فالكلام عن نفس الشخص.
بيقولوا قسموا أول 10 آيات لجزئين:
- أول جزء: فيها "من أجل"
- تاني جزء: من آية 7 "لذلك."
ليستة (قايمة) الاتهامات بتاعة ملك صُور... " مِنْ أَجْلِ أَنَّهُ قَدِ ارْتَفَعَ قَلْبُكَ". كلمة قلب هتتذكر في أول 10 آيات حوالي 8 مرات. لأن من القلب مخارج الحياة. والقلب في النص اللي قدامنا ده، هو مركز كبرياء ملك صُور. مركز حكمة ملك صُور. ويُشير الي أعماق البحار ... "قَلْبِ الْبِحَار".
" وَقُلْتَ: أَنَا إِلهٌ." ... الإنسان لما يحب يأله نفسه. لما يعوز يبقي إله.
" فِي مَجْلِسِ الآلِهَةِ" ... في وسط الالهة، أنا إله.
" أَجْلِسُ فِي قَلْبِ الْبِحَارِ." ... في وسط المية.
حرب الكبرياء: ديه الحرب اللي الشيطان من بداية الخليقة هو نفسه وقع فيها. وحارب آدم وحواء بالخطية ديه، ووقعهم فيها. " تنفتح أعينكما وتصيران مثل الله." ربنا يحميها كلنا من خطية الكبرياء: "قبل الكسر الكبرياء. وقبل السقوط تشامخ الروح."
فربنا بيقوله " وَأَنْتَ إِنْسَانٌ لاَ إِلهٌ، ".
" وَإِنْ جَعَلْتَ قَلْبَكَ كَقَلْبِ الآلِهَةِ " ... يعني حتي لو أنت حاطط جوة قلبك إنك إله من الآلهة. علي فكرة أهل صُور كان عندهم المشكلة ديه، حتي الي زمن ربنا يسوع المسيح له المجد. (نلاحظ ده لما هيرودس ليس الحُلة الملوكية ووقف يتكلم، اللي ألهوه او عاملوه زي اله، هما كانوا أهل صُور. وقالوله: ده صوت إله. لا صوت انسان. وفي وقتها ربنا ضربه بالدود. أعمال الرسل 12.).
3هَا أَنْتَ أَحْكَمُ مِنْ دَانِيآلَ! سِرٌّ مَا لاَ يَخْفَى عَلَيْكَ. " هَا أَنْتَ أَحْكَمُ مِنْ دانيال!" ... ده نوع من التوبيخ. لما حبوا يقارنوا ملك صُور في الحكمة، قارنوه بدانيال النبي. لأن شهرة دانيال في الوقت ده، أنه رجل حكمة. شديد الحكمة. شديد المعرفة. ولا يُخفي عنه سر. والكلام ده انتشر في كل أنحاء العالم. مش في بابل بس. لدرجة أن ربنا له المجد لما حب يبكت ملك صُور قاله: هو انت يعني فاكر نفسك أحكم من دانيال؟
"سِرٌّ مَا لاَ يَخْفَى عَلَيْكَ" ... ربنا بيقوله: أنت إنسان. وموصلتش حتي لدانيال في حكمته.
4وَبِحِكْمَتِكَ وَبِفَهْمِكَ حَصَّلْتَ لِنَفْسِكَ ثَرْوَةً، وَحَصَّلْتَ الذَّهَبَ وَالْفِضَّةَ فِي خَزَائِنِكَ. مشكلة ملك صُور: انه كان عنده حاجتين، وافتكر ان الحاجتين دول عنده من تلقاء نفسه. اللي هما الحكمة والفهم. وافتكر انه عملهم لنفسه وبنفسه.
أي عطية ربنا بيديهالنا، المفروض بنمجد ربنا بيها. مش نفتخر بيها ونسرق مجد ربنا. "ليس لنا يارب. ليس لنا. لكن لاسمك أعطي مجد." إذا الموهبة عطية من ربنا. مش بشطارتك. ديه نعمة من ربنا. فالمفروض الواحد يكون أمين علي النعمة اللي أدهاله ربنا. ويُعطي المجد لله.
" وَبِحِكْمَتِكَ وَبِفَهْمِكَ حَصَّلْتَ لِنَفْسِكَ ثَرْوَةً،" ... كان شاطر جدا في التجارة، وعمل ثروة وغِني فظيع.
"وَحَصَّلْتَ الذَّهَبَ وَالْفِضَّةَ فِي خَزَائِنِكَ" ... كان عنده ذهب وفضة ملهومش أخر.
*واللي وصف موضوع الغِني ده اكتر هو زكريا النبي (زكريا 9: 2 "صُور وصيدون .... كطين الاسواق." يعني عندهم ذهب وفضة كتير جدا. زي التراب.)
5بِكَثْرَةِ حِكْمَتِكَ فِي تِجَارَتِكَ كَثَّرْتَ ثَرْوَتَكَ، فَارْتَفَعَ قَلْبُكَ بِسَبَبِ غِنَاكَ. ملك صُور مقدرش يستحمل الحكمة والفهم والغِني الفظيع ده كله. وابتدي يتجبر ويتأله ... " فَارْتَفَعَ قَلْبُكَ بِسَبَبِ غِنَاكَ".6فَلِذلِكَ هكَذَا قَالَ السَّيِّدُ الرَّبُّ: مِنْ أَجْلِ أَنَّكَ جَعَلْتَ قَلْبَكَ كَقَلْبِ الآلِهَةِ، "مِنْ أَجْلِ أَنَّكَ جَعَلْتَ قَلْبَكَ كَقَلْبِ الآلِهَةِ" ... اتقالت في آية 2. 7لِذلِكَ هأَنَذَا أَجْلِبُ عَلَيْكَ غُرَبَاءَ، عُتَاةَ الأُمَمِ، فَيُجَرِّدُونَ سُيُوفَهُمْ عَلَى بَهْجَةِ حِكْمَتِكَ وَيُدَنِّسُونَ جَمَالَكَ. ده الجزء التاني بتاع "لذلك".
" عُتَاةَ الأُمَمِ،" ... المقصود بيهم البابليين.
" بَهْجَةِ حِكْمَتِكَ" ... جمال حكمتك.
فهنا ربنا بيقوله: كل ده الي زوال. كل اللي فرحان ومفتخر بيه، سواء حكمة او جمال او غِني أو أي حاجة. كل ده البابليين هيجردوك منه.
" وَيُدَنِّسُونَ جَمَالَكَ" ... صُور مدينة جميلة، هيدنسوها ويدمروها ومش هيخلوا فيها حاجة. حتي التراب هيرموه في البحر، علشان ميقدروش يبنوا مدينة صُور تاني.
8يُنَزِّلُونَكَ إِلَى الْحُفْرَةِ، فَتَمُوتُ مَوْتَ الْقَتْلَى فِي قَلْبِ الْبِحَارِ. الحفرة المقصود بيها الهاوية.
"فَتَمُوتُ مَوْتَ الْقَتْلَى فِي قَلْبِ الْبِحَار" ... لأن البابليين حاصروا مدينة صُور فترة طويلة. وخلاص هيخلّصوا عليهم. ومش هيموت موت عادي. لكن هيموت بالسيف. الكلام علي ملك صُور. وقلب البحار: اللي كانوا بيفتخروا بيه، هو ده المكان اللي هيموت فيه الملك. سبب افتخاره (البحار) هو نفسه سبب موته وهلاكه.
9هَلْ تَقُولُ قَوْلاً أَمَامَ قَاتِلِكَ: أَنَا إِلهٌ؟ وَأَنْتَ إِنْسَانٌ لاَ إِلهٌ فِي يَدِ طَاعِنِكَ! ربنا بيقول: ورينا هتقول ايه قدام اللي هيقتلوك. هتفضل برده تقولهم انا إله؟
"وَأَنْتَ إِنْسَانٌ لاَ إِلهٌ فِي يَدِ طَاعِنِكَ" ... زمان في الحروب مش مجرد انهم كانوا بيموتوا وبس، لكن كمان كانوا بيشهروا بالجثث. وطالما أنت بتموت، فأنت إنسان / بشر. مش إله زي ما أنت فاكر أول بتقول
10مَوْتَ الْغُلْفِ تَمُوتُ بِيَدِ الْغُرَبَاءِ، لأَنِّي أَنَا تَكَلَّمْتُ، يَقُولُ السَّيِّدُ الرَّبُّ». يعني موت شنيع. موت فيه احتقار. مفيهوش أي كرامة خالص.
الكلام ده اتذكر في حزقيال 31: 18 وحزقيال 32 : 9.
اصحاح 28 ده اصحاح متميز في سفر حزقيال. نقدر نأخد من أول الآية 11. ونحطه جنب قصة الخلق في سفر التكوين اصحاح 1 و 2 .
كنا أول مرة نقرأ عنها في اصحاح 28. لكن للدقة أكتر، قرينا عنها في اشعياء 14. فنحط حزقيال 28 مع اشعياء 14 ... وده كلام عن سقوط الشيطان.
هنلاقي الكلام هنا موجه كأنه الي شخصين، شخصية كأنها حاجة كده فوق البشر: وده هنأخده علي الشيطان قبل سقوطه. والجزء التاني نأخده علي ملك صُور.
وهنلاقي الكلام متداخل، فيما هو يتكلم علي الشيطان لما كان كاروب. يبتدي يدخل علي ملك صُور. والكلام أساسا موجه لملك صُور.. ولما يبقي الكلام واضح وصريح عن ملك صُور، نلاقي في حتة كده عن سقوط الشيطان. فديه من الحتت المميزة في سفر حزقيال. وديه مرثاة.
والجزء ده بينقسم لقسمين:
1) القسم الاول: أية من 12 ل 15. ده المجد الاول اللي كان عليه الشيطان قبل مايسقط.
2) القسم التاني: من أية 16 ل 19. وديه العقوبة اللي أخدها الشيطان.
وطبعا الخطية اللي أسقطت الشيطان هي: الكبرياء.
هنلاقي 3 حاجات لم يحتملهم الشيطان وهما دول اللي أسقطوه: - جمال – حكمة – غِني.
فالشيطان مستحملش التلاتة دول وسقط.
نقول حاجة هنا: اذا كان ربنا لم يشفق علي شعبه وعاقبهم لما غلطوا. فكان بالأولي الأمم اللي حوالين شعبه، علشان يفقوا لنفسهم. فاذا كان ربنا عاقب شعبه، فبالضرورة هيعاقب هذه الأمم عندما تخطئ. لأنهم برده فضلوا في خطيتهم ومفاقوش. فاتعاقبوا.
والحقيقة كمان أن الشاروبيم سيدينوا الشيطان. لأنه كان طغمة من طغمات الشاروبيم وسقط. كان واحد في وسطهم.
11وَكَانَ إِلَيَّ كَلاَمُ الرَّبِّ قَائِلاً: ربنا كلم حزقيال تاني ، وقاله:12«يَا ابْنَ آدَمَ، ارْفَعْ مَرْثَاةً عَلَى مَلِكِ صُورَ وَقُلْ لَهُ: هكَذَا قَالَ السَّيِّدُ الرَّبُّ: أَنْتَ خَاتِمُ الْكَمَالِ، مَلآنٌ حِكْمَةً وَكَامِلُ الْجَمَالِ. " يَا ابْنَ آدَمَ،" ... العبارة المشهورة لسفر حزقيال.
" ارْفَعْ مَرْثَاةً عَلَى مَلِكِ صُور" ... وكأن ملك صُور ميت في حكم ربنا.
" وَقُلْ لَهُ: هكَذَا قَالَ السَّيِّدُ الرَّبُّ: أَنْتَ خَاتِمُ الْكَمَالِ، مَلآنٌ حِكْمَةً وَكَامِلُ الْجَمَالِ." ... الكلمات ديه متنطبقش خالص علي بشر. لكن ديه كلمات صريحة عن سقوط الشيطان.
" أَنْتَ خَاتِمُ الْكَمَالِ،" ... معناه: أنا ربنا خلقتك في صورة شِبه الكمال. في المقاييس: أنت تُعتبر كامل. خلقتك في أبهي وأجمل صورة.
"مَلآنٌ حِكْمَةً" ... شوفناها في حزقيال 27 وهو بيتكلم عن ملك صُور
"وَكَامِلُ الْجَمَالِ." ... برده مكررة في حزقيال 27. لما صُور بتقول: أنا كاملة الجمال من جهة الحكمة، مليان حكمة. من جهة الجمال، حاجة أخر جمال. ... الشيطان قبل سقوطه، كان طغمة من الشاروبيم الملآنة جمال. ربنا خلقه بفن. فربنا بيقوله اتخلق في أبهي وأكمل صورة ممكن تُخلق عليها.
فديه مش تعبيرات تنطبق علي بشر خالص. لكن علي الكاروبيم قبل ما يسقط ويصير شيطان.
13كُنْتَ فِي عَدْنٍ جَنَّةِ اللهِ. كُلُّ حَجَرٍ كَرِيمٍ سِتَارَتُكَ، عَقِيقٌ أَحْمَرُ وَيَاقُوتٌ أَصْفَرُ وَعَقِيقٌ أَبْيَضُ وَزَبَرْجَدٌ وَجَزْعٌ وَيَشْبٌ وَيَاقُوتٌ أَزْرَقُ وَبَهْرَمَانُ وَزُمُرُّدٌ وَذَهَبٌ. أَنْشَأُوا فِيكَ صَنْعَةَ صِيغَةِ الفُصُوصِ وَتَرْصِيعِهَا يَوْمَ خُلِقْتَ. " كُنْتَ فِي عَدْنٍ جَنَّةِ اللهِ." ... ربنا خلقه قريب من العرش الالهي. عَدْنٍ: اتكررت كتير في سفر حزقيال. ومذكور عنها أنها جنة الله. غير عِدن المدينة اللي اتذكرت في الاصحاح اللي فات.
من ضمن زينته وجماله والعظمة اللي اتخلق عليها، هيذكر: أحجار كريمة كانت زينته.
(الأحجار الكريمة ديه اتذكر منها 9 من 12 حجر كريم، اللي كانوا موجودين علي صدرة رئيس الكهنة اللي كان بيلبسها في العهد القديم. رئيس الكهنة عنده صدرة زي بتاعة الكاهن حاليا. وفيها جزء علي صدره فيها 4 صفوف. كل صف فيه 3 أحجار كريمة، رمز للأسباط اسرائيل ال 12. يعني رئيس الكهنة يحمل أسباط بني اسرائيل ال 12، ويقف أمام الله في وقت خدمته)
فهنا ربنا بيقوله: أنت كان فيك الجمال ده. خلقتك في أبهي صورة. وزينتك بكل الزينة الممكنة. وقال 9 من الأحجار الكريمة ديه.
في خروج 28 اتذكرت صدرة رئيس الكهنة. ونشوفها مع حزقيال 28 هنا، لما نحط الاربع صفوف اللي علي صدرة رئيس الكهنة مع ال 3 صفوف اللي اتذكروا هنا في حزقيال. هنلاقي الفرق الآتي:
في حزقيال 3 أحجار كريمة متذكرتش، وفي ترتيب شِبه مختلف في حزقيال. بعدين هنوضح ليه.
"كُلُّ حَجَرٍ كَرِيمٍ سِتَارَتُكَ،" ... ستارتك: يعني زينتك، أنت متزين بكل حجر كريم.
"عَقِيقٌ أَحْمَرُ وَيَاقُوتٌ أَصْفَرُ وَعَقِيقٌ أَبْيَضُ وَزَبَرْجَدٌ وَجَزْعٌ وَيَشْبٌ وَيَاقُوتٌ أَزْرَقُ وَبَهْرَمَانُ وَزُمُرُّدٌ" ... لغاية هنا ينتهوا ال 9 أحجار الكريمة.
عاوز يقول: أن ملك صُور كان في جمال عظيم جدا. وكان يعتبر الكاهن الأعظم للإله بتاع مدينة صُور. لكن علشان ميبقاش في تطابق بين ملك صُور، وبين صدرة رئيس الكهنة متقالش ال 12 حجر كريم. وحتي التسعة احجار الكريمة مش بنفس الترتيب. علشان محدش يقول أدي رئيس كهنة اليهود زي الملك الوثني بتاع صُور.
"وَذَهَبٌ." ... في أصلها العبري: الدفوف بتاعتك اللي متزين بيها ديه كانت من ذهب. (وعلشان توضح معانا الحتة ديه نشوف ارميا 31: 3 " تَرَاءَى لِي الرَّبُّ مِنْ بَعِيدٍ: «وَمَحَبَّةً أَبَدِيَّةً أَحْبَبْتُكِ، مِنْ أَجْلِ ذلِكَ أَدَمْتُ لَكِ الرَّحْمَةَ. سَأَبْنِيكِ بَعْدُ، فَتُبْنَيْنَ يَا عَذْرَاءَ إِسْرَائِيلَ. تَتَزَيَّنِينَ بَعْدُ بِدُفُوفِكِ، وَتَخْرُجِينَ فِي رَقْصِ اللاَّعِبِينَ." ... فهنا لما قال الزينة: قالها علي الدفوف، يعني المزامير والآلات الموسيقية)
فكأن ربنا بيقول: هذا الكاروبيم كان مسئول عن التسبيح. ومُزَين بالتسبيح. ومع كده معجبهوش أنه يسبح ربنا له المجد. وأراد أن يضع كرسيه فوق كرسي العليً. ويبقي أعلي من ربنا فسقط.
ربنا خلاه كامل الجمال والحكمة وحاجة أخر عظمة، ومسئول في التسبيح ويحمل العرش الالهي. معجبهوش كل ده، ودخله الكبرياء، فسقط.
كمان الشُراح: قالوا لو أخدناها علي ملك صُور، كأن ربنا بيقوله: بالرغم من كل العظمة ديه اللي أنت فيها. لكن في الأخر أنت انسان.
"أَنْشَأُوا فِيكَ صَنْعَةَ صِيغَةِ الفُصُوصِ وَتَرْصِيعِهَا يَوْمَ خُلِقْتَ." ... ديه الجزء اللي قولنا عليه، ان ربنا قاله ان كانت مسئوليته التسبيح والدفوف.
14أَنْتَ الْكَرُوبُ الْمُنْبَسِطُ الْمُظَلِّلُ، وَأَقَمْتُكَ. عَلَى جَبَلِ اللهِ الْمُقَدَّسِ كُنْتَ. بَيْنَ حِجَارَةِ النَّارِ تَمَشَّيْتَ. يعني ربنا خلقه كاروب. أوقات " الْمُظَلِّلُ،" تترجم الممسوح. يعني ربنا خلقه. يعني رنبا خلقه ومسحه علشان يفضل بجوار العرش الالهي. أو حامل العرش الالهي. لكن هو معجبهوش كده. فهنا ربنا بيمدحه. فده مديح من ربنا، لكن للأسف ربنا يرحمنا لان الكبرياء شئ مؤلم.
"عَلَى جَبَلِ اللهِ الْمُقَدَّسِ كُنْتَ. بَيْنَ حِجَارَةِ النَّارِ تَمَشَّيْتَ." ... المقصود بالآية ديه: أنه كان قريب أوي من العرش الالهي. جبل الله المقدس: يعني عاوز يقول: ده كان في أعالي السنوات. والجبل المقدس: لما تُستخدم في أسفار الأنبياء، اشارة الي جبل الهيكل في أورشليم. فبرده معناها: حضرة الله.
وبرده حجارة النار: المقصود بيها الحضرة الالهية.
وحزقيال لما وصف شِبه مجد الرب، شوفنا النار والجمر المتوهج.
قالوا ملحوظة صغيرة هنا: " تَمَشَّيْتَ." ... بالعبري هي نفس الكلمة اللي اتقالت " وصار" لما اتقال وصار نوح مع الله. فكلمة صار هي نفسها كلمة تشميت. يعني ربنا خلاه قريب أوي منه.
15أَنْتَ كَامِلٌ فِي طُرُقِكَ مِنْ يَوْمَ خُلِقْتَ حَتَّى وُجِدَ فِيكَ إِثْمٌ. ربنا بيقوله: أنت كامل، من يوم ما خلقتك لم تكن مُعوزا لشئ آخر. مكانش ناقصك حاجة أبدا.
"حَتَّى وُجِدَ فِيكَ إِثْم." ... بكل أسف دخل فيه إثم، خطية الكبرياء. فبدل الطبيعة النارية النورانية اللي اتخلق عليها، صار طبيعة مُظلمة مليانة خطية.
16بِكَثْرَةِ تِجَارَتِكَ مَلأُوا جَوْفَكَ ظُلْمًا فَأَخْطَأْتَ. فَأَطْرَحُكَ مِنْ جَبَلِ اللهِ وَأُبِيدُكَ أَيُّهَا الْكَرُوبُ الْمُظَلِّلُ مِنْ بَيْنِ حِجَارَةِ النَّارِ. هيبتدي الكلام علي ملك صُور. او هيتنقل الكلام علي ملك صُور.
" بِكَثْرَةِ تِجَارَتِكَ مَلأُوا جَوْفَكَ ظُلْمًا فَأَخْطَأْتَ." ... شوفنا أن صُور تاجرت بكل أنواع التجارة، وبقت غنية جدا. وكانت من أشهر المدن في التجارة. وبنوا مباني جميلة وشيك اوي. ومع كده: ارتفع قلبهم وسقطوا.
"فَأَطْرَحُكَ مِنْ جَبَلِ اللهِ وَأُبِيدُكَ أَيُّهَا الْكَرُوبُ الْمُظَلِّلُ مِنْ بَيْنِ حِجَارَةِ النَّارِ." ... هنا الكلام عن سقوط الكاروب، وهو ده التداخل بين الاتنين. والاتنين هيأخدوا العقوبة.
أيها الكاروب. الشيطان الساقط. ابعد عن العرش الإلهي وهتصير مُظلما.
بيقولوا هنا: أن كثرة التجارة اللي كان فيها، خليته يغتني جدا. يبقي غني جدا.
(كان في حتة مكناش عارفينها بس هوشع النبي قالهالنا، هوشع 12: 7 "مِثْلُ الْكَنْعَانِيِّ فِي يَدِهِ مَوَازِينُ الْغِشِّ. يُحِبُّ أَنْ يَظْلِمَ." الكنعاني: اللي هو من صُور. فربنا هنا بيقول أن تجار صُور، هما تجار دخل لهم الغش، وبقت موازينهم موازين غش. وديه حتة مكناش عارفينها. فملك صُور كان ممكن يبقي غني بطريقة محترمة وكويسة. لكن طلع نصاب حتي في تجارته.) . المهم أن التجارة اللي اغتنوا بيها كانت بالظلم.
17قَدِ ارْتَفَعَ قَلْبُكَ لِبَهْجَتِكَ. أَفْسَدْتَ حِكْمَتَكَ لأَجْلِ بَهَائِكَ. سَأَطْرَحُكَ إِلَى الأَرْضِ، وَأَجْعَلُكَ أَمَامَ الْمُلُوكِ لِيَنْظُرُوا إِلَيْكَ. " قَدِ ارْتَفَعَ قَلْبُكَ لِبَهْجَتِكَ." ... وساعات تترجم: تشامخ قلبك من جمالك. علشاان جميل أوي، اتكبر وقلبه انتفخ.
"أَفْسَدْتَ حِكْمَتَكَ لأَجْلِ بَهَائِكَ." ... بسبب البهاء والجلال اللي عليك، مقدرتش تستحمل ده. فحكمتك راحت.
"سَأَطْرَحُكَ إِلَى الأَرْضِ، وَأَجْعَلُكَ أَمَامَ الْمُلُوكِ لِيَنْظُرُوا إِلَيْكَ." ... دخلنا كده في الكلام عن ملك صُور.
18قَدْ نَجَّسْتَ مَقَادِسَكَ بِكَثْرَةِ آثَامِكَ بِظُلْمِ تِجَارَتِكَ، فَأُخْرِجُ نَارًا مِنْ وَسْطِكَ فَتَأْكُلُكَ، وَأُصَيِّرُكَ رَمَادًا عَلَى الأَرْضِ أَمَامَ عَيْنَيْ كُلِّ مَنْ يَرَاكَ. قَدْ نَجَّسْتَ مَقَادِسَكَ: مش ممكن تتقال علي ملك صُور. تقديس المقادس بتتقال علي اليهود. فهنا بيقول: أنت مستحملتش كل المجد والكرامة اللي حطيتك فيهم. ونجست نفسك بالكبرياء والخطية. فالآية نفسها فيها حتة عن الكاروب.
ويكمل الكلام عن ملك صُور.
" بِظُلْمِ تِجَارَتِكَ،" ... تجارة ظالمة بتاعة ملك صُور.
"فَأُخْرِجُ نَارًا مِنْ وَسْطِكَ فَتَأْكُلُكَ،" ... شوفنا قبل كده، النار التي تخرج من الوسط وتأكل. شوفناه في حزقيال 19، يعني خطيته اللي اتكبر بيها، هي سبب سقوطه.
"وَأُصَيِّرُكَ رَمَادًا عَلَى الأَرْضِ أَمَامَ عَيْنَيْ كُلِّ مَنْ يَرَاكَ." ... عاوز يقول: عقوبة الاشرار أو عقوبة الشيطان يُعبر عنها بالآية ديه. وكان هلاك رئيس صور، أو الشيطان أمام أعين كل البشر عبرة للكل؛ حتى يبتعدوا عن الشر. إذ يتعجب الكل لرؤيتهم زوال عظمة الكبرياء، والنهاية الفظيعة المهولة لكل منهما وفناء قوتهما إلى الأبد.
19فَيَتَحَيَّرُ مِنْكَ جَمِيعُ الَّذِينَ يَعْرِفُونَكَ بَيْنَ الشُّعُوبِ، وَتَكُونُ أَهْوَالاً وَلاَ تُوجَدُ بَعْدُ إِلَى الأَبَدِ». كل اللي يشوفه هيتحير: بقي دول بتوع صُور المدينة العظيمة؟ اللي مش بتقع؟ المدينة الجميلة بتاعة التجارة، ايه اللي حصلها؟
"وَتَكُونُ أَهْوَالًا وَلاَ تُوجَدُ بَعْدُ إِلَى الأَبَد." ... خلاص انتهت. الكل هيستعجب ويتحير من اللي حصل فيها.
وديه أخر حاجة عن صُور.
20وَكَانَ إِلَيَّ كَلاَمُ الرَّبِّ قَائِلاً: وهيبتدي نبوة عن صيدا أو اسمها صيدون. وبيقولوا إنها مدينة فوق صُور تقريبا ب 40 كيلو.
ربنا كلم حزقيال تاني وقاله:
21«يَا ابْنَ آدَمَ، اجْعَلْ وَجْهَكَ نَحْوَ صَيْدُونَ وَتَنَبَّأْ عَلَيْهَا، من الآية ديه لأخر الاصحاح، بيقولوا اتذكر فيها "فيعلمون اني انا الرب" حوالي 5 مرات. ربنا قال لحزقيال انه يتنبأ علي صيدون او اللي هي نفسها صيدا. ده دورها في العقاب.
كل العقوبات اللي ربنا بيسمح بيها بتكون لأجل توبة الناس. وانهم يرجعوا لربنا.
22وَقُلْ: هكَذَا قَالَ السَّيِّدُ الرَّبُّ: هأَنَذَا عَلَيْكِ يَا صَيْدُونُ وَسَأَتَمَجَّدُ فِي وَسْطِكِ، فَيَعْلَمُونَ أَنِّي أَنَا الرَّبُّ حِينَ أُجْرِي فِيهَا أَحْكَامًا وَأَتَقَدَّسُ فِيهَا. فالله سيعاقب صيدون، وبالعقاب، أو الأحكام ديه، يتمجد الله أمام كل الأمم وأمام شعبه أيضًا. فإن من يصر على الكبرياء ويستهزئ بغيره، لاعتماده على قوته وتجارته وغناه، مثل صيدون، سيهلك في النهاية.
" وَأَتَقَدَّسُ فِيهَا." ... يعني أتمجد فيها.
23وَأُرْسِلُ عَلَيْهَا وَبَأً وَدَمًا إِلَى أَزِقَّتِهَا، وَيُسْقَطُ الْجَرْحَى فِي وَسْطِهَا بِالسَّيْفِ الَّذِي عَلَيْهَا مِنْ كُلِّ جَانِبٍ، فَيَعْلَمُونَ أَنِّي أَنَا الرَّبُّ. " وَأُرْسِلُ عَلَيْهَا وَبَأً وَدَمًا إِلَى أَزِقَّتِهَا،" ... شوفناها كتير واحنا بندرس حزقيال 5 ضد أورشليم: وبأ ودم.
وهنشوفها تاني في حزقيال 38: ضد جوج.
"وَيُسْقَطُ الْجَرْحَى فِي وَسْطِهَا بِالسَّيْفِ الَّذِي عَلَيْهَا مِنْ كُلِّ جَانِبٍ،" ... فهنا ربنا كأنه بيقول: هأجلب عليكِ كطرقكِ. هما اتعاملوا بالدم، فالدم يتبعهم. ولو اتعاملوا بالسيف، السيف يتبعهم. "ما يزرعه الإنسان إياه يحصد."
"فَيَعْلَمُونَ أَنِّي أَنَا الرَّبُّ." ... علشان ياريت يتوبوا ويفوقوا.
وبكده تبقي تأديبات الشعوب المجاورة لأورشليم، خلصت. فاضل بس نبوة ضد مصر. هنشوفها بعد كده. وقبل ما يدخل في النبوة ضد مصر، أدانا وقفة. فاصل وراحة.
وقالنا حتة مُنعشة شوية، فيها الرجوع.
بيقولوا: الآيات من 24 ل 26 تكملتها الطبيعية هو اصحاح 34.
بس حزقيال النبي حطها لنا كده. علشان نشم نفسنا شوية. وقبل ما يدخل في الاصحاح 34، قالنا النبوة ضد مصر.
24«فَلاَ يَكُونُ بَعْدُ لِبَيْتِ إِسْرَائِيلَ سُلاَّءٌ مُمَرِّرٌ وَلاَ شَوْكَةٌ مُوجِعَةٌ مِنْ كُلِّ الَّذِينَ حَوْلَهُمُ، الَّذِينَ يُبْغِضُونَهُمْ، فَيَعْلَمُونَ أَنِّي أَنَا السَّيِّدُ الرَّبُّ. " سُلاَّءٌ مُمَرِّرٌ" – يعني شوك بينخُس. يعني حاجة بتوجع. فالمعني: مش هيبقي في بعد كده سلاء، شوك النخل ولا هيبقي في وخزات من أي نوع. يعني ربنا هيريحهم من كل اللي حواليهم.
"مِنْ كُلِّ الَّذِينَ حَوْلَهُمُ، الَّذِينَ يُبْغِضُونَهُمْ،" ... لان كل اللي حواليهم بيبغضوا شعب ربنا.
"فَيَعْلَمُونَ أَنِّي أَنَا السَّيِّدُ الرَّبُّ." ... لما ربنا هيريحهم، وقتها هيعرفوا اني أنا ربنا.
25هكَذَا قَالَ السَّيِّدُ الرَّبُ: عِنْدَمَا أَجْمَعُ بَيْتَ إِسْرَائِيلَ مِنَ الشُّعُوبِ الَّذِينَ تَفَرَّقُوا بَيْنَهُمْ، وَأَتَقَدَّسُ فِيهِمْ أَمَامَ عُيُونِ الأُمَمِ، يَسْكُنُونَ فِي أَرْضِهِمِ الَّتِي أَعْطَيْتُهَا لِعَبْدِي يَعْقُوبَ، الكلام ده نبوة عن الرجوع من السبي. رجوع بني اسرائيل من السبي.
"وَأَتَقَدَّسُ فِيهِمْ أَمَامَ عُيُونِ الأُمَمِ،" ... لما الأمم تشوف ان هناك اله في اسرائيل، ويشوفوا اني بأهتم بيهم وهأرجعهم من السبي حتي بعد 70 سنة، وقتها ربنا هيتمجد قدام عيون الأمم.
"يَسْكُنُونَ فِي أَرْضِهِمِ الَّتِي أَعْطَيْتُهَا لِعَبْدِي يَعْقُوبَ،" ... يعقوب يعني الوعد بالميراث. يعني ربنا هيجمعهم في الأرض اللي وعد انه يديها ليعقوب.
26وَيَسْكُنُونَ فِيهَا آمِنِينَ وَيَبْنُونَ بُيُوتًا وَيَغْرِسُونَ كُرُومًا، وَيَسْكُنُونَ فِي أَمْنٍ عِنْدَمَا أُجْرِي أَحْكَامًا عَلَى جَمِيعِ مُبْغِضِيهِمْ مِنْ حَوْلِهِمْ، فَيَعْلَمُونَ أَنِّي أَنَا الرَّبُّ إِلهُهُمْ». معني انهم يبنوا بيوت ويغرسوا كروم، يعني الناس دول مستقرين. ومفيش حروب.
"وَيَسْكُنُونَ فِي أَمْنٍ عِنْدَمَا أُجْرِي أَحْكَامًا عَلَى جَمِيعِ مُبْغِضِيهِمْ مِنْ حَوْلِهِمْ، فَيَعْلَمُونَ أَنِّي أَنَا الرَّبُّ إِلهُهُمْ." ... كل شعب ربنا والشعوب اللي حواليهم هيفرحوا إن ربنا هو الههم.
ربنا عاوز يقول للشعوب: اني أنا مش بس اله بني اسرائيل. لكن اله كل الارض وكل الشعوب. "للرب الأرض وملؤها."
لما أتقدس في عيون الأمم، يعلمون اني أنا الرب، ويجوا ليا من كل مكان. ولما شعبي يُدرك اني أنا الرب، هيتوب ويفوق ويرجع ليا من تاني.
⪢