⪡ 1وَكَانَ إِلَيَّ كَلاَمُ الرَّبِّ قَائِلاً: اصحاحات 26و27 و28 بيتكلموا عن دينونة مدينة صُور. 3 اصحاحات علشان مدينة أممية. حاجة غريبة، بس كمان نلاقي سفر يونان كان مخصص لمدينة أممية مدينة نينوي. الفرق بين الاتنين: ان سفر يونان هو سفر نبوي قائم بحد ذاته. والتلات اصحاحات دول في سفر حزقيال وبيتنبأوا علي مدينة صُور، برده نقدر نعتبره سفر بيتنبأ علي مدينة أممية. الفرق بين المدينتين ان نينوي تابت. وصُور هلكت.
وده يدينا فكرة أن الله ليس لليهود فقط. لأن بعض الناس يتهموا إله العهد القديم، أنه إله يُميز شعبه عن باقي الشعوب... فنقولهم: الدراسة المتأنية للعهد القديم مش بتقول الكلام ده. بدليل أن في سفر كامل اسمه سفر يونان وده سفر نبوي، ومخصص لمدينة أممية اللي هي نينوي، وتابت. وكمان في 3 اصحاحات في سفر حزقيال مخصصين للنبوة ضد صُور، مدينة أممية، لكنها لم تتب. فده يوضح ان ربنا بيهتم بالكل. إله للكل.
اصحاح 27 عبارة عن رثاء لصُور.
في اول 10 آيات ... بيشبه مدينة صُور بسفينة، لان شهرتها البحر. والبحر أهم حاجة فيه هي السفن. وهيقول تفاصيل كل حاجة في السفينة معمولة من ايه. والمادة بتاعتها جاية من أي بلد. كأن كل مادة في السفينة جاية من أحسن مكان بيعمل الحاجة ديه. مثلا يقول الكتان من مصر. لان مصر كانت أحسن بلد في العالم القديم بتعمل الكتان، وهكذا.
المقصود: ربنا عاوز يقول هما كانوا فاكرين نفسهم انهم في تمام أو كمال الجمال. فربنا بيقول: ده حكمهم البشري. الحكم عندي مش كده خالص. عندي كل الكمال والجمال الي زوال. في دينونة هتقع عليكم يا صُور. وانهم يستحقوا الرثاء.
ربنا كلم حزقيال وقاله:
2«وَأَنْتَ يَا ابْنَ آدَمَ، فَارْفَعْ مَرْثَاةً عَلَى صُورَ، لو كانت الشعوب القديمة مش مهمة عند ربنا. مكانش ربنا قال لحزقيال: اعمل مرثاة عليها. بالرغم انها مدينة اممية. لكن تستحق الرثاء لأنهم هيهلكوا.3وَقُلْ لِصُورَ: أَيَّتُهَا السَّاكِنَةُ عِنْدَ مَدَاخِلِ الْبَحْرِ، تَاجِرَةُ الشُّعُوبِ إِلَى جَزَائِرَ كَثِيرَةٍ، هكَذَا قَالَ السَّيِّدُ الرَّبُّ: يَا صُورُ، أَنْتِ قُلْتِ: أَنَا كَامِلَةُ الْجَمَالِ. بيقولوا المقصود بيها، الاتنين ميناء بتوع صور، كان عندها ميناء طبيعي في الشمال. وزي ما قولنا قبل كده انهم لما بنوا الجزيرة اللي في البحر، الجزيرة ديه كانت في الجنوب شوية، وبقي فيها ميناء صناعي تاني . يعني المدينة كانت واخدة البحر كله لحسابها.
" وَقُلْ لِصُورَ: أَيَّتُهَا السَّاكِنَةُ عِنْدَ مَدَاخِلِ الْبَحْرِ، تَاجِرَةُ الشُّعُوبِ إِلَى جَزَائِرَ كَثِيرَةٍ،" ... ربنا بيقول لحزقيال قول لصور: "جزائر،" مش بس الجزائر اللي في البحر(جزيرة) لكن كمان المدن الساحلية اللي كانت علي البحر. فكانت صُور تاجرة مع شعوب كتيرة، وكانت تفتخر بده. والشعوب دول كانوا بيعملوا لها حساب، ويخافوا منها، لأنها مدينة مشهورة وليها قوتها.
"هكَذَا قَالَ السَّيِّدُ الرَّبُّ: يَا صُورُ، أَنْتِ قُلْتِ: أَنَا كَامِلَةُ الْجَمَالِ." ... وصلوا انهم يقولوا علي نفسهم: "كاملة الجمال." يعني مش ناقصها حاجة.
زي بالظبط الآية اللي بتقول "اني أنا غنيً. وقد استغنيت. ولا حاجة لي الي شيء " وأول ما الانسان يوصل للمرحلة ديه، بيسقط علي طول.
وأخدت اللقب اللي هو المفروض كان لقب أورشليم ... "كاملة الجمال " (موجودة في مراثي ارميا 2 : 15. وفي مزمور 50: 2).
بس للأسف أورشليم مكانتش فاهمة جمالها مستقر فين. في حزقيال 16 : 14 ... "وَخَرَجَ لَكِ اسْمٌ فِي الأُمَمِ لِجَمَالِكِ، لأَنَّهُ كَانَ كَامِلًا بِبَهَائِي الَّذِي جَعَلْتُهُ عَلَيْكِ، يَقُولُ السَّيِّدُ الرَّبُّ." وياريت احنا كمان نفهم ده: جمالنا من جمال ربنا اللي فينا.
لأن جمال أورشليم سببه وأساسه: أن الله سكب بهائه عليها. لكن للأسف اورشليم افتكروا أن جمالهم وكمالهم من نفسهم، فسقطوا. وكمان صُور وقعت في الحتة ديه، وقالت: انا كاملة الجمال.
ياريت نراجع نفسنا ونقول لنفسنا بكل أمانة، أن أي حاجة كويسة فيا، ترجع لنعمة ربنا اللي بيسكبها عليا.
4تُخُومُكِ فِي قَلْبِ الْبُحُورِ. بَنَّاؤُوكِ تَمَّمُوا جَمَالَكِ. حزقيال شاعر، فهيبتدي ينقلنا ما بين السفينة ومدينة صٌور. كلام يتقال علي السفينة وعلي صُور، في قطعة موسيقية شِعرية.
" تُخُومُكِ فِي قَلْبِ الْبُحُورِ." ... تنفع علي السفينة وعلي صُور.
"بَنَّاؤُوكِ تَمَّمُوا جَمَالَكِ" ... اللي عمالها، عملها بفن. علشان تبقي كمال الجمال. فاكر أن كده هتبقي جميلة لكن االجمال الحقيقي هو انسكاب نعمة الله في الانسان. مهواش مجرد الجمال الشكلي
5عَمِلُوا كُلَّ أَلْوَاحِكِ مِنْ سَرْوِ سَنِيرَ. أَخَذُوا أَرْزًا مِنْ لُبْنَانَ لِيَصْنَعُوهُ لَكِ سَوَارِيَ. هنبتدي نشوف أسماء مدن، وأسماء القطع اللي في السفينة. وقطع السفينة متأخدة من انهي بلد.
" عَمِلُوا كُلَّ أَلْوَاحِكِ مِنْ سَرْوِ" ... خشب السرو: نوع من أنواع الخشب الغالي.
"سَنِيرَ." ... ده جبل اسمه حرمون. من أعلي الجبال في المدينة المقدسة اورشليم. ألواح الخشب متأخدة من سنير اللي هو جبل حرمون.
"أَخَذُوا أَرْزًا مِنْ لُبْنَانَ لِيَصْنَعُوهُ لَكِ سَوَارِيَ" ... علشان يعملوا السفينة، أخدوا خشب الأرز من لبنان. السواري اللي هي عواميد السفينة. الساري بتاع السفينة.
وكمان في بناء هيكل سُليمان، صُور بعتت لسُليمان أجود أنواع أخشاب الأرز علشان يبقي الهيكل.
6صَنَعُوا مِنْ بَلُّوطِ بَاشَانَ مَجَاذِيفَكِ. صَنَعُوا مَقَاعِدَكِ مِنْ عَاجٍ مُطَعَّمٍ فِي الْبَقْسِ مِنْ جَزَائِرِ كِتِّيمَ. مجاديفك: المجاديف اللي بيجدفوا بيها في السفينة.
" بَاشَانَ" ... في شمال البحر الميت، فوق بني عمون. البلوط: أجود أنواع الأخشاب في مدينة باشان، علشان يعملوا منها مجاديف السفينة.
"صَنَعُوا مَقَاعِدَكِ مِنْ عَاجٍ مُطَعَّمٍ فِي الْبَقْسِ مِنْ جَزَائِرِ كِتِّيمَ" ... مقاعد السفينة. وبعض الأجزاء من جوة السفينة، عملوها من عاج مُطعم بنوع من انواع الخشب الجميلة جدا اسمها " الْبَقْسِ".
" كِتِّيمَ" ... يُقال انها كريت. قبرص. وكانت مشهورة بأنواع الخشب ده.
7كَتَّانٌ مُطَرَّزٌ مِنْ مِصْرَ هُوَ شِرَاعُكِ لِيَكُونَ لَكِ رَايَةً. الأَسْمَانْجُونِيُّ وَالأُرْجُوانُ مِنْ جَزَائِرِ أَلِيشَةَ كَانَا غِطَاءَكِ. مصر كانت مشهورة بالكتان. والكتان ينقسم لقسمين:
- كتان للناس العادية: الكتان السادة.
- لكن الكتان المطرز وفيه شغل حلو ده للناس الغنية.
فعملوا الشراع بتاع السفينة من الكتان المطرز وفيه ألوان جميلة، فكانوا بيفتخروا بالشراع اللي معمول من كتان أصلي فخم.
"الأَسْمَانْجُونِيُّ وَالأُرْجُوانُ مِنْ جَزَائِرِ أَلِيشَةَ" ... أَلِيشَةَ: المقصود بيها ايطاليا.
"كَانَا غِطَاءَكِ" ... كانوا بيستخدموا بعض الأغطية في السفن.
8أَهْلُ صِيدُونَ وَإِرْوَادَ كَانُوا مَلاَّحِيكِ. حُكَمَاؤُكِ يَا صُورُ الَّذِينَ كَانُوا فِيكِ هُمْ رَبَابِينُكِ. هنا هيقول 3 مدن:
"أَهْلُ صِيدُونَ وَإِرْوَادَ كَانُوا مَلاَّحِيكِ." ... صيدون و إرواد. ودول مدينتين. يعني حتي الناس اللي كانوا شغالين في السفينة جايبنهم أحسن ناس.
"حُكَمَاؤُكِ يَا صُورُ الَّذِينَ كَانُوا فِيكِ هُمْ رَبَابِينُك." ... ربان السفينة، يعني الكابتن اللي بيقود السفينة ومعاه مساعدينه.
"إِرْوَادَ" ... يُقال انها مدينة تبعد عن صُور الي الشمال حوالي 175 كيلو.
وده يدينا فكرة أن الناس هناك كانوا بيستغلوا الحكماء في المشورة، فكانوا بيقودوا المدينة. وفي الآخر حكمتهم أصبحة باطلة. كله هلك.
9شُيُوخُ جُبَيْلَ وَحُكَمَاؤُهَا كَانُوا فِيكِ قَلاَّفُوكِ. جَمِيعُ سُفُنِ الْبَحْرِ وَمَلاَّحُوهَا كَانُوا فِيكِ لِيُتَاجِرُوا بِتِجَارَتِكِ. " شُيُوخُ جُبَيْلَ" ... ديه مدينة تانية تبعد حوالي 100 كيلو وموقعها فوق صُور.
"وَحُكَمَاؤُهَا كَانُوا فِيكِ قَلاَّفُوكِ." ... قَلاَّفُوكِ: دول ناس شغلتهم أن لو حصل اي خرم أو أي حاجة في السفينة، يصلحوها علشان متغرقش.
" شُيُوخُ جُبَيْلَ وَحُكَمَاؤُهَا كَانُوا فِيكِ قَلاَّفُوكِ." ... يعني أحسن ناس هما اللي كانوا مخصصين يسدوا الثغرات اللي بتحصل في السفينة، ومع كده لم ينجحوا وهلكت السفينة وغرقت. والكلام برده علي صُور انها غرقت. بالرغم من كل الحكمة ديه، لأنهم مكانوش فاهمين أن كل حكمة مصدرها ربنا. وكانوا بيتكبروا، فكله هلك.
"جَمِيعُ سُفُنِ الْبَحْرِ وَمَلاَّحُوهَا كَانُوا فِيكِ لِيُتَاجِرُوا بِتِجَارَتِكِ" ...كل التجارة البحرية في العالم القديم في الوقت ده، كانت لازم تعدي علي صُور. علشان كده فرحوا لما بعض المدن التانية وقعت. علشان كل التجارة اتحولت ليهم.
10فَارِسُ وَلُودُ وَفُوطُ كَانُوا فِي جَيْشِكِ، رِجَالَ حَرْبِكِ. عَلَّقُوا فِيكِ تُرْسًا وَخُوذَةً. هُمْ صَيَّرُوا بَهَاءَكِ. هيقول 3 مدن تاني: فارس(ايران) – لود (تركيا) – فوط (غالبا ليبيا).
" فَارِسُ وَلُودُ وَفُوطُ كَانُوا فِي جَيْشِكِ،" ... صُور كانوا واخدين خيرة (أحسن) جُند الارض، واخدين من البلاد أحسن الناس علشان يدافعوا عنهم. وبرده منفعش.
"رِجَالَ حَرْبِكِ. عَلَّقُوا فِيكِ تُرْسًا وَخُوذَةً. هُمْ صَيَّرُوا بَهَاءَكِ" ... كانت صُور محمية بقوات عسكرية ضخمة. وكانت مدينة صُور قوية وبهية جدا.
11بَنُو إِرْوَادَ مَعَ جَيْشِكِ عَلَى الأَسْوَارِ مِنْ حَوْلِكِ، وَالأَبْطَالِ كَانُوا فِي بُرُوجِكِ. عَلَّقُوا أَتْرَاسَهُمْ عَلَى أَسْوَارِكِ مِنْ حَوْلِكِ. هُمْ تَمَّمُوا جَمَالَكِ. " بَنُو إِرْوَادَ" ... اللي هي 175 كيلو فوق صُور.
كانوا عندهم أحسن الجنود، وكانوا بيحاولوا يحموها بكل الطرق وبكل قوتهم.
"هُمْ تَمَّمُوا جَمَالَكِ." ... كم مرة هنا كانوا مفتخرين بجمالهم؟ مرة يقولوا " أنا كاملة الجمال" ومرة "هما صيروا بهاءك.".
الكتاب المقدس يقول "الجمال غش. والحُسن باطل."
الجمال والحلاوة الحقيقية (وديه حاجة نعملها لأولادنا): لما نعمة ربنا تنسكب علي الانسان، وحتي لو الانسان شكلا مش حلو مثلا، ربنا يديله نعمة.
وبعض الناس يقولوا: فعلا الانسان ده مش جميل بس روحه جميلة اوي. وده بسبب نعمة ربنا. والعكس طبعا، ممكن تلاقوا ناس جميلة جدا بس مفيش نعمة. فيبقي الانسان ده ولا حاجة من غير نعمة ربنا. علشان كده الجمال الطبيعي هو انعكاس نعمة ربنا وجمال ربنا جوانا، وده يحصل لما الواحد يتجمل بالفضايل: محبة – فرح – سلام – طول أناة – لطف – وداعة – تعفف
وبالنسبة لصُور وكل اللي عملوه في المدينة، لكن كل ده باطل وقبض الريح. وهلكت في الاخر.
الجزء التاني: حزقيال النبي بيقولنا أسماء دول كتيرة تاجرت مع صُور، وبالتفصيل. ويمكن في بعض البلاد اللي هيقولها منعرفهاش اصلا دلوقتي، وده لأنها اندثرت ومبقاش ليها ذِكر في التاريخ.
لكن عامة حزقيال عاوز يقولنا: أنها تاجرت تقريبا في كل أنواع التجارة تقريبا مع كل البلاد والمدن المعروفة في الوقت ده.
- لكن الملحوظة اللي المفروض نلاحظها في ك المدن ديه وأسمائها وكل البضايع ديه، أن مفيش بِر. ولا ايمان ولا أي فضيلة. يعني في وسط كل ده مفيش الصفات اللي ربنا بيحبها. مفيش محبة ولا فرح ولا سلام ولا اي حاجة من دول.
- في الجزء ده صُور عاملة زي واحد مهتم بكل حاجة من بره، الا زينة الروح الوديع الهادئ. من بره ممكن يكون واحد ناجح في شغله جدا. في تجارته وعلاقاته مع الناس. لكن لو بصيناا جواه نلاقي عنده فراغ رهيب.
"قبور مُبيضة من الخارج (شكلها ليها منظر بس في الاخر هو قبر.) ملآنة عظاما وكل نجاسة."
فلما نقرأ الجزء ده بكل التفاصيل اللي ذكرهالنا حزقيال النبي، نبكت نفسنا ونقول: توبي يانفسي لئلا تكوني مثلا صُور.
تكوين 10 وتكوين 25: لان الأسماء اللي هتتقال كتير ديه، ليها أصل في سفر التكوين:
- تك 10 : 2
- تك 25 : 13 "قيدار" --- ده ابن اسماعيل.
12تَرْشِيشُ تَاجِرَتُكِ بِكَثْرَةِ كُلِّ غِنًى. بِالْفِضَّةِ وَالْحَدِيدِ وَالْقَصْدِيرِ وَالرَّصَاصِ أَقَامُوا أَسْوَاقَكِ. هايجيب هنا من أقاصي الأرض الي أقاصيها. من ترشيش في إسبانيا، الي سبأ في جنوب شبه الجزيرة العربية وتقريبا هي اليمن حاليا. وديه تقريبا كانت حدود العالم المعروفة بالتجارة في الوقت ده. فكأن صُور تاجرت مع العالم كله.
"تَرْشِيشُ تَاجِرَتُكِ بِكَثْرَةِ كُلِّ غِنًى"... ترشيش: في إسبانيا، في أقصي الغرب.
" تَاجِرَتُكِ" ... بتترجم الي ان تجارتها كانت استيراد وتصدير، بتيجي لها بضائع وتطلع منها بضايع.
" بِالْفِضَّةِ وَالْحَدِيدِ وَالْقَصْدِيرِ وَالرَّصَاصِ أَقَامُوا أَسْوَاقَك" ... المنطقة ديه كانت بتتميز بالفضة والمعادن ديه. فكانت صُور تستلم البضاعة ديه، وبعدين هما يتاجروا بيها.
13يَاوَانُ وَتُوبَالُ وَمَاشِكُ هُمْ تُجَّارُكِ. بِنُفُوسِ النَّاسِ وَبِآنِيَةِ النُّحَاسِ أَقَامُوا تِجَارَتَكِ. "يَاوَانُ" ... اليونان.
"وَتُوبَالُ" ... منطقة آسيا.
"وَمَاشِكُ" ... موسكو.
"هُمْ تُجَّارُكِ." ... البلاد ديه شغالة معاهم في التجارة كويس جدا.
"بِنُفُوسِ النَّاسِ" ... يعني كان في تجارة عبيد، بيتاجروا بنفوس الناس.
" وَبِآنِيَةِ النُّحَاسِ أَقَامُوا تِجَارَتَك" ... تجارتها معتمدة علي العبيد وآنية النحاس.
14وَمِنْ بَيْتِ تُوجَرْمَةَ بِالْخَيْلِ وَالْفُرْسَانِ وَالْبِغَالِ أَقَامُوا أَسْوَاقَكِ. "وَمِنْ بَيْتِ تُوجَرْمَةَ" ... بيقولوا عليها ألمانيا.
"بِالْخَيْلِ وَالْفُرْسَانِ وَالْبِغَالِ أَقَامُوا أَسْوَاقَك" ... كان واخد من كل بلد ، ما تشتهر بيه البلد ديه وقتها.
15بَنُو دَدَانَ تُجَّارُكِ. جَزَائِرُ كَثِيرَةٌ تُجَّارُ يَدِكِ. أَدَّوْا هَدِيَّتَكِ قُرُونًا مِنَ الْعَاجِ وَالآبْنُوسِ. " دَدَانَ": في الترجمة السبعينية، دوان. المقصود بيها جزيرة روودس في البحر المتوسط.
"أَدَّوْا هَدِيَّتَكِ قُرُونًا مِنَ الْعَاجِ وَالآبْنُوسِ" ... في الاصل بتاع " الْعَاجِ وَالآبْنُوسِ" مكتوب نوع من الخشب كان بيُصنع بكثرة في جنوب مصر. وكان بعدين بيُطعم بالعاج والابنوس.
فالجزاير ديه اشتغلت مع صُور في التجارة ديه.
16أَرَامُ تَاجِرَتُكِ بِكَثْرَةِ صَنَائِعِكِ، تَاجَرُوا فِي أَسْوَاقِكِ بِالْبَهْرَمَانِ وَالأُرْجُوانِ وَالْمُطَرَّزِ وَالْبُوصِ وَالْمَرْجَانِ وَالْيَاقُوتِ. " أَرَامُ" ... اللي هي سوريا.
" بِالْبَهْرَمَانِ" ... اللون التركواز.
"وَالأُرْجُوانِ" ... قماش أحمر غالي، يلبسه الملوك والعظماء.
"وَالْمُطَرَّزِ" ... ثياب ثمينة ومخصصة برده للملوك والعظماء.
"وَالْبُوصِ" ... هو الكتان.
"وَالْمَرْجَانِ وَالْيَاقُوتِ" ... أحجار كريمة جدا.
هنلاقي في الجزء ده كل أنواع التجارة. ماعدا حاجة واحدة بس، وديه اللي ربنا عاوزها، بس للأسف مش موجودة.
كل أنواع التجارة ديه كانت موجودة ومهمة جدا في نظر العالم. لكن صفر في نظر ربنا. كل اللي يهم ربنا، أن الناس تقف تصلي، ويكون عندهم ايمان ويخلُصون.
17يَهُوذَا وَأَرْضُ إِسْرَائِيلَ هُمْ تُجَّارُكِ. تَاجَرُوا فِي سُوقِكِ بِحِنْطَةِ مِنِّيتَ وَحَلاَوَى وَعَسَل وَزَيْتٍ وَبَلَسَانٍ. " يَهُوذَا وَأَرْضُ إِسْرَائِيلَ هُمْ تُجَّارُكِ." ... تاجرت كمان مع يهوذا واسرائيل.
"تَاجَرُوا فِي سُوقِكِ بِحِنْطَةِ مِنِّيتَ" ... مِنِّيتَ: ديه مدينة في بني عمون.
"وَحَلاَوَى" ... يُقال انها حلوي مصنوعة من الدقيق.
"وَعَسَل وَزَيْتٍ وَبَلَسَانٍ" ... بَلَسَانٍ: اتذكرت في أرض يهوذا واورشليم. يعني ارض يهوذا واورشليم بتشتهر بالبلسان والعسل. (وكمان ده واضح في تكوين 37: 25.).
18دِمَشْقُ تَاجِرَتُكِ بِكَثْرَةِ صَنَائِعِكِ وَكَثْرَةِ كُلِّ غِنًى، بِخَمْرِ حَلْبُونَ وَالصُّوفِ الأَبْيَضِ. " حَلْبُونَ" ... هي حلب في شمال سوريا، شمال دمشق. فأخدوا من حلب: الخمر والصوف الابيض. لانها كانت مشهورة بكده. حلب من البلاد اللي تاجرت مع صُور.19وَدَانُ وَيَاوَانُ قَدَّمُوا غَزْلاً فِي أَسْوَاقِكِ. حَدِيدٌ مَشْغُولٌ وَسَلِيخَةٌ وَقَصَبُ الذَّرِيرَةِ كَانَتْ فِي سُوقِكِ. "و دَانُ" ... يُقال انه سبط دان.
"و َيَاوَانُ" ... اليونان.
الجزء ده مليان أسماء كتيرة وأنواع من المواد التجارية كتيرة. فالترجمة بتاعتها من الأصل صعبة. وغير ان بعض البلاد ديه اصلا مش موجودة حاليا، فاحنا بنشفق علي المُترجم.
"قَدَّمُوا غَزْلًا فِي أَسْوَاقِكِ. حَدِيدٌ مَشْغُولٌ وَسَلِيخَةٌ وَقَصَبُ الذَّرِيرَةِ كَانَتْ فِي سُوقِك" ...كل المواد ديه أنواع من الأعشاب والحاجات الثمينة جدا. زي الحديد المشغول مثلا.
20دَدَانُ تَاجِرَتُكِ بِطَنَافِسَ لِلرُّكُوبِ. "دَدَانُ تَاجِرَتُكِ" ... ددان: في أرض بني آدوم، جنوب إسرائيل.
"بِطَنَافِسَ لِلرُّكُوب" ... المفروشات اللي بتتحط علي الخيل.
صُور مدينة مسابتش نوع تجارة. الا وتاجرت فيه.
21اَلْعَرَبُ وَكُلُّ رُؤَسَاءِ قِيدَارَ هُمْ تُجَّارُ يَدِكِ بِالْخِرْفَانِ وَالْكِبَاشِ وَالأَعْتِدَةِ. فِي هذِهِ كَانُوا تُجَّارَكِ. قيدار: هو ابن إسماعيل، سكنوا في شِبه الجزيرة العربية وشمالها.
"بِالْخِرْفَانِ وَالْكِبَاشِ وَالأَعْتِدَةِ. فِي هذِهِ كَانُوا تُجَّارَكِ" ... العرب مشهورين بالخرفان والكباش اللي هو ذكر الخروف.
"الأَعْتِدَةِ" ... ذكر الماعز.
والآية ديه حزقيال قالها تاني في: حزقيال 39: 18.. فكل ده كانت تجارة العرب.
22تُجَّارُ شَبَا وَرَعْمَةَ هُمْ تُجَّارُكِ. بِأَفْخَرِ كُلِّ أَنْوَاعِ الطِّيبِ وَبِكُلِّ حَجَرٍ كَرِيمٍ وَالذَّهَبِ أَقَامُوا أَسْوَاقَكِ. " تُجَّارُ شَبَا" ... بتوع اليمن.
"وَرَعْمَةَ هُمْ تُجَّارُكِ. " ... رعمة: مدينة اندثرت، ومش عارفين هي فين دلوقتي.
"بِأَفْخَرِ كُلِّ أَنْوَاعِ الطِّيبِ وَبِكُلِّ حَجَرٍ كَرِيمٍ وَالذَّهَبِ أَقَامُوا أَسْوَاقَكِ" ... تجارتهم كانت الطيب والذهب والاحجار الكريمة.
23حُرَّانُ وَكِنَّةُ وَعَدَنُ تُجَّارُ شَبَا وَأَشُّورَ وَكِلْمَدَ تُجَّارُكِ. "حُرَّانُ وَكِنَّةُ وَعَدَنُ" ... دول في بلاد ا لعراق. وابونا ابراهيم من أرض حران.
"تُجَّارُ شَبَا" ... ديه حطها في النص. بعض الناس قالوا ليه حزقيال حطها في النص وشبا موجودة في الجنوب في اليمن؟ لكن جايز شبا تكون مدينة كانت موجودة في العراق، لكن احنا مش عارفينها. لكن هي طبعا مش محطوطة غلط ولا حاجة.. لأن كمان مذكورة آشور. اذا جايز جدا تكون مدينة في العراق اسمها شبا ... "وَأَشُّورَ وَكِلْمَدَ تُجَّارُك".
كلمد : ديه مدينة تاني.
24هؤُلاَءِ تُجَّارُكِ بِنَفَائِسَ، بِأَرْدِيَةٍ أَسْمَانْجُونِيَّةٍ وَمُطَرَّزَةٍ، وَأَصْوِنَةٍ مُبْرَمٍ مَعْكُومَةٍ بِالْحِبَالِ مَصْنُوعَةٍ مِنَ الأَرْزِ بَيْنَ بَضَائِعِكِ. أَرْدِيَةٍ: يعني جلاليب (جلابية). المنطقة اللي هناك مشهورة بالجلاليب الاسمانجونية، ألوانها جميلة ومطرزة. وفي بعض الترجمات مكتوبة: سجاجيد.
"وَأَصْوِنَةٍ مُبْرَمٍ مَعْكُومَةٍ بِالْحِبَالِ" ... عربي صعب. معناها: حبال مفتولة بإحكام شديد جدا.
"مَصْنُوعَةٍ مِنَ الأَرْزِ بَيْنَ بَضَائِعِكِ" ... حتي الحبال بيتاجروا فيها.
صُور كان ليها من بره منظر انها مدينة عظيمة جدا وغنية جدا وكمان شاطرة جدا في التجارة.
لكن في نظر الله " أنت الفقير وأعمي وعريان وبائس." مفيهاش أي نفوس بتخلُص ولا في ايمان ولا محبة. الحاجات الجميلة اللي ربنا بيدور عليها مش موجودة عندهم في قلوبهم.
فبالرغم من ان حزقيال خصص لصُور جزء كبير، وده لانه عاوز يقولنا: أوعوا تكونوا زي صُور، من بره شكلها جميل وحاجة عظيمة. لكن من جوة ربنا بيبقي حزين علي اللي جوانا.
ياريت واحنا بنقرأ عن صور: نصلي ونقول لربنا أعطينا قلوب مليانة ثمار روحك القدوس. هو ده اللي يفرح قلب ربنا. ونقول لربنا: يارب جملنا بالفضيلة، خلينا نتحلي بالفضيلة.. ابونا بيصلي في الصلوات السرية ويقول: يارب جملّهم بالفضائل
25«سُفُنُ تَرْشِيشَ قَوَافِلُكِ لِتِجَارَتِكِ، فَامْتَلأْتِ وَتَمَجَّدْتِ جِدًّا فِي قَلْبِ الْبِحَارِ. "سُفُنُ تَرْشِيشَ" ... مش بالضرورة تكون بتاعة مدينة ترشيش الموجودة في اسبانيا. لكن تعني: انها السفن الي تُبحرفي البحار لمسافات طويلة جدا. يعني سفينة مُهيئة لمسافات طويلة. سفن عملاقة.
"قَوَافِلُكِ لِتِجَارَتِكِ،" ... قوافلك: القوافل يعني مجموعة سفن مع بعض. السفن العملاقة بتاعتك كانت بتسير مجموعات مع بعض، وديه اللي كانت مشغلة التجارة بتاعتك.
"فَامْتَلأْتِ وَتَمَجَّدْتِ جِدًّا فِي قَلْبِ الْبِحَار" ... أصبحتِ غنية جدا ياصُور. بقي ليكِ شُهرة واسعة جدا. وكأن البحر بقي مِلك خاص بيكِ. سيدة البحار.
26مَلاَّحُوكِ قَدْ أَتَوْا بِكِ إِلَى مِيَاهٍ كَثِيرَةٍ. كَسَرَتْكِ الرِّيحُ الشَّرْقِيَّةُ فِي قَلْبِ الْبِحَارِ. ملاحوكِ: بما أن التشبيه لصُور كأنها سفينة، فبيقول: بما إنك سفينة عظيمة جدا، الملاحون بتاعك مشيوا بيكِ في مياه كثيرة. يعني تاجرتِ مع بلاد كثيرة من خلال مسافات طويلة.
"كَسَرَتْكِ الرِّيحُ الشَّرْقِيَّةُ فِي قَلْبِ الْبِحَار." ... يُقال ان المقصود بالريح الشرقية: هما البابليين وحاربوهم وخلصوا عليهم. (حاربوا صُور). وبعد بابل جه الاسكندر الاكبر وكمل عليها.
27ثَرْوَتُكِ وَأَسْوَاقُكِ وَبِضَاعَتُكِ وَمَلاَّحُوكِ وَرَبَابِينُكِ وَقَلاَّفُوكِ وَالْمُتَاجِرُونَ بِمَتْجَرِكِ، وَجَمِيعُ رِجَالِ حَرْبِكِ الَّذِينَ فِيكِ، وَكُلُّ جَمْعِكِ الَّذِي فِي وَسْطِكِ يَسْقُطُونَ فِي قَلْبِ الْبِحَارِ فِي يَوْمِ سُقُوطِكِ. "قَلاَّفُوكِ" ... الناس اللي بتعالج الثقوب اللي بتحصل في السفينة وهما في قلب البحار.
" وَالْمُتَاجِرُونَ بِمَتْجَرِكِ،" ... متجرك: يعني تجارتك.
" ثَرْوَتُكِ وَأَسْوَاقُكِ وَبِضَاعَتُكِ وَمَلاَّحُوكِ وَرَبَابِينُكِ وَقَلاَّفُوكِ وَالْمُتَاجِرُونَ بِمَتْجَرِكِ، وَجَمِيعُ رِجَالِ حَرْبِكِ الَّذِينَ فِيكِ،" ... هنا حزقيال ذكر كل الفئات اللي شوفناها في الآيات اللي فاتت ( من 8 ل 10).
"وَكُلُّ جَمْعِكِ الَّذِي فِي وَسْطِكِ يَسْقُطُونَ فِي قَلْبِ الْبِحَارِ فِي يَوْمِ سُقُوطِكِ." ... يعني أول ما هتسقط صُور، ده هيأثر بالسلب علي كل اللي كانوا بيتعاملوا مع صُور. وهنشوف بعد كده أن كل دول يبكوا ويرثوا صُور. لان تجارتهم وحالهم كله وقف. لأنهم كانوا معتمدين علي صُور.
28مِنْ صَوْتِ صُرَاخِ رَبَابِينِكِ تَتَزَلْزَلُ الْمَسَارِحُ. لما تسقط صُور، كل المدن اللي كانت بتتعامل معاها هترتعد وتصرخ. لان سقوط صور خلاص تم. ومن كتر صراخهم وعويلهم: كل المدن اللي صُور كانت بتتعامل معاهم هتتزلزل.
"تَتَزَلْزَلُ الْمَسَارِحُ." ... أصلها ترتعش سواحلك. المسارح: أصلها سواحلك.
29وَكُلُّ مُمْسِكِي الْمِجْذَافِ وَالْمَلاَّحُونَ، وَكُلُّ رَبَابِينِ الْبَحْرِ يَنْزِلُونَ مِنْ سُفُنِهِمْ وَيَقِفُونَ عَلَى الْبَرِّ، لأن شغلانتهم كانت في السفن والبحر، فخلاص شغلانتهم وقفت. فيسيبوا السفن بتاعتهم وهينزلوا علي البر.30وَيُسْمِعُونَ صَوْتَهُمْ عَلَيْكِ، وَيَصْرُخُونَ بِمَرَارَةٍ، وَيُذَرُّونَ تُرَابًا فَوْقَ رُؤُوسِهِمْ، وَيَتَمَرَّغُونَ فِي الرَّمَادِ. الشرقيين عندهم عادات في الحزن والوفاة، انهم بيحطوا تراب علي راسهم.31وَيَجْعَلُونَ فِي أَنْفُسِهِمْ قَرْعَةً عَلَيْكِ، وَيَتَنَطَّقُونَ بِالْمُسُوحِ، وَيَبْكُونَ عَلَيْكِ بِمَرَارَةِ نَفْسٍ نَحِيبًا مُرًّا. كان ممكن يحلقوا شعرهم خالص.
"وَيَتَنَطَّقُونَ بِالْمُسُوحِ،" ... وكانوا بيلبسوا المسوح.
"وَيَبْكُونَ عَلَيْكِ بِمَرَارَةِ نَفْسٍ نَحِيبًا مُرًّا." ... ويبكوا بكاء مر علي صُور
32وَفِي نَوْحِهِمْ يَرْفَعُونَ عَلَيْكِ مَنَاحَةً وَيَرْثُونَكِ، وَيَقُولُونَ: أَيَّةُ مَدِينَةٍ كَصُورَ كَالْمُسْكَتَةِ فِي قَلْبِ الْبَحْرِ؟ هيعملوا عليكِ مناحة يا صُور.
"وَيَقُولُونَ: أَيَّةُ مَدِينَةٍ كَصُورَ كَالْمُسْكَتَةِ فِي قَلْبِ الْبَحْرِ؟" ... كَالْمُسْكَتَةِ: يعني المهدمة في قلب البحار.
بعد ما كانت مدينة عظيمة جدا، سقطت. والناس بيقولوا: ياه، فين صور؟ ديه كانت برج عظيم في قلب البحار وبتاجر مع ا لدنيا كلها.
اللي ربنا مكانش في قلبه وكانت كل اهتماماته بشرية وارضية، الناس مش هينفعوه. أكتر حاجة الناس هيقولوها: فين الشخص ده؟ أهو راح.
فهنا خلاص صُور بقت مُهدمة في قلب البحار.
لكن "ذكري الصدّيق تدوم الي الابد." ... اللي ماشي مع ربنا كويس وحياته جميلة مع ربنا، ده ذكراه تدوم الي الابد.
لكن هنشوف عن صُور في اخر الاصحاح "تكونين أهوالا. ولا تكونين بعد الي الأبد." خلاص خلصت.
33عِنْدَ خُرُوجِ بَضَائِعِكِ مِنَ الْبِحَارِ أَشْبَعْتِ شُعُوبًا كَثِيرِينَ. بِكَثْرَةِ ثَرْوَتِكِ وَتِجَارَتِكِ أَغْنَيْتِ مُلُوكَ الأَرْضِ. تجارة صُور خليت اللي حواليها أغنياء.
"بِكَثْرَةِ ثَرْوَتِكِ وَتِجَارَتِكِ أَغْنَيْتِ مُلُوكَ الأَرْضِ." ... كان الناس بيعتمدوا عليها، ويبقوا أغنياء. علشان كده نفهم هما ليه بكوا عليها. مش حبا فيها، لكن علشان كانوا مستنفعين منها.
34حِينَ انْكِسَارِكِ مِنَ الْبِحَارِ فِي أَعْمَاقِ الْمِيَاهِ سَقَطَ مَتْجَرُكِ وَكُلُّ جَمْعِكِ. نفتكر الآية في اصحاح 26 :17 "كيف بدتِ يا معمورة من البحار" فكان صُور كل افتخارها بالبحر وانه سبب قوتها وغِناها.
" حِينَ انْكِسَارِكِ مِنَ الْبِحَارِ" ... فهنا ربنا بيوضح ان سبب انكسارها هو البحر. أن البحر اللي اتعظمتِ بيه يا صُور هو نفسه السبب انك تنكسري وتتهدمي، وملكيش ذِكر بعد كده.
"فِي أَعْمَاقِ الْمِيَاهِ سَقَطَ مَتْجَرُكِ وَكُلُّ جَمْعِكِ." ... متجرك: يعني كل تجارتك. جَمْعِكِ: هما كل الناس اللي ذكرناهم قبل كده، زي الملاحون والربان بتوع السفينة وكل الفئات ديه الموجودة في ايه 27، كل دول سقطوا مع صُور.
الاباء يقولنا قول جميل اوي: المتعجرف او المنتفخ بالفضيلة، يسقط في ا لزنا. والمنتفخ بالمعرفة، يسقط في التجديف. (وديه قاعدة.)
المنتفخ بالفضيلة: ده إنسان حاسس بنفسه، أنه إنسان مليان بالفضيلة والنُسك. ده نخاف عليها ليسقط في الزنا. فبدل ما الفضيلة أديته اتضاع، أديته انتفاخ.
واحد تاني منتفخ بالمعرفة زي آريوس أو مقدونيوس وغيرهم، دول عرفوا أكتر وأكتر وانتفخوا بمعرفتهم ديه. والمفروض المعرفة تقود الإنسان للاتضاع لأنه حاسس أنه قدام بحر لا ينتهي. فالمفروض يحس بضعفه. لكن آريوس انتفخ بمعرفته ، وكأن محدش عرف أكتر منه. فسقط في التجديف. وكانت بدعة آريوس من أبشع البدع اللي واجهت الكنيسة.
وحين انتفخت صُور بالبحار والتجارة، كانت البحار والتجارة سبب انكسارها.
35كُلُّ سُكَّانِ الْجَزَائِرِ يَتَحَيَّرُونَ عَلَيْكِ، وَمُلُوكِهِنَّ يَقْشَعِرُّونَ اقْشِعْرَارًا. يَضْطَرِبُونَ فِي الْوُجُوهِ. من كتر الخوف والرعدة، الجسم بيتنفض.
" يَضْطَرِبُونَ فِي الْوُجُوه." ... يبان علي الوجه تعبيرات الاضطراب والمضايقة او الضيق والحزن.
" كُلُّ سُكَّانِ الْجَزَائِرِ يَتَحَيَّرُونَ عَلَيْكِ،" ... لا يقصد الجزائر التي في البحار فقط، لكن كمان المدن الساحلية التي تتاجر مع صور، يتعجبون هم وملوكهم لسقوطها، محدش كان متخيل ابدا سقوط صُور العظيمة.
36اَلتُّجَّارُ بَيْنَ الشُّعُوبِ يَصْفِرُونَ عَلَيْكِ فَتَكُونِينَ أَهْوَالاً، وَلاَ تَكُونِينَ بَعْدُ إِلَى الأَبَدِ». في مراثي ارميا 2 : 15 يقول:
"يُصَفِّقُ عَلَيْكِ بِالأَيَادِي كُلُّ عَابِرِي الطَّرِيقِ. يَصْفِرُونَ وَيَنْغُضُونَ رُؤُوسَهُمْ عَلَى بِنْتِ أُورُشَلِيمَ قَائِلِينَ: «أَهذِهِ هِيَ الْمَدِينَةُ الَّتِي يَقُولُونَ إِنَّهَا كَمَالُ الْجَمَالِ، بَهْجَةُ كُلِّ الأَرْضِ؟" ... الكلام هنا علي أورشليم
وان صُور اللي شمتت في سقوط أورشليم وقالت: هه علي مقدس الرب الذي سقط في أورشليم، صُور نفسها اتعمل معاها نفس الكلام بالظبط... " كما فعلت يُفعل بك، عملك يرتد علي رأسك." (عوبديا 1: 15.)
و "الذي يزرعه الانسان، اياه يحصد." فهنا في مراثي، ارميا النبي كانبي تكلم علي اورشليم، والمعني كأنهم بيخبطوا كف علي كف لما يشوفوا اللي حصل في أورشليم ... " يُصَفِّقُ عَلَيْكِ بِالأَيَادِي كُلُّ عَابِرِي الطَّرِيقِ."
" يَصْفِرُونَ وَيَنْغُضُونَ رُؤُوسَهُمْ عَلَى بِنْتِ أُورُشَلِيمَ قَائِلِينَ: «أَهذِهِ هِيَ الْمَدِينَةُ الَّتِي يَقُولُونَ إِنَّهَا كَمَالُ الْجَمَالِ، بَهْجَةُ كُلِّ الأَرْضِ؟" ... يعني هيستغربوا من اللي حصل في أورشليم.
طيب هنا ايه اللي حصل في صُور؟
"اَلتُّجَّارُ بَيْنَ الشُّعُوبِ يَصْفِرُونَ عَلَيْكِ" ... متحيرين ومستغربين ان ازاي حصل كل ده لصُور. لان محدش كان متوقع ان يحصلها ده وتسقط.
"فَتَكُونِينَ أَهْوَالًا،" ... هتبقي رعب لكل اللي يسمع قصتك ويعرف ايه اللي حصلك.
"وَلاَ تَكُونِينَ بَعْدُ إِلَى الأَبَد." ... طيب اورشليم، رجعوا من السبي مرة تاني لبلدهم، بالرغم من شماتة الاعداء فيهم.
لكن صُور اتخربت، ويُقال أن الجزيرة لغاية دلوقتي موجودة لم تُعمّر تاني.
احنا بندرس الكتاب المقدس علشان نتعلم من أخطاء الاخرين.
يعني مهما تعظمت الممالك، لكنها بعيدة عن ربنا. نبقي عارفين أن الله يُعطيها زمانا لكي تتوب. وان لم تتب ، ستسقط. ده مبدأ.
فمهما كانت العظمة والشهرة والمجد، نأخدها علي كل المستويات: سواء ممالك أو الذين في مناصب. ونأخدها كمان علي نفسنا. نبص علي صُور، أن مهما كان الانسان وصل في المجد والشهرة او في موهبة معينة عنده ، هيسقط.
فنخلي بالنا لئلا نكون بنعمل زي صُور، بنتعجرف بحاجة عندنا. نتكبر بحاجة ربنا هو اللي مديهالنا عطية من ايده. نعمة ربنا ملناش يد فيها.
وفي الآخر أصلا ربنا هيسألنا عن ثمار الروح القدس مش مواهب الروح القدوس. وثمار الروح القدس: محبة – فرح - سلام – تعفف – طول أناة – لطف - صلاح – وداعة - ايمان. لكن ربنا مش هيسألنا: انت كنت بتتكلم بألسنة ولا لأ؟ كنت بتخرج شياطين؟ بتشفي امراض؟
- عندنا 3 اصحاحات عن مدينة صُور، ويمكن واحنا بنقرأها للوهلة الاولي نقول، واحنا مالنا ومال الكلام ده؟
لكن الكلام ده يمس الكتير مننا، لأن الكتير مننا مخدوع في العالم. وكل اللي هيديه العالم: هما شوية ناس هيقولوا: سقطت سقطت. او جايز ينوحوا عليه شوية وخلاص.
وفي الاخر تقف أعمال الناس ديه قدام ربنا. وربنا يسأله ويسأل كل واحد: أنت عملت ايه؟ هو ده اللي هيفضل لكل واحد فينا في الاخر.
المرة الجاية هيبقي أخر الكلام عن صُور. لكن الكلام هيبقي عن ملك صُور.
⪢