⪡ 1وَكَانَ كَلاَمُ الرَّبِّ إِلَيَّ فِي السَّنَةِ التَّاسِعَةِ، فِي الشَّهْرِ الْعَاشِرِ، فِي الْعَاشِرِ مِنَ الشَّهْرِ قَائِلاً: لما نخلص اصحاح 24: يبقي كده خلصنا الجزء الاول من سفر حزقيال. لان سفر حزقيال متقسم لتلات أقسام:
القسم الاول: من اصحاح ا لـ 24 ... دينونة مملكة يهوذا.
القسم التاني: من اصحاح 25 لـ 37 ... دينونة بقية الأمم اللي حوالين مملكة يهوذا.
القسم التالت: من اصحاح 38 لـ 48 ... الشفاء وعودة المجد، والبشارة المفرحة.
في اصحاح 22: شوفنا خطايا اورشليم.
وفي الجزء الاخير، قالنا ان كل فئات الشعب غلطوا، وكانت حالتهم صعبة خالص من اول الملك والكهنة والرؤساء والانبياء حتي الشعب. ونلاحظ ان ربنا لما اتكلم قال: "أنبيائها، كهنتها، رؤسائها، ..." يعني خلاص مبقوش ليهم علاقة بربنا. لأنه مقالش : أنبيائي – شعبي – كهنتي. خلاص عملوا حاجز بينهم وبين ربنا.
نأخد بالنا إن في اخر كام اصحاح، ان حزقيال بيكتب بطريقة عالية اوي بطريقة شِعرية. لان حزقيال بجانب انه نبي وعنده مواهب كتيرة كان شاعر كمان. وفي الاصحاح ده برده هنلاقيه كاتب حتة وكأنها أنشودة /أغنية. بس لما اترجمت معرفوش يحافظوا علي تناسق الشِعر اللي فيها. وهنلاقي بعض الكلمات شوية تقيلة.
اصحاح 24 هنا: اصحاح متميز في سفر حزقيال، لان الجزء التاني من الاصحاح بيتكلم عن الحاجة الشخصية الوحيدة لحزقيال النبي في حياته. واتذكرت عنه في السفر كله، وهي موت زوجته.
ربنا كلم حزقيال، في 10 /10/ السنة التاسعة (للتسهيل). (ونفس التاريخ ده بالظبط موجود في ارميا 52: 4. و 2 ملوك 25: 1). في نفس التاريخ ده ربنا قال لحزقيال:
2«يَا ابْنَ آدَمَ، اكْتُبْ لِنَفْسِكَ اسْمَ الْيَوْمِ، هذَا الْيَوْمَ بِعَيْنِهِ. فَإِنَّ مَلِكَ بَابِلَ قَدِ اقْتَرَبَ إِلَى أُورُشَلِيمَ هذَا الْيَوْمَ بِعَيْنِهِ. طيب اشمعنا يارب اليوم ده بالأخص؟ ربنا بيقوله: ابتداء من اليوم ده، ملك بابل: نبوخذنصر، هيذهب لأورشليم ويحاصرها. وهيبتدي حصار اورشليم، والحصار ده قعد فترة. فربنا بيقوله اكتب اليوم ده بعينه، علشان كده لما يتحقق اللي انت قولته، هيعرفوا وقتها ان بينهم نبي. لأنهم بيسمعوا كلام حزقيال، منهم بياخده بمحمل الجد، ومنهم بياخده بهزار. بس وقت تحقيق الكلام ده هيعرفوا إن كلامه كان صح. وأهو حصل. وهيبقي حزقيال بعد كده ليه مكانة معتبرة في وسط الشعب في سبي بابل. لأنهم في الوقت ده كانوا موجودين في بابل. في السبي.
"فَإِنَّ مَلِكَ بَابِلَ قَدِ اقْتَرَبَ إِلَى أُورُشَلِيمَ هذَا الْيَوْمَ بِعَيْنِهِ" ... ربنا أعلن لحزقيال ان ملك بابل رايح علي أورشليم علشان يحاصرها.
3وَاضْرِبْ مَثَلاً لِلْبَيْتِ الْمُتَمَرِّدِ وَقُلْ لَهُمْ: هكَذَا قَالَ السَّيِّدُ الرَّبُّ: ضَعِ الْقِدْرَ. ضَعْهَا وَأَيْضًا صُبَّ فِيهَا مَاءً. كنا شوفنا في حزقيال 17: 2، لما ربنا قاله قولهم مَثل. هنا برده حزقيال هيعمل نفس الحكاية، وهيقولهم مثل ربنا أعلنه ليه.
"وَقُلْ لَهُمْ: هكَذَا قَالَ السَّيِّدُ الرَّبُّ: ضَعِ الْقِدْرَ. ضَعْهَا وَأَيْضًا صُبَّ فِيهَا مَاء" ... بيقولوا الوقت اللي ابتدي فيه نبوخذنصر يحاصر اورشليم، كان تقريبا وقت صوم. وفضل عندهم وقت الصوم لغاية ما بعد السبي. فربنا قاله قولهم المثل ده. والمثل ده عبارة عن: قدر (اناء) كبير وصب (حط) فيه ماء.
هنلاحظ ان الْقِدْر هنا: مؤنث. بيقول: ضعها. فهنا القدر مؤنث لانها تٌشير الي اورشليم
4اِجْمَعْ إِلَيْهَا قِطَعَهَا، كُلَّ قِطْعَةٍ طَيِّبَةٍ: الْفَخِذَ وَالْكَتِفَ. امْلأُوهَا بِخِيَارِ الْعِظَامِ. " اِجْمَعْ إِلَيْهَا قِطَعَهَا،" ... هيحط فيها قطع لحم.
"كُلَّ قِطْعَةٍ طَيِّبَةٍ: الْفَخِذَ وَالْكَتِفَ." ... ابتدي يأخد أحسن القطع ويحطها في القدر او الحلة.
"امْلأُوهَا بِخِيَارِ الْعِظَامِ" ... ربنا بيقوله: حط عضم في المية ديه علشان تبقي شوربة جميلة. معناها هيتسلقوا.
كلمة العظام: في الاصل العبري هنا، في تشابه بينها وبين الاعضاء. فأوقات في النص هنا هنلاقي مرة العظام، ومرة الاعضاء. حسب الترجمة.
5خُذْ مِنْ خِيَارِ الْغَنَمِ وَكُومَةَ الْعِظَامِ تَحْتَهَا. أَغْلِهَا إِغْلاَءً فَتُسْلَقَ أَيْضًا عِظَامُهَا فِي وَسْطِهَا. "خُذْ مِنْ خِيَارِ الْغَنَمِ " ... مش بس من أفضل القطع، لكن كمان من أفضل الاغنام.
"وَكُومَةَ الْعِظَامِ تَحْتَهَا." ... لما بيولعوا نار: بيعملوا دايرة من الخشب، ويحطوا في وسط الدايرة ديه النار.
فربنا بيقوله: اعمل حاجة زي كده، حط النار في وسط الدايرة اللي من الخشب. يعني اعمل وقود نار. حاجة جامدة كده.
"أَغْلِهَا إِغْلاَءً فَتُسْلَقَ أَيْضًا عِظَامُهَا فِي وَسْطِهَا." ... وابتدي اغلي المية اللي في القِدر وفيها قطع اللحم بالعضم، وكمان عضم لوحده. واغلي كل ده مع بعضه.
اتفقنا ان القِدر ده إشارة لأورشليم.
وقطع اللحم الجيدة جدا: اشارة للطبقة العليا، طبقة رؤساء اورشليم. الطبقة الارستقراطية.
واحنا بندرس في سفر حزقيال: لما جم الناس وقالوا مش هنسمع كلام انبياء الله (الانبياء الحقيقيين) . قالوا: لتكن اورشليم القِدر واحنا اللحم. وده كان في حزقيال 11 : 7. الطبقة الأرستقراطية علشان منفعتهم قالوا: مش هنطلع من المدينة ومش هنستسلم لنبوخذنصر. وهنسمع كلام الأنبياء بتوعنا اللي هما الكذبة. وسيبكم من ارميا وحزقيال دول.
وقالوا حتي لو اتهدت اورشليم، تتهد فوق دماغنا، مش مهم. هي القِدر واحنا اللحم.
فربنا بيقولهم: الكلام اللي بتقوله ده مش هيحصل. هتموتوا . بس مش هتموتوا في اورشليم. اورشليم مش هتبقي ليكم القِدر وأنتم فيها اللحم. لأ، لكن ها اوديكم علي التٌخم (يعني الحدود) وهتتقتلوا هناك.
6« لِذلِكَ هكَذَا قَالَ السَّيِّدُ الرَّبُّ: وَيْلٌ لِمَدِينَةِ الدِّمَاءِ، الْقِدْرِ الَّتِي فِيهَا زِنْجَارُهَا، وَمَا خَرَجَ مِنْهَا زِنْجَارُهَا. أَخْرِجُوهَا قِطْعَةً قِطْعَةً. لاَ تَقَعُ عَلَيْهَا قُرْعَةٌ. نفس التعبير: مدينة الدماء، الكلام علي اورشليم. بعد ما كانت مدينة اورشليم هي مدينة العدل والبر. أصبحت مدينة الظلم والدماء.
"الْقِدْرِ الَّتِي فِيهَا زِنْجَارُهَا،" ... زنجارها: يعني قِدر مصدية (صدأ).
"وَمَا خَرَجَ مِنْهَا زِنْجَارُهَا." ... ربنا حاول ينضفها من الصدأ ده، منضفتش، مش عاوزة تنضف.
"أَخْرِجُوهَا قِطْعَةً قِطْعَةً. لاَ تَقَعُ عَلَيْهَا قُرْعَةٌ" ... الرؤساء دول، ربنا قال عليهم أخرجوهم قطعة قطعة ، مش هنعمل قٌرعة.
(القرعة: زمان يقولوا ان في ايام السبي، ان لما بلد تأخد سبايا من بلد تاني. كان ساعات يلقٌوا قٌرعة، مين يتأخد ومين لأ.) لكن هنا في حالة اورشليم: في الطبقة ديه بتاعة الرؤساء كله هيتأخد في السبي، مفيش قرعة علشان يشوفوا مين هيتأخد ومين لأ.
(وكمان زمان كانوا بيلقوا قرعة علشان يعرفوا مين المٌذنب ومين البرئ. زي ما حصل مع يونان النبي والبحارة. البحارة قالوا نعمل قرعة ونشوف مين المٌذنب، وطلع يونان هو المٌذنب.).
فربنا هنا بيقول مش هيعملوا قرعة ويشوفوا مين المٌذنب ومين البرئ. لكن كلهم هيتأخدوا.
7لأَنَّ دَمَهَا فِي وَسْطِهَا. قَدْ وَضَعَتْهُ عَلَى ضِحِّ الصَّخْرِ. لَمْ تُرِقْهُ عَلَى الأَرْضِ لِتُوَارَيهُ بِالتُّرَابِ. بيقولوا لما الواحد يعمل مصيبة او حاجة غلط، بيعملها في الخفاء. لكن دول بيعملوا المصيبة في وضح النهار. وفي وسط المدينة. ومش هاممهم حاجة او حد.
مثلا: حد يموّت حد ويبقي في دم، المفروض يحطوا تراب علي الدم علشان يغطوه، ويشيلوا اثار الجريمة. لكن اورشليم مكانتش بتعمل كده. ... " لأَنَّ دَمَهَا فِي وَسْطِهَا. قَدْ وَضَعَتْهُ عَلَى ضِحِّ الصَّخْرِ." لكن حطيت الدم علي الصخر من غير ما تغطيه، قدام الناس كلها. الكل يشوف ويتفرج. لهذة الدرجة وصل الفساد والاجرام وسفك الدم، ومش هاممهم.
"لَمْ تُرِقْهُ عَلَى الأَرْضِ لِتُوَارَيهُ بِالتُّرَابِ" ... المفروض يحطوا التراب علي الدم علشان يخفوا الجريمة، بس اورشليم معملتش كده.
8لِصُعُودِ الْغَضَبِ، لِتُنْقَمَ نَقْمَةً، وَضَعْتُ دَمَهَا عَلَى ضِحِّ الصَّخْرِ لِئَلاَّ يُوارَى. وكأنهم عاملين كده علشان يثيروا غضب الله، ونقمة الله عليهم.
فهنا بيقولوا لربنا: ادينا بنتقل وبنسفك الدماء، وبنذبح ذبائح للآلهة الغريبة وسايبين الدم علي الأرض ومش هاممنا. وكأنهم بيقولوا لربنا: اعمل اللي عاوزه. فربنا يقولهم:
"وَضَعْتُ دَمَهَا عَلَى ضِحِّ الصَّخْرِ لِئَلاَّ يُوارَى" ... يارب هو انت اللي وضعت الدم؟ ولا هما؟
في اصحاح 22: 24 كأن ربنا بيقولهم مش هانزل لكم مطر، يشيل آثار الدم ده. علشان تفضل خطاياهم باقية. لان لو كان في مطر، كان المطر هيشيل اي آثار للدم ده. لكن ربنا له المجد قال: هأغلق السماء ولم تٌمطر، علشان تفضل آثار الدماء والجريمة قدامهم. قصاد عنيهم.
9لِذلِكَ هكَذَا قَالَ السَّيِّدُ الرَّبُّ: وَيْلٌ لِمَدِينَةِ الدِّمَاءِ. إِنِّي أَنَا أُعَظِّمُ كُومَتَهَا. مدينة الدماء اللي هي اورشليم.
"إِنِّي أَنَا أُعَظِّمُ كُومَتَهَا" ... ان جاز التعبير إننا نقول: ان المسئول المسئولية المباشرة عن العقوبة هو ربنا له المجد. كأنه هو اللي بيزود الكومة، علشان النيران تبقي حاجة معتبرة، حاجة جامدة. (يعني عمال يحط الحطب والخشب والكومة تزيد، والأتون يٌحمي، وكل ده علشان ينالوا جزاء أعمالهم) .
10كَثِّرِ الْحَطَبَ، أَضْرِمِ النَّارَ، أَنْضِجِ اللَّحْمَ، تَبِّلْهُ تَتْبِيلاً، وَلْتُحْرَقِ الْعِظَامُ. الاسلوب الشِعري لحزقيال: "كَثِّرِ الْحَطَبَ، أَضْرِمِ النَّارَ،" ... علشان يدل علي مقدار العقوبة أد ايه.
"أَنْضِجِ اللَّحْمَ، تَبِّلْهُ تَتْبِيلًا،" ... مش واضح الكلام بالعربي، بس جايز في الترجمة اليسوعية اوضح شوية. الاصل بتاعها: افني اللحم، ركّد المرق (الشوربة).
يعني كأن القِدر اللي فيها اللحم، ربنا هيسيب اللحم والعضم اللي فيه علي النار، لغاية ما اللحم نفسه يذوب ويختلط بالشوربة، وتبقي كلها سايلة. وده علشان يورينا ويفهمنا مقدار العقوبة.
طيب ليها ربنا مستخدم الالفاظ القوية ديه؟ لان اللي كان هيحصل لهم مش قليل، خراب اورشليم والهيكل والتشتت والسبي. كل ده مكانش سهل. فربنا عمال يقولهم: توبوا وارجعوا، بس هما مش فارق معاهم اصلا ومش عاوزين يتوبوا. وبكل الطرق ربنا حاول معاهم. وحزقيال بأسلوبه الشِعري: اداهما كل الصور والأساليب، علشان يفهموا . بس لا فهموا ولا رجعوا. مش عاوزين.
"وَلْتُحْرَقِ الْعِظَام" ... يعني العضم كله بقي زي الفحم. العضم اتفحم.
11ثُمَّ ضَعْهَا فَارِغَةً عَلَى الْجَمْرِ لِيَحْمَى نُحَاسُهَا وَيُحْرَقَ، فَيَذُوبَ قَذَرُهَا فِيهَا وَيَفْنَى زِنْجَارُهَا. بعد ما خلص الجزء الاول بتاع اللحم وان العضم اتفحم علي الاخر، اتحرق علي الاخر. ربنا قاله:
"ُثمَّ ضَعْهَا فَارِغَةً عَلَى الْجَمْرِ لِيَحْمَى نُحَاسُهَا وَيُحْرَقَ،" ... ربنا عاوزها تتساب علي الجمر لغاية ماتسيح القِدر نفسها، اورشليم نفسها. وهو ده اللي حصل لهم فعلا، أيام نبوخذنصر. وكمان في القرن الاول علي ايد تيطس القائد الروماني. لان السيد المسيح قالهم: مفيش حجر هيبقي علي حجر يا اورشليم.
"فَيَذُوبَ قَذَرُهَا فِيهَا وَيَفْنَى زِنْجَارُهَا" ... ربنا حاول ينضف الزنجار اللي هو الصدأ ده ومنضفش. فخلاص يا حزقيال: سيب النحاس كله في النار، لغاية ما الصدأ ده يدوب لوحده.
12بِمَشَقَّاتٍ تَعِبَتْ وَلَمْ تَخْرُجْ مِنْهَا كَثْرَةُ زِنْجَارِهَا. فِي النَّارِ زِنْجَارُهَا. "بمَشَقَّاتٍ تَعِبَتْ" ... يعني بذل مجهود كتير جدا. علشان تنضف ومنضفتش.
"وَلَمْ تَخْرُجْ مِنْهَا كَثْرَةُ زِنْجَارِهَا." ... صدأ المعادن: ده يعتبر زي مرض في المعادن، بيأكل في المعادن لغاية مايبوظ خالص. فكأن الخطية بتاعة اورشليم او خطايا ونجاسة اورشليم، بقت عاملة زي المرض اللي عمال يأكل فيها. ومش عاوزة تخف. فربنا قالها: انا هأخففك، هأشفيكِ بطريقتي.
"فِي النَّارِ زِنْجَارُهَا" ... خلاص بقي الي النار. الحل الوحيد: انها تٌمحص وتٌفحص بالنار. علشان تتنقي. وينزل الصدأ وكل الشروائب ويفضل النحاس النقي بس.
13فِي نَجَاسَتِكِ رَذِيلَةٌ لأَنِّي طَهَّرْتُكِ فَلَمْ تَطْهُرِي، وَلَنْ تَطْهُرِي بَعْدُ مِنْ نَجَاسَتِكِ حَتَّى أُحِلَّ غَضَبِي عَلَيْكِ. ربنا يكمل ويقول:
"فِي نَجَاسَتِكِ رَذِيلَةٌ" ... خطاياهم مٌرة. اثمهم بشع.
"لأَنِّي طَهَّرْتُكِ فَلَمْ تَطْهُرِي،" ... ربنا بيقول لاورشليم: حاولت أطهرك بس مردتيش.
"وَلَنْ تَطْهُرِي بَعْدُ مِنْ نَجَاسَتِكِ حَتَّى أُحِلَّ غَضَبِي عَلَيْكِ" ... وشكل كده مفيش حل تاني معاكِ غير أنه يجي عليكِ الغضب. لانها الطريقة الوحيدة للتطهير.
ساعات الواحد فينا مش بيجي بمراحم ربنا، ولا بطول أناة ربنا وصبره علينا. فربنا يسمح للواحد بشوية ضيقات. والضيقات ديه: تطهر وتنقي. زي ما حصل مع أيوب البار: كان محتاج الضيقات ديه، علشان البر الذاتي اللي كان عنده.
14أَنَا الرَّبَّ تَكَلَّمْتُ. يَأْتِي فَأَفْعَلُهُ. لاَ أُطْلِقُ وَلاَ أُشْفِقُ وَلاَ أَنْدَمُ. حَسَبَ طُرُقِكِ وَحَسَبَ أَعْمَالِكِ يَحْكُمُونَ عَلَيْكِ، يَقُولُ السَّيِّدُ الرَّبُّ». معناها: أنا تكلمت، أنا أفعل، وهي نفسها جت في حزقيال 22: 14. يعني ما تكلمت بيه ، سوف يأتي وهأفعله . ديه طريقة شِعرية (فيها اختصار نص الجملة تقريبا.).
"لاَ أُطْلِقُ وَلاَ أُشْفِقُ وَلاَ أَنْدَمُ." ... خلاص وقت التوبة خلص.
"حَسَبَ طُرُقِكِ وَحَسَبَ أَعْمَالِكِ يَحْكُمُونَ عَلَيْكِ، يَقُولُ السَّيِّدُ الرَّبُّ." ... يعني هأسلط عليكي البابليين، وزي ما عملتِ يٌعمل فيكِ. كل الظلم اللي ظلمتيه، هتتظلمي. وكل الاثم وسفك الدم اللي عملتيه، هيجي عليكِ برده سفك الدم.
وده بكده كان الجزء الاول من الاصحاح.
الجزء التاني سهل، وهو موت زوجة حزقيال.
15وَكَانَ إِلَيَّ كَلاَمُ الرَّبِّ قَائِلاً: ربنا كلم حزقيال:16«يَا ابْنَ آدَمَ، هأَنَذَا آخُذُ عَنْكَ شَهْوَةَ عَيْنَيْكَ بِضَرْبَةٍ، فَلاَ تَنُحْ وَلاَ تَبْكِ وَلاَ تَنْزِلْ دُمُوعُكَ. الجزء اللي جاي لو أتاملنا فيه، فهي حتة صعبة مش سهلة. كإحساس.
" يَا ابْنَ آدَمَ، هأَنَذَا آخُذُ عَنْكَ شَهْوَةَ عَيْنَيْكَ بِضَرْبَةٍ،" ... شهوة عين حزقيال: هي زوجة حزقيال. وديه الحاجة الوحيدة الشخصية اللي اتذكرت عنه.
وديه تدينا فكرة عن ان حزقيال كان متزوج. وبيقولوا أنه كان متزوج من قبل السبي، وراحوا هما الاتنين السبي مع بعض. وبيقولوا أنه كان بيحب مراته جدا. ومراته بالنسبة له: شهوة عينه. كانوا اسرة جميلة. لدرجة ان لما ربنا قاله الموضوع ده، مقالهوش هأخد مراتك لكن قاله: شهوة عينيك، يعني أغلي حاجة عندك يا حزقيال.
" بِضَرْبَةٍ،" ... غالبا ده موت مفاجئ.
والجزء ده يدينا فكرة عن المستويات العالية اوي لخدام ربنا. خدام بكل اللي عندهم. وده مثلا يفكرنا بأبونا ميخائيل ابراهيم: لما كان بيخدم في القداس، وجاله خبر موت ابنه. بس أبونا كمل القداس وخلصه وبعدين راح يشوف ابنه اللي مات، ديه مستويات عالية.
بس ربنا قاله: علشان أدي اسرائيل مثل، هأموٌت مراتك يا حزقيال. فطبعا كانت أكيد صعبة. بس هو خادم ربنا.
"فَلاَ تَنُحْ وَلاَ تَبْكِ وَلاَ تَنْزِلْ دُمُوعُكَ" ... يعني مراتك هتموت يا حزقيال، وأنت متعبرش عن حزنك ده خالص بأي وسيلة.
17تَنَهَّدْ سَاكِتًا. لاَ تَعْمَلْ مَنَاحَةً عَلَى أَمْوَاتٍ. لُفَّ عِصَابَتَكَ عَلَيْكَ، وَاجْعَلْ نَعْلَيْكَ فِي رِجْلَيْكَ، وَلاَ تُغَطِّ شَارِبَيْكَ، وَلاَ تَأْكُلْ مِنْ خُبْزِ النَّاسِ». " تَنَهَّدْ سَاكِتًا." ... كل اللي تقدر تعمله اتنهد وبس يا حزقيال.
"لاَ تَعْمَلْ مَنَاحَةً عَلَى أَمْوَاتٍ." ... كل الحاجات اللي كانت بتتعمل علي أموات متعملهاش يا حزقيال، متندبش.
"لُفَّ عِصَابَتَكَ عَلَيْكَ،" ... حاجة زي العِمة، زمان لما حد يموت كانوا يكشفوا رأسهم، لكن حزقيال هيلبس العصائب ويلفها علي رأسه.
"وَاجْعَلْ نَعْلَيْكَ فِي رِجْلَيْكَ،" ... لما حد كان يموت، كانوا يقعلوا النعل، ويمشوا حافيين. اشارة للبؤس.
"وَلاَ تُغَطِّ شَارِبَيْكَ،" ... المفروض انه كان يغطي شنبه لما كان يبقي في ميت، (وديه تفهمنا ان حزقيال كان عنده شنب.) اشارة للخزي والعار وشدة الحزن. بس هنا ربنا بيقوله متغطيش شنبك.
"وَلاَ تَأْكُلْ مِنْ خُبْزِ النَّاسِ." ... خبز الناس: لما يكون في ميت، غالبا اهل المتوفي مش بيلحقوا يعملوا اكل، فجيرانهم وأصحابهم كانوا بيجيبوا لهم الأكل. فده اسمه خبر الناس.
بمعني: أن كل التقاليد اللي بتتعمل في موت حد، أنت يا حزقيال متعملهاش. وكل ده لأن ربنا عاوز يوصل الرسالة للشعب.
زوجة حزقيال النبي: خادمة في الخفاء، ساعدت زوجها للنفس الأخير. وهي نفسها في موتها، أصبحت مثال يٌضرب في أورشليم، وعند المسبيين كمان في بابل.
انسانة خادمة في الخفاء، مسمعناش عناه غير في حتة صغيرة في السفر (حزقيال 24) وهي ديه الخدمة الجميلة.
18فَكَلَّمْتُ الشَّعْبَ صَبَاحًا وَمَاتَتْ زَوْجَتِي مَسَاءً. وَفَعَلْتُ فِي الْغَدِ كَمَا أُمِرْتُ. " فَكَلَّمْتُ الشَّعْبَ صَبَاحًا" ... يعني ربنا له المجد كلم حزقيال بليل. وحزقيال تاني يوم الصبح كلم شعبه.
"وَمَاتَتْ زَوْجَتِي مَسَاءً." ... زوجة حزقيال ماتت بليل.
"وَفَعَلْتُ فِي الْغَدِ كَمَا أُمِرْتُ" ... تاني يوم الصبح، عمل كل اللي قالهوله ربنا
19فَقَالَ لِيَ الشَّعْبُ: «أَلاَ تُخْبِرُنَا مَا لَنَا وَهذِهِ الَّتِي أَنْتَ صَانِعُهَا؟» والشعب عارف أن لما حزقيال بيعمل حاجة زي تمثلية او مَثل، يبقي في حاجة هتحصل.
فقالوله: مش تقولنا في ايه؟ ده انت زوجتك ماتت، والمفروض كل تقاليدنا في الموت، أنت معملتش ولا حاجة منه.
" أَلاَ تُخْبِرُنَا مَا لَنَا وَهذِهِ الَّتِي أَنْتَ صَانِعُهَا؟" ... طيب احنا ايه دخلنا او علاقتنا بكل ده؟
فهما عارفين كده معناه: ان ليهم علاقة باللي هيتعمل.
20فَأَجَبْتُهُمْ: «قَدْ كَانَ إِلَيَّ كَلاَمُ الرَّبِّ قَائِلاً: جاوبتهم، وقولت لهم ان ربنا كلمني. 21كَلِّمْ بَيْتَ إِسْرَائِيلَ: هكَذَا قَالَ السَّيِّدُ الرَّبُّ: هأَنَذَا مُنَجِّسٌ مَقْدِسِي فَخْرَ عِزِّكُمْ، شَهْوَةَ أَعْيُنِكُمْ وَلَذَّةَ نُفُوسِكُمْ. وَأَبْنَاؤُكُمْ وَبَنَاتُكُمُ الَّذِينَ خَلَّفْتُمْ يَسْقُطُونَ بِالسَّيْفِ، " كَلِّمْ بَيْتَ إِسْرَائِيلَ:" ... بيقولوا ان الكلام يحمل معناين:
ان الكلام علي المسبيين وكمان علي القائمين في أورشليم. (يعني الكلام ده يمشي علي الفئتين دول من أول الاصحاح.).
"هكَذَا قَالَ السَّيِّدُ الرَّبُّ: هأَنَذَا مُنَجِّسٌ مَقْدِسِي فَخْرَ عِزِّكُمْ، شَهْوَةَ أَعْيُنِكُمْ وَلَذَّةَ نُفُوسِكُمْ." ... كل التعبيرات ديه ينفع تتقال علي زوجة حزقيال، لان موت زوجة حزقيال: هو اشارة الي خراب اورشليم وتنجيس الهيكل. فربنا بيقولهم: مكانة الهيكل واورشليم، عندكم ايه؟
" فَخْرَ عِزِّكُمْ، شَهْوَةَ أَعْيُنِكُمْ وَلَذَّةَ نُفُوسِكُمْ." ... علشان كده ربنا قال لحزقيال هأخد منك شهوة عنيك.
"وَأَبْنَاؤُكُمْ وَبَنَاتُكُمُ الَّذِينَ خَلَّفْتُمْ يَسْقُطُونَ بِالسَّيْفِ،" ... معني كده ان في ناس في السبي كانوا كبار، وسابوا أسرهم هناك. دول هيتقتلوا بالسيف. الأولاد والبنات هيتقتلوا بالسيف.
22وَتَفْعَلُونَ كَمَا فَعَلْتُ: لاَ تُغَطُّونَ شَوَارِبَكُمْ وَلاَ تَأْكُلُونَ مِنْ خُبْزِ النَّاسِ. حزقيال بيقولهم: هتعملوا زي ما انا عملت
"لاَ تُغَطُّونَ شَوَارِبَكُمْ وَلاَ تَأْكُلُونَ مِنْ خُبْزِ النَّاسِ" ... كل اللي شوفتوني عملته هتعملوا زي: مش هتغطوا شواربكم ولا هتأكلوا من الأكل اللي هيعملوه الناس ليكم لما يموت لكم حد.
23وَتَكُونُ عَصَائِبُكُمْ عَلَى رُؤُوسِكُمْ، وَنِعَالُكُمْ فِي أَرْجُلِكُمْ. لاَ تَنُوحُونَ وَلاَ تَبْكُونَ وَتَفْنَوْنَ بِآثَامِكُمْ. تَئِنُّونَ بَعْضُكُمْ عَلَى بَعْضٍ. نفس الكلام اللي عمله حزقيال، هما هيعملوه بالظبط.
"وَتَفْنَوْنَ بِآثَامِكُمْ." ... شوفناها قبل كده في حزقيال. كله هيموت بخطاياه.
"تَئِنُّونَ بَعْضُكُمْ عَلَى بَعْضٍ" ... اللي يلحق يهرب، يهرب. واللي يلحق يدوس علي الناس، هيدوس. وفي الاخر برده كله هيموت بخطاياه.
24وَيَكُونُ حِزْقِيَالُ لَكُمْ آيَةً. مِثْلَ كُلِّ مَا صَنَعَ تَصْنَعُونَ. إِذَا جَاءَ هذَا، تَعْلَمُونَ أَنِّي أَنَا السَّيِّدُ الرَّبُّ. فكل حاجة عملها حزقيال وقت وفاة زوجته، هما هيعملوها بالظبط.
كل ده هيحصل، ولما يحصل هتعرفوا ان حزقيال كان بني ربنا. واتكلم بكلام ربنا. وان ربنا هو الاله الحقيقي... "تَعْلَمُونَ أَنِّي أَنَا السَّيِّدُ الرَّبُّ".
25وَأَنْتَ يَا ابْنَ آدَمَ، أَفَلاَ يَكُونُ فِي يَوْمٍ آخُذُ عَنْهُمْ عِزَّهُمْ، سُرُورَ فَخْرِهِمْ، شَهْوَةَ عُيُونِهِمْ وَرَفْعَةَ نَفْسِهِمْ: أَبْنَاءَهُمْ وَبَنَاتِهِمْ، معناها: ان هيجي يوم والكلام هيتحقق علي الهيكل واورشليم. لان في ذهنهم ان كل الدنيا ممكن تقع الا اورشليم والهيكل.
"وَرَفْعَةَ نَفْسِهِمْ:" أَبْنَاءَهُمْ وَبَنَاتِهِمْ" ... الحاجة اللي بيفتخروا بيها، كله هيتأخد حتي اولادهم وبناتهم
26أَنْ يَأْتِيَ إِلَيْكَ فِي ذلِكَ الْيَوْمِ الْمُنْفَلِتُ لِيُسْمِعَ أُذُنَيْكَ. ربنا بيقوله: اكتب وسجل اليوم ده، لأنه كان بداية الحصار. والحصار هيقعد حوالي سنة وشوية. ولما يجي الْمُنْفَلِتُ الهارب، يعني اللي جاي في الاسر. وتقريبا حزقيال من أخر حاجة قالها في الجزء ده، سكت. مقالش حاجة تاني.
كنت عمال أكلمكم علشان تفوقوا وتوبوا، وعمال أذكركم بآثامكم. بس مكانش في فايدة. فديه أخر حاجة هأقولهالكم وهأسكت. لغاية ما تعرفوا ان اللي قولته ده صح.
لغاية ما فعلا جاله الْمُنْفَلِتُ، الهارب. وقاله أورشليم وقعت. والشعب أتاخد في السبي.
27فِي ذلِكَ الْيَوْمِ يَنْفَتِحُ فَمُكَ لِلْمُنْفَلِتِ وَتَتَكَلَّمُ، وَلاَ تَكُونُ مِنْ بَعْدُ أَبْكَمَ. وَتَكُونُ لَهُمْ آيَةً، فَيَعْلَمُونَ أَنِّي أَنَا الرَّبُّ». خلاص بقي، لان حزقيال كان بقاله اكتر من سنة ساكت. لأنه كده كده مكانوش مصدقين.
"وَلاَ تَكُونُ مِنْ بَعْدُ أَبْكَمَ. وَتَكُونُ لَهُمْ آيَةً، فَيَعْلَمُونَ أَنِّي أَنَا الرَّبُّ." ... فلما يجي الْمُنْفَلِتُ، ويجوا السبايا اللي جايين من أورشليم، وتيجي أخبار أن أورشليم سقطت والهيكل خربوه. وأخدوا آنية بيت الرب. تبتدي يا حزقيال تتكلم. بس الكلام الجديد: هو عبارة عن البشارة المٌفرحة والرجوع والشفاء.
في الأخر هيفهموا أن ربنا فعلا اتكلم عن فم حزقيال النبي.
⪢