⪡ 1وَكَانَ إِلَيَّ كَلاَمُ الرَّبِّ قَائِلاً: الاصحاح الـ23 مشهور زي الاصحاح الـ 16، الإصحاحين دول كلامهم بيوجع القلب. لأن بيكون فيه تشبيه شعب الله بالزوجة الخاينة. تشبيه مُر، لأنه عاوز يوصل أد ايه مشاعر ربنا مجروحة من شعبه.
فهنا هيحكي الحكاية تاني: أورشليم والسامرة، أختين زانيتين.
رجع شعب ربنا يحن لعبادة الأوثان والنجاسة وبعد ما اتفرقوا لمملكتين شمالية وجنوبية. الشمالية عاصمتها السامرة والجنوبية عاصمتها اورشليم.. الأخت الكبيرة الشمالية اللي عاصمتها السامرة سماها ربنا أهولة حنت لأيام مصر أيام النجاسة والأوثان، فدورت على أقرب مملكة عايشة في النجاسة وهي مملكة آشور حبتها واتعلمت منها الأصنام والنجاسة. فغضب الله عليها وسلمها لآشور فأحتلتهم وكان السبي الآشوري. هي دي طريقة عدو الخير اللي بيروح له ويحن له على طول بيغدر به ويسبيه ويقتله.
2«يَا ابْنَ آدَمَ، كَانَ امْرَأَتَانِ ابْنَتَا أُمٍّ وَاحِدَةٍ، " كَانَ امْرَأَتَانِ " ... الأختين هما: إسرائيل الأخت الكبرى، وكانوا 10 أسباط. ويهوذا الأخت الصغرى وكانوا سبطين.
" ابْنَتَا أُمٍّ وَاحِدَةٍ." ... لأن أورشليم والسامرة قبل انفصالهم لمملكتين، كانوا شعب واحد، مملكة واحدة. شعب اليهود، وكانوا كلهم أولاد يعقوب (اللي كان اسمه إسرائيل). انفصلوا لمملكتين في عهد رحبعام ابن سُليمان الملك.
3وَزَنَتَا بِمِصْرَ. فِي صِبَاهُمَا زَنَتَا. هُنَاكَ دُغْدِغَتْ ثُدِيُّهُمَا، وَهُنَاكَ تَزَغْزَغَتْ تَرَائِبُ عُذْرَتِهِمَا. وبما أن الكلام مش على اتنين سيدات، فالزنا هنا هو زنا روحي. يعني خيانة الله. اللي هو عبادة الأوثان.
"وَزَنَتَا بِمِصْرَ." ... حزقيال النبي كان وضح لنا قبل كده، أن أول تعلُق للشعب اليهودي بعبادة الأوثان، كان أثناء وجودهم في أرض مصر. فالمعني انهم: وقعوا في الزنا في مصر، يعني عبدوا الأوثان في مصر.
"فِي صِبَاهُمَا زَنَتَا." ... يعني عرفوا الشر وهما لسه في بدايتهم كشعب الله. قبل ما يطلعوا البرية وقبل دخولهم لأرض كنعان. كان بداية تعامل الجيل ده مع ربنا في أرض مصر.
" عُذْرَتِهِمَا." ... عذراويتهما وبكوريتهما كفتاتين غير متزوجتين.
" تَرَائِبُ" ... جمع تريبة. ومعناها من المُعجم: عظام القفص الصدري. (عظام الصدر، وهي موضع القلادة). وجوة تجويف عظام الصدر، موجود القلب. يعني المشاعر.
"هُنَاكَ دُغْدِغَتْ ثُدِيُّهُمَا، وَهُنَاكَ تَزَغْزَغَتْ تَرَائِبُ عُذْرَتِهِمَا." ... يعني مارسوا الزنا، بس أكيد الزنا الروحي. فاستهواهم جو النجاسة، وحبوه. وعلشان كده لما ربنا حررهم من العبودية وخرجهم من أرض مصر، رجعوا جري للوثنية وعملوا العجل الذهبي وهما في البرية.
فهنا حزقيال النبي بيوضح لنا: أن شعب الله زنى في مصر، يعني عبد الأصنام وساب ربنا.
يعني المقصود هنا: أن القلب فقد عُذريته، القلب فقد طهارته. الشهوات الرديئة نجست القلب.
" تَزَغْزَغَتْ" ... زي حد بيزغزغ حد يعني بيضحكه. فهناك في مصر، استهويتهم وفرحتهم العبادات الوثنية.
شالوا شهوة العِشرة مع ربنا، وحطوا مكانها شهوة الشر والخطية.
إذا معني الآية: أن مش المقصود فعل حسي، لكن المقصود أن الشهوات الرديئة والنجاسة عرفت طريقها للقلب.
4وَاسْمُهُمَا: أُهُولَةُ الْكَبِيرَةُ، وَأُهُولِيبَةُ أُخْتُهَا. وَكَانَتَا لِي، وَوَلَدَتَا بَنِينَ وَبَنَاتٍ. وَاسْمَاهُمَا: السَّامِرَةُ «أُهُولَةُ»، وَأُورُشَلِيمُ «أُهُولِيبَةُ». ديه أسماء مجازية. مش حقيقية. فهنا ربنا بيوضح لنا أنه بيتكلم عن المملكتين، مسبناش احنا نجتهد وندور.
" أُهُولَةُ الْكَبِيرَةُ" ... وهي مملكة السامرة. وكبيرة لأنها مكونة من 10 أسباط.
"أُهُولِيبَةُ أُخْتُهَا." ... الأخت الصغيرة، وهي مملكة يهوذا. اللي هي أورشليم وعبارة عن سبطين.
ويُقال إن اسمهم متاخد من كلمة أهول: وهي كلمة عبرية، معناها خيمة. يعني في الاًصل ده شعب الخيمة. لأن أبونا ابراهيم واسحق سكنوا في الخيمة. وكمان معناها: أن أنا ربنا كنت ساكن في وسطكم في الخيمة بتاعتي، ساكن معاكم. كنت بأحل بمجدي على تابوت العهد، في خيمة الاجتماع. وفجأة شالوا مجدي، وحطوا مكان مجدي، الأوثان. (علشان كده ربنا اختار الأسماء ديه لأن ليها معاني).
الخيمة يعني الغٌربة عن الدنيا. ملناش فيها حاجة. مش متمسكين بالدنيا واللي فيها. كمان كلمة خيمة روحيا: بتُشير للجسد، زي معملنا بولس الرسول في رسالته لأهل كورنثوس "ان نُقض بيت خيمتنا الأرضي، فلنا بناء في السماء غير مصنوع بيد. أبدي." (2كو5 : 1). فكان ربنا بيقولهم أنتم جريتوا وراء الجسد. فالأسماء ديه اللي معناهم مرتبط بالخيمة، ربنا يقصد بيه حاجتين:
- أنه كان المفروض ساكن معاهم في خيمة الاجتماع، وهما مش عاوزين مكان لربنا وسطهم.
- أن الخيمة ديه إشارة للجسد، وهما جريوا وراء الجسد بتاعهم وشهواتهم. مع أن الخيمة بتتهد في لحظة. (الجسد بيشبهوه بالخيمة، لأن أي شوية هواء هيوقعها. والجسد مصيره للزوال.).
وأول ما الشعب اليهودي بقي مُتمسك بالدنيا، واختفت الخيمة. بقي عمال يتذل ويأخد على دماغه، وبقي زيه زي أي شعب وثني.
"وَكَانَتَا لِي، وَوَلَدَتَا بَنِينَ وَبَنَاتٍ. وَاسْمَاهُمَا: السَّامِرَةُ أُهُولَةُ، وَأُورُشَلِيمُ أُهُولِيبَةُ." ... الاختين دول جريوا وراء شهواتهم.
5وَزَنَتْ أُهُولَةُ مِنْ تَحْتِي وَعَشِقَتْ مُحِبِّيهَا، أَشُّورَ الأَبْطَالَ الكلام هنا عن مملكة السامرة، الأخت الكبيرة.
"وَزَنَتْ أُهُولَةُ مِنْ تَحْتِي" ... زنت من تحتي: يعني رفضتني. رفضت اني أسُود (يسود) عليها وأرعاها. لأن ربنا كان بيعامل شعبه علي أساس أنها عروسه، وهو عريسها.
"وَعَشِقَتْ مُحِبِّيهَا، أَشُّورَ الأَبْطَال." ... السامرة لقت حد تتحد بيه، وهي مملكة أشور. لأن مملكة السامرة راحت وراء أشور.
6اللاَّبِسِينَ الأَسْمَانْجُونِيَّ وُلاَةً وَشِحَنًا، كُلُّهُمْ شُبَّانُ شَهْوَةٍ، فُرْسَانٌ رَاكِبُونَ الْخَيْلَ. "شِحَنًا" ... هما القادة والرؤساء.
هنا ربنا بيوضح الحاجات اللي جذبت السامرة لمملكة أشور:
"اللاَّبِسِينَ الأَسْمَانْجُونِيَّ وُلاَةً وَشِحَنًا،" ... السامرة أُعُجبت بلبس مملكة أشور.
"كُلُّهُمْ شُبَّانُ شَهْوَةٍ، فُرْسَانٌ رَاكِبُونَ الْخَيْل." ... انبهرت السامرة بالتنظيم اللي في مملكة أشور، وبقوة شبابها وجيشهم.
زي مثلا بنت تقول شدني أو عجبني في عريسي، قوته وشخصيته وشكله وهكذا ... فهنا مملكة السامرة انجذبت لأمور جديدة عليهم، مشافوهاش في مملكتهم قبل كده.
فكل دي أسباب خلت مملكة إسرائيل (السامرة) تتعلق بآلهة أشور، وتبني لها معابد، وتتعبد لها. أنبهرت أهولة بالمظاهر، ونست أن الله هو قوتها الحقيقية وانشغلت عن عبادته.
زي بالظبط حاليا في ناس بتحارب أولادنا بالتعاليم والأساليب الجديدة في الجذب، والشباب فرحان بالأساليب الجديدة ديه.
7فَدَفَعَتْ لَهُمْ عُقْرَهَا لِمُخْتَارِي بَنِي أَشُّورَ كُلِّهِمْ، وَتَنَجَّسَتْ بِكُلِّ مَنْ عَشِقَتْهُمْ بِكُلِّ أَصْنَامِهِمْ. "فَدَفَعَتْ لَهُمْ عُقْرَهَا" ... عُقْرَهَا: يعني أجر الزانية. الفلوس اللي بيقدموها لها. فهنا برده بيكرر الفكرة ديه لأن قبل كده حزقيال النبي قالها "صار فيكِ عكس عادة الناس" يعني أنتِ اللي بتدفعي فلوس للناس اللي بتزني معاكِ. فهنا بيقولها: أنتِ أديتِ فولس وقدمتِ رشاوي لمملكة أشور.
"لِمُخْتَارِي بَنِي أَشُّورَ كُلِّهِمْ،" ... قدمتِ فلوسك ورشاوي لمملكة أشور.
"وَتَنَجَّسَتْ بِكُلِّ مَنْ عَشِقَتْهُمْ بِكُلِّ أَصْنَامِهِم." ... فالكلام هنا عن عبادة الأوثان. الزنا الروحي. وعلي فكرة طقس عبادة الاوثان فيها ممارسات من كل أنواع الفجور. علشان كده ربنا كان بيستخدم تعبيرات الزنا والفجور في عبادة الأوثان.
8وَلَمْ تَتْرُكْ زِنَاهَا مِنْ مِصْرَ أَيْضًا، لأَنَّهُمْ ضَاجَعُوهَا فِي صِبَاهَا، وَزَغْزَغُوا تَرَائِبَ عِذْرَتِهَا وَسَكَبُوا عَلَيْهَا زِنَاهُمْ. حزقيال النبي بيحب التكرار. نفس الآية 3.
يوضح الله سبب انزلاق السامرة في الزنى، أنها اتعودت عليه من صغرها، من وقت ما كانت فتاة صغيرة، يعني من ساعة ما كان شعب الله صغير في مصر، واتزايد هناك، وفي وقت حياتها في مصر ارتبطت أهولة بأصنام مصر، وسابت عبادة الأوثان تشغل قلبها وفكرها، وقدمت للأوثان العبادة، (أهولة) بأنها فتاة صغيرة أهملت طهارتها فزنت، وارتبطت بعبادة الأوثان
9لِذلِكَ سَلَّمْتُهَا لِيَدِ عُشَّاقِهَا، لِيَدِ بَنِي أَشُّورَ الَّذِينَ عَشِقَتْهُمْ. مملكة السامرة انجذبت لمملكة أشور، ومملكة أشور هي اللي انهت وخلصت علي السامرة.
وده اللي بتعمله الخطية فينا، احننا بننجذب للخطية، بتعجبنا شكلها. زي ما السامرة انجذبت لأشور علشان شكلهم. واشور انتهت علي السامرة. فتبقي نتيجة الخطية، دمار الانسان.
"لِيَدِ بَنِي أَشُّورَ الَّذِينَ عَشِقَتْهُم." -... لأن السامرة كانت مُعجبة بأشور وبأوثانها.
10هُمْ كَشَفُوا عَوْرَتَهَا. أَخَذُوا بَنِيهَا وَبَنَاتِهَا، وَذَبَحُوهَا بِالسَّيْفِ، فَصَارَتْ عِبْرَةً لِلنِّسَاءِ. وَأَجْرَوْا عَلَيْهَا حُكْمًا. " هُمْ كَشَفُوا عَوْرَتَهَا." ... زي ما اتفقنا، الكلام عن مدينة مش أشخاص خالص. ومعناها: أنهم كشفوا عن ثغرات المدينة. والأعداء عرفوا يدخلوا المدينة.
"أَخَذُوا بَنِيهَا وَبَنَاتِهَا، وَذَبَحُوهَا بِالسَّيْفِ،" ... طبعا لما أشور دخلوا السامرة، بعد ما عرفوا ثغرات الدخول ليها. فسبوا الشباب، وقتلوا بالسيف.
"فَصَارَتْ عِبْرَةً لِلنِّسَاءِ. وَأَجْرَوْا عَلَيْهَا حُكْمًا." ... متفقين أن الكلام علي مدن وممالك، مش علي نساء. صارت عبرة، يعني المدن والممالك اتفرجوا علي السامرة، وشافوا انهم لما سابوا ربنا حصل لهم ايه.
وبكده انتهت مملكة السامرة علي أيد مملكة أشور، السبي الأشوري.
11«فَلَمَّا رَأَتْ أُخْتُهَا أُهُولِيبَةُ ذلِكَ أَفْسَدَتْ فِي عِشْقِهَا أَكْثَرَ مِنْهَا، وَفِي زِنَاهَا أَكْثَرَ مِنْ زِنَا أُخْتِهَا. الآيات من 11 لـ 14: الكلام عن مملكة يهوذا اللي عاصمتها أورشليم.
(معلومة: مملكة أشور هاجمت المملكتين، السامرة واورشليم، قبل كده.
- مملكة يهوذا: وقتها فشلت أشور في دخول أورشليم، وكان وقتها الملك حزقيا الملك واشعياء النبي. لما بعت ربنا، ملاك وقتل 185000 جندي أشوري. واترجعوا.
- مملكة السامرة: أشور دمرت السامرة، وأخدتهم جزء للسبي، وقتلت جزء. ودمرت وخلصت علي السامرة تماما.)
ربنا أنقذ مملكة يهوذا من ايد أشور. مع ان مملكة يهوذا راحوا يتحالفوا مع أشور. علشان كده ربنا بيقول انها متعلمتش من اللي حصل مع السامرة أختها.
"لَمَّا رَأَتْ أُخْتُهَا أُهُولِيبَةُ ذلِكَ أَفْسَدَتْ فِي عِشْقِهَا أَكْثَرَ مِنْهَا، وَفِي زِنَاهَا أَكْثَرَ مِنْ زِنَا أُخْتِهَا." ... ربنا بيقول: أن أورشليم زادت في زناها وبعدها عن ربنا. لدرجة أن الملك آحاز، وده أحد ملوك أورشليم، بعت رسالة لملك أشور (2 مل 16: 7 – 8) وقاله: "أنا عبدك وابنك. اصعد وخلصني من يد ملك آرام وملك اسرائيل القائمين عليا. فأخذ أحاز الفضة والذهب ..... وأرسلها الي ملك أشور." آحاز أخد الذهب والفضة اللي في الهيكل، ودول أصلا مِلك لربنا. وبعتهم لملك أشور. وقاله تعالي أنقذني. مع أن قبل كده ربنا قتل من جيش أشور 185000 عن طريق الملاك. فربنا بيقول: أن أورشليم متعلمتش، وكمان زادت في شرها عن أختها السامرة.
12عَشِقَتْ بَنِي أَشُّورَ الْوُلاَةَ وَالشِّحَنَ الأَبْطَالَ اللاَّبِسِينَ أَفْخَرَ لِبَاسٍ، فُرْسَانًا رَاكِبِينَ الْخَيْلَ كُلُّهُمْ شُبَّانُ شَهْوَةٍ. الحاجات اللي جذبت السامرة لأشور. برده جذبت أورشليم، من اللبس الفخم وقوة فرسانهم وقوة شبابهم. وقوة مركز أشور. 13فَرَأَيْتُ أَنَّهَا قَدْ تَنَجَّسَتْ، وَلِكِلْتَيْهِمَا طَرِيقٌ وَاحِدَةٌ. أورشليم والسامرة تنجسوا بعبادة الاوثان. الاتنين بقوا وحشين مفيش فرق بينهم.14وَزَادَتْ زِنَاهَا. وَلَمَّا نَظَرَتْ إِلَى رِجَال مُصَوَّرِينَ عَلَى الْحَائِطِ، صُوَرُ الْكَلْدَانِيِّينَ مُصَوَّرَةًٍ بِمُغْرَةٍ، " بِمُغْرَةٍ" ... ده أُكسيد الحديد، مادة لونها أحمر. بيرسموا بالمادة ديه.
" وَلَمَّا نَظَرَتْ إِلَى رِجَال مُصَوَّرِينَ عَلَى الْحَائِطِ، صُوَرُ الْكَلْدَانِيِّينَ مُصَوَّرَةٍ بِمُغْرَةٍ،" ... أورشليم مكتفوش بعلاقتهم بأشور. الله بيتعجب أن مدينته أورشليم أتعلقت بأشور بمجرد ما شافت صور الآشوريين اللي هم الكلدانيين مرسومة على الحوائط،
شعب الله سمعوا عن عظمة الأشوريين، عشقوا صور الكلدانيين، وفرحوا بأن يقيموا أحلافًا معهم. وربما أورشليم أرسلوا يطلبون صورًا لهياكل أشور وأصنامهم ليستخدموها في عبادتهم، وكانوا بيرسموا الصور بمادة أُكسيد الحديد اللي هي "ُمُغْرَةٍ".
وده زي النهاردة: الميديا. وسائل التواصل مليانين صور فاسدة. تفسد أي عين ودماغ. ويحول الانسان لبركان من الشهوات.
15مُنَطَّقِينَ بِمَنَاطِقَ عَلَى أَحْقَائِهِمْ، عَمَائِمُهُمْ مَسْدُولَةٌ عَلَى رُؤُوسِهِمْ. كُلُّهُمْ فِي الْمَنْظَرِ رُؤَسَاءُ مَرْكَبَاتٍ شِبْهُ بَنِي بَابِلَ الْكَلْدَانِيِّينَ أَرْضُ مِيلاَدِهِمْ، مملكة يهوذا مكتفتش بتحالفها مع مملكة أشور، لكن كمان ابتديت تميل ناحية مملكة بابل.
" مُنَطَّقِينَ بِمَنَاطِقَ عَلَى أَحْقَائِهِمْ، عَمَائِمُهُمْ مَسْدُولَةٌ عَلَى رُؤُوسِهِمْ. كُلُّهُمْ فِي الْمَنْظَرِ رُؤَسَاءُ مَرْكَبَاتٍ شِبْهُ بَنِي بَابِلَ
شاف شعب الله اللي عايشين في يهوذا رسوم الأشوريين، وهم لابسين المناطق وسطهم فما أسفل، وعمائمهم اللي على رؤوسهم، بمنظر جذاب، يبين عظمتهم كرؤساء في الحرب وهم راكبين مركباتهم، زي البابليين العظماء في مظهرهم، فاتعلقوا بهم وسعوا ناحيتهم. كأنهم بيقولوا لربنا أنت متقدرش تحميني ولا تخلصني هم دول اللي معاهم القوة والحماية.
" الْكَلْدَانِيِّينَ أَرْضُ مِيلاَدِهِمْ،" ... لأن أصلهم كلدانيين.
16عَشِقَتْهُمْ عِنْدَ لَمْحِ عَيْنَيْهَا إِيَّاهُمْ، وَأَرْسَلَتْ إِلَيْهِمْ رُسُلاً إِلَى أَرْضِ الْكَلْدَانِيِّينَ. "عَشِقَتْهُمْ عِنْدَ لَمْحِ عَيْنَيْهَا إِيَّاهُمْ،" ... حاجة كده زي الحب من أول نظرة. *هي ديه الخطية، جمال الخطية الجذاب. لمستها ناعمة. بس بتلدغ زي الحية.
"وَأَرْسَلَتْ إِلَيْهِمْ رُسُلًا إِلَى أَرْضِ الْكَلْدَانِيِّين." ... عاوزين يدخلوا في تحالف مع أشور.
أورشليم هي اللي أرسلت لأشور، عشان يتحالفوا معاها. وده لأنها عشقت آلهة أشور. وعجبها الصور المرسومة للآلهة أشور.
17فَأَتَاهَا بَنُو بَابِلَ فِي مَضْجَعِ الْحُبِّ وَنَجَّسُوهَا بِزِنَاهُمْ، فَتَنَجَّسَتْ بِهِمْ، وجَفَتْهُمْ نَفْسُهَا. "فَأَتَاهَا بَنُو بَابِلَ فِي مَضْجَعِ الْحُبِّ" ... في ملوك التاني وسفر اشعياء، اللي حصل بعد ما ملاك الرب قتل من جيش أشور 185000 جندي. جُم رُسل من بابل لحزقيا الملك يباركوله، أن ربنا مد في عمره 15 سنة. فحزقيا الملك اتكبر، بعد ما حصل معاه وقدامه المعجزتين دول. فحزقيا الملك فتح لهم خزاينه وقصوره، وخزائن بيت الرب، ووراهم كل حاجة عنده. فربنا عن طريق اشعياء النبي قاله: أنت فتحت أسرارك لجيش بابل؟ فكل حاجة أنت ورتهالهم، هما هيجوا ويأخدوها علي بابل.
"وَنَجَّسُوهَا بِزِنَاهُمْ، فَتَنَجَّسَتْ بِهِمْ،" ... يعني أورشليم اتحدت مع بابل، وسابت ربنا.
"وجَفَتْهُمْ" ... معناها: كرهتهم.
"وجَفَتْهُمْ نَفْسُهَا." ... المعني: بعد كل المعاهدات والحب ده، أورشليم بعد كده اتمردوا علي بابل، علشان كده نبوخذنصر هجم ودمر أورشليم وسباهم لبابل.
الخطية في بدايتها حلوة، بعدين الواحد يكتشف أن الخطية دمرته. وكتير الإنسان بيكتشف ده متأخر.
في الأول السامرة اتحدت مع مملكة أشور. وبعدين بابل. وبعدين مصر.
18وَكَشَفَتْ زِنَاهَا وَكَشَفَتْ عَوْرَتَهَا، فَجَفَتْهَا نَفْسِي، كَمَا جَفَتْ نَفْسِي أُخْتَهَا. هنا ربنا بيعبر بلغة البشر، وكأن نِفس ربنا قفلت من الناس.
"وَكَشَفَتْ زِنَاهَا وَكَشَفَتْ عَوْرَتَهَا، فَجَفَتْهَا نَفْسِي، كَمَا جَفَتْ نَفْسِي أُخْتَهَا." ... لما خضعت أورشليم للأشوريين كشفوا مقدساتها، اللي هو هيكلها المقدس، فقشرت الذهب، وأخذت الفضة والذهب من خزائن بيت الرب وأعطتها لآشور، فى كبرياء كشفت أورشليم خزائنها، زي ما عمل حزقيا الملك مع البابليين، فغضب الله عليها وكرهها بسبب كثرة زناها (الزنا الروحي)، وتعلقها بالعالم واتكالها على العالم مش على الله.
19وَأَكْثَرَتْ زِنَاهَا بِذِكْرِهَا أَيَّامَ صِبَاهَا الَّتِي فِيهَا زَنَتْ بِأَرْضِ مِصْرَ. بتكتّر زناها، عن طريق أنها بتفتكر ذكريات الشر القديم. حالة إدمان للزنا الروحي بتاعها، وعبادتها للأوثان.
" وَأَكْثَرَتْ زِنَاهَا بِذِكْرِهَا أَيَّامَ صِبَاهَا الَّتِي فِيهَا زَنَتْ بِأَرْضِ مِصْرَ."
تذكرت أورشليم أوثان مصر اللي عبدتها في بداية حياتها لما كانوا مملكة واحدة قبل الانقسام، وبدأت تعمل مذابح للآلهة المصرية وتتعبد لها، واتمادت في زناها وشرها، مش بس مع آلهة أشور وبابل، لكن كمان مع آلهة مصر. وكانت مصممة على الخطية والبعد عن الله.
20وَعَشِقَتْ مَعْشُوقِيهِمِ الَّذِينَ لَحْمُهُمْ كَلَحْمِ الْحَمِيرِ وَمَنِيُّهُمْ كَمَنِيِّ الْخَيْلِ. " وَعَشِقَتْ مَعْشُوقِيهِمِ" ... رجعت للحب الأولاني، واتحالفت مع مصر ضد بابل.
في الأول أورشليم اتحالفت مع بابل. وبعدين اتحالفوا مع فرعون مصر ضد بابل. ومفيش مرة أورشليم راجعت نفسها، واتقالت أتحالف مع ربنا. لكن رجعت لمصر، كان واحشها الشر اللي عاشوه في مصر قبل الخروج من مصر.
"الَّذِينَ لَحْمُهُمْ كَلَحْمِ الْحَمِيرِ وَمَنِيُّهُمْ كَمَنِيِّ الْخَيْلِ." ... المقصود بالآية ديه: أن لما الانسان يمشي وراء شهواته، يبقي زي الحيوانات الغير عاقلة.
مش أول مرة الكتاب المقدس يستخدم التشبيه ده، الآية ديه موجود شبهها في سفر ارميا النبي، لما ربنا اتكلم علي خطية الزنا اللي انتشرت بين الشعب. ارميا5: 8 "صاروا حُصن (جمع حصان) معلوفة سائبة. صهلوا كل واحد علي امرأة صاحبه." ... يعني الانسان اللي الشهوة بتحركه بدون عقل، وقتها ميبقاش فرق بينه وبين الحيوانات. لأن الحيوانات غريزتهم هي اللي بتحركهم.
فهنا ربنا بيقولهم: أنتم نزلتوا لمرتبة الحيوانات، خلاص لغيتوا عقلكم. محبتكم للشر والخطية هي اللي بتحرككم، وبتجركم بسلسلة وبتجروا وراها.
21وَافْتَقَدْتِ رَذِيلَةَ صِبَاكِ بِزَغْزَغَةِ الْمِصْرِيِّينَ تَرَائِبَكِ لأَجْلِ ثَدْيِ صِبَاكِ. آية متكررة. لما ابتدت زناها الروحي وفي لسه في مصر. ومعناها: أن الخطية بتوحشك يا أورشليم للدرجة ديه.
" وَافْتَقَدْتِ رَذِيلَةَ صِبَاكِ بِزَغْزَغَةِ الْمِصْرِيِّينَ تَرَائِبَكِ لأَجْلِ ثَدْيِ صِبَاكِ." ... ربنا بيوبخ أورشليم ويشبهها بامرأة تزنى وتشتاق للزنا الي بدأته وهي فتاة صغيرة لما كانت في مصر وسابت الأصنام تلعب بقلبها، واشتاقت لعبادتها من تاني، لان قلبها كان متعلق بها، ونست إلهها الحقيقي، اللي أخرجها من أرض مصر، ورعاها في البرية، وأعطاها أرض الميعاد، وما زال يحفظها لحد دلوقت.
لا تنجذب إلى الشهوات الشريرة، فإن مظهرها جذاب وطعمها حلو كالعسل ولكن داخلها السم المميت. ابعد وتوب عن الخطايا وارجع لربنا بقلب نقي طاهر.
22«لأَجْلِ ذلِكَ يَا أُهُولِيبَةُ، هكَذَا قَالَ السَّيِّدُ الرَّبُّ: هأَنَذَا أُهَيِّجُ عَلَيْكِ عُشَّاقَكِ الَّذِينَ جَفَتْهُمْ نَفْسُكِ، وَآتِي بِهِمْ عَلَيْكِ مِنْ كُلِّ جِهَةٍ: الآيات من 22 لـ 25: نتيجة الخطية. أن نفس الممالك اللي راحت أورشليم تدخل معاهم في تحالف ومعاهدات. هما اللي هيجمهوا عليها.
" لأَجْلِ ذلِكَ يَا أُهُولِيبَةُ، هكَذَا قَالَ السَّيِّدُ الرَّبُّ: هأَنَذَا أُهَيِّجُ عَلَيْكِ عُشَّاقَكِ الَّذِينَ جَفَتْهُمْ نَفْسُكِ، وَآتِي بِهِمْ عَلَيْكِ مِنْ كُلِّ جِهَةٍ:" ... اللي اشتهتهم أورشليم (أهوليبة)هيكونوا هما سبب خرابها.
23بَنِي بَابِلَ وَكُلَّ الْكَلْدَانِيِّينَ، فَقُودَ وَشُوعَ وَقُوعَ، وَمَعَهُمْ كُلُّ بَنِي أَشُّورَ، شُبَّانُ شَهْوَةٍ، وُلاَةٌ وَشِحَنٌ كُلُّهُمْ رُؤَسَاءُ مَرْكَبَاتٍ وَشُهَرَاءُ. كُلُّهُمْ رَاكِبُونَ الْخَيْلَ. " فَقُودَ وَشُوعَ وَقُوعَ،" ... دول قبائل من شرق نهر دجلة. وبقايا جيش أَشُّورَ الذي إنضم إلى بابل بعد خراب أشور بيد بابل.
"وَمَعَهُمْ كُلُّ بَنِي أَشُّورَ، شُبَّانُ شَهْوَةٍ، وُلاَةٌ وَشِحَنٌ كُلُّهُمْ رُؤَسَاءُ مَرْكَبَاتٍ وَشُهَرَاءُ. كُلُّهُمْ رَاكِبُونَ الْخَيْلَ."
ربنا بيذكر الأماكن اللي أورشليم أتعلقت بأوثانهم، ووهجموا عليها، وكلهم من منطقة واحدة هي قريبة من بابل، وبيتميزوا كلهم بالحيوية والقوة الحربية والعظمة.
24فَيَأْتُونَ عَلَيْكِ بِأَسْلِحَةٍ مَرْكَبَاتٍ وَعَجَلاَتٍ، وَبِجَمَاعَةِ شُعُوبٍ يُقِيمُونَ عَلَيْكِ التُّرْسَ وَالْمِجَنَّ وَالْخُوذَةَ مِنْ حَوْلِكِ، وَأُسَلِّمُ لَهُمُ الْحُكْمَ فَيَحْكُمُونَ عَلَيْكِ بِأَحْكَامِهِمْ. أورشليم بعتوا لبابل رُسل علشان يعملوا معاهدات معاهم. فبابل جت وحاصر أورشليم. ودمروها وخربوها وأخدوا أواني الهيكل من أورشليم.
"التُّرْسَ وَالْمِجَنَّ " ... الأداة اللي بيدافع بها الجندي عن نفسه لصد السهام.
"الْخُوذَةَ" ... اللي بيلبسها على الرأس والجبهة وهو من المعدن؛ لحماية رأسه.
"فَيَأْتُونَ عَلَيْكِ بِأَسْلِحَةٍ مَرْكَبَاتٍ وَعَجَلاَتٍ، وَبِجَمَاعَةِ شُعُوبٍ يُقِيمُونَ عَلَيْكِ وَمِنْ حَوْلِكِ،" ... بيعدد الله أسلحة المهاجمين لأورشليم، فهي مركبات حربية، وأعداد ضخمة من الجنود، شايلين أسلحة الدفاع عن أنفسهم، زي الترس والمجن والخوذة.
"وَأُسَلِّمُ لَهُمُ الْحُكْمَ فَيَحْكُمُونَ عَلَيْكِ بِأَحْكَامِهِمْ." ... وأقوياء هيسيطروا على أورشليم ويحتلوها، فبدل ما يحكم الله عليها بالعقاب بنفسه، ساب البابليين يسيطروا عليها ويذلوها.
25وَأَجْعَلُ غَيْرَتِي عَلَيْكِ فَيُعَامِلُونَكِ بِالسَّخَطِ. يَقْطَعُونَ أَنْفَكِ وَأُذُنَيْكِ، وَبَقِيَّتُكِ تَسْقُطُ بِالسَّيْفِ. يَأْخُذُونَ بَنِيكِ وَبَنَاتِكِ، وَتُؤْكَلُ بَقِيَّتُكِ بِالنَّارِ. ديه واحدة من أساليب تحويل أي شعب لعبيد. يقطعوا لهم ودنهم وأنفهم. وديه علامة ذل ومهانة، وأنه شعب مهزوم.
وكانت عادة أشورية، فهم يقطعون أنوف وأذان الملوك والأمراء والعظماء من أسراهم ويضعونهم في أقفاص ويعرضونهم أمام شعوبهم للسخرية منهم.
"يَقْطَعُونَ أَنْفَكِ وَأُذُنَيْكِ،" ... ديه بلد ملهاش أنف ولا أذن. وزي ما اتفقنا الكلام مش علي أشخاص خالص ولا سيدات. فديه أمور تشبيه للمشاعر والاحاسيس.
- الأنف: دايما فيها حاسة الشم. يعني التمييز، الانسان عن طريق أنفه يقدر يعرف الأكل ده صالح للأكل ولا لأ. فهنا كأن ربنا بيقول لأورشليم: أنتِ فقدتِ التمييز خلاص. مش عارفة الصح من الغلط. بدل ما تيجي ليا أنا إلهك، روحتِ للبشر، للأعداء والأوثان. روحتِ للهلاك بنفسك.
- الأذن: لآنها سدت اذنها عن سماع صوت ربنا. لأن ربنا كان بيبعت لهم الأنبياء ورسايل ربنا مع الأنبياء. وهي مكانتش بتسمع وقافلة ودنها خالص.
فكأن التمييز والاستماع، علامة أولاد الله. أولاد ربنا بيميزوا الصح من الغلط. وبيخافوا من الغلط. بيحبوا ربنا وسير القديسين وبيحبوا يسمعوا صوت ربنا دايما.
"وَبَقِيَّتُكِ تَسْقُطُ بِالسَّيْفِ. يَأْخُذُونَ بَنِيكِ وَبَنَاتِكِ، وَتُؤْكَلُ بَقِيَّتُكِ بِالنَّارِ."... هي ديه النتيجة لبُعدك عن ربنا.
نبوخذنصر ملك بابل هيجي وهيدمر أورشليم ويخربها. ويخرب ويهد ويدمر الهيكل. وكمان هيولعوا في أولادك. لأن ديه كانت طريقة الناس الوثنين، بيحطوا الشبان والأطفال في النار كذبائح لأوثانهم.
وطالما ده اللي كان نفسكم فيه، فهتشوفوا نتايج أفعالكم وعبادتكم لأوثانهم.
26وَيَنْزِعُونَ عَنْكِ ثِيَابَكِ، وَيَأْخُذُونَ أَدَوَاتِ زِينَتِكِ. متفقين أن الكلام عن بلد، مش علي انسانة خالص.
"ويَنْزِعُونَ عَنْكِ ثِيَابَكِ، وَيَأْخُذُونَ أَدَوَاتِ زِينَتِك." ... يعني كل فخر البلد وزينتها هيتأخدوا منها.
فنزع الثياب وسحب أدوات الزينة منها، يشير لدخولها في عار وخزي علني قدام الأمم. ودي نهاية الخاطئ بيفقد كل كرامة له ويبقى في خزي قدام الكل، خصوصاً في يوم الرب العظيم. يوم الدينونة.
وتتعرى أورشليم من جمالها، فيقشروا الذهب من هيكل الله، ويأخذوا الفضة والنحاس وكل شيء جميل في الهيكل فتبقى أورشليم منظرها قبيح بسبب شرورها، وتبقى في عار وذل قدام جميع الأمم.
27وَأُبَطِّلُ رَذِيلَتَكِ عَنْكِ وَزِنَاكِ مِنْ أَرْضِ مِصْرَ، فَلاَ تَرْفَعِينَ عَيْنَيْكِ إِلَيْهِمْ وَلاَ تَذْكُرِينَ مِصْرَ بَعْدُ. الغُلب اللي شوفتيه وقت فرعون مصر، هتشوفي أصعب منه وقت سبي أشور وبابل.
" وَأُبَطِّلُ رَذِيلَتَكِ عَنْكِ" " وَلاَ تَذْكُرِينَ مِصْرَ بَعْد." ... يعني ربنا سمح لها بكل الضيقة ديه والذل والعار، علشان ترجع لربنا. يعني مش انتقام من ربنا ليهم. لكن علشان ينسوا الأوثان ويعرفوا أن الأوثان ذلتهم.
هي دي فائدة الضيقة، اللي بتخلي الخاطئ يكره خطاياه، وده قصد الله من التجارب. ودي حاجة تشجعنا على التوبة دايما.
28لأَنَّهُ هكَذَا قَالَ السَّيِّدُ الرَّبُّ: هأَنَذَا أُسَلِّمُكِ لِيَدِ الَّذِينَ أَبْغَضْتِهِمْ، لِيَدِ الَّذِينَ جَفَتْهُمْ نَفْسُكِ. وده نتيجة لما الانسان يبعد عن ربنا، فلما يتخلى الله عن أورشليم، يسيب أعداءها البابليين يهجموا عليها، وهم أقوى منها، زي ما الشيطان أقوى من الإنسان.29فَيُعَامِلُونَكِ بِالْبُغْضَاءِ وَيَأْخُذُونَ كُلَّ تَعَبِكِ، وَيَتْرُكُونَكِ عُرْيَانَةً وَعَارِيَةً، فَتَنْكَشِفُ عَوْرَةُ زِنَاكِ وَرَذِيلَتُكِ وَزِنَاكِ. نرجع لاصحاح 16: "ومررت بكِ، ورأيتك مدوسة بدمك. عريانة عارية. فقلتِ لكِ: بدمك عيشي" و "ومررت بكِ ورأيتك واذ زمنِك زمن الحب." ... ربنا نضفها وغسلها. وسترها ..."ألبستك مُطرزة"
لكن للأسف الانسان عنده هواية يفضل عريان، مهما ستر ربنا علينا.
الله بيستر علي ضعفاتي، وبدل ما اتكسف وأقدم توبة. أروح أعمل خطية جديدة. أعري بيها نفسي من تاني.
وربنا هيفضل يستر علينا، بس احنا لغاية أمتي عاوزين نعيش عريانين؟
"فَيُعَامِلُونَكِ بِالْبُغْضَاءِ وَيَأْخُذُونَ كُلَّ تَعَبِكِ،" ... لأنهم هيأخذوا محاصيلها ومقتنياتها من الذهب والفضة، وكل شيء نفيس فيها، وتبقى خربة خالية وعارية من كل زينة، وقبيحة المنظر بعد تدميرها.
"وَيَتْرُكُونَكِ عُرْيَانَةً وَعَارِيَةً،" ... الخطية بتعمل فينا كده.
" فَتَنْكَشِفُ عَوْرَةُ زِنَاكِ وَرَذِيلَتُكِ وَزِنَاكِ " ... العُري: في اللغة الروحية: يعني الانسان يلبس توب الدنيا، ويعجبه مجد الدنيا. وكرامة الدنيا. فيتعري من نعمة ربنا.
نعمة ربنا، زي الهدوم اللي بتسترنا وبتغطينا. فنعمة ربنا ساترة علينا دايما.
30أَفْعَلُ بِكِ هذَا لأَنَّكِ زَنَيْتِ وَرَاءَ الأُمَمِ، لأَنَّكِ تَنَجَّسْتِ بِأَصْنَامِهِمْ. يؤكد الله أن التأديب والعقاب اللي هيحصل في أورشليم، بسبب زناها الروحي مع الأمم، المقصود بها عبادتها للأوثان.31فِي طَرِيقِ أُخْتِكِ سَلَكْتِ فَأَدْفَعُ كَأْسَهَا لِيَدِكِ. " فِي طَرِيقِ أُخْتِكِ" ... المقصود: السامرة.
"سَلَكْتِ فَأَدْفَعُ كَأْسَهَا لِيَدِكِ." ... فتتعاقب أورشليم زي السامرة بنفس كأس الغضب الإلهي وهو السبي، وكل العقاب اللي فيه
32هكَذَا قَالَ السَّيِّدُ الرَّبُّ: إِنَّكِ تَشْرَبِينَ كَأْسَ أُخْتِكِ الْعَمِيقَةَ الْكَبِيرَةَ. تَكُونِينَ لِلضَّحِكِ وَلِلاسْتِهْزَاءِ. تَسَعُ كَثِيرًا. السامرة هي الأخت الكبيرة، أهولة. وهي شربت من كأس غضب ربنا. شربت كأس السبي والخراب والدمار والهلاك.
فربنا بيقول لأورشليم: نفس الكاس اللي شربته السامرة، هتشربيه أنتِ كمان.
"تَكُونِينَ لِلضَّحِكِ وَلِلاسْتِهْزَاءِ. تَسَعُ كَثِيرًا." ... اللي بيضحك علينا ويشمت فينا لما نبقي عريانين بالخطية، هو الشيطان. علشان كده الكتاب المقدس يقول "لا تشمتي بي يا عدوتي، اذا سقطت أقوم، اذا جلست في الظلمة. فالرب نور لي." ... لو عريت نفسي بالخطية، متشمتيش فيا. التوبة هتسترني. بس المشكلة في اللي يعري نفسه، ويفضل عريان. هو ده الشيطان اللي بيستهزأ ويضحك علي الخاطئ.
فربنا بيقولها نصيبك هيبقي أكتر من السامرة. عقابك أكتر. لأنك غلطتي أكتر منها. وفعلا العقاب علي أد الغلط. وكمان علي أد الجهاد والتعب، علي أد النعمة والكرامة في الأخر.
33تَمْتَلِئِينَ سُكْرًا وَحُزْنًا، كَأْسَ التَّحَيُّرِ وَالْخَرَابِ، كَأْسَ أُخْتِكِ السَّامِرَةِ. لما يجي نبوخذنصر يدخل أورشليم، كله هيبقي في حالة حيرة وقلق وخوف. هو احنا هيحصل فينا ايه؟ وهل هيقدر أصلا يدخل أورشليم؟ ولا زي ما حصل مع جيش أشور قبل كده ومدخلوش لما ربنا موت لهم 185000 جندي لجيش أشور. طيب ربنا هينقذنا منهم ولا لأ؟34فَتَشْرَبِينَهَا وَتَمْتَصِّينَهَا وَتَقْضَمِينَ شُقَفَهَا وَتَجْتَثِّينَ ثَدْيَيْكِ، لأَنِّي تَكَلَّمْتُ، يَقُولُ السَّيِّدُ الرَّبُّ. "تقْضَمِينَ" ... تقرضين، أو تكسرينها بأسنانك.
" شُقَفَهَا" ... قطع من الفخار المصنوع منها الكأس.
"تَجْتَثِّينَ" ... تستأصلين
" فَتَشْرَبِينَهَا" ...يعني: الكاس وهتشربه. وأختك السامرة شربته قبلك.
فربنا هنا بيقول لأورشليم، أنتِ الموضوع عندك أكبر. أنتي عارفة الفخار المصنوع منه الكاس، بعد ما تشربي اللي جواه. هتأكلي الفخار نفسه. يعني العقاب أسوأ.
ربنا بيقولها: زعلان منك أكتر ما زعلت من السامرة. وده لأن مملكة السامرة من وقت انقسام الشعب علي يد يربعام بن نباط، وهو أول ملك علي السامرة. كانت السامرة ماشية في الشر. لكن مملكة يهوذا كان عندهم الهيكل والكهنوت. فمكانش عندهم حجة للشر ده.
" ثَدْيَيْكِ،" ... المقصود: المشاعر الريئة اللي جوة القلب.
فربنا عاوز يقول: الهدف من اللي هأعمله معاكِ، أن الشهوة الرديئة اللي جواكِ ديه، تنزعيها وترميها.
" وَتَجْتَثِّينَ ثَدْيَيْكِ،" ... ترمي الشهوات من جواكِ. كفاياكِ شر وخطية.
فترفض كل ما يتعلق بعبادة الأوثان، وتعلقها بالأمم، وترجع لربنا بكل قلبها، وهي دي التوبة الحقيقية اللي هي هدف الله من كل التأديبات.
35لِذلِكَ هكَذَا قَالَ السَّيِّدُ الرَّبُّ: مِنْ أَجْلِ أَنَّكِ نَسِيتِنِي وَطَرَحْتِنِي وَرَاءَ ظَهْرِكِ، فَتَحْمِلِي أَيْضًا رَذِيلَتَكِ وَزِنَاكِ». "مِنْ أَجْلِ أَنَّكِ نَسِيتِنِي" ... ربنا بيقول لأورشليم: كل ده علشان نسيتيني.
أول ما الانسان ينسي ربنا، قوته تروح منه. ميبقاش ليه قيمة. الواحد لما بينسي ربنا، بينسي قيمته وأنه ابن ملك الملوك. لأنه صورة الله. فبينسي وصية ربنا. بينسي السماء.
"وَطَرَحْتِنِي وَرَاءَ ظَهْرِكِ،" ... ياه لما ربنا يقولنا كده: أنتم رميتوني وراء ضهركم. ركنتوني علي جنب. أنا مش في حساباتكم.
"فَتَحْمِلِي أَيْضًا رَذِيلَتَكِ وَزِنَاكِ ." ... اتحملي بقي نتيجة أفعالك وشرورك.
في النهاية يأكد الله أن سبب كل التأديب ده، نسيان أورشليم له، فلازم تتحتمل نتيجة زناها الروحي، والعقاب.
من كده نفهم ان: لذة الخطية مؤقتة وتخلف وراءها ضيق وندم.
36وَقَالَ الرَّبُّ لِي: «يَا ابْنَ آدَمَ، أَتَحْكُمُ عَلَى أُهُولَةَ وَأُهُولِيبَةَ؟ بَلْ أَخْبِرْهُمَا بِرَجَاسَاتِهِمَا، يا حزقيال احكم أنت كبني آدم. ايه اللي يتعمل في الناس ديه، بعد كل اللي عملته علشانهم؟ وبعد كل ده وصلوا لكل الشر والزنا الروحي ده كله. علشان كده "لأنه لو حكمنا علي أنفسنا، لما حُكم علينا." (1كو11) لما الواحد يبقي حقاني مع نفسه، يقوله يارب أنا وحش مستاهلش أروح السماء. مستاهلش تبقي أبويا. ولا استاهل أي حاجة حلوة في حياتي. لآني بارجع أغلط تاني، كل ما أتوب. سامحني أرجوك يارب.
"وَقَالَ الرَّبُّ لِي: «يَا ابْنَ آدَمَ، أَتَحْكُمُ عَلَى أُهُولَةَ وَأُهُولِيبَةَ؟ بَلْ أَخْبِرْهُمَا بِرَجَاسَاتِهِمَا،" ... يا حزقيال: خليهم يفوقوا ويعرفوا غلطهم. اشرح لهم أززاي أسأوا ليا.
يا حزقيال فهمهم غلطهم. وشرورهم. يمكن حد منهم يرجع ويتوب.
37لأَنَّهُمَا قَدْ زَنَتَا وَفِي أَيْدِيهِمَا دَمٌ، وَزَنَتَا بِأَصْنَامِهِمَا وَأَيْضًا أَجَازَتَا بَنِيهِمَا الَّذِينَ وَلَدَتَاهُمْ لِي النَّارَ أَكْلاً لَهَا. ده الزنا الروحي، عبادة الأوثان.
"وَزَنَتَا بِأَصْنَامِهِمَا وَأَيْضًا أَجَازَتَا بَنِيهِمَا الَّذِينَ وَلَدَتَاهُمْ لِي النَّارَ أَكْلًا لَهَا." ... كانوا بيقلدوا الأمم في الممارسات الوثنية: أنهم كانوا بيقدموا أولادهم ذبايح للأوثان، وكانوا بيعملوا موسيقي عالية علشان ميسمعوش صراخ أطفالهم وهما بيتحرقوا كذبايح في النار.
في أهالي بيعملوا كده دلوقتي، بيقدموا أولادهم ذبيحة للشيطان. بيعلموهم ازاي أن حب المال يتملك عليهم. والشهوات والمراكز.
38وَفَعَلَتَا أَيْضًا بِي هذَا: نَجَّسَتَا مَقْدِسِي فِي ذلِكَ الْيَوْمِ وَدَنَّسَتَا سُبُوتِي. كان في خطيتين بيعملوهم:
" وَفَعَلَتَا أَيْضًا بِي هذَا: نَجَّسَتَا مَقْدِسِي فِي ذلِكَ الْيَوْمِ" ... ياما بنستهين بمقدس ربنا، الكنيسة والأسرار المقدسة. والهيكل اللي هو جسدنا المقدس لله.
"وَدَنَّسَتَا سُبُوتِي." ... يعني ايام السبت طبعا ده كان في العهد القديم. في العهد الجديد عندنا يوم الأحد. مين لسه حاطط لربنا وقت مخصص ليه؟
تنجيس هيكل الله، بكسر الشريعة، وخطية أفظع وهي وضع الأصنام في هيكل الله.
تدنيس سبوت الله، فقد كان ينبغى التفرغ في هذا اليوم لعبادة الله، أما هما فقد استخدمتا السبوت لأعمالهما التجارية، وكل عمل مادى، وتركوا عبادة الله.
39وَلَمَّا ذَبَحَتَا بَنِيهِمَا لأَصْنَامِهِمَا، أَتَتَا فِي ذلِكَ الْيَوْمِ إِلَى مَقْدِسِي لِتُنَجِّسَاهُ. فَهُوَذَا هكَذَا فَعَلَتَا فِي وَسْطِ بَيْتِي. شعب الله خلط بين عبادة الأوثان، وعبادة الله، فبعد ما كانوا يخلصوا العبادة للآلهة الوثنية وحرق اولادهم كانوا بجسارة واستهانة يدخلوا بنجاستهم الهيكل ويقدموا العبادة لله، من غير ما يحسوا انهم بيعملوا حاجة غلط.40بَلْ أَرْسَلْتُمَا إِلَى رِجَال آتِينَ مِنْ بَعِيدٍ. الَّذِينَ أُرْسِلَ إِلَيْهِمْ رَسُولٌ فَهُوَذَا جَاءُوا. هُمُ الَّذِينَ لأَجْلِهِمِ اسْتَحْمَمْتِ وَكَحَّلْتِ عَيْنَيْكِ وَتَحَلَّيْتِ بِالْحُلِيِّ، أنت اللي بعتم الرُسل لبابل.
" هُمُ الَّذِينَ لأَجْلِهِمِ اسْتَحْمَمْتِ وَكَحَّلْتِ عَيْنَيْكِ وَتَحَلَّيْتِ بِالْحُلِيِّ،" ... الكلام مازال عن السامرة وأورشليم، فالمعني: انهم جابوا الغرباء علشان يتمنظروا قدامهم. ويفرجوهم علي الهيكل أد ايه هو حلو.
يعني اتزينوا علشان الخطية والشر.
طيب لما بنيجي لربنا، هل بنجهز نفسنا لمقابلة خاصة مع ربنا؟ الآباء علمونا أن اليوم اللي نتناول فيه، لازم يكون عندنا نضافة خارجية وداخلية. ده الواحد هيقابل الملك.
ياما آباء سواح كانوا بيبلسوا المسوح، اللي هو الخيش. عايشين في حالة تقشف. لكن يوم القداس والتناول يلبسوا أحلي لبس عندهم. رايحين للملك.
فهنا ربنا بيعاتبهم، بيعاتب شعبه. وبيقولهم: كنتم في كامل الزينة والاستعداد. لكن مش ليا. ده للخطية.
41وَجَلَسْتِ عَلَى سَرِيرٍ فَاخِرٍ أَمَامَهُ مَائِدَةٌ مُنَضَّضَةٌ، وَوَضَعْتِ عَلَيْهَا بَخُورِي وَزَيْتِي. " مَائِدَةٌ مُنَضَّضَةٌ " ... يعني جاهزة عليها كل الحاجات الفاخرة.
" وَجَلَسْتِ عَلَى سَرِيرٍ فَاخِرٍ أَمَامَهُ مَائِدَةٌ مُنَضَّضَةٌ، وَوَضَعْتِ عَلَيْهَا بَخُورِي وَزَيْتِي." ... فهي قدمت علي مائدة الزنا، البخور والزيت الخاص بعبادة ربنا. استخدمت بخور وزيت عبادة ربنا، للأوثان. فده كان شئ مُهين جدا لربنا.
فربنا بيقولها: مش بس بعتِ رُسل لبابل، ده كمان استقبلتي الناس دي هفي كامل زينتك. علشان الخطية أنتِ جهزتِ نفسك. وياريتك عملتِ الخطية وبس، لكن أخدتِ الزيت والبخور بتوعي، وحطيتيهم علي مائدة الخطية، لعبادة الأوثان.
الزيت والبخور هما المواهب والطاقات اللي ربنا أدهالنا. الوقت والصحة. فالواحد بيأخد اللي عنده، وهدية من ربنا. وبيقدمه علي مذبح الخطية.
العين اللي بأشوف بيها حاجة مش كويسة، ديه بتاعة ربنا.
اللسان – الافكار – القلب – الصحة – الوقت. فربنا يقولنا أخدتم زيتي وبخوري وقدمتوهم علي مائدة الأوثان.
42وَصَوْتُ جُمْهُورٍ مُتَرَفِّهِينَ مَعَهَا، مَعَ أُنَاسٍ مِنْ رَعَاعِ الْخَلْقِ. أُتِيَ بِسَكَارَى مِنَ الْبَرِّيَّةِ، الَّذِينَ جَعَلُوا أَسْوِرَةً عَلَى أَيْدِيهِمَا وَتَاجَ جَمَال عَلَى رُؤُوسِهِمَا. " رَعَاعِ الْخَلْقِ" ... يعني: أدنياء القوم. المقصود بيهم: اللي بيعملوا الخطايا. اللي شايفين أن جسدهم ملهوش قيمة. فباعوه بالرخيص. زي خطايا النجاسة.
" وَصَوْتُ جُمْهُورٍ مُتَرَفِّهِينَ مَعَهَا، مَعَ أُنَاسٍ مِنْ رَعَاعِ الْخَلْقِ. أُتِيَ بِسَكَارَى مِنَ الْبَرِّيَّةِ،
"الَّذِينَ جَعَلُوا أَسْوِرَةً عَلَى أَيْدِيهِمَا وَتَاجَ جَمَال عَلَى رُؤُوسِهِمَا " ... الخطية جاية ليهم وفي ايدها تاج وأسورة. جايبة ليهم هدايا. التاج والأسورة: تمنهم ضياع اكليل الأبدية. وده دايما هدف الشيطان.
43فَقُلْتُ عَنِ الْبَالِيَةِ فِي الزِّنَا: آلآنَ يَزْنُونَ زِنًا مَعَهَا وَهِيَ. البالية: يعني القديمة في الزني.
"آلآنَ يَزْنُونَ زِنًا مَعَهَا وَهِي." ... المفروض الأية تكمل، يزنون زني معها، وهي معهم.
لكن الوحي الالهي صعبان عليه يقول: أن أولادي معاهم. ربنا صعبان عليه يقول أولادي زيهم زي ألاشرار دول. المفروض أولادي يكونوا مختلفين. وميسلموش هيكلهم (جسدهم) المقدس للخطية.
وهنا الله بيقول على شعبة انه قديم في الزنا الروحي يعني من سنين طويلة وهو متعلق بالأمم اللي حوالية ويعبد ألهتهم الغريبة. وأد ايه بهدلوا حياتهم في الوثنية.
44فَدَخَلُوا عَلَيْهَا كَمَا يُدْخَلُ عَلَى امْرَأَةٍ زَانِيَةٍ. هكَذَا دَخَلُوا عَلَى أُهُولَةَ وَعَلَى أُهُولِيبَةَ الْمَرْأَتَيْنِ الزَّانِيَتَيْنِ. 45وَالرِّجَالُ الصِّدِّيقُونَ هُمْ يَحْكُمُونَ عَلَيْهِمَا حُكْمَ زَانِيَةٍ وَحُكْمَ سَفَّاكَةِ الدَّمِ، لأَنَّهُمَا زَانِيَتَانِ وَفِي أَيْدِيهِمَا دَمٌ. " وَالرِّجَالُ الصِّدِّيقُونَ هُمْ يَحْكُمُونَ عَلَيْهِمَا" ... وديه مش معناها اننا بنحكم علي بشر. لكن الإنسان البار بيشارك في دينونة الأشرار بحياته. طبعا الدينونة لربنا وحده. لأنه الديان. لكن وجود أبرار في كل جيل، بيبقوا رسالة دينونة للأشرار. يعني لو طلع واحد في جيل، وقال: ما هو الشر مالي الدنيا ومحاوط علينا من كل ناحية. يطلع مثلا يوسف العفيف يقوله: لأ. أنا زيك وعرفت أقاوم الشر والخطية. وجاهدت.
"حُكْمَ زَانِيَةٍ وَحُكْمَ سَفَّاكَةِ الدَّمِ، لأَنَّهُمَا زَانِيَتَانِ وَفِي أَيْدِيهِمَا دَمٌ." ... في ايديهما دم: يعني دم اخرين تعثّروا بسببهم. لأن الانسان الشرير سبب عثرة للأخرين. * زي مثلا الخادم مش بس تقصيره في حياته يتحسب عليه، لكن كل اللي أُعثروا في ربنا بسببه، هيتحسبوا عليه. وكأن في ايده دم. كام واحد اتعطل عن القرب لربنا بسبب سلوك الخدام؟ كام واحد شهوت صورة الكنيسة قدامه؟
علشان كده بنقول "نجيني من الدماء يا الله. إله خلاصي."
" وَالرِّجَالُ الصِّدِّيقُونَ هُمْ يَحْكُمُونَ عَلَيْهِمَا" ... الله بيعطي الرجاء في وجود بقية صالحة في شعبه، هم الرجال الصديقين، اللي رفضوا الاشتراك في عبادة الأوثان والاتكال على الأمم. الرجال الصالحين هيدينوا ويحكموا بتقواهم على شعب الله الزانى، لأنهم لم يثبتوا مثلهم في عبادة الله والاتكال عليه.
46لأَنَّهُ هكَذَا قَالَ السَّيِّدُ الرَّبُّ: إِنِّي أُصْعِدُ عَلَيْهِمَا جَمَاعَةً وَأُسَلِّمُهُمَا لِلْجَوْرِ وَالنَّهْبِ. "لِلْجَوْر" ... الظلم لشعبه في السامرة وأورشليم.
" إِنِّي أُصْعِدُ عَلَيْهِمَا جَمَاعَةً وَأُسَلِّمُهُمَا لِلْجَوْرِ وَالنَّهْبِ." ... يبدأ هنا الله في إعلان عقابه لشعبه على كل الخطايا اللي عملوها، فيسمح للأمم من آشور وبابل بالهجوم عليهم وتدميرهم وسلب ممتلكاتهم، ويظلموهم زي ما ظلموا الله والأبرياء هيذووقوا الظلم في وقت السبي.
47وَتَرْجُمُهُمَا الْجَمَاعَةُ بِالْحِجَارَةِ، وَيُقَطِّعُونَهُمَا بِسُيُوفِهِمْ، وَيَذْبَحُونَ أَبْنَاءَهُمَا وَبَنَاتِهِمَا، وَيُحْرِقُونَ بُيُوتَهُمَا بِالنَّارِ. يستكمل الله تفاصيل العقاب اللي هيتم على شعبه بواسطة الأمم فيما يلي:
" وَتَرْجُمُهُمَا الْجَمَاعَةُ بِالْحِجَارَةِ، وَيُقَطِّعُونَهُمَا بِسُيُوفِهِمْ،" ... تدمير أورشليم والسامرة ويشبهه بالرجم بالحجارة.
"وَيَذْبَحُونَ أَبْنَاءَهُمَا وَبَنَاتِهِمَا،" ... قتل الكثيرين من شعبيهم بالسيف.
آشور وبابل ذبحوا أولادهم كبار وصغار قدام عيون الآباء والأمهات من غير لا شفقة ولا رحمة
"وَيُحْرِقُونَ بُيُوتَهُمَا بِالنَّارِ." ... حرق أورشليم، يعني حرق هيكل الله وقصور العظماء بالنار.
48فَأُبَطِّلُ الرَّذِيلَةَ مِنَ الأَرْضِ، فَتَتَأَدَّبُ جَمِيعُ النِّسَاءِ وَلاَ يَفْعَلْنَ مِثْلَ رَذِيلَتِكُمَا. " فَأُبَطِّلُ الرَّذِيلَةَ مِنَ الأَرْضِ،" ... في ناس مستكترة أن ربنا يوقف الشر. فيأدب البشرية تأديب شديد. فده عدل من ربنا أنه يعاقب علي الشر.
الأبرار في التجربة يتزكون. لأن في ناس تقول طيب والناس الكويسة ذنبها ايه؟ والأشرار في التجربة يأما يتوبوا، أو يهلكوا علي حسب استقبالهم للتجربة.
"فَتَتَأَدَّبُ جَمِيعُ النِّسَاءِ وَلاَ يَفْعَلْنَ مِثْلَ رَذِيلَتِكُمَا." ... بالتأديب الإلهي يخاف شعب الله ويحسوا بأن الآلهة الوثنية ملهاش قيمة وأن التحالف مع الأمم من غير فايدة فيتوبوا ويبعدوا عن خطاياهم ويرجعوا إلى الله بالتوبة، وبكده يبطل الله الخطية من شعبه، ويكونوا قدوة للأمم اللي حواليهم؛ علشان تخاف الله وتؤمن به، وده اللي حصل في ملء الزمان لما آمنت الأمم بالسيد المسيح له المجد.
49وَيَرُدُّونَ عَلَيْكُمَا رَذِيلَتَكُمَا، فَتَحْمِلاَنِ خَطَايَا أَصْنَامِكُمَا، وَتَعْلَمَانِ أَنِّي أَنَا السَّيِّدُ الرَّبُّ». نتيجة الخطية، أن المملكتين انتهوا بسبب الشر. مملكة السامرة انتهت تماما. لكن ربنا أعطي رجاء لمملكة يهوذا، وبعد 70 سنة في السبي، رجعت مملكة يهوذا مرة أخري علي يد زربابل. وأُعيد بناء الهيل وأسوار أورشليم مع رزبابل وعزرا ونحميا.
"وَتَعْلَمَانِ أَنِّي أَنَا السَّيِّدُ الرَّبّ." ... والناس وقتها هتعرف أن ربنا كبير وضابط الكل.
إذا الاصحاح الـ 23:
كان بيتكلم عن الأختين، المملكتين السامرة ويهوذا.
وأن الاصحاح ده بيتهاجم، بعض الناس بيهاجموه. بس احنا معندناش حاجة نتكسف منها أو حاجة مُخجلة.
الله بيتكلم فيه عن بشاعة الخطية والشر. وعن الخيانة الموجهة لربنا من أولاده. الكلام عن الزنا الروحي. وعن بلاد. الكلام مش موجه لإنسان أو أي سيدة.
⪢