⪡ 1ثُمَّ نَظَرْتُ وَإِذَا عَلَى الْمُقَبَّبِ الَّذِي عَلَى رَأْسِ الْكَرُوبِيمِ شَيْءٌ كَحَجَرِ الْعَقِيقِ الأَزْرَقِ، كَمَنْظَرِ شِبْهِ عَرْشٍ. الاصحاح العاشر من آية 9 الي الآية 17 ... يعتبر مراجعة للإصحاح الاول. وبيأكد حزقيال النبي لينا تاني اللي هو شافه في الاصحاح الاول.
كنا انتهينا من اصحاح 9، وشوفنا لما ربنا فرج حزقيال علي الرجاسات المعمولة في الهيكل. ربنا فرجه علي اللي بيعملوه جوة الهيكل، انهم كانوا حاطين الأصنام وبيعبدوا الشمس.
وكمان شوفنا الراجل اللابس الكتان: اللي ختم وعمل سمة علي جباه (جبين) الناس اللي في المدينة واللي لسه كويسين. والسمة كانت الصليب.
" ثُمَّ نَظَرْتُ وَإِذَا عَلَى الْمُقَبَّبِ الَّذِي عَلَى رَأْسِ الْكَرُوبِيمِ" ... نفس اللي قاله حزقيال في الاصحاح الاول، منظر العرش اللي شايلينه الكائنات الاربعة: اللي هما الكاروبيم ...
" كَحَجَرِ الْعَقِيقِ الأَزْرَقِ" ... حجر كريم لونه ازرق ك لون السماء.
2وَكَلَّمَ الرَّجُلَ اللاَّبِسَ الْكَتَّانِ وَقَالَ: «ادْخُلْ بَيْنَ الْبَكَرَاتِ تَحْتَ الْكَرُوبِ وَامْلأْ حَفْنَتَيْكَ جَمْرَ نَارٍ مِنْ بَيْنِ الْكَرُوبِيمِ، وَذَرِّهَا عَلَى الْمَدِينَةِ». فَدَخَلَ قُدَّامَ عَيْنَيَّ. "وَكَلَّمَ الرَّجُلَ اللاَّبِسَ الْكَتَّانِ" ... رمز لربنا يسوع المسيح له المجد. او يشير الي ربنا له المجد.
الكتان: لبس الكهنة. فديه اشارة لربنا يسوع المسيح، الكاهن الحقيقي.
وَقَالَ: «ادْخُلْ بَيْنَ الْبَكَرَاتِ تَحْتَ الْكَرُوبِ" ... الله له المجد، كلم الراجل اللابس الكتان اللي هو السيد المسيح له المجد. (بيقولوا: لان السيد المسيح له المجد في تجسده بقي أقل قليلا من الملائكة.)
"وَامْلأْ حَفْنَتَيْكَ جَمْرَ نَارٍ مِنْ بَيْنِ الْكَرُوبِيمِ،" ... واملئ يدك من جمر نار.
"وَذَرِّهَا عَلَى الْمَدِينَةِ. فَدَخَلَ قُدَّامَ عَيْنَيَّ" ... يعني يرمي نار علي المدينة. وهي ديه العقوبة. وحزقيال النبي قال: ان المسيح دخل قدام عنيه وشافه وهي بيملي ايده من جمر النار.
وقولنا ان النار: ممكن ربنا يقبل بيها الذبيحة، وتشير الي مراحم الله التي قبلت الذبيحة. وكمان النار ممكن ربنا يهلك بيها سدوم وعمورة.
3وَالْكَرُوبِيمُ وَاقِفُونَ عَنْ يَمِينِ الْبَيْتِ حِينَ دَخَلَ الرَّجُلُ، وَالسَّحَابَةُ مَلأَتِ الدَّارَ الدَّاخِلِيَّةَ. حزقيال شاف يسوع المسيح له المجد وهو داخل يملأ حفنتيه من النار.
" عَنْ يَمِينِ الْبَيْتِ" ... يعني جنوب البيت. والسحابة مليت الدار الداخلية. يعني ظهر مجد الرب في السحابة اللي مليت الدار الداخلية.
اصحاح 10: هو زوال مجد الرب ... وده تم علي اربع مراحل:
مجد ربنا كان في قدس الاقداس، فوق تابوت العهد، فوق الكاروبيم اللي علي تابوت العهد.
- أول حاجة هنشوفها: أن المجد ارتفع من قدس الاقداس الي باب القدس. مجد ربنا وقف علي باب القدس، لان مجد الرب بيبقي في قدس الأقداس.
- تاني حاجة: من باب القدس، راح للباب الشرقي.
- تالت حاجة او خطوة: من الباب الشرقي لوسط المدينة اورشليم.
- رابع حاجة او خطوة والأخيرة: ارتفع مجد الرب من اورشليم وخرج.
طيب ليه يارب مخرجتش مرة واحدة؟ لانه كان نفسه يتوبوا. بس ماتابوش.
طيب ليه واقف علي الباب؟ ربنا له المجد لما حب يعبر أنه بيحب صهيون، قال في المزمور " أحب الرب أبواب صهيون." ... لأنها مدينة ربنا. بيحب أبوابها. لان الابواب تشير للحراسة. فربنا عاوز يقول: أنا حارس المدينة ديه. بتاعتي اسمي دعي عليها.
في اصحاح 8 و9: لما غاظوا ربنا له المجد، جم علي الباب الشمالي وحطوا الهة غريبة، وسموه تمثال الغيرة. علشان يحرسوا المدينة بالتمثال ده. وربنا له المجد لما طلع بمجده، طلع من الناحية التانية. مطلعش من نفس الباب اللي حطوا فيه التمثال. ... أصلا المصايب كلها جيالهم من عند تمثال الغيرة ده، والسبي البابلي اصلا جايلهم من ناحية الشمال.
وربنا لما طلع وساب لهم الهيكل طلع لهم من ناحية الجنوب.
في قول بيقول: الشعب الذي لم يريد أن يكرم الله في أرضه، أهينوا بالسبي في أرض غريبة ... كل واحد يحطها علي نفسه:
لو مش هتكرم ربنا في صحتك ... هتروح منك.
لو مش هتكرم ربنا بمالك ... هيروح منك.
لو مش هتكرم ربنا بعلمك ... هيروح منك.
فبلاش نبقي زي الشعب ده، خلينا نكرم ربنا له المجد في كل مالينا. وهنأخد بركة دايما من ربنا له المجد.
4فَارْتَفَعَ مَجْدُ الرَّبِّ عَنِ الْكَرُوبِ إِلَى عَتَبَةِ الْبَيْتِ. فَامْتَلأَ الْبَيْتُ مِنَ السَّحَابَةِ، وَامْتَلأَتِ الدَّارُ مِنْ لَمَعَانِ مَجْدِ الرَّبِّ. يعتقد ان المقصود هنا بالكروب: هو الكروب اللي موجود علي تابوت العهد.
فديه قاعدة عامة: لو مش هتمشي مع ربنا، أنت اللي خسران. ولما الواحد يمشي مع ربنا له المجد بجد وبأمانة، هيأخد بركة ونعمة.
لكن اللي يسيب مجد الرب، يتقال عليه " فَارْتَفَعَ مَجْدُ الرَّبِّ" ... وهيبقي الشخص ده هو اللي خسران.
لان لما الواحد بيكون مع ربنا، ربنا دايما بيكون مظلل علينا ومباركنا، ولما الواحد بيسيب ربنا يبقي هيخلبط في حياته، ومجد الرب هيسيبه.
" فَارْتَفَعَ مَجْدُ الرَّبِّ" ... خلاص ارتفع مجد الرب عن قدس الاقداس. وعلي فكرة الهيكل واورشليم: ميزتهم حلول ربنا له المجد فيهم. ولو ربنا هيسيب الهيكل وأورشليم، مش هيبقي ليهم اي ميزة تاني خالص. علشان كده لما يزول مجد الرب عنهم، هتيجي النار ... اللي هما البابليين وهتتحرق المدينة.
5وَسُمِعَ صَوْتُ أَجْنِحَةِ الْكَرُوبِيمِ إِلَى الدَّارِ الْخَارِجِيَّةِ كَصَوْتِ اللهِ الْقَدِيرِ إِذَا تَكَلَّمَ. وصوت أجنحة الكاروبيم اتسمع لغاية الدار الخارجية. وصوت الاجنحة قوي جدا، زي صوت ربنا له المجد لما يتكلم بيكون صوت قوي، فكأن ربنا اتكلم وأصدر الامر خلاص. 6وَكَانَ لَمَّا أَمَرَ الرَّجُلَ اللاَّبِسَ الْكَتَّانِ قَائِلاً: «خُذْ نَارًا مِنْ بَيْنِ الْبَكَرَاتِ، مِنْ بَيْنِ الْكَرُوبِيمِ» أَنَّهُ دَخَلَ وَوَقَفَ بِجَانِبِ الْبَكَرَةِ. يعني الآب كلم الابن، وأرسله الي العالم. 7وَمَدَّ كَرُوبٌ يَدَهُ مِنْ بَيْنِ الْكَرُوبِيمِ إِلَى النَّارِ الَّتِي بَيْنَ الْكَرُوبِيمِ، فَرَفَعَ مِنْهَا وَوَضَعَهَا فِي حَفْنَتَيِ اللاَّبِسِ الْكَتَّانِ، فَأَخَذَهَا وَخَرَجَ. واحد من الكاروبيم مد ايده للنار الموجودة بي الكاروبيم، واخد جمر النار وحطها في ايد الرجل اللابس الكتاب. واللابس الكتان اخدها وخرج. ... ده معناه: أنه هينفذ أمر الله بحرق أورشليم.8فَظَهَرَ فِي الْكَرُوبِيمِ شِبْهُ يَدِ إِنْسَانٍ مِنْ تَحْتِ أَجْنِحَتِهَا. ظهور شبه يد في الكاروبيم من تحت اجنحتها ... معني الأيد: أن الملايكة تخدم البشر. وقولنا ان شبه اليد ممكن:
- تأخد صلواتنا وترفعها وتقدمها لربنا له المجد. فياريت ناخد من ربنا البركات، بلاش ناخد عقوبات.
- او ممكن تدي عقوبة من ربنا له المجد للبشر.
9وَنَظَرْتُ وَإِذَا أَرْبَعُ بَكَرَاتٍ بِجَانِبِ الْكَرُوبِيمِ. بَكَرَةٌ وَاحِدَةٌ بِجَانِبِ الْكَرُوبِ الْوَاحِدِ، وَبَكَرَةٌ أُخْرَى بِجَانِبِ الْكَرُوبِ الآخَرِ. وَمَنْظَرُ الْبَكَرَاتِ كَشِبْهِ حَجَرِ الزَّبَرْجَدِ. " الْكَرُوبِ" ...كلمة مفرد، والجمع: الكروبيم.
كل بكرة جنب كل كروب.
"وَمَنْظَرُ الْبَكَرَاتِ كَشِبْهِ حَجَرِ الزَّبَرْجَدِ" ... حجر الزبرجد عبارة عن حجر كريم، ولونه يميل للخضرة. للون الاخضر.
10وَمَنْظَرُهُنَّ شَكْلٌ وَاحِدٌ لِلأَرْبَعِ. كَأَنَّهُ كَانَ بَكْرَةٌ وَسْطِ بَكْرَةٍ. كل البكرات شبه بعض. وكل بكرة وسط بكرة تانية. داخلين في بعض. زي الصورة في الاصحاح الاول.11لَمَّا سَارَتْ، سَارَتْ عَلَى جَوَانِبِهَا الأَرْبَعَةِ. لَمْ تَدُرْ عِنْدَ سَيْرِهَا، بَلْ إِلَى الْمَوْضِعِ الَّذِي تَوَجَّهَ إِلَيْهِ الرَّأْسُ ذَهَبَتْ وَرَاءَهُ. لَمْ تَدُرْ عِنْدَ سَيْرِهَا. ربنا له المجد كان بيوري لحزقيال النبي: المركبة النارية الالهية. علشان يقوله: أنا هو الاله الحقيقي. سيبك من كل الالهة والملوك اللي حواليك. اللي ليهم مركبات بعجلات وخيل، كل ده ولا حاجة. أنا الاله الحقيقي.
" الرَّأْسُ" ... المقصود هنا: رأس الكائنات الحية. وغالبا يقصد وجه الانسان. ومش بتلف عند سيرها.
12وَكُلُّ جِسْمِهَا وَظُهُورِهَا وَأَيْدِيهَا وَأَجْنِحَتِهَا وَالْبَكَرَاتِ مَلآنَةٌ عُيُونًا حَوَالَيْهَا لِبَكَرَاتِهَا الأَرْبَعِ. فكرة إنها مليانة عيون ... " مَلآنَةٌ عُيُونًا" ... بتوضح لنا المعرفة. ربنا له المجد بيشوف ويري في كل مكان وكل موضع وفي كل زمان. وحكمه علي الامور وكل حاجة بيكون بالعدل. ربنا عارف كل الخبايا بتاعنا بالتفصيل.
علشان كده فكرة مليانة أعين، بتتكرر كتير. والاعين: عموما تشير للمعرفة والحكمة. وفي نفس الوقت بتقولنا ان ربنا بيحكم بالعدل دايما. وده سبب تكرار إنها مليانة أعين.
13أَمَّا الْبَكَرَاتُ فَنُودِيَ إِلَيْهَا فِي سَمَاعِي: «يَا بَكْرَةُ». غالبا ده أمر إلهي الي الاربعة كائنات والبكرات بالتحرك.
" يَا بَكْرَةُ" ... لان كل البكرات ليها عمل واحد، وهو تنفيذ مشيئة الله.
فحزقيال النبي هنا سمع صوت الله لما نادي علي البكرات.
14وَلِكُلِّ وَاحِدٍ أَرْبَعَةُ أَوْجُهٍ: الْوَجْهُ الأَوَّلُ وَجْهُ كَرُوبٍ، وَالْوَجْهُ الثَّانِي وَجْهُ إِنْسَانٍ، وَالثَّالِثُ وَجْهُ أَسَدٍ، وَالرَّابعُ وَجْهُ نَسْرٍ. هنا ترتيب الاوجه مختلف عن الترتيب في الاصحاح الاول:
الوجه الأول ... وجه كروب.
الوجه التاني ... وجه انسان.
الوجه التالت ... وجه أسد.
الوجه الرابع ... وجه نسر.
علي فكرة وجه الثور هنا متذكرش. طيب ليه؟
الثور: يشير الي كمال الصبر. صبر ربنا له المجد، او مراحم ربنا.
فالناس ديه استنفذت صبر ربنا له المجد. علشان كده مذكرش وجه الثور ... وده لانهم داخلين في الدينونة والعقاب. وعقابهم هيبقي صعب اوي. ... من وقت آدم لما سقط: ربنا له المجد عين كاروب شجرة الحياة.
15ثُمَّ صَعِدَ الْكَرُوبِيمُ. هذَا هُوَ الْحَيَوَانُ الَّذِي رَأَيْتُهُ عِنْدَ نَهْرِ خَابُورَ. بيأكد لينا أن الكاروبيم ده اللي شوفته عند نهر خابور، كان من سنة وستة شهور في بداية الرؤيا.16وَعِنْدَ سَيْرِ الْكَرُوبِيمِ سَارَتِ الْبَكَرَاتُ بِجَانِبِهَا، وَعِنْدَ رَفْعِ الْكَرُوبِيمِ أَجْنِحَتَهَا لِلارْتِفَاعِ عَنِ الأَرْضِ لَمْ تَدُرِ الْبَكَرَاتُ أَيْضًا عَنْ جَانِبِهَا. أول ما الكاروبيم يتحرك، البكرات تتحرك معاهم.
وَعِنْدَ رَفْعِ الْكَرُوبِيمِ أَجْنِحَتَهَا لِلارْتِفَاعِ عَنِ الأَرْضِ لَمْ تَدُرِ الْبَكَرَاتُ أَيْضًا عَنْ جَانِبِهَا " ... ولما الكاروبيم رفعوا أجنحتهم علشان يطلعوا من الارض، البكرات بطلت تدور.
17عِنْدَ وُقُوفِهَا وَقَفَتْ هذِهِ، وَعِنْدَ ارْتِفَاعِهَا ارْتَفَعَتْ مَعَهَا، لأَنَّ فِيهَا رُوحَ الْحَيَوَانِ. الروح اللي شغال في الكاروبيم، هو نفس الروح اللي شغال في البكرات. روح الله واحد. روح الله بيخلي المنظر كله يسير، وبيقود المنظر كله.
وقولنا يابختهم علشان روح ربنا هو اللي بيقودهم وبيمشيهم. واحنا البشر بنتعب دايما علشان ماشين بمزاجنا. فاحنا السبب اللي بنوقف العلاقة الحلوة ديه اللي بينا وبين ربنا، ونقوله: سيبنا نمشي بمزاجنا. وعلشان كده دايما تعبانين في حياتنا. لكن الشاروبيم والكائنات السمائية مش كده خالص، مش زينا.
(واتفقنا ان الآيات من 9 - 17 مراجعة سريعة للي شافه حزقيال في الاصحاح الأول وبيأكد اللي شافه في الرؤيا في الاصحاح الاول)
18وَخَرَجَ مَجْدُ الرَّبِّ مِنْ عَلَى عَتَبَةِ الْبَيْتِ وَوَقَفَ عَلَى الْكَرُوبِيمِ. مجد ربنا بيفارق بيت ربنا له المجد. وربنا وقف علي الكاروبيم الحاملين عرشه. 19فَرَفَعَتِ الْكَرُوبِيمُ أَجْنِحَتَهَا وَصَعِدَتْ عَنِ الأَرْضِ قُدَّامَ عَيْنَيَّ. عِنْدَ خُرُوجِهَا كَانَتِ الْبَكَرَاتُ مَعَهَا، وَوَقَفَتْ عِنْدَ مَدْخَلِ بَابِ بَيْتِ الرَّبِّ الشَّرْقِيِّ، وَمَجْدُ إِلهِ إِسْرَائِيلَ عَلَيْهَا مِنْ فَوْقُ. مشاعر قلب ربنا وهو مجبر ان جاز التعبير: انه يسيب بيته. هما اللي اجبروا ربنا علي كده. ربنا اصلا مش عاوز يسيب بيته ولا أورشليم. لكن أنتم يا شعب إسرائيل بتطرودوني. وربنا عمال يتحايل عليهم، يمكن يتوبوا. بس مش بيتوبوا لغاية ما وصلوا للمرحلة الأخيرة، وارتفع مجد الرب من أورشليم وخرج.
" فَرَفَعَتِ الْكَرُوبِيمُ أَجْنِحَتَهَا وَصَعِدَتْ عَنِ الأَرْضِ قُدَّامَ عَيْنَيَّ. عِنْدَ خُرُوجِهَا كَانَتِ الْبَكَرَاتُ مَعَهَا،" ... لما حل مجد الرب علي الكاروبيم ارتفعت عن الأرض، وبعدت بعرش ربنا له المجد عن الهيكل. والبكرات مرتبطة بالكاروبيم، والبكرات صاعدة مع الكاروبيم.
20هذَا هُوَ الْحَيَوَانُ الَّذِي رَأَيْتُهُ تَحْتَ إِلهِ إِسْرَائِيلَ عِنْدَ نَهْرِ خَابُورَ. وَعَلِمْتُ أَنَّهَا هِيَ الْكَرُوبِيمُ. هنا حزقيال النبي بيوضح أن الكائنات الحية الغير متجسدة اسمها: الكاروبيم / الشاروبيم. وهي نفسها اللي شافها في اصحاح 1.21لِكُلِّ وَاحِدٍ أَرْبَعَةُ أَوْجُهٍ، وَلِكُلِّ وَاحِدٍ أَرْبَعَةُ أَجْنِحَةٍ، وَشِبْهُ أَيْدِي إِنْسَانٍ تَحْتَ أَجْنِحَتِهَا. نفس الشرح: كل واحد منهم عنده اربعة اوجه. واربعة اجنحة وشبه ايدي انسان تحت اجنحتها.22وَشَكْلُ وُجُوهِهَا هُوَ شَكْلُ الْوُجُوهِ الَّتِي رَأَيْتُهَا عِنْدَ نَهْرِ خَابُورَ، مَنَاظِرُهَا وَذَوَاتُهَا. كُلُّ وَاحِدٍ يَسِيرُ إِلَى جِهَةِ وَجْهِهِ. وده نفس منظرها بتاع الاصحاح الاول.
" كُلُّ وَاحِدٍ يَسِيرُ إِلَى جِهَةِ وَجْهِهِ" ... يعني مفيش حد بيتصرف من نفسه او من دماغه. لكن علي حسب خطة ربنا له المجد.
حاجة جميلة: انهم يصنعون ارادة الله. حاجة جميلة في الملايكة والكائنات السماوية: انهم يصنعون ارادة الله.
⪢