⪡ 1وَكَانَ لَمَّا فَرَغَ إِرْمِيَا مِنْ أَنْ كَلَّمَ كُلَّ الشَّعْبِ بِكُلِّ كَلاَمِ الرَّبِّ إِلهِهِمِ، الَّذِي أَرْسَلَهُ الرَّبُّ إِلهُهُمْ إِلَيْهِمْ، إرميا بعد مقتل جدليا، قالوا له: شوفلنا ربنا يقول إيه، هل ربنا عايزنا نقعد هنا ولا ننزل مصر ولا نروح فين؟
طبعاً هم كان جوه قلبهم خطة معينة وفكر معين كانوا هيعملوه كدة كده، وإرميا استشف ده من كلامهم.
بيقولوا لإرميا: قولنا ربنا عايزنا نعمل إيه، وعلى حسب كل اللي يقوله الرب إلهنا هنعمل. فإرميا جابلهم الرد من عند ربنا وقالهم متنزلوش مصر، مش هيكون ليكم خير ولا سلام ولا راحة في مصر، لكن خليكم هنا واستقروا في أرض يهوذا، ومتقلقوش من جهة نبوخذنصر والبابليين، أنا هتصرف.
الإصحاح 43، ده إصحاح سهل وأحداثه بسيطة، نقراه كده مع بعض:
إرميا بعد ما قالهم كل حاجة، بكل أمانة، ودي صفة من صفات الخدام الامناء، يقولوا كلمة الرب وكلمة الحق باستقامة، بنقولها في القداس: يفصلوا كلمة الحق باستقامة.
2أَنَّ عَزَرْيَا بْنَ هُوشَعْيَا وَيُوحَانَانَ بْنَ قَارِيحَ، وَكُلَّ الرِّجَالِ الْمُتَكَبِّرِينَ كَلَّمُوا إِرْمِيَا قَائِلِينَ: «أَنْتَ مُتَكَلِّمٌ بِالْكَذِبِ! لَمْ يُرْسِلْكَ الرَّبُّ إِلهُنَا لِتَقُولَ: لاَ تَذْهَبُوا إِلَى مِصْرَ لِتَتَغَرَّبُوا هُنَاكَ. بعد ما إرميا قالهم كلام الله الذي طلبوه منه، وقال لهم أن يبقوا في بلادهم ولا يذهبوا إلى مصر لئلا يموتوا أن رؤساء الشعب إتهموه بالكذب، وذلك لأن كلامه لم يوافق رغبتهم.
"أَنَّ عَزَرْيَا بْنَ هُوشَعْيَا" ... ده اسم جديد علينا، كان واحد من ضمن الرؤساء، لكن "يُوحَانَانَ بْنَ قَارِيحَ وَكُلَّ الرِّجَالِ الْمُتَكَبِّرِينَ. " ... الكتاب إدالهم صفة الكبرياء، لان الكبرياء أبو العصيان، قَبْلَ الْكَسْرِ الْكِبْرِيَاءُ (أم 16: 18).
"وَكُلَّ الرِّجَالِ الْمُتَكَبِّرِينَ كَلَّمُوا إرميا قَائِلِينَ: أنت مُتَكَلِّمٌ بِالْكَذِبِ!" ... ودي نفس الكلمة اللي كان إرميا بيقولها على الأنبياء الكذبة، يعني حطوا إرميا في صف الأنبياء الكذبة، يقولوا له: أنت كذاب ونبي كذاب. تخيلوا بيقولوا على إرميا كده! اللي كانوا جايين في منتهى الانكسار والاتضاع والمسكنة، وعمالين يقولوا له: صلي من أجلنا إلى الرب إلهك علشان يقولنا نعمل إيه! بعد ما صلى وقالهم يعملوا إيه، قالوا له: أنت كذاب.
"أنت مُتَكَلِّمٌ بِالْكَذِبِ! لَمْ يُرْسِلْكَ الرَّبُّ إِلهُنَا لِتَقُولَ: لا تَذْهَبُوا إِلَى مِصْرَ لِتَتَغَرَّبُوا هُنَاكَ." ... قالوا عن المسيح أنه به شيطان، وأنه ببعلزبول رئيس الشياطين يخرج الشياطين. (لو 11: 15). وأهم قالوا على إرميا: أنت مُتَكَلِّمٌ بِالْكَذِبِ! وتلاقي كده كل رجال الله الاتقياء في كل جيل، دايمًا ياخدولهم تُهمة كده، إذا كان قالوا على المسيح له كل المجد كده مش هيقولوا يعني على رجال الله!
3بَلْ بَارُوخُ بْنُ نِيرِيَّا مُهَيِّجُكَ عَلَيْنَا لِتَدْفَعَنَا لِيَدِ الْكَلْدَانِيِّينَ لِيَقْتُلُونَا، وَلِيَسْبُونَا إِلَى بَابِلَ». تهمة جديدة اتهموا بيها إرميا، قالوا له: أنت شخشيخة في إيد باروخ، الكاتب بتاعك، هو اللي بيحركك، قالك: قولهم متروحوش مصر وخليكوا هنا، علشان لما يجي البابليين نخلص منهم. هما بيفكروا كده أو إدعوا كدة بالكذب.
"لَمْ يُرْسِلْكَ الرَّبُّ إِلهُنَا لِتَقُولَ: لا تَذْهَبُوا إِلَى مِصْرَ لِتَتَغَرَّبُوا هُنَاكَ. بَلْ بَارُوخُ بْنُ نِيرِيَّا مُهَيِّجُكَ عَلَيْنَا لِتَدْفَعَنَا لِيَدِ الْكَلْدَانِيِّينَ لِيَقْتُلُونَا، وَلِيَسْبُونَا إِلَى بَابِلَ. " ... رجعوا إتهموا إرميا بأنه، عميل زي ما كان أبائهم والناس اللي قبليهم قالوا له: أنت عميل، أنت عايزنا نستسلم لبابل، أنت شغال عند بابل. فقالوا نفس الكلام ده.
4فَلَمْ يَسْمَعْ يُوحَانَانُ بْنُ قَارِيحَ وَكُلُّ رُؤَسَاءِ الْجُيُوشِ وَكُلُّ الشَّعْبِ لِصَوْتِ الرَّبِّ بِالإِقَامَةِ فِي أَرْضِ يَهُوذَا، خلاص هم عندهم قرار واخدينه. طب بتسألوا ربنا ليه؟ عشان يختم على اللي إحنا عايزينه، مش هيختم على اللي إحنا عايزينه؟ خلاص إحنا هنعمل اللي إحنا عايزينه في الآخر.5بَلْ أَخَذَ يُوحَانَانُ بْنُ قَارِيحَ، وَكُلُّ رُؤَسَاءِ الْجُيُوشِ، كُلَّ بَقِيَّةِ يَهُوذَا الَّذِينَ رَجَعُوا مِنْ كُلِّ الأُمَمِ الَّذِينَ طُوِّحُوا إِلَيْهِمْ لِيَتَغَرَّبُوا فِي أَرْضِ يَهُوذَا، الناس اللي كانت متطوحة ومتشتتة ورجعت، الرؤساء دول خدوهم وقالولهم: يلا، كلنا هننزل على مصر.6الرِّجَالَ وَالنِّسَاءَ وَالأَطْفَالَ وَبَنَاتِ الْمَلِكِ، وَكُلَّ الأَنْفُسِ الَّذِينَ تَرَكَهُمْ نَبُوزَرَادَانُ رَئِيسُ الشُّرَطِ، مَعَ جَدَلْيَا بْنِ أَخِيقَامَ بْنِ شَافَانَ، وَإِرْمِيَا النَّبِيِّ وَبَارُوخَ بْنِ نِيرِيَّا، خدوا معاهم مجموعة كبيرة أوي،واخدوا ارميا النبي وتلميذه باروخ كمان. طبعًا منقدرش نقول إن أرض يهوذا فضيت، لكن نزلوا مجموعة كبيرة أوي إلى مصر.7فَجَاءُوا إِلَى أَرْضِ مِصْرَ لأَنَّهُمْ لَمْ يَسْمَعُوا لِصَوْتِ الرَّبِّ وَأَتَوْا إِلَى تَحْفَنْحِيسَ. "لانَّهُمْ لَمْ يَسْمَعُوا لِصَوْتِ الرَّبِّ " ... بتيجي في بعض الترجمات لانهم لم يطيعوا الرب. دول ناس ربنا عمال يكلمهم بقاله 40 سنة ولا هم هنا خالص. والاكتر من كده، خدوا إرميا وباروخ قصراً وغصب عنهم إلى مصر، يُقال إن إرميا أنهى حياته في مصر، في أرض الغربة، مصر بالنسبة له أرض غُربة. الغريب بقى إن الإنسان يحن إلى أرض العبودية، هي مصر دي بالنسبة لهم كانت إيه؟ مصر دي هم وصلوا لمرحلة فيها إنهم صرخوا لربنا، مش طايقين من كُتر الاستعباد والظلم والمشقة وكانت حالتهم صعبة خالص وبيسخروهم بيبهدلوه. لكن شوفوا الإنسان يلف يلف ويشتاق إلى الخطية مرة أخرى.
"وَأَتَوْا إِلَى تَحْفَنْحِيسَ. " ... بيقولوا إن تحفنحيس دي كانت مدينة محصنة جدًا وقوية، مدينة لفرعون مصر، في شمال الأرض الدلتا. يعني اختاروا مدينة محترمة محصنة عشان البابليين ميطولوهمش لكِنْ مَشُورَةُ الرَّبِّ هِيَ تَثْبُتُ. (أم 19: 21). إرميا قالهم: حتى لو روحتوا مصر السيف وراكم. ويُقال إن نبوخذنصر، في التاريخ، كده من سنة 567-68 وصل إلى مصر وهزم فرعون مصر في الوقت ده واتبهدلوا في الوقت ده برضه في مصر.
8ثُمَّ صَارَتْ كَلِمَةُ الرَّبِّ إِلَى إِرْمِيَا فِي تَحْفَنْحِيسَ قَائِلَةً: إرميا وهو في أرض مصر، أرض العبودية والمذلة، جاءت كلمة الرب برضه إلى إرميا، كلمة ربنا ميحدهاش مكان، يعني ربنا مش محصور عندهم في الهيكل،
"ثُمَّ صَارَتْ كَلِمَةُ الرَّبِّ إِلَى إرميا فِي تَحْفَنْحِيسَ قَائِلَةً." ... ربنا بقى راح قال لإرميا: عايزك تعمل حاجة يا إرميا، أنا بس بفكركم إن في نبوات ضد مصر في سفر حزقيال، الإصحاحات 29-32. هنا برضه ربنا هيقول كلام عن مصر،
9«خُذْ بِيَدِكَ حِجَارَةً كَبِيرَةً وَاطْمُرْهَا فِي الْمِلاَطِ، فِي الْمَلْبِنِ الَّذِي عِنْدَ بَابِ بَيْتِ فِرْعَوْنَ فِي تَحْفَنْحِيسَ أَمَامَ رِجَال يَهُودٍ. "الملاط" ... الطين الذي يصنعون منه الطوب.
" الْمَلْبِنِ " ... المكان الذي يعجن فيه الطين ليعمل ألواح من الطوب اللبن.
فكان المكان ده مليان بالطين عشان بيعملوا منه الطوب اللبن. فهو غالبًا كان مكان كبير مليان بالطين وفيه الفرن بتاع الطين اللبن وفيه حتة كمان معمولة بالحجارة.
كانت هذه النبوة مصحوبة بأعمال طلبها الله ظاهرة مرئية تؤكد معنى النبوة، فطلب من إرميا أنه: يدفن حجارة كبيرة في الطين أمام قصر الملك، وهذه تمثل قوة بابل العظيمة التي لا يستوعب بنى إسرئيل ولا المصريون قوتها فهي في نظرهم غير ظاهرة ومطمورة في الطين ولكنها قوية قادرة أن تحطم مصر، ولا تخاف من فرعون إذ أن إرميا طمرها أمام باب قصر الملك.
10وَقُلْ لَهُمْ: هكَذَا قَالَ رَبُّ الْجُنُودِ إِلهُ إِسْرَائِيلَ: هأَنَذَا أُرْسِلُ وَآخُذُ نَبُوخَذْرَاصَّرَ مَلِكَ بَابِلَ عَبْدِي، وَأَضَعُ كُرْسِيَّهُ فَوْقَ هذِهِ الْحِجَارَةِ الَّتِي طَمَرْتُهَا فَيُبْسِطُ دِيبَاجَهُ عَلَيْهَا. "ديباجة" ... الثياب الملكية الحريرية. اللبس الفخم الملوكي بتاع الملك.
"يبسط ديباجة عليها " ... يسيطر على المنطقة ويحتلها.
فبيقول إن نبوخذنصر هيجيب الكرسي بتاعه وسلطانه ويقعد في الحتة دي ويملك في الحتة. ودي نبوة عن هزيمة فرعون مصر على يد نبوخذنصر.
11وَيَأْتِي وَيَضْرِبُ أَرْضَ مِصْرَ، الَّذِي لِلْمَوْتِ فَلِلْمَوْتِ، وَالَّذِي لِلسَّبْيِ فَلِلسَّبْيِ، وَالَّذِي لِلسَّيْفِ فَلِلسَّيْفِ. يعني هم هربانين من الموت ومن السبي ومن السيف! هيجيلهم لغاية عندهم.
دول هربوا من أرض يهوذا، على عكس إرادة ربنا، عشان خايفين من ملك بابل ومن السيف ومن السبي، راحوا في مصر فجالهم السيف والسبي والهلاك هناك، عشان عدم الإيمان.
12وَأُوقِدُ نَارًا فِي بُيُوتِ آلِهَةِ مِصْرَ فَيُحْرِقُهَا وَيَسْبِيهَا، وَيَلْبَسُ أَرْضَ مِصْرَ كَمَا يَلْبَسُ الرَّاعِي رِدَاءَهُ، ثُمَّ يَخْرُجُ مِنْ هُنَاكَ بِسَلاَمٍ. بالرغم إن نبوخذنصر كان بيعبد أوثان غريبة برضه، لكن كان في عادة زمان في الحروب، إن الملك اللي يغلب يدخل البلد ويسبي حتى تماثيل الآلهة بتاعة البلد المهزومة، علشان يزفوهم في بلدهم ويقولوا: إن آلهتنا هزمت الآلهة الثانية. زي ما عملوا مع أورشليم، خدوا الأواني وخدوا حاجات كتير، وكانوا بيزفوا الحاجات دي في بابل وبيقولوا: إن إحنا آلهتنا أعظم آلهة، ومفيش حد قدر يقف قصادها. فكانت دي عادة في الحروب زمان، يقولوا: إحنا وآلهتنا كسبنا الناس دي وآلهتهم.
"فَيُحْرِقُهَا وَيَسْبِيهَا، وَيَلْبَسُ أَرْضَ مِصْرَ كَمَا يَلْبَسُ الرَّاعِي رِدَاءَهُ، ثُمَّ يَخْرُجُ مِنْ هُنَاكَ بِسَلامٍ." ... التشبيه اللي موجود هنا ده - وَيَلْبَسُ أَرْضَ مِصْرَ كَمَا يَلْبَسُ الرَّاعِي رِدَاءَهُ ... زي راعي الغنم لما يكون هيخرج للغنم، هو راعي الغنم هيلبس إيه يعني؟ حتة جلابية ويخرج علطول. فبيقول: زي ما الراعي بيلبس الرداء بتاعه ويخرج علطول عشان يرعى الغنم بتاعه، ومبياخدش مجهود عشان يلبس الجلابية بتاعته. نبوخذنصر كده، مش هياخد مجهود عشان ياخد مصرويستولي عليها.
13وَيَكْسِرُ أَنْصَابَ بَيْتَ شَمْسٍ الَّتِي فِي أَرْضِ مِصْرَ، وَيُحْرِقُ بُيُوتَ آلِهَةِ مِصْرَ بِالنَّارِ». "بيت شمس" ... دي غالبًا مدينة أون، المدينة اللي كان يعبد فيها إله الشمس رع، مكان هليوبوليس دلوقتي، اللي هي زي ما تقولوا مطار القاهرة يعني." وَيَكْسِرُ أَنْصَابَ بَيْتَ شَمْسٍ." ... المنطقة دي كانت معروفة بالمسلات الكبيرة العالية جداً، اسمها الأنصاب، دي كانت من حاجات اللي بيفتخر بيها المصريين، وحاجات بتاعة الآلهة، وحاجات فخمة. يقولك نبوخذنصر هيكسر كل ده.
"وَيَكْسِرُ أَنْصَابَ بَيْتَ شَمْسٍ الَّتِي فِي أَرْضِ مِصْرَ، وَيُحْرِقُ بُيُوتَ آلِهَةِ مِصْرَ بِالنَّارِ." ... يعني أدي مصر.
هي مش مقصود بقى بيها مصر بس وخلاص، لكن أي حاجة نعتمد عليها بعيد عن ربنا، ربنا بيقولك: أنا هكسرهالك عشان تخلي عينك عليَّ بس. عايز تعتمد على إيه؟ على صحة، على مال، على مراكز، على سلطان، على معارف؟ ربنا يقولك: كل ده مش هيخلّصك، خليك معايا وأنا هخلصك. لكن كل الحاجات التانية اللي هتعتمد عليها عاملة زي عكاز من بوص بمجرد ما تتني عليه هيتكسر، كل ده ولا حاجة، لكن اَلْمُتَوَكِّلُونَ عَلَى الرَّبِّ مِثْلُ جَبَلِ صِهْيَوْنَ، الَّذِي لا يَتَزَعْزَعُ، بَلْ يَسْكُنُ إِلَى الدَّهْرِ. (مز 125: 1)
⪢