⪡ 1وَحَدَثَ فِي تِلْكَ السَّنَةِ فِي ابْتِدَاءِ مُلْكِ صِدْقِيَّا مَلِكِ يَهُوذَا، فِي السَّنَةِ الرَّابِعَةِ، فِي الشَّهْرِ الْخَامِسِ، أَنَّ حَنَنِيَّا بْنَ عَزُورَ النَّبِيَّ الَّذِي مِنْ جِبْعُونَ: كَلَّمَنِي فِي بَيْتِ الرَّبِّ أَمَامَ الْكَهَنَةِ وَكُلِّ الشَّعْبِ قَائِلاً: إرميا 28 دا إصحاح سهل كده بيحكي عن موقف حصل ما بين نبي حقيقي هو إرميا ونبي وكاهن كذاب واسمه حنانيا، حنانيا ابن عزور، فهو إصحاح كده زي حكاية يعني.
"في ابتداء ملك صدقيا،" ... مُلك صدقيا قعد 11 سنة. ابتداء من صدقيا، وابتداء هنا تشير إلى الجزء الأول من مُلكه، يعني أول أربع سنين تقريباً. في السنة الرابعة، هو بيقولك في السنة الرابعة، في الشهر الخامس واحفظوا الشهر كويس لأن الإصحاح هيتختم في الشهر السابع، وآخر كلمة في الإصحاح.
يبقى في الشهر الخامس في واحد اسمه "حنانيا ابن عزور النبي" ... من مدينة الكهنة اللي اسمها جبعون في سبط بنيامين شمال غرب أورشليم بـ 5 ميل تقريباً. الراجل حنانيا ده كان نبي وكان من مدينة الكهنة فقال إنه كان كاهن برضه وجه وكلم إرميا في نفس المكان اللي كان إرميا عمال يقول فيه للناس في الهيكل. "كَلَّمَنِي فِي بَيْتِ الرَّبِّ أَمَامَ الْكَهَنَةِ وَكُلِّ الشَّعْبِ قَائِلًا." ... جه بقى حنانيا ويكلم إرميا قدام الكهنة والشعب في الهيكل.
حنانيا يعني يهوه حنّان فحنانيا ده حاجة جميلة واسم جميل. بس هو كشخص مش كده.
2«هكَذَا تَكَلَّمَ رَبُّ الْجُنُودِ إِلهُ إِسْرَائِيلَ قَائِلاً: قَدْ كَسَرْتُ نِيرَ مَلِكِ بَابِلَ. ده بيستخدم نفس التعبيرات بتاعة إرميا فبيقول: "هكذا تكلم رب الجنود إله إسرائيل،"... يعني بيدي للكلام منظر وشكل يعني عشان الناس تاخد بالها وتقول ده بيتكلم باسم إله إسرائيل يبقى نسمع ونشوف ده نبي حقيقي ولا إيه؟
"قَائِلًا: قَدْ كَسَرْتُ نِيرَ مَلِكِ بَابِلَ." ... إرميا عمال يقولهم سنين هذا عددها أخضعوا لملك بابل علشان المدينة تحيا ولا تخرب، وده يجي فجأة حنانيا ده ويقولهم قد كسرت نير ملك بابل، إيه رأيكم بقا لما الناس تسمع لإرميا تبقى مبسوطة ولا لما تسمع لحنانيا تبقى مبسوطة؟ أكيد لما تسمع لحنانيا إنما إرميا عمال يقولهم كلام صعب وده هيحصل وربنا هيسوي أما الراجل ده جاي بيقولهم قد كسرت نير ملك بابل، فيا سلام الناس نفسها تسمع كلام حلو تسمع كلام يطمن.
لازم الواحد يبقي في منتهي الحرص من التعاليم الغريبة اللي بتلخبط وتضل الانسان، اللي بيبقي ليها شكل منطقي وصورة مبهرة، ولكن طبعا طالما بتتعارض مع تعاليم الكنيسة والآباء القديسين فهي مضلة. لا تندفع وراءها وارفع قلبك بالصلاة، وتمسك بما عندك أي ما تعلمته من الكنيسة لئلا تضل.
3فِي سَنَتَيْنِ مِنَ الزَّمَانِ أَرُدُّ إِلَى هذَا الْمَوْضِعِ كُلَّ آنِيَةِ بَيْتِ الرَّبِّ الَّتِي أَخَذَهَا نَبُوخَذْنَاصَّرُ مَلِكُ بَابِلَ مِنْ هذَا الْمَوْضِعِ، وَذَهَبَ بِهَا إِلَى بَابِلَ. النبوة عبارة عن: نهاية سبي نبوخذ نصر لكل البلاد التي احتلها ومنها مملكة يهوذا بعد سنتين من الزمان وأنكسار بابل، ورجوع آنية بيت الرب التي أغتصبها نبوخذ نصر من الهيكل في أورشليم. ويلاحظ انشغاله بالماديات أاللي هي آنية بيت الرب قبل المسبيين االلي هم أهم، وطبعًا نبوته كاذبة لأن إرميا أعلن أن السبي البابلي سيستمر 70 عامًا (إر25: 12).
ركزوا في الكلام اللي قاله حنانيا عشان نشوف الفرق بين كلام حنانيا وكلام إرميا، ونشوف إيه الفرق بين كلام النبي الكذاب حنانيا وكلام النبي الحقيقي إرميا. في فرق في الكلام هنشوفه دلوقتي، وده بالرغم من إنه بيحاول يقلد إرميا.
4وَأَرُدُّ إِلَى هذَا الْمَوْضِعِ يَكُنْيَا بْنَ يَهُويَاقِيمَ مَلِكَ يَهُوذَا وَكُلَّ سَبْيِ يَهُوذَا الَّذِينَ ذَهَبُوا إِلَى بَابِلَ، يَقُولُ الرَّبُّ، لأَنِّي أَكْسِرُ نِيرَ مَلِكِ بَابِلَ». طبعا كلامه يجي على هوى الناس. بس ايه الفرق بين كلامه وكلام إرميا؟
هو مذكرش في كلامه إن الناس تتوب، واخدين بالكوا إرميا عمال طالع روحه معهم إن جاز التعبير نقول كده يقولهم يا جماعة توبوا بقى وارجعوا لربنا، أطلبوا وجه ربنا واستسمحوه، إنما ده بقى جاي كده من الدار للنار يقولهم ربنا هيكسر نير ملك بابل خلاص. فده فرق كبير أوي بين كلام حنانيا وكلام إرميا.
هو الراجل كان بيتكلم زي ما الناس عايزة تسمع.
5فَكَلَّمَ إِرْمِيَا النَّبِيُّ حَنَنِيَّا النَّبِيَّ أَمَامَ الْكَهَنَةِ وَأَمَامَ كُلِّ الشَّعْبِ الْوَاقِفِينَ فِي بَيْتِ الرَّبِّ، 6وَقَالَ إِرْمِيَا النَّبِيُّ: «آمِينَ. هكَذَا لِيَصْنَعِ الرَّبُّ. لِيُقِمِ الرَّبُّ كَلاَمَكَ الَّذِي تَنَبَّأْتَ بِهِ، فَيَرُدَّ آنِيَةَ بَيْتِ الرَّبِّ وَكُلَّ السَّبْيِ مِنْ بَابِلَ إِلَى هذَا الْمَوْضِعِ. المفسرين يقولوا: إرميا هنا بيتكلم بطريقة إلى حد ما فيها نوع من السخرية، فهو بيقول ربنا يكسر نير ملك بابل، كأن إرميا بيقولوا أمين يخويا يعني نفسنا كلنا كده بس مش هيحصل حاجة حاجة من هذا القبيل يعني، ما دي شهوة قلبنا، بس الحقيقة يعني اللي أنت بتقوله ده مش هيحصل.
علشان بس تعرفوا أن إرميا مكنش واحد بيشتهي الشر للشعب ده، لا، ما هو لو كان قاعد قاوح معاه كده، يبقى أنت بقى في إيه بينك وبين الشعب؟ وأنت بتكره الشعب ده ولا إيه؟ وأنت مش بتحب شعبك ومدينتك، لكن إرميا مكانش كده، إرميا إصحاح 17: "أَمَّا أَنَا فَلَمْ أَعْتَزِلْ عَنْ أَنْ أَكُونَ رَاعِيًا وَرَاءَكَ، وَلاَ اشْتَهَيْتُ يَوْمَ الْبَلِيَّةِ. أَنْتَ عَرَفْتَ. مَا خَرَجَ مِنْ شَفَتَيَّ كَانَ مُقَابِلَ وَجْهِكَ." (إر 17: 16).
إرميا كان بيكلم ربنا وبيقوله: أنت يا رب عارف إن ما اشتهيت يوم البلية للشعب ده، يعني أنا مش حابب إن هما يحصل فيهم كل ده، بس بكل أسف هو ده نتيجة أعمالهم، ربنا قاله أعطيهم ثمر أعمالهم.
7وَلكِنِ اسْمَعْ هذِهِ الْكَلِمَةَ الَّتِي أَتَكَلَّمُ أَنَا بِهَا فِي أُذُنَيْكَ وَفِي آذَانِ كُلِّ الشَّعْبِ. إرميا قاله ياريت يكون كده، بس اسمع أنا عايز أقول لك حاجة: 8إِنَّ الأَنْبِيَاءَ الَّذِينَ كَانُوا قَبْلِي وَقَبْلَكَ مُنْذُ الْقَدِيمِ وَتَنَبَّأُوا عَلَى أَرَاضٍ كَثِيرَةٍ وَعَلَى مَمَالِكَ عَظِيمَةٍ بِالْحَرْبِ وَالشَّرِّ وَالْوَبَإِ. 9النَّبِيُّ الَّذِي تَنَبَّأَ بِالسَّلاَمِ، فَعِنْدَ حُصُولِ كَلِمَةِ النَّبِيِّ عُرِفَ ذلِكَ النَّبِيُّ أَنَّ الرَّبَّ قَدْ أَرْسَلَهُ حَقًّا». إرميا بيقوله هنا وبيستشهد بالأنبياء اللي قبليه وبيقوله الحقيقة أن فيه كتير قبلينا حبقوق وناحوم وصفنيا و كتير جداً تاني اتنبأوا باللي أنا بقوله برضه، وأنا ماشي في نفس خط هؤلاء الأنبياء، خلي بالك أنت كده ماشي بعيد عن الخط ده. 10ثُمَّ أَخَذَ حَنَنِيَّا النَّبِيُّ النِّيرَ عَنْ عُنُقِ إِرْمِيَا النَّبِيِّ وَكَسَرَهُ. غالباً بقى حنانيا أتضايق من إرميا أكتر، راح واخد النير اللي كان على عنق إرميا وغالباً إرميا كان لسة ماشي بالنير في الهيكل وعمل إيه بقا؟ راح مكسره. 11وَتَكَلَّمَ حَنَنِيَّا أَمَامَ كُلِّ الشَّعْبِ قَائِلاً: «هكَذَا قَالَ الرَّبُّ: هكَذَا أَكْسِرُ نِيرَ نَبُوخَذْنَاصَّرَ مَلِكِ بَابِلَ فِي سَنَتَيْنِ مِنَ الزَّمَانِ عَنْ عُنُقِ كُلِّ الشُّعُوبِ». وَانْطَلَقَ إِرْمِيَا النَّبِيُّ فِي سَبِيلِهِ. الرجل أنفعل والناس كلها انفعلت معاه، وطبعاً حابين يسمعوا كلام حنانيا فأحسن حاجة يعني راح إرميا بهدوء قاله خلاص وانسحب من المشهد علشان الدنيا بس تهدى شوية لكن مش هيسيبه ده يرجعله تاني.
"وَانْطَلَقَ إِرْمِيَا النَّبِيُّ فِي سَبِيلِهِ. " ... "لاَ تُجَاوِبِ الْجَاهِلَ حَسَبَ حَمَاقَتِهِ لِئَلاَّ تَعْدِلَهُ أَنْتَ." (أم 26: 4).
في أمور كده لما تلاقي اللي قدامك بقى كده على اخره، يبقى وقف الكلام اللي بتقوله وتقوله عن إذنك نبقى نكمل بعدين لإن كده الموضوع مش هيمشى كويس، ملهاش لازمة ينفعل والناس تنفعل معاه والدنيا هتبقى ممكن تخش في طرق يعني مش حلو. راح إرميا قاله خلاص "وانطلق إلى حال سبيله."
12ثُمَّ صَارَ كَلاَمُ الرَّبِّ إِلَى إِرْمِيَا النَّبِيِّ، بَعْدَ مَا كَسَرَ حَنَنِيَّا النَّبِيُّ النِّيرَ عَنْ عُنُقِ إِرْمِيَا النَّبِيِّ، قَائِلاً: والحاجة الجميلة كمان ربنا مداش لإرميا كلمة على طول في ساعتها علشان هو كان عايز ينسحب من المشهد شوية لغاية ما الدنيا تهدأ، وإرميا كانت ودنه حساسة أوي لربنا، بما أنك يا رب مقلتليش حاجه دلوقتي فخلاص مش هتكلم، لأني أنا مش بتكلم من عندي اللي أنت هتقولولي أنا هقوله. يعني ارميا مندفعش وقال كلامً لتوبيخ حننيا لكن لجأ لربنا وصلى ، لغاية ما ربنا يقول رسالته لحننيا لانه بيتكلم بصوت الله وليس بكلامه الشخصى.13«اذْهَبْ وَكَلِّمْ حَنَنِيَّا قَائِلاً: هكَذَا قَالَ الرَّبُّ: قَدْ كَسَرْتَ أَنْيَارَ الْخَشَبِ وَعَمِلْتَ عِوَضًا عَنْهَا أَنْيَارًا مِنْ حَدِيدٍ. مش أنت كسرت نير الخشب يا حنانيا. فربنا يقولك: أنت كسرت النيرالخشب بس هيبقى حديد ..."قَدْ كَسَرْتَ أَنْيَارَ الْخَشَبِ وَعَمِلْتَ عِوَضًا عَنْهَا أَنْيَارًا مِنْ حَدِيدٍ."
كانو رضيوا بالخشب! مرضيوش بالخشب هياخدوا النير الحديد. هما عمالين كل مدى يعمقوا العقوبة بتاعتهم، مش يتوبوا ويرجعوا فربنا يعني يتغاضى عن أزمنة الجهل، لكن هما عمالين يزودوها، فربنا قال خلاص بلاش النير الخشب يبقى نير حديد.
14لأَنَّهُ هكَذَا قَالَ رَبُّ الْجُنُودِ إِلهُ إِسْرَائِيلَ: قَدْ جَعَلْتُ نِيرًا مِنْ حَدِيدٍ عَلَى عُنُقِ كُلِّ هؤُلاَءِ الشُّعُوبِ لِيَخْدِمُوا نَبُوخَذْنَاصَّرَ مَلِكَ بَابِلَ، فَيَخْدِمُونَهُ وَقَدْ أَعْطَيْتُهُ أَيْضًا حَيَوَانَ الْحَقْلِ». لفتت نظري المرة اللي فاتت برضه لما اتكلم قالك "وأعطيته أيضاً حيوان الحقل،" ... مرتين ربنا يقول وأعطيته حيوان الحقل، اشمعنا؟
أولا. الناس في الوقت ده ثروتها عبارة عن: الأغنام والبهايم اللي في الحقل وحتة الحقل اللي معاهم دي الثروة بتاعتهم، فلما نبوخذنصر ييجي هياخد كل ممتلكاتهم الحقل بحيوان الحقل، يعني هما ولا هيبقى عندهم ممتلكات ولا حاجة، ده مش هياخد الناس أسرى وخلاص لكن ده هياخد ممتلكاتهم كمان، فعايز يقولهم هتضيعوا منكم كل حاجة.
- ثانياً. "إِنْسَانٌ فِي كَرَامَةٍ وَلاَ يَفْهَمُ يُشْبِهُ الْبَهَائِمَ الَّتِي تُبَادُ." (مز 49: 20). ربنا عايز يقولهم: بكل أسف، أنتوا في كرامة بس مش فاهمين تبقى أنتوا والحيوانات بقيتوا زي بعض ولا إيه؟ هو هياخدكوا وهياخد حيوانات الحقل، بكل أسف، ربنا عايز يرفعهم ويمجدهم وهما عايزين يتشبهوا بحيوانات الحقل.
15فَقَالَ إِرْمِيَا النَّبِيُّ لِحَنَنِيَّا النَّبِيِّ: «اسْمَعْ يَا حَنَنِيَّا. إِنَّ الرَّبَّ لَمْ يُرْسِلْكَ، وَأَنْتَ قَدْ جَعَلْتَ هذَا الشَّعْبَ يَتَّكِلُ عَلَى الْكَذِبِ. إرميا قاله استني إحنا لسه مخلصناش كلامنا، المرة اللي فاتت سبتك، لكن لسه ليا كلمة معاك من ربنا رب الجنود إله إسرائيل اللي أنت بتقول باسمه، عايز أقولكم ساعات البعض يقولك أصل إرميا أتشكك واتهز فمشي، لا طبعاً اتشكك واتهز ازاي يعني بعد 23 سنة وهو عمال يقولهم ويعيد ويزيد، وربنا بيكلمه يجي علشان واحد يطلع كده فإرميا اتشكك واتهز؟ لا. لا طبعاً مش ممكن.
فمينفعش برضه إحنا وإحنا في كل الإيمان ده، أي واحد يجي يطلع بكلام جديد نتشكك ونتهز، يبقى كأن إحنا آمنا بخرافات ولا إيماننا مكانش ثابت؟ لازم الواحد يبقى راسخ في الإيمان. فإرميا ماكانش بأي حال من الأحوال يكون اتشكك.
"فَقَالَ إِرْمِيَا النَّبِيُّ لِحَنَنِيَّا النَّبِيِّ: «اسْمَعْ يَا حَنَنِيَّا. إِنَّ الرَّبَّ لَمْ يُرْسِلْكَ، وَأَنْتَ قَدْ جَعَلْتَ هذَا الشَّعْبَ يَتَّكِلُ عَلَى الْكَذِبِ." ... قاله أنا هواجهك كده بالحقيقة وأبقى كأني مراية قدامك عشان تشوف أنت بتعمل إيه، أنت ربنا مأرسلكش وأنت عارف كده، يعني أنت كذاب، وأنت عارف إن أنت الكذاب. والمشكلة مش إن أنت بس بتكدب وكدبك هيجي عليك وخلاص. ده أنت خليت الشعب نفسه يضل.
16لِذلِكَ هكَذَا قَالَ الرَّبُّ: هأَنَذَا طَارِدُكَ عَنْ وَجْهِ الأَرْضِ. هذِهِ السَّنَةَ تَمُوتُ، لأَنَّكَ تَكَلَّمْتَ بِعِصْيَانٍ عَلَى الرَّبِّ». يا حنانيا اسمع أنت متستاهلش تقعد في الأرض دي وهتطرد منها، ومش كده وبس، هذه السنة تموت، لأنك تكلمت بعصيان على الرب، أنت بتخلي الناس دي كلها تعصي ربنا، 17فَمَاتَ حَنَنِيَّا النَّبِيُّ فِي تِلْكَ السَّنَةِ فِي الشَّهْرِ السَّابعِ. الفرق ما بين بداية الكلام وأخره: شهرين تلاتة. من الشهر الخامس لغاية الشهر السابع، طبعاً مش في كل المواقف ربنا هياخد إجراء صارم بالشكل ده زي الإجراء اللي حصل مع حنانيا ده، أنتوا عارفين فيه إجراءات صارمة كده حصلت في الكتاب المقدس، مثلا زي اللي حصل مع حنانيا وسفيرة.
لكن رحمة الله اديت حننيا هنا شهرين فرصة للتوبة وده أفضل من حالة حنانيا وسفيرة اللذين ماتا في الحال، حننيا اتنبأ أنه بعد سنتين ستنتهي العبودية فلم يمض إلا شهرين ومات هو، أما العبودية البابلية فظلت سبعين عامًا. وده بيوضح خطورة خطية العصيان والتمرد علي ارادة ربنا (الارادة الإلهية)
⪢