⪡ 1اَلْكَلاَمُ الَّذِي صَارَ إِلَى إِرْمِيَا عَنْ كُلِّ شَعْبِ يَهُوذَا، فِي السَّنَةِ الرَّابِعَةِ لِيَهُويَاقِيمَ بْنِ يُوشِيَّا مَلِكِ يَهُوذَا، هِيَ السَّنَةُ الأُولَى لِنَبُوخَذْرَاصَّرَ مَلِكِ بَابِلَ، بنعمة ربنا خلصنا إرميا 24، إصحاح سلتا التين. الآيات من أول 15 لغاية نهاية الإصحاح 25 زي مقدمة كدة للإصحاحات من أول إصحاح 46 لغاية إصحاح 51 والإصحاحات دي نبوات عن الأمم.
يوشيا الملك ابن أمون ده كان ملك كويس، وكان ابنه اللي ملك بعده، يهوآحاز قعد حوالي 3 شهور وبعد كده جه يهوياقيم
"فِي السَّنَةِ الرَّابِعَةِ لِيَهُويَاقِيمَ بْنِ يُوشِيَّا مَلِكِ يَهُوذَا، هِيَ السَّنَةُ الأُولَى لِنَبُوخَذْنصَّرَ مَلِكِ بَابِلَ." ... بيحدد التاريخ هنا بالظبط: السنة الرابعة ليهوياقيم والسنة الأولى لنبوخذنصر. تقريبا دي كدة تبقى حوالي سنة 604 ق.م أو 605 ق.م. في الفترة دي ملك بابل غلب نخو فرعون مصر، في معركة مشهورة جدًا اسمها كركميش، واتكسرت شوكة مصر على يد نبوخذنصر، وابتدئ نبوخذنصر والبابليين يسيطروا على معظم العالم تقريبًا في الوقت ده، فهو يتكلم عن الهجوم البابلي المقبل سريعًا ليدمر أورشليم واليهودية وينبه شعبه لآخر مرة حتى يتوب.
2الَّذِي تَكَلَّمَ بِهِ إِرْمِيَا النَّبِيُّ عَلَى كُلِّ شَعْبِ يَهُوذَا وَعَلَى كُلِّ سُكَّانِ أُورُشَلِيمَ قَائِلاً: غالبًا ده كان في محفل أو في حاجة عامة، وراح إرميا برضه قايل الكلام ده على كل شعب يهوذا وكل سكان أورشليم بالرؤساء بالملوك بكله. 3«مِنَ السَّنَةِ الثَّالِثَةِ عَشَرَةَ لِيُوشِيَّا بْنِ آمُونَ مَلِكِ يَهُوذَا إِلَى هذَا الْيَوْمِ، هذِهِ الثَّلاَثِ وَالْعِشْرِينَ سَنَةً، صَارَتْ كَلِمَةُ الرَّبِّ إِلَيَّ فَكَلَّمْتُكُمْ مُبَكِّرًا وَمُكَلِّمًا فَلَمْ تَسْمَعُوا. يعلن إرميا أن بداية نبواته: كانت في السنة الثالثة عشر "ليوشيا" الملك بن آمون وهي عام 627 ق.م، واستمرت 19 سنة، وبعدين التلات شهور بتاعة مُلك "يهوآحاز"، وبعد ذلك مَلَكَ "يهوياقيم" لمدة أربع سنوات ووصلنا إلى عام 604 ق.م (لان العد تنازلي علشان مجئ السيد المسيح.) ، أي أن نبوات "إرميا" امتدت حتى الآن 23 سنة نبههم فيها للتوبة وكلمهم بكلام الله ويقول "مبكرًا" لأن "إرميا" بدأ نبواته في سن مبكرة.
كل يوم بقولكم كلام ربنا، كل يوم. "هذِهِ الثَّلاَثِ وَالْعِشْرِينَ سَنَةً، صَارَتْ كَلِمَةُ الرَّبِّ إِلَيَّ فَكَلَّمْتُكُمْ مُبَكِّرًا وَمُكَلِّمًا فَلَمْ تَسْمَعُوا." ... ولم تسمعوا هنا هتتكرر 3 مرات كأن إرميا بيختم إن الناس دي لها أذن ولا تسمع.
4وَقَدْ أَرْسَلَ الرَّبُّ إِلَيْكُمْ كُلَّ عَبِيدِهِ الأَنْبِيَاءِ مُبَكِّرًا وَمُرْسِلاً فَلَمْ تَسْمَعُوا وَلَمْ تُمِيلُوا أُذُنَكُمْ لِلسَّمْعِ، بيقولهم: كمان ربنا أرسل إليكم كل عبيده الأنبياء - ما هو كان في قبله ميخا وإشعياء وإليشع وإيليا فربنا أرسلهم أنبياء كتير – فبيقول: "وَقَدْ أَرْسَلَ الرَّبُّ إِلَيْكُمْ كُلَّ عَبِيدِهِ الأَنْبِيَاءِ مُبَكِّرًا وَمُرْسِلاً." ... برضه مبكرًا هنا أهي تتقال على ربنا، وتعهدتنا دائمًا بأنبيائك القديسين، "مبكرًا" ... معناها علطول يعني بلا توقف، يعني ربنا لم يتوقف عن أن يرسل أنبيائه القدسين عشان الناس دي تسمع وترجع، وممكن مُبكرًا بتاعة ربنا إنه في كل صباح كان بيبعتلهم كلمته على فم نبي من الأنبياء. "فَلَمْ تَسْمَعُوا وَلَمْ تُمِيلُوا أُذُنَكُمْ لِلسَّمْعِ. " ... 3مرات إرميا يكررها ويقول الناس دي مبتسمعش، لها أذن ولا تسمع. 5قَائِلِينَ: ارْجِعُوا كُلُّ وَاحِدٍ عَنْ طَرِيقِهِ الرَّدِيءِ وَعَنْ شَرِّ أَعْمَالِكُمْ وَاسْكُنُوا فِي الأَرْضِ الَّتِي أَعْطَاكُمُ الرَّبُّ إِيَّاهَا وَآبَاءَكُمْ مِنَ الأَزَلِ وَإِلَى الأَبَدِ. رسالة الأنبياء كلهم هي: رسالة توبة، ودي علامة الرسالة الصحيحة اللي ممكن ربنا يبعتها إن نسمع حاجه تحرك قلبنا وتخلينا نتوب، إذا حاجة حركت قلبنا وخلتنا نتوب ونرجع ونبتدي بداية جديدة مع ربنا يبقى ربنا بعت الرسالة دي لينا. فإرميا بيقول: كانت الرسالة "ارْجِعُوا كُلُّ وَاحِدٍ عَنْ طَرِيقِهِ الرَّدِيءِ." ... كل واحد ياخدها فينا على نفسه دي، ربنا النهاردة بيقولي أرجع عن طريقك الرديء، أنت النهاردة كنت هتمشي في طريق مش كويس، متكملش. في ناس بتبقى مستنية الصباح ييجي : عشان تروح تعمل مشكله، عشان تروح مش عارف تعمل ايه. ولما كل واحد يرجع عن طريقه الرديء ويقدم توبة، المجموع كله هيبقى كويس، يعني المجتمع ينصلح حاله ازاي؟ لما كل واحد يرجع عن طريقه الرديء ويتعلم طرق الله المستقيمة المجتمع كله يبقى حلو وجميل.
فالرسالة بتاعة الأنبياء كانت بتقول: "ارْجِعُوا كُلُّ وَاحِدٍ عَنْ طَرِيقِهِ الرَّدِيءِ وَعَنْ شَرِّ أَعْمَالِكُمْ وَاسْكُنُوا فِي الأَرْضِ الَّتِي أَعْطَاكُمُ الرَّبُّ إِيَّاهَا وَآبَاءَكُمْ مِنَ الأَزَلِ وَإِلَى الأَبَدِ."
6وَلاَ تَسْلُكُوا وَرَاءَ آلِهَةٍ أُخْرَى لِتَعْبُدُوهَا وَتَسْجُدُوا لَهَا، وَلاَ تَغِيظُونِي بِعَمَلِ أَيْدِيكُمْ فَلاَ أُسِيءَ إِلَيْكُمْ. يقولهم: قبل ما تخشوا الأرض ربنا كان منبه على أبائكم متمشوش ورا الآلهة اللي انتم بتعملوها بإيديكم. كانوا بيعملوا آلهة بإيديهم: آلهة خشب أو حجر ويعبدوها، ويقولوا: هذه آلهتك يا إسرائيل. ربنا من الأول من قبل ما يخشوا أرض الميعاد ومتفق معاهم الاتفاق ده: هتمشوا كويس في وصاياي ومتعملوش آلهة غريبة ومتسلكوش ورا آلهة الأمم، يكون ليكم خير. هتسلكوا زي ما سلك الأمم اللي قبليكم وعبدوا الأوثان ونجسوا الأرض، انتم كمان تتطردوا من الأرض.7فَلَمْ تَسْمَعُوا لِي، يَقُولُ الرَّبُّ، لِتَغِيظُونِي بِعَمَلِ أَيْدِيكُمْ شَرًّا لَكُمْ. كانوا بيغيظوا ربنا. بس الحقيقة هم كانوا بيعملوا إيه؟ "أنا أختطفت لنفسي قضية الموت"، بيموتوا نفسهم، "الشر يميت الشرير"، عمال يعمل آلهة غريبة ويمشي وراها ويتنجس بنجاسات الآلهة.8«لِذلِكَ هكَذَا قَالَ رَبُّ الْجُنُودِ: مِنْ أَجْلِ أَنَّكُمْ لَمْ تَسْمَعُوا لِكَلاَمِي يظهر الله إحدى صفاته وهي "رب الجنود" ... ليعلن قوته القادرة على معاقبتهم على شرورهم.9هأَنَذَا أُرْسِلُ فَآخُذُ كُلَّ عَشَائِرِ الشِّمَالِ، يَقُولُ الرَّبُّ، وَإِلَى نَبُوخَذْرَاصَّرَ عَبْدِي مَلِكِ بَابِلَ، وَآتِي بِهِمْ عَلَى هذِهِ الأَرْضِ وَعَلَى كُلِّ سُكَّانِهَا وَعَلَى كُلِّ هذِهِ الشُّعُوبِ حَوَالَيْهَا، فَأُحَرِّمُهُمْ وَأَجْعَلُهُمْ دَهَشًا وَصَفِيرًا وَخِرَبًا أَبَدِيَّةً. "عشائر الشمال " ... جيوش البابليين.
"أحرمهم " ... أقتلهم.
"دهشًا " ... يصيرون في رعب.
"صفيرًا " ... يستهزئ بهم كل البشر لما حدث لهم.
يعلن الله عقابه لعصيانهم وهو: استخدام "نبوخذنصر" الجبار ملك بابل بجيوشه ليهجم على مملكة يهوذا ويحطمها، ويستولى أيضًا على كل البلاد المحيطة ويخربها ويقتل من فيها، ومن يبقى فيها يصير في رعب وخوف ومن يمر بهم من البشر يستهزئ بهم ويحتقرهم لما حدث لهم بسبب خطاياهم.
10وَأُبِيدُ مِنْهُمْ صَوْتَ الطَّرَبِ وَصَوْتَ الْفَرَحِ، صَوْتَ الْعَرِيسِ وَصَوْتَ الْعَرُوسِ، صَوْتَ الأَرْحِيَةِ وَنُورَ السِّرَاجِ. العدو على الأبواب دلوقتي ومفيش فرح ومفيش عريس وعروس. "الأرحية" ... جمع رحى وهي الحجارة التي تستخدم في طحن الغلال. بتاعة الصعيد زمان دي اللي بتطحن القمح. المفروض لما الرحايا تشتغل يبقى في خير وفي قمح وفي أكل والعيش هيتعمل، بس دلوقتي ولا في عيش ولا في قمح ولا في رحايا شغالة لإن في خراب. فبيقول كده: "صَوْتَ الأَرْحِيَةِ وَنُورَ السِّرَاجِ." ... بقى في ظُلمة، الإنسان البعيد عن ربنا إنسان يحيى في الظلمة.
اذا هيبقي في: جوع وحزن وظلمة. وكل ده عقاب ليهم علي خطاياهم وشرهم وعدم توبتهم.
11وَتَصِيرُ كُلُّ هذِهِ الأَرْضِ خَرَابًا وَدَهَشًا، وَتَخْدِمُ هذِهِ الشُّعُوبُ مَلِكَ بَابِلَ سَبْعِينَ سَنَةً. يحدد هنا مدة سبى مملكة يهوذا أو السبي البابلي عندما احتل نبوخذنصر ملك بابل كل بلاد اليهود وكل البلاد اللي حواليها، ومدة السبي: 70 عامًا بدأت عام 609 ق.م، وده وقت اعلان إرميا هذه النبوة إلى عام 536 ق.م لما رجعت أول مجموعة من اليهود بقيادة "زربابل" إلى أورشليم، أيام كورش ملك مادي وفارس. أي أن السبعين عامًا هي تقريبًا مدة المملكة البابلية، وبعدها سقطت بابل، وقامت مملكة مادي وفارس التي في أولها بدأت عودة اليهود إلى أورشليم من السبي.
70 سنة رأي عام عند المفسرين: إنها تشير إلى فترة كاملة، 7 و10 دي أرقام كمال، بمعنى هيقعدوا في السبي فترة تأديبية كاملة متنقصش ولا تزيد، لازم لهم التأديب ده.
12«وَيَكُونُ عِنْدَ تَمَامِ السَّبْعِينَ سَنَةً أَنِّي أُعَاقِبُ مَلِكَ بَابِلَ، وَتِلْكَ الأُمَّةَ، يَقُولُ الرَّبُّ، عَلَى إِثْمِهِمْ وَأَرْضَ الْكَلْدَانِيِّينَ، وَأَجْعَلُهَا خِرَبًا أَبَدِيَّةً. ربنا كان مديهم وصية إن مفروض كل 7 سنين يسيبوا الأرض سنة كده تشم نفسها، زي يعني راحة للأرض، سبت للأرض. من ساعة ما دخلوا وبنوا الهيكل لغاية ما الهيكل اتخرب كانوا حوالي 490 سنة. يعني 70 سنة في 7 مرات، يعني هم المفروض كانوا كل 7 سنين يريحوا سنة، فهم قعدوا كل 7 سنين ميريحوش سنة لمدة 490 سنة، يعني 70 مرة مريحوش الأرض. فربنا قالهم: طيب، نريح إحنا الأرض، وتتاخدوا انتم في السبي شوية لغاية ما السبوت اللي انتم مريحتوش فيها الأرض نريحها، عشان الأرض تشم نفسها من الدنس والخطية والنجاسة اللي انتم عملتوها في الأرض، عشان كده إداهم 70 سنة، ده حسب ما كتب في سفر أخبار الأيام التاني 36.
بصوا الحتة دي: كأن ربنا إداهم عطية غير مشروطة، لكن استمرار العطية مشروط. إداهم يدخلوا ارض الموعد، عطية غير مشروط، مش عشان بر فيهم. وعشان يستمروا في الأرض لازم شروط زي: لا تغيظ الرب إلهك بأعمال يديك، وتعمل أصنام والكلام ده. فإداهم عطية بطريقة غير مشروطة، إنما استمرار العطية مشروط. ساعات ربنا بيدي عطية بالشكل ده، مثلاً "واحد ذكي" دي عطية غير مشروطة، هو أنا ليا نصيب إن واحد يبقى ذكي؟ لا، إنما استمرار إن العطية الواحد ميبقاش متكبر، وممكن ربنا ياخدها بأي شكل يعني. "واحدة جميلة" هو يعني انتي عملتي إيه عشان تبقي جميلة؟ استمرار العطية برضه إن الواحد يحافظ على ما أعطاه ربنا، وهكذا. في بعض العطايا ممكن ربنا يديها من فيض إحسانات وخيراته، لكن استمرار العطية محتاج إن الواحد يسير في طرق الرب المستقيمة يعني.
13وَأَجْلِبُ عَلَى تِلْكَ الأَرْضِ كُلَّ كَلاَمِي الَّذِي تَكَلَّمْتُ بِهِ عَلَيْهَا، كُلَّ مَا كُتِبَ فِي هذَا السِّفْرِ الَّذِي تَنَبَّأَ بِهِ إِرْمِيَا عَلَى كُلِّ الشُّعُوبِ. ربنا بياكد: أنه هيتمم نبوات إرميا المذكورة في سفره على شعب الله وعلى البابليين.
" في هذا السفر" ... إرميا كتب النبوة دي بتاعته، (ويقال إن إصحاح 25 ده: هو المكمل لإصحاح 20 علطول) أخدوا اللي إرميا كتبه ، و راحوا ادوه ليهوياقيم الملك (في إصحاح 36،) ولما يهوياقيم سمع الكلام بتاع إرميا ونبوخذنصر هييجي وهيهلك وهيعمل، قال: هاتوا كلام إرميا وقطعه وحرقه. فيقولك: "وَأَوْصَى إِرْمِيَا بَارُوخَ قَائِلاً: «أَنَا مَحْبُوسٌ لاَ أَقْدِرُ أَنْ أَدْخُلَ بَيْتَ الرَّبِّ. فَادْخُلْ أَنْتَ وَاقْرَأْ فِي الدَّرْجِ الَّذِي كَتَبْتَ عَنْ فَمِي كُلَّ كَلاَمِ الرَّبِّ فِي آذَانِ الشَّعْبِ،" (إر 36: 5-6).
وراح فعلاً باروخ عمل كده، فراح يهوياقيم ده واخد الدرج وقطعه وراح حرقه في النار.
"فَأَخَذَ إِرْمِيَا دَرْجًا آخَرَ وَدَفَعَهُ لِبَارُوخَ بْنِ نِيرِيَّا الْكَاتِبِ، فَكَتَبَ فِيهِ عَنْ فَمِ إِرْمِيَا كُلَّ كَلاَمِ السِّفْرِ الَّذِي أَحْرَقَهُ يَهُويَاقِيمُ مَلِكُ يَهُوذَا بِالنَّارِ، وَزِيدَ عَلَيْهِ أَيْضًا كَلاَمٌ كَثِيرٌ مِثْلُهُ." (إر 36: 32).
14لأَنَّهُ قَدِ اسْتَعْبَدَهُمْ أَيْضًا أُمَمٌ كَثِيرَةٌ وَمُلُوكٌ عِظَامٌ، فَأُجَازِيهِمْ حَسَبَ أَعْمَالِهِمْ وَحَسَبَ عَمَلِ أَيَادِيهِمْ». إحنا بنقولها دي، ويعطي كل واحد حسب أعماله، وكل واحد يأخذ أجرته بحسب تعبه.
ويقرر أن الملوك الذين أستعبدوا شعبه وأساءوا إليه، وحسب شرهم هيجازيهم على خطاياهم، فستنقلب بابل وبعدها مادى وفارس ثم الأغريق أي اليونان.
دلوقتي من أول آية 15 بيتكلم عن نبوات ضد الأمم، جمع كل الأمم اللي مذكورين في الإصحاحات من 46-51، والإصحاحات دي فيها نبوات بالتفصيل عن الأمم.
15لأَنَّهُ هكَذَا قَالَ لِيَ الرَّبُّ إِلهُ إِسْرَائِيلَ: «خُذْ كَأْسَ خَمْرِ هذَا السَّخَطِ مِنْ يَدِي، وَاسْقِ جَمِيعَ الشُّعُوبِ الَّذِينَ أُرْسِلُكَ أَنَا إِلَيْهِمْ إِيَّاهَا. هيتكلم هنا عن كأس، ربنا بيقول لإرميا خد يا إرميا الكأس دي وأسقيها لكل الأمم اللي أنا هقولك عليهم، الكأس دي بيسميها " كَأْسَ خَمْرِ هذَا السَّخَطِ مِنْ يَدِي" ... يعني كأس التأديب الإلهي، كأس الغضب أو كأس المصير.
في سفر العدد إصحاح 5: حاجة اسمها كدة ماء اللعنة، لو واحد شك في زوجته إنها خانته فيروح يجيبها عند البيت، خيمة الاجتماع، وييجي للكاهن ويقوله: أنا شاكك إن في حاجه غلط حصلت. فالكاهن يروح يجيب كأس فيها مياه وبعد كده يحط عليها شوية من تراب المسكن، والست تمسك التقدمة كده كأنها في إيديها، ويقولها – بما معناه يعني - إن أنت هتقولي دلوقتي انتي عملتي كده ولا معملتيش، إذا معملتيش تبقي تُكرَّمي وربنا يباركك ويرزقك نسل وأول طفل ييجي يبقى ذكر، حاجة كده. لكن إذا عملتي وأنت بتكدبي هتبان عليكي علامات علطول إن انتي كدابة وتبقي لعنة في إسرائيل. الحكاية دي كان اسمها كأس اللعنة. وكانوا بيعملوها عشان لو واحد شاكك.
"لأَنَّهُ هكَذَا قَالَ لِيَ الرَّبُّ إِلهُ إِسْرَائِيلَ: «خُذْ كَأْسَ خَمْرِ هذَا السَّخَطِ مِنْ يَدِي، وَاسْقِ جَمِيعَ الشُّعُوبِ الَّذِينَ أُرْسِلُكَ أَنَا إِلَيْهِمْ إِيَّاهَا." ...
دي بتنقلنا لأول دعوة إرميا للخدمة لما قاله: جعلتك نبيًا للشعوب. إرميا مش بس على شعب بني إسرائيل، ده تنبأ عن كل الشعوب اللي حوالين شعب بني إسرائيل في المنطقة.
16فَيَشْرَبُوا وَيَتَرَنَّحُوا وَيَتَجَنَّنُوا مِنْ أَجْلِ السَّيْفِ الَّذِي أُرْسِلُهُ أَنَا بَيْنَهُمْ». آثار غضب ربنا على الأمم أن "يترنحوا" ... يعني: يفقدوا اتزانهم.
"ويتجننوا" ... يعني: يفقدوا عقولهم، من أجل كثرة القتلى بينهم، فهذا يعلن أن غضب الله سيكون شديدًا لكثرة خطاياهم.
ربنا بيقول: انهم هيشربوا وتبقى حالتهم بؤس "يترنحوا (يسكروا) وَيَتَجَنَّنُوا مِنْ أَجْلِ السَّيْفِ الَّذِي أُرْسِلُهُ أَنَا بَيْنَهُمْ،" ... تعرفوا لما يبقى ضربات ورا بعض، وعقوبات شديدة جدًا، الواحد بيحس إنه هيتجنن.
17فَأَخَذْتُ الْكَأْسَ مِنْ يَدِ الرَّبِّ وَسَقَيْتُ كُلَّ الشُّعُوبِ الَّذِينَ أَرْسَلَنِي الرَّبُّ إِلَيْهِمْ. إرميا خد الكاس من إيد ربنا وتنبأ عن الشعوب اللي حوالين بني إسرائيل، (شفناهم شعوب كتيرة من إصحاحات 46-51، وهيقولهم لنا هنا دلوقتي، نعدي عليهم بسرعة.). ووصلت نبوة ارميا لكل الشعوب ديه اللي هتتعاقب.18أُورُشَلِيمَ وَمُدُنَ يَهُوذَا وَمُلُوكَهَا وَرُؤَسَاءَهَا، لِجَعْلِهَا خَرَابًا وَدَهَشًا وَصَفِيرًا وَلَعْنَةً كَهذَا الْيَوْمِ. ابتدى التأديب بشعبه، عشان يقولهم إذا كان شعبي وحبايبي وولادي لم يسلموا من التأديب، فانتم أيها الأمم متتخيلوش أن انتم كمان هتفلتوا من التأديب. على رأي القديس بطرس في رسالته يقولك: لأَنَّهُ الْوَقْتُ لابْتِدَاءِ الْقَضَاءِ مِنْ بَيْتِ اللهِ. (1 بط 4: 17). يعني الناس القريبين يؤدبوا في الأول، لإنهم اللي ذاقوا ونظروا ما أطيب الرب، وهم اللي اختبروا أمور ربنا الجميلة دي فيُطالبوا بالأكثر. فابتدى بأورشليم.
بعد أورشليم يخش على مصر لأن مصر كانت العكاز اللي أورشليم عايزة تتعكز عليه، وعلشان كده راح ربنا ضرب مصر ضربات كثيرة، وقال لشعبه مصر مش هتقوم لها قومة.
19وَفِرْعَوْنَ مَلِكَ مِصْرَ وَعَبِيدَهُ وَرُؤَسَاءَهُ وَكُلَّ شَعْبِهِ. أدي مصر وفرعونها:اللي كنتوا معتمدين عليهم هيتضربوا ويتعاقبوا. 20وَكُلَّ اللَّفِيفِ، وَكُلَّ مُلُوكِ أَرْضِ عُوصَ، وَكُلَّ مُلُوكِ أَرْضِ فِلِسْطِينَ وَأَشْقَلُونَ وَغَزَّةَ وَعَقْرُونَ وَبَقِيَّةَ أَشْدُودَ، "وَكُلَّ اللَّفِيفِ،" ... هم الذين انضموا إلى بني إسرائيل من المصريين وعاشوا معهم..
"وَكُلَّ مُلُوكِ أَرْضِ عُوصَ." ... عوص دي اللي موجودة في جنوب أدوم جنوب البحر الميت كده، واللي كان ساكن فيها ايوب.
"وَكُلَّ مُلُوكِ أَرْضِ فِلِسْطِينَ وَأَشْقَلُونَ وَغَزَّةَ وَعَقْرُونَ وَبَقِيَّةَ أَشْدُودَ." ... يعني ذكر هنا المدن الخمسة الكبرى بتوع فلسطين، مذكرش منهم جت، لإنه يقال إن جت كانت سقطت.
كل دول هيجي عليهم العقاب.
21وَأَدُومَ وَمُوآبَ وَبَنِي عَمُّونَ، دي الممالك اللي موجودة شرق إسرائيل. "أدوم " ...ده نسل عيسو، "موآب وبني عمون" ... دول نسل لوط من ابنتيه بالطريقة الصعبة اللي بنات لوط غلطوا بيها مع أبوهم. 22وَكُلَّ مُلُوكِ صُورَ، وَكُلَّ مُلُوكِ صِيدُونَ، وَمُلُوكِ الْجَزَائِرِ الَّتِي فِي عَبْرِ الْبَحْرِ، صوروصيدا في نبوات كتير عنهم في سفرحزقيال. "والجزائر" ... التي في عبرالبحر زي كريت وقبرص وما شابه. 23وَدَدَانَ وَتَيْمَاءَ وَبُوزَ، وَكُلَّ مَقْصُوصِي الشَّعْرِ مُسْتَدِيرًا، "دَدَانَ وَتَيْمَاءَ وَبُوزَ." ... دول قبائل عربية.
" وَكُلَّ مَقْصُوصِي الشَّعْرِ مُسْتَدِيرًا." ... كان زمان من عادات الشعوب الوثنية يحلقوا حلاقة كده معينة، يروحوا حالقين كل راسهم ويسيبوا بس حتة مستديرة فوق، كان علامة من علامات عبادات الأوثان، كانوا بيعملوها كده زمان، ودي كانوا يسموها مقصوصي الشعر مستديرًا. طبعا دلوقتي دي حاجة مشهورة أوي، لكن زمان كان ربنا قالهم متعملوش دي عشان دي علامة من علامات عبادة الأوثان. برضه مش هيفلتوا من التأديب والعقاب.
24وَكُلَّ مُلُوكِ الْعَرَبِ، وَكُلَّ مُلُوكِ اللَّفِيفِ السَّاكِنِينَ فِي الْبَرِّيَّةِ، برضه قبائل عربية25وَكُلَّ مُلُوكِ زِمْرِي، وَكُلَّ مُلُوكِ عِيلاَمَ، وَكُلَّ مُلُوكِ مَادِي، بلاد برضه هيقع عليها العقاب.26وَكُلَّ مُلُوكِ الشِّمَالِ الْقَرِيبِينَ وَالْبَعِيدِينَ، كُلَّ وَاحِدٍ مَعَ أَخِيهِ، وَكُلَّ مَمَالِكِ الأَرْضِ الَّتِي عَلَى وَجْهِ الأَرْضِ. وَمَلِكُ شِيشَكَ يَشْرَبُ بَعْدَهُمْ. للرب الأرض وملؤها، يعني مفيش أمة من دول ولا شعب من ده بره الكنترول يعني، بره عين ربنا، لا، ربنا شايف الكل وعارف الكل وابتدئ بتأديب شعبه وهيأدب بقية الشعوب عن طريق "شيشك،" ... اللي هي بابل. بابل تسقيهم كلهم من الكأس، وفي الآخر بابل تشرب من نفس الكأس. ده معناه: أن بابل اللي كانت أداة تأديب للشعوب دي، مش هتتبرر تقول ما هو أنت كنت عايزني أأدبهم! لا، هم أخطأ وبيتأدبوا وبابل ظلمت وأخطأت وتجبرت فهتتأدب.
كل واحد مسؤول عن أعماله، محدش يقول أصل أنا طلعت في بيت كان شكله كده وصفته كده وهم اللي طلعوني بالشكل ده وهم أجرموا في حقي وهم عملوا فيا وسووا. كل واحد مسؤول عن أعماله، هم هيتسألوا عن أعمالهم، وأنت هتساءل عن أعمالك. مش تقول أصل أنا ضحية وأنا مجني عليه وهم اللي تسببوا إن أنا أطلع بالشكل ده. لا، أنت مسؤول.
27وَتَقُولُ لَهُمْ: «هكَذَا قَالَ رَبُّ الْجُنُودِ إِلهُ إِسْرَائِيلَ: اشْرَبُوا وَاسْكَرُوا وَتَقَيَّأُوا وَاسْقُطُوا وَلاَ تَقُومُوا مِنْ أَجْلِ السَّيْفِ الَّذِي أُرْسِلُهُ أَنَا بَيْنَكُمْ. اذا هنا ربنا بيعلن:غضبه على شعوب الأرض لأجل خطاياهم، فيقول لهم على فم إرميا: إشربوا كأس الخمر أي شهواتكم الشريرة وعبادة الأوثان، حتى تفقدوا اتزانكم كالسكارى، وتتقيأوا أي تصيروا في حالة حقيرة مزرية، وتصبحوا في فراغ بعد إخراج ما في داخلكم أي تصيرون في ضعف، ثم تصمتون من أجل خزيكم ورعبكم أمام القتلى الكثيرين منكم. 28وَيَكُونُ إِذَا أَبَوْا أَنْ يَأْخُذُوا الْكَأْسَ مِنْ يَدِكَ لِيَشْرَبُوا، أَنَّكَ تَقُولُ لَهُمْ: هكَذَا قَالَ رَبُّ الْجُنُودِ: تَشْرَبُونَ شُرْبًا. ما هو إرميا قعد يقول في أورشليم ويعيد ويزيد سنين هذا عددها، مدة خدمة إرميا كانت قربت من 40 سنة، محدش عايز يسمع، وكدبوه، وقالوا له: أنت كذاب، أنت عميل، أنت مش بتحبنا ومش بتحب شعبك، وأنت ميال لبابل. مرضيوش يسمعوا ففي الآخر شربوا شُربًا يعني. 29لأَنِّي هأَنَذَا أَبْتَدِئُ أُسِيءُ إِلَى الْمَدِينَةِ الَّتِي دُعِيَ اسْمِي عَلَيْهَا، فَهَلْ تَتَبَرَّأُونَ أَنْتُمْ؟ لاَ تَتَبَرَّأُونَ، لأَنِّي أَنَا أَدْعُو السَّيْفَ عَلَى كُلِّ سُكَّانِ الأَرْضِ، يَقُولُ رَبُّ الْجُنُودِ. ربنا بيقولهم ده أنا هأدب ولادي وشعبي، "المدينة التي دُعي اسمي عليها." تبقى انتم الأمم الغريبة تتبرأون؟ لا تتبرأون ربنا بيقولهم كده.
حتة النبوات عن الأمم: معناها أن العالم كله في قبضة ربنا، ربنا هو الضابط الكل فمنخفش، ولا موظف ولا مسئول ولا جهة ولا وزارة ولا أي حاجة في الدنيا خارجة عن نطاق عمل ربنا،: "فَوْقَ الْعَالِي عَالِيًا يُلاَحِظُ، وَالأَعْلَى فَوْقَهُمَا." (جا 5: 8). يعني ورقك في إيد موظف، عندك انترفيو مع حد، ولا يهمك، لا يقف إنسان في وجهك، ليه؟ لأن ربنا هو اللي مسؤول.
30وَأَنْتَ فَتَنَبَّأْ عَلَيْهِمْ بِكُلِّ هذَا الْكَلاَمِ، وَقُلْ لَهُمْ: الرَّبُّ مِنَ الْعَلاَءِ يُزَمْجِرُ، وَمِنْ مَسْكَنِ قُدْسِهِ يُطْلِقُ صَوْتَهُ، يَزْأَرُ زَئِيرًا عَلَى مَسْكَنِهِ، بِهُتَافٍ كَالدَّائِسِينَ يَصْرُخُ ضِدَّ كُلِّ سُكَّانِ الأَرْضِ. "بهتاف كالدائسين ... صوت الدائسين العنب بعد جمعه في المعاصر يكون قويًا.
كأن هنا في تشبيهين لربنا، مرة شبهه كأسد يزأر، ومرة تاني كالدائسين المعصرة، لما بيدوسوا المعصرة ويطلعوا العنب ويدوسوا عشان يعملوا الخمر بتبقى حاجة كده بيعملوها بقوة وبيعملوها بهتاف، حاجة كده فيها قوة يعني. فكأن إرميا بيقول ربنا خلاص أخد القرار وسيجازي كل واحد حسب عمله، إله مجازاة ويكافئ مكافأة. يعني: ربنا بيعلن غضبه على كل شعوب العالم فيعاقبهم كلهم ليؤمنوا به ويرجعوا إليه.
31بَلَغَ الضَّجِيجُ إِلَى أَطْرَافِ الأَرْضِ، لأَنَّ لِلرَّبِّ خُصُومَةً مَعَ الشُّعُوبِ. هُوَ يُحَاكِمُ كُلَّ ذِي جَسَدٍ. يَدْفَعُ الأَشْرَارَ لِلسَّيْفِ، يَقُولُ الرَّبُّ. يعني مش هنقدر وإحنا بندرس الكتاب المقدس ننفي عن ربنا صفة إنه يجازي وإنه ممكن يعاقب، شوفوا اتذكرت كام مرة؟ ويقولك: "لأَنَّ لِلرَّبِّ خُصُومَةً مَعَ الشُّعُوبِ. هُوَ يُحَاكِمُ كُلَّ ذِي جَسَدٍ. ولما يُحاكِم ويجازى الأشرار لازم يؤدبوا، يَدْفَعُ الأَشْرَارَ لِلسَّيْفِ، يَقُولُ الرَّبُّ."32هكَذَا قَالَ رَبُّ الْجُنُودِ: هُوَذَا الشَّرُّ يَخْرُجُ مِنْ أُمَّةٍ إِلَى أُمَّةٍ، وَيَنْهَضُ نَوْءٌ عَظِيمٌ مِنْ أَطْرَافِ الأَرْضِ. يعني مملكة ورا مملكة ومدينة ورا مدينة هتسقط، وده اللي شوفناه في زحف بابل، يخلصوا على المملكة فيخشوا في اللي بعديها واللي بعديها، بعد ما خلصوا على أورشليم، وكانت أدوم شمتانة في أورشليم وكانوا الأدوميين واقفين على الطرق وأي يهودي يهرب يمسكوه ويقدموه لبابل، حاجة كانت صعبة أوي! في المزمور:" اُذْكُرْ يَا رَبُّ لِبَنِي أَدُومَ يَوْمَ أُورُشَلِيمَ، الْقَائِلِينَ: «هُدُّوا، هُدُّوا حَتَّى إِلَى أَسَاسِهَا»." (مز 137: 7). لف الكأس وبعد ما أورشليم شربت أدوم نفسها شربت هي كمان، ودُمِّرت أدوم وبقت كلها أطلال. 33وَتَكُونُ قَتْلَى الرَّبِّ فِي ذلِكَ الْيَوْمِ مِنْ أَقْصَاءِ الأَرْضِ إِلَى أَقْصَاءِ الأَرْضِ. لاَ يُنْدَبُونَ وَلاَ يُضَمُّونَ وَلاَ يُدْفَنُونَ. يَكُونُونَ دِمْنَةً عَلَى وَجْهِ الأَرْضِ». "دمنة " ... فضلات الإنسان.
"يندبون " ... يرثيهم الناس بعبارات الرثاء المعروفة.
"يضمون " ...تُجمع جثثهم الملقاة في الشوارع.
فربنا بيقولهم مش هتلاقوا وقت تندبوا ولا تلطموا على اللي ماتوا، مش هيلاقوا حد يدفنهم. يَكُونُونَ دِمْنَةً، دمنة زي روث الحيوانات كده، جثث مرمية على وجه الأرض مش لاقية حد يدفنها.
الجزء الأخير من أول آية 34 ده كلام عام لكل المسؤولين، للملوك والرؤساء والوزراء وكل الناس المسؤولين عن الشعوب بتوعهم دول
في بعض الناس بياخدوهم على مسؤولين إسرائيل بس، لا، تنفع على كله، المسؤولين بتوع بابل وفلسطين وأورشليم وكل الممالك المذكورة دي.
34وَلْوِلُوا أَيُّهَا الرُّعَاةُ وَاصْرُخُوا، وَتَمَرَّغُوا يَا رُؤَسَاءَ الْغَنَمِ، لأَنَّ أَيَّامَكُمْ قَدْ كَمَلَتْ لِلذَّبْحِ. وَأُبَدِّدُكُمْ فَتَسْقُطُونَ كَإِنَاءٍ شَهِيٍّ. "رؤساء الغنم،" ... هم مسؤولين عن شعوبهم اللي عاملة زي الأغنام، بس أغنام لا راعي لها، المسؤولين بتوعهم طلعوا هم اللي بياكلوهم وهم السبب في كل البلاوي اللي حصلت ليهم دي. السبب الرئيسي لأن الشعوب برضه كانت غلطانة. "لأَنَّ أَيَّامَكُمْ قَدْ كَمَلَتْ لِلذَّبْحِ" ... جه الوقت بتاعهم بقى إن هم نفسهم اللي كانوا فاكرين إن حتى لو سقطت المدينة، إحنا عاملين زي سراديب أو مهارب كده نقدر ننفد بجلدنا. فربنا بيقولهم مش هتفلتوا. المثال ده علي : آخر ملك من ملوك أورشليم، صدقيا، فضل إرميا يقوله: استسلم، استسلم، استسلم. ومرضيش. في الآخر حاول صدقيا يهرب وفاكر إنهم مش هيشوفوه، و راحوا جابوه. وانتم طبعًا عارفين نهاية صدقيا ازاي، دبحوا ولاده وفقعوا عينيه بعد ما دبحوهم، وجروه بالسلاسل لبابل. "وَأُبَدِّدُكُمْ فَتَسْقُطُونَ كَإِنَاءٍ شَهِيٍّ." ... إناء شهي كأنه إناء خزف جميل جدًا، أول ما تسيبه في الأرض يتكسر ومتعرفش تلمه تاني. يعني ربنا بينذرهم بأن عقابهم جه، وهيتكسروا زي الإناء الفاخر وهيتحطموا.35وَيَبِيدُ الْمَنَاصُ عَنِ الرُّعَاةِ، وَالنَّجَاةُ عَنْ رُؤَسَاءِ الْغَنَمِ. "يبيد المناص" ... يعني مفيش مهرب عن الرعاة، ومفيش نجاة للرؤساء دول.
"المناص " ... الحل والإنقاذ.
وإن حاول هؤلاء الرعاة أن يهربوا من الهجوم البابلي فلن يجدوا فرصة إذ سيدركهم ويقتلهم أو يقبض عليهم ويذلهم ويستعبدهم.
36صَوْتُ صُرَاخِ الرُّعَاةِ، وَوَلْوَلَةِ رُؤَسَاءِ الْغَنَمِ. لأَنَّ الرَّبَّ قَدْ أَهْلَكَ مَرْعَاهُمْ. أهم جالهم الوقت إن الرعاة نفسهم يصوتوا ويقولوا الحقونا، كانت شعوبهم بتصوت وهم مبيسمعوش، فبقوا يصوتوا ومحدش هيسمعهم. مرحموش الفقراء فجه الوقت إن محدش هيرحمهم.37وَبَادَتْ مَرَاعِي السَّلاَمِ مِنْ أَجْلِ حُمُوِّ غَضَبِ الرَّبِّ. "مراعى السلام " ... المراعى الخضراء التي ترعى فيها الأغنام بهدوء وطمأنينة.
كان في زمان مراعي حلوة وسلام وخير وحاجات كده جميلة. دلوقتي كله راح، مفيش.
38تَرَكَ كَشِبْل عِيصَهُ، لأَنَّ أَرْضَهُمْ صَارَتْ خَرَابًا مِنْ أَجْلِ الظَّالِمِ وَمِنْ أَجْلِ حُمُوِّ غَضَبِهِ. "عيصة " ... بيته او عرينه.
يشبه بابل بشبل الأسد: الذي خرج من بيته ليفترس ويحطم أمم العالم، ويصفه بالظالم: لأنه ينهب غنائم كل البلاد ويخربها.
كل ظالم وليه ظالم. يعني كل مملكة من دول جالها مملكة تاني تهدها، بعد ما بابل خلصت على كل دول جت. مادي وفارس خلصت على بابل.
⪢