⪡ 1أَرَانِي الرَّبُّ وَإِذَا سَلَّتَا تِينٍ مَوْضُوعَتَانِ أَمَامَ هَيْكَلِ الرَّبِّ بَعْدَ مَا سَبَى نَبُوخَذْرَاصَّرُ مَلِكُ بَابِلَ يَكُنْيَا بْنَ يَهُويَاقِيمَ مَلِكَ يَهُوذَا وَرُؤَسَاءَ يَهُوذَا وَالنَّجَّارِينَ وَالْحَدَّادِينَ مِنْ أُورُشَلِيمَ، وَأَتَى بِهِمْ إِلَى بَابِلَ. إرميا 24 عبارة عن رؤيا ربنا وراها لإرميا، قاله: أنت شايف إيه؟ فقاله: يا رب أنا شايف كذا كذا. فقاله: طب هقولك معنى اللي أنت شوفته إيه يا إرميا.
بعد ما نبوخذنصر سبى ناس كتير من أورشليم سنة 597 قبل الميلاد. وكان على رأسهم الملك يكُنيا أو كنياهو أو يهوياكين الملك الـ 19، الـ قبل الاخير، في سلسلة ملوك يهوذا، الملك ده استسلم ونبوخذنصر خده عنده هناك في بابل. وخد معاه في السبي ده حوالي 10,000من خيرة الناس، من المهرة والصناع عشان يقوي بيها مملكة بابل ويضعف مملكة يهوذا أكتر وأكتر. تخيلوا لما كل الصناع والمهرة والناس اللي زي كده يتاخدوا، البلد هيبقى مفهاش حد غير الناس اللي على قد حالها. وهناك هو يستخدمهم ويستغلهم.
المهم، بعد ما خد الترحيل ده حصل حاجه غريبة أوي، الناس اللي فضلوا في أورشليم طلعوا كلام معناه: إن ربنا بيحبنا إحنا أكتر من اللي اتاخدوا في السبي، إحنا اللي لسه قاعدين في أورشليم وجنب الهيكل وكل حاجة بتاعتنا موجودة، لكن اللي اتاخدوا دول ربنا غضبان عليهم وربنا زعلان منهم. الكلام ده بالظبط قالوه في حزقيال 11.
2فِي السَّلَّةِ الْوَاحِدَةِ تِينٌ جَيِّدٌ جِدًّا مِثْلُ التِّينِ الْبَاكُورِيِّ، وَفِي السَّلَّةِ الأُخْرَى تِينٌ رَدِيءٌ جِدًّا لاَ يُؤْكَلُ مِنْ رَدَاءَتِهِ. إرميا شاف سلتين محطوطين قدام الهيكل. وفي سلة منهم تين جيد أوي، السلة التانية تين رديء جداً. التين الاولاني بيسميه التين الباكوري، اللي هو جيد جداً. والتين التاني ده تين رديء جدا.
التين تلات أنواع. إما تين باكوري جيد جداً، أو تين صيفي يعني حاجة كده معقولة يعني ممكن تتاكل، أو الشتوي ده ميتاكلش خالص. فبيقوله: يا رب أنا شايف سلتين، وحدة فيهم فيها تين جيد جداً، تين باكوري. وفي الثانية تين اللي هو بتاع الشتاء ده، لا يؤكل من رداءته، رديء جداً.
الملحوظة الاولانية، إن السلتين محطوطتين قدام ربنا، كلنا قدام ربنا بس الواحد فينا تبع التين الباكوري ولا التين الرديء جداً؟ هو ده السؤال، اسأل نفسك كده: أنت قدام ربنا، قدام عينين ربنا في كل وقت. وأنت قدام عينين ربنا كدة تبقى تين باكوري حلو، طعم وشكل ورائحة وكل حاجة؟ ولا أنت تين ردئ جداً؟ لازم الواحد يفكر في دي، ومفيش حد مخفي من أمام عينين ربنا، كلنا قدام عينين ربنا الفاحص الاعماق
اشمعنا التين؟ التين يرمز إلى الجماعة. في العهد الجديد نقول إنه يرمز إلى جماعة الكنيسة عمومًا. لان التين عبارة عن غلاف وجواه بذور كتيرة جداً، ومادة كده بتجمع تلك البذور مع بعض، لو خدت بذرة واحدة بس تلاقي ملهاش طعم، حاجة واحدة بس كده ملهاش طعم. لكن لما تاخد قطمة كده مع بعض، كذا بذرة بقى كده، تحس التين ليه طعم وحاجة حلوة كده. عامل زي كنيسة، الآباء شبهوه بالكنيسة، الغلاف اللي بره ده وحدانية الكنيسة كلنا مع بعض، كلنا أعضاء في نفس الجسد، جسد المسيح. واللي يجمعنا، المادة اللي تجمع كل البزور دي مع بعض، روح الله القدوس اللي بيجمعنا كلنا.
3فَقَالَ لِي الرَّبُّ: «مَاذَا أَنْتَ رَاءٍ يَا إِرْمِيَا؟» فَقُلْتُ: «تِينًا. اَلتِّينُ الْجَيِّدُ جَيِّدٌ جِدًّا، وَالتِّينُ الرَّدِيءُ رَدِيءٌ جِدًّا لاَ يُؤْكَلُ مِنْ رَدَاءَتِهِ». أحكم على نفسك قبل أن يُحكم عليك، من أي سلة سوف تكون؟ ومعندناش حل وسط، إما تين جيد جداً، أو تين رديء جدًا. ونقوله: يا رب، أعطني أن أكون من التين الجيد جداً، اللي حلو قدامك وحلو برضه قدام الناس. "مُعْتَنِينَ بِأُمُورٍ حَسَنَةٍ، لَيْسَ قُدَّامَ الرَّبِّ فَقَطْ، بَلْ قُدَّامَ النَّاسِ أَيْضًا." (2 كو 8: 21). لما يشوفونا يمجدوا أبانا الذي في السماوات. (مت 5: 16).4ثُمَّ صَارَ كَلاَمُ الرَّبِّ إِلَيَّ قَائِلاً: 5«هكَذَا قَالَ الرَّبُّ إِلهُ إِسْرَائِيلَ: كَهذَا التِّينِ الْجَيِّدِ هكَذَا أَنْظُرُ إِلَى سَبْيِ يَهُوذَا الَّذِي أَرْسَلْتُهُ مِنْ هذَا الْمَوْضِعِ إِلَى أَرْضِ الْكَلْدَانِيِّينَ لِلْخَيْرِ. قولهم يا إرميا إن اللي بيقولوه غلط، أنا في نظري اللي راحوا السبي في بابل دول مثل التين الجيد. أنا أنظر ليهم للخير، أن دول أفكاري تجاههم للخير، دول اللي اتاخدوا في السبي واتبهدلوا وراح وسابوا أرضهم والهيكل وكل ده، دول أنا في الآخر هعمل معاهم خير. لكن اللي قاعدين مستريحين اللي فاكرين إن إحنا كده عشان ربنا سايبنا فإحنا كويسين، وإحنا أكيد أحسن من التانيين. قولهم: لا، أنتم أساساً العقاب بتاعكم جاي. 6وَأَجْعَلُ عَيْنَيَّ عَلَيْهِمْ لِلْخَيْرِ، وَأُرْجِعُهُمْ إِلَى هذِهِ الأَرْضِ، وَأَبْنِيهِمْ وَلاَ أَهْدِمُهُمْ، وَأَغْرِسُهُمْ وَلاَ أَقْلَعُهُمْ. وأبونا بيصلي على مياه المعمودية، في الصلاة العميقة جدًا اللي بيقولها من أجل المُعمدين، تلاقيه كده بكل خشوع يرفع قلبه وإيديه ويقوله: إبنيهم ولا تهدمهم، إغرسهم لا تقلعهم بعد. كل واحد فينا دخل جرن المعمودية كانت الصلاة دي اتقالت علشانه. أبونا بيصلي صلاة من أجل كل واحد هيخش جرن المعمودية، يقوله: يا رب، إبنيهم ولا تهدمهم، إغرسهم لا تقلعهم بعد. تعالوا كل واحد فينا يصلي الصلاة دي من أجل نفسه ومن أجل بيته ومن أجل أولاده، نقوله: يا رب، إبنيهم ولا تهدمهم، متسمحش إنهم يتهدموا. إغرسهم لا تقلعهم بعد، متسمحش يا رب إن هم يبعدوا عنك، وإن هم يفسدوا، وإن العالم ياكلهم وياخدهم. إبنيهم ولا تهدمهم. دي طلبة مستجابة قدام ربنا، شهوة حلوة، ربنا يسمع فوراً. 7وَأُعْطِيهِمْ قَلْبًا لِيَعْرِفُونِي أَنِّي أَنَا الرَّبُّ، فَيَكُونُوا لِي شَعْبًا وَأَنَا أَكُونُ لَهُمْ إِلهًا، لأَنَّهُمْ يَرْجِعُونَ إِلَيَّ بِكُلِّ قَلْبِهِمْ. ربنا بيوعد اللي أطاعوه وأتوا إلى السبي بأنه يباركهم لأجل قبولهم التأديب، وأنه هيكافئهم بالرجوع إلى أورشليم ويثبتهم هناك، ويبنى لهم الهيكل ويبنيهم في حياة روحية قوية لأنه الله القادر على كل شئ.
"فَيَكُونُوا لِي شَعْبًا وَأَنَا أَكُونُ لَهُمْ إِلهًا، لانَّهُمْ يَرْجِعُونَ إِلَيَّ بِكُلِّ قَلْبِهِمْ. " ... ديه الناس اللي في السبي، وعلى فكرة في السبي كان فيهم ناس حلوة أوي زي دانيال وحزقيال والثلاث فتية. كان فيهم ناس حلوين جدا يعني. فالحقيقة برضه ربنا بينظر إلى استعداد القلب، فالناس اللي راحت للسبي دي - آه ممكن تكون في نبوات كتيرة جت عليهم - لكن في الآخر ربنا سيفتقد بمراحم والناس ترجع وتتوب.
8«وَكَالتِّينِ الرَّدِئِ الَّذِي لاَ يُؤْكَلُ مِنْ رَدَاءَتِهِ، هكَذَا قَالَ الرَّبُّ، هكَذَا أَجْعَلُ صِدْقِيَّا مَلِكَ يَهُوذَا وَرُؤَسَاءَهُ وَبَقِيَّةَ أُورُشَلِيمَ الْبَاقِيَةَ فِي هذِهِ الأَرْضِ وَالسَّاكِنَةَ فِي أَرْضِ مِصْرَ. الحقيقة في أسفار الأنبياء تحتل مصر جزء مهم. لانها كانت تمثل لاسرائيل العكاز اللي بيتسندوا عليه، عايزين حماية؟ أول حد يفكروا فيه أعظم الممالك، مصر، يروحوا يحتموا في مصر. فراح ربنا قالهم: طيب، أنتوا واللي هتحتموا فيهم كمان. أنا مش هكسركم أنتم بس، لكن هكسر كمان فرعون وجنوده، عشان متقولوش بعد كده نحتمي في حد تاني. يبقى العكاز بتاعكم والاحتماء والصخرة والسند بتاعكم هو يهوه وبس. عشان كده تلاقوا كتير في أسفار الأنبياء في نبوات على مصر، علشان فرعون ده كان مُتأله. ربنا بيقوله: لا، بتقول أنت اللي صنعت النيل؟ طب أنا هعرفك مدى ضعفك يعني.
"هكَذَا أَجْعَلُ صِدْقِيَّا مَلِكَ يَهُوذَا." ... ده الملك الاخير رقم 20، اللي فضل في أورشليم ومرضيش يستسلم، وفي الآخر قتلوا ولاده قدام عينيه وفقعوا عينيه وخدوه للسبي في بابل. مش كان سمع الكلام من الأول، ربنا قالهم على لسان إرميا: استسلموا، عشان المدينة لا تهلك. هم مسمعوش! يهوياكين استسلم فراح إلى بابل وأكرموه هناك على فكرة وعاملوه كويس. لكن صدقيا بقى والباقيين معاه ركبوا دماغهم ومكنوش فاكرين الاهوال بتاعة العقوبة هتبقى بالشكل ده! لكن كل اللي تنبأ عليه إرميا حصل.
9وَأُسَلِّمُهُمْ لِلْقَلَقِ وَالشَّرِّ فِي جَمِيعِ مَمَالِكِ الأَرْضِ عَارًا وَمَثَلاً وَهُزْأَةً وَلَعْنَةً فِي جَمِيعِ الْمَوَاضِعِ الَّتِي أَطْرُدُهُمْ إِلَيْهَا. لان هما بعد سبي نبوخذنصرليهم، قالوا: كلام إرميا ده كلام فاضي، فين الاهوال اللي قعد يقول إنها هتحصل؟ والهيكل هيتخرب والمدينة هتتحرق والدنيا هتخرب، محصلش حاجة! ده نبوخذنصر خد شوية في السبي وهيرجعوا تاني إن شاء الله، وإحنا زي الفل مفيش حاجة. مكانوش متوقعين الاهوال اللي هتحصل دي، فربنا بيقول: و" أُسَلِّمُهُمْ لِلْقَلَقِ وَالشَّرِّ فِي جَمِيعِ مَمَالِكِ الأرض عَارًا وَمَثَلا وَهُزْأَةً وَلَعْنَةً فِي جَمِيعِ الْمَوَاضِعِ الَّتِي أَطْرُدُهُمْ إِلَيْهَا." ومش بس كده،10وَأُرْسِلُ عَلَيْهِمِ السَّيْفَ وَالْجُوعَ وَالْوَبَأَ حَتَّى يَفْنَوْا عَنْ وَجْهِ الأَرْضِ الَّتِي أَعْطَيْتُهُمْ وَآبَاءَهُمْ إِيَّاهَا». قارنوا بين المصيرين، وبين السلتين، وبين الفريقين دول. الفريق الاولاني ربنا بيقول: عيني عليهم للخير. الفريق الثاني بيقول: أسلمهم للقلق والشر ويكونوا عاراً ومثلا وهزأة ولعنة وأرسل عليهم السيف والجوع....
اذا يقرر الله أنه هيعاقبهم بثلاثة ضيقات:
- السيف أي الموت.
- فقرهم الشديد وجوعهم حتى للطعام الضرورى.
- إصابتهم بالأمراض الشديدة عن طريق الأوبئة التي تضعفهم وتهلك بعضهم.
وبالضربات هيموتون مش هيستفادوا من وجودهم بأرض الميعاد، لأن الوجود بالأماكن المقدسة من غير السلوك بالقداسة لا يفيد.
⪢