⪡ 1الْكَلاَمُ الَّذِي صَارَ إِلَى إِرْمِيَا مِنْ قِبَلِ الرَّبِّ قَائِلاً: بيت الفخاري في بيت الفخاري يمكن ترنيمة "أيها الفخاري الأعظم" الترنيمة المعروفة دي واخدة الأفكار الرئيسية بتاعتها من إرميا 18. إرميا 18 إصحاح مهم في السفر وبيتكلم عن حاجة مفصلية في علاقتنا بربنا، يعني لازم تبقى معروفة لينا وراسخة في قلوبنا وفي أذهاننا، وإحنا في إيدين ربنا كالطين في يدي الفخاري.
الفخاري او ساعات يقولوا الفخراني.. دي حاجة كده مش عارف حد فيكم شاف فخاري قاعد شغال على الصلصال أو على الطين، المكنة اللي هو شغال عليها دي بيسموها الدولاب دي اللي تذكرت كمان في إرميا 18، وهو برجله من تحت بيقعد زي عجلة كده يدورها فوق القرص اللي فوق ده بيدور وعليه الصلصال. وفيما القرص اللي فوق بيدور و برضه قطعة الصلصال دي بتدور فهو بإيديه يقعد يشكل في قطعة الصلصال أو الطين دي. هو في ذهنه في خطة وفي رسمة لقطعة الطين دي حاجة أولى.
أما الحاجة الثانية، المكان اللي شغال فيه الفخاري بيسموه بيت الفخاري، وبيت الفخاري ده في الغالب بيبقى في حتة كده، يعني عايز أقول منحدرة شوية تكثر فيها المياه. وهو بيكون قاعد كدة عند باب دولاب اللي القاعد شغال عليه.
وساعات ممكن تبقى قطعتين كده يعني مش مش عجبه أوي أو حاسس إن فيها حاجة، فيقعد ينقي فيها شوية فيحطها على جنب وياخد قطعة ثانيه، فده المكان اللي شغال فيه بيسموه بيت الفخاري.
ربنا كلم إرميا وقاله الآتي.
2«قُمِ انْزِلْ إِلَى بَيْتِ الْفَخَّارِيِّ وَهُنَاكَ أُسْمِعُكَ كَلاَمِي». ربنا بتاعنا جميل، بيدي تشبيهات وأمثلة علشان إحنا نفهم. وتلاقيه شبه علاقته بينا بكذا تشبيه عشان يقرب المثل. يعني شبه علاقته بينا بالأب مع الأبناء عشان نفهم، ويشبه علاقته بينا بالفخاري مع الطين اللي شغال الفخاري بإيديه فيه عشان يشكل منه حاجة حلوة، يشبه علاقته برضه بينا بالعريس والعروس، علشان كل دي تشبيهات تقرب اللي ربنا عايز يقولهولنا. فربنا بيقول لإرميا: عايز أديك تشبيه علشان تقوله لبني إسرائيل فيفهموا. "قُمِ انْزِلْ." ... قم وأنزل، لأن بيت الفخاري غالبا كان في الوادي في مكان منخفض عشان يبقى في طين مناسب ومية مناسبة، ويقال إنه كان بجانب بركة سلوام، فربنا قاله: قم انزل.
الحقيقة دول كلمتين بس مهمين هنشوفهم.
"قُمِ انْزِلْ إِلَى بَيْتِ الْفَخَّارِيِّ وَهُنَاكَ أُسْمِعُكَ كَلاَمِي،" ... ربنا بيقوله روح لبيت الفخاري عشان أقولك كلمتين هناك، علشان لما يشوف الحاجة قدامه هيفهم كويس. راح إرميا سمع الكلام.
3فَنَزَلْتُ إِلَى بَيْتِ الْفَخَّارِيِّ، وَإِذَا هُوَ يَصْنَعُ عَمَلاً عَلَى الدُّولاَبِ. "الدولاب" ... الآلة بتاعة الفخاري. إرميا بسرعة دخل بيت الفخاري فلقى الراجل الفخاري الفنان ده قاعد يصنع عملاً على الدولاب، قاعد وشغال، رجليه شغالة وبتدور العجلة والقرص اللي فوق بيدور والطينة عمالة تلف مع القرص، وبيشكل في الطينة دي بإيديه وتلاقوا إيديه مليانة من الطينة، فحبة يضغط وحبة يسحب بإيديه الإثنين على الطينة وهكذا.4فَفَسَدَ الْوِعَاءُ الَّذِي كَانَ يَصْنَعُهُ مِنَ الطِّينِ بِيَدِ الْفَخَّارِيِّ، فَعَادَ وَعَمِلَهُ وِعَاءً آخَرَ كَمَا حَسُنَ فِي عَيْنَيِ الْفَخَّارِيِّ أَنْ يَصْنَعَهُ. لما راح إرميا إلى بيت الفخاري: لقاه يصنع آنية فخارية على الدولاب ثم لاحظ أن الإناء قد فسد، بس مقالش أن: الفخاري قد أفسده، لأن الفخاري ... يرمز إلى الله والآنية الفخارية ... إلى البشر الذين يفسدون حياتهم بأنفسهم بابتعادهم عن الله، ولكن الله بمحبته يعيد تشكيل الطين مرة أخرى ويُصلح الآنية التي فسدت فهي وإن فسدت، ولكنها ما زالت بين يديه، ولو تابوا ورجعوا لربنا يجدد طبيعتهم ويصنعهم آنية للكرامة بحسب مسرته وما يحلو في عينيه، كما جدد الجنس البشرى، بفدائه من خلال سر المعمودية.5فَصَارَ إِلَيَّ كَلاَمُ الرَّبِّ قَائِلاً: راح ربنا قاله: شفت يا إرميا؟ فقاله: شفت يا رب. قاله: طب هقولك بقى. 6«أَمَا أَسْتَطِيعُ أَنْ أَصْنَعَ بِكُمْ كَهذَا الْفَخَّارِيِّ يَا بَيْتَ إِسْرَائِيلَ، يَقُولُ الرَّبُّ؟ هُوَذَا كَالطِّينِ بِيَدِ الْفَخَّارِيِّ أَنْتُمْ هكَذَا بِيَدِي يَا بَيْتَ إِسْرَائِيلَ. شاف إرميا عمل الفخاري كوسيلة إيضاح، قال له الله: إنى أستطيع مثل هذا الفخاري أن أعيد تشكيلكم بعدما أفسدتم حياتكم بالخطية وأجددكم. ربنا بيدي رجاء لشعبه علشان يتوبوا ويرجعوا ليه فيعيدهم إلى بنوتهم الأولى له وحياتهم النقية.
ثق في قوة الله القادرة على تجديد حياتك مهما كانت خطاياك كثيرة أو متكررة، فهو أبوك اللي بيحبك وأنت دائمًا بين يديه فارجع إليه بالتوبة واطلب معونته فيصلح حياتك.
هو ده ربنا بتاعنا، الفخاري الجميل جدا، الفخاري الأعظم.
طب دلوقتي إحنا في أنهي مرحلة بقى في إيدين الفخاري؟ كل واحد على حسب المرحلة بتاعته، هل أنت لسه في مرحلة الدولاب اللي بيلف وإيدين الفخاري اللي عماله تضغط، ولا أبتدت الصورة تتشكل، ولا محطوط في الفرن عشان تثبت؟ كل واحد فينا بيمر بالـ 3 مراحل دول، لكن في النهاية بيطلع إناء جميل جدًا حسب قلب الفخاري.
طبعًا إذا كأنت العجينة مش لينة ومش سهلة، فالموضوع ممكن يطول شويه، لكن كل ما تكون العجينة نقية ولينه في إيدين الفخاري وسهلة تلاقوا الشكل يطلع بسرعة، الإناء يطلع بسرعة من تحت إيد الفخاري. لكن إذا قاومت العجينة يدي الفخاري وطلع فيها شوية حصا ولا طلعت عجينة خشنة شويه أو ما شابه، بتحتاج شغل أكثر من الفخاري فمنتعبش ومنتضايقش إذا كأنت يد الرب قد ثَقٌلَت على أحد مننا، نقول ده معنى كده إن إحنا قدام عينين ربنا وهو عمال يشكل فينا، دي حاجة حلوة مش حاجة وحشة. لكن المهم نقول: يارب، يعني إحنا هنجيلك بكل فسادنا، اصنع مننا آنية للمجد والكرامة، المهم متقولش العجينة دي فاسدة مفيش منها رجا وتطرحها من قدام وجهك.
7تَارَةً أَتَكَلَّمُ عَلَى أُمَّةٍ وَعَلَى مَمْلَكَةٍ بِالْقَلْعِ وَالْهَدْمِ وَالإِهْلاَكِ، يعني أمة خاطئة وربنا أصدر القرار إن الأمة دية لازم تتعاقب، لكن تحصل حاجه كده تغير القرار اللي ربنا خده.8فَتَرْجعُ تِلْكَ الأُمَّةُ الَّتِي تَكَلَّمْتُ عَلَيْهَا عَنْ شَرِّهَا، فَأَنْدَمُ عَنِ الشَّرِّ الَّذِي قَصَدْتُ أَنْ أَصْنَعَهُ بِهَا. "عن الشر " ... يعني العقاب.
طبعا التعبيرات عشان توصل لنا، ربنا بيستخدم بعض التعبيرات اللي نفهمها، "أندم" ... كأن ربنا بيقول طب أنا مش هعمل اللي أنا كنت قلت إني هعمله،
لو رجعت هذه الأمة عن سلوكها الشرير وتابت فالله، لا يعاقبها فالمقصود بالشر الذي كان سيوقعه الله بها أي عقابها.
9وَتَارَةً أَتَكَلَّمُ عَلَى أُمَّةٍ وَعَلَى مَمْلَكَةٍ بِالْبِنَاءِ وَالْغَرْسِ، 10فَتَفْعَلُ الشَّرَّ فِي عَيْنَيَّ، فَلاَ تَسْمَعُ لِصَوْتِي، فَأَنْدَمُ عَنِ الْخَيْرِ الَّذِي قُلْتُ إِنِّي أُحْسِنُ إِلَيْهَا بِهِ. الكلام ده ينطبق على مملكة يهوذا، ربنا خرجهم من أرض مصر بذراع رفيعة وعمل قدامهم أعاجيب، بحر إيه اللي يتشقق نصين ويمشوا في النص ده؟ وأردن اللي يتشقق ويمشوا برضه في النص؟ حاجه مش معقولة! وأزاح ملوك من أمامهم، وأزاح أمم من أمامهم، وفي الآخر أسكنهم في أرض الميعاد التي وعدهم بها.
وبعدين؟ بعد ما سكنوا واستريحوا جدفوا على قدوس إسرائيل وقالوا: "بطرقك لا نسر" مش عايزينك، فإيه اللي يحصل؟
"فَأَنْدَمُ عَنِ الْخَيْرِ الَّذِي قُلْتُ إِنِّي أُحْسِنُ إِلَيْهَا بِهِ. " ... إحنا كنا اتفقنا إن مشورة ربنا من جهتنا هي خير وصلاح، لو مشينا في طريقه هناخد الخير والصلاح ده، لكن إحنا إذا حيدنا عن الطريق وقلنا له: بطرقك لا نسر، ما تبعد عننا! خلاص، ربنا مش هيدي الخير والنعم والبركة التي أراد أن يحسن بها إلينا. كل واحد يسأل نفسه، أنا من أنهي نوع؟ من نوع نينوى اللي كان مصيرها الهلاك بس لما تابت ربنا قبلها ورجعها، ولا من نوع مملكة يهوذا وأورشليم التي أراد الرب أن يحسن إليها - وأحسن إليها بالفعل - ولكنها قالت له بطرقك لا نسر، مش عايزين طريقك، ابعد عننا.
11«فَالآنَ كَلِّمْ رِجَالَ يَهُوذَا وَسُكَّانَ أُورُشَلِيمَ قَائِلاً: هكَذَا قَالَ الرَّبُّ: هأَنَذَا مُصْدِرٌ عَلَيْكُمْ شَرًّا، وَقَاصِدٌ عَلَيْكُمْ قَصْدًا. فَارْجِعُوا كُلُّ وَاحِدٍ عَنْ طَرِيقِهِ الرَّدِيءِ، وَأَصْلِحُوا طُرُقَكُمْ وَأَعْمَالَكُمْ». امشوا في طريق الله وابعدوا عن طرق الشر.
ينذر الله شعبه بالعقاب لأجل خطاياهم، فصدرت قرارات إلهية بعقابهم لعلهم يخافون ويرجعون إليه فيرفع عنهم هذا العقاب.
ربنا يخطط ليهم للخير، بقت مشورة ربنا من ناحيتهم دلوقتي هي العقوبة، لازم يتعاقبوا عشان يفوقوا. ولكن لغاية أخر وقت ربنا يقول: "فَارْجِعُوا كُلُّ وَاحِدٍ عَنْ طَرِيقِهِ الرَّدِيءِ، وَأَصْلِحُوا طُرُقَكُمْ وَأَعْمَالَكُمْ." ... الآية دي بتتقال لكل واحد فينا النهاردة، فَارْجِعُوا كُلُّ وَاحِدٍ عَنْ طَرِيقِهِ الرَّدِيءِ، إيه الطريق الرديء اللي فيا يا رب اللي عايزني أرجع عنه؟ كل واحد فينا، أعتقد، يمكن مع الوقت يكون اتسلل جواه طريق رديء بأي شكل وبأي صور، ربنا يقول لكل واحد: يرجع عن طريقه الرديء، وَأَصْلِحُوا طُرُقَكُمْ وَأَعْمَالَكُمْ. لأن الطريق بقت وحشة، والأعمال بقت تشهد إن إحنا بقينا بعاد قوي عن ربنا. والحقيقة على رأي سيدنا البابا لما كتب في القصيدة بتاعته، "يشربون الإثم كالماء". الواحد، من كتر ما أتعود على الغلط بقى حاسس إنه حاجة طبيعية.
لكن شوفوا الشعب ده جاوب ربنا وقال له إيه؟
12فَقَالُوا: «بَاطِلٌ! لأَنَّنَا نَسْعَى وَرَاءَ أَفْكَارِنَا، وَكُلُّ وَاحِدٍ يَعْمَلُ حَسَبَ عِنَادِ قَلْبِهِ الرَّدِيءِ». "باطل،" ... ده كان ردهم علي ربنا، اللي أنت بتقوله ميهمناش، وبالنسبة لنا يعني ميخشش دماغنا بحاجة. "
لأَنَّنَا نَسْعَى وَرَاءَ أَفْكَارِنَا،" ... سيبنا إحنا نمشي اللي في دماغنا، تخيل الناس بتقول لربنا إيه؟
"وَكُلُّ وَاحِدٍ يَعْمَلُ حَسَبَ عِنَادِ قَلْبِهِ الرَّدِيءِ." ... هي دي مشكلة الإنسان، شايف إن الطريق ده غلط، بس هو مش قادر يرجع فبقى يقعد يخش في مناقشات عقيمة. وليه ده غلط؟ أنت من زمان مكنتش بتقول كده، بس لما اتعودت على الطريق ده ومبقيتش قادر تبطله فبقيت تقول: سيبونا كل واحد يمشي في عناد قلبه الرديء. كل واحد يمشي زي ما هو عايز، واللي عايزين شهوات وحاجات يقولوا: هو إيه الغلط في كده؟ هو في آيات بتقول إن ده غلط؟ ومثلا: ربنا يبعت بيبي لاسرة ، وهم مش عايزين حمل دلوقتي فيقولوا: طب وإيه المشكلة إن إحنا ننزله؟ ونقعد نتناقش ونعيد ونزيد، حاجة مش معقولة! الكلام ده مكنش قبل كده، أومال إيه اللي حصل؟ اللي حصل إن كل واحد يمشي على حسب عناد قلبه، وبعدين يقولوا هو ليه ربنا مضيق علينا كده؟ أنت زمان مكنتش بتقول كده بس أنت لما وسعت الطريق على نفسك وحبيت تمشي في طرق العالم، فحسيت إن أنت الدنيا خانقاك بقى وعلاقتك بربنا بقت خنقة.
13لِذلِكَ هكَذَا قَالَ الرَّبُّ: «اسْأَلُوا بَيْنَ الأُمَمِ. مَنْ سَمِعَ كَهذِهِ؟ مَا يُقْشَعَرُّ مِنْهُ جِدًّا عَمِلَتْ عَذْرَاءُ إِسْرَائِيلَ. فهنا ربنا يقولهم: "اسْأَلُوا بَيْنَ الأُمَمِ. مَنْ سَمِعَ كَهذِهِ؟" ... مين سمع باللي بيحصل ده؟ تخيلوا مقدار الاستعجاب والاستغراب اللي ربنا بيعبر عنه! ربنا بيشهد عليهم الامم اللي بيطيعوا الهتهم الوثنية.
"مَا يُقْشَعَرُّ مِنْهُ جِدًّا عَمِلَتْ عَذْرَاءُ إِسْرَائِيلَ." ... اللي يقشعر منه جدا، الحاجة الكريهة جدا اللي عذراء إسرائيل عملتها. ربنا حابب إسرائيل وبيشبهها بعذراء إسرائيل، يعني غالية على ربنا جدًا. يقول اللي عملته عذراء إسرائيل محدش عمله في الدنيا. أنتوا عارفين إيه أوحش حاجة عملتها عذراء إسرائيل؟ أنهم قتلوا القدوس البار، وقالوا: أصلبه! وأصلبه! دمه علينا وعلى أولادنا. لدرجة إن الشمس استخبت، والأرض تزلزلت، والصخور تشققت، الطبيعة مش مستحملة ما فعلته عذراء إسرائيل بإله وقدوس إسرائيل.
14هَلْ يَخْلُو صَخْرُ حَقْلِي مِنْ ثَلْجِ لُبْنَانَ؟ أَوْ هَلْ تَنْشَفُ الْمِيَاهُ الْمُنْفَجِرَةُ الْبَارِدَةُ الْجَارِيَةُ؟ الحته دي اترجمت بمعاني كتيرة بس ناخد اسهلها. ربنا بيقول حاجة طبيعية جدًا المفروض الواحد يتوقعها، لكن اللي حصل مع إسرائيل غير كده: المفروض الطبيعي جدا إن ماذا أرد للرب من أجل كثرة إحساناته؟ المفروض يردوا لربنا إيه؟ دول ردوا لربنا أعمال كريهة بالشكل ده، فربنا بيقول هنا:
"هَلْ يَخْلُو صَخْرُ حَقْلِي مِنْ ثَلْجِ لُبْنَانَ؟" ... عارفين إن جبال لبنان جبال عالية جدًا وفي أعلى الجبال دي في ثلج وخاصة جبل حرمون العالي أوي ده، فربنا بيقول: أعلى جبال لبنان فوق خالص على الصخر بيبقى في ثلج، ده حاجة طبيعية. فمعظم السنة، حتى لو الجبل نفسه مبقاش فيه تلج، القمة بتاعته بتبقى فيها تلج.
"أَوْ هَلْ تَنْشَفُ الْمِيَاهُ الْمُنْفَجِرَةُ الْبَارِدَةُ الْجَارِيَةُ؟" ... المياه الجارية دي مياه جارية علطول مبتنشفش، حاجة طبيعية. فربنا بيقول بقى اللي أنتوا عملتوه بقى حاجة غير طبيعية، تركوني أنا ينبوع المياه الحية وذهبوا يحفروا لأنفسهم أبارًا مشققة! حاجة مش طبيعية اللي عملوه ده.
فهنا ربنا بيعاتب شعبه: بأنه أحبه فأعطاه الماء في صورة الثلج على قمم الصخور في الجبال المرتفعة مثل لبنان وعندما يذوب الثلج يتحول إلى مياه جارية تجرى باستمرار وتسقى الإنسان والحيوان والنبات. فالله يعطيهم بركاته السماوية فلماذا لا يعبدونه ويشكرونه؟ لماذا تحولوا إلى عبادة الأوثان؟
15لأَنَّ شَعْبِي قَدْ نَسِيَني! بَخَّرُوا لِلْبَاطِلِ، وَقَدْ أَعْثَرُوهُمْ فِي طُرُقِهِمْ، فِي السُّبُلِ الْقَدِيمَةِ لِيَسْلُكُوا فِي شُعَبٍ، فِي طَرِيق غَيْرِ مُسَهَّل، "السبل القديمة " ... طرق الآباء الذين عاشوا مع الله وحفظوا وصاياه.
" شُعَبٍ " ... طرق ملتوية في الصحراء بين الجبال فيعسر المرور بها.
"غير مُسهل " ... طريق صعب لا يمكن السير فيه وهو طريق عبادة الأوثان والشر.
"الباطل" ... ده الأوثان.
"بَخَّرُوا لِلْبَاطِلِ." ... يسيبوني أنا ويروحوا يبخروا للأوثان.
"أعثروهم في طرقهم، في السبل القديمة،" ... الطرق بتاعتي اللي كانوا ماشيين معايا فيها، الآلهة الغريبة اللي بخروا ليها دي أعثرتهم وأسقطتهم.
"لأَنَّ شَعْبِي قَدْ نَسِيَني!" ... دي حاجة مش طبيعية خالص إن شعبه ينساه! كأن كل واحد فينا بينسى ربنا ويغلط بأي شكل،
وَقَدْ أَعْثَرُوهُمْ فِي طُرُقِهِمْ. الأوثان دي أعثروهم ووقعوهم في طرقهم، خلوهم يمشوا في طرق نجسة وطرق خاطئة." فِي السُّبُلِ الْقَدِيمَةِ،" ... أعثروهم في الطرق القديمة اللي كانوا ماشيين فيها والمفروض معايا لكن حادوا عنها. "لِيَسْلُكُوا فِي شُعَبٍ، فِي طَرِيق غَيْرِ مُسَهَّل." ... الكتاب بيقول طرق الله مستقيمة، يعني طريق واضح ومعروف لكن لما مشيوا بعيد عن ربنا، حبوا يمشوا يمين وشمال فالشعب تاه. وطبعا النتيجة إنهم هيطردوا من أرضهم إلى أرض غريبة، لأن هم بعدوا عن ربنا.
16لِتُجْعَلْ أَرْضُهُمْ خَرَابًا وَصَفِيرًا أَبَدِيًّا. كُلُّ مَارّ فِيهَا يَدْهَشُ وَيَنْغِضُ رَأْسَهُ. "صفيرًا أبديًا" ... موجودة كتير في كتب الأنبياء وبتدل على الخراب، منطقة فاضية خالص خالص ومش سامع فيها غير صفير كده، الرياح اللي بتيجي والهوا فتسمع صفير. ده معناها: خراب، لما يكون بيت مهجور واحد يخش فيه أي هوا كده ولا حاجة تسمع كأن صفير. "كُلُّ مَارّ فِيهَا يَدْهَشُ وَيَنْغِضُ رَأْسَهُ، " ... كل واحد يمشي ويبص على أورشليم، يهز براسه ويتعجب: يااااه دي أورشليم؟ فين أورشليم؟ 17كَرِيحٍ شَرْقِيَّةٍ أُبَدِّدُهُمْ أَمَامَ الْعَدُوِّ. أُرِيهِمِ الْقَفَا لاَ الْوَجْهَ فِي يَوْمِ مُصِيبَتِهِمْ». "أريهم القفا " ... اتخلى عنهم.
أصعب عقاب هو تخلى ربنا عنهم، فيبعد وجهه يعني هيسيبهم ومش هيرعاهم ويتركهم يعانون من الضيقات لأنهم رفضوا تبعيته ومُصرين على الطريق الغلط والعند، فتكون الضيقات عنيفة جدًا عليهم وهذا يرمز للعذاب الأبدي.
18فَقَالُوا: «هَلُمَّ فَنُفَكِّرُ عَلَى إِرْمِيَا أَفْكَارًا، لأَنَّ الشَّرِيعَةَ لاَ تَبِيدُ عَنِ الْكَاهِنِ، وَلاَ الْمَشُورَةَ عَنِ الْحَكِيمِ، وَلاَ الْكَلِمَةَ عَنِ النَّبِيِّ. هَلُمَّ فَنَضْرِبُهُ بِاللِّسَانِ وَلِكُلِّ كَلاَمِهِ لاَ نُصْغِي». مش يتوبوا يسمعوا الكلام؟ لا، قالوا طب يلا نفكر على إرميا أفكارًا. هيعملوا إيه؟ هيقول 3 فئات دلوقتي وهم القوة الكبرى في المجتمع، "لأَنَّ الشَّرِيعَةَ لاَ تَبِيدُ عَنِ الْكَاهِنِ،" ... "لاتبيد" يعني: لاتفارق، إحنا عندنا كهنة، يطلع لنا إيه إرميا ده؟ والكهنة نطلب منهم الشريعة، لكن ده ولا نعتبره كاهن ولا نعتبره حاجة.
"وَلاَ الْمَشُورَةَ عَنِ الْحَكِيمِ،" ... هو إحنا قولنا لك عايزين مشورة يا إرميا؟ عندنا الحكماء بتوعنا، أبعد عننا أنت.
" وَلاَ الْكَلِمَةَ عَنِ النَّبِيِّ،" ... أنت ولا كاهن ولا حكيم ولا بنعتبرك نبي، ده أنت بتتكلم باسم الله باطلاً وعقوبتك الموت، يعني عايزين يقولوا: مش عايزين إرميا! عندنا كهنة نطلب منهم الشريعة، عندنا حكماء هنطلب منهم من مشورة، عندنا أنبياء نطلب منهم كلمة الله. لكن أنت أنت ولا نبي ولا كاهن ولا حكيم وهنتخلص منك.
"هَلُمَّ فَنَضْرِبُهُ بِاللِّسَانِ وَلِكُلِّ كَلاَمِهِ لاَ نُصْغِي،" ... "نضربه باللسان" دي لها كذا معنى. نضربه باللسان: يعني يلا نشوه سمعته، ونجيبه الأرض. او معناها: نصطاد كلام من كلامه، ونقول: انه جدف، يستحق الموت. عايزين يصطادوه بكلمة
"هَلُمَّ فَنَضْرِبُهُ بِاللِّسَانِ وَلِكُلِّ كَلاَمِهِ لاَ نُصْغِي." ... هم قرروا مع نفسهم مش هيسمعوا لإرميا، فإرميا بقى رفع دعواه لربنا. جميل لما الواحد يلاقي الجو اللي حواليه صعب بالشكل ده والناس بتدبر ليه المكائد فيروح رافع قلبه لربنا ويقول:
19أَصْغِ لِي يَا رَبُّ، وَاسْمَعْ صَوْتَ أَخْصَامِي. ارميا بيستنجد بربنا: شوف يا رب خصومي بيقولوا ايه، أنا مش هعرف أجاوب، ولا أدافع عن نفسي ، ولا هعرف أعمل حاجة قدامهم. 20هَلْ يُجَازَى عَنْ خَيْرٍ بِشَرّ؟ لأَنَّهُمْ حَفَرُوا حُفْرَةً لِنَفْسِي. اذْكُرْ وُقُوفِي أَمَامَكَ لأَتَكَلَّمَ عَنْهُمْ بِالْخَيْرِ لأَرُدَّ غَضَبَكَ عَنْهُمْ. هنا ارميا النبي بيتعجب من: أن شعبه رد على محبته بالشر، لما كان بيقف قدام ربنا يطلب رحمة لشعبه، لكن هم فجازوا خيره بالشر وكانوا عاوزين يقتلوه.
المفروض الواحد يعمل خير فيلاقي خير، لكن تعمل خير تلاقي شر؟ ه"َلْ يُجَازَى عَنْ خَيْرٍ بِشَرّ؟" ... فأنت لو حصل معاك كده متستعجبش، أقف قدام ربنا وقول الكلمتين بتوع إرميا دول: "أَصْغِ لِي يَا رَبُّ، وَاسْمَعْ صَوْتَ أَخْصَامِي." ، بيتبلوا عليَّا وبيقولوا حاجات أنا معملتهاش.
"هَلْ يُجَازَى عَنْ خَيْرٍ بِشَرّ؟" ... ده أنا يا رب وأنت عارف كنت بقف قدامك واشفع فيهم وأقولك: يا رب معلش حن عليهم وسامحهم.
"لأَنَّهُمْ حَفَرُوا حُفْرَةً لِنَفْسِي." ... عمالين يحفروا حفرة عشان يوقعوا إرميا. "اذْكُرْ وُقُوفِي أَمَامَكَ لأَتَكَلَّمَ عَنْهُمْ بِالْخَيْرِ لأَرُدَّ غَضَبَكَ عَنْهُمْ." ... إرميا بيقول لربنا: طيب يعني يا رب هم نسيوا الخير ونسيوا إن أنا خايف عليهم وبحبهم، لكن أنت مش هتنسى. ياريت نعمل كده، حتى لو في ناس بتعمل فينا الأذية وبتأذينا نقف قدام ربنا عشان لما نقف قدام ربنا نقول: اذْكُرْ وُقُوفِي أَمَامَكَ لأَتَكَلَّمَ عَنْهُمْ بِالْخَيْرِ. متبقاش واقف قدام ربنا وبتقوله أنتقم منهم يا رب واعمل واسوي فيهم.
21لِذلِكَ سَلِّمْ بَنِيهِمْ لِلْجُوعِ، وَادْفَعْهُمْ لِيَدِ السَّيْفِ، فَتَصِيرَ نِسَاؤُهُمْ ثَكَالَى وَأَرَامِلَ، وَتَصِيرَ رِجَالُهُمْ قَتْلَى الْمَوْتِ، وَشُبَّانُهُمْ مَضْرُوبِي السَّيْفِ فِي الْحَرْبِ. "ثكالى " ... أمهات مات أولادهن.
ارميا النبي بيتكلم هنا بروح النبوة عن اللي هيحصل لشعبه، وليس بروح الانتقام او الغضب علشان كلامهم عليه وانهم كمان عاوزين يخلصوا عليه او ينتقموا منه. ولكن لأن أبوته واضحة طوال هذا السفر. فيتنبأ بموت الشباب والرجال وتصير النساء ثكالى وأرامل.
22لِيُسْمَعْ صِيَاحٌ مِنْ بُيُوتِهِمْ إِذْ تَجْلِبُ عَلَيْهِمْ جَيْشًا بَغْتَةً. لأَنَّهُمْ حَفَرُوا حُفْرَةً لِيُمْسِكُونِي، وَطَمَرُوا فِخَاخًا لِرِجْلَيَّ. حاول الشعب قتل إرميا بإسقاطه في حفرة أو إيقاعه في شباكهم ، وحاولوا يصطادوه بكلام أو محاولة قتله بأى شيء، لذا ينتقم الله منهم بعدله الإلهي فتهجم عليهم بابل، وتصدر صرخات من كل بيوتهم لموت الكثيرين منهم.23وَأَنْتَ يَا رَبُّ عَرَفْتَ كُلَّ مَشُورَتِهِمْ عَلَيَّ لِلْمَوْتِ. لاَ تَصْفَحْ عَنْ إِثْمِهِمْ، وَلاَ تَمْحُ خَطِيَّتَهُمْ مِنْ أَمَامِكَ، بَلْ لِيَكُونُوا مُتَعَثِّرِينَ أَمَامَكَ. فِي وَقْتِ غَضَبِكَ عَامِلْهُمْ. هنا ارميا بيطلب: العدل الإلهي لشرور شعبه لأجل مشورتهم فيعاقبون بالهلاك. وهذا ليس فقط نبوة لكن إعلان للشعب يمكن يتوبون، فيربح نفوسهم لأنه يحبهم.
كل مشوراتهم كأنت للموت والهلاك مش مشورة حلوة أبدًا، والشر يُميت الشرير، اللي يقعد يفكر بالشر وبالأذية يعرف إن الأيام هتلف والشر والأذية اللي فكر فيهم هترجعله تاني. لأن الناس دي فكرت بالشر والموت والأذية وكأنت كل أفكارهم كده فلفت الأيام وجتلهم.
لاَ تَصْفَحْ عَنْ إِثْمِهِمْ، وَلاَ تَمْحُ خَطِيَّتَهُمْ مِنْ أَمَامِكَ، بَلْ لِيَكُونُوا مُتَعَثِّرِينَ أَمَامَكَ. فِي وَقْتِ غَضَبِكَ عَامِلْهُمْ. البعض قال ممكن تكون يعني الحالة النفسية بتاعة إرميا فعلاً صعبة لأن ده إحنا شوفناه في سفر إرميا، قال في إرميا 15: 10، "وَيْلٌ لِي يَا أُمِّي لأَنَّكِ وَلَدْتِنِي إِنْسَانَ خِصَامٍ وَإِنْسَانَ نِزَاعٍ لِكُلِّ الأَرْضِ لَمْ أَقْرِضْ وَلاَ أَقْرَضُونِي، وَكُلُّ وَاحِدٍ يَلْعَنُنِي."
على أي حال من الأحوال إحنا هناخد القطعة الأخيرة دي اللي قالها إرميا إن هي قطعة تقرير مصير وتقرير حالة هتحصل للشعب ده، لكن محدش ياخد كلام إرميا ويقول إذا كان إرميا نفسه ضعف وقال كده ، معلش إحنا هنروح فين من إرميا، لا، مش هندعي على الناس، لكن هنتمثل بإرميا الجديد، ربنا يسوع المسيح الذي قال: «يَا أَبَتَاهُ، اغْفِرْ لَهُمْ، لأَنَّهُمْ لاَ يَعْلَمُونَ مَاذَا يَفْعَلُونَ»." (لو 23: 34).
⪢