⪡ 1فِي أَيَّامِهِ صَعِدَ نَبُوخَذْنَاصَّرُ مَلِكُ بَابِلَ، فَكَانَ لَهُ يَهُويَاقِيمُ عَبْدًا ثَلاَثَ سِنِينَ. ثُمَّ عَادَ فَتَمَرَّدَ عَلَيْهِ. في الوقت ده نبوخذ نصّر كان قائد للجيوش. لكنه أخد المُلك، وقدر يؤسس مملكة بابل.
واقتحم كل مدن العالم. وفي الوقت ده، كان اتجاهه ناحية مصر. علشان يأخدها ويستولي عليها.
وفي طريقه ناحية مصر، كانت موجودة مملكة يهوذا.
"فَكَانَ لَهُ يَهُويَاقِيمُ عَبْدًا ثَلاَثَ سِنِينَ." ... يهوياقيم، ده اللي كان عينه فرعون مصر، ملك علي مملكة يهوذا.
فكان يهوياقيم، شوية يميل لمصر. وشوية يخضع لمملكة بابل.
"ثُمَّ عَادَ فَتَمَرَّدَ عَلَيْهِ." ... يهوياقيم اتمرد علي مملكة بابل. مرضيش يدفع الجزية لنبوخذ نصّر.
في الوقت ده نخو ملك مصر، كان اتقتل. ومملكة بابل بقت هي المملكة الكبري في المنطقة.
وهنا هتبتدي أول مرحلة في السبي.
يهوياقيم الملك: اتمرد علي ملك بابل. وقاومه. لأن كان من الطبيعي أنه يدافع عن أرضه.
الغريبة أن الأنبياء مكانوش بيقولوا كده. وبالأخص ارميا النبي.
في جزء تاريخي في سفر ارميا النبي بيحكي الاصحاحين دول بالتفصيل.
ارميا النبي: وقتها راح ليهوياقيم ملك يهوذا، وقاله: السبي ده، ربنا كان واعد أنه هيجي، من ساعة ما بعدنا عن ربنا. و زوغنا بعيد عن ربنا، من أيام منسي الملك.
يوشيا الملك أبوك، هو اللي ربنا أنقذه من السبي. علشان كان ماشي مع ربنا.
لكن دلوقتي السبي جه أهو. وربنا بيقولك: استسلم للسبي. علشان الشعب ميتضرش. ولا المدينة تتحرق، ولا الهيكل يتحرق ويتخرّب.
فكانوا بيتهموا ارميا النبي بأنه خاين. لأنه قالهم استسلموا للأعداء.
والأنبياء الكذبة قالوا للملك: أن ارميا خاين. وأن ربنا لا كلمه ولا حاجة. ووقتها رموا ارميا النبي في السجن. ومنعوا الأكل والشرب عن ارميا النبي.
ارميا النبي كان بيبعت رسايل، وهو جوة السجن، علي ايد تلميذه باروخ النبي.
(نبوة باروخ النبي: في الأسفار القانونية التانية.
نبوة باروخ ، علشان يهوياقيم يرجع.
ارميا النبي كان بيبعت رسايل لباروخ علشان برده يهوياقيم.
وباروخ نفسه كتب رسايل منفصله، بوحي من الروح القدس.)
فكانت النبوات كلها عبارة عن: متخلوش الشعب يموت. متخلوش الهيكل والمدينة يتحرقوا. بلاش تتسببوا في خراب الهيكل.
استسلم يا يهوياقيم لملك بابل. لأن كل ده جزاء أفعالنا.
2فَأَرْسَلَ الرَّبُّ عَلَيْهِ غُزَاةَ الْكِلْدَانِيِّينَ، وَغُزَاةَ الأَرَامِيِّينَ، وَغُزَاةَ الْمُوآبِيِّينَ، وَغُزَاةَ بَنِي عَمُّونَ وَأَرْسَلَهُمْ عَلَى يَهُوذَا لِيُبِيدَهَا حَسَبَ كَلاَمِ الرَّبِّ الَّذِي تَكَلَّمَ بِهِ عَنْ يَدِ عَبِيدِهِ الأَنْبِيَاءِ. "فَأَرْسَلَ الرَّبُّ عَلَيْهِ" ... بمعني: أن ربنا هو اللي سمح وبعت ليهوياقيم، كل الأعداء دول.
كل الشعوب اللي حواليهم، هاجت علي مملكة يهوذا وملكها يهوياقيم.
ربنا كان أمر بتأديب مملكة يهوذا، بسبب كثرة شرورها وخطاياها.
وبعدوا عن ربنا. فربنا سمح أن يحصل عليهم تحالف من البلاد اللي حواليهم.
ولأنهم رفضوا ربنا له المجد، فربنا اتخلي عنهم. وده كان اتفاق ربنا مع شعبه من زمان.
وفي الفترة ديه، تم سبي 3023 شخص يهودي (ارميا 52: 28 ) . واتسبوا الي بابل.
" حَسَبَ كَلاَمِ الرَّبِّ الَّذِي تَكَلَّمَ بِهِ عَنْ يَدِ عَبِيدِهِ الأَنْبِيَاءِ." ... عبيده الأنبياء: المقصود بيه هو ارميا النبي. (القصة ديه موجودة تقريبا في سفر ارميا النبي بين اصحاح 22 و 32. وهي قصة تاريخية، في سفر ارميا النبي.)
3إِنَّ ذلِكَ كَانَ حَسَبَ كَلاَمِ الرَّبِّ عَلَى يَهُوذَا لِيَنْزِعَهُمْ مِنْ أَمَامِهِ لأَجْلِ خَطَايَا مَنَسَّى حَسَبَ كُلِّ مَا عَمِلَ. علشان الخطايا التي علَّمهم إياها منسى. ولو كانوا تابوا عنها، لقبلهم الله بالتأكيد. فالله طويل الأناة، لكنه لا يَقْبَلُ الخطية، ويؤدب ما دام الإنسان متمسكًا بها.
" خَطَايَا مَنَسَّى" ... كمان لما بيتقال منسي، مش بيبقي مقصود بيه هو كشخص فقط. لكن كمان المقصود بيه: عهد منسي. يعني: في العهد بتاعه، انتشرت الخطايا.
لدرجة أن يوشيا الملك الصالح، بعد كل اللي عمله من اصلاحات ونهضة روحية. لكن بمجرد موته، رجع الشعب والملوك اللي بعد يوشيا، لحالة الشر والخطية من تاني. زي ما كانوا قبل كده.
ولما ربنا اتخلي عنهم، علشان هما تركوا ربنا. ربنا سمح بتشتيتهم (تشتتوا). وفقدانهم لكيانهم، كدولة مستقلة.
4وَكَذلِكَ لأَجْلِ الدَّمِ الْبَرِيءِ الَّذِي سَفَكَهُ، لأَنَّهُ مَلأَ أُورُشَلِيمَ دَمًا بَرِيئًا، وَلَمْ يَشَإِ الرَّبُّ أَنْ يَغْفِرَ. وديه تورينا أن ربنا مش بينسي الظلم اللي اتظلمه أي شخص.
"وَلَمْ يَشَإِ الرَّبُّ أَنْ يَغْفِرَ." أية صعبة جدا. ربنا مش هيغفر الظلم اللي حصل. وسفك دم برئ.
وده نتيجة شرورهم وأعمال الظلم اللي كانوا عايشين فيه.
" وَلَمْ يَشَإِ الرَّبُّ أَنْ يَغْفِرَ." مش معناها: أن ربنا رفض أنه يغفر ليهم.
لكن معناها: أن الناس رفضت تتوب. مش عاوزين يتوبوا. وربنا صمم أن السبي والتأديب هيحصل.
فهما السبب في الحال اللي وصلوا ليه.
5وَبَقِيَّةُ أُمُورِ يَهُويَاقِيمَ وَكُلُّ مَا عَمِلَ، أَمَا هِيَ مَكْتُوبَةٌ فِي سِفْرِ أَخْبَارِ الأَيَّامِ لِمُلُوكِ يَهُوذَا؟ 6ثُمَّ اضْطَجَعَ يَهُويَاقِيمُ مَعَ آبَائِهِ، وَمَلَكَ يَهُويَاكِينُ ابْنُهُ عِوَضًا عَنْهُ. كل ما يخص يهوياقيم، مكتوب في سفر أخبار الأيام لملوك يهوذا. (و ديه أسفار كانوا بيكتبوها، بتحكي أخبار الملوك والحروب في أوقاتهم.)
وطبعا ده غير سفر أخبار الأيام الموجود في الكتاب المقدس.
ومات يهوياقيم واتدفن مع آبائه. وجه بعده يهوياكين ابنه.
ملك بابل كان قيد يهوياقيم، بسلاسل نحاس. وحب أنه يسبيه لبابل. بس ملك بابل غير رأيه. وقتله.
(ارميا 22: 19) "يُدْفَنُ دَفْنَ حِمَارٍ مَسْحُوبًا وَمَطْرُوحًا بَعِيدًا عَنْ أَبْوَابِ أُورُشَلِيمَ."
وكل ده بسبب شرور يهوياقيم. حتي شعبه لم يبكي عليه.
7وَلَمْ يَعُدْ أَيْضًا مَلِكُ مِصْرَ يَخْرُجُ مِنْ أَرْضِهِ، لأَنَّ مَلِكَ بَابِلَ أَخَذَ مِنْ نَهْرِ مِصْرَ إِلَى نَهْرِ الْفُرَاتِ كُلَّ مَا كَانَ لِمَلِكِ مِصْرَ. ملك مصر مبقاش بيقوم بغزوات تانية.
"لأَنَّ مَلِكَ بَابِلَ أَخَذَ مِنْ نَهْرِ مِصْرَ إِلَى نَهْرِ الْفُرَاتِ كُلَّ مَا كَانَ لِمَلِكِ مِصْرَ." ملك بابل استولي علي كل البلاد اللي حوالين مصر.
وزي ما اتذكر في الاصحاح اللي فات، أن مصر الفرعونية ضعفت جدا.
وملك بابل أخد من " نَهْرِ مِصْرَ" وهو نهر النيل. الي أن وصل لنهر الفرات.
وبعدها صارت مصر مملكة ضعيفة.
ربنا كان دايما بيحذر إسرائيل، من انهم يلجأوا لمصر للحماية فيها.
وهنشوف حتي بعد السبي، الناس كانت بتلجأ لمصر. وتستخبي فيها.
8كَانَ يَهُويَاكِينُ ابْنَ ثَمَانِي عَشَرَةَ سَنَةً حِينَ مَلَكَ، وَمَلَكَ ثَلاَثَةَ أَشْهُرٍ فِي أُورُشَلِيمَ، وَاسْمُ أُمِّهِ نَحُوشْتَا بِنْتُ أَلِنَاثَانَ مِنْ أُورُشَلِيمَ. هنا هيبتدي يتكلم عن يهوياكين بن يهوياقيم.
هنلاقي في اختلاف هنا عن سفر أخبار أيام التاني 36: 9. أن هنا بيقول أن يهوياكين مَلك في سن 18 سنة.
لكن في أخبار أيام التاني، قال أنه مَلك وكان سنه 8 سنين.
الحقيقة هو مش اختلاف. لأنه زي ملوك كتير، بيملك في فترة حُكم أبوه. يعني كان في فترة حُكم مشتركة بين يهوياقيم و ابنه يهوياكين، عشر سنين. لكن يهوياكين، بقي ملك مستقل، من بعد قتل يهوياقيم أبوه، علي ايد ملك بابل. وكان عنده 18 سنة.
( يعني مَلك مع أبوه لمدة 10 سنين.) .
وديه كانت خطة بيتبعها كتير من الملوك، أن أولادهم يملوكوا معاهم. علشان يدربوهم علي المُلك أثناء حياتهم. لأن كمان أوقات كانت بتحصل ثورات علي الملوك. أو أن أخو الملك هو اللي يملُك، لو الابن مش متسعد.
وأوقات تانية بتبقي للظروف الصحية للملك الأب، فيملك ابنه معاه. فبتكون في فترة حُكم مشتركة بين الأب الملك، وابنه.
"وَمَلَكَ ثَلاَثَةَ أَشْهُرٍ فِي أُورُشَلِيمَ، وَاسْمُ أُمِّهِ نَحُوشْتَا بِنْتُ أَلِنَاثَانَ مِنْ أُورُشَلِيمَ." وفترة حُكمه كانت 3 شهور. وبعد ال 3 شهور، حصل السبي.
9وَعَمِلَ الشَّرَّ فِي عَيْنَيِ الرَّبِّ حَسَبَ كُلِّ مَا عَمِلَ أَبُوهُ. ومشي في الشر زي أبوه يهوياقيم.
نلاحظ أن ربنا بيطول باله، للجيل التاني والتالت والرابع. ولو ظل الانسان عايش في شره، ورافض التوبة. ربنا يبتدي يضرب الضربة النهائية.
لكن لو في توبة، ربنا بيأجل العقاب والدينونة.
10فِي ذلِكَ الزَّمَانِ صَعِدَ عَبِيدُ نَبُوخَذْنَاصَّرَ مَلِكِ بَابِلَ إِلَى أُورُشَلِيمَ، فَدَخَلَتِ الْمَدِينَةُ تَحْتَ الْحِصَارِ. بعت نبوخذنصّر جيوشه وحاصر مدينة أورشليم. خلاص أورشليم دخلت تحت حصار بابل.
وده يوضح أن خلاص ربنا اتخلي عن شعبه بسبب شرورهم وعبادتهم للأصنام. ومش عاوزين يتوبوا ويرجعوا لربنا.
11وَجَاءَ نَبُوخَذْنَاصَّرُ مَلِكُ بَابِلَ عَلَى الْمَدِينَةِ، وَكَانَ عَبِيدُهُ يُحَاصِرُونَهَا. وبعدها وصل نبوخذ نصّر نفسه لأورشليم. وكان خلاص جيوشه حاصروها.12فَخَرَجَ يَهُويَاكِينُ مَلِكُ يَهُوذَا إِلَى مَلِكِ بَابِلَ، هُوَ وَأُمُّهُ وَعَبِيدُهُ وَرُؤَسَاؤُهُ وَخِصْيَانُهُ، وَأَخَذَهُ مَلِكُ بَابِلَ فِي السَّنَةِ الثَّامِنَةِ مِنْ مُلْكِهِ. يهوياكين ملك يهوذا، استسلم هو و أمه وعبيده وكل اللي معاه في القصر.
خاف يهوياكين من اقتحام ملك بابل لأورشليم. و ان جيش بابل يدمر أورشليم. ويقتلوه هو وكل اللي معاه. ففضل أن يحصل استسلام.
"وَأَخَذَهُ مَلِكُ بَابِلَ فِي السَّنَةِ الثَّامِنَةِ مِنْ مُلْكِهِ." ملك بابل أسر الملك وكل اللي استسلموا معاه. وأخدهم علي بابل.
وحصل سبيهم في السنة الثامنة لمُلك نبوخذنصّر.
13وَأَخْرَجَ مِنْ هُنَاكَ جَمِيعَ خَزَائِنِ بَيْتِ الرَّبِّ، وَخَزَائِنِ بَيْتِ الْمَلِكِ، وَكَسَّرَ كُلَّ آنِيَةِ الذَّهَبِ الَّتِي عَمِلَهَا سُلَيْمَانُ مَلِكُ إِسْرَائِيلَ فِي هَيْكَلِ الرَّبِّ، كَمَا تَكَلَّمَ الرَّبُّ. وده كان السبي الأول الكبير.
"وَأَخْرَجَ مِنْ هُنَاكَ جَمِيعَ خَزَائِنِ بَيْتِ الرَّبِّ، وَخَزَائِنِ بَيْتِ الْمَلِكِ،" ملك بابل أخد كل حاجة موجودة في خزائن الهيكل. وكل اللي في خزائن بيت يهوياكين.
"وَكَسَّرَ كُلَّ آنِيَةِ الذَّهَبِ الَّتِي عَمِلَهَا سُلَيْمَانُ مَلِكُ إِسْرَائِيلَ فِي هَيْكَلِ الرَّبِّ،" كسر الأواني الذهب اللي كان عاملها سُليمان. (أنية الذهب: زي مذبح البخور – مائدة خبز الوجوه. لأن الأواني الصغيرة كان أخدها قبل كده نبوخذنصّر في السبي الأول. وديه الأواني اللي شرب فيها حفيده بيلشاصر. مذكورة في داينال 5). والأواني ديه كانت رجعت مع زربابل، في العودة من السبي لأورشليم.
"كَمَا تَكَلَّمَ الرَّبُّ." وبكده يكون اتحقق كلام ربنا، اللي قاله اشعياء النبي، لحزقيا الملك، لما خلي البابليين يشوفوا كل اللي عنده في الهيكل وفي بيت ربنا. ووخلاهم يشوفوا كل حاجة عنده. واشعياء النبي قاله: كل ده هيتأخد منك. وده حصل بعد ما صلي لربنا. وربنا أطال في عمره 15 سنة تاني. (2مل 20: 17).
وبكده يكون نبوخذنصّر أول حاجة عملها، أزال المجد اللي كان في الهيكل. عن طريق أنه أزال الذهب، اللي كان في الهيكل، وأخد الذهب اللي علي الأواني. وأخده كله علي بابل.
14وَسَبَى كُلَّ أُورُشَلِيمَ وَكُلَّ الرُّؤَسَاءِ وَجَمِيعَ جَبَابِرَةِ الْبَأْسِ، عَشَرَةَ آلاَفِ مَسْبِيٍّ، وَجَمِيعَ الصُّنَّاعِ وَالأَقْيَانِ. لَمْ يَبْقَ أَحَدٌ إِلاَّ مَسَاكِينُ شَعْبِ الأَرْضِ. "الأَقْيَانِ." يعني الحدادين. جمع حداد.. ملك بابل أسر عظماء أورشليم. وكان عددهم 10 ألاف.. أخد خيرة شعب الأرض: الصُناع – المهرة – الرؤساء، واللي كان منهم دانيال النبي والتلات فتية. (اتاخدوا في السبي الأول.)
وأخدوا كمان حزقيال النبي. لأنه كان شاب. ومجرد ساب في أورشليم الناس البسيطة. وكل ده علشان يخلي مدينة أورشليم ضعيفة. ومحدش يقدر يعمل ثورة علي ملك بابل.
وسابوا ارميا النبي، لأنه كان راجل كبير في السن. مفيش خوف منه.
15وَسَبَى يَهُويَاكِينَ إِلَى بَابِلَ. وَأُمَّ الْمَلِكِ وَنِسَاءَ الْمَلِكِ وَخِصْيَانَهُ وَأَقْوِيَاءَ الأَرْضِ، سَبَاهُمْ مِنْ أُورُشَلِيمَ إِلَى بَابِلَ. يهوياكين ملك يهوذا وكل اللي معاه، اللي استسلموا، راحوا مسبيين علي بابل.16وَجَمِيعُ أَصْحَابِ الْبَأْسِ، سَبْعَةُ آلاَفٍ، وَالصُّنَّاعُ وَالأَقْيَانُ أَلْفٌ، وَجَمِيعُ الأَبْطَالِ أَهْلِ الْحَرْبِ، سَبَاهُمْ مَلِكُ بَابِلَ إِلَى بَابِلَ. ملك بابل سبي كل الأقوياء وأصحاب المهن وكل أبطال الحرب، سباهم الي بابل.
يهوياكين فضل مسجون في بابل حوالي 37 سنة.
17وَمَلَّكَ مَلِكُ بَابِلَ مَتَّنِيَّا عَمَّهُ عِوَضًا عَنْهُ، وَغَيَّرَ اسْمَهُ إِلَى صِدْقِيَّا. ملك بابل: خلي متنيا، عم يهوياكين، هو اللي يكون الملك علي أورشليم. لأن يهوياكين، اتسبي علي بابل.
وملك بابل غيّر اسم متنيا، الي صدقيا. وتغير الاسم معناه: أن ملك بابل هو اللي مسيطر عليه. وليه الفضل عليه. وأن لازم متنيا اللي هو صدقيا، يتبع ملك بابل.
متنيا: ده ابن يوشيا الملك الصالح.
يهوآحاز بن يوشيا الملك. وبعده جه يهوياقيم بن يوشيا. وبعده يهوياكين بن يوشيا.
دول 3 اخوات. هما أولاد يوشيا الملك.
18كَانَ صِدْقِيَّا ابْنَ إِحْدَى وَعِشْرِينَ سَنَةً حِينَ مَلَكَ، وَمَلَكَ إِحْدَى عَشَرَةَ سَنَةً فِي أُورُشَلِيمَ، وَاسْمُ أُمِّهِ حَمِّيطَلُ بِنْتُ إِرْمِيَا مِنْ لِبْنَةَ. كان عُمر صدقيا 21 سنة، لما مسك حُكم مملكة يهوذا. وكان ملك لمدة 11 سنة.19وَعَمِلَ الشَّرَّ فِي عَيْنَيِ الرَّبِّ حَسَبَ كُلِّ مَا عَمِلَ يَهُويَاقِيمُ. وكالمعتاد مشي في طريق الشر. 20لأَنَّهُ لأَجْلِ غَضَبِ الرَّبِّ عَلَى أُورُشَلِيمَ وَعَلَى يَهُوذَا حَتَّى طَرَحَهُمْ مِنْ أَمَامِ وَجْهِهِ، كَانَ أَنَّ صِدْقِيَّا تَمَرَّدَ عَلَى مَلِكِ بَابِلَ. صدقيا الملك، مكتفاش بعمل الشر. وتضليل الشعب. لكن كمان اتمرد علي ملك بابل.
وعلشان كده ملك بابل أخده أسير. وقتل أولاده قدام عنيه. وبعدين فقعوا ليه عنيه الاتنين.
صدقيا الملك: كان شخصية صعبة جدا.
كان بيحب ارميا النبي. وبيسمع كلام ارميا النبي. وعارف أن كلامه صح. وعارف أن ربنا له المجد هو اللي صح.
لكن مشكلته: أن كان بيخاف الشعب. واللي كانوا معاه في القصر الملكي.
ارميا النبي: قاله خليك خاضع لملك بابل. لأن ده تأديب من ربنا. واقبل التأديب ده. لكن كل الي حواليه في القصر قالوله: متصدقش ارميا. ده خاين. معندهوش وطنية.
وقالوله: أنه يتمرد علي ملك بابل، ويثور عليه.
صدقيا الملك كان محتار يسمع لمين. مع أنه عارف كويس جدا أن كلام ارميا صح. ومن عند ربنا.
- وفي يوم من الأيام، الناس اللي حوالين صدقينا الملك في القصر، حبوا انهم يتخلصوا من ارميا النبي. فأجبروا صدقيا الملك، أنه يرمي ارميا النبي في جُب (بير)، علشان يموت.
وبعد ما رموه في الجُب، ارميا النبي صعب علي صدقيا الملك. وصدقيا بعت ناس ينقذوا ارميا من الجُب. وطلعوه من الوحل والطين اللي كان فيه. لأن الجب كان قديم، ومليان وحل.
- وهي ديه كانت مشكلة صدقيا الملك. كان متردد. مكانش عارف يعمل ايه.
- عارف أن كلام ارميا النبي صح، وأنه من عند ربنا له المجد. لدرجة أنه يستدعي ارميا النبي سراً، ويقوله صلي لي. وشوف ربنا هيقولك ايه علشاني في الموضوع الفلاني. وارميا النبي فعلا يوصله كلام ربنا.
وبعد كده يرجع تاني يخاف من الشعب والرؤساء اللي حواليه.
وكانت النتيجة دايما: أنه يعمل عكس كلام ارميا النبي.
⪢